KAN INLUAH HNUHNUN BER KHA

 KAN INLUAH HNUHNUN BER KHA

Ziaktu : Aaron Malsawmdawngzuala

(True incident)

Tuna ka rawn sawi tur hi thil thleng tak tak a ni a, a tawngtu ngeiin min hrilh a ni. A ngaihnawm deuh nan keima tawn angin ka han sawi mai ange....

******************

Mi in luah a insawm kual reng thin kan ni a, tuna kan inhrang chanchin ka sawi tur pawh hi tuna kan in luah meka kan insawm hmaa kan luah kha a ni. In luah in insawn kual reng mah ila vengchhung chu kan chhuahsan ngai lo, mahse hethil kan tawn atang hian kan vengah nilo, veng dangah kan insawn phah hial a ni.

Kan in luah lai chu concrete niin a chung leh hnuai a awm a, a chung zawkah hian a neitu te an awm a keinin a hnuai kan luah thung a,  a zau tha angreng khawp mai. Kawngka pui bakah hian sitting room lamah varanda chhuahna tur kawngka dang a awm leh bawk a, inchhung luh chiah hian sitting room a lo awm nghal a, chhak lamah choka a awm a, choka bul ah ka room a awm leh a, ka room piah ah ka u te room a awm leh bawk a ni. 

Ka u te room thlang chiah chu ka nu leh pa te room a ni leh a, choka ah hian bathroom pakhat a awm a, ka nu leh pa room ah pakhat a awm leh bawk. Ka u te room ah chuan kawmchar chhuahna turin kawngka a awm leh bawk a. Hetih lai hian ka u chu Aizawla an post lai a nih avangin kan la awm ho vek a, kan chhungkua chu ka u fa te 2 nen kan vaiin pasarih kan ni. 

Kan in neitu te hi kan sawi leh lawk anga, anni hi chhungkaw member 4 an ni a. Nupa an ni a, fa pahnih, mipa leh hmeichhian an nei a ni. An fanu hi kan hriat dan chuan vanduai thil avangin depression nasa takin a nei thin a ni awm e, an in hnuai a kan awm hma chuan anmahni chhungkua hian an luah thrin a, ka room chu an fanu room hlui a ni thin. Hei hi kan han sawi tel kher nachhan chu, vawikhat an fanu chu a pa nen an in bak kaih deuh hlek vangin a hau chiam2 mai a, a pa chu chem a vih a tum ta mai a, a nu mangang in min rawn pun vat a, kei leh ka pa leh ka nu leh ka u mipa te nen kan tlan chho nghal a ni. 

Kan han thlen chhoh chuan a nau mipa chuan alo dawm bet a, mahse a dawm hneh meuhlo. A pa lah mahni tawk a mipa in ti chi alo ni ve bawk nen, a fanu in chutia thah a han tum chu tlanchhiat a lo tum bik hauh lo. Tichuan an fanu chu beng daih tumin kan han thlem a, mahse min ngaipawi mawh lo hle mai.

Kan theihtawp chhuah a kan han man beh pawh khan a tal vak vak a, a awrawl tawp tawpin a au va. Mak ka tih em em chu tikhawp khan mi puitling rual thah in kan manbet kha ania, ani hmeichhia lehnghal kha kan man bet zo lo lek lek. A chak zia mai chu, a chemte hum lai pawh kan laksak thei hram a ni. 

An fanu hi ka hmuhsit vang nilo se, hetia a rilru a buai hnu hian a intifai ngai lova, a inbual duh ngai ta hauh lo. A rimchhe thei em em a, a bula awm pawh a hrehawm thei thin khawp mai. An sawi dan chuan zanlaiah hian a nu leh pate room lamah ngawi rengin ava phei thin a, a nu leh pate mu lai chu a en reng thin a ni awm e. 

Ahma chuan veng dangah an chhungkua hian an awm thin a, tuna an in hi chu midang an luah tir thin. Khatih hunlai khan tuna kan luah lai mek hi ka hmelhriat te ngei pawhin an luah tawh a, hethil rapthlak tak ka tawn hnu hian ahmaa lo luah ve tawh thin ka hmelhriatte chu thil hlauhawm leh danglam deuh an tawn ve leh veloh thu te chu ka zawt hial a, mahse engmah an tawn ngailoh thuin min chhang vek. 

***************

Zankhat chu choka lama tui inherh haw ri hi ka hria a, kan monu a inthiar dawn a nih ringin engah vak ka ngai lo. Mahse a rei deuh va, tui chu a chang leh a inherh tawp a, a herh haw leh a, tiang chuan a awm char char mai a. Bungbel te chu a ri leh rek thin a, mahse kan inluah ah hian sazu ka hmuh zeuh zeuh avang chuan sazu a nih ka ring hmiah zel. Hemi zan hi thawm ka hriat tanna chu a ni a, mahse a zankhatna ah hi chuan ka hlau eih lo. Ngaihthatlohna pawh ka nei lo, ka chhungte pawh ka hrilh lemlo bawk.

Ka u hi office a rawn ban veleh hian badminton a khel ziah a, dar 6-7 inkar ah hian alo haw tlangpui thin a, chaw chu kan lo eisan mai zel. Tlai khat chu ka nu choka ah a awm a, keiin TV ka en a, kan monu leh a fate chu an roomah an awm thung a, ka pa erawh alo la haw lo. Ka u chu a inkhelh thawmhnaw nen chuan a rawn haw a, a chauh hmel kher mai.

An room ah chuan a lut tlang a, "I u hi biak duhna ka nei tak e, ka hriatchhuah lai hian ka han titi pui lawk teh ang." tiin an roomah chuan a zui lut nghal a. Ka nu chu reilo teah a lo chhuak leh a, a hmel atang chuan thil diklo a awm tih ka man thiam nghal. "Tinge ka nu? In va inbe reilo ve.." ka lo ti a.

Ka nu chuan hrilhhai hmel zet hian min en a, "A awmlo a ti...an nu ka va zawt a, a lo lut lo a ti." a ti ta mai a. "Ava mak awm ve, bathroom lamah a lut tlang a nilo maw?" ka lo ti vat a. Mahse ka nu chuan, "Roomah a luh tlang kha, nangpawn i hmu ve anilawm ni?" a han ti leh a. "Hmu e, a lo haw reng kha." tiin ka lo chhang a. Chiang takin ka nu nen khan ka u lo haw lai kha kan hmu a, mahse chutia a bo lehnghal mai chuan min ti hrilhhai takzet. Ka u chu a thiante inah chaw a ei tlang dawn hi a lo ni a, hemi zan pawh hian dar 8 velah a lo haw ve chauh a ni.

**********************

Vawikhat leh pawh ka nu nen kan pahnih chiahin inah kan awm a, ka room ah ka awm a, ka nu pawh an roomah a awm ve bawk a. Kawngka kik ri kan hria a, "In awm em?" ti ri kan hre zui nghal bawk a. "Lo lut rawh.." tiin ka nu chuan a lo chhawn vat a. Ka nu chu ava chhuak phei nghal a, "Tunge ni a, ka nu?" tiin ka awmhmun atang chuan ka han zawt a.

"Ka hrelo, tumah an awm lo." a rawn ti a, room atang chuan ka chhuak ve ta nghal a. Kan hawikual a, pawnah te chuan kan chhuak a, lehlam kawngka ah ka chhuak ve nghal bawk a. Kan inkawt a chhuah chiah hian kawngpui chu a lang nghal vek a, rawn kik tu kha kal lehnghal pawh nise kan hmuhman dawn chiang lutuk. Mahse tumah kan hmulo, kawngpui lah chu a reh hian a reh diak mai si. "A hrang aniang.." tiin ka nu nen chuan kan nui vel ta mai mai ringawt.

***********

Kan inluah neitu te chu Lunglei ah an zin a, kan inah chahbi an dah a, engemaw thut awm pawh nise kan lo han ngaihven theih nan an ti a ni. Ni khat chu an choka a an hun, an showcase tlu ri thuai thawm kan hre ta a, ka pa nen chuan kan tlan chho nghal vat a. Kawngka chu kan han hawng a, mahse engmah tlu a lo awm lo.

Inchhung chu a lo felfai em em a, a reh ruih mai bawk a. Kan thenawm ami, U Maseni te nufa pawh an rawn dak a. "Mate..enge tlu ri thuai kha?" a rawn ti a. Ka pa chuan, "In lo hre ve ami? Showcase tlu ri niawm tak kan hria a, mahse kan han en a, hei engmah a lo awm leh bawk si lo a nih hi." a lo ti ve bawk a. Kan chhungkua chauh khan kha thawm kha kan hrelo, kan thenawmte pawhin an lo hre ve reng. Mak kan ti em em a, mahse eng thawm mah chu kan hre zui tawh chuang lo.

Ni 4 a liam leh hnu chuan kan inluah neitute pawh chu an lo haw ve ta a, an pa ber chuan chahbi a rawn lam a. Ka nu chuan an pa ber chu kan thawm hriat te chu  ahan hrilh a, mahse hlau hmel pawh a pu lo. A inthlhrun hmel em em a, a zah hmel hle bawk. Thawm an lo hre fo thin tawh anga, ngaiah an nei tawh aniang te kan ti ta vel mai mai a.

******************

Ka khum bul chiah chhuatah ah hian polythene-in ka lehkha bu vel ka dah thin a, ka sawi tak ang khan ka room bul chiah hi choka a ni ka tih tawh kha. Zantin mai hian polythene chu mihringin a rap ri ang hian a ri reng mai thin a, mak ka ti thei khawp mai. Sazu an nih chu ka la ring fan a, hlauhawm lamah pawh ka ngai ngai lo.

Zankhat chu ka ning ta deuh a, light off thim veka mu thin ka nih avang chuan engmah chu ka hmu ngai chuang lo. En pawh ka tum ngai lem lova, a ri reng chu ka ning em em zawk. En mang hlei lo chuan, "A ninawm, a bengchheng.." ka han ti vak ringawt a, a reh ve hmak tho. Light pawh ka on lem chuang lo, mahse khatia ka hauh tak hnua a reh ve hmak kha chu mak ka ti khawp mai.

Hetih hunlai hi 2009 kum vel kha niin ka hria, mizote chuan FB kan khawih tan kum vel kha nia. Youtube ah thlahrang thawnthu ngaihthak tur ala awm ngai lova, FB-a thlahrang thawnthu group-a chhiar kha a nimai. Zan mut tawh hnuah light off vekin ka chhiar thin a, ka huai em em vang pawh nilovin ka hlau ngai lemlo, thlahrang thawnthu chhiar kha ka atchilh ve hrim hrim a ni.

**********************

Thawm ka hre hnem ta malh malh bawk a, hlauh enah pawh ka en tawh lo. Mi a ti na ngai lova, thawm chiah a nei thin. Zankhat phei chu thlahrang thawnthu ka chhiar lai tak hian ka thosilen chu a rawn che luih a, ka beng bulah hian mihring thaw ri huam huam ka hre nghak bawk. Ka phu nasa lutuk khan ka phone ka la vawr vak zui, mahse ka hlau chuang miah lo.

Chutah a la duhtawk lo cheu aniang chu, ka thosilen chungah chuan a rawn thu amaw tih mai tur hian thosilen chu a rawn hniam vak mai a, ka lo en vung vung ringawt. Ka naupan tet lai atang khan ka nu hian thlahrang thawnthu hi min hrilh nasa a, chuvang chu a ni mahna, nge ka at huai ve vang hrim hrim zawk pawh ka hrelo, han hlauh em em kha ka nei ngailo hrim hrim. 

***************

Zankhat FB-a thlahrang thawnthu ka chhiar leh chu zandang ka ang ta hauh lo, ka hlau ve ta riau mai. Thenkhat chuan inlo chhiar ve tawh maithei a, Taxi driver thil tawn kha a ni. Ka thauvah min man ve tlat mai a, ka inlukhup tawp. Ka thlan zawih zawih a, ka chhiar laklawh bawk si.

Chutah ka inlukhup lai chuan tu emawni hian min rawn th(r)ut ta mai a, ka thlarau a thlawk chhuak lo chauh. Ka hlau lutuk chu ka khawng vek mai a, au pawh ka au chhuak thei lo. Mahse min delhtu chu a tho va, ka thaw huai mai. Mahse ka la che ngam mai lo, tawng pawh ka la tawng chhuak ngam chuang lo.

Ka maimitchhing vang vang a, thih leh thih tiin ka zuang tho lawp a. Plug awmna lam ni ngeia ka hriat lam chu pan pheiin ka petek phei nawk nawk a, ka mit ka la meng ngam chuang lo. Light chu ka va in fuh ve mai a, ka meng ta. Mahse ka room chu a reh vek a, tumah ka hmu lo. Hemi zan hian ka mu leh tawh lo hrim hrim a, ka tlaivar thak a ni.

A tukah chuan ka pa hnenah plug awmna chu sawn hnaih ka dil a, ka khum bul chiah a dah turin ka ngen a. A chhan min zawt a, mahse ka sawi duh lo. Chhuanlam eng engemaw ka siam hnu chuan a remti ve mai a, ka khum bul chiah ah chuan min sawn sak ta nge nge a. Chuta tang chuan thawnthu ka chhiar reng rengin light ka off ngam ta biklo, ka chhiar rei deuh leh tlaivar thak ten ka on ta thin a ni.

*****************

Ka u fapa hi hetih lai hian kum 3 mi chauh a la ni a, thim hi a hlau em em a. Current a rawn thim thut te hian a bul hnaia kan awmloh chuan a tap vak zel mai thin a ni. Zankhat chu computer ah movie ka en a, ka lo entui deuh nge ni, zing dar 1:30 ah pawh chuan ka la mu phal lo.

Chutia tui taka ka en lai chuan sitting room lama naupang tlan ri niawm tak chu ka hre ta a, ka vahpa a nih ringin, "Bawihtea chu a lo tho chhuak amawni le? Ani leh nilo anga thim hnuaiah te a rawn tlan ter ter mai le.." tiin ka rilru chuan ka inbe mawlh mawlh a. Kan mut tawh hnu hi chuan inchhung light zawng zawng hi kan off mai zel a, chutia light on miah lova thawm a nei chu mak ka ti angreng hle.

Ka room light erawh movie ka la en avangin ka la on reng a, a lo luh mai ka ring a, mahse a rawn lut miah bawk silo. A tlan ri leh vak vak zel a, ka ngaih chu a tha ta hauh lo mai. Room atang chuan ka chhuak a, light ka han on eng a. Mahse tumah an awmlo, a lo reh diak mai. Ka u te roomah chuan ka han dak dek dek a, Bawihtea chu a nu khan awr awr chung chuan tui takin a lo mu hnar bawrh bawrh mai a.

Ngawi rengin ka roomah chuan ka let ve leh mai a, "Bawihtea a nih kha ka ringlo rengah.." tiin ka phun phei nuah nuah a. Tlan ri pawh chu a reh nghal daih a, movie chu ka enchhunzawm leh a. Inhiat ri vak vak thawm ni awm tak hi ka hre leh a, mahse ka ngaihsak lo lui a. Movie chu ka en zawm zel a, engtik lai khan nge thawm kha  areh ka hre ta mai lo.

***************

Nikhat chu ka nute room ah puan ka thui a, ka nu chuan TV a en a. Ka room atang chuan thil tla ri hi kan hria a, a thawm atang chuan calendar tarlai thli in a chhem thla ni ngeiin ka hria. "Mami, calendar i ti tla em ni?" tiin ka nu chuan min rawn zawt ve ta ngei bawk reng a. "Aih, inroomah ka awm...hei khawl ka khawih, puan ka thui." tiin ka lo chhang a.

Ka nu chu rawn lutin, "Ehe, i roomah i awm emaw tia? Tun lawk khan i roomah lehkha thlawk thla ri niawm tak ka hria a, i lehkhabu vel i dah fello a nilo maw?" a rawn ti a, ka chhang lem lo. A chhuak veleh mai a, ka room lamah chuan ava lut a. A rawn let leh a, "I roomah sawn Calendar i tar em khah?" a rawn ti leh a, mahse ka chhan hma hma chuan a chhuak leh daih.

 

*************

Bawihtea hi apa in keyboear lem tereuhte, battery hmang a leisak a. A ngaina em em a, a khal mual mual reng zel. A keyboard lem hi current hmang thei tho ang chi kha a ni bawk a, battery ka vuahsak ngai lemlo. A khalh duh hi chuan current ah kan connect sak mai zel a, a hlimpui ve thei em em tho.

Zankhat chu bawihtea keyboard chu a rawn ri tut tut mai a, ka room atang chuan ka lo hre ve thei a. Keyboard chu ka u te steel almirah ah a awm kha a ni bawk si a, an dah luh lai pawh ka hmu ve ngei kha ania, mak ka ti khawp mai. Keipawh chu ka va phei ve a, ka u te pawh chuan keyboard chu an lo la chhuak miah lo.

Almirah chhung atanga lo ri ngei a ni, ka u chuan a la chhuak a. "Wire vel kal dik loh vang a niang.." tiin a dah lut leh mai a, mahse mak ka tih em em chu battery kan vuah silova, current nen kan connect chuang bawk silo chunga a rawn ri kha mak ka ti takzet. Engthil mah chu kan hre zui lemlo, kan mu ve leh ta mai a.

******************

A tuk chhunah chuan kan monu chu room-a a awm laiin keyboard chu a mahin a rawn intum ri leh ta a, kan monu lah dawih chi a ni bawk nen, a hlau khawp mai. Hemi hnu hian keyboard chu a ri ta fo mai a, chhunah a ri bawk a, zanah a ri bawk. Ka pa ngaih tha lo chuan nikhat chu, "A chhung hi kan ahwng reng reng teh ang, enge maw awm ni..battery te hi a lo invuah reng a nilo maw?" tiin keyboard chu a han la a.

Chutia ka pa in keyboard a han lek kual vel lai chuan a rawn ri leh ta a, kan phu nasa teh asin. Mak ka tih em em nachhan chu keyboard kha amahin a inhmet tlum ngei a, chiang takin ka hmu a ni. Ka pa chuan an room lamah a keng phei a, steel almirah-a dah pah chuan, "Nakinah a zuartute zawh tur a ni, wire kal sual te pawh chu a lo ni tak tak mahna." tiin a kalh hnan hmak a. Chuta tang chuan keyboard chu a ri tawh ngai miahlo, mak tak a ni. Ka pate room ah hian thawm a awm ve ngai miah lova, ka room leh ka u te room atang hi chuan zantin mai hian thawm hi a awm ziah thung.

***************

Vawikhat leh pawh kan monu hian ka pa bulah chuan, "Ka pa, kan room hi a rawn vawt leh thut thut zel, amak lutuk." a ti a. Ka pa chuan thingpui in pah chuan ka u te room chu thli rawn luhna tur awm ang te a han check a, chutih lai chuan a thingpui no ken lai chu a thlauh keh chhuai mai a. Keilah chuan, "Engtin nge i thlauh theih a?" tiin ka lo vin deuh tuar a. Ka pa chu a nui suk ringawt a, "Ele, min rawn ben thlak sak mawle..." a han ti sam et lehnghal a.

Hetia thil mak tak tak kan tawn hnu hian thil engemaw ngaihthatlohna kan nei ta a, chu chu ka vahpa, ka u fapa rawn pian hnu, thla sarih vel chauh anih laia a awmdan kha a ni daih thung. Nausen mai ala nih lai khan kan lawm luai luai zel a, mahse tumah min en ngai lo. Chunglam enin a nui leh ver ver thin a, ngaihthat lohna pawh kan nei ngailo.

Mahse a mutlai te hian a tap thawmah a harh tih kan hre ngailo, a nui ri ker ker ri ah zawk kan hre thin. Hmuh theih siloh amah lawmtu an awm ni ngeiin a hriat, a chhan chu a nautet lai khan a tap khat em em a ni. Tunah chuan Bawihtea hi lian tawh viau mahse, hetiang thil mak tak tak kan tawn hnu hian a nautet lai chu kan ngaihtuah let leh a, khatih hunlai khan engah vak lo ngailo mah ila tun hnu hian mak kan ti hnuhnawh leh khawp mai.

************************

Ka vahpa hi kum 4 a rawn nih chhoh khan a bula awm ve ang mai hian boruak hi a be vak vak zel a, a tir chuan a inkhualtelem a nih mai kan ring a. Mahse a rei telh telh a, inkhualtelem mai chu a ang talo tawp mai. A bula awm ve ang mai hian a be reng zel a, a hming pawh phuahsakin "JISH-A" a ti mai hian ka hria. 

A mizia chu a dang tulh tulh a, thu a awihloh changa kan han hauh te hian, "Jish-a ka vuak tir dawn che u." tiin min chhanglet thin. Amaha awm a ngam ngai lova, chhun engah pawh a kal duhnaa kalpui zel a ngai tawh. A chhan kan zawh lah chuan, "Jish-a'n min hauh a tum, ka hlau.." tiin min chhang thin.

"Bawihte, Jish-a chu a tunge? Chutiang tumah an awm lo hrim hrim. Hlauh tur a awm lo, engtin mah a ti lovang che." kan tih pawh chuan, "A awm reng, ka hmu thin alawm." a ti tlat mai a. Tlaikhat phei chu hlauh hmel tak hian room atangin a rawn tlan chhuak a, a tap pur mai lenghal a.

"Bawihte, engtizia nge? Tuin nge hau che?" tia ka han zawh chuan, "Jish-a'n min tihthaih a.." tiin a tap vak vak mai. "Jish-a chuan a tina thin che em ni?" tiin ka han zawt leh a, chokaa rawngbawl mek ka nu pawh chu a rawn phei a. Ka nu chuan rawn thlamuan vakin, "Laljish, misualpa. Kal bo rawh, bawihteea hi lo hau tawh reng reng suh." tiin boruak te chu a han vai vel vak vak a.

Hemi ni atang phei hi chuan ka ngaih a thalo leh zual, "Nu, bawihtea bulah hian Jish-a a tih ve chhen hi kawm tawh suh tiin hrilh ila, anih loh pawn doctor kan panpui mai dawn em ni? A tah hlekin JISH-A'N MIN HAU a ti zel bawk sia, a dawih lehzual dawn lutuk." tiin ka nu bulah chuan ka sawi a.

Ka nu pawh chuan minlo pawm pui thlap a, ka u bulah pawh chuan kan saiw ta a. Mahse ka u ngaihdan a lo ni hauh lo, "Naupang dang pawh tihian an awm ve tho, thil an hmusual a, an dawihzep vang mai mai a ni. Naupang mai an la ni a, chutia lak thutak vak angai lo. Thil reng reng hi in ngai ramhuai thei lutuk, ka ning." tiin min lo vin hlur mai.

****************

Vawikhat chu ka u te room atang chuan Bawihtea chuan, "Aniiii.." tiin ring takin min au vak a, rang takin ka va tlan nghal a. Room kawngkhar bulah hian hlauh nei tih hriat tak hian a lo ding khur zawih zawih a, a hmel lah chu a dang vek lehnghal. An room atanga kawmchar chhuahna kawngka chu a lo in hawng huau bawk a, a va melh leh zeuh zeuh zel a.

"Enge ni Bawihte?" tiin ka va zawt a, mahse min chhang lo. "Lo kal rawh..in room ami toys ho saw va la la, ka roomah lut ang." tiin ka sawm a. Mahse a duh hauh lo, "Jish-a ka hlau.." a ti leh ta tlat mai. "Khawnge Jish-a chu a awm a?" tiin ka zawt leh a. Kawmchar lam chhuahna kawngka chu kawkin, "Sawmi hnungah sawn.." a ti khur dar dar a.

A thlamuan nan tiin, "Bawihte, a lo kal leh chuan anu te apa ten kawm che an phal tawh lo, kal bo rawh...kan hlau lo che, nang aia chak Pathian kan nei tiin i lo hau hrep thin dawnnia." ka han ti a. "Saw a lo kal ania.." tiin kawmchar lam bawk chu a kawk leh a, mahse tumah ka hmu ve lo. 

"Hey..nangkha..kal bo rawh...Bawihtea hi lo tibuai tawh suh.." tiin boruak chu ka han hau a, a thla a muang ve deuh chuan ka hria. Chuta tang chuan Bawihtea chu a hlauh apiangin boruak chu ka hau der ta thin a, kar khat hnu velah chuan a ziaawm ve deuh ta. Naupang kum 4 mi lek, khawhar taka kan lo dah thin avangte, thian kawm lova lenchhuah pawh kan phal ngai loh avanga hetia awm ta mai a nih ka ring a, ka inthiamlo angreng hle.

Hemi hnu atang hi chuan thiante kan kawm tir ve a, pangngai takin a awm ve leh mai bawk a. Tin, mak deuh bawk chu hemi hnu atang hi chuan kan inah pawh thawm a awm ta vak ngailo. Khatia ka han hauh vak vanga reh ta mai nge, a reh ve hrim hrim pawh ka hre lo. Mahse vawikhat chu kan sitting room dawhkan chungah sam lo awm nuai mai hi ka hmu a, ka u te khumah mihring kut thla niawm tak, bal ung deuh ruih mai hi ka hmu bawk.

Kan chhungkua chuan chumi kut thla chu kan kut nen kan han teh chhin liam liam a, ka u leh ka pate kut ai mahin chu kutthla chu a lian zawk. "Misual an lo lut anga, an rawn nem aniang." fiamthu ti tak deuh chuan ka pa chuan a han ti ringawt a, kan nuih liam ta vel mai mai a nih kha.

Hun alo kal zel a, thawm pawh engmah kan hre tawh ngai lo. Ka nu phei chuan, "Kan hlau lo ve hlawm ropui sia, min tibuai peih tawh lo aniang." tiin fiamthu thawh nan te a hmang vel ta mai mai a. A ni reng bawk a, BAwihtea leh anu tih loh hi chuan kan hlau lutuk ngai lemlo. Thawm chauh kan hria a, mit ngeia kan hmuh ve loh vang te pawh a ni mahna.

Chutia thawm a rawn reh takah chuan mak tak maiin kan inluahna neitute fanu pawh chu a rawn ziaawm chho ve zel a, inbual fai te pawh a duh ve tan ta a. Inkhawm nachangte pawh a hre tawh a, pangngai takin a biak theih tawh. Kum engemaw zat liam hnu chuan loh theih lovin 2016 kum khan kan chhuahsan ta a, ka u chu Serchhip ah a post an sawn dawn vang a ni.

Kan chhuahsan atanga thla 3 hnuah midangin an luah tih kan lo hria a, an sawi dan chuan tui inherh haw ri te, khum hnuai atanga thaw ri vak vak te leh inhiat ri vak vak te chu an lo hre ve a ni awm a, ka thianpa hian min rawn hrilh nghe nghe. Kan inhlui luahtute chuan ka thianpa hi an hmelhriat a lo ni awm a, kan inkawm thin tih an hriat avang chuan ka thianpa chuan min rawn zawt hi a lo ni.

Kei lah chuan, "Tikhan ngawihsan hmak se, a reh ve mai ang." ka lo ti sam et a, kan nui dun vak vak ringawt. Chumi hnu atang chuan chanchin engmah ka hre leh tawh ngai lova, mahse kha thilthleng kha tun thleng hian ka la theihnghilh thei lo. Min ti mu theilo chuang miah lo nangin, tawn leh erawh ka duh tawh hauh lo thung.

A TAWP TA