YOUNG KNIVES (MIZO FICTION FANTASY STORY) Written by : Aaron Malsawmdawngzuala CHAPTER - 4

 YOUNG KNIVES

(MIZO FICTION FANTASY STORY)

Written by : Aaron Malsawmdawngzuala

CHAPTER - 4

***********************************

Chhun a ni a, waiting shed pakhat ah hian ngawi reng hian Emily chu a thu a, chutia power an neih tak hnua an thil tih hi a dik ber em tih chu a ngaihtuah nasa kher mai. Hmeichhia a nih bik vang pawh a ni mahna, mipa dang zawng kha chuan thil tha tih nan hman an tum dawn lo hrim hrim tih a chiang sa reng.

A chhan chu kha arsi tla chhung a, tuihnang pawl vat mai kha alien rannung chikhat, kum sang chuang zet a upa an ni a. Khatia khawvel a an rawn chhuk khan, hmun nga ah insem darh in mihring taksa chhunga chen an mamawh a. Tichuan Emily, Ruatfela, Augustine-a, DAvid-a leh Zorama te kawchhungah a lut ta a ni.

A awmzia chu he alien te hian Young Knives ho hi an thluak an suk sak a, ngaihtuahna dik lam ai mah chuan ngaihtuahna tha lo a put tir nasa a. Amaherawh chu an mihring mize pangngai theuh chu an hlauh chuang lo, thluak pahnih theuh an nei bik tihna a ni ber mai.

Mihring fel pangngai th(r)ah panga, mi pawi sawi ngai lem lo te hian hetia power an neih tak avang mai hian thil sual an ti ngawt bik a rinawm loh. Chutah tak chuan khang laien te khan an thluak chu an rawn hmang ve thin a, tichuan ngaihtuahna dang an lo pu ve leh chiah thin a ni.

Chutia Emily a inngaihtuah vauh vauh lai chuan a hmaah tak mai hian mi pakhat hi a rawn ding a, Emily chu a han hawi chho va. Erik-a a lo ni reng mai, Emily chuan mak a ti kher mai. A ding nghal a, "Enge i duh a?" a han ti vin hlur a. Erik-a chuan rum tak hian a melh a, "Naute i la ti tla lo a ni maw?" a lo ti let khur khur mai.

Emily chu ngeiawm tak hian a han khi deuh suk a, "I thu a awm lo, ka ti tla lovang." a ti hmuk mai. Erik-a chuan a lu abu nghauh nghauh va, "A tha e, tikhan maw kan in chal tauh dawn a? I hre khawp ang, lo ngai reng rawh. I chak adwn lo, i video hi ka la kawl reng tih hre rawh." a han ti leh khur khur a.

A phone chu a phawrh a, "Enrawh, vawi khat click bak a ngai lo. Khawvel pumin an hmu che a ni mai, ka ti muapho dawn che." tiin a han vau chhunzawm leh nghal a. Emily chuan rum tak hian a en reng ringawt a, chutih lai tak chuan Erik-a hnung atang chuan DAvid-a chu rawn lang thutin Erik-a phone chu a rawn laksak daih a.

Erik-a chuan thinrim tak hian, "Hmela, tunge i nih a? Ka phone kha min rawn pe let vat rawh, ka khawih hreh miah lo che ania." tiin a vin nghal vak mai a. DAvid-a chu Emily bulah chuan ava phei a, "Saw saw em ni, in Sir chu?" tiin a han zawt a. Emily chuan mak ti tak hian DAvid-a chu a en a, "Ihh..aw..aw.." a ti bah nuai mai.

Erik-a chu a rawn kal phei a,"Min rawn pe rawh ka ti.." tiin a rawn vin khur khur tawh mai. DAvid-a chuan a kut chu lo pharin, Lawk aw, Sir..Sir..Sir...lawks, magic kan show lawk ang aw.." tih pah chuan a kut pahnih chuan Erik-a phone chu a han hum ran a.

Erik-a pawh chuan tihngaihna a hre lo, a en tawp ringawt. Chutah Erik-a phone chu vawi leh khatah meivap-ah a chang nghal ringawt mai a, simcard chiah chu a bang ta mai. Erik-a hmaah chuan ava theh phei a, "Kha..kha tal kha chu ka pe hram ang che, sim thar siam tir hi a buaithlak thin sia." David-a chuan a han ti zuah zuah a.

Erik-a mak ti lutuk chu a ka hau mai a, "Ka..ka phone, ka phone kha engtin nge i tih?" a ti bah nuai mai. DAvid-a lah chu a lo chek hlur a, "Aww...ka ti bo hmak mai mawle...magic vek a nih kha. Tikhan Emily video chu a bo hmak anga, i ti leak out thei lo tihna a nimai. I inchei dan atang khan in hausa ve thawkhat tih a hriat bawk a, a thar chu i lei leh thei mai ang." a han ti leh zuah zuah a.

Erik-a chu a thaw deuh hak a, "Emily, he mi mawl hi tunge?" a han ti vin leh hlur a. Emily chuan DAvid-a banah chuan a va kai a, "Hei hi maw...ka bialpa a  nih hi." a ti ta mai a. David-a zawk pawh chuan mak a ti kher mai, Emily chu a en hu mai a. Erik-a chuan mak tih hmel tak hian, "Eng a? Ka bialpa a?" a ti hu mai a.

Chutah David-a chuan pawr zet hian, "I beng a ngawng a mi? A sawi kha i hre lo ami? Ka bialnu hi i lo vau vel amaw? Saw i fa saw tun atang chuan theihnghilh tawh ang che, ka fa a ni tawh ang. Kei hi pa tha tak ka ni bawk ang, ka nupui tur a nih saw i hria em? Vawi khat pawh lo ti buai leh tawh suh ang che, kan inhmangaihna hi i rin phak bak a ni ang." a han ti kur nghal deuh duah a, a hnuk chu a la ulh deuh amawni.

Emily meuh pawh a lo ka hau mai, Erik-a chuan a kawr awmah chuan a tham a. Thinrim tak hian, "Zawnga, ka phone kha rawn la vart rawh." a ti khur khur mai. Chutah David-a chuan a rek thut a, a rek kang ta vu vu mai. Erik-a chu a thaw hleithei ta lo, "I phone kha ka ti chhe tawh, tikhan haw nal nal rawh." a han ti ve khur khur a.

Chutah a aia zawi leh thum zet hian, "I sim card saw, chhar theihnghilh hauh suh ang che. Kal la, kei leh ka nupui hual hi min rawn tibuai leh tawh suh ang che." tiin a thlah a, Erik-a chu a thaw hlawi hlawi mai. Sim card chu a chhar a, "I la hre khawp ang, nang naupang kha.." tiin a kalsan ta a.

Emily tawng hma hma chuan DAvid-a chuan, "Emily...min duh tih ka lo hre miah lova. Mahse maw, min ngaidam rawh. Nichin kha chuan i thlavang ka hauh vangin dawt ka sawi a nih kha, nangmah lah khan ka bialpa min rawn ti thut bawk sia. Rachael-i hi ka la theihnghilh thei lo a ni, min lo nghak hram hram dawn nia." a lo ti nghal zung zung mai.

Emily insum zo lo chuan a kek hrep a, a kuai bu lawp bawk. David-a chuan a lu chu a tuai vut vut a, "Engeee?" a ti hu mai. Vin zet hian Emily chuan, "MAwla....ka duh reng reng lo che. A thik nan ka hmang mai mai che a nih kha, chubakah khatia nupui hual, ka fa a ni tawh ang tihte thleng khan sawi duah kher a ngai mi?" tiin a lo hau hrep mai.

DAvid-a chu inthiamlo hmel tak hian a kun run a, "Chubakah ti khan i power te mi bulah tilang vak vak tawh suh, U Ruatfela pawn a sawi zo chiah a, i hre ve reng a ni lawm ni? A phone te kha a hmuh laiin meivap ah i siam a, hrechhuak ta che sela kan vai hian buaina kan tawk thei tih hre ta che." tiin Emily bawk chuan a hau leh hrep a.

David-a chu a han nui deuh suk a, "Lungngai suh, khate chu magic a an zia kha. MAgic a maw a ti tho vang, a hrethiam teuh lo." a lo ti sam et mai. Emily chuan a melh run a, "Nangmah chauhvin i nei lo, kan nei ve vek. tih lan tih lan angai lo, vawikhat mah ti tawh suh ang che...chuan..ka lawm e." tiin a kalsan daih a.

*************************************

Zan dar 11 a pel a, Hospital atang chuan in lam pan in Ruatfela chu a haw mek a. A fanu erawh a anu, Pi DEngi'n a riah pui dawn a ni. Lirthei engmah a neih loh avang chuan ke in a haw hnak hnak a, a rilru chu a hah khawp mai. Pawisa nei tawh mahse, a fanu chu hlawhtling takin an zai angem tih mawlh chu a thil hlauhthawn a ni.

Chutia a inngaihtuah vung vung chu a kalna tur a lo en chiang lova, mipa pakhat nen an insu bur mai. Chupa chuan phone a lo hmang mek a, a phone chu a thlauh phah lehnghal. Inthiam lo tak chuan, "Ka tihpalh lutuk, thianpa." tiin phone chu a chhar sak a.

Pek pah chuan, "Min hrethiam hram teh, ka kalna tur ka lo en chiang lo a ni." tiin ngaihdam a dil chhunzawm nghal mawlh mawlh a. A sut a chu tudang nilovin Rindika a lo ni reng mai, mahse an inhre lo ve ve thung. A phone lak pah chuan, "A pawi love, hei a chhe em hleinem." a lo ti a.

Mahse Ruatfela kut a arsi lem tattoo chuan a mit chu a la kher mai, a mitthla ah chuan a hma zana lo tibuaitute zinga mi, hnunglam atanga rawn rektu kuta tattoo nen a in ang chiah a hmuh te chu a rawn lang nghal zawk mai. Ruatfela chuan a kalsan a, Rindika chuan a en zui vang vang mai.

A lu a han bu nghauh nghauh va, "A va fuh cher cher ve leh, hetiang em em a intawng fuh hi an awm leh thei tawh ngai lovang." tiin a phone chu a phawrh nghal a. Siamtei chu a call a, "Siamte, Duhtak.....good news. Nizan min beitute zinga mi pakhat ka hmu, hei ka zui ru dawn mek." tiin a hrilh a.

Siamtei pawh chu a lo lawm kher mai, "A that nasat chu, khawilam nge a pan, khawiah nge i awm?" tiin a rawn zawt nghal a. KAwng kawiah chuan Ruatfela chu a kal liam chiah a, "Jeriko Road lam ah a kal, kei hi tunah kawng chungah ka la awm mek. Ka zui dawn e...rawn hmanhmawh rawh aw, silai pai ngei ngei bawk ang che." tiin phone chu a dah a.

Ruatfela chu a chhuk zel a, fimkhur tak hian Rindika chuan a zui zel a. Ruatfela chuan in chu a thleng ta, an veng a lo mawng khawp mai. Thingkung a tam hle bawk, thingkung pakhat phenah chuan Rindika chu a biru a. Ruatfela chuan kawngka chu khar lovin a hawng huau va, room ah chuan a lut tlang a.

Chu chu remchangah la in Rindika chu inchhungah chuan ava lut ve nghal a, inchhung chu a han enkual a. Bihrukna mai tur a awm lo, a lo zim ve angreng bawk si nen. Kudam ni awm tak, bungraw tam tak lang huau hi a lo awm a. Rindika chu ava lut a, kawngka pawh a lo nei lo.

Puan zar tawp a ni mai, puan chu zarin a biru ta a. Room atang chuan Ruatfela chu a rawn chhuak a, thutthlengah chuan thu in phone a khawih mial mial a. Rindika chuan a phone chu a phawrh chhuak ve a, Siamtei chu text nghal in, ‘An inah ka awm mek, kawng chungah khan min lo nghak law law rawh.’ tiin a thawn a.

Siamtei chuan rawn reply vatin, ‘AWle, fimkhur la. Power an nei tih hre reng la, ka lo thleng tep ania.’ tiin a rawn thawn let a. Minute 10 vel a liam hnuah chuan dar 12 a ri ta, sana chu Ruatfela chuan a han en a. A lu bu nghat nghat in, “A hun ta e.” tiin room ah chuan a lut leh a.

Rindika chu a che ngam hrih lo, zan a rei deuh tawh avang chuan thawm dim a ngai tawh bawk si. Reiloteah chuan Ruatfela chu a rawn chhuak leh a, thawmhnaw dum vek deuthaw a inbel a, a hmai tuamna tur a keng bawk. Thutthleng hnuaia air bag chu a la chhuak a, an pawisa ruk dahkhawmna tur a ni.

*******************************************

Emily, Zorama, DAvid-a leh Augustine-a te pawh chu an awmhmun theuhvah chuan an insiam sap sap hlawm a. An hmai te chu tuamin an room tukverh theuh atang chuan an thlawk chhuak a, Ruatfela ang tho khan an thlawk ve thei vek a ni. Tichuan rei lo teah chuan Ruatfela in kawt ah chuan an rawn t(r)um dat dat hlawm a, an rawn thleng rual vek deuh thaw a nih chu.

An hmaikawr te chu phelhin inchhungah chuan an rawn lut a,  Rindika chuan a la enthla reng. An chet dan tur te, an kalna hmun tur te chu an sawi khawm mek a. An hmel chu Rindika chuan a hmu chiang hlawm ngang mai, a jacket ipte chhung lam chu a zen a. Tarmit pakhat hi a phawrh chhuak a, a vuah a.

Ruatfela te titi lai chu chiang tak chuan a han en leh a, tarmit sir chu a han hmet zeuh va. Tarmit chu tarmit satliah nilovin, camera a ni. Vawi nga vel a hmeh hnu chuan a phelh a, a ak tha leh a. Tichuan Young Knives te chuan an hmaikawr chu an vuah sap sap hlawm a, tichuan an chhuak ta a.

Kawngka chu pawn lam atang chuan an kalh daih mai, an panga chuan ruk ru tur chuan van lamah sang takah chuan an thlawk chho va, an thlawk mai pawh a ni lo, a per hian an per chho zawk hi a ni ber mai. Rindika chu kudam atang chuan a rawn chhuak a, a awmna chu an nu, Siamtei chu a hrilh nghal a.

Ruatfela roomah chuan a lut a, khum bulah chuan thlalak hi a lo awm a. Rindika chuan a han en a, Ruatfela te nupa  leh an fanu thlalak a lo ni. NGawi reng chuan Rindika chuan a thlir vang vang a, a awmna ngaiah chuan a dah leh a. Room te chu a han check kual a, thawmhnaw te chu a hai chiam a.

Mahse pawisa engmah a hmu lo, thil pawimawh vak engmah a awm lem lo bawk. A phone chu a rawn ri a, Siamtei a lo ni. “Ka lo thleng, helai in fal deuh hi em ni?” tiin Siamtei chuan a rawn zawt a. “AW...tala kha chu tichhe mai rawh. I tawng pawh ka hre pha, lo hmanhmawh la.” tiin Rindika chuan phone chu a dah a.

Siamtei chuan in chu a thleng a, pistol phawrh nghalin a hmawrah chuan silencer a vuah a. Tala chu a tin vang vang a, a kal pawp mai. A silai puak ri pawh chu a zawi takzet, a ri sut ringawt. Tichuan tala chu a bung nghal phawk mai a, Siamtei chuan kawngka chu a hawng nghal a.

Rindika chu rawn chhuak nghalin, “Kan kal vat angai, an kalna hmun tur ka hria.” tiin kawngka chu a khar a, a vih kalh a. Siamtei chuan a lo en hu a, “NGawi lawk teh, inchhungah saw in en fiah tawh em ni?” tiin a lo zawt a. “AW...engmah a awm lo, kal vat ang.” tiin Rindika chuan Siamtei chu a kai dawr dawr mai.

Motor chu an thleng a, a chhungah chuan an thu lut dun nghal a. Saimtei chuan a pasal hmanhmawh em em mai chu mak a ti kher mai, “Min hrilh chiang la, khawnge kan kal dawn?” tiin a han zawt leh a. Motor start pah chuan Rindika chuan, “An kalna turah..ATM Booth an ti chhe dawn, kan style an copy dawn.” ti a khik suk pah chuan chak takin a tlan a.

**********************************

ATM booth pakhat chu Young Knives te chuan an thleng a, CCTV thlen hma chuah chuan an ding a. Augustine-a chuan CCTV chu a han thlek vang vang a, a mit chu a rawn pawl vat vat mai a. Chutah CCTV chu chawp leh chilh hian a rawn khal vek a, vur in a khuh ta vek mai.

A vawh em avang chuan CCTV hmai chu a khi deuh thawt a, a chhe nghal bawk. Tichuan ATM Booth chhungah chuan Augustine-a bawk chu a lut leh a, CCTV chu a ti khalh leh a, a chhe leh ta. Midang chu an rawn lut vek a, Ruatfela chuan ATM Machine chu a han pawt vak a, a thlawn pawp mai.

A chhung chu an hawng a, tichuan pawisa awm zawng zawng chu an la ta vek a. Chutiang chuan darkar khat lek chhungin ATM Booth panga vel chu an rawk hman a, pawisa chu ngah tawh vet vet tak an ni. Chutih lai mek chuan Rindika te nupa pawhin ATM booth chhe tawh ho an hmuh atang chuan an rawn chhui ve zel bawk a, a hnaih dan indawtin an rawk zel a ni tih an hrethiam nghal a.

ATM dawt leh chiah an thlen dawn hnaiah chuan an ding a, motor atang chuan an chhuak a. Ruatfela te chu an panga chuan booth chhungah chuan lo awmin pawisa chu an lo thun mek a, Siamtei te nupa chu zun in phenah chuan an biru a, an chetla lai chu an en reng a.

Ruatfela te chu an rawn chhuak a, chuveleh Rindika chuan a kut a la chhuak a. Siamtei chuan silai ang tak, te tak te mai hi a pasal chu a pe a. Rindika chuan a han tin vang vang a, a kap pawp mai. DAvid-a pheikhawk ah tak chuan a fuh a, DAvid-a pawh chuan a lo feel hman ni ngei tur a ni.

A ke chu a han thlek zuk a, mahse a kal leh nghal mai a. Siamtei chuan a pasal chu a en hu a, “Khapa ber kher kha maw...i zui ber pa kha chu saw zawk saw alawm.” a lo ti nuah nuah a. Rindika chu a lo khi suk a, “Lungngai suh, an hmaikawr kha ka chhinchhiah vek alawm. Ka kah ber kha chu mipa pali zinga hmel naupang ber ania, an titi naah pawh a nawi ber. Khapa atang khan bul kan tan ang, tichuan abak chu nakinah a mal te te in..” tiin a lo chhang a.

An nupa chuan Ruatfela te kan phei zel chu an en zui zel a, chutah an ding tlar thap a. An pawisa ruk te chu an bag theuhvah chuan an ak far hlawm a, chutah an thlawk ta thut mai. A per hian an per chho zawk hlawm mai a, rang tak an ni. Siamtei chuan phawk hru hian a en a, “PAwng tawng zuam ngawt chi chu an ni dawn lo tawp mai, keini mihring tan chuan..” a han ti nuah nuah a.

Rindika chuan confi hmel tak hian, “An ni chuan power an nei, thiltihtheihna an nei, mahse an neih ve loh kan nei. Chu chu kan thluak tha tak hi a ni, kan thluak hmang hian kan hneh thei. Pawisa kan nei a, kan mamawh apiang chu kan upgrade zel ang.” tiin a lo chhang leh a.

Heta DAvid-a an kahna hi tracking device tereuhte, an nupa a an siam chhuah a ni a. An va kah chiah khan Davida pheikhawh an chuan a fuh a, tichuan a tet em avangin David-a chuan a hmu lo a ni. Rindika te nupa pawh chu motor lam an pan leh a, ruk ruk chhunzawm ve ta lem lo chuan an haw ta a.

****************************************

A tukah chuan ATM Booth paruk lai mai zan khat thilthu a rawk a ni ta mai leh, CCTV vura inkhuh a, khal vek mai te chu news ah chuan a lar hle a. CCTV footage en dawn pawhin a chhe hmak bawk si, record sa ah lah engmah finfiahna a awm hman bawk si lo.

Police te pawh an lu a hai takzet, chutih lai karin Ruatfela, Emily, Zorama, Augustine-a leh David-a te chuan pawisa zawng zawng chu an lo insem vek thung a. A tam tham bawk a, a mal te te chuan mi hausa hi an ni ringawt tawh. Tu a te mah chuan an thiltih a ni tih chu an hre der mai silo, a hretu awmchhun chu mi pahnih chiah niin Saimtei leh Rindika te nupa an ni.

Chhun a ni a, Rindika chuan computer chu a khawih mual mual a, Siamtei chuan thingpui a rawn pe a. Rindika chuan lo ban pah in, “Kha naupang kha, DAvid tiin an kovin ka hria nizan an titi naah khan..hei, a location chu a la lang zel e. An veng pawh kan hre tawh bawk a, amah atang hian kan t(r)an ang.” tiin computer screen chu a kawk a.

Siamtei chu a han thaw deuh hak a, “Engtia tih nge i tum? Eng ang power nge a neih pawh kan la chian loh hi....keini chu mihring ve mai chauh kan nih hi.” a han tih chuan Rindika ngaihdan chu a ni lo kher mai. An nu chu a en deuh hru a, “Kan beihlet angai alawm, kan pawisa ruksa min ruksak tute an nih hi, kut min la thlak zui.” a han ti vin deuh hlur a.

Siamtei chu a han maimitchhing vang vang a, “Keini chuan kan hna kan  thawh chhunzawm thei, an ni kan beih a ngai lo, duhleh police ten bei rawh se. Ka hlauh vang a ni lo, mahse an nunna hial pawn a tawrh phah thei asin.” tiin a chhang let leh a. Rindika chuan a lu a thing a, “Kan chan lul lovang, kan beih angai. Kan hna ang an thawh ve miau avang hian kan kawng an dal alawm, hetiang te chuan engmah kan ru ve thei tawh nang.” a lo ti leh a.

“Engtin nge kan beih anga, an thiltihtheihna zawng zawng pawh kan la hre zo lo ania, mi hlauhawm tak an nih hi.”

“Hmanzan kha chuan vur, tui leh meialh kha chu ka hmu nei a. Midang pahnihte khan enge an tihtheih ve ka hre lo. An thlawk thei tih kan hre tawh bawk a, tunah an zinga naupang ber David-a location kan hre tawh bawk a, engmah lungngaihna tur a awm lo.”

“Rindik, David-a kha a hmel i hmu a ni mai. MAhse eng power ber nge a neih i hre lo, ngun lehzualin han ngaihtuah teh.”

“Aww..chuvang tak reng a.... Tui, mei alh leh vur power nei, chumite beihna tur hmanrua kan siam ve mai dawn lawm.”

Saimtei chu a ngawi vang vang a, “Ka chan che ka hlau a ni, Rindik. Mahse i thutlukna apiang chu ka zah sak ang che, anih chuan kan beilet ang.” a ti ve ta nge nge a. Rindika chuan Siamtei hmuiah chuan a han fawp zeuh va, “Ka hmangaih che.” tiin a han nuih seih a.

**************************************

Chawhma dar 11 vel a ni a, Ruatfela te inah chuan Young Knives ho chu an thu thap mai. Dawhkanah chuan tala chhia, a hma zana Siamtei’n a kah chhiat tak chu a let bal a. David-a chuan a han la a, a en vang vang a. Mak tih hmel tak hian, “A silai hman a tha awm hle mai, a bung hmawk alawm.” a han ti nuah nuah a.

Ruatfela chu a ding deuh hluai a, “Nizan kan haw hnu....tukin a ni tawh zawk mah ang chu. Ka mu reng reng hleinem, ka rom vel te ka check kual a. Tu phaingsen nge mawni, ka inah berkher lehnghal.” tiin a vei kual ang thuak thuak a. Augustine-a chuan a thuthmun atang chuan, “Hmelma i nei reng reng em ni, nang hian?” tiin a lo zawt a.

Ruatfela chuan a lu a lo thing a, “Rukru satliah vel mai mai an ni lo maw? Thil ruk tum hrim hrim an ni ve maithei bawk a, nangmah hrechiangtu che kher pawh a ni lo thei ania.” Zorama chuan a lo ti ve bawk a. Ruatfela chu a han thaw deuh hak a, “Ka in awmna fal zia in hria, chuan rawk tham pawh a ni lo. Mahse tinge ka in kher, engemaw diklo chu a awm chiang alawm.” a han ti leh nuah nuah a.

Emily chu rawn tawng chhuak ve in, “Anih leh U Ruatfel, thil bo a awm hrim hrim em?” tiin a rawn zawt veleh a. “Aih, engmah a bo lo. Ka check nghal vek a, nizan kan haw hnu pawh khan rawn hrilh che u ka tum a, mahse in chau ve tawh awm sia ka tia engmah ka rawn sawi lo tawp a nih kha. Mahse tlaivar deuh thakin ka chang a, ka mu tha thei reng reng hleinem. Chubakah inah hian pawisa ka dah lo hrim hrim a, thil hlu em em ruk chhuah tur a awm lo bawk nen.” tiin Ruatfela chuan alo chhang a.

DAvid-a lah chuan tala chu a lo la en reng a, “A silai mawlh chu a ni, a tha ngawt ang.” a lo ti ve chhen mai. Chuveleh Augustine-a chu a ding deuh zawk a, “Ngawi teh u...hmelma kan nei lo emaw kan ti a, mahse kan lo nei ru reng thei tlat.” a rawn ti chhuak hlawl mai a.

Midang ho chuan an en thup mai, “Enge i sawi awmzia?” tiin Emily chuan a lo zawt nghal vat a. Augustine-a chuan a han ngaihtuah vang vang a, “Nizan hmasa a kan beih te kha, ATM lo rawk ve tho te kha...in la hria em?” a han ti leh a. Ruatfela chu a ngawi vang vang a, “Aw.. mipa leh hmeichhia an ni. Ka la hria keichu, hmai an tuam ve ve bawk.” a rawn ti ve nghal chat a.

Zorama chu a rawn ding chhuak ve a, “Anih chuan khamite kha an nih i ringhlel deuh tihna em ni?” tiin Augustine-a chu a han zawt a. “An ni e chu ka ti lo, mahse a mipa zawk khan in la hre khawp ang a ti a, phuba lak an tum te pawh a ni ve thei tho mai.” Augustine-a chuan a ti nuah nuah a.

 “Tute nge kan nih an hre kher nang, hmai kan tuam ve vek tho alawm.” David-a chuan a rawn ti ve leh a. Mahse Ruatfela chuan, “Kan pian hmang te atangin an lo chhinchiah ve thei reng thova, mahse anmahni kher kha chu an lo ve thei bawk.” a lo ti ve bawk a.

Augustine-a chuan tala chu a han en ve a, “David-a sawi ang deuh khan pistol tha leh sial tak hmanga kah a ni ngei ang, chuvang chuan mi naran, rukru naran anih chu keichuan ka ring lo phawt.” a han ti a. Ruatfela chuan a melh gnai chu a han melh vung vung a, “KA hrechhuak vat tho vang.” tiin a insehruh nasa kher mai.

***********************************

Tlai lam a ni a, thli chu a thaw vuk vuk mai. Tam si lo hian ruah chu a tla cherh cherh reng a, boruak chu a vawt angreng hle bawk. Chhum a zing chuai chuai mai bawk a, khaw awmdan chu nuam lo tak a ni. Arsi tlakna hmun, park hnunglamah ngei mai chuan t(r)ek a tla ri dum mai a, thirlen an hungna, a hma a arsi in a lo den chhiat tawh, an siam that leh tawh chu a deng che leh ta vek mai.

Current a t(r)ek deuh chuai chuai bawk, t(r)ek denna chin chu a khu vut vut a. Meikhu kar atang chuan thil engmaw mak tak, mihring pianzia deuh reuh ni bawk si. Lu lian tak, taksa te leh rut mai. Hmelchhe tak leh mitmeng lian tak mai hi a rawn ding tuah tuah a, chu chu alien pakhat niin khang alien ramsa chikhat, tuihnang ban tak mai, Ruatfela, Emily, Zorama, Augustine-a leh DAvid-a te kawchhunga lut ta te siamchhuaktu kha a ni.

Alien zinga thiamna sang tak nei, hlauhawm tak niin a hming chu ZONKI a ni. Mahse kha a thilsiam tuihnangte kha engtia a siam chhuah nge, khawi planet atanga lo kal nge tih leh engtia arsi tla atang daih a kha thil tuihnang kha rawn awm nge tih chu story dangah kan la hre turah ngai ila.

A awmna hmun chu Zonki chuan a en kual a, khang a thilsiam te kha a rawn zawng zui ve zel dawn a nih hmel. Park chhungah chuan a lut a, security guard pakhat, park bula duty ho thutna, in te tak te chhunga thingpui a lo in chu ava hmu a. A va pan ta mai a, guard pawh chuan a hmu chiah chu a phu nasa ngang mai.

Pawnah chuan a tlan chhuak a, a tiang chu a hum nghal a. Zonki chu a lo kal zel a, “HEy, tunge i nih?” tiin a vin vak vak a. Zonki pian zia chu a rawn lang chiang tulh tulh a, security guard chuan a hlau kher mai. Zonki chu a rawn thleng hnai zel a, chu guard lah chu a lu a hai thut a.

A thal tawp mai, Zonki chu a zu kun hniam a. Guard chu a en vang vang a, chutah amah chu a khu ral riai riai mai a. A khu zawng zawng chu security guard, nikhawhrelova let reng mai ka chhungah chuan a lut ta vek mai a. Chutah security guard chu a rawn meng kawk mai.

A tho thut a, a mitmeng chu a dum vek a. MAhse reiloteah a rawn pangngai vat a, a han hawi kual a. Security Guard satliah ni tawh lovin, chupa cbhu Zonki-a a ni tawh tihna a nih chu. A duty na hmun chu a kalsan a, tichuan a ramsa siam chhuah, Young Knives te chu zawng turin bul a tan ta a ni.

Zonki hi alien satliah a ni ngawt lova, planet dang tamtak ah pawh nung dama awm thei a ni a. Khawvel pawn, lei hipna awmloh naah leh oxygen awmlohnaah pawh dam khawchhuak thei leh buai ve ngai lo a ni. Alien hlauhawm tak niin a thiamna a sang hle a, anmahni planet ah pawh dinhmun sang tak a chelh nghe nghe a ni.

Amaherawh chu khang a thilsiam te kha mirhing kawchhungah an lut tawh tih leh, chung mihringte chuan team an lo din daih tawh tih erawh engmah a hre ve hauh lo thung. Young Knives te tan hmelma thar a lo kal hi a ni ringawt, buaina chu a la intan dawn chauh a ang kher mai.

*************************************

TO BE CONTINUE