YOUNG KNIVES (MIZO FICTION FANTASY STORY) Written by : Aaron Malsawmdawngzuala CHAPTER - 3

 YOUNG KNIVES

(MIZO FICTION FANTASY STORY)

Written by : Aaron Malsawmdawngzuala

CHAPTER - 3

***************************************

Ruatfela chu a rawn kal phei a, Emily, Augustine-a, Zorama leh David-a te chuan an lo en thap mai. An hmaah tak chuan a rawn ding a, "Tunge i nih ve le, nang?" tiin Zorama chuan a lo zawt a. A mal te te in Ruatfela chuan a han en kual den den a, "Ka hming chu Lalruatfela a ni a, nangmah ni ang tho hi ka ni." tiin a lo chhang a.

Zorama chu a khi suk a , "Ngawi teh lawk, nangmah ni ang tho i tih kha enge awmzia? Chuan...engthil nge helai hmunah hian thleng hi? Tute nge in nih ka hre lo che u a, helai hmunah bee kher hian enge kan inhmuhkhawm nachhan hi ka hrethiam lo." a lo ti nuah nuah mai.

Ruatfela chuan Zorama chu a han en ang ren rawn a, "Mihring pangngai tih theih bak chin, thiltihtheihna i nei tiraw?" tiin a han zawt a. Zorama chu a hawi hruk hruk a, "Aw nei e, i hmuh zawh chiah kha." a lo ti hu mai. Ruatfela chu a han thaw hak a, "Keini pawn, midang ho pawh hian kan nei ve vek." a han ti leh hmuk a.

"A enga pawh chu nise, engvanga hetiang thil nei hi nge kan nih, chuan nang hian engtin nge thil thleng tur hre lawk vek ni awm taka i rawn tawng vel zuah zuah a?" tiin Augustine-a chuan Ruatfela chu a han zawt ve leh a. Ruatfela chua  thaw hak a, "Ni e, nzian khan arsi tla atang khan thiltihtheihna danglam tak kan dawng vek a ni." tiin a lo chhang a.

David-a chu a lo nui huk mai, "Khate chu keichuan ka hria, midang pawn an hre vek ang. Mahse nang hian engtin nge keimahni hi hetah kan in tawk khawm dawn tih ilo hria lawk bik? Nangma thil tih vek em ni?" tiin a lo zawt ve leh a. Ruatfela chu a han ngawi vung vung a, "A chhan chu nang ni pali te hi in thawh ve hma khan ka hmu lawkj vek che u a ni." tiin a chhang ta mai a.

An en thup mai, "Eng a? A nih chuan heng kan power te hi nangma min pek vek maw?" Emily chuan a lo ti hu mai. Ruatfela chuan a lu thingin, "Ni lo, nizan arsi tla atang khan heng power te hi kan nei a ni. Tukin zing khan ka tho hmasa ber a, park ah khan ka lo la awm reng a. A mal te te in ka hmu vek che u, kaih thawh che u ka tum a, mahse tumah in tho thei lo. Chuvang chuan ka haw san che u a, tichuan power ka nei tih ka inhria a. Keiin ka nei a nih chuan nangni pawh hian in neih ve ka ring nghal a, tichuan ka zui ru vek che u a ni." tiin a lo chhang leh a.

An panga chuan an ngawi ta thap hlawm mai, "Anih chuan, enge i sawi duh ber chu han sawi ta che." David-a chuan a han ti leh a. Ruatfela chu a han thaw leh deuh hak a, "A tu a te mah hi hmelma ah insiam lovang u...thiltihtheihna kan nei vek a, chuvang chuan kan tan ho angai." tiin a chhang a.

Chutah Augustine-a chu a rawn nui chhuak ta huah huah mai, "Engmaw i sawi a? Kan tang ho ang maw? Tunge kan beih anga, keimahni anga power nei, hmelma beih tur pawh kan neih loh hi.." ngeiawm tak chuan a rawn ti a. Ruatfela chuan ava pan a, "Anih leh nangmah hi kan hmelma chu ni ta la, kan beih rawn ang che aw, i duh a mi?" a ti ta khur khur mai.

Zorama chu va kal in Ruatfela chu ava pawt hrang a, "NGawi lawk teh u, ngawi lawk teh u. Hetiang a nih ro ro chuan, Ruatfela sawi hi a dikna chin a awm ve tlat. Mahni tanghma hai a, mahni a thil ti tur bik kan awm lo. Thiltihtheihna kan nei vek a, i inbei lovang u." a rawn ti ve leh a.

Mahse David-a chu rawn inrawlhin, "Ani leh...hepa sawi hi engtin nge ni ve ta ang? Hmelma kan nei lova, beoh tur pawh kan nei o. Lo tangkhawm ta pawh ni ila, eng hna nge kan thawh chuan anga?" a arwn ti ve leh khauh mai. Emily chuan inthlahrun hmel tak hian, "ANih chuan keimahni leh keimahni hi kan inbei dawn tihna em ni? Sual kan do thei alawm, entirnan thil sual ti thin te kan enthla ru anga, kan power hmangin kan bei anga.." a rawn ti ve nuah nuah mai.

Ruatfela chu a khi suka , "Nula, i thluak a tha bik hle mai. Tunge i hming, min hrilh thei em?" tiin a han zawt a. Emily chuan zawi sap hian, "Emily Zodinpuii ka nia." a han ti tham tiak a. Ruatfela chuan a han en vang vang a, "Hming i nei nalh hle mai, ka sawi tu tak zawk chu hei chauh hi kan power a ni lo." a ti ta daih mai a.

MAk tih hmel tak hian Zorama chuan, "Enge i sawi awmzia, thiltihtheihna dang kan la nei amaw?" tiin a han zawt hu mai a. Ruatfela chu a han zuang deuh tharh tharh a, "Hetiang hi in ti thei ve em ka hre lova, mahse keichuan ka thei..." tih pah chuan a zuang vak vak a, chutah a ri phut a, van lamah chuan a per hian a per chho nawlh mai.

Sang takah a thlawk vang vang a, midang ho chuan vanva dak meuhvin an en chho thup mai. A thlawk sang telh telh a, chutah a sir zawng chuan a aia chak chuan rocket ang mai hian a thlawk leh a, darkar khata km 1000 ang vela chak hian a thlawk lehnghal. A ran em avang chuan a sir zawnga a thlawk phei chu an hmu hman lo lek lek zawk, mak an ti kher mai.

Mahse an rin loh tak mai chuan an hnung lamah chuan Ruatfela chu a rawn t(r)um leh chat mai a, a la khi deuh vur vur zui. Tumah chu an t(r)awng lo, "Kha kha ka ti thei bawk, nang ni ho pawh hian in tih ve theih vek ka ring." a han tih chhunzawm nghal a. Chutah DAvid-a chu a phur nasa mai, "Khawnge kan ti ve chhin ange." tiin a han zuang ve thauh thauh va.

Mahse Zorama chuan a lo pawt bet a, "Kha chu nakinah kan test dawnnia, engpawh chu nise...zawhna tamtak ka nei. Engtin nge hetiang thiltihtheihna hi kan neih, tu min pek nge?" a han ti a. David-a lah chuan, "Ele.. Pathian a nimai lawm." a lo ti hu mai. Augustine-a chu a han inngaihtuah vang vang a, "Arsi, arsi kha a ni. Arsi tla kha, khata tang khan kan nei a ni." a rawn ti chhuak hlawl mai.

Chuveleh Emily chuan, "Thil tuihnang, ban deuh mai. A rawng pawh a pawl(blue) ala ni zui, kha kha in taksa chungah a lut ve em?" a rawn ti ve leh a. Zorama leh DAvid-a chu an in en hu a, "AW.....aw..kha kha ka ke ah min rawn vial a, ka hrechhuak zawk mai." David-a chuan a rawn ti a.

"Nia, keipawh ka samah a kai a. Tih tlak ka tum a, mahse ka beng chhungah a lut. Khami hnu khan nikhawhrelovin ka awm, ka harh leh chuan power ka nei, ava mak tak." Zorama pawh chuan a lo ti ve bawk a. "Kan vaiin kan kawchhungah a lut vek, kha thil tuihnang, pawl vut mai kha. Khavanga hetiang dinhmun thleng thei hi kan ni, engtia rawn tla nge ka hre lova, eng thil nge a nih ka hre hek lo." tiin Ruatfela chuan a lo sawi fiah a.

Augustine-a chu a rawn hawi chhuak a, "Enge pawi? Khawi atanga kan neih nge, eng vanga kan neih nge a pawimawh lo. Thiltihtheihna kan nei a, a hmangtu tur chu keimah ni, a neitute kan ni. Hna chan zo hlim chiah ka ni a, ka chhungkua ka chawm angai. Kan rethei a, pawisa kan mamawh. Keichuan ka thiltihtheihna hi kan chhungkaw tun din nan, chhungkaw chawm nan ka hmang dawn." a ti chang deuh fak fak mai.

Emily chu a lo khi suk a, "Pawisa i ru dawn tihna maw?" tiin a lo zawt a. Augustine-a chuan Emliy chu rum tak hian a melh a, "Min dang dawn em ni?" a ti ta khur khur mai. Emily lah chuan a lo hlau bik lo nasa, rum taka lo melh let ve in, "Ka dang dawn che ka ti lo, mahse...dan che chu sawi loh, ka join zawk maithei che a ni." a ti ta daih mai.

Ruatfela pawh chu a rawn nui chhuak huk a, "Mi fel tak ka ni lova, keipawh pawisa mamawh ve tho ka ni. Ka fanu hi cancer a ni a, surgery tih nan pawisa tam tak a ngai. Mahse nuai chuang a ngaih avangin engmah ka ti thei lo, chuvang chuan keipawh hian ka thiltihtheihna hi ka hmang dawn, ka fanu chhan nan hian ka hmang dawn a ni." a lo ti ve bawk a.

DAvid-a lah chuan, "Engtin nge brain tumor natna chu i power hmanga i tih tawp anga? LEi i ti khi tuah tuah thei a, sang tak tak ah i thawlk thei bawk a. Brain tumor tih dam nen chuan a inthlau e, doctor ten an thiam daih zawk ang." a lo ti heu mai a, Emily chuan a lo tuk lawlh mai.

Zorama chu rawn tawng chhuak ve in, "Ka unaunu a dam lova, serious tak chu a ni lem lo. Mahse a dam har khawp mai, kei lahin ba ka ngah em em bawk a. Cheng nuai fe ka ba a, ka batna ten min vau reng bawk nen. Keipawh hian engtin emaw tak chuan ka power hi hman tangkai ka duh, engtin nge ka tih ang ka hre lo." a lo ti ve bawk a.

Emily chuan a aw a han thian kharh kharh a, "Ka rai mek a, min raitu hi class 12 ka nih laia kan English Teacher a nia.." a han ti dek dek chu DAvid-a bawk chuan, "Ehe...in Sir in maw? Ava tenawm, nangpawh enge i lo dawh hawrh hawrh aniang chu...." a lo ti leh zuah zuah mai.

Midang ho chuan an en rum hlawm ngei mai, David-a chu a inthlahrung hnuhnawh leh khawp mai a. Emily chuan sawi chhunzawm zelin, "Ka rai thu ka va hrilh a, ti tla turin min ti a. Ka tih tlak loh chuan ka video teh darh ah min vau a ni, kan chesual lai kha a lo record vek a ni. Ihh... min hrai rui a, min khawih a ni." a han ti zawi deuh sap a.

Ala sawi velo awmchhun, DAvid-a chu an en thap mai. Mei nei deuh tak hian Augustine-a chuan, "Nang ve kha..sawi tur te i nei ve em?" a han ti deuh kher a. DAvid-a chu a han nui deuh vur vur a, "Aaa...keichu in harsatna nena tehkhin chuan a ho inti maithei a. MAhse maw, keimah ah chuan.....a na ve lutuk. Ihh..ka bialnu in mi then a, midang min kawp san a. A hrehawm zia chu...mahse vawiin khan ka power ka hmang a, ka han sawp deuh zek anih kha....a bialpa thar kha." tiin intihtheih hmel tak chuan a han khi vur vur a.

Mahse Ruatfela chuan, "Kha kha i tih loh tawp tur a ni, tunge i nih tih hi tumah i hriat tir tur a ni lo. Thiltihtheihna, power i nei a ni tih an hriat vaih chuan, buaina i tawk zawk thei." tiin a lo hau vat a. DAvid-a lah chuan, "Enge, a hma zanin min hnek tlu tawp a nih kha." a lo ti leh bui bui mai.

Ruatfela chu a han thaw hak a, "Ti tawh suh, inzep arwh. Nang chauh a ni lo, kan vai hian kan inzep angai." a han ti leh a. Emily chuan a lu a han bu nghat nghat a, "Nia, a dik khawp mai. Mahse engtin nge kan inthup tlat chuan hna kan thawh theih ang, kan hmel kan ti danglam thei silova." a lo ti a.

DAvid-a bawk chuan, "Spiderman ang te ni ta ila chu, suit kan th(r)ui ang a. Tuman min hre nang, kan thlawk vek thei tho va....ihh, ka sawi awmzia chu. u Ruatfela pawh a thlawk thei a, kan thei ve vek tho chuan ka ring a." a lo ti leh zuah zuah mai. Zorama chu a thaw hak a, "Hepa hi kan team ah a tel awm sia, ava ninawm dawn tak." tiin DAvid-a chu a kawk a.

Chutah Augustine-a chu muang chang chuan a rawn hawi chhuak a, "Spiderman nih kher a ngai hleinem, suit th(r)ui pawh a ngai lo." a rawn ti a. Midang ho chuan an en thap mai, "Hmaikawr a awm alawm, kan vuah mai dawn alawm. Tichuan, kan duh duh kan ti thei ang. Harsatna nei vek kan i ni a, kan harsatna ti reh turin PAthianin power min pe vek. Miin tute nge kan nih an hre dawn lo, khawvel hi kan ta a ni mai tihian." Augustine-a bawk chuan a han ti leh a.

Ruatfela chuan Augustine-a chu a en vang vang a, "I sawi dik e, khawi atanga lo kal nge, eng atanga kan neih nge hriat a pawimawh lo. Kan harsatna su kiang tu tur chu kan nei tawh, chuvang chuan kan panga hian team khat tawp kan ni ang. Tumah kan inphatsan lo ang a, tute nge kan nih kan in hre tawn vek tawh bawk a. Tunah hian sawi fel ang u, keiman bul ka tan ang." tih pah chuan a kut chu a han lek kang a.

A zawna lei(ground) chu a rawn pawng chhuak a, an awm(chest) vel thleng chu a rawn pawng chhuak a. A hmawrah chuan Ruatfela chuan a kut chu a dah a, "Tunge min join dawn le?" a han ti a. Augustine-a chuan a kut chu a dah ve a, Zorama chuan a dah ve bawk. David-a chuan a han enkual den den hlawm a, "Nuam dawn ve awww.." tih pah chuan a dah ve a.

Emily chiah chuan ala dah lo, a ngawi vung vung a. A mitthlaah chuan Erik-a'n a vau lai te, a bialnu nena an kaldun lai te, a mit hmuh lai ngeia a bialnu in Erika a kuah derh kher laite chu a mitthla ah chuan a rawn lang zawk zawk mai. Second 10 vel lai chu a ngawi vung vung a, a kut chu lungpui chungah chuan a dah ve ta.

Ruatfela chu a khi suk a, "Ti kha chuan team khat kan din tawh a, tumah kan inphatsan lovang." a han ti a. DAvid-a bawk chuan, "Ngawi lawks teh u, group hming te kan nei ve dawn lo em ni? Whatsapp group te siam ve ila, team kan din ve ta ro ro. Enge a hming ni ang, Mizo Justice LEague kan ti dawn mi, nge suicide squad?" a lo ti leh zuah zuah mai.

Augustine-a chuan vur tlang chu a siam chhuak a, chemte shape chiah chiah hian a siam a. A hriam hmel kher mai, "KAn la naupang hlawm a, kum 40 em tling tur awm ang ka hmu lo che u. Chuvang chuan kan chak tha dawn tih ka hria, chemte hriam tak ang kan ni." tih pah chuan lungpui chungah chuan chem chu a vit bur pawp a.

Augustine-a chu a thaw deuh hak a, "A sap tawng takin... YOUNG KNIVES... chu chu ka phuah e." a han ti a. DAvid-a bawk chuan kut a lo beng vel, "A va nalh thaks thaks ve, bro. Enteh, LEader ni law law teh. Phuah nalh lutuk, T-shirt te siam tir ang u." a lo ti leh zuah zuah mai.

Mahse Ruatfela chu lo inrawlh in, "Hmaikawr kan vuah vek ang, ka duhdan phei chuan kan hmel chauh nilo, kan tukhum lam thlenga khuh thei tur. Ka sawi thiam dan ber chuan, rukru ho hmaikawr ang chi hi. Tiang hi vuah ila a tha ang, min hrelo ber ang." a lo ti ve leh a.

Zorama chuan a lu a bu nghat nghat a, "Keichu ka pawm e, a tha khawp ang." a lo ti a. Midang ho pawh chuan an pawm tlang khawp mai, tichuan team chu an din fel ta. YOUNG KNIVES chu a lo piang ta a, nickname an inphuah theuh bawk. Emily chu tui thunun thei a nih avangin SHORE tiin a inphuah a, DAvid-a chu mei alh siamchhuak thei a nih avangin SOLARIS tiin a inphuah a, DAvid-a hian a power, mei alh hi ni(sun) ang vela sa pawn a siam thei a ni.

A awmzia chu maktaduai 15 degree celsius vela sa pawh a siamchhuak thei tihna a nih chu, a sa tha vet vet khawp ang. Augustine-a chu vur siamchhuak thei a nih avang chuan NAVADA tiin a inphuah bawk a, Zorama chu thli thunun thei a nih avangin HURRICANE tiin a inphuah ve bawk.

An zinga upa ber, Ruatfela chu lei leh, vaivut leh thing thunun thei, ti che thei a nih avang chuan VOLCANO tiin a inphuah bawk a, an super hero hming ve a ni tihna  anih chu. An panga chuan inthurualin an thiltihtheihnate chu midang tana malsawmna nilovin, anmahni hlawkna atana hman an tum ta zawk a nih hmel khawp mai.

***********************************

Zan dar 12 vel a ni a, mipa leh hmeichhia hi kawnglaiah chuan an inzui dun a. Rawmawlin an hmai chu an tuam ve ve a, an lan dan atang chuan an fel hmel vak loh kher mai. ATM booth lam chu an pan a, CCTV awmna an thlen dawn tep chuan an ding a.

A mipa zawk chu a thu hniam a, a koki ah chuan a hmeichhia zawk chu a lawn a, a chuang ta vung mai. Tichuan mipa chu a ding a, hmeichhia chu a koki chhuan ta vu vu mai. Chu hmeichhia chu a hming chu Siamtei a ni a, mipa zawk chu Rindika a ni. Siamtei chuan a iptea atang chuan screw driver niawm tak hi a phawrh a, CCTV chu a herh ang nawk nawk a.

Reiloteah chuan a herh thlawn der mai, tichuan CCTV chu an bag ah laiah chuan an khung hmak mai a. ATM ah chuan an lut ta, ATM chhunga CCTV pawh chu an la thla leh a, tichuan ATM machine chu an hmanrua chuan awlsam takin an hawng thei ta mai a nih chu.

Pawisa awm zawng zawng deuh thaw chu an la fai ta vek a, an bag ah pawh a rit tha nalh nalh khawp mai. ATM atang chuan an chhuak leh a, an motor lam chu an pan mek a. Motor kawngkhar an hawng chiah chu a driver seat anh chuan hmaituam ve tho pakhat hi a lo thu khur mai a, Siamtei leh Rindika te chu an phu zawk mai.

Chu hmaituam pa chuan Rindika chu a dulah a tlawh nghal pawp mai a, Rindika chu a thal tawp mai. Siamtei chuan pistol chu a phawrh nghal a, chu hmaituam pa chu a tin a. Mahse hmaituam pa chuan a kut chu a lek kang a, chutah Siamtei pistol chu vur ang mai hian a khal nghal vek mai.

Siamtei kut pawh chu a rawn vawt veka , pistol chu a thlah rang takzet. Rindika chu a rawn tho leh a, pistol phawrh ve in chu hmaituampa chu a tin ve nghal bawk a. Mahse a hnunglam atang chuan tu emaw hian a rawn rek thut a, lamlianah chuan a theh thal tawp mai.

Chupa chu tudang nilovin Ruatfela a ni a, Siamtei te motor-a lo thu chu Augustine-a a ni. An hmai an tuam ve ve bawk, Rindika chu a rawn tho leh a, thinrim tak hian chemte phawrhin Augustine-a chu ava pan a, mahse a hma zawna tui tling chu a rawn inphuh thut mai.

Tui tlemte ni si chu a rawn tam ta vak mai a, Rindika chu a huh vek mai. Tui force chu a nat em avangin a leng deuh dawrh lehnghal a, Siamtei chuan mak a tiin a hlau rilru kher mai. Hnunglam ava en chu EMily a lo ding reng mai a, a hmai a lo tuam ve tho bawk.

Motor atang chuan Augustine-a chu a rawn chhuk a, Rindika chu Siamtei chuan a kai tho vat a. An bag chu an la thlauh zui, Rindika chuan bag chu va lak a tum a. Mahse a hma zawn takah chuan DAvid-a a rawn t(r)um thut mai a, van atanga rawn zuang thla ang mai a nih avang chuan Rindika chuan mak a ti takzet.

David-a pawh chuan a hmai a tuam ve tho va, a la khu deuh vut vut zui. Rindika chuan hlau rilru hle mahse a inla pa lui hram hram a, "Tunge i nih?" tiin a han vin deuh tuar a. Chutah le, a kut pahnih chu DAvid-a chuan a ti alh ta hluah hluah mai a. Siamtei chuan Rindika chu a rawn pawt hrang nghal, Emily chu lo pheiin bag chu a rawn la nalh mai.

Siamtei chuan Rindika chu a pawt phei zel a, "Nakinah, Duhtak...kal phawt ang." a ti a. Rindika chu a thinrim kher mai, mahse power nei ve lo ta na na na chu, an kal ta a. An kal hnu chuan Zorama chu a rawn thleng ve nghal bawk a, "Engmah pawh i ti ve hman hleinem." DAvid-a chuan a lo la ti zui.

Zorama chuan chhan pawh a chhang peih lo, Emily chuan bag chu a hawng a. Ruatfela chuan inti thu tak hian a rawn laksak nghal hmak a, pawisa a lo tam mep mep khawp mai. An khi vur vur hlawm mai a, "Kan hausa dawn..kan va hausa dawn em!" tiin David-a chu a nui huah huah mai.

Emily chuan a lo kuk fawk a, "Bengchheng suh...miin kan thawm an hria ange." a lo ti vat a. Augustine-a chu a ngawi vang vang a, "Khawnge kan insem ang, khawlaia insem tawp hi chu a chi dawn miah lo ania." a lo ti a. Ruatfela chuan a lu a han bu nghat nghat a, "Keimah in ka awm, keimahin in ka luah alawm. Ka inah phei phawt ang u." a lo ti a.

"Engtin nge kan insem dawn?" DAvid-a bawk chuan a lo ti leh hu mai. "PAwisa awm zat hi kan chhiar phawt angai dawn lawm, tichuan a awm zat a zirin kan insem ang." tiin Augustine-a chuan a chhang a. Zorama chu rawn tawng chhuak ve in, "Ni e, tumah chang tam bik emaw, chang tlem bik kan awm tur a ni lo." a rawn ti a.

Augustine-a pawh chuan, "Ni e, fair takin kan che tur a ni." a lo ti ve bawk. David-a lah chuan, "Nia..team kan nia, team chu team a ni." a lo ti ve nghut nghut a. An vai chuan an motor ruk ah chuan an chuang a, tichuan Ruatfela in lam pan chuan pawisa insem turin an kal ta a.

******************************************

Inchhungah chuan Siamtei leh Rindika te chu an lut a, Rindika chuan a hmaituamna rawmawl chu phelh in chhuatah chuan a han vawm pawm a. Thinrim hmel tak hian, "Tu phiangsen te nge maw an nih le, hmelma lah hi kan nei chhen reng mai." a han ti hlur a.

Siamtei chu thutthleng ah chuan a thu a, "Mi mai mai chu an ni lo tawp tih a chiang, thiltihtheihna an nei tlat, power an nei tlat." a lo ti ve bawk a. Rindika pawh chu a thu ve a, "Hetiang mi ho hi chu ka deal thiam tawh emai, mihring pangngai mah ni ila khatiang chi ho kha chu kan dahthat nual tawh kha." tiin a han khi deuh suk a.

Siamtei chuan Rindika kutah chuan a vuan a, "Lungngai suh, engtik lai pawhin kan vannei reng thei bik hleinem. Hlawhtlin reng theih a ni lova, zanin chu kan hlawhchham ve a ni mai. A lehpekah chuan plan mumal tak kan siam tawh dawn nia, hmanrua pawh siam belh a ngai dawn a nih hmel." zaidam tak chuan a han ti a.

Rindika chuan a lu chu a bu nghat nghat a, "An la hria ang, kan la tawng leh khawp ang. Ngam loh kan nei tur a ni lo, Siamte. PAwisa dang ruk chhuah ai mah chuan keichu khamite kha a ni ka duh ni, an vaiin, a mal te te in ka dahtha vek ang." a han ti khur khur a.

Siamtei leh Rindika te hi nupa an ni a, an la naupang hle thung. College student ve ve an ni a, mahse zan lamah ruk an ru thin thung a ni. An nupa hian rukruk lamah leh technology lamah an sang hle a, Siamtei hi kum 20 niin Rindika hi kum 24 a ni. An pahnih hian bank te, dawr te leh ATM booth thlengin an rawn thin a, hmanrua an nei tha in ruk pawh an awlsam thin hle bawk.

A rukin an hausa dun hle a, mahse an in erawh a lian lo. A chhan chu mi in luah an ni a, in nuam tak leh zau tak ah awm thei reng mahse an inthup a ngaih avang chuan rethei tak, khawsa tawk tawk angin an lang thin a ni. An finger print te pawh an ti bo vek zel a, an sulhnu pawh chhuichhuah theih loh turin fimkhur takin an siam thin a ni.

VEng hrang hrang ah ruk an ru thin a, mahse mihringte tihnat erawh an duh ngai lo thung. An mahni bei tute bak an bei let ngai lova, tual that khawp khawpin an chet ngai loh mai bakah misual dang, rukru ve thin ho hi an ngai thei lo hle bawk. An pahnih hian team khat ang chu an ni ve a, RAGE BAR tiin an inphuah a ni.

******************************************

A tuk ah chuan Ruatfela chu damdawiin lam a pan a, ward chhunga a fanu, oxygen mask vuah chunga lo muhil mek chu a en ngawih ngawih a. A rilru chuan inbia in, "BAwihte, i pa ka awm alawm. I tha leh em em ang, surgery tihna tur pawisa chu ka nei tawh e." tiin a mittui chu a tling teuh mai.

Chutih lai chuan doctor a lo kal a, "Pu Ruatfel, enge i thutlukna chu ni ta?" tiin a rawn zawt a. Ruatfela chu a han thaw hak a, "Doctor, surgery chu ti ngei ang che u." tiin a chhang a. Doctor chuan a en deuh hu mai, "Pu Ruatfel, ka sawi tawh ang khan cheng nuai 2 chuang daih a nia, chu ai pawh chuan a tam maithei. I chiang chiah amaw, pawisa tam tham tak a ni asin." a han ti a.

Ruatfela chu a lo khi deuh suk a, "Ka fanu dam leh nan chuan engpawh ka ti ang, eng anga tam pawh nise. Theih tawp chhuah ula, ka fanu nunna hi venghim hram ang che u." tiin a chhang leh a. Doctor chu a ngawi vung vung a, "AWle, kan lo buaipui ang e. Anih chuan naktuk chhun dar 12 ah kan zai anga, tih tur pawimawh dang chu kan inhrilh leh dawnnia." a ti a, a kalsan ta a.

Chutih lai chuan a thian dangte, Zorama, Emily, Augustine-a leh David-a te chu an rawn kal a. Ruatfela fanu mu bar mai chu an en a, "Saw saw em ni i fanu chu?" tiin Emily chuan a zawt a. Ruatfela chu a nui khi suk a, "A nih saw.." a ti zawi sap mai. Emily chuan a en vang vang a, "A hmeltha hle mai, chuan a chhun bawk che." nui sen sen chung chuan a han ti a.

DAvid-a lah chuan, "Keichu in in ang pawh ka ti lo, i fanu a ngo sia, i hang ve angreng sia.." a lo ti leh zuah zuah mai a, Emily chuan a nghawk pawp mai. Augustine-a chuan Ruatfela chu a en vang vang a, "Nizana kan pawisa ruk chhuah kha cheng nuai 2 leh tlem a ni a, chu chu i fanu zaina atan kan hlan vek che a. Cheng khat pawh kan chang lo, ruk dang kan ru leh dawn tihna em ni?" a lo ti vin deuh hlur a.

DAvid-a bawk chuan, "Nia, kan insem dawn maw ka tia. Kei phei chu ka broke teh mai ania aw, tunah phei chuan cheng 50 bak ka nei lo." a lo ti ve leh nuah nuah mai. Ruatfela chuan a lu a han bu nghat nghat a, "Ka hria alawm, chuan in chungah ka lawm hle bawk. I tan engemaw tak ka la ti ve ang, ka tiam a che u." a ti a.

Zorama chu rawn tawng chhuak ve in, "Zaninah kan che chhuak leh ang, a theih chhung chu keichuan ruk ka ru dawn. HEi hi kan zalenna a ni a, kan thu thu a ni." a rawn ti chang fak mai a. Midang chu an ngawi thap mai, "Ka lo kal ve duh ania aw, ka broke emai." DAvida chuan a rawn ti leh hram a.

Augustine-a chuan ZOrama darah chuan a beng thak thak a, "Kan inkawm ngeih dawn riau mai nang nen hian.." a han ti te te phawt a. Chutah midang chu enkual leh in, "Tunge zaninah min zui ve dawn?" tiin a han zawt hlawm a. David-a chuan a ban a lo phar nghal, "A tha e, team kan ni a. Kan kal chhuak vek zel tur a ni, kan inah kan inhmu khawm dawn nia." Ruatfela chuan a han ti a.

Emily chuan Ruatfela fanu chu a la en ngawih ngawih mai a, a khawngaih hmel kher mai. Ruatfela bawk chuan, "Pawisa mamawh vek kan ni a, tumah indem thei bik kan awm lo. KAn tih tih chu kan ti zel ang, amaherawh chu kan fimkhur hle a ngai thung ang. Kan hmel, kan nihna hi an hre tur a ni lo. Mi zingah pawh kan power te hi show reng reng loh tur, chu chu kan vawn reng angai." a han ti leh dap dap a.

Emily chuan Ruatfela chu a en vang vang a, "I sawi dik alawm, pawisa mamawh vek kan ni. I fanu saw a tha chhuak leh ngei ang, keipawh ka nau pai hi ka ti tla dawn lo...ka hring chhuak ngei dawn a ni. Ka enkawl ang a, patea pali lai a nei nghal dawn tihna ania." tiin a han khi suk a.

DAvid-a bawk chu rawn tawng veleh in, "Aa..keichu patea ka ni duh lo. Min u tir dawnnia, a senior thlak emai a...tiraw bor." tia nui huah huah chung chuan Augustine-a chu a han nghawk zeuh va, mahse Augustine-a chu a lo nui miah lo. Midang chu a han en kual a, tumah chu an lo nui lova, a zak ru angreng kher mai.

*********************************************

TO BE CONTINUE