UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 2

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 2

*****************************************

Zing dar 6 leh a chanve a pel tawh a, crime scene ah chuan mipui chu an awm nual hman tawh tho mai. Nunui thihna hmun, kudam kha kawnghnuai a awm a ni a. Chutia hmun hla lutuk ni lo mahse a fal angreng hle a, Pu Ruata te kawmthlang lawk a awm niin kudam pawh chu anmahni kudam a ni.

Pu Ruata zing huan kal tur chuan a hmu a, a hmuh rual rualin police a phone nghal a. Thenawm khawveng te hrilh darh nghalin mipui pawh an lo pung khawm ta a lo ni a, police te pawh an lo thleng vat a. Chumi case bawhzui tura ruat, SI Hlua chu motor atang chuan a rawn chhuak a.

Kudam chhungah chuan a lut a, constable dang lo awm ve te chuan mipui chu an hnawt then a. Ruang chu cage chhungah chuan a lo la awm a, rul ngan ho pawh chuan an lo la vial tuau tuau mai. Nunui ruang chu en a hrehawm takzet, a chil phuan a tla buah mai a, a vun te chu a dan hian a dang var pup mai.

SI Hlua chuan ruang chu a en vang vang a, "Sarah lo kal lawk teh." tiin head constable, Sarah-i chu a ko va. Sarah-i pawh chu a rawn phei vat a, "Aw enge ni ta, Sir?" a rawn ti a. Hlua chuan a aw a han thian kharh kharh a, "Heng rul ho hi tuten nge la sawn dawn?" tiin a lo zawt let a.

"Sir, forest department lam ho kan phone tawh a, an lo thleng tep ang." tiin Sarah-i chuan a chhang a. A sawi zawh rual rual chuan forest lam ho pawh chu an rawn thleng chawp chilh ve nghal a. Durataf chu an la sawn a, cage kalhna tala chu an tichhia a, fimkhur tak chuan a mal te te in rul ngan te chu an man thei ta vek a.

Chuveleh Hlua chu ava kal phei a, a aia chiang zawk chuan Nunui ruang chu a han en leh vang vang a. A kut phuarna hrui, sei tak mai pawh chu a lo la awm reng bawk. Hlua chu a ding a, kudam chhung chu a han en kual a. Cage awmna zawn, pen 20 vela hla ah chuan ban a hrui zai chah sa, tawite lo la intawn bet chu ava hmu a.

Rang takin a va pan nghal vat a, hrui chu a en chiang a. A phelh nghal a, ruang awmna lamah chuan ava keng phei leh a. Cage chhunga hrui, Nunui kut phuartu nen chuan a han en dun a. A lu a bu nghat nghat a, "A inang chiah chiah." a ti a. Sarah-i chuan a lo en a, "Enge awmzia, Sir?" a lo ti hu mai.

Hlua chu a han ding ngil arh a, chung lam chu a en chho va. Ban in khamphei a hmuh chuan thil thlen dan chu a ring thiam deuh nghal. Sarah-i chu a en a, "Tualthahna a ni." tih pah chuan Nunui kuta hrui chu a phelh a, Nunui kut, hruai phuarna chin chi a pilh hian a pilh hrup mai a, "Hei en rawh." tiin Hlua chuan a kawk a.

Sarah-i chuan a en chiang a, "Ehe, a vun a thler titih hial a nih hi, hrui hi a rawlin a hriam hmel bawk sia." a ti nuah nuah mai. Hlua chuan a lu a lo bu nghat a, "Chuvang reng a, a taksa rihna zawng zawng in a uai hneh em alawm." a lo ti a. Sarah-i chuan hriatthiamloh hmel tak hian, "Enge awmzia, an khai kang i tihna ami?" tiin a lo zawt leh a.

"Aw ni e, inchung khi en la, han hawi chho teh." tiin a lo hrilh a. Sarah-i chuan inchung lam chu a han en a, "Thing inkham phei khi, khitah hian hruai a khai a ni. Tichuan sawlam sawm en leh la.." tiin hrui ava lakna, ban chu a kawhhmuh leh a. Sarah-i chuan a en ve zel bawk, "Tah sawn tualthattu hian hrui chu a zai chat a, victim hi rulngan bawm chhungah hian a tla thla ta a ni." tiin Hlua chuan a sawi chhunzawm zel a.

Sarah-i chu a ngawi vang vang a, "Anih leh durataf kha, a chungah khan a awm tlat bawk sia?" tiin a lo zawt leh a. Constable dang pakhat, Sentea chuan, "Tualthattu hian a khung hnuin a chhuah theih loh nan tiin a dah a ni mai alawm." a lo ti sam et a. Sarah-i lah chuan, "A theih ngawt dawn mi, a rit ve ropui sia. Mahnia chawi sawn lawp lawp theih a ni miah lo ania, durataf kha.." a lo ti nuah nuah a.

"Tualthattu hi mipakhat chiah an ni lo tihna a ni mai alawm." Sentea chuan a lo ti sam leh et mai. Sarah-i chu ala tlawm duh bik lo, "Keichu mak ka la ti tho tho, hemi cage chhung ah hian a tla mahse, a ke hi phuar ve a ni lova. A tlak rual rual khan a zuang chhuak hman dawn lutuk cage chhung atang hian, rulin lo chuk hman pawh nise thui fe chu a tlanchhe hman ngei ang." a lo ti leh a.

Sentea bawk chuan lo chhang lehin, "A khai khan khan a chiu mu pawh a ni thei a, nikhawhrelovin a awm sa a nih hmel ka ti keichuan...post mortem result ah a hriat ang chu." a lo ti ve leh a. Hlua erawh chu a ngawi reng a, a inngaihtuah nasat hmel kher mai.

Forensic doctor te pawh an lo thleng ve leh a, ruang chu an rawn enfiah ve a. Doctor pakhat chuan, "Rul chukna hnuhma hi a taksa ah hian hmun 16 laiah a awm a, an chukna ngai chiah ah hian an chuk nual bawk. A vai belhkhawmin vawi 30 vel an chuk a ni." tiin Hlua chu a hrilh a.

Ruang chu post mortem turin an phur phei ta a, a vun te chu a puar hian a puar luah hlawm mai. Hlua chuan Pu Ruata chu a ko va, "Kudam hi inkalh ngai lo tihna em ni?" tiin a zawt a. "Kalh ngai e, tukin ka huan kal kha a lo inhawng huau kha ka hmu a. Chahbi ka ak reng bawk sia, engtin nge a lo inhawn ka hre bik lo." tiin Pu Ruata chuan a lo chhang a.

"Anih leh chabi spare in nei em?"

"Aih, kudam chahbi kher kher hi chu a spare kan nei lo."

"Tualthahna a i ngeia rin a ni a, ka sawi awmzia chu tu emaw thil tih a ni hethil hi. Nangmahni hrechiangtu an nih hmel ka ti bawk a, han rinhlelh tur awm ang i nei mial em?"

"KA nei lo, ka pu. HEtiang ti duhtu tur hmelhriat leh chhungkhat ka neih awm ka hre lo, chubakah kan kudam hi chu kan kal khat viau mai."

Hlua chu a ngawi deuh vang vang a, "Anih leh mithi kha tunge a nih i hre ngailo tak tak amaw?" tiin a hann zawt leh a. Pu Ruata chuan a lu thingin, "Ka hre ngai lo, ka hriat mi a ni lo hrim hrim." tiin a lo chhang leh a. SI Hlua chuan a lu a bu nghauh nghauh va, "Awle, nakinah kan la mamawh dawn che a, inah lo awm reng ang che." tiin a hrilh a.

***************************************

Abawihi chu a room, thim reih ruih ah chuan a awm a. Bangah chuan Nunui, a victim hmasa ber thlalak chu a lo awm a. Abawihi chuan marker sen(red) chuan Nunui hmai zawn takah chuan lian tak hian X tih chu a ziak a, a bul chiah ah chuan mipa pakhat thlalak chu a bel leh a.

Kum 40-45 vel ni awm tak, hmeltha lutuk bik lem lo, cher lampang a ni. Abawihi chuan a en vang vang a, Nunui thlalak chungah chuan number 1 tih chu a ziak a, chupa thlalak chungah chuan 2 tih chu a ziak leh a. A thaw deuh hak a, "Pakhatna chu a zo ta." a ti zawi sap a.

A bag a la a, Shadow X inthuamna, hoodie dum, a hma taka Shadow X tih inziahna leh jeans kekawr tlawn dum, kutkawr dum leh face mask dum pangngai chu a la khawm a. Tichuan a bag ah chuan a khung vek a, amah tak chu pangngai tak chuan a inchei thung.

BAg chu a ak a, room atang chuan a chhuak a. Motor ah chuan lutin a seat hnunglam hnuaiah chuan a bag chu a thukru a, tichuan motor chu start in chak takin a tlan ta vang vang a. A tlan mek lai chuan a phone a rawn ri a, "Hello?" tiin a chhang vat a. Phone ami chuan, "Amazon atangin a nia, i thil chah kha a lo thleng a. I address sawina ah khan ka awm tawh a, khawnge i awm aw?" a rawn ti a.

"Ka lo thleng tep, ka lo thleng nghal animai." tiin Abawihi chuan phone chu a dah nghal hmak a, minute 2 vel hnuah chuan waiting shed pakhat hi a thleng a, a motor chu a tiding a. A bulah chuan Delivery boy chu a lo awm ngei bawk, motor atang chuan Abawihi chu a rawn chhuak a.

Delivery Boy chuan a lo en hu mai, "Keimah ka nia, ka tihpalh lutuk ka lo tlai a.." tiin Abawihi chuan thupha a chawi nghal mawlh mawlh a. Delivery boy chuan a thil chah chu a pe a, tichuan a tlan leh nghal mai a. Abawihi chu motor chhungah chuan a lut leh a, a thil chah chu a hawng a.

Hydroflouric Acid galon khat lai mai chu a lo chah hi a lo ni, a phone a phawrh leh a. Tu emaw chu a call a, "Hello, i hman tawh em? HEi ka inpeih tawh ania, ka motor ka lo keng bawk aw?" a han ti nghal luam a. Phone ami chu mipa lo niin, "AW...kan veng taxi stand ka thleng tep. Lo tlan phei rawh, kan inhmu dawnnia." a rawn ti a.

Abawihi chu a tlan zel a, tichuan taxi stand chu ava thleng ta. Phone-a a biak pa chu a rawn kal phei a, chupa chu tudang nilovin a victim dawt leh, kum 44 mi Peter-a a ni. Abawihi hian a victim dawt leh tur a nih avang pawh a ni mahna, a ngaizawng der mek a ni.

Peter-a chu a rawn nui phei vur vur a, motor chhungah chuan a rawn chuang a. Abawihi biangah chuan fawp zeuhvin, "I van chhelo ve a, ka duat bawihte.." a han ti vel a. Abawihi pawh chu za lo tak chuan a lo khi lui suk mai, "Tun tum chu i tlai lo ve khiah mai a.." a lo ti a.

Petera chu a han ner deuh nung a, "Nia...vawiin chu kan nu in a len chhuah pui vek a. Chuvang chuan ka hman hma ve thei hram a nih hi, ka nupui ni zawk la ka van ti tak." tiin a han inla zei kual vel a. A ruk tak chuan Abawihi chuan a ten takzet, mahse duh ngawih ngawih anga a awm a ngai tlat bawk si.

*********************************************

Police Station ah chuan Sarah-i leh Hlua te chu an lo inbe mawlh mawlh a, chutih lai chuan constable Sentea chu a rawn kal a, "Sir, mitthi chhungte kan hre tawh a. Mitthi hi Lalnunsangi a ni a, Nunui tia koh thin a ni. Chuan Vengthar lama awm an ni bawk, a nu leh pate chu Pu Thangliana leh Pi Liankhumi te an ni." a rawn ti zat zat mai.

Hlua chuan a lu a lo bu nghauh nghauh va, "A that nasat chu, mitthi chhungte in lam kan pan vat angai. Pu Ruata pawh biak ala ngai dawn bawk a, hun khawhral thiang kan ni lo. Station hi lo ngaihtuah rawh aw, Sente? KEi leh Sarah-i chu mitthi chhungte in lamah kan va kal ange." a ti a.

Sentea chuan a lu lo bu nghatin, "Awle Sir. Constable Zuala te chu an awm tawh a, an lo ngaichang ang che." a lo ti a. Sarah-i leh Hlua te chu an inzui chhuak nghal a, motorah chuan lutin Nunui te in lam pan chuan an tlan ta nghal vang vang a. "Post mortem report a lo chhuak tawh em?" tiin Hlua chuan SArah-i chu a zawt a.

Sarah-i chuan a lu lo thingin, "Aih la chhuak lo, Sir...a lo chhuah veleh kan rawn phone ang an ti che a, Dr. Samuela khan a tia." tiin a lo chhang a. Hlua chu a han ngawi deuh vang vang a, "Ka ngaihtuah mai mai a, mitthi kha...tunge khah, a hming ka theihnghilh leh nghal daih.." a han ti hu a.

"Nunui, Lalnunsangi." Sarah-i chuan a lo ti nghal vat a. Hlua chu a han khi deuh suk a, "E aw ni tak, Nunui. Ka sawi tum tak zawk chu, tualthattu hi a nunrawng awm ka ti. Tinge khatia rul ngan 10 rual zet a chuk hlum tir le, pakhat lek pawhin a thah theih dawn tehreng nen...a haw hle ni tur a ni." a han ti nuah nuah a.

"Nia tiraw, Sir. Aman thah ve mai awm, chubakah hrehawm a tuar tir nasa e. Hmeichhe awmnem zawk lehnghal, mipa rilru chhia hi chu an sual ngawt mai." Sarah-i chuan a lo ti a. Hlua chu a nui deuh huk mai, "Mipa nge hmeichhia a nih i hria ami, tualthattu hi?" tiin a lo zawt vat a.

Za lo tih hriat tak chuan inthiamloh hmel tak hian Sarah-i chu a nui suk a, "Hehe..ahhh, mipa a nih duh hmel alawm. Hmeichhe tih atan em chuan a rapthlak ka ti mah mah alawm, chubakah inchung ban ah khan ala khai kang zui ania." a han ti leh a.

"Nia....aman a thah kher loh nachhan hi, rul a chuk hlum tir kher nachhan hi aman tual a thah duh loh vang pawh a ni ve thei tho bawk."

"Chupawh nise a suahsual thlak, a nunrawn thlak ak ti tho tho. Tualthattu tiin tunah pawh kan sawi char char tho hi, hei bak baka tualthahna a awm hleinem le." Vih hlum tawp, kah hlum tawp te nise ala rapthlak lo deuh zawk alawm."

"Hmeichhe thil tih a nih chu i ring lo takzet amaw?"

"Ring lem lo, mahse a lo ni tho thei bawk a."

Hlua chu a khi leh suk a, "Mitthi chhungte thu zawh fiah hi nuam lo ka ti thei kkhawp mai, mahse kan hna a ni miau sia leh..." a han ti deuh vawng vawng a. Sarah-i chuan a chhang lo, a ngawi reng a. Reiloteah chuan Nunui te in chu an thleng a, mipui pawh an lo tam tawh khawp mai.

**********************************************

Tlang pakhatah hian Abawihi leh Petera te chu an thudun a, an awmna hmun chu khaw thlir theihna niin a view a tha bawk a, spot rem tak a ni. A fal deuh bawk nen, inngaizawngte tan chuan chu tluka sawirem tlang a awm lovang. Petera chuan hnai deuh takah chuan a han thut hnaih a, "Tunlai chu i induh khawp mai, ka message pawh i chhang tha ngai bawk si lo." tiin a sam chu a chul sak vel a.

"Nia, ka buai em alawm. Kan hna hi a buaithlak ve lutuk a, office ka ban har phah thei lutuk." tiin Abawihi chuan a lo chhang a. Petera chu a han ngawi vang vang a, "Zanin ah chuan rem i ti tawh ngei ang tiraw, ka hmangaih tak tak che, min ringhlel suh. Ka nei ang che, ka kalsan miah lovang che." a han ti chiam a.

MAhse Abawihi chuan a lu lo thingin, "Ka duh lo, i nupui saw then phawt rawh. Keipawn ka hmangaih che a, ka la thianghlim bawk a, chuvang chuan kan inneih phawt angai." a lo ti tlat mai. Petera chu a han thaw hak a, "Ka then dawn alawm, mahse tun ah chuan a then theih tut tut si hleinem." a han ti leh a.

Abawihi chu a khi suka , "Anih chuan i la nghah deuh angai tihna animai, kei chu ka rinawm reng dawn tho va...ka ngaihtuahawm loh." tiin a lo chhang leh a. An ngawi dun vang vang a, "Motor ah sawn beer ka dah, hnunglam saw va hawng la. Kan in dawnnia, i cool emai." Abawihi chuan a rawn ti deuh thut a.

Petera pawh chu a ding a, motor lam pan chuan ava kal ve mai bawk a. Motor hnung chu a hawng a, "Khawiah maw? Khawiah maw i dah a?" tiin a hai vak vak mai. A ding ngil a, "KA hmu lo reng reng." a han ti nuah nuah a. Chutah hnunglam atang chuan a lu chu tu emaw hian a rawn hlap pawp mai, Petera chu a hai chhawk mai.

Nikhawhrelovin a let nghal tawp mai a, a hnungah chuan Abawihi chu thing tum nen hian a lo ding reng mai. A han hawi kual a, tuman an hmu lo tih a chian hnu chuan seat hnungah chuan Petera chu Abawihi chuan a mut tir a. Tichuan motor chhungah chuan lutin a bag chu a phawrh chhuak a, Shadow X hnawmhnaw chu a la chhuak ta a.

A ha mawlh mawlh a, tichuan motor chu start-in a tlan ta vang vang a. Hla deuh takah chuan a tlan pui zel a, ramhnuai lam a pan pui ta mai. In luah tawh loh, a bang pawh tla bal nuai tawh bulah chuan Abawihi chuan motor chu a ti ding a. Motor atang chuan a chhuak leh a, hnunglam chu hawngin nikhawhrelova la awm mek, Petera chu a hnuk chhuak a.

***************************************************

Nunui pa, Pu Thangliana leh SI Hlua chu an lo titi mek a. "I fanu Nunui hian hmelma a neih awm i hre reng reng em?" tiin Hlua chuan a han zawt a. Inhnit deuh feih feih chung hian Pu Thangliana chuan, "Ka hre lo, a neih awm pawh ka hre lo. Fanu fel leh chhuantlak tia sawi tur chu a ni bik hauh lo, sawn a pai tawh nghe nghe a. Mahse a chhiat a, mahse khatiang khawpa rapthlaka tawrh tir duhtu tur awm ang an awm ka hre lo a ni, ka pu." tiin a lo chhang a.

Chuveleh Hlua chu a han thu ngil sauh sauh va, "A fa paina pa chu tunge a nih min hrilh thei em?" tiin a zawt nghal vat a. "AW hrilh thei e, a hming chu Duhzuala ania. Mahse a thi tawh a, jail chhungah a thi." tiin Pu Thanga chuan a chhang leh a. SI Hlua chu a meng phawk hru mai, "A thi tawh a, jail ah maw? Engvanga thi nge?" tiin a zawt leh nghal a.

"A inawkhlum a...ama cell chhungah."

"Anih engvanga tang nge?"

"Ka fanu Nunui hi kut a thlak a, naute ti tla turin a ti a. Ka fanu chhul lam hi a lo khawih pawi tel deuh bawk nen, tichuan nau chu a chhiat phah ta a. Kan report a, tichuan attempt to murder case in an man ta a ni."

Hlua chu a han ngawi vang vang a, "Anih leh Duhzuala chu engvanga inawkhlum nge a nih ang?" tiin a han zawt leh a. "An sawi dan chuan jail chhung hrehawm a tih lutuk vang te an tia, a thenin a rilru a buai thin hrim hrim te an tia, thudik tak enge pawh ka hre ve lo." tiin Pu Thanga chuan a han chhang leh a.

Hlua chuan thil dik fumfe lo a awm deuh tlat hian a hria a, "Anih Duhzuala te chhungkua nen chuan tunah enge in boruak ni hrim hrim, in inhaw viau em?" tiin a han zawt leh a. Pu Thanga chu a ngawi vung vung a, "Kan inbe ngai lo, kan inbiak lohna pawh a rei ta khawp mai." tiin a lo chhang leh a.

"An chhungkua eng ang nge an nih?"

"Nau pakhat a nei a, a hming chu Malawma a nia. Chuan Duhzuala pa hi a boral tawh bawk a, anu hi mi hrisel lo tak a ni bawk a. An pathum chuan an khawsa a, Kanan Vengah sawn an awm."

"Engtia rei nge in inbiak tawh loh.. ka sawi awmzia chu, chumi hunlai, i fanu Nunui'n nau a chhiat lai vel chu engtik vel nge, a rei tawh em?"

"Rei ve angreng tawh e, kum 2 leh a chanve vel lai chu a ni tawh ang."

"Anih engtik hun chhung nge Duhzuala chu jail a tan hman, engtia rei nge?"

"A tan atanga kar khatna velah a ni in ka hria, ka chiang chiah tawh lo, ka pu."

Hlua chuan a lu a bu nghat nghat a, "Anih leh Nunui hi tunhnaiah, a awmdan a dang thut em? Emaw a mizia dang riau, a che zia vel nen.. chutiang chu a awm awm i hria em?" tiin a han zawt leh a. Pu Thanga chuan a lu thingin, "Chutia a mizia a dan awm ka hre lo, a pangngai reng." tiin a lo chhang leh a.

"A tha e, anih chuan Pu Thang, Duhzuala te address chu min hrilh chiang thei angem?" a tih lai chuan a phone a rawn ri a, Pu Ruata a lo ni. "Sarah, lo kal lawk teh." tiin Hlua chuan Sarah-i chu a ko va. Sarah-i pawh chu lo pheiin, "Enge ni ta, Sir?" a rawn ti a.

"Pu Thanga hnen atang hian Duhzuala te address kimchang takin lo la ang che aw, phone call kan chhang lawk ange." tiin a thawh san a. A kal hrang deuh va, "Hello, Pu Ruat, enge ni ta?" tiin phone chu a chhang a. "Ka pu, kudamah i lo kal thei angem? Engemaw thil hmuh duh che ka nei tlat mai, i hmu duh ngei ang, nangpawn." a rawn ti a.

"Awle, ka lo kal nghal ange." tiin phone chu a dah a. Ava let leh a, "Sarah, i lo la tawh em, address chu?" tiin a zawt a. Sarah-i chuan paper them chu pe in, "Kha le...ka ziak thla fel diam tawh e." a lo ti a. Paper them chu akin, "A tha e, crime scene ah kan let leh lawk angai, Pu Ruata'n min rawn phone a." a han ti leh zung zung a.

Sarah-i chuan a lo en hu a, "Tinge, engthil nge thleng leh ta a?" tiin a lo zawt nghal vat a. "Nakinah kan sawi dawn nia, phei phawt ang." tiin Pu Thanga chu a en leh a, "Ka pu, theih tawpin misual hi kan chhui anga, kan man ngei ang. Lo lungngai reng reng suh aw, chuan lo fimkhur ula, lo chhuak vak lo bawk ang che u." tiin an kalsan ta a.

*******************************************

Petera chu a harh a, thutthlengah hian nghet taka phuarh beh a lo ni a. A awmna chu a enkual a, bangla ni awm tak, bang tla bal nuai tawh leh maimawmril tam em em na hmunah chuan a lo awm reng mai. A hma zawn, pen 30 vela hla ah chuan Shadow X chuan rawng(colour) bucket, lian tha tak maiah chuan Hydroflouric acid chu a lo chhunglut mek a.

Petera chu a hrilhhai takzet, "HEy..Hey nangkha...tunge i nih?" tiin a au vak vak a. MAshe Shadow X chuan a ngaih pawimawh loh hmel khawp mai, a thil tih lai chu a tih zawm mial mial a. Petera bawk chuan, "Engvanga hetia min man nge i nih, tunge i nih ka tih chu..." tiin a au leh vak vak a.

Mahse Shadow X chuan ala chhang chuang lo, bucket khaina ah chuan hrui a suih mawlh mawlh a. A hma a Nunui a khaina ang bawk chuan hrui chu inchung, thing in kham pheiah chuan a bang liam leh a. A pawt phei zel a, tichuan bucket, acid tui hlira khat chu a pawt kang ta vu vu mai.

Hrui chu hla vak lovah chuan a pawt phei leh deuh va, ban pakhatah chuan a suih bet a. Petera lam chu ava pan phei a, "Tunge i nih, mawh..mawh sawi rawh. Engvanga hetia min ti nge i nih?" tiin a vin vak vak mai. Shadow X chuan a la chhang eih chuang lo, Petera chu a phuarna thutthleng nen chawp chuan a nawr phei a. Buket awmna zawn tak hnuaiah chuan a tawp chat a, amah chu a han kal hla deuh va.

Petera chu a hrilhhaiin a mangang kher mai, "Tunge i nih ka tih chu, engvanga hetia min ti hi nge i nih?" a han ti leh a. Chutah Shadow X chu a ranw tawng chhuak ta, "Peter LAlhmachhuana, kum 44... i nupui hming chu Hlimpuii niin kum 37 mi a ni. Nang hi mi tenawm, mi hurherh leh lepchiah tak i ni. I nupui lakah i uire a, chumai nilovin i nupui nau, kum 20 mi lek Sawmsawmi pawngsualtu leh vau thintu i ni bawk." a han ti ta siah siah mai.

Petera chuan mak tiin a meng phawk nasa mai a, "Eng a? Tunge i nih a, eng thu nge maw i sawi le?" tiin a tal vak vak a. Shadow X chuan ring leng lawng hian, "Shadow X ka ni, i thil tihsual puang turin helai hmunah hian ka hruai che a ni." tiin a chhang a. Petera chuan tal vak vak pah hian, "I va zak lo ve a, engmah ka ti sual lo. Sawmsawmi pawh ka pawngsual hek lo, nau mai nilovin fanu ang chiah a ka en a ni a, engtikah mah ka pawngsual lovang. Ka nupui ka uire san lo bawk, tu phaingsen nge maw i nih le?" tiin a vin nasa kher mai.

Shadow X chu a han thaw deuh hak a, "Anih leh Abawihi kha...ani kha tunge a nih ve le? Engvanga lo thu dun nge in nih, i nupui i then tur thute kha i sawi a ni lawm ni?" tiin a zawt let ta daih mai. Petera chu a meng phawk leh hru mai a, "Eng a? A..Abawihi maw? Khawnge, khawnge a awm, khawnge Abawihi chu i dah?" tiin a rak leh tuar tuar mai.

Shadow X chu a khi suk a, "Ani chu ngaihtuah suh, a tha e, a tha mah mah zawk. Tunah hian duhthlan tur pahnih i nei, pakhatna chu i sual i puang tur a ni a, tichuan i thil tihsual avangin a ngaidam tur diktak in a ngaihdam che chuan nung damin i chhuak thei ang. Mahse i inpuang duh lo emaw, thilsual i ti tih hre reng chunga i zep lui tlat a nih chuan i thi ang." a han ti leh a.

Petera chuan thinrim tak hian, "Engmah ka ti sual lo, engmah inpuan tur ka nei lo." a lo la ti talh mai a. Shadow X chuan a en vang vang a, "Abawihi chauh lo pawh, innu hriat lohvin KS engzat nge i mutpui tawh, tleirawl tak tak te i bum kual a, i mutpui bawk a. Chu chu i la inzep ngam amaw, Peter... inpuang mai rawh." a han ti vin ve thak a.

Petera chuan a lu thingin, "I thusawi kha thu awmze nei lo vek a ni, dawt i phuahchawp vek a ni. Tunge ka nih hi i hre lo a ni, Hmela. Min chhuah vat lo a nih chuan i chak lo khawp ang, phuba chu ka la ve khawp ang tih hria ang che." tiin ala pawr nasa mai.

Shadow X chu a khi suk a, "A tha e, anih chuan le..." tiin a ipte chu a zen a, bur te reuh te a acid tui a dah ban chu a la chhuak a, Petera chu ava pan hnai a. Bur chu a hawng a, a chhin ah chuan chhe te chu a bun chhuak a. Petera chuan a lo hrethiam lo kher mai, "Kha kha eng thil nge, engtia min tih nge i tum a?" tiin a lo mangang nasa mai.

Shadow X chuan bur chhina acid chu Petera mal chungah chuan ava theh ta mai, Petera mal chu a kang nghal a, acid awmna chin zawng chu a khu vut vut mai. A kekawr chua  pawr nghal thuah bawk a, na a ti lutuk chu a t(r)e ring ngei mai. A tal vak vak a, "A sa, a sa lutuk. A sa lutuk, khawngaihin ti tawh suh." tiin a ngen nghal lawm lawm mai.

Chutah Shadow X chu a kal hla leh deuh va, "A nih chuan lo ngaithla rawh, i thil tihsual chu puang la. Ka sawi ang khan ngaidam tu tur che in a ngaihdam che chuan i zalen thei ang, anih loh chuan i chung zawna bucket khi en la, a chhungah khian hydroflouric acid hlir a awm. Hrui hi ka zai chat a nih vaih chuan, i mal mai nilo, i taksa pum kha khi acid khian a rawn tuam chhuak vek ang." a han ti leh a.

Petera chuan a hlau takzet, "Nilo...khawngaihin, khawngaihin ti suh." tiin a tap pur tawh mai. Shadow X chuan sawi chhunzawm zelin, "I uire thu puang rawh, Sawmsawmi i pawngsual thu puang la, vawitam a duhlo chung i khawih thin thu leh a sawi chhuah chuan thah i tum thu te, i vau thute sawi vek ang che. Chu chu i nupui bulah i sawi ang, tichuan a ngaihdam che a ngai bawk." a ti leh a.

Petera chuan a lu a thing a, "Ni lo, min ngaidam lovang. Min ngaidam dawn chuang lo, ka thi dawn tho tho. Chu ai chuan chance min pe hram rawh, engkim ka inpuang ngei ang. Tunah nilo, thih ka la duh lo a ni. Ni e, Sawmsawmi kha ka khawih thin ngei alawm. Ka nupui pawh ka uire san a, KS tam tak ka dawr thin bawk. Mi tenawm tak ka ni, ka hria. Mahse tunah chuan min ngaidam thei dawn chuang lo, khawngaihin engkim ka siamthat leh theih nan hun tlemte tal min pe hram rawh." tiin tap chung chuan a ngen lawm lawm a.

Shadow X chuan Petera phone chu a phawrh a, "Nang hian ka rules i thlak ve ngawt thei lo, rules chu keima siam a ni. Ka sawi anga i awm lo a nih chuan tunah pawh hian hrui hi ka zai chat nghal thei, chu chu i duh lo anih chuan ka sawi ang chuan awm mai rawh." tiin Petera nupui, Hlimpuii number chu a hmet chhuak a.

Muangchang chuan Petera lam chu ava pan a, "Tunah hian i nupui ka call anga, engkim i inpuang vek ang. Tichuan ngaihdam i dil anga, a ngaidam ngei tur che a ni. A ngaidam lo che a nih chuan hrui hi ka zai chat anga, acid in i inbual ang. Chuzawng chu duhthlan tur i nei, Peter. Inpuang rawh, a nih loh chuan i thi ang." tiin Hlimpuii chu a call ta a.

Phone chu Petera hmaah chuan a theh thla a, a in-ring ta ral ral mai. Shadow X chu a kal hla leh deuh va, Petera hnungchhawn zawng chuan a ding a. Peter-a chu a mangang takzet, "Ni lo, min khawngaih hram rawh. Ti lul suh, khawngaihin min chhuah rawh." tiin a ngen leh a, mahse Shadow X chuan a ngaihsak duh tawh hauh lo.

*********************************************

TO BE CONTINUE