UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 7 (LAST)

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 7

(LAST)

****************************************************

Zan dar 8 rik nan minute 10 vel chiah a awm tawh, Abawihi chu a car ah chuang in a tlan mek a. A phone a rawn ri a, Shadow X a lo ni. A la vat a, "Khawi lai nge i lo thlen tawh?" tiin X-a chuan a rawn zawt a. Abawihi chu a han hawi kual a, "Park ka lo thleng tep." tiin a chhang hmuk a.

"Park hnung lam, kawng chhuk ah khan rawn tlan thla ang che. Khawiah mah peng lovin lo tlan tlang zel la, a zawl i thlen veleh kawng peng pathum a awm ang. A laiah tak khan lo kal la, tichuan ka farm house chu i hmu ang." tiin X-a chuan phone chu a dah nghal hmak mai.

Abawihi chu a kal zel a, X-a sawina ah zel chuan a kal a. Kawng chhuk tak maiah chuan a tlan thla a, kawng peng pathum chu a zawl lai a thlen chuan a lo awm tak tak a. X-a sawi ang ngei chuan a lai takah chuan a tlan a, km 1 vel a tlan hnu chuan farm house chu a hmu ta.

Motor chu a tiding a, a chhuak a. Farm house chu a en vang vang a, kawngka pui lam pan chuan ava kal ta a. Kawngka hma takah chuan dingin a thaw hak mai, hawn a han tum chhin a. A lo inkalh lo lehnghal, a chhungah chuan a lut ta a. A lo eng deuh ruih a, bungraw hrang hrang a tam em em mai bawk.

Abawihi chu a hawi kual a, inchhung chu rin ai tak hian a lo zau va. A kal kual a, a ruk tak chuan a hlauthawng ve khawp mai. Room pali vel a awm a, a mal te te chuan a hawng kual den den a. Pathum a hawng tawh a, tumah a ala hmu lo. Room palina chu a han hawng a, Pu Tluanga leh Pu Rinawma te chu thutthlengah hian phuar hlawm an lo ni a.

Nikhawhrelovin an la awm reng bawk, Abawihi chu a va tlan vat a. An hmaiah chuan a beng vak vak a, "Hey, harh ru... harh teh u." tiin a au dun mawlh mawlh a. Pu Rinawma zawk chu a rawn harh a, a rawn meng diar diar a. Abawihi a hmu chiah chu a meng phawk nasa kher mai, "I hnung kha....." a ti vak a.

Abawihi chuan hnunglam a hawi a, Shadow X chu a hnungah chuan rod bung, lian tha nelh nawlh nen hian a lo ding reng mai. Abawihi inrin hma chuan X-a chuan Abawihi lu ah chuan a hlap ta chawrh mai a, Abawihi lu chu a hai nghal chhawk mai. Chhuatah chuan a let tawp a, a khaw hmuh te chu a fiah lo ruai a.

X-a chuan a banah chuan a pawt a, "Thlah rawh...nang kha tunge i nih, kha nu kha thlah vat rawh." tiin Pu Rinawma chu a lo au nasa mai a. A au ri ah chuan Pu Tluanga chu a lo harh ve bawk, "Ehe, enge awmzia? Rinawm, enge kan chungah thleng?" a lo ti ve hu bawk a.

Rinawma chuan Pu Tluanga chu a en a, "Sir, Shadow X a ni. Shadow X hian kan pahnih hian min man a ni, saw en rawh.. Tunah Abawhi a man leh mek, kei ni hi min thah a tum a ni." tiin a chhang a. Pu Tluanga chuan X-a chu a en vang vang a, X-a lah chuan Abawihi chu room atang chuan a hnuk chhuak a.

Abawihi chu a mang ruai mai, a lu atang chuan thisen a rawn chhuak a. A hmaiah chuan a luang thla a, a thi hnuang mai. Thei leh thei lo hian X-a chu a han en leh a, X-a chu roomah chuan a lut leh a. Pu Tluanga leh Pu Rinawma te chu an thutthleng chawp chuan a rawn hnuk chhuak veleh bawk a, Pu Tluanga te thinrim ang ri te chu fiah lo deuh hian a hre ruai ruai thei chauh.

*************************************

Minute 10 vel a ral hnu chuan Abawihi chu a rawn pangngai leh deuh va, X-a lah chuan tuiin a la rawn theh kher zui. A harh deuh kawk mai, thei leh thei lo chuan bang kil lamah chuan a vak phei a. Pu Tluanga leh Pu Rinawma erawh thutthlengah chuan phuar beh in an la awm reng thung a, an hmui chu tape-a tuam sak an ni.

Abawihi chu a vak phei zel a, Shadow X chuan hmuhsit hmel tak chuan a lo nuih vel a. A kut te chu a beng vel a, "Abawih leh.... a hmeichhe awmnem zawk nisi Shadow X ka ni e te chu i ti ve khanglang a. Shadow X chu mipa chauh an ni tur a ni, nangni ang hmeichhia nilovin." tiin a han elh sen vel a.

Abawihi chu bang vuanin a ding kang tawk tawk a, a la zam hauh lo. Rum tak chuan X-a chu a en a, a va la pan hnai chhet chhet mai. Mahse a lu a la hai deuh avang chuan a kal pai deuh chhawih chhawih a, X-a hma zawn takah chuan a va ding a. X-a chuan a lo en ran mai, "Ka duh chuan that nghal thei che ka ni, ka duh phawt chuan heng putar pahnihte ang hian ka phuar hlawm ve thei che. Mahse ka ti lo, enge a chhan i hria em?" tiin X-a bawk chuan a han zawt leh a.

Mahse Abawihi chuan a chhang lo, rum em em hian X-a chu a melh run ringawt. Chutah X-a bawk chuan, "A chhan chu zanin hian kei, Shadow X i la hriat ve ngai loh hi tunge ka nih ka hmuh tir dawn che a ni." a ti ta mai a. Abawihi chuan mak a ti ve deuh ni ngei tur a ni, X-a chu a en hu mai.

X-a chuan a lu a lo bu nghat a, "Ni e, mak i ti tiraw? Mahse dawt ka sawi lo, Abawih. Kei hi tunge ka nih i hre dawn, chumi hriat tir tur che a ko che ka ni." a han ti leh a. X-a chu a han thaw hak a, "Chumi hma chuan he putar pahnih, Officer Tluanga leh Inspector Rinawma hian tunge i nih a, eng thil nge i duh tih chiang taka an hriat a ngai." tih pah chuan Pu Rinawma te chu ava pan phei a.

An hmui tuamna chu ava pawh thlak sak ve ve a, "Engmah la sawi suh u, ka sawi zo phawt dawn." X-a bawk chuan a han ti leh nghal a. Pu Rinawma leh Pu Tluanga pawh chu an tawng bik lem lo, an ngawi ve mai bawk a. Chutah X-a bawk chuan sawi chhunzawm leh in, "Nangni putar pahnih, inla fing satliah. Engmah nilo te hi ka man nachhan che u in hre duh em? A chhan chu Abawihi hi ka hmuh duh vang a ni, nangni in tel chuan a lo kal ngei ngei dawn." a han ti leh te te phawt a.

Pu Tluanga chuan rum zet hian X-a chu a melh a, "I duh tawk khan t(r)awng char char rawh, mahse kan nau ten an la rawn man tho tho dawn che." a ti khur khur a. Rinawma pawh chuan, "I duh tawkin min sawisa la, i ngam phawt chuan min that rawh. Mahse nang hi Shadow X hmasate ang thovin i him reng dawn lo, i tawpna tur chu Shadow X hmasate ang tho kha a ni ang." a lo ti ve pang pang mai.

X-a chu a khi suk a, "Thi turin min duh amaw? Chutiang chiah chuan mi tu emaw te te hian thi turin a duh ve che u asin." tih pah chuan Abawihi chu a va kawk a, "Saw nula hmeltha Abawihi ngei sawn thah che u hi a tum reng thin alawm." a han ti leh a. MAk tih hmel tak chuan Pu Tluanga leh Rinawma te chuan Abawhi chu an en hu mai.

Shadow X chu a han nui leh huah huah a, "Tinge, in awih lo em ni? In duh chuan amah Abawihi saw zawt ta che u, aman thudik chu a sawi mai ang chu.." a han ti leh a. Pu Tluanga chuan Abawihi chu a en vang vang a, "Abawih, chu chu thudik em ni? Nang hian kei leh Rinawma hi min thah i tum amaw?" tiin a han zawt a.

Mahse Abawihi chuan a chhang lo, hnuai lam chu a melh reng ringawt a. Pu Rinawma pawh chuan, "Enge i lakah kan tihsual a, engvanga min that duh nge i nih?" tiin a lo zawt ve bawk a. Chutah Abawihi chu thinrim hmel tak hian a rawn dak chhuak thut a, "Aw ni e, hrem che u hi ka thil tum a ni." a rawn ti ve ta sak mai a.

Pu Tluanga leh Pu Rinawma chuan mak tih hmel tak hian an en hu ringawt mai, "Officer, nang hi Alex-a pa i nih avangin ka zah hle thin che a. Mahse nang hian ka tana mi pawimawh em em, min ngaihtuah em em tu leh min hmangaih em em tu, engmah hre chiang lova ka kalsan hnu pawh a min la vuan tlat tu Nghaka kha, min thah sak a ni." Abawihi chuan a han ti khur dar dar a.

Tichuan Inspector Rinawma chu a en leh a, "Tichuan nang hian, ka patea... thudik min hrilh duh avanga ka tana mi hlauhawmte thian faitu, a fanu ang chiah a min entu leh min hmangaihtu ka pa Rina kha min kah hlum sak bawk a ni." a ti leh khur khur mai. Pu Tluanga chu a maimitchhing vang vang a, "Abawih, kan hna kan thawk mai chauh a ni. I tan thil tha lo ti mahse, tual an that a ni." a han tih chuan Abawihi ngaidan chu a ni lo kher mai.

Vin zet hian, "Ni lo, tual a that lo. Nghaka khan tual a that lo hrim hrim, an phutawk hremna a pe a, damchhuahna chance a pe theuh bawk. An thih phah a nih chuan an phu tawk a ni mai, chhan nei lovin thil a ti ngai lo. Chutiang bawk chuan ka pa Rina pawh kha a ni, nunna a ngai hlu a, chuvang chuan nunna ngai hlu lote a hrem thin. Nangni pahnih pawh hian hrem in phu, chuvanga phuba lak tum ka ni, in pahnih lakah hian." a ti ta vak vak mai a.

Rinawma chu ngeiawm tak hian a lo khi suk mai, "Hrem kan phu maw, nunna a ngai hlu amaw? Anih chuan engvangin nge thi ngei ngei tura a kalsan thin, a victim te kha thi ngei se a ti. Chu chu Shadow X nihna a ni, a thil tih hi a thatna pakhat mah a awm lo." a lo ti ve sak sak mai a.

Chutah Shadow X chu rawn inrawlhin, "Awle awle, a tawk a tawk. Inhnialna hun ka pe lo che u, duhtawk phaw teh u. Hriat tur pakhat inla nei, ka hrilh leh dawn che u." tiin Abawihi chu a han melh leh vang vang a. Pu Rinawma dara ben thak thak pah chuan, "Bungdur khaw police Station atanga call i dawn khan maw, Pu Rinawm. Shadow X a lo let leh thu kha an rawn hrilh che a, mi pahnih lai a lo that tawh lehnghal tiraw... kha kha maw, keimah ka ni reng reng lo." a ti ta daih mai.

Pu Rinawma leh Pu Tluanga chuan an en hu mai a, "Ni e, dawt ka sawi lo. Kei chauh hi Shadow X ka ni lo, saw Abawihi bawk saw a ni." a han ti leh a. Pu Rinawma chuan hriatthiam loh hmel tak hian, "Eng maw? Abawihi maw? Eng thil nge ni nei nuai, awmzia pawh ka hre tawh lo." a ti nuah nuah mai.

Shadow X chu a nui khi leh suk a, "Aw... keimah hma hian Shadow X pakhat an awm leh a ni, chu chu saw Abawihi saw a ni. Nichin lawk pawn ka sawi kha, Shadow X hi hmeichhia an ni tur a ni lo. Chuvang chuan kei hi Shadow X ka nih ve a ngai ta a nih hi, a hma a ruang pahnih kan chhar te kha chu Abawhi thah ve ve alawm." tiin a chhang a.

Pu Rinawma chuan rum zet hian Abawihi chu a melh a, "A nih te chuan nang nula rapthlak kha, tunah hian he Shadow X thar nen hian min that law law ta che u. I duh a ni lawm ni chu chu, a ni tiraw?" a han ti vak vak a, a thinrim hmel kher mai. Pu Tluanga erawh chu a lo inngaihtuah vung vung a, muang chang chuan Shadow X chu a han melh chho va.

Zawi sap hian, "Bungdur Khua atangin call kan dawng a, Shadow X thar a awm tih thu kan dawng. Keimah chuan ka dawng lo, Inspector Rinawma zawk hian a dawng a ni. Mahse, Rinawma zawkin call a dawng hmasa a ni tih engtin nge i hriat?" tiin a zawt a.

Shadow X chu a thaw hak a, "Engvangin nge ka hriat loh teh lul ang?" tih pah chuan a hoodie lukhum chu a phelh a, a face mask chu a phelh leh a. Chutah a hmel dik tak chu an hmu ta, Abawihi, Pu Rinawma leh Pu Tluanga te chu an meng phawk nasa ngei mai.

Shadow X thar chu tudang nilovin Sub Inspector Hlua kha a lo ni reng mai, "A chhan chu Pu Rinawma call tu kha keimah hi ka nia lawm." tiin a voice changer chu a phawrh a, chhuatah chuan a paih thla a. Pu Tluanga chuan mak ti tak hian, "Hlua, nangmah hi maw lo ni reng a?" a ti hu mai.

Hlua chu a nui ta huah huah mai a, "Ni ang chu mawle, keimah vek, keimah vek a ni. Kei hi Shadow X chu ka ni, Sub Inspector Hlua hi Shadow X diktak chu ka ni." ring tak chuan a han ti a. Rinawma chuan thinrim hmel tak hian, "Police ka ni chu ila inti ve ngam amaw? I senior te tihian min kidnap a, engvanga ti nge i nih?" tiin a vin hrep mai a.

Chutah Hlua chuan Rinawma chu a melh ta run mai, "Nang hian min hmusit em em a, tiraw? Shadow X chu keimah hian nung damin ka man ngei ang tiin ka hrilh che u a, mahse nang hian ngeiawm tak takin min tawng khum a. Tunah hian min en ta che, tunge chungnung zawk chu en ta che." tiin a aia vin chuan a an khum ve ta hrep mai.

Pu Rinawma chuan a chhang tawh lo, Pu Tluanga pawh chu beidawn hmel takin hnuailam a melh tlawk tlawk ringawt. Hlua chuan Abawihi chu ava en a, Abawihi chuan a lo en reng a. Hlua chuan ava pan phei a, "Ngati nge, mak i va tih hmel ve loh ve?" tiin a han zawt a.

Abawihi chu a khi suk a, "A tir atang khan ka mi rin zawng i ni lo nghal hrim hrim alawm, min surpise lem lo." a lo ti daih mai. Hlua pawh chu a nui huk ringawt a, "Mi fing leh huaisen, nula chhuanawm Abawihi nge nge, i lo fing bik thin e." hmuhsit hmel tak chuan a han ti vel a.

Abawihi chuan ngei hmel tak hian a han melh leh run a, "Engvanga ti nge i nih sawi rawh?" a ti khur dar dar a. Hlua chuan a aw a han thian vel phawt a, "A chhan chu maw, Abawih.... i bialpa hlui, Nghaka, Shadow X original kha.... ka nau, ka cousin a ni." a ti ta mai a.

Abawihi pawh a meng phawk ve ta hru mai, "Eng.. engmaw i sawi, Nghaka kha i nau maw?" a ti hu mai a. Hlua chuan a lu a bu nghat nghat a, "AW ni e, ka cousin a ni a, ka pianpui unaute ai pawh a ka hmangaih a ni. KA thiantha ber a ni bawk, i chungchang hlir hi a sawi thin. Engmah hre chiang mang lova i then rikngawt lai te pawh khan a hnem thintu ber chu keimah a ni. Mahse tikhan Shadow X tih hming inphuahin khatiang khan a che dawn tih min hrilh bik miah lo, tichuan nangmah a hmangaih vang che in a nunna a chan phah a, nangmah vanga thi a ni." tiin a vin ta hrep hrep mai a.

Abawihi chuan chhan ngaihna reng a hre lo, mak ti tak hian a ding ngawi vung vung ringawt. Chutah Hlua bawk chuan, "A thih ni ah pawh ka awm ve hman lova, a vui ni ah lah ka awm hman lo bawk a, a ruang takngial pawh ka hmu ve hman hek lo, a chhan chu he khua, Bungdur khua ah hian min post vang a ni. Tichuan Shadow X thar a awm an tih pawh khan ka ngaihven em em a, nangmah i nih hi ka ring pha ngai bik lo hrim hrim. Mahse case kan buaipui laiin tlai khat chu bazarah ka hmu fuh hlauh che a, ka nau Nghaka ka hrechhuak nghal a. Tichuan Shadow X thar a lo awm bawk nen, nangmah hmuhna hun remchangah ka hmang a. I number ka nei a, tichuan he khuaah hian i awm tih pawh hre lawk reng mah ila ka hre lo der a, ka rawn phone ta che a nih kha. Kan inhmuh hmasak ber ni atang khan, i mi chhandan te reng reng atang khan nang hian engemaw thup i nei tih ka ring thiam nghal a. Ka zui ru reng thin che a, tichuan i in awmna ka hre bawk a. I awmloh hlanin tukverh atangin ka lut ru a, Shadow X chu nang ngei hi i ni tih ka hre ta a ni." a ti ta siah siah mai.

Abawihi erawh ala ngawi reng, sawi tur reng a hre lo. Hlua chuan sawi chhunzawm leh in, "Williama kha i target dawt leh a ni tih ka hrethiam nghal a, tichuan in inbulah khan khami zan, Williama ka kidnap zan khan ka awm ve ta reng a. Williama pawh a rawn kal ngei bawk, tichuan ka lo man ta a ni. Shadow X angin ka inchei a, tichuan Williama kha a bul tan nan keimah ngeiin hrem ve ka duh a. Mahse keichuan thah kher pawh ka tum tak tak lo, nangmah tih hrehawm nan, chhaih kual nan che hman ka tum mai chauh a ni. Mahse a tlanchhuak a, ramhnuaiah kan inum chiam a. Rei fe hnuah ka man thei ta a, min beihna lamah ka hmaituamna a pawt thla a. Khaw khata cheng ve ve kan lo ni bawk nen, tunge ka nih tih chu chiang takin a hria. Ka hming pawh a lam ri ngei bawk, tichuan a tlanchhe leh a. Man ngei ka tum a, mahse motor khan a su ta hlauh va. A la thi lo tih ka hriat avangin ka that ta mai a nih kha, a chhan chu a harh chhuah hunah kha thil tih ngei a ni tih a sawi chhuak dawn si a. A thil tihsual diktak kha min hrilh tha hle hle la chu, a thi kher lo tur ania." a han ti leh a.

Abawihi chu a ngawi vang vang a, "Anih chuan engtin nge Williama drip khai laiah khan damdawi i pawlh theih zawk? Engtik lai khanin nge i pawlh hman, khatih hunlai kha chuan ka motor lam panin hospital kawtah khan i lo phei mek kha a ni si a. Ka hmu reng che sia, engtin nge Williama kha damdawi i lo pek hman theih?" tiin a zawt leh a.

Hlua chu a khi suk a, "Sentea nen khan kan duty a, tukverh atang khan i motor hi ka hmu daih tawh a ni. Williama ka thah a ngai si a, tichuan hospital store room ah khan ka lut ru a, damdawi zinga Pancuronium bromide kha ka la a. Damdawi lam pawh hi ka hre ve lutuk alawm, tichuan ka ak tha reng a. Sentea thingpui in turah khan damdawi ka telh a, tichuan a pum a nuam lova, a inthiar a ngai ta a. Chu chu remchangah la in Hospital hnuai garage lamah ka chhuk vat a, Shadow X angin ka inthuam nghal a. Williama nu Pi Makimi kha a muthlu tih ka hre bawk a, tichuan Shadow X thuam famkim nen Williama chu ka that ta mai a nih kha. Pi Makimi harh khan min hmu a, rang takin ka tlanchhe nghal vat a. Ka chhuk pahin ka inthlak leh sawk sawk a, tichuan garage atangin ka lo chhuak a. I bulah rawn kal tum angin ka lang a, mahse tikhan Sentea khan min rawn phone leh ta kha a nia...." a chawl deuh dat a.

Abawihi chu a han nuih suk a, "Mahse i tan chuan a awlsam daih zawk ang chu, Williama pawh kha i thah tur list a mi ve tho kha a ni lawm ni? Keiman tikhan ka thah sak angah che ngai mai la, tiraw?" tiin a han nui leh vel huah huah a. Abawihi chuan zam hauh lo chuan Hlua chu a melh ran mai, "Anih leh Officer leh Inspector te hi engtin nge i man theih?" tiin a zawt leh a.

Hlua chuan ring deuh hian a kut chu a han beng ri thak a, "Aw..hei hi chu maw.... I inah kan lo kal a, Sarah-i nen.... Sarah-i pawh khan min rinhlelh loh nan tiin i address ka zawn chhuah chawp tir leh a, tichuan kan rawn kal kha a nia. Khami ni khan plan ka nei lawk tawh, chu chu he putar pahnih kidnap hi a ni. Khami ni khan Shadow X case atangin min ban a, tangkai lo dun dawn ropui si, kan kutah awm tawh rawh se an han ti vel a..." tih pah chuan a nui suk a.

Chutah sawi zawm leh in, "Tichuan khami ni khan Shadow X case buaipui turin an chhuak dawn tih ka hre lawk vek a, chuvang chuan kawg reh laia lo chan a, lo kidnap kha ka tum a ni. Sarah-i bulah dawt ka sawi a, ka nu dam lo angin ka sawi a. Tichuan Hospital bulah ka chhuk a, hospital bulah khan ka bike ka dah lawk vek a ni. Tichuan hemite pahnih hi ka man ta a, ka kidnap ta a ni. Shadow X hmasate tih ang thovin, nangmah ka hmuh theih nan he mite pahnih hi ka hmang tangkai ta a ni. Mahse a danglamna chu, Shadow X hmasate kha chuan an venghim che a, thudik hriattir che an tum. Mahse keichuan thudik hriat tir che a, hrem ve che ka duh a ni. A chhan chu Nghaka kha, nangmah vanga thi a ni, i thah a ni." a ti ta khur khur mai.

Abawihi chuan zam hauh lo hian a en kar a, "Engthil chu nge i tih anga, tunah hian ti nghal ta che." a lo ti ve khur khur mai. MAhse Hlua chuan a lu a thing a, "Nilove, chumi hma chuan min hrilh tur i la nei. ENgtin nge Pu Ruata te kudam kha i hman theih tihte, Petera kha engvanga htem ve nge i nih tihte, Williama thil tihsual diktak te, chu chu min hrilh vek angai." a ti a.

Abawihi chu a lo khi suk mai, "Chu chu maw i hriat duh a, chu chauh chu maw?" tiin a lo zawt daih mai. Za lo tih hriat tak hian Hlua chu a khi ve suk a, "Chuan thil pakhath nen, Sarah-i nena kan rawn kal khan, engvanga Shadow X thuamhnaw inbel chunga rawn lut thut nge i nih, kha kha nangmah a ni tih ka hre vek ania." a han ti leh a.

Abawihi chu a thaw hak a, "Awle, anih chuan lo ngaithla ve rawh. Nunui ka hremna chhan kha chu i hre vek tawh anga, a chhan chu Malawma te inah ngei i va kal a, an lo hrilh che a nih kha. Duhzuala kha ka thiantha tak a ni a, lehkha kan zir ho lai atang tawhin a farnu ang chiahin min en thin. Nghaka leh ka Pa Rina te an boral hnu khan, ka thisenah hian Shadow X thisen a awm tel ve tawh ang mai hian ka inhria a. Pu Rinawma leh Pu TLuanga te lakah hian phuba lak ngei chu ka duh takzet, chuvang chuan ka thian tha ber ni thin, Duhzuala lo ti hrehawmtu leh ama nunna hial a lak phahna, Nunui atang khan bul ka tan a ni. Pu Ruata te kudam ka hman theihna chhan maw, Pu Ruata hi he khua ka awm tirh atanga ka nel hmasak ber a ni a, an kudam pawh min hmuh nghe nghe a. A fanu nen kan inkawm ngeih hle bawk, vawikhat chu an inah ka leng a. An hmuhloh hlanin an kudam chahbi chu ka la a, a ak ru a. Tichuan chumi tlai chuan a ang chiah chiah ka siam tir a, zanah ka va leng leh a, an hmuh loh hlan bawkin an kudam chahbi chu a ngai ah chiah ka dah leh a ni. Petera erawh kha chu ka ngaizawng der phawt a, ani kha nupui nei lai a ni a. A nupui nau a pawngsual bawk a, a khawih fo thin bawk. KS tam tak a dawr thin bawk a, chuvang chuan ka hrem ve ta a ni. Ka hremna chhan dang leh pakhat bawk chu, a nupui kha ka cousin a ni ve thung a ni." a ti ta mai a.

Hlua chuan a en hu mai, Abawihi chuan a chal a thisen kai nuaih mai chu a kut chuan a han tuai thuak a. Chutah sawi zawm lehin, "Mak i ti tiraw, ka dem lo che. Hei vang hi alawm Shadow X diktak i ni ve thei ngai lovang ka tihna chhan, a chhan chu Shadow X chuan a chhung leh khat te, a thian tha tak tak te chunga thil sual titu bak a hrem ngai lo. Mi sual satliah a hrem ngai lo, chutiang bawkin keipawhin ka chhung leh khatte, ka thian thate, ka laina hnaite chunga thil tisual tute chauh ka hrem ve. Nunui ka hremna chhan chu Duhzuala kha ka school kal laia ka thiantha ber a ni a, Petera ka hremna chhan chu a nupui kha ka cousin a ni a, Bungdur khua a ka awm theihna chhan pawh Petera nupui vang a ni. Petera chungchang hi engtin nge ka hriat i hre duh ang tiraw, a diary ah a ziak vek a, chu chu ka chhiar a ni. He khuaa ka rawn awm tirh khan Petera te inah hian ka thleng hmasa ber a, chuta tang chuan min lo ngaih melh tawh a ni. Tichuan vawikhat chu a awmloh hlanin a diary ka hmu fuh a, tum loh deuhvin ka chhiar a. Engkim ka hre ta a, tichuan a pahnihna turin ka hual a, tichuan ka hrem leh ta a ni. Williama thil tihsual ka phuahchawp nachhan chu nang hian tumah i hrem ve ka phal loh vangin dawt ka phuahchawp a ni, Williama hi maw... Petera diary ah khan a lang ve a ni. Petera leh Williama te hi in upat hleih viau mahse thian an lo ni reng a, Petera nupui nau Petera'n a pawngsual fo hnu khan Williama hian a dil ve a, tichuan an duh duh hunah an khawih ta thin a. Chuvang chuan Williama kha ka ngaizawng der ve leh ta a, hrem ka tum ve leh a ni." tiin a inpuang ve ta a.

Rinawma chu lo tawng chhuak ve in, "Engtin nge chutiang khawpa thuruk a ziahna diary chu, inleng mai maiin a hmuh tura a dah a, a va dah uaulau awm ve?" a lo ti khut mai. Abawihi chu a nui suk a, "An inhnuai thingzai dahna bulah ka chhar reng alawm. A dahtha pilril lutuk, an nu inhnuai ka tihfai pui laiin ka chhar a, a lo inkeu sa a. A nupui nau a pawngsual thu a ziahna phek a lo ni chiah chiah bawk nen. Tichuan zung tur angin ka kal sawn a, ka chhiar ta vek a. Tichuan a ngaiah chiah ka dah leh a, Petera leh Williama chu ka target ta nghal a ni." tiin a lo chhang leh a.

Hlua chu a ngawi vung vung a, "Anih leh Warden Kumara te, a nupui Rani te kha engtin nge i hriat ve, Williama phone ah khan an number kha a awm ve vek bawk sia. MAhse i dawt phuahchawp vek a ni bawk sia, engtin nge khang ho kha i lo hriat ve theih?" tiin a han zawt ve leh a.

"Ka ngaizawng der ka tih tawh kha, Rani hi hmeltha  a tih thin thute min hrilh fo va. Chuvang chuan khatia min rawn phone a, a thil tihsual, hrem ka duhna chhan min rawn zawh khan. Dawt ka hrilh che a, a phone i kawl bawk tih ka hria a. I buai phah ka beisei a, i buai phah reng bawk a ni lawm ni?" Abawihi chuan a lo ti zek mai.

Za lo tak chuan Hlua chu a han khi leh suk a, "Min hrilh loh ila nei, Sarah-i nena kan rawn kal khan, engvanga Shadow X thuamhnaw inbel chunga rawn lut nge i nih, khami hma khan thil tih i nei chiang alawm. Enge i tih sawi rawh, a vaiin min hrilh rawh." tiin a zawt leh a.

MAhse Abawihi chuan a lu a thing tlat mai, "I hriat tur chin chu ka hrilh tawh che, abak i hriat a ngai lo." tiin a chhang ta hmak mai a. Hlua chu a thinrim kher mai, "Abawih, i luhlul ve khanglang dawn amaw? He putar pahnihte hi ka that dawn, i sawi loh chuan i hmuh lai ngei hian ka that khawp ang.” tiin a vau khur khur mai.

Abawihi chu a nui leh suk a, “That ta che, that mawlh rawh. Nangman that lo mah la keiman ka that dawn tho tho, Anmahni vanga Shadow X ni ve alawm ka nih le, i hrait reng kha.” tiin a lo chhanglet leh a. Hlua chu a thinrim takzet, pistol a phawrh ta mai a.

Abawihi chu a tin ran a, “I sawi dawn nge ka kap dawn che, hemite pahnih ai hian i thi hmasa ang.” a ti leh ta khur khur mai a. Chutah kawngka a rawn ri rak a, an vai chuan an hawi phei thup mai. Rinloh tak maiin Sarah-i chu pistol nen kawngka bulah chuan a lo ding ran mai a, “Silai kha dah thla nghal rawh.” tiin Hlua chu a rawn tin nghal a.

Hlua chuan mak a ti takzet, “Sarah, nang... engtin?” a ti hu mai. Sarah-i chuan a rawn pan hnai a, “Ka tihpalh, Sir. Mahse i thil tih hi a dik lo a ni, engkim thudik ka hre ve vek alawm.” tiin a rawn pan hnai a. Hlua chu a han thaw deuh hluai a, “Sarah, engtin nge i hriat?” tiin a han zawt leh a.

Sarah-i chu a khi sak a, “Sir, constable mai mai pawh ka ni thei e. Mahse mi mawl nileng ka ni bik lo, Female Head Constable ngat ka ni ve ania. Zanin khan Station lama va kal tur khan min ti a, mahse ka thleng reng reng lo. DAwr pakhatah i nu thil lei lai ka hmu a, ka va pan a. A dam that thu leh thaw hah a neih ngai loh hrim hrim thu min hrilh a, mak ka ti takzet. DAwt min hrilh ta mai kha a mak ka ti a, i nu kal veleh khan Abawihi hi ka hmu leh a. Tichuan ka zui ru a, a tlan chak em avangin ka um phak mai bik lo. Mahse a kalna hnu ka en khan i farm house lam hi a pan a nih ka ring ta, a chhan chu khami lamah zel khan a tlan vang a ni. Tichuan hei, i inpuanna zawng zawngte kha ka lo hre ve ta vek a nih hi.” tiin a chhang a.

Hlua chu a ngawi vang vang a, a khi leh suk mai. Thawk a han la leh te te a, “Sarah, silai kha dahthla rawh... kha kha ka revolver a nih kha, engvangin nge ka thu lova ka silai i lo lak a?” tiin a han vau deuh khur khur a. Mahse nghet tak hian Sarah-i chuan pistol chu a hum a, “Sir, nangpawn i hriat kha. A ruka pistol kah min zirtir thintu i nih kha, ka thiam tawh zia pawh i hria. KA kah thleh hauh lovang che, hetianga hnaiah phei chuan ka kahthelh lo chiang lehzual khawp ang che. Ni e, hei hi i revolver a ni, a ruka min kawl tir ngei mai kha.” tiin a lo chhang let a.

Hlua chu a maimitchhing vang vang a, “Enge ti tura min duh?” a han ti a. “Silai kha chhuatah muangchangin dah la, ka lamah rawn chhir phei rawh.” Sarah-i chuan a han ti leh a. Hlua chuan muangchang chuan silai chu a dahthla riai riai a, Sarah-i lama chhir phei ta lo chuan hnung zawngin a chhir ta daih mai a, ahmaa Pu Tluanga leh Rinawma lo awmna room kawngka inhawng sa ah chuan a chhuih lut daih  mai.

Chutah Sarah-i silai chu va laksak a tum a, mahse a che muang tlat. Sarah-i chuan silai chu a kap puak dur mai a, Hlua banah chuan a kap fuh a. Abawihi pawh a phu nasa kher mai, Hlua chu a tawlh hnung dawrh a. A ban chu a thi nghal zawih zawih a, na tih hmel tak hian a dawm vawng vawng mai.

Vin zet hian, “Hmeli, min kap tak tak amaw?” tiin a si deuh hlarh hlarh mai a. Khur dar dar chung hian SArah-i chuan, “I chet leh vaih chuan i chalah khan ka kap tawh ang.” tiin a lo chhang let a. “Sarah, min rawn phelh vat teh, vatin...” Rinawma chuan a lo ti chiam chiam a.

Sarah-i chuan Abawihi chu a en a, “Tawlh hnung rawh, hlau reng reng suh aw, awm hla deuh la. A rawn beih dawn che chuan ka rawn kap nghal a nimai, zam reng reng suh aw..” tiin a ha fuih mawlh mawlh a. Abawihi chu a tawlh hnung a, Hlua pawh chu a che ngam tawh bik lo.

Sarah-i chuan RInawma phuarna chu phelh ava tum a, mahse Rinawma chu phuar a lo ni ve reng reng lo. Hrui chu a lo hum bet vel mai mai a lo ni, a rawn ding thut a. Sarah-i pistol chu a laksak a, rekbetin a luah chuan a tin ta ran mai. Pu Tluanga mak ti lutuk chuan a en hu mai a, “Rinawm, engemaw i tih le?” tiin a vin vak a.

Rinawma chu a khi suk a, “Plot twist...Shadow X dang an la awm, chu chu keimah hi ka ni.” a ti ta mai a. Hlua chu ava en a, an nui dun ta var var mai. An lo inthurual lek chu niin, Hlua nen chuan an nui ta huah huah mai a. Abawihi pawh chuan mak a ti takzet, Hlua chuan Abawihi chu a va en leh a.

Va pan hnaiin, “Tikha chuan mak i ti ve deuh tawh ang tiraw? Ni e, keimah chauh khan Shadow X kha ka ni peih bik reng reng hleinem. Williama drip-a damdawi thun tu kha maw, kei nilovin Inspector RInawma zawk hi a ni. Khatiang em em a rang khan ka che zung zung thei bik nang, ka dawt phuahchawp chu i lo awih hmel em em leh nghal a.” tiin a nuih tiah tiah mai.

Abawihi chu a ngawi reng a, “Engtin, enge thil awmzia?” tiin Pu Tluanga chu a bang bo takzet. Rinawma chuan a aia na chuan Sarah-i chu a han rek leh vak a, “Keiman ka hrilh ang che, Sir. Keichu min hriat kha, nangpawhin min hauhna ber a nih thin kha. Pawisa hian ka mit a ti del mah mah, i ti tiraw? Ni e, a dik alawm. Pawisa vanga ti ka ni, pawisa vang liau liauvin Shadow X ka ni ve a ngai ta a nih hi.” a ti ham ham mai.

Hlua chuan lo zawi chhunzawmin, “Shadow X anga ka inthuam a, ka chhuak tur hi Inspector RInawma hian min hmu fuh a, min man ngei bawk. Mahse ka thil plan zawng zawngte ka hrilh a, tichuan pawisa in ka thlem a. Plan kan siam dun a, Williama atanga t(r)an a, Abawihi chhaih buai kual kan tum kha a nia. Mahse Williama kha a tlan chhuak ta si a, chuvang chuan khami zan khan, Williama thih zan khan, Inspector Rinawma hi ka ko va. Damdawi ka lak ruk hlanin min lo veng a, tichuan Abawihi hmu tur anga ka chhuk hlanin Williama drip khai ah khan damdawi chu a lo thun ta a ni. A awmzia chu Shadow X hi pakhat nilovin, nangmah nena chhair tel phei chuan pathum kan ni tihna a nih chu.” tiin a nui leh huah huah mai a.

“Engpawh nise hun kan khawhral hnem tawh, Hlua. Plan kan thlak angai, hei Sarah-i a rawn lang veleh bawk si nen. Shadow X diktak chu Abawihi hi ni se, Pu TLuanga hi kidnap ta se. Tichuan keini pahnihin va chhan kan tum anga, mahse Pu Tluanga erawh a lo thi hman tawh ang. Mahse Abawihi hi a nung chungin kan man anga, Sarah-i pawh Shadow X a beihna lamah a nun a chan a ni leh mai a. Shadow X kan man theih avangin kan kaisang ngei bawk ang, nangpawh Sub-Inspector i ni tawh bik lovang. Inspector ah i kaisang anga, keipawh Assistang Superintendent of Police, ASI ka ni ve tawh ang, Police Officer ka ni ve tawh ang.” Rinawma chuan tiin a lo nui ve huah huah bawk.

************************************************

Chutih lai chuan a hma a Pu Tluanga leh Rinawma lo awmna room tukverh atang chuan tu emaw hi thawm dim thei ang ber hian a rawn lawn lut tuih tuih a, Shadow X inthuam dan ang chiah chiah in a intuam bawk. Khum bula pistol, a hma lawka Hlua’n a chhui phei chu a chhar a.

Hlua chu a han thaw hak a, “Nia, media hmaah dawt phuahchawp te ala ngai dawn si a. Zan a rei tawh nen, kan chau lutuk ang. Engtin nge bul kan t(r)an tak ang, tugne thi hmasa ber dawn?” a han ti vel a. Rinawma chuan Sarah-i sam chu a han hnim vel a, “Henu atang hian t(r)an ang hmaing..” a lo ti a.

Abawihi chu a rawn nui ta huah huah mai le, mak ti tak hian Rinawma leh Hlua chuan an en hu ringawt a. Sarah-i leh Pu Tluanga pawh chuan mak an ti ve takzet, “Enge i la nuih a, enge nuihzatthlak awm?” tiin Rinawma chuan a han vin vak a. Mahse Abawihi chuan a chhang lo, a aia za chuan a nui leh vak vak mai a.

Hlua chuan thinrim tak hian, “A nung chunga kan man dawn vang che in media hmaah thudik i puang chhuak thei angah i in ngai ami, chuvang chu em ni i nuih vel a? Abawih, i tawng theih loh nan a tul chuan i lei kha kan tan mai ang, i hria em?” tiin a han vau khur khur a.

Abawihi chu a nui tawp hmak a, “Sub Inspector, Pu Hlu..... mi a nileng ka ni hleinem. Shadow X ve ve, one on one in kan inhmachhawn dawn amaw tia, mahse nangmah pui turin Shadow X dang i lo kawl ve reng a. Hmeichhe awmnem zawk keimah a min ta tir in tum chu ania, chu chu ka thlen tir lovang.” tiin rum tak chuan a melh a.

Hriatthiam loh hmel tak hian Hlua chuan, “Enge i sawi awmzia?” a ti hu mai. Abawihi chu a han thaw deuh hak a, “Shadow X ka ni a, nangni pawh Shadow X ve tho in ni. Mahse amala t(r)an chu ka peih bik hleinem, chuvang chuan keipawn midang ka rawn hruai ve alawm.” a ti ta mai a.

Chuveleh silai a puak dur mai, Rinawma chu a eu zawk a. A thingthi dawt mai, a hnunglam atang chuan silaia kah a lo ni. Hnunglam an va hawi rual thup a, Shadow X dang an hmu leh ta. Room bulah chuan silai keng chung hian a lo ding ran mai a, a rawn kal hnai a.

Hlua chuan mak ti tak hian, “Midang leh maw? Tu.... Tunge i nih?” a ti bah nuai mai. Shadow X thar ber chuan a hoodie lukhum chu a hlip a, a mask chu a phelh bawk a. Malawma, Duhzuala u kha a lo ni reng mai. Hlua hrethiam lo lutuk chuan a en hu mai a, Abawihi chu ava melh leh a.

Abawihi lah chuan a lo nuih suk a, “Another plot twist, keimah chauhva ka lo kal i ring em ni? Puitu ka mamawh ve alawm, chuvang chuan Malawma hi engkim ka hrilh a. Tichuan min rawn kal pui ta a ni, ka motor seat hnungah a thu ve reng alawm.” a lo ti a.

Rinawma chu chhuatah chuan a lo mu khur cher cher mai, mahse a dar lam deuhva kah a nih avang chuan thih puina em chu a ni lo, mahse na a tih em avang chuan tawng pawh a tawng chhuak hleithei lova, a mu kawm ngal ringawt mai. Hlua chu a ngawi vung vung a, Abawihi lamah chuan ava tlan thut mai.

Va reh a tum a, mahse Abawihi chuan pocket knife, a ruka a lo ak that reng chu a phawrh a. Hlua hnute veilam ah chuan a lo vit siah siah mai, Hlua na ti lutuk chu a t(r)e vak vak a, a tawlh hnung nghal bawk. Chuveleh Malawma chuan Hlua chu chhautah a keuh tlu pawp a, na em em hian vawi thum a hnek a, nikhawhrelovin a awm der mai.

***********************************************

Pu TLuanga pawh chu an phelh ve ta a, Abawihi bulah chuan ngaihdam a dil nghal mawlh mawlh a. “Heng misual pahnihte hi chu ka kutah dah rawh u, engkim ka lo buaipui vek mai ang. Chuan a tawp nan tak tak, Abawih, min ngaidam hram dawnnia.” a han ti leh a.

Abawihi pawh chuan a lu a lo bu nghat a, a ngaidam tihna a niang chu. REilote hnuah pawh chuan police dangte chu an rawn thleng a, SI Hlua leh Inspector Rinawma te chu man an ni ta a ni. Pawnah chuan Malawma leh SArah-i leh Abawihi te chu an ding a, “I van rei em em ve?” tiin Abawihi chuan Malawma chu a han nghawk sawk a.

Malawma chuan inthiamloh hmel tak hian, “Nia... kha Sarah-i kha, kan inhmu thut a. Kan han sawifel chawp leh mawle, tichuan ka lut hmasa anga, tukverh atangin i lo lut dawn nia a tia, police a ni sia a thu ka awih ta mai a nih kha.” tiin a han khi suk a. Sarah-i pawh chu lo nui ve in, “KA plan chu a thawk tho alawm kha...” a lo ti ve bawk a.

Lawmthu an inhrilh tawn mawlh mawlh a, Malawma chu phone call a dawn avangin a kal sawn a. Sarah-i chuan Abawihi chu a han en vang vang a, “Enteh Abawih, hriart duh deuh pakhat ka la nei a..” a han tih chuan Abawihi chuan. “Eng thil nge i hriat duh a?” tiin a lo zawt nghal vat a.

Sarah-i chuan a chil a han lem dawk a, “Ihh.. SI Hlua zawhna tho kha.... kan pahnih a i ina kan rawn kal khan, tinge Shadow X anga inthuam a i rawn luh thut a, a hma in thil dang tih i nei em ni, kan hriat lohvin Shadow X anga thil tih i nei em ni? tiin a han zawt a.

Abawihi nui hmel chu a tum hmak mai, Sarah-i chu a han en ren rawn a. Chiang fek fawk hian, “I hrait tur chin chu i hre tawh, abak min zawh belh suh.” a ti hmak mai a, a kalsan ta daih mai. Sarah-i pawh chu a hrilhhai angreng kher mai a, Abawihi chu a en zui vawng vawng ringawt.

***********************************************

A tuk zingah chuan Abawihi chu a tho va, morning walk te neiin a inkawt ah chuan a han work out vel thuak thuak a. A duhtawk hnu chuan a inhnung huan lamah chuan a chhuk thla a, earphone vuah in a zai rut rut bawk. A kal hla telh telh a, a ramhnuai telh telh mai.

Tichuan kudam lian lem lo tak, chhe ve tawh tak hi a lo ding ruah mai. A va pan nghal a, a luh hma chuan a ear phone te chu a han ak tha a. A phone a rawn ri thut mai a, Sarah-i a lo ni. “Hello Sarah, enge ni ta? Eng maw? Tumaw bo?....” a thaw deuh hak a, “Ava mak awm ve, Bungdur khuaah a rawn zin ve hrim hrim em ni?” tiin a han vawi leh vang vang a.

“A ni maw, a rawn zui amaw? KA lo hre reng reng hleinem...... awle, engpawh nise chaw eikhamah ka lo kal dawnnia.” tiin phone chu a dah a. A thaw leh deuh hak mai, tichuan a ipte atang chuan chahbi pakhat hi a phawrh chhuak a, kudam kalhna tala chu a hawng a.

Kawngkhar chu a hawng ri tuah tuah mai a, a chhung chu a lo thim mup mai. Light a han on eng pup a, a hma zawn chu a en vang vang a. A khi suk a, "Kan rawn kal ni khan tinge Shadow X anga inthuam a in rawn luh thut, dei dei dei... in hriat a tul lova ka sawi lo a nimai" tiin a han phun nuah nuah a.

Kudam chhung lai takah chuan mi pakhat hi thutthlengah phuar hlawmin a lo awm a, a lo kun ngul mai. Chutia kawngka a rawn inhawn takah chuan thei leh thei lo hian a rawn dak chhuak a, a mit te chu a bui luk mai a, a meng diar diar bawk. A hmaiah chuan thisen a kai nual bawk a, a vung deuh bur mai.

Chupa chu tudang nilovin, Officer Pu Rintluanga fapa, Abawihi college kal laia a bialpa ni thin, Alex-a kha a lo ni reng mai. A hmui tuam a ni bawk a, Abawihi chu a en tawk tawk a. Abawihi chuan a nuih suk a, "I pa kha ka ngaidam reng reng lo." tiin ring takin kawngka chu a karh ri bur mai.

**************************************************

THE END