UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 3

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 3

*********************************************

SI Hlua leh Sarah-i te chuan kudam chu an va thleng a, Pu Ruata'n a hmuh veleh chuan ava pan nghal a. "Ka pu, helai thuk bula inziak hi en teh. Tu ziah nge ka hre lo, ka tute hi kudama ka hruai chang hian bangah leh chhuatah hian thil an ziak rang nasa thin hrim hrim a. Mahse hei chu anmahni ziah a ni thei lo, vawiin khan ka hmu ve chiah a ni." thuk lam pan pah chuan Pu Ruata chuan thaw hlawp hlawp hian a ti a.

Thuk bul chu an va thleng a, a hma zana Abawihi'n meihawla a ziah, SHADOW X IS BACK tih chiang taka lo inziak chu Pu Ruata chuan a kawk a. Hlua chuan a han en chiang a, a meng phawk nasa mai. Sarah-i chuan ngun leh zual chuan a han bih a, "Shadow X...Shadow X... englo kha a ni em, nikum leh kum hmasa vel a niin ka hria. Aizawla thil thleng kha, case mak deuh kha.." a ti nuah nuah a.

Hlua chuan a lu a lo bu nghat a, "I sawi dik, thil tisual te chu a hrem thin. Shadow X chu pahnih an awm tawh tih pawh ka hria, mahse an thi ve ve tawh. Tuna mi hi a thar a ni, Shadow X thar an awm leh tawh a ni." a han ti chang fak fak a. Pu Ruata chu a hawi hu a, "Enge awmzia, Shadow X chu tunge?" tiin a lo zawt ve bawk.

Hlua chuan a chhang lo, a phone a phawrh a. Number pakhat a chhu a, a call nghal a. Phone ami chuan, "Hello, Inspector Rinawma..tunge ni aw?" a rawn ti a. Hlua chu a han thaw hak a, "Hello Sir, Bungdur khua Police Sub-Inspector Lalruathlua ka ni a. Hmuh che ka duh a ni, a pawimawh khawp mai." a han ti nghal thawr a.

Inspector Rinawma chu a lo khi suk a, "Ngawi teh, Bungdur Khua ah daih in awm a, kei Aizawlah daih ka awm bawk sia. Han inhmuh tawp mai chu ava har duh awm ve...han sawi chiang deuh teh." a lo ti a. Hlua chuan zawi te si, chiang fek fawk hian, "Shadow X a lo let leh tawh a ni." a han ti chu Inspector Rinawma pawh a meng phawk nasa ngei mai.

"Bungdur khua maw....a theih anga rangin ka rawn be leh ang che, ka dah phawt ange." tiin phone chu a dah a. Rang takin Officer Rintluanga, Alex-a pa a phone ve leh nghal. Pu Tluanga chuan a phone chu a lo chhang vat a, "Hello, enge ni ta, Rinawm?" tiin a lo zawt a.

Ring leng lawng hian Rinawma chuan, "Sir, Shadow X a lo let leh tawh. Shadow X thar a awm, Bungdur Khua ah tunah hian a awm mek a ni." a ti nghal deuh chiam mai. Officer Tluanga pawh chu a meng phawk nghal hru mai a, "Eng a? Sha..Shadow X dang an awm leh amaw?" a ti ve hu bawk a.

****************************************

Phone chu ala in-ring reng a, "Khawngaihin..khawngaihin min pui hram rawh, Lalpa..." tiin tap chungin Petera chu a phun sap sap reng a. Second 10 hnu velah chuan Hlimpuii chuan phone chu a rawn chhang ta a, "Hello...enge ni ta?" a rawn ti a. Hreh hmel tak hian Petera chuan, "Nu-i...thil hrilh tur che ka nei a ni. Khawngaihin min ngaidam ang che aw...khawngaih takin." a ti nghal lawm lawm a.

Hlimpuii chuan a hrethiam lo kher mai, "Enge awmzia, engtin nge i awm a? Khawnge i awm, Peter?" tiin a rawn mangang nghal kher mai. Petera chu a inhnit leh hlawp hlawp a, "Nu-i, min ngaidam rawh. Ka...ka bum che a ni. Ihh.. hmeichhe dang tam tak ka kawp thin, min ngaidam rawh. Chuan i nau Sawmsawmi mizia dan nachhan leh a damloh reng nachhan kha keimah vang a ni." tiin a inpuang ta a.

Hlimpuii mak ti lutuk chu tawng mai ngaihna pawh a hre lo, "Pe..Peter, enge i thil sawi hi, enge awmzia?" a ti khur dar dar mai. Petera chu a tap pur mai a, "Aw keimah vang, ka.. ka khawih thin a ni. Vawi tam tak ka pawngsual thin, chuan bialnu ka nei thin bawk." a han ti leh a.

Mahse Hlimpuii chuan ala hrethiam chuang lo, "Peter, i fiamthu chu a ni em lo maw, a nuihzatthlak loh khawp mai." a ti vin hlur tawh mai. "Nilo.. Nu-i ka fiamthu lo. Khawngaihin min ngaidam hram rawh, ka inchhir takzet, ka thiam lo takzet a ni." Petera chuan a ti chel chu mai.

Hlimpui chu a ngawi reng, a mittui a tla zawih zawih a. A thinrim bawk si chu a khur dar dar thei hial a, "Peter Lalhmachhuan, i rui em ni a, engei awmzia hi... i va tenawm ve, tiang pasal chu ka lo nei reng amaw?" tiin a thinrim takzet. Petera chu a inhnit hlawp hlawp a, "Min ngaidam hram rawh, a niloh chuan ka thi a nimai." tiin a ngen leh a.

Chutah chhuak em em hian Hlimpuii chu a tap ta hawm hawm mai, "Nu-i, min ngaidam rawh... khawngaihin min ngaidam hram rawh." tiin Petera chuan a lo ngen mawlh mawlh reng bawk a. Hlimpuii chu a tap bang a, "Zawnga, i chak dawn lo tih hria ang che." tiin phone chu a dah hmak mai.

Petera mangang chuan, "Nilo... nilo, Nu-i... dah suh. Hello.. hello?" a ti vak vak a. Shadow X chu ava en a, "Hey... Hey, a dah daih ania. Min la ngaidam lo ania, call back leh rawh." a ti chel chul mai. Shadow X erawh chuan ala hnungchhawn reng, "Chutiang rules ah a awm lo, rules chu keima siam a ni a, tuma thlak danglam theih a ni lo." tiin hawi let chuang miah lo chuan a lo chhang a.

Petera chu a tal vak vak a, "Nilo... call nawn leh rawh. Min ngaidam em em ang, khawngaihin mawhhh..khawngaihin.." a ti lawm lawm mai a. Shadow X chuan hrui chu a zai chat a, mahse bucket erawh chu ala rawn tla lo. Shadow X chuan a pawt a, mahse Petera chu a en duh hauh lo, ala hnungchhawn reng.

Muang chang chuan hrui chu a dar zawnah chuan dahin a pawt a, a kalpui ta mai a. Chuveleh acid awmna bucket chu a awn ruai ruai a, Petera chhip atanga a ke ler thleng chu a leih ta mai a nih chu. Petera sa ti lutuk chu a rak ring kher mai, a vun chu kangin a ri sawr sawr mai a.

A khu vut vut bawk, Shadow X chuan a hoodie lukhum chu a phelh a. A mask chu ala thla leh a, Abawihi hmel chu a rawn lang ta. Mahse Abawihi chuan Petera na tuar lai chu a en duh bik lo, hnungchhawn reng chung chuan hrui chu a thlah a. Bucket chu chhuatah chuan a tla ri bawl mai, Petera chuan a na chu a tuar ngang lo, acid lah kha a lem tel nual nen.

A vun mai nilovin a kawchhung pawh a kang tel vek a, a thi ta nge nge a. A ke bula ama phone ngei pawh chu acid chuan a ti kang chhe ve vek bawk, Abawihi chuan en miah lo chuan a kalsan a. A motor chhungah chuan a lut a, a thaw hak a. A melh ngai melh run run in, "Pahnihna chu ka zo fel leh ta." a ti zawi sap mai.

********************************************

SI Hlua leh SArah-i chuan in pakhat hi an thleng a, tichuan kawngka chu an han kik dat dat a. Tlangval pakhat hian a lo hawng a, "Enge ni ta, ka pu?" tiin a lo zawt nghal a, police dorm an ha bawk si nen a ngaih a tha lo khawp mai. SI Hlua chu a han thaw deuh hak a, "Malawma te in a ni em aw?" tiin a han zawt a.

Chu tlangval chuan, "Aw ni e, keimah hi ka nia." tiin a lo chhang a. Chu tlangval chu tudang nilovin Malawma, Duhzuala nau ngei kha a lo ni. "Kan lo lut thei angem?" tiin Hlua chuan a dil a. MAlawma chuan a luh tir a, "Tute nge ni a?" tiin room atang chuan Malawma nu chu a rawn chhuak ve bawk.

Chutia police pahnih a hmu ta mai chu Malawma nu pawh chu a hrilhhai angreng hle a, "Ehe, engthil nge ni ta?" a ti hu mai. Hlua chu a han nui sen sen a, "Englo ania, kan case kal mek laiah i fapa Malawma hi thu han zawh fe deuh kan duh a, engmah hlauhthawnawm a awm hauh lo ania." tiin a han sawifiah nghal zung zung a.

Malawma chuan a hrethiam lo kher mai, "Eng a? Keimah hi maw...eng case maw?" a lo ti hu mai. Hlua leh Sarah-i te chu an thu a, "Aa.. sawi nuam chu a ni miah lo a. I nau boral ta, Duhzuala fa paitu, Nunui Vengthar ami kha nizanah a boral a." a han ti te te a.

"Nia kan lo hre ve alawm, chuan engtin zel?" Malawma chuan a lo ti a. Hlua chuan a han en hu a, "E, inlo hria maw?" tiin a zawt let nghal a. Malawma chuan ban deuh chap hian, "Nia..kha, a zia lo kan ti khawp mai keini pawn." tiin a chhang a. Malawma nu pawh chu lo tawngchhuak ve in, "Rul chuk an ti ani lawm ni?" a lo ti ve bawk a.

Hlua leh Sarah-i chu an han in melh zeuh va, "Englo ania, ka pi. Rul chuk hlum chu a ni ngei mai a, mahse Nunui kha kidnap hmasak a ni." a han ti chiah chu MAlawma te nufa chuan mak an tih hmel kher mai, an inen hu mai a. Chutah MAlawma chuan thil hriat chhuah zawk a nei a, "Ehe taka, a thih zan khan, nizan khan min rawn call tak asin mawle.." a rawn ti chhuak hlawl mai.

Chuveleh Hlua chuan, "Animaw, enge a rawn sawi?" tiin a zawt nghal vat. Malawma chu a ngawi vang vang a, "Ka nu nen hi chuan kan hre daih tawh tho va, a thil tihsual a rawn puang a ni." tiin a chhang a. Hlua chuan mak a ti hle mai, "Engtia a thil tihsual maw?" a lo ti leh hu mai a.

"Ka u Duhzuala khan kut a thlak ngai reng reng lo, hmeichhia chu sawiloh..kei tak ngial pawh hi kut min thlak ka la hre ngai lo. Mi nunnem, mi pawisawi hlau leh zaidam tak a ni a. Hotel pakhatah thawkin a inhlawh ve tawk tawk a, kan nufa hian min chawm ve tawk tawk a ni. Tichuan Nunui hi a tawng ta a, a hmangaih em em a. Mahse Nunui chuan amah nilovin a pawisa zawk a ni a duh ni. Kan chhungkua kan buai phah hial bawk, ka nu lah a hrisel lo bawk nen. Rethei hle mah ila chhungkaw hlim tak leh inhau ngai lo kan ni thin, mahse Nunui a rawn lang chiah a. KA u nen pawn kan inhauh phah fo va, mahse kei lah hna nei mumal thei silo nen, ka tawng ve vak ngam ngai bawk si lo. Nunui chu a rai ta a, ka u pawhin a fa ngei a ni tih a pawm thlap. Nunui chhungte lamin an hria a, ka u nen hian innei ngei turin an ti a. KA u hian a hmangaih em em a, a hriat tirh phei chuan a lawm zia thu hlir a sawi thin. MAhse Nunui chuan midang, officer hausa tak tak a kawp kual san a, a nau pai pawh chu amah ngei insawisa in a chhiat ta nge nge a. Ka u laka a kal bo theih nan ka u chu a puh a, mi thiltithei zawk na na na chuan thiamloh min chantir a, ka u chu evidence mumal pawh awm hauh lovin jail ah a tang ta a ni. A tan atanga kar khatna lekah hrehawm a ti lutuk chu a inawkhlum ta a, mahse tun thleng hian rorelna dik chu kan la hmu chuang lo." tiin Malawma chuan a chhang a, a inhnit feih feih mai.

Hlua chuan a lu a han bu nghat nghat a, "Ka rin ang reng a ni, engemaw dik lo kha a awm chiang alawm. Mahni thiam lohna ngei ah, jail chhung hrehawm tih avangin kar khat lekah a inawhhlum em kha chu ka ring lo. Nunui pa Pu Thanga nen kan inbe zo chiah a, tukin khan... min hrilh lai pawh khan dik lo a awm ngeiin ka hria a ni. Anih leh Malawm, nizan chuan Nunui chuan engmaw a rawn sawi a?" tiin a han zawt leh a.

Malawma chu a han thu tha te te a, "Tap chung khan a sawi a, a mangan hmel hle bawk. NGaihdam min rawn dil a, amah ngei a insawisa a, nau a chhiat thu leh ngaihzawng dang tamtak a neih reng thin thute, ka u thihna chu amah vang a nih thute a rawn sawi teuh va. Keilah chuan hmun leh hmunah, hmaichhanah inhmu ang ka ti tlat a. Tunah min ngaihdam ngei ngei a ngai a la rawn ti ham ham a, ka thinrim insum zolovin ka dah ta hmak a nih kha. A la rui pawh a nimaithei, chuzawng chu a nimai ka hriat chu." tiin a chhang a.

"Ni e, Bawiha pawh hian nizan khan min hrilh a. Kan rilru a na thar takzet, a thuhrimin tinge ka pu, engvang ber chuan maw in lo kal?" tiin Malawma nu chuan a lo zawt ve a. Hlua chu a han ngawi vang vang a, "Nunui kha rul chuk avanga thi chu a ni ngei a, mahse tu emawin a kidnap a, a chuk luih tir a ni." tiin a chhang a.

Phawk hru hian Malawma chuan, "Eng a? Tihluihna maw?" a lo ti hu mai. Hlua chuan a lu a lo bu nghat a, "Aw, ni e. Tihluihna hmangin, a rawn phone che pawh khan, amah kidnap tu hian i hnenah a inpuan luih tir a ni." a ti leh a. Malawma chuan mak a ti kher mai, "Mahse ka pu, chu chu engtin nge i lo hriat daih theih a?" tiin a zawt leh a.

Hlua chu za lo tak chuan a khi sak a, "A chhan chu he thil titu hi Shadow X a ni." tiin a chhang a. Malawma te nufa chuan an hriatthiam loh hmel tak zet, an inen leh hu mai. Malawma nu chuan, "Shadow X a, chu chu khawia mi nge?" tiin a lo zawt ve leh a.

"Shadow X hi pakhat chauh an ni lova, tun ami hi a pathumna a ni. Kum khat dan zelah a thar an awm zel a, a hma a pahnihte chu encounter hmanga kah hlum an ni ve ve tawh. Misualte, an thil tih sual zep a zalen taka khawlaia tei mai mai ho hi Shadow X chuan a haw takzet a. Chung mite chu manin, an inpuan hma chu hrehawm a tawrh tir thin. Tichuan inpuanna hun a siam sak a, an thil tihsual avanga tuar tute beng hriatah a inpuan luih tir thin a, phone call a hmang tlangpui bawk." a han ti leh a.

Malawma chu a ngawi vang vang a, "Mahse ka hrethiam lo, engtin nge Shadow X chuan ka u chu a lo hriat ve theih? Engtin nge Nunui tihsual zawng zawng te chu a lo hriat ve theih. Chubakah Shadow X chu enge awmzia ni reng reng le, an thih pawn a thar an awm zel anih chuan ava mak awm ve!" a han ti leh nuah nuah a.

"Ni e, amak ti pawh ni la a awm lo hran love. Mahse ka thusawi hi a dik a ni, sawi tak ang khan Shadow X hi pahnih chu an thi tawh a. Tun ami hi a pathumna a ni a, a hmasa a mite pahnih pawh kha an man har khawp mai. A fingin a thluak a chak em em a, a hnuhmate pawh tifai em em chuang silovin, chhuichhuah har tak siin a kalsan thin. A pawimawh berah chuan, tuna Shadow X thar hian tunge i nih a hria a, inchhungkua a hrechiang hle bawk. In fimkhur angai a, inah hian in tawm reng a ngai a ni. Chhuak tam lo ula, he Shadow X thar hi tunge a nih tih kan hriat ngei angai." a han ti leh a.

*******************************************

Police Station chhungah chuan Constable Sentea chuan file pawimawh vel chu a thliar fel mek a, chutih lai chuan phone chu a rawn ri a. Rang takin a la a, "HEllo, Bungdur Police Station?" a han ti nghal deuh thlap a. Phone ami chuan, "Ka pu, hetah... Lawibual mual lamah ruang chhar a ni a, bangla hlui awmnaah khan. Chu chu kan rawn phone che u a nih hi.." a rawn ti ta mai a.

Sentea chu a meng phawk nasa mai, "Eng a? Ruang maw... i sawichiang deuh thei angem?" tiin a zawt leh nghal a. Phone ami chuan, "Lawibual mual lam, bangla hlui awmna ah khan. Tah khan a thutthlenga inphuar betin a awm a, a taksa hi a kang vek bawk. Acid tuia leih hlum a nih hmel, a hmel phei chu hmuh tlak pawh a nilo." a rawn ti leh a.

Sentea chu a thaw hak a, "Awle a nih tak chu, nangmahin em ni i hmuh? Nge midang awmpui i nei em?" a han ti leh a. Phone ami chuan, "Hei ka nau nen ram riah kan tum a, kalkawngah kan hmu a. Kan rawn phone nghal che a nih hi, kan hmuh veleh..." tiin a rawn chhang leh a.

"A tha e, in hming ka hre thei angem?"

"AW tehreng mai, ka hming chu Lalrammawia a ni a, ka nau hi Zothanpuia a ni e."

Sentea chuan a ziak thla nghal a, "Awle, tikhan lo awm ula. Kan rawn kal vat dawnnia, kan pute ka han hrilh nghal ange. Midang lo hrilh pung lo bawk ula, in awmna ngaiah khan lo awm reng rawh u." tiin phone chu a dah a. Phone a dah rual rual chuan SI Hlua leh SArah-i te chu an rawn thleng ve nghal bawk.

Sentea chuan Hlua chu a lo pan nghal a, "Sir, ruang chhar a ni leh tawh." a tih chuan Hlua chu a meng phawk nasa mai. "Eng a? Khawih hmunah?" tiin a zawt nghal. "Lawibual mual, Bangla hlui bulah khan... thutthlenga phuarh beh a nih hmel a, acid tuia leih hlum anih hmel an ti bawk." tiin Sentea chuan a lo chhang leh a.

Hlua leh Sarah-i chu an in en a, "Shadow X." an ti rual a. Sentea chuan a lo hriatthiam loh hmel khawp mai, "Eng a? Shadow X a? Enge awmzia?" a lo ti hu mai. "Nakinah kan sawi dawnnia, crime scene ah chuan va kal vat angai a nih chu." a ti a, chutih lai chuan Forensic Dr. Samuela a lo kal a.

File pakhat chu rawn pe in, "Pu Hlu, hei le post mortem report chu." a rawn ti a. Hlua chuan lo ban nghalin, "In va peih fel har ve.." a lo ti nuah nuah a. A han keu thuak thuak a, "Sente, Sarah-i nen khan bike-in crime scene lam pan chuan lova kal ula, nakinah kan lo kal ve ang. Constable paruk vel tal hruai bawk ang che u, kal nghal rawh u.” a han ti a.

Sentea leh SArah-i chu crime scene lam pan chuan an inphur phei nghal a, Hlua chuan post mortem result chu a han en chhunzawm leh a. “Rul ngan tur hlir a khat ti ila kan sawi sual lovang, a rapthlakt takzet. Chuan inchungah khan hruia khai kan ngei a ni bawk a, darkar 2 zet khai kan a ni.” Dr. Samuela chuan a han ti a.

Hlua chuan a lu a bu nghauh nghauh va, “Vawi engzat vel nge an chuk, chuan minute nge a hman?” tiin a zawt leh a. “Rul ngan te kha an tur a chak em em a, 10 rualin an chuk rawn a. A taksa ah khan chukna hnuhma 28 vel a awm a, chukna ngaia chuk nen zawng zawng belhkhawmin vawi 40 vel chuk ang an ni. Minute 2 vel hnuah a thi ang, rul pakhat chauh chu nise minute 30 vel chu a la dam thei maithei a ni.” tiin Dr. Samuela chuan a chhang a.

Hlua chu a han thaw hak a, “Doctor, nang enge i ngaihdan ni hrim hrim?” tiin a han zawt a. Dr. Samuela chu a lo khi suk a, “Ka ngaihdan chuan maw, he kidnapper hian a kut ngeia thah chu a duh lo. Mahse na taka hrem a duh a ni, ka sawi awmzia chu a haw hle ni tur a ni.” tiin a lo chhang a.

“Umm ni e, chu chu a dik ang. Rul pakhat chauh pawh dah se, a thihpui dawn chian tehreng nen. Rul ah pawh rul ngan, hlauhawm ber chi a ni bawk a. Pakhat mai nilovin sawm chuang a dah a, khawi ami nge maw a khawn khawm bik em em le te ka ti hial zawk...engpawh nise, crime scene ah chuan ka va kal ve ange.” a han ti nuah nuah a, a chhuak ve ta a.

******************************************

Crime scene chu Hlua chuan ava thleng a, ruang chu an lo la khawih danglam lova. Petera ruang chu hmuh a hrehawm takzet, a kawr chu a kang sawr vek a, a hmel phei chu a sawr bawk vek a, a diak deuh pur ti ila kan sawi fiah thei ber awm e. A phuarna hrui pawh chu acid chuan a lo ei chhe nual a, Petera chu a thle sawi bawi mai.

Hlua chuan a han en vang vang a, “Tute maw ruang hmu hmasa ber tute chu?” tiin a han au deuh lauh lauh va. Ruang hmu tute, Rammawia leh Zothana te unau chu an rawn kal a. “Ka pu, keimahni kan ni e.” a rawn ti a. Hlua chuan a han en dun vang vang a, “Thiandun ami in nih?” tiin a han zawt daih a.

Rammawia chuan inthlahrun hmel tak hian, “Aa... unau kan nia ka pu, mau put kan tum a. Tichuan kan hmu a, kan hmuh veleh kan rawn phone nghal che u a nih hi.” tiin a chhang a. Hlua chu a han hawi kual vel a, “Helai hmun hi inhrechiang reng reng em, in kal fo tawh ang chu tiraw?” tiin a zawt leh a.

“Aw ka pu, kan kal ngun ve fu chuan ka hria. Helam kawngah hian mau pu turin kan kal thin a, LAwibual mual hi mau a tha thei hrim hrim a.”

“Anih leh ruang in hmuh tirh hian a bul velah thildang hmuh in nei em, mihring tumah dang an awm lo tiraw?”

“AW awmlo ka pu, keimahni unau chiah hi a ni mai.”

Chutia a zawh mek lai chuan Hlua chuan ruang bula engemaw dum, kuttum tiat vel lo let reng chu ava hmu a. Ava pan nghal a, a enchiang a. Phone kang bang kha a ni, glove a bun a. A chhar a, a en a. On a han tum a, mahse a lo kang chhe vek tawh. SArangah chuan a dah a, “Sente, ruang hmu tute kha thu lo zawh belh teh aw, chiang deuh zawkin..” tiin crime scene chu uluk leh zual chuan a han en chiang leh a.

Bangla sir a, bang keh kar chuan a mit a la ngei mai. A va en hnai ta nge nge a, hnim bula acid bur ruak chu a hmu ta a. Ava kal hnai a, a bur chu a la kang a. Sarah-i lamah chuan ava phei a, “Eng bur nge a, acid bur chu em ni, Sir?” tiin Sarah-i chuan a lo zawt nghal vat a.

Hlua chu a khi deuh suk a, “Hydroflouric acid...acid hlauhawm berte zing ami a ni. Mahse..” tih nuah nuah pah chuan Petera ruang chu ava en a. Sarah-i lah chuan, “Enge mahse?” a lo ti hu mai. “Aa.. hydroflouric acid kang ni tur chuan a kang nasa e, thildang a pawlh tel a ni lo maw le?” Hlua chuan a han ti nuah nuah a.

Forensic doctor pakhat chuan, “Sir, heta bucket chhungah hian acid la ro lo, tuihnang tlem ala awm e. Hei hi kan lak chuan eng ang acid chiah nge a nih a hriat theih ang, hydroflouric acid chauh chu a nih ka ring lo keipawn.” a lo ti ve bawk a. Hlua chuan a lu a han bu leh deuh nghat nghat a, “A tha e, engpawh chu nise ruang hi post mortem turin phur phei ang che u.” a ti a.

***************************************

Abawihi chu inah chuan a haw a, a room ah chuan a lut leh ta a. Banga a tar, Petera thlalak chu a en vang vang a. Marker sen(red) chuan chiang kelh kawlh hian Petera hmai zawn takah chuan X tih chu lian takin a ziak a, a bag chhung chu a zen rawk rawk a.

Thlalak dang a rawn phawrh leh ta, chu chu mipa niin a hmel pawh ala naupan hmel. Kum 20 pawh ala tling em dawn mi tih tur khawpa naupang ala ni ngei ang, a hmel pawh a tha reuh fu lehnghal. Bangah chuan a tar leh a, a chungah chuan 3 tih chu chiang kelh kawlh hian a ziak leh ta a.

Room chu a chhuahsan a, bathroom ah a lut tlang nghal a. A thawmhnaw te chu phelhin fai tak chuan a inbual a, verandah ah chuan thu chhuakin boruak thianghlim te chu a dawng a. A maimitchhing vang vang mai, “In lo kal chu a hun tawh viau mai, pute u.” tiin a khi suk a.

Pute u tia a sawi hi chu Inspector Rinawma, a Pa Rintea, Shadow X hmasa zawk that tu leh Officer Tluanga, a bialpa hlui Nghaka, Shadow X original thattu te a sawina kha a ni. Abawihi hian Inspector Rinawma leh Officer Tluanga te hi a huat hian a haw bur tawh a ni tawp, phuba lak ngei a tum.

Mahse thah ve kher a tum em erawh chu a la chiang chiah bik lo, lo man thei ta se, lo kidnap thei ta pawh nise engtin nge a tih ang a la hre bik chiah chuang lo. Mahse a hmangaih te pahnih, amah ngaihsaka venghimtu, thudi hmuh tirtu, a pa Rintea leh a bialpa hlui Nghaka thattute an nih miau avangin a haw em em ringawt mai a ni.

A phone a rawn ri a, number ringawt a lo ni. A la nghal a, “Hello, tunge aw?” tiin a zawt nghal a. Phone ami chu tudang nilovin SI Hlua a lo ni reng mai, “Abawihi a ni em aw?” a rawn ti ta mai a. Abawihi chuan mak a ti ru kher mai, “AW...aw ni e, tunge ni?” tiin a lo zawt let nghal vat a.

Hlua chu a han thaw hak a, “Sub Inspector Hlua ka nia, biak lawk che ka va duh ve. Tunah Aizawlah i awm em, hmaichhan ngeia inbiak ka duh a?” tiin a rawn zawt leh a. Abawihi thin chu a phu nghal dup dup mai, “Sub Inspector.... police maw i nih a?” a ti bah deuh nuai mai a.

“Aw ni e, a pawimawh si a.... hei i number hi ka nei thei hram a, ka zawng kual nasa lutuk a.”

“Anih chu, engthil ah nge min biak duh a?”

“Phone-a han sawi mai chu a har deuh va, Aizawlah chuan em ni i awm?”

“Aih...Bungdur khuaah hna thawkin ka awm a.”

“E a nimaw, i ti tak tak em?”

“Ti tak tak e, kum chanve vel chu ka awm tawh.”

“Anih chuan a tih zia hlauh chu, Bungdur khaw Police Station Sub-Inspector kha ka nia...” a han ti chu Abawihi chu a phu nasa kher mai. A phone chu a dahthla nghal a, “Nilo..hepa hi case khawih mektu SI kha a lo ni reng amaw?” tiin a phun zawi sap mai.

“Hello...Hello, Abawih, ka tawng i hre thei em?” Hlua chuan a la rawn ti nasa mai. Abawihi chuan phone chu a bengah chuan a chuktuah leh a, “AW..aw, enge, hei..ka.. ka la awm e.” a ti bah deuh nuai mai. “Anih chuan Police station ah i hman remchan hunah i lo kal thei angem?” Hlua chuan a rawn ti leh a.

Abawihi chu a ngawi vang vang a, “Eng chungchang ah nge tih tal ka hre thei angem?” tiin a lo zawt let ve a. Hlua chuan a aw a han thian kharh kharh phawt a, “Aa.. ih, englo ania. Shadow X chungchang ania, mi thar an awm leh tawh anih hmel a... chuvang chuan ka rawn be tawp che.” tiin a rawn chhang a.

Abawihi chu a maimitchhing vang vang a, “Anih tinge min hmuhduhna chhan, Shadow X chu ka ni em ni?” a ti deuh kher a. Hlua chu a khi suk a, “Chutiagn lam a nilo, Shadow X pahnih an awm tawh a, chung mite chu i hraitchian leh nangmah nena inzawmna nei ve ve an ni. Chuvang chuan ka biak che angai, i lo kal theih ngei ka beisei.” tiin a rawn chhang ve sak mai.

Abawihi pawh chu a khi suk a, “Awle, zanlamah a pawi angem?” a ti leh a. Hlua pawh chuan, “Pawi love, ka lo ngaichang dawn che nia.” tiin a chhang a, phone chu an dah ta a. Abawihi chuan rum zet hian a melh ngai chu a melh reng a, “SI Hlua maw i nih a, ka kawng dal zawnga i awm a nih vaih chuan nangpawh hi ka dahtha ve nghal ang che.” a ti khur dar dar mai.

Abawihi hi a hma chuan mi nunnem leh tharum thawhna ngaina lo zet a ni thin tih kan hriat tawh kha, mahse Shadow X a nunna a lo lan tak atang khan thil tawn tam tak a nei tawh a. Tunah phei chuan Shadow X a ni ve tawh lehnghal, Shadow X awm tawh azawngah chuan a rapthlak ber leh khawngaihna nei lo ber nih a tum hial zawk a ni.

**************************************

TO BE CONTINUE