UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 5

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 5

**********************************

Light eng pup mai chuan Williama chu a ti harh zawk mai, a han meng a. Mahse a maimitchhing leh nghal vat, a lu zawn takah chuan bulb eng tak mai hi a lo inchhi a, mahse hmundang zawng chu a thim vek thung. A awmna lai bik te chu a eng a, a han meng lui tawk tawk a.

Thutthlengah hian phuar beh a lo ni a, a awmna chu hall zau ve angreng tak nimai hian a hria. A hawi kual a, "Khawnge ka awm?" tiin a tal vak vak a. Chutah a hma zawn thim lai atang chuan Shadow X chu a rawn chhuak ta, "Nang bawk maw, tunge maw i nih le?" tiin Williama chuan a han vin tuar a.

Shadow X chu a hma zawn takah chuan a rawn ding a, "William Lalfakzuala, kum 19... i la naupan tehlul nen i tenawmin i zaktheilo kher mai." a ti a. Williama chuan mak tih hmel tak hian a en a, "Min hria amaw? Tu phiangsen chu nge maw i nih le?" a han ti vin leh tuar a.

Shadow X chu a han vei kual a, "Kei hi Shadow X ka ni a, mahni duh thu a thil tisual thinte hrem hi ka hna a ni." a han ti te te a. Williama chu inla pa lui tlatin a han khi vel suk a, "Tu mihring pawh hian thil kan tisual vek alawm, i hrem vek dawn tihna em ni?" ngeiawm tak chuan a lo ti a.

Shadow X chuan a lu a han bu nghauh nghauh va, "I sawi dik, tupawn thil kan tisual vek. Mahse hrem phu bik hi in awm alawm, entirnan nang ang te..." a beng bulah kher chuan a zu t(r)awng a. Williama chuan a melh rum kher mai, "Engthil nge ka tihsual a, sawi ta che." a han ti leh pang pang a.

Shadow X chu Williama hma ah tak chuan a han ding leh a, "Levania School ah pawl 12 zirlai i ni a, hosteller i ni bawk. In warden kha hnamdang niin Kumara a ni, tichuan in inexam laiin nikhat chu Kumara chhuah laiin warden room ah i lut ru a, Kumara nupui Rani thil in turah mutduhna i pawlh a, a dik zel em?" a han ti ta zuah zuah mai a.

Williama chu a meng phawk nasa kher mai, "Eng...engthu nge maw i sawi le, chutiang engmah ka ti lo." a ti nghal vak vak mai a. Shadow X chuan hnai takah a en a, "Rani chu a muhil ta ngei a, tichuan i phone pai ruk hmang chuan a thla i laksak a, i phelh ruak a, a taksa i duh duh lai i khawih bawk." a ti leh a.

Williama thinrim chu a tal nasa kher mai, "Zawnga, dawt sawi suh. Chutiang ka ti lo, dawt phuahchawp reng reng suh." tiin a vin nasa mai. Shadow X chu a nui ta huah huah mai a, "William...William... naupang leh. Chu lo pawh chu ka la hre teuh, ka sawi zel dawn em?" a la ti ta deuh deuh va.

Williama chuan rum zet hian a melh a, "I chak lo khawp ang, i chak dawn lo, hre rawh.." tiin a vau khur khur a. Shadow X chu a ngawi vang vang a, "Engvangin nge i tih? Khami thlalak hmang khan exam in chawlh tawh hnu pawh khan i vau thin a, i duh duh hunah i mutpui thin bawk. Chuvang chuan hrem i phu, i hria em?" a ti thum chhur chhur mai.

Williama chuan a chhang tawh lo, a ngawi vung vung ringawt a. Shadow X bawk chuan, "Zanin hian i thil tih sual chu i puang ngei ang, i duh emaw, duh lo emaw." a han ti leh a. Williama chuan thinrim tak hian, "Nanga dawt phuahchawp mai mai kha, engmah tihsual ka nei lo, inpuanna tur ka nei lo." a lo ti leh a.

Shadow X chuan a bag chu a zen ruk ruk a, electric wire sei tak mai hi a rawn phawrh a. Williama chuan ngaih tha lo tak chung hian a lo en reng a, X-a chuan wire chu rawn keng pheiin Williama taksa ah chuan a vet kual ta teuh mai a. Williama chu a lo tal vak vak a, "Zawnga, engthil nge maw i tih le?" tiin a lo hlauthawng nasa mai.

Mahse X-a chu a ngawi reng a, tichuan wire hmawr chu plug ah chuan a vuah a. Williama chuan vin zet hian, "Engthil phiangsen nge maw i tih le?" tiin a han vin leh khur khur a. Shadow X chuan Williama chu a en vang vang a, "In warden hnenah a nupui i khawih thin avangte, i blackmail thin avangte leh tihluihna hmanga i mutpui avangte in ngaihdam i dil ang." a ti a.

Williama chu a thinrim kher mai, "Eng thu nge maw i sawi le, Levania School ah sawn ka lut ngai lo, chuan an warden Kumara sawn nupui a neih ka hre lo bawk. Min chhuah vat rawh, kei hian engmah tihsual ka nei lo." a ti khur dar dar mai. X-a chu a khi suk a, "I inpuang lova, ngaihdam i dil duh lo a nih chuan plug hi ka on anga, current chak tak in a shock hlum thak ang che." a ti leh ta khur khur mai a.

Williama hlau leh mangang bawk si chu a thlan a tla zawih zawih mai, "Tu mi mawlin nge dawt lo hrilh che le, Rani tih hmingpu tumah ka hre ngai lo. Min hai a ni lo maw....kei hian chutiang thil engmah ka ti ngai lo." tiin a tal leh vak vak a. A kut phuarna hrui chu X-a hmuh loh chuan hnunglama thuthleng ther, hriam laiah chuan tal chat tumin a bei ru ngar ngar a.

X-a chuan Williama phone chu a phawrh a, a han hmet kual zat zat a. A contact list chu a en a, WARDEN SIR KUMARA tih chu a lo awm tak tak a. Shadow X chu a khi suk mai, "Hei en rawh, engtin nge a number i neih si?" tiin ngeiawm tak chuan a han zawt deuh kher a.

Williama chu a thaw hak a, "Kumara saw ka thianpa Suresh-a U a ni a, chuvang chuan a number ka nei. Min awih loh chuan i duh leh Suresh-a kha call rawh, a u a nih thu chiang takin a lo hrilh ang che, chuan Kumara sawn nupui a la nei lo bawk." a ti ta zuah zuah mai.

X-a ngaih pawh chu a tha bik chiah tawh lo, a ngawi ta vung vung mai a. Ama hriat tham lek chuan, "Abawihi hian dawt min hrilh tihna em mawni le?" tiin a phun zawi sap mai. Chutih lai chuan Williama pawh in a kut phuarna chu a ti chat thei ta, mahse ala che chhuak mai duh bik lo.

Wire sei tak in a la vet tlat bawk si, mahse a nghet lutuk lo hlauh thung. X-a chuan contact list chu a han en chiang leh a, Williama sawi ang ngeiin Suresh tih pawh chu contact list ah chuan a lo awm ngei bawk. Chuvang chuan han tih luih chu a ngam chiah tawh bik lo, Williama chu a hnungchhawn a.

Ama phone chu phawrhin Abawihi chu a call leh ta, mahse Abawihi chuan a lo la thei mai lo leh ta nghal a. A call nawn leh ngat a, mahse a la ring quit thak thak tho va. Chutia hnungchhawn zawnga a awm lai chu remchangah la in thawm dim thei ang ber chuan Williama chuan wire vel chu a lo phelh mial mial a, X-a chuan a hre hauh lo.

Vawi 4 vel a try hnu pawh chuan ala la thei si lo chu a thinrim ngei mai, "Hrep tak chuan le, Hmeli mai mai chuh..." ti a hnunglam a hawi phei chiah chu Williama chuan a rawn hnek siah mai. X-a chu a thal tawp a, Williama chuan a chhuih zui hrep bawk. Rang lutukin kawngka lam chu a zawng kual nghal a, ala hmu mai lo zui.

X-a chu a rawn tho ve lehnghal a, a thinrim hmel kher mai. Williama chuan kawngka chu a hmu fuh hlauh va, a inkalhna chu hawngin a chhuak nghal a. X-a chuan a umzui ve nghal bawk, a theih tawpa chak chuan a tlan a. Mahse X-a chu a rawn tlan chak fua fua kher mai, a rawn um pha nghal titih der mai a.

Lamlian lam chu a hmuh veleh chuan Williama chuan a pan nghal, kawng sir atang chuan a zuang thla a. Lamlian lam ava thlen veleh chuan motor pakhat hi a lo tlan mek a, a rawn la tlan chak em em mai lehnghal. Driver chuan Williama rawn lang thut chu a phu nasa kher mai, a break hman tawh lo.

Williama chu a su pawp mai a, a vir nawk mai. Motor chungah chuan a rik chho rawk rawk a, lamlianah chuan a tla thum leh t(r)awk a. A hmai chu thisen hian a bual kher vek a ni ber mai, X-a pawh chu a ding chat a, lamlian lam pan lo chuan kawngsir thingkung phen atang chuan a en reng a.

Driver chu a rawn chhuak a, "A va pawi tak e aw.... thianpa, thianpa i tha em?" tiin Williama chu a buaipui nghal a. Williama chu a thaw hrawk hrawk a, tichuan nikhawhrelovin a awm ta nghal a. Driver chuan a pawm nawlh a, a motor ah chuan a luhpui a.

***********************************************

(2 HOURS LATER)

"Chuan tuman an rawn um awm ang i hmu lo maw?" tiin SI Hlua chuan Driver chu a han zawt leh a, damdawiinah an awm mek a ni. Driver chuan a lu a lo bu nghat nghat a, "Aw ka pu, a rawn lang thut a. Kei lah ka lo khalh chak ve angreng bawk nen, motor dang awm bawk silo leh zanrei tawh na na na chu ka tia ka lo fimkhur lo ve pawh a ni mahna. Ka hawikual a, tumah midang chu ka hmu lo." tiin a chhang a.

"Khawia kal tur nge i nih reng reng?"

"Aizawl lam pan tur ka nia, zan tlan ngei ngei ka ngai a, chhungkua kan buai lutuk a."

"Anih leh enge maw sawi te a nei hman em?"

"Aih, nikhawhrelovin a awm nghal a, a mar ka la hmuh avangin rang takin damdawiin hi ka rawn pan pui nghal a ni."

"Umm..... a nih tak chu, amah hi i hriat ngai mi a ni lo tak tak amaw?"

"Aw ka pu, vawikhat mah ka la hmu ngai lo."

Chutih lai chuan doctor chu Operation room atang chuan a rawn chhuak a, "Doctor, enge chanchin?" tiin Hlua chuan a lo zawt nghal vat a. "A ngaihtuahawm loh ve, mahse ala harh rih lo. A kut veilam hi a ruh a tliak a, kan cher nghal a. Chuan a ke rek dinglam hi a ulh deuh bawk a, a tukhum a sawh nat deuh vanga nikhawhrelova awm ni berin a lang." tiin doctor chuan a chhang a.

Driver pawh chu a thaw huai mai, "Mahse a hmaia hliam te saw accident vang a ni lo thung." doctor bawk chuan a han ti leh a. Mak tih hmel tak hian Hlua chuan, "Eng a? Kutthlak a ni i tihna em ni?" tiin a lo zawt leh hu mai. Doctor chu a han ngawi vang vang a, "A ban rekah sawn hruai phuarna hnu niawm tak kan hmu a, a duk vek bawk. Chuan a hmaiah sawn hliam a awm nual a, a mit pahnih a duk chur bawk a, a lan dan chuan vawi 20 chuang chawl miah lovin a hmaiah sawn kutthlak a ni." tiin a chhang a.

Eng eng emaw an sawi leh hnu chuan doctor chu a kal ta a, "Sir, Shadow X tho a ni leh lo maw?" tiin Sarah-i chuan a lo zawt ve a. Hlua chu a ngawi vang vang a, "Ka rin ber chu ania, mahse Shadow X hian kut a thlak ngai lo, tumah a victim te hi ama kut ngeiin a that ngai lova, a tina ngai lo bawk." tiin a lo chhang a.

Sarah-i chuan a lu chu a han hiat nauh nauh va, "Anih chuan midang, tuten emaw an sawisa pawh a ni thei tho mai." a lo ti ve leh nuah nuah a. Hlua chu a khi suk a, "Dam lo hi han harh chhuak phawt se, kan hre em em ang." tiin a chhang leh a. Chutih lai chuan constable Sentea chu a rawn kal a, "Sir, a hming kan hre tawh e. A chhungte nen, William Lalfakzuala, Bungdur Tuikhur Veng ami, Section B ami a ni e. Pu Lalnunthara leh Pi Zahmingi te fapa te ber." a rawn ti deuh zat zat a.

"I ti tha e, a chhungte chu in hraittir tawh em?" tiin Hlua chuan a lo zawt a. Sentea chuan a lu lo bu nghatin, "Aw Sir, an lo kal mek e." tiin a chhang a. Hlua chuan driver chu a han en leh a, "Anih leh phone chu a ak miah lo amaw?" tiin a han zawt ve leh a. "Aw ka pu, a kekawr ipteah engmah a dah lo, ka ti tak tak." tiin Driver chuan a lo chhang a.

*************************************

Abawihi chuan Hospital chu ava thleng ve a, Hlua leh Sarah-i chu an lo titi mek a. Hlua'n Abawihi a hmu thut chu mak a ti kher mai, Abawihi pawh a ding chat a. An in en vung vung a, Abawihi chu ava kal hnai a. "Abawih, eng nge hetah i tih ve a?" tiin Hlua chuan a lo zawt nghal a.

Abawihi chuan a chil a han lem dawk a, "Aa.. ihh, ka hmelhriat, ka thianpa ania." a ti bah deuh nuai mai. Rinhlelh hmel tak hian Hlua chuan Abawihi chu a han thlek deuh vang vang a, "A nih leh engtin nge a accident tih i lo hriat ve a?" tiin a han zawt leh deuh kher a.

Thawk deuh hak pah hian, "A chhungte atangin, ka lo hre ve tawp." tiin a chhang leh a. A sawi zawh rual rual chuan Williama chhungte chu an rawn thleng a, an rawn mangang nghal khawp mai. Hlua chuan Sarah-i bulah chuan, "A chhungte hi lo bia la, hrilh chin tur tawk te kha hria la aw... Abawihi nen hian kan han inbe lawk ange, a rei lovang." a ti a.

Sarah-i pawh chuan a lu a lo bu nghat a, "Awle, Sir." tiin a lo chhang a. Ward atanga pen 20 vela hla ah chuan Hlua chuan Abawihi chu a hruai phei a, "Ka sawi reng kha maw, Abawih? Bungdur Khua daih pawh ni sawmsarih rawh se, Shadow X a nih chuan nangmah nen hian a inkungkaih dawn tho tho." Hlua chuan a han ti nghal deuh chiam a.

Abawihi chu a han ngawi deuh vang vang phawt a, "Shadow X thil tih a ni tih i hre ngawt ami?" tiin a lo zawt daih mai. Hlua chu a han thaw deuh hluai a, "Shadow X thil tih a ni thei tlat, a chhan chu a ban rekah sawn hruaia phuarna ni awm tak hnuhma kan hmu a ni." tiin Hlua chuan a chhang a.

"Shadow X pawh chu lo ni tehreng se, Williama kher..... Shadow X victim ni ve tur chuan engthil sual lian tham mah a tih ka ring lo a ni." Abawihi chuan a han ti ve leh a. Hlua chu za lo tak chuan a khi deuh suk a, "A ni lo thei bawk, a chhan chu Williama hmaiah sawn kutthlakna hnuhma, hliam tam tak hmuh a ni bawk." a han ti leh a.

MAk tih hmel tak hian Abawihi chuan a en hu mai, "Kut a thlak amaw? Shadow X in tumah kut a thlak ngai lo, hmanraw dang hmangin, thildangin a hrem thin. A ni thei lo, Shadow X a ni thei lovang." a ti deuh tlat mai. Hlua chu a han ngawi vang vang a, "Engpawh chu nise Williama hi harh phawt se, thudik chu kan hria a ni mai." a han ti a.

Kal a tum a, "Mahse Ka pu, Williama hi in ven uluk a ngai khawp ang." Abawihi chuan a han ti leh a, Hlua pawh a ding chat mai. A va hawi let a, "A harh veleh kan zawt nghal mai dawn lawm, nikhawhrelovin a la awm a, ven vak a ngai hleinem." tiin a khi suk a.

Abawihi chuan ava pan hnai a, "Nikhawhrelova a awm lai hian alawm in ven uluk a ngaih, a chhan chu amah kidnaptu emaw, amah umtu khan ala thi lo tih hi a hre ve reng dawn. A harh a nih vaih chuan thudik a puang dawn si a, chuvang chuan rawn thah pawh ala tum maithei ania. Hospital chhungah hian a rawn lut duh hial maithei, chuzawk chu ani ka sawi." a ti chang deuh fak fak mai.

Hlua chuan chhang let miah lo chuan Abawihi chu a en vung vung ringawt a, Abawihi chu a kal ta daih mai. Rinhlelh hmel tak hian Hlua chuan a en zui vawng vawng a, Sarah-i bulah chuan ava kal a. "Sir, ka lo be hlawm tawh e." Sarah-i chuan a lo ti vat a.

"Sarah, khawvar hunah Abawihi chenna in lo zawng chhuak ang che aw, kan khuaah tho hian a nia, a harsa lovang." tiin Hlua chuan a hrilh a. Sarah-i chuan mak a ti deuh va, "Awle, Sir. Mahse...... enge a chhan ka zawt thei che angem?" inthlahrung tak chuan a lo ti a. Hlua chu a khi suk a, "Inrinhlelh hi a na tawh anih hi, tupawh hi kan inring zo tawh lo chu a nih hi maw..." tiin a nui deuh huk a.

*************************************

Zing dar 3 a pel tawh a, Williama chu ala harh chhuak thei chuang lo. A chhungte pawh an haw then tawh a, anu Pi Makimi chauh chu a awm tawh a. Ward pawna thutthleng seiah chuan a muthlu bawk bawk mai, Abawihi pawh ala haw reng reng lo. Hospital kawtah chuan a motor chhungah chuangin ala thu ngawi reng a, Shadow X a lo kal ngei chu a ring tlat a ni.

Sarah-i erawh a haw thung a, constable Sentea leh SI Hlua te chuan nikhawhrelova awm mek, Williama chu an veng tlat a ni. Williama ward dawt chiah ah chuan SI Hlua leh Sentea te chu an duty a, boruak chu a reh hian a reh diak mai. Thingpui an in dun a, "Sir, Shadow X pawh chu lo nise.... a hmai a tuam vek awm tho sia, tunge a nih tih Williama hian a hre chuang miah lovang. Shadow X tih a kawr hmaah a inziak, tih vel bak a sawi leh lo anga, hriatbelh tur chu a awm tam vak ka ring lo." a han ti nuah nuah a.

Hlua chuan thingpui chu a han lem deuh khalh a, "Shadow X a ni nge ni lo kan hriat phah thei dawn hrim hrim a, Williama harh hun hi kan tan a pawimawh lutuk." tiin a lo chhang a. An titi deuh fe hnu chuan Hlua chuan Abawihi car chu tukverh atang chuan a zu hmu fuh ta hlauh mai.

A han thaw deuh hak a, "Sente, lo muthlu miah suh aw... pawnah meizu turin ka zu chhuak lawk ange." a ti a, a chhuahsan ta a. Sentea chu a thu a, a phone chu a han khawih mual mual a. A che deuh sek a, "Vawiin tlai ka sachek ei hnem lutuk kha ka va inchhir tak, pum a nuam lo reng mai." tiin a dul chu a chul a chul a.

A thaw leh halh halh thin, "Huiham, va inthiar leh lawk mai teh ang." tiin bathroom chu a pan a, ava inthiar ta a. Chutih lai chuan ward lam pan hian mipakhat hi a rawn kal mek a, hoodie dum hlang a ha a, a lukhum chu khumin face mask a vuah tlat bawk.

Williama awmna ward bul chu a thleng a, Williama nu Pi Makimi chu a lo la muthlu nasa mai. Chupa chu tudang nilovin, Shadow X thar ber kha a lo ni. Pi Makimi muthlu lai chu a en vang vang a, tichuan Williama awmna ward chhungah chuan a lut ta a.

Williama drip an khai mek chu a en vang vang a, a ipte atang chuan syringe hi a rawn la chhuak a, a chhungah chuan damdawi hip luh sa a lo awm bawk. Williama drip an khaiah chuan a vit lut a, damdawi chu a hmet lut ta pawk mai. Chuveleh syringe chu a phawi a, a ak lehnghal a.

Ward chhung chu a chhuahsan a, a kal dawn chiah tih ah chuan, "Tunge i nih?" tih ri a hria chu a ding chat mai. Williama nu, Pi Makimi chu a lo harh chu niin. A ding a, "Tunge i nih, a chhungah khan enge i tih?" tiin a zawt leh a. X-a chu a hawi let a, zawi zawi chuan a tawlh hnung hret hret a.

Chutah engemaw ri rawk rawk hi Pi Makimi chuan a hre ta, a fapa awmna ward chhung atang ngeia lo ri a ni. Kawngka chu a hawng vat a, Williama chu  a lo tal nasa mai. Pi Makimi chu a mangang takzet, "Nilo..enge awmzia, William..ka fapa.." tiin a au nghal vak vak a.

Sentea pawh chu a lo inthiar zo chiah a, Pi Makimi au ri chu a hre nghal. Pi Makimi chu a tlanchhuak leh a, X-a lah chu a lo bo daih tawh lehnghal. "Min pui ru, nurse...nurse, khawnge in awm?" tiin Pi Makimi chu a rak nasa tawh mai. A duty-na room atang chuan Sentea chu a rawn tlan chhuak a.

"Enge ni ta, ka pi?" tiin a zawt a, nurse leh doctor te pawh chu an rawn kal khawm ve nghal bawk. Pi Makimi chuan thaw hlawp hlawp chung hian, "Ka fapa saw...a awmdan saw a dik lo." tiin a tap pur mai a. Nurse te chu an tlan lut a, an buaipui nghal.

Pi Makimi chuan Sentea chu a vuan a, "Mi pakhat... mi pakhat, a dum veka inthuam, a hmai a tuam bawk." tiin a sawi hleithei lo. Sentea chuan hrethiam lo tak hian, "Enge awmzia, tumaw?" a lo ti hu mai. Tap chung hian Pi Makimi chuan, "A lut, ka fapa kha engtin emaw a ti chiang alawm, a lo chhuak lai ka hmu a ni." a tih chuan Sentea chu a meng phawk nasa ngei mai.

"Khawi ah, khawi lamah nge a kal?" tiin a zawt nghal a, "Ka hre lo, sawlamah sawn aniang." tiin veilam chu Pi Makimi chuan a kawk ringawt a. Rang takin Sentea chu a tlan nghal a, a zawng kual chiam mai. Mahse Shadow X awm ang reng reng a hmu lo, a phone phawrhin SI Hlua chu a call nghal a.

*************************************

Pawn lamah chuan Abawihi chuan a phone chu a khawih mial mial a, tuk verh lam ava hawi zeuh chu a phu nasa ngei mai. A motor lam pana Hlua rawn kal phei mek a hmuh chuan a ner deuh sak a, "Hmela mai mai chuh... min rawn hmuh fuh chu le." tiin a phun sup a.

Hlua chu a rawn thleng dawn tep tih ah chuan a ding chat mai, a phone chu phawrhin Sentea phone call chu a chhang a. Abawihi chuan motor atang chuan a lo en ve reng a, Sentea'n thil thleng a rawn hrilh chuan Hlua chu a meng phawk nasa ngei mai, lehlam hawiin Hospital chhung ah chuan a tlan lut leh ta daih mai.

Abawihi ngaih chu a lo tha lo ve nghal, "Enge awmzia ni ang, Williama chungah thil tha lo a thleng a ni chiang mai." tia phun zawi sapin a motor atang chuan a chhuak ve nghal a, Hospital chhungah chuan a tlan lut ve ta ngawt mai. Williama ward awmna lam pan chuan a chho ve zel a, a thleng dawn hnai tih ah chuan nutling tap hawm hawm ri a hre ta tlat mai.

A ding chat a, muang chang chuan a kal a. A va thleng ta, Williama chu a lo thi hman tawh chu niin. Doctor leh Hlua chu an lo titi mek a, a bulah chuan inthiamloh hmel tak hian Sentea chu a lo ding kun ngal mai. Abawihi chu ava kal hnai a, "Drip chhungah hian Pancuronium bromite damdawi thun luh a ni a, chu chuan kan khai lai mek damdawi hi a ei ral vek a. He damdawi hi a chak em em a, muscle paralysis leh respiratory arrest siamin Williama lungphu hi a ti muang telh telh a, potassium chloride a tel avang hian a lungphu hi a tawp a ni." tiin doctor chuan a lo sawi fiah a.

Hlua chuan a chal a han dawm vawng vawng a, "Anih leh chutiang chu hetah, hospital ah hian a awm em, in nei em?" tiin a zawt leh a. Doctor chu a thaw hak a, "Aw nei e, mahse chutin a hralh chhuah theih loh. Lethal injection ah pawh hetiang damdawi hi hman a ni thin a, kan dahna pawh kan fimkhur khawp mai." tiin a chhang a.

Doctor a kal sawn hnu chuan rum zet hian Hlua chuan Sentea chu a melh a, "Enge i lo tih a? Mawh... i duty reng a ni lawm ni? Reilote ka chhuak zawk a nih kha, i va han nep em em ve..." tiin a vin hrep mai. Sentea chuan Hlua mitah pawh chuan a en ngam lo,  "Ka tihpalh a ni, Sir. Ka inthiar hlanin a nia, ka pum a nuam lo lutuk a." tiin kun reng chung chuan ngaihdam a dil a.

Chuveleh Hlua insum zo lo chuan a beng thle thuai mai, "Naupang chhia i ni em ni, pum nuam lo te i chhuamlam amaw? Police i nih kha... min tih mualpho dan tur zia hi i hria em?" tiin a han vin leh hrep a. Sentea chuan a chhang ngam tawh lo, a ngawi reng a.

Hlua chu a han thaw hak a, "Haw rawh.... zing dar 8 ah Station ah rawn thleng ang che, han tlai vaih teh... haw nghal rawh, ka mamawh lo che." a han ti leh a. Sentea chu a kal ta a, "Shadow X chu a ni em?" Abawihi chuan a rawn ti chu Hlua chu a phu deuh zuk a, lehlam a hawi nghal a.

Abawihi nen chuan an in en vang vang a, "Nangpawh tinge ila haw loh, i kal daih tawh amaw tia?" Hlua chuan a han ti vin leh deuh hlur a. Abawihi chu a rawn kal hnai leh deuh va, "Mawh... Shadow X chu a ni em?" tiin a zawt leh a. Hlua chu a thaw hak a, "Pi Makimi sawi dan kha chuan, kawrlum dum, lukhum nei, face mask dum, kutkawr dum, a dum vekin a inthuam a tia, Shadow X chu a nih ngei hmel e." tiin a lo chhang a.

Abawihi chu a thinrim hmel kher mai, "I man thei lo a ni maithei, mahse keichuan he Shadow X hi ka man ngei ang. Tunge a nih ka hria anga, ka zawng chhuak khawp ang." a ti khur khur mai. Mahse Hlua chuan a chhang lo, rilru hah hmel tak hian a han thaw leh deuh hluai a.

***********************************************

Zing dar 8 : 30 a ni a, Inspector Rinawma leh Officer Tluanga hmaah chuan Hlua chu a ding a, a kun deuh ngal mai. Rinawma chuan a han melh ren rawn a, "Hna pakhat chiah in nei, tlaivara duty a ni. Chupawh a hahdam em em lehnghal, nang ang SI ve meuh tan phei chuan tlaivara duty hi thil harsa a ni dawn lo hrim hrim." tiin a han tawng khum deuh sak sak a.

Officer Tluanga pawh chuan, "Tun atang chuan he case hi i khawih tawh lovang, kan kutah dah tawh rawh." a ti ta mai a. Hlua chu a meng phawk hru mai, "Khawngaihin Sir, chance khat chiah min pe leh rawh u. Ka man ngei ang, in bulah ngei hian nungdamin ka rawn hruai ang." tiin a ngen nghal mawlh mawlh a.

Chutah vin zet hian Rinawma chuan, "NGawi hmak rawh, i duty pawh i hlen thei lo ania. A hmuna awm ve reng chungin in mi ven mek, nikhawhrelova awm chu misual pakhatin awlsam lutukin a rawn chiu hlum thei ania. Chance pek leh che hi e, a ngam awm tawh hlawl loh." a lo ti leh hrep mai.

Pu Tluanga chu a han thaw deuh hak a, "Hlua, Bungdur Khaw Police Station enkawltu i ni a, mipui pawhin nangmah ah hian rinna an nghat nasa dawn tih pawh i hria. Mahse nizan ang kha chu Sub Inspector awmdan tur a ni lo, chuvang chuan he case atang hian i inhnuhdawh angai a ni. A pawi ka ti khawp mai, i chhuak thei e." zaidam tak chuan a han ti a.

Hlua chuan a chhang tawh lo, a ngawi reng a. A khi suk a, "Awle, Sir." tiin salute a pe a, office atang chuan a chhuak ta a. Sarah-i chuan a lo pan vat a, "Engthil nge an sawi?" tiin a lo zawt nghal. Beidawn hmel tak hian Hlua chuan, "Case atangin min chhuah tir, anmahni in an chhui tawh dawn." tiin a chhang zawi sap  a.

Sarah-i chu a lo chek deuh hlur a, "Uii.. encounter hmangin an kap hlum leh nghal hmak anga, awmzia awm dawn chuang lo." a lo ti ve bui bui mai. Hlua chu nui sukin, "Hey, an hre pha ange, i tawng ring lutuk." tiin a lo khap vat a. Sarah-i chu a thaw hak a, "E taka, Sir... Abawihi chenna in chu ka hre tawh aw...DAwrkawn Bazar veng lamah an awm." tiin a hrilh a.

Hlua chu a han ngawi deuh vang vang a, "Shadow X hi tunge ka chhuichhuak tho tho dawn, eng ang pawhin he case atang hian min lo paih bo sawm sarih rawh se. Ka kut ngei hian ka man anga, saw putar chapo pahnih hmaah sawn ka la hruai ngei ang." a han ti khur deuh dar dar a.

**********************************************

TO BE CONTINUE