UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 1

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 1

********************************************

Zan dar 8 leh a chanve vel a ni a, veng pakhata restaurant lian lem lo tak chhungah chuan Nunui chu dawhkan pakhat kilin amah chauh chuan a thu ngawi nghal mai a. A phone chu a en leh zauh zauh thin a, a hmel atang chuan a hmanhmawh hmel kher mai.

Nunui hi kum 24 mi lek niin nula hmeltha tak a ni a, a online chhas nen an inhmu dawn mek a ni. An vawikhat inhmuhna tur a ni a, Nunui pawh chu a zam kher mai. Mahse dar 8 a inhmu tur an ni a, a online chhas Malawma chu a rawn thleng thei hauh lo mai.

A text lah in a reply bawk si lo, a phone lah in a ring quit thak thak zel mai bawk si nen. Minute 3 vel a liam leh hnu chuan a phone chu a rawn ri ta ral ral mai, rang takin Nunui chuan a en nghal vat a. Malawma a lo ni ngei bawk, "Hello, Malawm...i lo van thlegn har ve?" tiin phone chu a chhang nghal a.

Malawma chu a rawn thaw deuh hak a, "Nia, buaina ka tawk alawm mawle...ka rawn thleng tep a. Khawi lai nge khah, restaurant awmna kha?" a rawn ti a, a aw chu a thum tha ham ham khawp mai. Nunui pawhin Malawma aw chu a vawikhat hriatna a ni a, a rin ai daih chuan a aw chu a thum a ti ve bawk.

"Ahh...ka van sawi thiam lo. Tunah khawnge i awm reng reng a?"

"DAwrkawn ah, kawn lai takah khan ka awm a."

"Tlem chuan ila awm hla deuh a nih chu, lo kal zel rawh...khawiah mah khan peng kawi lo la."

"Pawmnah khan min lo nghak mai la, i awmna lai tak ka hre duh alawm."

Nunui chu pawnah chuan a chhuak a, "Aw ka chhuak tawh e." a han ti a. Malawma chu a kal mek ni awm tak hian a thaw deuh halh halh a, "Ka lo thleng tepin ka hria, hei restaurant a awm tlar phei thluah mai." a rawn ti leh a. Nunui chu a kal phei ve deuh va, "Khawilaiah nge i awm, min hmu thei tawh em?" tiin a han hawi kual a.

Mahse Malawma chu a reh vang vang mai, "Malawm, ka tawng i hre thei em?" Nunui chuan a han ti leh a. Chutah MAlawma chuan, "Nunu, helamah...i opposite ah khan step chhukthlakna a awm a, tah khan lo chhuk lawk teh." a rawn ti ta daih mai. Nunui pawh chuan mak a ti angreng hle a, "Tinge, engvangin maw?" a lo ti hu mai.

Malawma chu a han nui ri deuh hak hak a, "Lo chhuk la, ka awm mek." a rawn ti leh a. Nunui chu a han chek deuh hlur a, "Enge maw i hriat le? Lo chho mai la, kan dawhkan tur ka hauh tawh ania." a han ti deuh hlur a. "Thil pek tur ceh ka nei alawm, a rei dawn lo. Lo chhuk rawh, kan chho leh nghal dawn nia." a rawn ti leh a.

Nunui chu a thaw hak mai, "Restaurant chhungah min pe mai la, khata rawn chhuk kher ngai lovin!" a han ti leh hlur a. "Mi zinga inpek chi a ni lo, i lawm ngawt ang, lo chhuk mai mai teh." Malawma chuan a rawn ti leh t(r)alh mai a. Nunui chu a han maimitchhing vang vang a, "Awle, mahse min tihthaih reng reng suh ang che." tiin a chhuk ve ta mai bawk a.

Step lah chu a thim em em mai lehnghal a, a reh phian lehnghal. A phone torch chu a on a, "Malawm, khawilai ah tak nge i awm?" tiin a han zawt a. MAlawma lah chuan, "Ka hmu che, lo chhuk thleng law law rawh." a rawn ti sam et mai. Nunui chu a chhuk zel a, step tawp chu a thleng ta.

Kawng zim te hi a lo awm phei a, "Khawiah maw i awm?" tiin a han zawt leh a. Mahse Malawma chuan a rawn chhang tawh miah lo, a ngawi ta daih mai. Nunui ngaih chu a tha tawh lo khawp mai a, "Malawm, Malawm khawnge i awm ka tih chu?" tiin a aw pawh chu a khur deuh dar dar tawh mai.

Mahse Malawma chu a reh reng tawh mai a, Nunui chu a phone flashlight on chung chuan a phei zel a. Malawma lah chuan phone chu a dah daih mai, Nunui chuan a phone chu a en a. Mak ti tak hian, "Enge maw a dah daih le?" a ti nuah nuah a. Chutih lai tak chuan a hnungah chuan Shadow X ang chiah a inchei, dum veka inthuam hi a lo ding reng mai.

Nunui erawh chuan a hmu hauh lo, a phone chu a la en char char a. A hnunga ding, Shadow X thar chuan iron rod bung lian tha leng lawng hi a hum reng bawk. Nunui chuan Malawma chu a han call a, chutah Shadow X ipte chhunga phone chu a rawn ri ta ral ral mai, Nunui chu a phu nasa takzet.

Rang takin lehlam a hawi nghal a, Shadow X chu a hmu ta. Mahse dek pawh a ti hman lo, Shadow X chuan a rod ken lai chuan na em em hian a lu ah chuan a hlap nghal pawp mai a. Nunui chu a vir deuh nawk a, leiah chuan a thal nghal tawp mai. Shadow X chuan Nunui chu a en vang vang a, a hnuk sawn ta a.

********************************

(AFTER 2 HOURS)

Tui far ri kauh kauh chuan Nunui chu a ti harh a, thei leh thei lo chuan a mit chu a han meng a. A awmna chu a en kual a, kudam zim te ah hian a lo awm a, amah chu boxer leh bra nen chauh lo awmin saruak deuh thaw hian khai kan a lo ni a. Inchung a thing in kham phei ah chuan hrui chu invet in, chumi hrui chuan Nunui kut chu phuar beh niin, a ke erawh chuan lei a rap lo, chhuat atanga ft 6 vel laia inhlat a ni.

A hmai chu thisen luanna hnu tih hriat tak hian a sen deuh huam mai a, a lu chu a la hai hle mai. Chutah hnuailam chu a zu en a, a zawn takah chuan cage zim tak, mihring lenna si hi a lo aawm bawk a. A chhungah chuan rul ngan (King Cobra) lian em em mai, 10 vel lai a lo awm bawk.

A hmuh veleh chuan a hlau kher mai a, a au ta vak vak mai. Rul ngan ho awmna cage hi cage pangngai ang a ni lova, rul chhuah theihlohna turin thir atanga siam net, kaw zim tete vek a ni. Nunui chu a au vak vak a, "Min pui ru, khawngaihin min pui ru." tiin a t(r)e chiam mai.

Chutah kudam sir, thim zing atang chuan Shadow X chu a rawn chhuak a, Nunui'n a hmuh veleh chuan phawk hru hian a en a, "Tu..tunge i nih? Khawngaihin min chhuah rawh, min ti na lul suh." tiin a ngen nghal mawlh mawlh a. Shadow X chu a va kal hnai deuhva, "Hello Nunu, tunge ka nih i hrelo amaw?" tiin a rawn zawt a.

Nunui chuan tap pur chung chuan, "Ka hrelo che, tunge i nih ka hrelo. Khawngaihin min chhuah hram rawh, rul te khu ka hlau ania. Khawngaihin, enge ka lakah i duh?" a han ti leh chiam chiam a. Shadow X chu a han nui ri leh hak hak a, "Amak thei emai, i online chhas, i whatsapp chhas Malawma ka nih hi." a ti ta mai a.

Nunui chuan phawk hru hian a en a, "Engmaw, MA..Malawm, nangmah maw?" a ti hu mai. Shadow X chuan a lu a han bu nghauh nghauh va, "Ni ang chu, ka aw atang chuan i hre thei mai lovem ni?" tiin a lo la zawt let zui. Nunui chuan tap chung hian, "Enge i chungah ka tih sual a, tinge hetia min tih? Malawm, min chhuah rawh...min chhuah vat rawh." tiin a vin hian a vin chiam chiam mai.

Thutthleng pakhat lo awmah chuan Shadow X chu a thu a, Nunui chu a en ran a. Nunui bawk chuan, "Malawm, tihsual ka nei em ni? Min chhuah rawh, khawngaihin min chhuah rawh." tap chung chuan a han ti leh lawm lawm a. Shadow X chu a han thaw hak a, "Nunu, nang hian thil chu i ti sual ngei alawm." a ti chak fak mai.

Nunui chuan mit sem rum chung chuan a en a, "Eng a? Enge ka tihsual. Nang hi tunge i nih ka hre ngai lo che, inhmuh i duh avangin ka ring che a, ka lo kal a. Enge chu chu ka tihsual a nih na, tinge hetia min tih?" a han ti vin tuar tuar a. Thinrim hmel tak hian Shadow X chu a ding ta hluai mai, "I hre duh amaw, a nih chuan lo ngaithla rawh aw.." a han ti ve deuh hlak a.

Nunui chu a ngawi kar mai, "Lalduhzuala kha i la hria em, i tenawm lutuk avanga a nunna chan ta kha?" Shadow X-a'n a han ti chiah chu Nunui chu a meng phawk nasa kher mai. Chhan pawh a chhang mai thei lo, "A sum vangin i ngaizawng a, i ei ral thak a. Tichuan pawisa a neih tak lovah chuan then i tum a, mahse i lo rai hman tawh bawk si. I chhungten Duhzuala nena innei turin an ti che a, nang erawh chuan sugar daddy dang i lo nei leh hman tawh sia, neih i duh silo a ni kha tiraw?" X-a bawk chuan a ti leh ta siah siah mai.

Nunui chuan tap chung hian, "Dawt...dawt sawi suh, chutiang engmah ka hre ve lo." tiin a lu chu a thing vak vak a. X-a bawk chuan sawi chhunzawm zelin, "I nu leh pa te ngei pawhin naute tih tlak ai chuan tiin Duhzuala chu an makpa ni turin duh bik viau lo mahse mualpho ai chuan tiin neih tir che an tum a, mahse i duh silo. I nu leh pate i hnial ngam si lo khan tihdan i ngaihtuah a, tichuan naute chu ti tla in Duhzuala kha i mawhpuh ta nih kha, i la hria em?" a han ti leh a.

Nunui chuan ring tak hian, "Duhtawk rawh, dawt sawi suh. Duhzuala ka hre ngai lo, dawt vek i sawi." tiin a rak tuar tuar mai. X-a chuan thinrim tak hian, "Nau i ti tla a, tichuan nangmah leh nangmah i inkhawih na lui bawk a. Chu chu Duhzuala'n kut a thlak che angin i chhungte bulah i sawi a, Duhzuala chu veng pum mai nilo, Mizoram pum huat rawn a ni ta a. Thiamthu pawh a sawi ve thei lo, a rilru nat em avangin jail a tan hnuin a cell chhungah a inawkhlum ta a nih kha. Nang lah chu i in enkawl dam hnuah ti hian, mipa dang i duh duh i kawp kual leh vel mai mai a, chuti chung chuan engmah ka ti sual lo i ti amaw?" tiin a vin ve ta hrap mai.

Nunui chu a tap zawih zawih a, "Engmah ka hrethiam lo, khawngaihin min chhuah rawh. Min hai a ni ngei ang, chutiang engmah ka hre lo." a la ti hram a. X-a chu a han thaw deuh hluai a, "Nunna hi a hlu a, tumah hi kan piang nawn tawh dawn lo. Nunna pakhat chauh kan nei a, chuvang chuan kan inzahsak tur a ni. Mahse nang chuan chu nunna hlu tak chu ngaih hlutna chang hrelovin, i hmakhua i ngaih zawk avangin i ti chhe vek a ni. Mi nun i ti chhe vek a, nangmah vangin nunna hlu tak pakhat chu lak bovin a awm ta a ni." a han ti leh a.

Nunui chu a thaw halh halh tawh mai, a kut pawh na a ti tawh takzet. A mitmeng sen rum mai chuan X-a chu a en a, "Tunge i nih?" a han ti khur dar dar a. Chutah Shaodw X chuan a hoodie lukhum chu a phelh a, mipa awzawng a lo ni lo. A sam a lo sei a, a kutkawr te chu a phelh a, hmeichhe kut no tak a lo ni bawk.

A awmzia chu Shadow X chu mipa nilovin hmeichhia a lo ni reng mai tihna a nih chu, a kawr ipte atang chuan voice changer mic chu a rawn phawrh a, a off hmak a. Chutah a aw diktak, hmeichhe aw ngei mai chuan, "Kei hi Malawma ka ni lova, mipa pawh ka ni hek lo. Hmeichhia ka ni, Shadow X ka ni." a ti a.

Nunui mak ti chu a meng phawk nasa mai, "Eng...eng a? Hmeichhia maw i nih, hmeichhia maw?" a ti hu mai. MAhse Shadow X chuan a face mask erawh a la phelh ve lova, a hmel tak tak ala hriat loh a ni.  A han thaw leh hak a, "Ni e, i thil tihsual vangin ka hrem dawn che a ni." tiin a chhang a.

Nunui chuan thinrim hmel tak hian, "I hmeichhiat pui chungah ngei pawh hetiang khawpa rapthlak hian i che duh ania, nunna chu i hlut bik tawp loh chu. Chuan Duhzuala pawh ka hre ngai lo, kei hian engmah ka ti sual lo. Min chhuah rawh, kahwngaihin...pawisa i duh duh zat min dil la, ka pe ang che, min chhuah vat rawh." a han ti vin leh hlur a.

Shadow X chu a han thaw leh hak a, "Nunu, i thil tihsual i puan hma loh chu ka chhuah dawn lo che. I tihsual puang la, tichuan tihtur dang pakhat i nei leh a, chumi i tih zawhah chuan i chhuak thei ang." a lo ti leh hmak mai. Nunui chu a ngawi vang vang a, a kut chu na a ti tawh si, a hnuailam a en lah chuan rul ngan lian em em mai te chu a lo la invial tup tup mai bawk si.

A chil a lem dak a, "Aw...ka tisual a ni. Ni e, keimah leh keimah ka inkhawih na lui a, tichuan ka naupai lai kha keimah ngei hian ka that a ni. Keima thiam loh vek a ni, Duhzuala kha a pawisa vang chauhvin ka duh a. Mahse ka rai tih ka hriat khan ka hrilh a, amah pawhin min neih ngei a tum thu a sawi. Mahse ngaihzawng dang ka nei tawh a, chupawh patling, nupui nei lai, officer a ni bawk. Duhzuala'n kut min thlak angin ka sawi ngei alawm, tichuan jail ah a tang a, a rilru na vangin a inawkhlum ta a ni. I sawi zawng zawng kha a dik, ka thiam loh a ni." tiin a inpuang ta vek mai a.

Shadow X chu a ngawi vang vang a, "Ka inpuang tawh, min chhuah tawh rawh. Khawngaihin, ka inpuan tawh chuu..." Nunui bawk chuan a ti leh chiam chiam a. Mahse Shadow X chuan a lu a thing a, "Ni mai love, ka sawi kha i theihnghilh nghal der em ni? Thil dang pakhat tih tur i la nei ka tih kha, chumi chu i tih leh phawt angai." a lo ti leh tlat mai a.

Nunui chuan hrehawm a ti tawh takzet, "Enge..enge ka la tih ngai cheu va?" tiin a tap pur tawh mai. Shadow X chu a han vai kual thauh thauh va, "Malawma diktak zawk chu i bialpa hlui, nangmah vanga inawkhlum ta, Duhzuala nau, a pianpui unau ngei, a unaupa neih chhun a ni. Ani khan kei hi engkim min hrilh vek a, high school ka kalpui thin a ni. Hremna pek ngei che pawh a duh a, mahse engtia tih tur nge a hre silo. Chuvang chuan kei hian ka be ta che a, mipa anga insawiin ka aw ka ti danglam a, tichuan tihian ka man ta che a ni. Malawma khan ngaihdam min dil se, ka ngaidam thei angem ka hrelo, mahse hremna a hmuh ve ngei chu angai ang tiin min hrilh a, tunah hian atan, Malawma tan ka hrem ta che a nih hi." a han ti leh te te a.

Nunui chuan hlauh hmel tak hian Shadow X chu a en reng ringawt, "I tihtur chu hei hi a ni, Malawma hi i phone atang hian ka call anga, tichuan ngaihdam i dil ang. Tichuan a ngaidam che a nih chuan ka chhuah ang che anga, hlim dam takin in inah ngei ka dah thlap bawk ang che. MAhse a ngaidam lo che a nih chuan a ngaihdam hma che chu i dil nawn zel ang, mahse hun erawh i nei tlem hle thung tih hre bawk la. Duhzuala kha a inawhhlum khan police te sawi dan chuan a inkhai chiah khan, minute 1 vel chu ala thi lo an ti a. Lo hmu hma deuh se chuan an chhan hman ngei ang, minute khat chu second 60 a ni a. Second 60 chhungin Malawma hnenah hian i thil tihsual zawng zawng i puang chhuak vek tur a ni a, ngaihdam i dil nghal bawk ang. Chumi second 60 chhung vek chuan a ngaidam hman ngei bawk tur che a ni, a chiang em?" tiin Shadow X chuan a sawi chhunzawm zel a.

Nunui chu a mangang tawh takzet, "Nilo..khawngaihin, khawngaihin ti suh...min chhuah hram rawh." tiin a lu a thing a, a tap nasa tawh kher mai. Shadow X chuan sawi zawm lehin, "Second 60 chhunga a ngaidam hman lo che a nih chuan phone hi ka off anga, tichuan nangmah khai kangtu che, hrui kha ka zai chat ang." tiin a bul lawk bana hrui intawn chu a kawk zeuh va.

Nunui chuan a zu en a, hrui chu inchung thing inkham pheiah chuan invet chho zelin amah phuartu hrui nena inzawm vek hi a lo ni a. "I hnuaia rul te kha rul ngan an ni a, an tur hian sai lian tak pawh darkar tlemte chhungin a ti hlum thei a ni. Chupawh rul ngan pakhat lek a tawk, mahse i hnuaia mite erawh kha chu 10 rual vel an ni. An awmna cage bula durataf bang kha i hmu bawk anga, kha kha kg 20 35 laia rin a ni a, hrui hi a chat a nih chuan cage ah khan i tla ve anga, i tlak rual rualin cage kha a inkhar nghal ang. Tichuan durataf khan cage chung kha a rawn delh anga, i chhuak thei mai dawn lo. Rulngan pakhat lek chuk hi mihring pangngai tan chuan damchhuah ngaihna a awm lo, minute 15-30 chhung bak an dam ngai lo. MAhse nang chu 10 rualin an chuk rawn luih luih che anga, i chhuak thei dawn si lo. Vawi khat mai an chuk dawn lo che, chuvang chuan i thawk a tawp nan hian minute 2 aia rei pawh i hmang lovang." Shadow X bawk chuan a han ti leh a.

Nunui chuan a hlauvin a mangang tawh takzet, a tawp nasa tawh mai a. Shadow X chu a han thaw hak a, "Engkim ka sawi fiah tawh bawk a, i hrethiam tawh in ka ring. Tunah hian MAlawma chu ka phone anga, ngaihdam i dil hma in tunge i nih i sawi anga, i thil tihsual zawng zawng i sawi zawh a, i inpuan zawh hunah chauh ngaihdam i dil ang. Amamerawh chu tuna i dinhmun, hrem mek, chance pek mek i ni tih erawh engmah i sawi tur a ni lo. I sawi a nih vaih chuan hrui hi ka zai chat nghal ang, chu chu hria ang che." tih pah chuan a ipte atang chuan phone dang a rawn phawrh chhuak leh a.

Nunui hmuh theih tur chuan a lek kang a, "Hemi phone ah hian i hun neihzat chu a intarlang ang, tichuan loud speaker ah ka dah anga, i phone zawk hian MAlawma chu i bia ang..... Nunu, i thil tihsual chu puang rawh, a nih loh chuan i thi ang." tiin MAlawma chu a call a, phone pakhat zawkah chuan timer a set bawk a, tichuan phone pahnihte chu Shadow X chuan a lek kang ta ve ve a. 

A in-ring ta lauh lauh mai a, Nunui hun pawh chu a intan ta. Malawma'n phone a rawn chhan meuh chuan second 7 vel lai a kal tawh, Nunui chuan second 53 vel chauh a nei nghal der mai. "Hello...tunge aw?" MAlawma chuan a rawn ti a. Hmanhmawh tak hian Nunui chuan, "Malawm, Nunui ka nia. Nunui, ihh...i u Duhzuala bialnu hlui Nunui kha ka ni." tiin a thaw hlawp hlawp mai.

Malawma lah chuan vin tak hian, "Nunui maw i nih a, enge i duh a? Enge ka lakah i duh, min va rawn be ngam zawk ve?" a lo ti hrep mai a. Nunui chuan tap pur chung chuan, "Malawm, min ngaithla teh. Ka tisual a ni, ni e. KEima thiamloh vek a ni, i u fa kha ka pai a, mahse ka neih duh loh avangin keiman ka ti tla lui a ni. Keimah leh keimah ka inti na a, ka nau pai chu ka chhiat phah a. Chu chu i u kha ka puh a, police ten an man a. KEimah vang vek ani, ka thiamlo a ni. Min ngaidam hram rawh, Malawm. KA ngen a che, ka thiamlo takzet." a han ti leh nghal zung zung a.

Malawma chu a ngawi vang vang a, "Chutin ka ngaidam ngawt thei lo che, hmaichhanah ngei inhmu ila, ngaihdam min dil dawnnia." a lo ti hmak mai. Nunui chu a mangang takzet, timer chu a en a, second 35 chiah a lo awm tawh. Tap chung bawk chuan, "Nilo nilo, Malawm. I hrethiam lo a ni, ka thil tihsual hi ka pawm thlap. Ka thiam lo, min ngaidam hram rawh." a han ti leh lawm lawm a.

Mahse Malawma lah chuan, "A theih loh ka tih chu...hmaichhanah ngei ngaihdam min dil dawn nia. Phone atanga ngaihdam theih i ni lo, i thil tih pawizia kha i hria em?" a la rawn ti hrep zui. Nunui mangang chuan, "Ka hria alawm, chuvang chuan min ngaidam rawh. MAlawm, inhmuh hun a awm lo. Tunah min ngaihdam angai, a nih loh chuan ka thi a nimai." tiin a tap zawih zawih mai a.

MAlawma chuan ngaihdam a hnekin a thinrim zual sauh va, "I va han zak lo tak, thu te chu min la rawn pe ngam khanglang a ni maw? Khatiang khawpa tenawm kha i nia, i rui phur min rawn call te a ni hial lo maw?" tiin a rawn vin leh ta hrep mai a. Nunui chu a thlan a tla zawih zawih tawh, timer chu a han en a, second 20 a la awm.

Manganga tak hian, "Nilo, ka rui lo tak tak. Malawm, min ngaidam lo a nih chuan..tunah hian min ngaidam lo a nih chuan ka thi dawn...rulin min chuk hlum dawn, i hrethiam lo a ni." tiin sawi pawh a sawi tha hleithei tawh lo. MAlawma chuan vin zet hian, "A tawk e, fiamthu ah mai mai maw ilo la ngaih a. I hre khawp ang, mi tenawmnu." tiin a dah hmak mai.

Timer ah chuan second 10 chauh a awm tawh, "Nilo dah suh, dah suh. Call nawn leh rawh, call nawn leh rawh." tiin a rak chiam chiam mai a. MAhse Shadow X chuan a lu a thing a, "Chutiagn kan rules ah a tel lo, i hun a tawp dawn." tiin timer chu a en a, a hun chu a tawp ta.

Nunui chuan a hlau takzet, "Nilo, khawngaihin ti lo hram rawh." tiin a ngen lawm lawm a, a tap nasa mai. Shadow X chu a thaw hak a, "Mangtha le, Nunu." tiin chemte a phawrh a, hrui bana inhling chu a zai chat ta mai a. Chuveleh Nunui chu a tla thla ta, cage chhungah chuan a tla thum dup mai a.

Chuveleh Shadow X chuan remote a ken lai chu a hmet zeuh va, cage chu a inkhar nghal a, a in lock nghal hmak bawk. Tichuan a bula durataf chu a rawn tlu ruai ruai mai a, cage chua  delh bet ta tlat mai. Nunui chu cage zimte chhungah chuan rul ngan lian tak tak leh tur hlauhawm tak nei, 10 rual velte nen chuan an tang ho ta ran mai.

A hlau lutuk chu a tal vak vak a, cage chu hawn a tum a. MAhse durataf rit tak mai avang chuan a hawng thei lo, a tal nasat em avang leh a thawm a benchhen em avang chuan rulngan te chuan anmahni beih tum emaw tiin inven nan an lo chuk rawn ta hrep mai bawk a, Nunui chu a rak ring kher mai.

A chhuak thei der bawk si lo, Shadow X lah chuan a en reng a. Minute 1 vel lai mai chu Nunui chu a tal buai nasa kher mai, rul ngan ho lah chuan a hma a Shadow X sawi ang chiah chuan vawi khat mai an chuk lo, vawi engemaw zat chu an chuk hrep hrep mai.

Nunui che pawh chu a zawi tial tial a, rul tur chu a tam bawk a, mihring pakhat chauh, chupawh hmeichhe awmnem zawk lehnghal tawrh atan chuan a thawk chak khawp mai. Minute 2 a ral a, Nunui chu a thawm a zawi tial tial a, a phu uih uih mai. A lu an rawn hai vak a, a taksa chu a vai mai chuan a rawn na chhuak vek bawk.

A khaw hmuh a fiah lo telh telh a, rul ngante pawh chuan chutia a thawm a zawih tak tial tial avang chuan an chuk tawh lem lo, a taksa chu an vial kual a. Minute 4 a ral meuh chuan Nunui chu a thaw tawh lo, a thi ta nge nge a. Shadow X chu ava kal phei a, Nunui ruang, saruak deuh thaw a awm, rul chukna hliam awm thluah mai chu a en vang vang a.

Muang chang chuan a face mask chu a phelh a, tudang nilovin Abawihi, Shadow X original Nghaka bialnu hlui ngei mai kha a lo ni. Kudam kila thuk chu ava pan a, meihawl pakhat a la a. Chhuatah chuan chiang kelh kawlh hian 'SHADOW X IS BACK' tih hi a ziak a, kudam chu a chhuahsan ta a.

Car chhungah chuan a lut a, a thaw hak a. A mittui a rawn tla a, "Shadow X chu a lo kir leh e, phuba a la ngei bawk ang. Shadow X hna chu chhunzawm leh a ni ang, kei hi Shadow X ka ni kumkhua tawh bawk anga, kei lo chu Shadow X dang an awm leh tawh ngai lovang." tiin a phun sap a, motor chu start in chak tak chuan a tlan ta vang vang a.

************************************************

Abawihi hi Shadow X hnuhnung ber, a pa Rintea thih hnu khan Shadow X hna chu thawh chhunzawm tumin a rilru a siam fel nghal a. Shaodw X hmasa zawk, a bialpa hlui, Nghaka thattu Officer Tluanga, Alex-a pa leh Shadow X hnuhnung ber, a pa Rinte thattu Inspector RInawma te chunga phuba lak ngei chu a tum a ni.

Mahse chu ringawt chu a thil tum a ni lova, Shadow X hmasate lo tih tawh thin ang bawkin Mizoram chhunga mi tenawm leh tualthah hreh lo, mahni mihringpuite nunna pawh ngai hlu lote chu man a, inpuan luih tir a, hrem a duh ve ta tlat mai a. A victim hmasa ber atan Nunui hi a hmu fuh ta a, a thlang ta chat a ni.

Nunui bialpa hlui, inawkhlum ta Duhzuala kha Abawihi school kal pui thin leh a kawm ber thin a ni a. A thih thu a hriat veleh thian hluite tiin ava kal ve a. Tichuan a u MAlawma rilru na lutuk chuan engkim a lo sawi fiah ta vek a, tichuan Abawihi chuan Nunui chu a target ta chat a ni.

A zawng ru reng a, a number neih theih dan a ngaihtuah char char bawk. Tichuan ni engemaw zat a ral hnu chuan a nei thei ve ta hlauh mai a, tichuan mipa anga insawiin Nunui chu a bem ta a, a hausak zia te a hrilh thin bawk. Pawisa duh lutuk leh Gold Digger tenawm tak, Nunui lah chuan a lo awih nghal pek a.

Abawihi chuan be zelin inhmuh puiah a sawm ta a, engkim plan lawk sa vekin a hma a, Shadow X hmasate tih ang bawkin voice changer hmangin a aw a ti danglam a, mipa aw angin a siam a. Nunui chu a man thei ta a, khang rul ngan te erawh kha chu khawi atanga a neih nge tuma hriat va ni suh.

Abawihi hian Shadow X hmasate pahnih thih hnu khan an hna hi a chhunzawm nghal mai bik lova, nasa takin a inzir phawt a. Fimkhur a ngaih tur zia te a hria a, amah pawhin mi a biak tlem phah hle bawk. Roomah chuan a inkhung deuh chawt reng a, a chhungte ngei pawh a be ngai lo.

Thla engemaw zat a liam leh hnu chuan amahin a intodelh thei ta maw tih ah a chhungte bulah hna chhuanlamin khawdangah a zin ta daih a, tichuan pawisa te khawlin a hmanrua tur ang ang te chu a lei khawm a. In a luah a, tumah inleng pawh a nei ngai lo bawk.

Nunui a man hma pawh hian engkim a plan lawk sa vek a, a fimkhur hle bawk. Nunui chauh hi a victim nih tir erawh a tum lo bur, a duh dan phei chuan Shadow X awm tawh azawnga victim nei ngah ber nih a tum hial zawk, a mizia pawh a dangin a tawng tlem hle a.

A nun zawng zawng chu a inthlak hlawk a ni ber mai, chumai bakah Shadow X ni tur chuan thiam thil neih ve nual a ngai tih a hria a. A inzir nasa in a bei ngawrh hle a, pawisa pawh a khawl chak khawp mai. Mahse chhan awm lova mi thah ngawt chu a duh bik lo, mi tenawm, mi sual leh midang nunna la ho bak chu target a tum bik hauh lo thung a ni.

********************************************

TO BE CONTINUE