UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 4

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 4

*******************************************

Zan a ni a, Abawihi chu Police Station ah chuan ava kal ta ngei a. Hlua'n a lo hmuh veleh chuan, "Lo kal rawh, Abawih. Lo thu rawh, hetah hian.." tiin polite tak hian thutna te chu a lo kawh hmuh nghal a. Abawihi chu ngawi reng chuan a thu a, a hma takah chuan Hlua chu a thu ve a.

Hlua chu a han thaw hak a, "I tan sawi chhuah leh chu a nuam tawh hauh lo anga, mahse case a rawn siam thar tlat mai bawk si a. Ka hna ka thawk angah min ngaih sak hram dawnnia, vawi hnih lai mai Shadow X i lo hmachhawn tawh a. Chutah i tana mi pawimawh tak ve ve an ni lehnghal a, chuvang chuan ka biak ngei che angai a ni." a han ti hmasa leh te te a.

Abawihi chuan tum hmuk hian, "Eng thil nge min zawh duh chu ni a?" a lo ti nghal deuh hlur a. Hlua pawh chu a khi suk ringawt, "Ka sawi tak ang khan Shadow X hmasate kha i bialpa hlui leh i patea te an ni a, tunah a thar a awm leh a. KA zawh duh che chu tunge ni a i rin, rinhlelh deuh te i nei em?" tiin a zawt a.

Abawihi chu za lo tak hian a khi suk a, "Hetah, he khua ah hian ka awmna ala rei lova...Shadow X thar a awm thu pawh vawiin tlai a min hrilh khan ka hre ve chiah ania, ka hmaah a lo la inlan ve lo bawk. Engtin nge maw ka hriat ang ni, kei hian?" tiin a lo zawt let daih mai.

Hlua chu a han ngawi vang vang a, "Anih leh kan khuaah hian eng ti tura lo awm nge i nih ka hre thei angem?" tiin a han zawt leh a. Abawihi chuan confi tak hian, "Hna..hna vang animai." a lo ti leh hmuk ringawt a. Hlua chuan Abawihi chu a han en vang vang a, "He Shadow X thar hian nang hi a rawn umzui che a ni lo maw, he khuaah hian a awm ve nachhan hi, nangmah vang a ni mai lo maw?" tiin a zawt leh a.

Abawihi chuan Hlua chu a melh rum ngei mai, "Eng a? Engvangin nge kei hi min umzui anga, tunge a nih pawh ka hre hleinem?" a lo ti vin hlur mai. Hlua chu a nui deuh var var a, a tho deuh thut a. Muang chang chuan a han vei kual vel phawt a, "Tuman tunge a nih kan hre bik lo, Abawih. Mahse hnuchhuina kan bei mek a, kan rin thu ka sawi mai a nih chu." a han ti chang fak fak a.

Abawihi chu a ner deuh nung mai, "Shadow X thar an awm avang hian kei hi ka lo buai ve nachhan tur ka hre lo, i rin thu chu engpawh lo nise, keichuan tunge a nih rin ngaihna pawh ka hre lo." a lo ti leh hmak mai a. Hlua chu a ding chat a, "A hmasate pahnih kha i tana mi pawimawh ve ve an ni, an man ve ve che a, thudik an hriat tir ve ve che, i mit hmuh lai ngeiin. Chutiang chiah chu a thleng leh ang tih ka hlau a ni, chumi tur chuan nangpawh hian venhimna i mamawh dawn." tiin a han hrilh fiah leh a.

Abawihi chu a ngawi vang vang a, "Shadow X chungchang kha a lar ve hrim hrim a, chuvang chuan tu emaw, keima laichin hnai nilo, Shadow X angin a lo insiam ve mai mai a ni thei tho asin, tleirawl hawklak ho mai mai te pawh an ni ve thei tho alawm." a han ti leh nuah nuah a.

Mahse Hlua chuan a lu a thing a, "Nilo, kan khua phei hi chu thingtlanga  ni a, tleirawl emaw rawlthar hawl lak fing tak an awm dawn lo. He Shadow X thar pawh hi chutiang naupang mai mai a ni dawn lo tih ka chiang, a chetdan hi a fing lutuk." a ti tlat mai.

Chutih lai chuan constable pakhat hi a rawn lut a, "Sir, Officer leh Inspector an lo thleng e." a rawn ti a. Chu veleh Abawihi chu a meng nghal hru mai, "Aw le, lo va hmuak ru." a ti a, constable chu a chhuak lehnghal a. Hlua bawk chuan, "Abawih, i number ka nei tawh tho va. Nakinah ka mamawh leh che chuan ka rawn ko leh dawn che nia, a nih phawt le." a han ti leh zung zung a.

Abawihi chu a chhuak ta a, kawng sir thim laiah chuan a ding a. Police Station lam chu ava thlek leh vang vang a, reilote hnuah chuan police motor pakhat hi kawtah chuan a rawn ding a, a chhung atang chuan Inspector Rinawma leh Officer Tluanga te chu an rawn chhuak ta.

Abawihi chuan a lo en rum ngang mai, Pu Rinawma leh Pu Tluanga te chu Station chhungah chuan an lut a, SI Hlua te nen chuan an inchibai a. Abawihi chuan lehlam a hawi nghal a, "Ka lo nghak reng che u alawm, tunah chuan a nuam tan dawn e." tiin ama hriat tham lek chuan a phun zawi sap a.

*********************************************

"Hei hi Nunui, victim hmasa zawk post mortem result a nia. Chuan hei hi tukina a ruang kan hmuh, Petera result ve thung." tiin SI Hlua chuan mitthi pahnih post mortem result chu Pu Tluanga leh Pu Rinawma te hnenah chuan a pe a. Inspector Rinawma leh Officer Tluanga te pawh chuan an  en ngun khawp mai, an bulah chuan Dr.Samuela a awm ve bawk.

"Chuan Sir, acid kha eng acid nge a hman hriat a ni tawh bawk. Sulphuric acid leh hydroflouric acid a chawhpawlh a ni, khatiang khawpa acid chak leh hlauhawm pahnih chawhpawlh kha chu....bucket khat tawpa mihring leih chuan rei a dam thei dawn lo hrim hrim." tiin Dr.Samuela chuan Hlua chu a hrilh a.

Pu Tluanga chuan a lu a han bu nghauh nghauh va, "Engpawh chu nise, Shadow X original kha encounter-i'n ka kap hlum a. A hnu khan ka naute zinga mi khan pistol kha kan lama a rawn tin pah khan a maxine kha a hmet thla lui ni tlatin an hria a, chu chu min hrilh a." a han ti chu Inspector Rinawma chuan a en hu mai.

"Engmaw? I sawi awmzia chu, Sir... kah hlum a duh hrim hrim tihna em ni?" tiin a lo zawt hu mai. Pu TLuanga chu a han ngawi vang vang a, "A nih duh hmel ka tia, ka ngaihtuahna a ti thui khawp mai. A ruang kan buaipui lai pawh khan pistol maxine kha a inphawi hrim hrim bawk a, tun thleng hian ka la ngaihtuah thin keipawn." a ti nuah nuah a.

Inthlahrun hmel tak hian Hlua chuan, "Sir, ngaih loh lamah lo ngai lo ula. Shadow X hmasate pahnih kha encounter in in kap hlum ve ve a, mahse tuna mi hi chu kut ngeia man ka duh a ni, nung damin.... a thil tih chhan te, engvanga ti nge a nih tihte, kan zawh angai in ka hria." a han ti a.

Inspector Rinawma ngaihdan chu a nih vak loh hmel kher mai, "Tualthattu a ni a, mi a that thin. Chu chu thil sual a ni, kan lo kap hlum a nih pawhin police kan ni a, tualthattu kan kaphlum tihna a ni mai." a lo ti deuh hmak hmak mai a. "Chutiang a ni lo, Sir. Chhan a awm a ngai a alawm, Shadow X hi tualthattu satliah an ni ngai lo, kei ai pawhin in hrechiang daih zawk ang.." a sawi zawh hma hma chuan Rinawma chuan a lo tawng khalh leh a.

"Ni e, keini chuan a beih meuhvin kan bei alawm. Tu ami pawh hi engvak a ni dawn lo, kan man thei em em ang." a lo ti leh zung zung mai. MAhse Pu Tluanga chuan, "Hlua sawi hi a dik a ni, a chhan chu kan hriat ve angai alawm." a lo ti a, Rinawma pawh chu a ngawi ve ta a.

*****************************************

Abawihi chu a room thim takah chuan a awm leh mek tawh a, a lo inbuatsaih leh der tawh mai. Chemte lian tak mai leh seizet mai chu a tat hriam mek a, a mitthlaah chuan Pu Tluanga leh Rinawma te chu an rawn lang leh zawk zawk mai. Tichuan hun kal tawh a ngaihtuah let leh a, Pu Tluanga'n Nghaka a kah hlum lai leh Inspector Rinawma'n a pa Rina a kah hlum laite chu a ngaihtuah chhuak leh a, a thinrim thar ngei mai.

Tichuan a wardrobe chu hawngin hoodie a la chhuak a, a jeans dum a la chhuak lehnghal bawk. Hoodie hmaah chuan SHADOW X tih lian tak chuan a lo inziak a, a bag ah chuan a khung mawlh mawlh a. A phone a rawn ri leh thut mai, chu chu a victim pathumna tur, banga a tar rawlthar kum 19 mi leh, William-a a ni.

Abawihi hian a ngaizawng der ve tho hi a lo ni a, Petera nen khan a der ve ve in a kawp tihna a nih ber chu. Phone chu a la a, "Hello, ka insiam mek.." a han ti nghal a. Phone ami, William-a chuan, "Khawiah nge ka lo nghah ang che, hetah bazar hnuai ah khan ka awm a, i sawina ah tak khan?" tiin a rawn zawt a.

"Aw tah khan lo awm char char rawh, ka rawn chhuk ang."

"Ke in a ni lawm ni i rawn kal dawn?"

"Dawn tho e, ka hman tep."

"A thim sia, i hlau lo ami? In inbulah ka rawn ding anga, kan chhuak dun nghal mai dawn alawm."

"Angai lo, ka chhungte an la meng. Ka rawn chhuak ru dawn anih hi, lo awm mai mai rawh."

"Awle."

Williama chuan phone chu a dah a, "Ka nghahna rei tawh sin le, helai hi a thim si, rimchhe si." tiin a phun nuah nuah a. Second 10 vel hnuah chuan step thim lai tak atang chuan tu emawni hi a rawn chhuk a, Abawihi a nih ringin Williama chu a thaw huai mai.

A va pan nghal a, "I van huai em em, a thim thim nen....i rei bawk sia, hawh kal vat ang." tiin a lo be nghal mawlh mawlh a. MAhse  a eng zawn a rawn thleng chu Williama pawh a ding chat mai, Shadow X anga inthuam hi a lo ni reng mai a. Williama chu a hrilhhai takzet, "Tu..tunge i nih a?" a ti hu mai a.

Chuveleh Shadow X chuan a kut a rawn lek chhuak a, perfume bur ni awm tak hi a keng bawk. Williama hma zawnah chuan a spray ta vak mai a, "Engthil nge maw i tih le?" tiin Williama chu a tawlh hnung nghal. A khuh vak vak a, reilote ah chuan a thal nghal tawp mai.

Nikhawhrelovin a awm der mai a, Shadow X chuan a en vang vang a. A pawm kang nawlh a, a pu phei ta vu vu mai. Zan a rei deuh tawh avang leh bazar hnuai chep tak a nih avang chuan tuman an hmu lo, Williama chu motor seat hnung lamah chuan a mut tir a.

A phuar bet vek a, a phone a laksak bawk. Tichuan kawngka chu a khar leh a, driver seat lamah chuan a thu ve leh a. Williama phone chu a hma zawnah chuan a dah a, motor chu a start a. Chak takin a tlan a, Williama phone chu a rawn rik nghak ang mai hian a en leh zauh zauh thin a.

****************************************

Bazar hnuaiah chuan Abawihi chu a thleng thla ve chiah a, mahse tumah an lo awm der mai si lo. A hawi kual hru a, a thim bawk si nen. A phone chu a phawrh a, a han en kual a. MAhse Williama hmel reng reng hmuh tur a awm lo, "Khawnge maw a lo awm hman ni?" tiin a call a.

A la tlang mai thei lo lehnghal, bazar hnuai atang chuan a chhuak a. Williama bike chu a hmu ngei bawk si, "A va han ninawm tak e aw.." tih nuah nuah pah chuan a call leh a, a tlang thei ta hlauh mai. Phone chu a rawn in-puck up ta ngei mai. Chuveleh Abawihi chuan, "Khawnge i kal daih a, hei ka zawng kual nasa tawh lutuk che." a ti nghal chiam chiam a.

Mahse lehlama mi chuan, "Hello Abawih, kan Shadow X thar chu... tunge i zawn a, i next victim i zawng mek em ni?" a rawn ti ta mai a. Abawihi chu a ding chat mai, mak a ti takzet. A chhan chu phone lehlam ami chu Williama a ni lo chiang lutuk tlat, chumai bakah a thilsawi vang chu ni tho mahse, Shadow X voice, ama hman ang tho kha a nih vang a ni.

"Tunge i nih?" a han ti zawi sap a, phone ami chu a rawn nui huah huah mai. Chutah vin zetin Abawihi chuan, "Tunge i nih ka tih chu?" a han ti vak a. Phone ami chuan chiang fek fawk hian, "Aww... Shadow X mawle. Shadow X female version chu nangmah i nia, kei male version..chuti chuan a chiang em?" a rawn ti ta mai a.

Abawihi thin chu a phu dup dup mai, "Khawnge William a?" a ti khur dar dar a. Shadow X chu a rawn nui leh huah huah a, "Lungngai suh, ka bulah a awm e. tun tum chu ka kutah dah rawh, hei chu ka lo buaipui ve tawh ange." tiin a rawn chhang leh a. Abawihi chu a hlauthawng ru kher mai, "Tunge i nih, enge i sawi awmzia ka hre lo. Williama kha khawiah nge a awm, min hrilh vat rawh." a han ti leh a.

"Abawih, min ngaithla rawh. Ngun takin ngaithla ang che, Shadow X anga i thil tih kha duhtawk rawh. A chhan chu i ni ve thei tak tak dawn lo, keimah hi Shadow X diktak chu ka ni. Tun atang chuan i hna ka thawh chhawk dawn che a nih chu, i hrethiam em?" a rawn ti leh a.

"Enge i duh?" Abawihi chuan a ti khur leh dar dar mai. Shadow X chu a han thaw hak a, "Williama hi enge a thil tihsual, ka hremna turin eng thil nge a tihsual min hrilh la. A inpuan tur te, tu hnenah nge ngaihdam a dil dawn tih te nen min hrilh vek rawh le." a rawn ti leh ta ham ham mai.

Abawihi chu a rilru a buai takzet, "Zawnga, police hnenah ka report dawn che, i hria em?" a han ti vin leh hlur ringawt a. Shadow X lah chuan a lo hlauh loh hmel kher mai, "Khai a, police a... Shadow X ve tho i nih kha, i him dawn bik lo." tiin a lo nuih hrep mai.

Abawihi thinrim bawk si, mangang bawk si chu awm ngaihna pawh a hre tawh lo. A hawi kual hru hru a, "Shadow X ka ni lo, i thil sawi kha a awmzia ka hre lo." a ti leh vak vak a. Shadow X lah chu a nui vak vak a, "Williama chu enge a tihsual, sawi mai rawh. A nih loh chuan awmze nei lovin ka that mai dawn nia, an thil tihsual vang kher nilovin, nang ang lo takin keichuan ka that hmiah mai dawn asin, eng sawi set set lovin..." tiin a rawn vau leh a.

Abawihi chuan a lu a dawm vang vang a, "Khawiah nge i awm, lo chhuak rawh." a han ti leh ringawt a. Shadow X chu a thaw hak a, "A tha e, darkar 2 hun ka pe ang che, khua a var hma ngeia thah ka duh ania aw, Williama hi...chu chu hre reng ang che." a rawn ti leh ta mai a.

Vin zet hian Abawihi chuan, "Zawnga, Williama kha engtin mah lo ti suh ang che." a han ti tuar tuar a. Shadow X chu a rawn nui leh huk mai, "Abawih, amak thin emai. I bulah pawh awm se, i thah tur tho ania. Enge i mangan vak, lo chawl hahdam rawh. Darkar hnih i nei aw, chumi hnuah chuan ka rawn phone leh ang che." tiin a dah ta hmak mai.

Abawihi chuan a call back leh nghal a, mahse OUT OF SERVICE a inti ta tlat mai, vawi 3 vel a try nawn leh a, mahse a tlang thei tawh hauh lo. A mangang takzet, "Kei lo Shadow X dang an awm amaw? Tunge ni ang? Engtin nge ka victim dawt leh a hriat theih?" tiin a phun nuah nuah a.

Chutah engemaw hrechhuak zawk ni awm tak hian a meng phawk hru a, rang lutukin a in luah lamah chuan a tlan chho lehnghal a. A in hnunglam tukverh vel te chu a han check chiang a, chutah a hlauh ang ngei ngeiin tukverh darthlalang pakhat, lo thar(new) bik riau chu a hmu fuh ta.

Ava en a, vuah thar chawp a ni tih a hriat hle a, darthlalang dang aiin a thianghlimin a tle vur bik a. Rang lutukin inchhung lamah chuan a tlan lut a, tukverh lam chu ava pan nghal. Tukverh bar chu a han en chiang leh a, a bar tak chu a thar nilo mahse, a kilhna perek te chu a thar vek a lo ni tih a hmu chhuak bawk.

Hmanraw chihim rawn keng sa in chu Shadow X thar chu a awm loh hlanin a inah a lut ru tih a hrethiam ta, a roomah chuan a tlan lut leh nghal a. Light on meuhvin a han check chiang a, engmah khawih danglam a hmu bawk si lo. Banga Williama thlalak chu a han en chiang a, a sirah chuan tereuhte hian THIS ONE IS MINE tih hi a lo inziak reng mai.

Ama ziah a ni lo tih a chiang, "a lo...a lo lut ru amaw?" tiin a phun leh sap a, a hlauthawng kher mai. "Engtin nge ka tih ang?" tiin a lu a dawm a, a rilru a hah takzet. Wiliama thil tihsual chu a sawi mai dawn nge, Shadow X thar chu a zawngchhuak dawn, thutlukna siam har a ti khawp mai.

**************************************

Pu Tluanga leh Inspector Rinawma te chu hotel pakhatah hian an thleng a, room hrang ve ve an book a. Pu Tluanga chu verandah ah chuan dingin mei a zu khu hluah hluah a, chutih lai chuan kawngka a rawn inkik a. "Sir, keimah Inspector Rinawma, ka lo lut thei angem?" Rinawma chuan a rawn ti lauh lauh va.

"Lo lut rawh." tiin Pu Tluanga chuan a lo chhawn vat a. Rinawma chu a rawn lut a, verandah ah chuan a chhuak tlang ve nghal a. Pu Tluanga bulah chuan ava ding a, "I duh leh zu ve la.." Pu Tluanga chuan lo tiin a sikret chu a pe ve a. Rinawma pawh chuan a zu ve mai bawk a, "Bungdur Khuaah daih daih, thingtlang lam Shadow X ve aniang maw?" tiin a han khi suk a.

Pu Tluanga chu a han si vawng vawng a, "He khua ah hian kal chhan a nei a ni ang, SI Hlua sawi dan hmang khan Shadow X hmasa ang tho khan a che fing em em mai si a." a lo ti nuah nuah a. Rinawma chuan Pu Tluanga chu a han en hu a, "Sir, hemi khua ami hi a nih i ring lo tihna em ni?" tiin a zawt nghal a.

Pu Tluanga chuan a lu a thing a, "A nih ka ring lo mai a nilo, a ni lo tih ka chiang. Khawiah thingtlang khua atangin fing takin Shadow X an piang ve lovang, a victim pahnih, a thah tawhte post mortem result en khan a chiang vek alawm." tiin a lo chhang a.

Rinawma pawh chuan a lu a han bu ve nghauh nghauh va, "Ani thei tho mai, a thu hrimah tinge maw Shadow X hi an awm belh zel le, ngaisang pawl te hi an lo awm a ni lo mawle..." tiin a han khi leh suk a. Pu Tluanga chu a ngawi vang vang a, "Abawihi kha ila hria tiraw?" a ti deuh thut mai.

Rinawma chu za lo tak chuan a nui suk a, "Hria e, ka Shadow X thah kha, a patea a lo nia, a hnuah ka hre leh chiah a. Encounter shoot-na hmunah khan a lo awm ve alawm, nangpawh kha....a awm tiraw tah khan, Abawihi kha?" tiin a zawt let ve nghal a. "Aw awm e, amah chiah dam chhuak a awm alawm." tiin Pu Tluanga chuan a lo chhang a.

Rinawma chuan a aw a han thian kharh kharh a, "Anih chuan, Sir. Engtin nge Abawihi nen khan in inhriat ve, ka sawi awmzia chu nangmah ah enge in relationship?" tiin a han zawt leh a. "Ka fapa Alex-a bialnu hlui ania, khatih lai kha chuan an la inngaizawng a." tiin a lo chhang leh a.

"Tunah an inthen tawh em ni?" tiin Rinawma chuan a han zawt leh hram a. Pu Tluanga chuan a lu bu nghat nghatin, "Um... an inthenna a rei tawh. Shadow X thih hnu lawk khan an inthen ta mai niin ka hria, Alex-a lah chuan a tuar na phian lehnghal a." tiin a han khi suk a.

****************************************

Williama chu a harh thut mai, motor seat hnung lamah chuan a lo la mu reng a. Hnung khirh a phuar a lo ni a, a hmui pawh tuam tlat a lo ni. Theih ang tawk chuan a tal vak vak a, second 20 vel a beih tang tang hnuah chuan a thu chhuak thei hlauh mai. Motor chhungah chuan amah chauh hian a lo awm a, motor dinna lah chu kawng reh tak mai, ramhnuai ve angreng tak hi a lo la ni zui.

Theih tawp chhuah in a han tal leh a, vanneihthlak takin minute 2 vel a  beih hnuah chuan a phuarna hrui chu a phelh thei ta hlauh mai. A hmui tuamna tape pawh chu a pawt thla nghal a, motor atang chuan a chhuak nghal. A hawi kual hru a, a awmna lai chu khawi lai nge a hre thei hauh lo.

A mangang takzet, a tlan vak ringawt a. Mahse rei pawh a tlan lo, a hma lawkah chuan Shadow X chu a lo ding khur mai. Kuthnung a lo suih at a, rum em em hian Williama chu a melh khur mai a. Williama chuan vin zet hian, "Tunge i nih, engvanga min man ngawt nge i nih a?" tiin a han vin nghal vak vak a.

Mahse Shadow X chuan a chhang lo, a en reng ringawt. Williama chuan a bulo vel chu a han en kual leh a, thing bung lian tha nelh nawlh pakhat chu chharin a hum ran a, "Tunge i nih sawi rawh, a nih loh chuan ka vaw hreh miah lo che ania." a han ti leh khur khur a.

Mahse Shadow X chuan ala chhang chuang lo, ngawi reng hian a la en char char ringawt. Chutah Williama chu a au vak a, ava tlan phei ta mai a. A thing tum ken lai chuan X-a chu vuak tumin a han vai thuak a, mahse X-a chuan awlsam zet hian a lo bum a.

William-a chuan a vuak thleh chiang ngei mai, a pai khut khut a. A chloroform hip luh avang khan a lu a la hai deuh bawk nen, lamlianah chuan a bawk thlawp mai. A tho leh taih taih a, thingtum chu a chhar leh a. Shadow X lam chu ava hawi a, X-a lah chu ngil at hian a lo ding leh run tawh.

William-a chuan ava pan leh a, a han vai leh thuak thuak a. Mahse awlsam em em hian X-a chuan a lo bum leh zat zat mai a, Williama zawk chu a invai chau vek thei hial. A thaw hlawi hlawi a, a tha a hmang nasa bawk nen, ala rui deuh bawk si nen, a chau takzet.

Chuveleh Shadow X chuan a dulah a tlawk sak pawp mai a, Williama chu a thal leh ta tual mai. X-a chuan a zu thutchilh ran a, dim baksak lo chuan Williama hmaiah chuan a hnek ta siah siah mai. A hnek na bawk aniang, a ri chawk chawk mai a. Nikhawhre lova a awm hma chu a hnek siah siah a, vawi 20 vel lai chu a hnek hman.

X-a meuh pawh a thaw hrawk hrawk mai, Williama chu nikhawhrelo chuan a let leh ta der mai a. A ngai ang bawk chuan Shadow X chuan a kut leh ke te chu a phuar leh a, a hmui chu tape in a tuam sak leh bawk. Motoe seat hnungah chuan a mut tir leh a, a harh mai loh nan tiin a hnar zawnah chuan chloroform chu a spray leh bawk a.

Driver seat lamah chuan a thu leh a, a thaw hak mai. Ama phone a phawrh ve tawh thung a, number pakhat a hmet chhuak a. Chu chu tudang nilovin Abawihi number a ni, "Tunah chuan min hrilh ngei angai tawh ang, anih loh chuan he naupang hi a chak lo viau ang." a ti duh khur khur a, Abawihi chu a call ta a.

***************************************

A room ah chuan Abawihi chu mangang tak hian a lo la inngaihtuah nasa mai a, a vei kual thuak thuak reng mai. Chutah a phone chu a rawn ri a, number ringawt a ni. Rang takin ala a, "Hello? a han ti nghal a. A rin ang ngeiin Shadow X a lo ni, "Darkar hnih a liam ta e, Abawih. Enge i thutlukna chu ni ta, Shadow X rules in ka che dawn nge, ka dan siamchawp hian?" tiin a rawn zawt a.

Abawihi chu a maimitchhing vang vang a, "Shadow X chuan rules pangngai a nei, chu chu nangpawn i hria. I duh dan danin i thlak thei lo, Williama khawnge a awm?" tiin a lo zawt let a. Shadow X chuan vin deuh tak hian, "Abawih, ka hun khawhral suh. Tunah min hrilh rawh, anih loh chuan he naupang hi ka that hreh miah lo tih hria ang che." a rawn ti khur khur mai.

Abawihi chu a mangang takzet, chhan dan tur pawh a hre mai tawh lo. A ngawi reng ringawt a, "Abawih, hun ka pe che. KA hrilh lawk che, min chhang dawn nge he naupang hi ka that dawn?" tiin Shadow X bawk chuan a rawn vau leh khur khur mai. Abawihi chu a thaw hak a, "A tha e, ka hrilh ang che. Williama kha pawl 12 zirlai a ni a, private school pakhat, LEVANIA SCHOOL ah a lut mek. AN exam chawlh lai a ni a, hoseteller a ni. An warden hi vai a ni a, Kumara niin a nupui in a rawn riahpui zeuh zeuh thin a ni. Tichuan vawikhat chu Williama khan an warden awmbo hlanin, warden nupui, kum 21 leka upa, Rani chu a inturah mutduhna a pawlh sak a, midang hriat lohvin a phone pai ruk chuan Rani mu lai chu a duhtawkin a khawih a, a saruak thla a laksak bawk. Chu chu vau nan a hmang a, a duh hun hunah a rukin Rani chu a mutpui thin a, Rani chuan a sawingam ngai lo a ni." tiin a hrilh ta ringawt mai.

Shadow X chu a khi suk a, "I ti tha e, anih chuan tu hnenah nge ngaihdam a dil dawn le? An warden, Rani pasal Kumara chu nge ni a, amah Rani zawk?" tiin a rawn zawt leh a. Thinrim avanga insehruh teuh chung hian Abawihi chuan, "Aw... Kumara kha, Kumara kha ngaihdam a dil ang." tiin a lo chhang vin leh hlur mai.

Shadow X chu a ngawi vang vang a, "I ti tha e, Abawih. Lungngai suh, Shadow X hmasate angin kei chuan ka man ve dawn lo che, ka tina ve dawn lo che. I hnathawh hi thawh chhunzawm ve ka duh mai chauh ania, ka lawm lutuk e." a rawn ti vel deuh luam a.

Abawihi chu a thinrim ngei mai, "Enteh, a tu apawh chu lo ni la. Ka lak atang hian himin i chhuak lovang, i hria em? KA zawng chhuak che anga, tunge i nih hi ka hre dawn khawp mai." tiin Abawihi chuan a vau ve ta khur khur mai. Mahse Shadow X chuan a hlauh loh hmel kher mai, "I ti sual ang, BAwihte... tunge ka nih chu chiang takin i hria, mahse i rinloh deuh ka ni ngei ang." tiin phone chu a dah leh daih mai.

Shadow X lah chuan phone a hmang zo chu a hnung a phawi nghal a, sim card chu la chhuakin a tichhe nghal vek bawk a. Phone chu a a thiat darh vek bawk, a car tape chu a on a. Ring takin Avenged Sevenfold hla hlui chuai thei lo leh nalh em em mai, Unhoy Confessions tih hla chu playin a motor chu a start a, chak tak chuan a tlan leh ta vang vang a.

Abawihi chuan call back a han tum leh a, mahse a rin ang ngeiin OUT OF SERVICE a lo inti leh ta tlat mai. A phone chu a ak a, a thinrim lutuk chu dawhkan a chum bur ringawt. A thu hnawk a, a thaw halh halh mai. Enge a tih hmasak ber ang a hre lo, "Tu mimawl phiangsen nge maw i nih le?" tiin a phun zawi leh sap a.

Rinhleh tur awm ang tumah a hre bawk si lo, Shadow X thar anga lo insiam satliah chu nise mak a ti hauh lovang. Mahse kha Shadow X thar kha chuan amah Abawihi chu tunge a nih a hrechiang si a, Shadow X a ni ve tho tih a hre bawk a, chu chuan a ti hlauthawng zual ber a ni.

A inngaihtuah vang vang a, a hnathawh mek chu a her danglam a ngaih phah ta. A lu a bu nghauh nghauh va, banga Williama thlalak a tar chu a la thla nghal a. Tichuan paper pakhat la in lian tak leh chiang kek kawk hian SHADOW X tih chu a ziak kuau mai.

A hnuaiah chuan question mark(?) a ziak tel bawk a, tichuan Williama thlalak a tarna ah chuan chu paper chu a tar ta zawk a. A en vang vang a, "Ka next victim chu nang hi i ni ang, ka chhui che ang a, ka man chhuak che anga, tunge i nih pawh ka hre ngei bawk ang." tiin a khur dar dar a.

A ngawi leh deuh vang vang a, "Tichuan.... Tichuan...." tiin a thinrim lutuk chu a sawi hleithei lo. Bang chu na takin a han chum ri leh bur a, "Tichuan ka that ang che, ka that khawp ang che, SHADOW X." zawi sap si, chiang fek fewk chuan a ti khur dar dar mai a.

**************************************

TO BE CONTINUE