UNHOLY CONFESSIONS (PART- 3) (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 6

 UNHOLY CONFESSIONS (PART- 3) 

(MIZO FICTION TEEN SLASHER/HORROR STORY) 

Written by : Aaron Malsawmdawngzuala 

WARNING : 18+ 

Chapter - 6

**************************************

Abawihi chenna inah chuan Hlua leh Sarah-i te chu an va kal ta a, kawngka chu an han kik karh karh a. Mahse tumah chhangtu an awm lo, "Awm in awm em?" Hlua chuan a han ti lauh lauh va. Mahse a reh vang vang mai, Hlua chuan kawngka chu tlem a han pawt chhin a.

A lo inkalh lo hlauh mai, Sarah-i nen chuan an in en hu ringawt a. Hlua chu a han thaw leh hak a, tichuan a lut ta a, Sarah-i chuan a zui lut ve nghal bawk. Inchhungah chuan tumah an lo awm lova, "Abawih...Abawih?" tiin Hlua chuan a au vak vak a. MAhse tumah chhangtu an awm lo, room lamah luh an tum chiah chu kawngkhar chu a rawn ri rawk mai.

Rang takin Hlua leh SArah-i chu an hawi phei vat a, Shadow X ang chiah chiah a inthuam hi a rawn lut ta mai a. Hlua chuan rang lutukin a pistol a phawrh a, "Che tawh suh." tiin a vin nghal thak mai. Mahse Shadow X chu rang lutukin a tlan chhuak leh nghal vat a, Hlua leh Sarah-i chuan an um ve nghal bawk.

Rei fe an in um a, Sarah-i chu hmeichhia a ni bawk a, a tlan muang bik kher mai. An in um zel a, bazar lamah chuan Shadow X chu a tlan thla a. Hlua chu a muang ta hret mai, mipui an lo tam ve angreng bawk si nen. Shadow X chu a hmu zo ta hauh lo mai. Zunin phenah chuan Shadow X chu a lo biru hi a lo ni a, fimkhur tak chuan Hlua chu a han bih dek dek a.

Hlua chu a lo hawi hu hu mai, thinrim hmel tak chuan a let leh ta a. Shadow X chu a thaw huai mai, a lukhum chu a la thla a, a mask chu a phelh bawk a. Tudang nilovin Abawihi a lo ni reng mai, "Hrep tak chuan a, enge maw an rawn tih le?" tih nuah nuah pah chuan a kawr lum chu a phelh a.

A bihrukna atang chuan a chhuak a, a hoodie dum ken lai chu bawlhhlawh bawmah a paih daih a. A phonr a rawn ri a, a han en chuan Hlua a lo ni ngei mai. A aw a han thian kharh kharh a, "Hello, ka pu....enge ni ta?" tiin pangngai tak chuan a lo chhawn a.

Hlua chuan thaw deuh hlawp hlawp chung hian, "Abawih, khawnge i awm? I inah kan rawn kal a, i lo awm si lova.." tiin a rawn zawt nghal a. Abawihi chu a thaw deuh hak phawt a, "Nia....ka chhuak lawk a, ka lo haw mek, bazar ah ka kal a. TUnah khawnge in awm a?" tiin a lo zawt let a.

"I in bulah kan awm, ka thawhpuinu nen kan lo kal." tiin Hlua chuan a lo chhang leh a. Abawihi chu a kal chak deuh sawt a, "AWle, ka lo thleng nghal a nimai." tiin phone chu a dah a, "Enge maw an duh reng reng le?" tiin a phun leh nuah nuah a, a kal chak leh deuh sawt a.

*************************************

Abawihi chu a va thleng a, a in kawtah chuan Hlua leh Sarah-i chu an lo awm ngei a. A va kal hnai a, "Khawiah maw i kal a?" tiin Hlua chuan a lo zawt leh a. Abawihi chu a han thaw deuh halh halh a, "Bazarah ka thiannu thil ka zuk pe lawk a, enge in lo tih dawn a?" tiin a zawt let ve a.

Hlua leh SArah-i chu an han inen deuh zeuh phawt a, "Aa.. englo ania. Thil sawipui duh che ka nei a, chuvang mawle." tiin Hlua chuan a chhang a. Abawihi lah chuan, "Engthil maw, han sawi la.." a lo ti sam leh et mai. Hlua chu a khi deuh suk a, "Chu aia pawimawh sawi tur chu a awm thar leh chiah." a han ti a.

Abawihi chuan hrethiam reng mahse hrethiam lo ang tak chuan a lang der a, "Enge awmzia ni nei nuai, eng ber nge i sawi duh a?" tiin a zawt leh a. Hlua chu a ngawi vang vang a, "I inchhungah kan sawi zawk dawn em ni?" a lo ti daih mai. Abawihi chuan chhan mai ngaihna a hre lo, "Aaa.. ihh, aw.. awle, lo lut ru." a ti bah deuh nuai mai.

Inchhungah chuan an pathum chuan an inzui lut ta hlawm a, an thu a. Hlua chuan Abawihi chu a han en vang vang a, "Abawih, i dinhmun hi a hlauhawm a ni." a ti deuh tawp mai. Abawihi chu a khi suk ringawt, "Khate chu ahma pawn i sawi tawh kha, ka dinhmun te chu a hlauhawm reng a ni lawm ni?" a han ti deuh kher a.

"Enteh, ka ti tak tak. A thuhrimin tinge in hi kalh lova i chhuahsan a?" Hlua'n a han ti chu Abawihi chu a ngawi deuh dat a, "Nia.. ka lo fimkhur lo a ni." a han ti zawi sap a. Hlua chu a maimitchhing vang vang a, "Kan lo kal a, kan kik a, kan au bawk che a. Mahse min chhang silova, kan lut ta tawp a. Kan luh hnu reiloteah khan Shadow X a rawn lut a ni, a thuam famkim nen.." a han ti a.

Abawihi chu a han meng phawk lui vel a, "Eng a? KA inah Shadow X a lo kal amaw, i fiamthu chu a ni em lo maw?" a han ti deuh hluai a. "Aih, kan fiamthu lo. Abawih, a rawn lut a, mahse a tlan chhuak lehnghal vat a. Kan um a, mahse bazar lamah a chhuk thla a, kan hmu zo ta lo a ni." Sarah-i chuan a lo ti ve bawk a.

Hlua chuan sawi chhunzawm veleh in, "Tinge i inah kher a lo kal? Ngaihtuah chiang rawh, he Shadow X thar hian Shadow X hmasate ang tho khan nang hi a plan ah hian hruai luh ve che a tum a ni. Tichuana  tawpah engkim a tarlang ang, midangte ang tho khan a che ve a ni." a han ti leh a.

Abawihi chu a ngawi vang vang mai, "Anih leh min hrilh tur pakhat zawk chu enge?" tiin a zawt leh ta daih mai a. Hlua pawh a khi suk ringawt, "Williama thihna avang khan he case atang hian min inhnuh dawh tir a ni, Officer Tluanga leh Inspector Rinawma ten." tiin a chhang a.

Abawihi chu a meng deuh hraw mai, Hlua chuan chiang leh zual chuan Abawihi chu hnai takah a han en leh a. Rinhlelh hmel tak hian, "Abawih, Williama nen khan engtia inhria maw in nih, i tan enge a nih han sawi chiang leh deuh teh." a han ti leh deuh kher a.

Abawihi chuan ngei hmel tak hian a melh hraw mai a, "Ka bialpa a ni, a chiang em?" a ti ve deuh ta hmak mai. Sarah-i chuan mak a lo ti ngang mai, "I bialpa maw?" a lo ti hu mai a. Abawihi chuan a lu a lo bu deuh nghauh nghauh va, "Aw ni e, chuvang alawm hospital ah pawh khan ka lo kal ve.." tiin a chhang leh a.

Sarah-i bawk chuan, "Min lo hrethiam la, i bialpa nisi a thih khan i van tuar nat hmel loh ve?" tiin a lo zawt leh a. Abawihi chu a khi suk mai, "Tap hawm hawm turin min beisei kher em ni? Ni e, ka bialpa chu a ni ngei alawm. MAhse kar khat em pawh kan la ni lova, ihmuh pawh kan la inhmu tlem lutuk. Chubakah Shadow X chetna a ni tiin in sawi bawk nen, Williama ai mah chuan Shadow X tih hming hian ka rilru a ti hah zawk." tiin a chhang leh hmak hmak mai.

Hlua chu a ding hluai a, Sarah-i chu a ding ve bawk. Hlua chuan Abawihi chu a han en leh vang vang a, "Kan kal phawt ange, mahse hei hi hre reng rawh. He case ah hian ka tel tawh lova, tunah chuan mi naran mai ka ni tawh. Mahse ka tawp san dawn chuang lo, Pu TLuanga leh Pu Rinawma zah ram ram na tur khawpin Shadow X hi ka zawng chhuak anga, an hmuh tur ngeiin Police Station ah ka hruai lut bawk ang." a han ti deuh khur khur a.

Abawihi chu a ding ve a, "Awle, all the best." a tih khum ve deuh hmak a. Hlua chuan a chhanglet tawh lem lo, Sarah-i nen chuan an chhuak dun ta a. Abawihi chuan a en zui vawng vawng a, "Min tihbuai man hi chu in hmu dawn khawp." a ti khur khur mai.

A room lamah chuan a let leh a, Hlua chuan a room a la check tho tho dawn tih a rin lawk avang chuan banga a thlalak bel te chu a la thla a, a room chu hmeichhe room pangngai tak ang chuan a chei a. Thlalak leh thildang rinhlelhawm deuhte chu dah tha in a then chu a hal bawk a, Hlua lakah chuan a lungawi lo kher mai.

***********************************************

Hlua leh Sarah-i te pahnih chu Station lam panin motor ah chuan an chuang dun mek a, Sarah-i chuan Hlua chu a melh leh zeuh zeuh zel a. Hlua lah chu rum tak hian a hma zawn chu a melh reng a, biak a huphurhawm takzet. Sarah-i chuan a aw a han thian kharh kharh a, "Sir, keichu Abawihi hi hmeichhe zak theilo leh nasa tak a nih ka ring." a han ti ringawt a.

Hlua chuan a lo en hu a, "Engvang chuan maw?" tiin a lo zawt a. Sarah-i chu a han thaw deuh hak a, "A chhan dan fawk fawk che kha, engemaw mi pawimawh deuh angah a inngai ve khanglang amawni? Ka ei thlawt lo, ben hrep mai kha ka duh a...a chapo ve ar ar khawp mai." a han ti leh nuah nuah a.

Hlua chu a khi suk a, "Engemawni tak chu a ni chiang alawm." a lo ti daih mai. Sarah-i chuan a en hu a, "Enge i sawi awmzia?" tiin a zawt nghal a. "Ka sawi thiam bik lo, amnah ah khan engemawni a awm. Shadow X pahnih an awm tawh a, inkungkaihna an nei ve ve. Tunah Shadow X ngei mai chu a inah a rawn lut ru a, tuna Shadow X thar nen pawh hian an inzawm tih a chiang mai alawm." tiin a lo chhang leh a.

"Anih Sir, Abawihi leh Shadow X hi an lo inhre reng mial mai lo maw?"

"Chu chu thil awmthei a ni, mahse amah Abawihi pawh hi a ni thei tho mai."

"Abawihi hi Shadow X chu a ni i tihna em ni?"

"A ni chu ka ti lo, mahse engemaw hriat a nei a ni. Engemaw zep ruk a nei a ni, Abawihi hian."

Sarah-i chu a ngawi vang vang a, "Anih te chuan amah hi dawp tawp mai ila, han vau deuh bawk ila, a inpuang mai lo maw?" a han ti leh a. Hlua chuan a lu a thing a, "Nilove, chutiang kan ti thei tawh hleinem. Shadow X case ah hian kan tel ve tawh lo, mahse saw putar pahnih chet hma sawn ka che dawn, ka man tho tho dawn." a ti khur deuh dar dar mai.

Chutih lai chuan a phone chu a rawn ri a, "Aw hello nu....enge ni?" tiin a chhang nghal. Sarah-i chu inthlahrung tak chuan a lo ngawi nghal hmak a, "Ava buaithlak ve...awle, ka lo kal ang." tiin phone chu a dah a. Sarah-i chuan a lo en hu a, "Engthil nge a, Sir?" tiin a lo zawt nghal vat a.

Chhang mai lo chuan Hlua chu a ngawi deuh vang vang phawt a, "Sarah, motor i khalh thiam tiraW?" tiin a zawt let daih mai. Sarah-i chuan mak a ti angreng khawp mai, "Aw thiam e, tinge?" a lo ti leh hu mai a. "Ka nu thaw hah a chhuak thut a, damdawiinah an lo kal pui a ni awm e. Damdawiin kawtah ka chhuk anga, Station ah lo va khalh phei mai ta che." Hlua chuan a ti a.

Sarah-i chu a hlauthawng nghal kher mai, "Eng a, a ngaihtuahawm loh maw? KA lo kal ve dawn em ni?" a lo ti nghal chiam chiam a. "A ngaihtuahawm loh, mahse pawisa vel ka han tih fel sak loh chuan...Station ah chuan ka rawn let leh vat ang, taxi ka rawn hmang phei mai ang." tiin Hlua chuan a chhang a.

Sarah-i pawh chu a thaw huai mai, "Umm... i lo let har lovang tiraW?" a han ti leh hram a. Hlua chu a khi suk a, "Let har dawn lo, ka han hmu zuai anga, chuzawng chu a nimai." tiin a lo chhang leh a. Hospital kawtah chuan an ding a, Hlua chu damdawiin lamah chuan a lut chho va, Sarah-i erawh Station lamah a inkhalh phei ta thung a.

*************************************

Inspector Rinawma leh Officer Tluanga te chu office atang chuan an rawn chhuak a, Sentea lo duty mek chu an va pan a. Rinawma chuan Sentea darah chuan a han beng thak thak a, "I pum chu a ziaawm deuh tawh em?" ngeiawm tak chuan a han ti kher a. Sentea chuan inthlahrung tak hian, "Aw Sir, ka tha tawh e." tiin zah tak chuan a lo chhang a.

Rinawma bawk chuan, "Khatiang kha a thleng leh a nih chuan tuna i awm ang mai mai hian i awm tawh dawn hauh lo ania, i hna in a tuar thei tih hre reng ang che." tiin a han vau deuh khur khur a. Sentea chu a zak ru kher mai, "A thleng tawh ngai lovang, Sir." tiin a chhang leh a.

"Sente, rukruk case an rawn report thar kha.... Sub-Inspector Hlua lo let hunah lo hrilh la, a kutah awm nghal rawh se aw.. Hei Inspector Rinawma nen hian Shadow X case chungchang buaipui chhunzawm turin kan feh chhuak t(r)an dawn a, Hlua kha lo hrilh ang che." Officer Tluanga chuan zaidam tak chuan a han ti a.

Sentea chuan a lu a lo bu nghauh nghauh va, "Awle, Sir... ka lo hrilh nghal ang." tiin a chhang a, Officer Tluanga leh Inspector Rinawma te chu an chhuak ta a. An chhuah hnu deuh lawk chuan Sarah-i chu a rawn thleng ve nghal a, Sentea chu ava pan nghal vat a.

"Khawnge Officer Tluanga leh Inspector Rinawma te kha an kal dawn a?" tiin Sarah-i chuan a zawt a. "Shadow X case kha an buaipui chhunzawm dawn a ni awm e, khawnge Sir Hlua a awm a?" tiin Sentea chuan a lo zawt let a. Sarah-i chuan dawhkana tui bur chu a ban a, "A nu a dam lova, damdawiinah a kal lawk a nih kha." tia chhangin tui chu a in khawlh khawlh a.

Sentea chuan phawk hru hian, "Eng a? A serious em?" a lo ti nghal vat a. "Serious lutuk lo a niang, amah...a nu berin alawm rawn phone ni." tiin Sarah-i chuan a lo chhang leh a. Sentea pawh chu a thaw huai mai, "Anih a rawn let har angem?" tiin a han zawt leh a.

"Let har lovang chu a tih kha."

Sentea chu a thaw hak a, "E taka, hei report thar a lo lut a." tiin file chu la in Sarah-i chu a pe a. Sarah-i chuan lo ban vatin, "Eng report nge ni a?" tiin a en nghal a. "Rukruk case mawle, Dingdi Veng lam an nia, Pu Tluanga khan Sir Hlua kutah a dah nghal bawk a." tiin Sentea chuan a lo chhang a.

*********************************************

DArkar hnih vel hnuah chuan Hlua chu a rawn let leh a, "E Sir, i lo let tawh maw? Enge i nu chu a an?" tiin Sarah-i chuan a lo zawt nghal a. "A tha a ni mai e, kan han buai rei deuh alawm mawle?" tiin Hlua chuan a chhang a. Sarah-i chuan file chu a pe a, "Hei report thar, rukruk case a ni e." a han ti a.

Hlua chuan a han en vang vang a, "Ka kutah an dah em ni?" tiin a zawt nghal vat a. Sentea chuan lo chhangin, "Aw Sir, Pu Tluanga leh Pu Rinawma ten hrilh tur che in min ti a ni." a lo ti a. Hlua chu a ngawi vang vang a, "Tikhan lo awm ru, Sir Tluanga chu ka va hmu lawk ange." tiin kal ngawt chu a tum a.

Mahse Sentea chuan, "Sir, an chhuak a." a lo ti vat a. Hlua chuan Sentea chu a en deuh hu a, "An chhuak a, amn kalna tur an sawi mial em?" tiin a zawt leh nghal a. Inthlahrung tak hian Sentea chuan, "Aw.... ihh... Shadow X case kha, an buaipui chhunzawm dawn a." tiin a chhang a.

Hlua chu a hmel atang chuan a lungawi loh hmel kher mai, "Kan phone lawk ange." tiin a phone chu a phawrh a, Officer Tluanga chu a call ta nghal a, mahse a ring quit thak thak mai. "A la thei miah lo.." a ti zawi sap a. Inspector Rinawma chu a han call ve leh a, mahse a la thei bik chuang hauh lo.

Hlua chuan mak a ti angreng khawp mai, "Ani pawhin ala thei bik lo, engemaw awmzia le?" a ti nuah nuah mai. SArah-i lah chuan, "An tlan laklawh emaw, an buai deuh aniang chu." a lo ti sam et a. MAhse Hlua chuan a lu a thing a, "Pakhat Police Officer zah kai chin, pakhat Inspector inla pa ve tawk tak. An phone an la lo ngai lo, thil diklo a awm palh ang tih ka va hlau em." a ti deuh vawng vawng mai.

SArah-i bawk chuan, "I miss call an hmu anga, an rawn call back mai ang che chu." a lo ti sam leh et mai a. Mahse Hlua chuan a chhang lo, "Sente, an chhuahna a rei tawh em?" tiin Sentea zawk chu a zawt daih mai a. Senta chu a han inngaihtuah deuh vang vang a, "DArkar 2-3 vel chu a liam tawh ang?" tiin a lo chhang a.

********************************************

Tlai dar 3 a ni a, Abawihi chu a roomah chuan a thu ngawi reng a. A rilru a buai kher mai, chet han lak mai ngaihna a hre ngang bik lo a ni. Chutia a inngaihtuah vung vung lai chuan a phone a rawn ri a, number ringawt a ni. Muang chang chuan a pick up a, "Hello?" a han ti zawi deuh sap a.

Chutah phone ami chuan, "Hello Abawih, ka naute duat... mi i bum ve khanglang amaw?" Shadow X aw ngei mai chuan a rawn ti thum leh ta chhur chhur  mai. Abawihi chu a thu ngil nghal at a, "Nang bawk maw, i phone call hi ka lo nghak reng asin." a lo ti ve deuh ngat a.

Shadow X chu a rawn nui deuh huah huah a, "Ani maw? Enge ka lakah sawi duh i neih a, min hrilh ta che." a rawn ti vel ham ham a. Abawihi chuan thinrim tak hian, "A tam mai, tam tak a ni. Lo nghak reng rawh, i la chak dawn lo tih hria ang che." a han ti khur dar dar a.

Shadow X chu a han thaw deuh hak a, "A tha e, i sawi hma in thil pakhat ka zawt ang che. Engvangin nge Williama chungchang kha dawt min hrilh, a hremna tur kha...i phuahchawp tiraw?" a rawn ti vin deuh hlur mai. Abawihi chu a khi suka , "Ka hrem tur chu keiman ka hrem ang, nang nilovin." tiin a lo chhang leh deuh sak mai.

Shadow X chu a ngawi vang vang a, "I thil tih man hi i hmu dawn khawp, i chunga ka thil tih tur hi i rin phak bak a ni ang." tiin a rawn vau leh khur khur a. Abawihi chu a ding deuh hluai a, "Anih thil pakhat ka zawt ve ang che, Shadow X angin i insawi a. A inthuam dan pawhin i inthuam ve ngei ang, face mask i vuah anga, i hmel lang theilo tur berin hoodie nen, lukhum i khum bawk ang. Chutiang a nih si chuan engvangin nge Williama kha i thah kher, lo harh chhuak leh pawh nise enge a sawi vak anga, tualthah hmang hrim hrim i ni tihna em ni, khatiang i chin dawn chuan engtikah mah nang hi Shadow X i ni ve thei ngai lovang." a ti deuh hrep mai.

Chutah Shadow X chu a rawn nui leh huah huah a, "Abawih, thil hrechiang lo hian tawng phawng phawng zel lo teh. A chhan chu ka hrilh ang che aw, ni e.... a nazawngin tual thah ka duh ve hauh lo. Amaherawh chu kha tleirawl, Williama khan tunge ka nih chiang takin a hria. Tichuan ka hmaikawr a pawt thla a, ka hmel a hmu hman ngei a ni. Chuvang chuan a harh chhuah leh vaih chuan, tunge ka ni tih a puang chhuak dawn. Chuvanga that ka ni, ti khan a chiang em?" a rawn ti ve ta siah siah mai.

Abawihi thinrim lutuk chu a insehruh nasa mai a, "Engthil phiangsen nge ka lak atang hian i duh a, Zawngsen?" tiin a vin vak mai. Shadow X lah chuan zaidam tak hian, "Shhh... inbeng dai rawh. Thil pakhat, thil pakhat chiah i lak atang hian ka duh. Ka hmu duh che a ni, zaninah.. lo kal ngei ang che." a rawn ti a.

Abawihi chu za lo tak chuan a khi suk a, "Anih lo kal lo ta ila?" tiin a lo zawt deuh kher a. Shadow X chuan ring deuh leng lawng hian, "I lo kal dawn tih ka hria alawm, a chhan chu i hmelma huat ber, i phuba lakna turte pahnih hi tunah hian ka bulah an awm a ni." a rawn ti ta mai a.

Abawihi chuan a hrethiam lo kher mai, "Enge i sawi awmzia, tute maw?" a ti hu mai a. Shadow X chu a rawn nui leh ta huah huah mai, "Engtin nge i hmelma lian ber pahnihte hi i theihnghilh tak mai le, Officer Tluanga, i bialpa hlui Alex-a pa leh i bialpa hlui tho, Nghaka, Shadow X original that tu leh Inspector Rinawma, Shadow X pahnihna, i pa Rina kap hlum tute kha mawle.." tiin a rawn chhang ta mai.

Abawihi chuan mak a ti takzet, "Eng...engmaw, ka..ka ring lo che, dawt i sawi. Ka lo kal duh nan dawt i sawi...ka ring lo che." a ti bah deuh nuai mai a. "Amak talh e aw, a proof-na i duh kher em ni? I duh leh han call tum chhin la, keimah thovin ka lo chhang ang che. Chu aia chiang i duh chuan tunah khan i whatsapp han en teh le... pic ka rawn thawn ang." a rawn ti leh a.

Abawihi chuan a phone chu a en nghal a, whatsapp message chu a dawng nghal ngei bawk. A han en chu a meng phawk nasa mai, X-a chuan dawt a lo sawi hauh lo. Pu Tluanga leh Pu Rinawma, thutthlenga phuarbeh lai thlalak a lo ni. Abawihi chuan a phone chu a bengah chuan a chuktuah lehnghal a, "Zawnga, anni kha ka chan pual an nih kha. Lo khawih suh, i kut hmawr pawhin lo khawih hlek suh ang che." a ti khur dar dar mai.

Chutah vin zet hian X-a chuan, "Anih chuan ka thusawi awih la, zaninah chuan min rawn hmu mai rawh. I duh phawt chuan hemite pahnih hi, i duh ang thalin i khawih dawn nia, phuba chu i la ngei dawn nia." a rawn ti hrep mai a. Abawihi chu a ngawi vang vang a, "Min bum chuang lovang, ka lo kal dawn lo." a la ti talh mai.

Shadow X chuan chiang fek fawk hian, "Ngaithla rawh, Hmeli. Nangmah ngei pawhin i sawi kha, ka hrem tur chu keiman ka hrem ang i tih kha. Williama atangin min hmuhfiah tir tawh a, keichuan ka ring thlap che. Mahse i sawi anga i awm ngei ngei thin takzet a nih chuan fiahna dang tha tak chu ka kawl mek, nangpawn i hria. I lo kal lo a nih chua, Shadow X i nih ve nachhan, he police putar pahnihte hi ka that ang, ka that khawp ang." tiin a rawn vau leh ta chhur chhur mai.

Abawihi chu a maimitchhing vang vang a, "Khawiah nge kan inhmuh ang, khawi hmunah nge i duh?" tiin a zawt ta nge nge a. Shadow X chu a nui khi sak mai, "A tha e, kha kha alawm Abawihi diktak chu, hmeichhe huaisen Abawihi diktak ka hmu let leh ta." a han ti deuh chiam a.

Vin zet hian Abawihi chuan, "Min chhang rawh, khawiah nge kan inhmuh dawn?" a han ti leh hlur a. "Khawiah vak nge ni anga, hei i hmelma pahnihte ka hrenna hmunah hian..... ka farm house ah mawle." tiin Shadow X chuan a chhang a. Abawihi chu a thaw hak a, "Khawiah nge i farm house chu a awm?" tiin a zawt leh a.

"Location leh time chu ka rawn hrilh ang che, zanin dar 7 rik hmain ka rawn hrilh ang che. Chuan eng hmanrua mah rawn keng suh ang che, police rawn hruai lo bawk la. Trick hai tum hlek suh, Shadow X ve tho ka nih hi hre reng rawh." tiin Shadow X chuan a rawn chhang leh a.

Abawihi chuan rum zet hian a melh ngai chu a melh ngar ngar a, "AWle, ka lo kal ang. Ka lo kal khawp ang, tumah ka rawn hruai lo anga, eng hmanrua mah ka rawn keng lo bawk ang. MAhse hei hi hre rawh, nang hi Shadow X ka nihna anga, ka last victim i ni bawk ang." a ti ve sak mai.

Shadow X chu a khi suk a, "Awle, ka number hi lo chhui tum hlek suh ang che. Ka lo nghak ang che, kan inhmu ngei dawnnia." tiin phone chu a dah a. Abawihi chu room ah chuan a vei kual a vei kual a, thil hriat chhuah thut nei ang mai hian a ding thut a. In atang chuan a chhuak a, kawngka chu tala in a kalh a.

Bazar lamah chuan a chhuk a, tlai lam thim deuh thet thet a nih tawh avang chuan mipui pawh an tlem tawh khawp mai. Mi hmuh loh theih ang ber chuan bawlhhlawh bawm pakhat chu ava pan a, hawi kual zeuh zeuh pah chuan a chhung chu a zen a. Shadow X hoodie ngei mai, a paih hnu chu a la chhuak leh ta.

In lamah a tlan chhoh pui leh a, a room ah chuan a inkalh hnan nghal a. Hoodie chu a han en vang vang a, SHADOW X tih lian taka inziak chu a melh deuh ngar ngar a. A lu a bu nghat nghat a, "Ka lo kal ang, tunge Shadow X diktak chu kan hre dawn khawp alawm." tiin a thinrim em avang chuan a khur deuh dar dar mai.

******************************************

Khua a thim a, tlai dar 6 vel a ni. Sarah-i chu a room tukverh bulah chuan thu in pawn lam chu a en vung vung a, a phone a rawn ri thut mai. A han enchiang chu SI Hlua a lo ni, "HEllo Sir, enge ni ta?" tiin a chhang vat a. "E, Sarah. I biak lawk hman em?" tiin a rawn zawt a.

"Aw, biak lawk hman e, enge ni ta a?"

"Chaw te i ei tawh maw?"

"AW, ei tawh e, Sir. Engthil nge ni a?"

Hlua chu a han thaw hak a, "ENglo ania, Pu Tluanga leh Pu Rinawma hi ka la be tlang thei miah lova, vawi 20 chuang ka call tawh. Ka ngaih a tha lo khawp mai, call i tum ve chhin tawh em?" tiin a rawn zawt a. Sarah-i pawh chuan mak a ti angreng kher mai, "Call pawh ka lo tum ve miah lo asin, avan mak ve.. tawhsual an tawk te a ni em lo maw?" tiin a han zawt let a.

"Chu chu ka hlau va, chu ai mah a ka hlauh chu Shadow X chhui tute an ni a. Amah Shadow X hian a lo man daih te hi a ni mai lo maw aw ka ti hial, ka ngaih a tha thlawt lo." tiin Hlua chuan a chhang a. Sarah-i chu a ngawi vang vang a, "A ring quit zel ami?" tiin a han zawt leh a.

"Aw ring quit zel a, tlai dar 5 vel atang phei kha chuan a tlang tawh lo hrim hrim." tiin Hlua chuan a rawn chhang leh a. SArah-i chu a han thaw deuh hluai a, "An chhungte i phone em?" a ti leh a. "Phone ve bawk ang chu, an lo la haw loh thu bakin min chhang lo." tiin Hlua chuan a lo chhang leh a.

"Sir, enge ti tura min duh?"

"Sentea hrilh la, Station lamah lo va buaipui teh u. An phone trace a ngai a nih pawhin kan ti mai tur a ni, kei erawh ka nu ka awmpui deuh angai bawk si nen. Ka rawn tel ve vat ang, nangni pawhin call lo tum tang tang ula."

"Awle Sir, i nu chu a ngaihtuah awm viau em?"

"Ka sawi thiam lo, a buaithlak angreng khawp mai. Hei tunah pawh a thaw hrawk hrawk a, damdawiin lamah tlan chhoh pui leh pawh a ngai maithei a ni."

"Thil pawi chu a thleng em lovang chu tiraw?"

"A thleng lo turah ngai ang, engpawh chu nise ka sawi ang chuan lo ti phawt teh u."

"Awle, Sir. Kan lo buaipui ange, lo lungngai suh." tiin Sarah-i chuan phone a dah a. Pu Tluanga leh Pu Rinawma te chu call a han tum ve chhin a, mahse Hlua sawi ang ngeiin a tlang thei hauh lo. A insiam mawlh mawlh a, Station lam pan tur chuan a chhuak ta a.

*************************************

TO BE CONTINUE