MUKPUI LUI (MIZO FICTION STORY) Written by : Aaron Malsawmdawngzuala Chapter - 3

 MUKPUI LUI

(MIZO FICTION STORY)

Written by : Aaron Malsawmdawngzuala

Chapter - 3

******************************

Bza, Sangsangi, Peka leh Euniki te pawh chuan lui chu an rawn thleng ve leh ta, lungpui chunga Muani lo mu reng mai an hmuh chuan mak an tiin an hlauthawng kher mai. Phawk hru hian, "Saw..saw Muani a ni em?" tiin Sangsangi chuan a kawk a. Peka chuan tlan pah hian, "Anih saw...va kal vat ang u." a ti nghal a, an vai chuan an va tlan nghal a.

Bza chuan Muani chu a han sawi vak vak a, "Muani..Muani...i harh em? Harh teh..Muani harh teh." tiin a be mawlh mawlh a. A lu kak atang chuan thisen a rawn chhuak leh a, a tuamna rawmawl pawh thisenin a ti huh vek tawh. "Ehe..a lu ah hliam a nei a nih hi." Euniki chuan a lo ti vat a.

Muani chu zawi muang hian a rawn meng a, "Khaw..khawnge ka awm?" a rawn ti bah nuai mai. Sangsangi chuan a kuah a, "Awii ka van lawm tak, Muani...hei i bulah kan awm ania, hlau miah suh aw.." tiin a lo hnem nghal a. Bza chu a hawi kual a, "Muani, khawnge Siama a awm? I hmu em?" tiin a zawt ve nghal bawk.

Muani pawh chu a rawn hlauthawng thar leh kher mai, "Nilo..Siama kha..ka bulah a awm reng kha, khawnge a awm tak?" tiin a mangang kher mai. Peka chu a han ding hluai a, "Engtin nge hetah hian i awm...sanghal kha khawnge a awm i hria em?" tiin a han zawt ve leh a.

Muani chuan a lu chu a dawm vawng vawng a, "Ka..ka hrelo. Ihh..Siama kha ka bulah a awm reng alawm. Hetah hian min hruai a, ka muhil a, ka kutah khan a vuan reng sia...khawnge a awm tak ang?" tiin a lo hrethiam bik lo kher mai. Bza chu a han ngawi vang vang a, "Min zawng turin ramhnuai lamah sawn a phei leh em mawnile?" a han ti nuah nuah a.

Peka chuan a chempui dahna lam ava melh a, a lo awm ta hauh lo. Mak ti tak hian, "Ehe, tah sawn chempui kha ka theihnghilh a, a awm tawh miah lo." a ti hu mai. "Lui lamah khuan a awm a ni lo maw...kan zuk en chhin dawn mi?" Euniki chuan a lo ti ve leh a. Chuveleh Bza chuan, "Kan vai chuan kal lovang, keimah ka zuk kal chhin ange." tih leh tlan thlak a rual nghal a.

******************************

Bza chuan lui chu a zuk thleng a, Siama chu thi hnuang hian a lo let reng mai. Ring tak hian, "Peka..Muani..hetah lo chhuk vat teh u, Siama chu ka hmu ania." a han ti vak a. Midang ho pawh chu an rawn chhuk ve nghal a, Muani chuan Siama chu a va buaipui nghal a. Tap chung hian, "Siama..awi ka duh thei lo, a thi em ni?" tiin a mangang kher mai.

Peka chuan Siama taksa vel chu a han en kual a, "Sanghal nen khan an inbei anih hi, hei....a banah a seh sak a nih hi." a han ti a. Siama chuan thisen a hloh hnem tawh em avangin a vun pawh a lo dang deuh hman hial a, Bza chuan a kawr chu phelhin Siama bana hliamah chuan a tawnbet a.

"Ala dam, khi lamah han zawn chho ang u." Peka chuan a lo ti leh a. MAhse Bza chuan, "Keiman ka paw chho mai ang." tiin a paw ta a, an chho leh ta a. A hma a Muani mutna ah chuan Siama chu an mut tir a, tih harh tumin an be mawlh mawlh a. Mahse a harh thei tlat lo, "Engtin nge kan tih ang, tiang chuan a thi mai ang..." tiin Muani chu a tap chhen tawh mai.

"Nilove...a thi mai bik lovang. A lu ah hliam a nei bawk si a, kha khan a lu a ti hai rih a nih kha. A rawn harh vat mai ang, a thisen chhuak tur pawh kan ti tawp tawh alawm kha.." tiin Peka chuan Muani chu a lo hnem a. Engtia awm zel tur nge an hre lo, rilru hah tak chuan an thu thap ringawt mai a ni.

Euniki chuan mangan hmel tak hian, "Khawnge kha sanghal kha a awm ang le? Keichu kan dam chhuah pawh ka ring lo, hei hi kan tawpna tur a niang." tiin a inhnit feih feih reng a. Peka chuan vin lek lek hian, "Chutiang rawn sawi suh, i thian hmeichhiate i ti thlaphang mai mai. Chhel tak khan awm rawh, kan dam chhuak em em ang." a lo ti deuh zek mai a.

Zaidam tak hian Bza pawh chuan, "Kan dam chhuak ang, eng ang pawhin sanghal chu lo kal leh mahse kan beilet tawh ang. Tumah kal hrang lo ila, a dik a nimai. Chubakah lui lamah hi chuan a lo kal lovang, kan hmuh hnuhnun ber kha chuan a awmna a hla emai." a lo ti ve bawk a.

******************************

Darkar 1 leh tlem chu rilru hah tak chuan an thu reng tawh a, Peka chu a rawn ding deuh hluai mai. Bza chuan a han en hu a, "Teh hluai che chuan, khawnge i kal dawn a?" tiin a lo zawt a. Peka chu a han ngawi vang vang a, "Hetia kan awm tawp ringawt chuan tuman min rawn pui dawn lo, signal lah nise a awm bawk si lo. Engemaw tal kan tih angai, anih loh chuan helai hmunah hian riltamin ka thi vek a nih loh pawhin kha sanghal khan min ei zo vek a ni mai." a han ti deuh hlur a.

Bza chu a lo nui suk a, "Enge maw kan tih vak chuan ang le? Hei tunah Siama pawh a la harh lo a ni a, ramhnuaiah lah sanghal a awm bawk si. Chet ngaihna a awm hrih lo anih hi, tihtheih engmah kan nei hrih lo." tiin a lo chhang a. Peka chu a han thaw halh halh a, "Sanghal pakhat lek...engtin tin emaw kan that thei maithei asin. Thang kan siam emaw, hmanrua emaw kan siam chawp anga, engemaw tal chu kan tih angai alawm." a han ti vin leh hlur a.

Bza chuan a lu a lo thing a, "Pakhat chauh a awm ka ring lo, khatiang ramhnuai zau lutuk ah sanghal pakhat chiah a awm lovang, engemaw zat an awm ka ring." tiin a lo chhang leh a. Muani chu a tap leh nghal pur mai, "Awii leh ta nghal a, kan thi vek dawn nih hi." tiin a kun ngal mai a.

Bza pawh chu a han ding hluai a, "Anih chuan engemaw hriamhrei kan siam chawp ve angai a nimai, engtin nge kan tih ang?" tiin Peka chu a han zawt a. Peka chuan lui chu a han thlir thla vang vang a, "Ral lehlam ah sawn mau hmun a awm saw i hmu thei em? Mau hmangin engemaw thil hriam emaw, thil zum kan suih chawp mai dawnnia." tiin a lo chhang a.

Bza chuan hmeichhe ho chu a han en a, "Hmeichhe ho hetia kan kalsan tawp chuan a chi lovang, mahse nangmah a i kal pawh a chi chuang lo." a han ti leh a. Peka chuan a lu a bu nghat nghat a, "Umm...anih chuan Euniki nen kan va kal anga, nangin Muani leh Sangsangi i lo awmpui mai dawnnia." a han ti a.

Tichuan Peka chuan a chempui chu a la a, "Hawh le, Eunik....kal ang le." tiin Euniki chua  sawm a. Mahse Euniki chuan a lo chak lutuk vak lo, "Sanghal kha...lo awm ta se.." a han ti tham tiak a. Peka chu a han thaw hak a, "Ka veng dawn che alawm..khawiah nge a awm kan hre bik lo, kan him lo vek...chuvang chuan hmanrua kan siam ve angai alawm...lo kal rawh, ka venghim ang che." tiin a lo chhang a, Euniki pawh chuan hreh tak chung chuan a zui ve ta a.

*************************************

Minute 15 vel a ral hnu chuan Peka leh Euniki te pawh chu Bza te chuan an hmu phak tawh lo, an inhlat tawh takzet. Chutah Siama chu a rawn harh thut mai, a rawn khuh vak vak a. Rang tak hian Bza chuan a lo buaipui nghal a, "Siama..Siama..i tha em?" tiin a lo be nghal mawlh mawlh a.

Siama chu a hawi a nasa mai, "Muani..Muani khawnge i awm?" tiin a thawh rang nasa mai. Muani chuan a lo kuah vat a, "Heta hi ka awm, i bulah ka awm alawm." tiin a kutah chuan a vawn sak a. Siama pawh chu a thaw huai mai, "Muani...i tha em? I tha tiraw?" tiin a han zawt leh a.

"Ka tha e..ka tha lutuk e." tiin Muani chuan a lo chhang a. Bza chuan Siama chu a han en vang vang a, "Siama..i ban kha engtia i tih hliam nge? Sanghal nen khan in inbei em ni?" tiin a han zawt a. Chuveleh thil hriat chhuah nei ni awm tak hian Siama chu a phu zuk mai, "Nilo..sanghal kha...sanghal kha.." a ti bah ta nuai mai a.

Sangsangi leh Bza te chu an in en hu mai, "Ngati nge..enge awmzia, enge sawi i tum a?" tiin Bza chuan a han zawt leh a. Chutah Siama chu a hawi kual a, "Khawnge Peka leh Euniki?" a han ti vin hlur a. A thiante chuan a chet dan chu mak an ti kher mai, "Lui ral lehlamah sawn mau an va la, hmanrua kan siam chawp angai, sanghal beihna turin.." tiin Bza chuan a lo chhang leh a.

Chutah le, Siama chu a ding hluai mai. A mangan hmel em em a, "Nilo...Luiah an kal maw...kan dan angai, kan chhan vat angai." thaw hlawp hlawp chung chuan a han ti a. Midang ho pawh chu an ding ve nghal a, "Enge i sawi awmzia, Siama?" tiin Muani chuan a lo zawt ve nghal a. Siama thlan chu a tla bawrh bawrh mai, "Lui...luiah khuan...sa..saphai a awm, saphai lian lutuk a awm..ka hmu, ka mit ngei hian ka hmu a ni." a ti ta mai a.

A thiante pawh chu an meng phawk hru hlawm mai, "Saphai a? Luiah khuan saphai a awm maw?" Bza chuan a lo ti hu mai. Tap tep chung hian Siama chuan, "Aw ka hmu alawm...sanghal pawh pakhat chiah an awm lo, ka bana seh tu sanghal pawh kha...a hma a ramhnuaia sanghal kan hmuh nen khan a in ang lo." a la ti ta deuh deuh va.

Muani chuan zawi te hian, "Saphai..saphai a awm a nih chuan...Euniki leh Peka te kha..." a rawn ti tham tiak mai. Bza chu a han ngawi vang vang a, "Au mah ila min hre pha tawh lovang, kan va kal angai..kan va chhan angai." a han ti chang fak a. Siama pawh chuan, "Kal vat ang u...sanghal min beitu kha chu saphai chuan a dawlh lai ka hmu a ni, a hlauhawm lutuk." a lo ti leh a.

******************************************

Mau hmun chu Peka leh euniki te pawh chuan an thleng tep a, thlen dawn hnaih ah hian kawng chin vel tui dai kai hmasak phawt a ngai a ni. Peka chu a kal hmasa zawk a, hlau lo turin Euniki chu a fuih phei char char a. Euniki chu a ding a, "Lawk...ding lawk ang." tiin a han thaw hluam hluam a.

Peka chu a rawn hawi let a, "Ngati nge?" tiin a lo zawt nghal a. Eniki chuan a slipper chu a phelh a, "A thlawn zel ka slipper hi, ke lawngin ka kal mai dawn." tiin slipper chu a keng a. An kal leh tur chiah chu Euniki bawk chu a rawn t(r)e tuar mai, "Ana..ana lutuk..ka duh thei lo." tiin a rawn rak vak vak mai a.

Peka chu a rawn hawi let leh vat a, "Tinge...ngati nge...enge awmzia?" tiin a hlauthawng kher mai. Euniki chu a che ngam tawh lo, "Ka ke..ka ke ah engemawni in a seh..ana..ana lutuk." tiin a mittui a lo tla pur mai. Peka chuan ava pan a, "Lo che suh..lo che suh." tiin thui chu a zuk zen a, engemaw hi a pawt vak a.

Euniki chu a lo aiah tuar mai, Peka chuan a kut chu rawn lek chhuakin kaikuang te reuhte hi a rawn keng chhuak a. Khik suk pah hian, "Kaikuangin a chep che a nih hi...min ti mangang hman alawm." tiin a han nui vur vur a. Euniki lah chuan mittui tla phung hian, "Thildang amaw ka tia lawm, nat mah nak alaia." a lo ti tuau mai.

An kal leh zel a, mau hmun chu an thleng ta. Mau chang tha deuh ho chu PEka chuan a han sat nghal mawlh mawlh a, reiloteah chuan a zo nghal mai a. "Saw tah law law kan suih mai dawnnia, kan thiante bulah khan i let leh vat zawk teh ang." PEka chuan a han ti a, an let leh ta a.

A ngai te ang bawkin tui chu an han dai leh a, Euniki chuan hma a hruai ve tawh thung a. PEka chuan nui deuh vur vur chung chuan, "Kaikuang khan a rawn chep leh che ange aw.." tiin Euniki chu a han chhaih zeuh va. Euniki erawh a nuih a lo za lo kher mai, "Fiamthu hun pawh a nih loh hi...rilru hah mah nak alaia." a lo ti vin hlur mai.

Peka chuan a fiam zui tawh lem lo, chutah a ke chu engemawni hian a rawn man thut mai. Tuiah chuan a pawt lut ta daih mai a, a mau ken te pawh chu thlauhvin tuiah chuan a lang nel nel hlawm mai a. Rang lutukin Euniki chu a hawi let nghal, Peka lo bo daih chu a fiamthu a nih ringin a nuih a za lo hle mai.

Thinrim tak hian, "PEka, a tawk..a nuihzatthlak loh, lo chhuak vat mai teh." a ti vin hlur a, kal leh mai a tum a. Mahse PEka chu a rawn chhuak ta hauh lo mai, "Peka..Peka..a nuihzatthlak loh ka tih chu.." a han ti leh vak vak a. Mahse PEka chu a reh ta vang vang mai si a, Euniki chu a hlauthawng tawh kher mai.

Chutah tui hnuai atang chuan thisen ni awm tak hi a rawn chhuak a, a sen ta phut mai. Chutah zet zawng, Euniki chu a mangang ta hle mai. Muang chang chuan a tawlh hnung hret hret a, "Pe..Peka..Peka, khawnge i awm?" tiin a au vak vak a. Chutah Peka chu a rawn inhleuh chhuak buan buan a, "Eu..Eunik..tlan rawh..tlan rawh.." a rawn ti vak vak mai.

Euniki hlau lutuk chu mau hmun lamah zawk chuan a tlan let a, tui awmlohna chin chu a thleng vat a. Peka chuan a rawn zui bawk, mau hmunah chuan a rawn zuang kai ve nghal a. Euniki chu a tlan chhunzawm zel a, Peka chuan bai auh auh chung chuan a rawn zui ve zel a. Euniki lah chu a la inchhuih zui, PEka chuan rawn kai thovin thingkung phenah chuan a bihruk pui nghal a.

Euniki chu a mangang kher mai, "Peka..enge awmzia, engthil nge ni a?" tiin a thaw hlawp hlawp a. PEka pawh chu a hah kher mai, a chempui erawh ala hum reng thung. Thawk a han la te te a, "Sa..saphai, saphai a awm tui chhungah khan." a ti ta mai a. Euniki chu a meng phawk nasa kher mai, "Saphai a? Chuan...tunah khawnge a awm?" a han ti leh a.

"Ka sat..ka sat hliam a, min thlah chauh alawm. Chem hi keng lo phei ila chu min zial hlum anga, min dawlh daih tawh ang." tiin Peka chuan a lo chhang leh a. Euniki mangang chu a tap zawih zawih mai, "Engtin nge kan tih tak ang, kan thiante kha ral lehlamah daih an awm sia." tiin a inhnit hlawp hlawp a.

PEka chu a han hawi kual a, "Tunah mai chuan min rawn bei hrih lovang, hmanraw dang kan siam a ngai. Heta mau hi ka sat leh anga, hetah law law hian ka suih mai ang." tiin a tho va, mau chu a han sat leh a. A hmawr zum tha tak mai hian a suih a, inven nan Euniki chu a ken tir a.

***********************************

Minute 10 vel hnuah chuan Euniki chuan au ri niawm tak hi a hre ta tlat mai, "Peka, chu...chu i hre ve em?" a han ti a. PEka chu lo hawi hu in, "Eng maw?" a lo ti hu mai. Euniki chu a ding a, "Au thawm ka hria, ngaithla chiang lawk teh." a han ti leh a. Peka pawh chuan ding meuhvin a han ngai thla ve a, "Peka..Eunik.." tia an thiante au thawm chu an hre ta.

Peka chu a meng nghal hrawk a, "Ehe..lo kal an tum a nimaw? Saphai khan a lo bei ve mai ang, a chiloh tawp mai." tih leh tlan phei a rual nghal a. Euniki lah chuan Peka suih sak, a hmanraw thar chu a la ta chuang lo, Peka chu a umzui ve nghal a. Mau hmun luhna bul, kopang atang chuan an va en a.

An lam lo pan mek, Bza, Muani, Sangsangi leh Siama te chu an va hmu ta. Ring tak hian Peka chuan, "Lo kal suh u...luiah khan saphai a awm ania." tiin a au vak vak a. Mahse Bza te chuan enge an sawi an hre pha lo, "Lo let vat ru...luiah khan saphai a awm ania." tiin an lo au let ve bawk, mahse tawng an inhre pha der mai si lo.

Euniki mangang chu a han kal hmawr deuh va, "Let leh rawh u...saphai a awm ania.." a tih lai chuan thawk leh khatah lui atang chuan saphai chu a rawn lang leh ta thut mai, Euniki lah a lo ding hmawr tawh bawk si. SAphai chuan Euniki chu a rawn la ta chat mai a, tuia luh pui pah chuan a zial bet nghal bawk a.

Peka mangang lutuk chuan, "Nilo..Eunik...Eunik.." tiin a au zui vak vak a, tuiah chuan a chem ken lai nen chuan a zuang lut ve nghal. Mahse saphai chuan Euniki chu a thuk lamah chak takin a tleng thlak pui daih mai, Peka tan pawh chhan ngaihna a awm lo. Thil thleng zawng zawng chu Bza te lam chuan an lo hmu ve vek a, Sangsangi leh Muani phei chu an au ring tawh khawp mai.

Siama chu rang mangkheng hian ava tlan phei a, mahse Bza erawh chuan hmeichhe pahnihte chu a lo awmpui thung. Mau hmun luhna bul chu Siama pawh chuan a va thleng thuai a, tui dai ngai chin chu ava thleng a. PEka chu a rawn inhai chhuak buan buan a, Siama chuan a lo pui vat a.

Lungpui chungah chuan a pawt chho va, Peka chu a thaw a chham teuh kher mai. Siama chuan a kuah a, "I tha em, PEka?" tiin a zawt nghal a. Peka chuan thawk halh halh pah hian, "Ka..ka chhan hman lo, Euniki...Euniki kha a la daih." tiin a tah a chhuak takzet, a mit pawh a sen rum mai.

Sangsangi leh Muani chu an tap nasa mai a, Bza pawhin tih ngaihna a hre bik lo. Khua lah chu a rawn thim tan dawn ta der mai lehnghal a, Siama leh Peka pawh an awmna ngaiah chuan an awm reng ringawt. SAphai chuan Euniki chu hmun dangah kal puiin a zial hlum a, muangchang chuan a dawlh ta bawk a.

*********************************

Khua a thim tawh a, tlai dar 6 vel a ni. Lui sirah chuan Bza te thian ho chu an thu ngui bar hlawm mai a, hmeichhe pahnihte chu an la inhnit leh feih feih thin. An ngawi thap a, boruak chu a reh hian a reh tlawk tlawk a ni ber mai. Chutah Bza chu a han thaw deuh hak a, "Mukpui lui hi a hma khan ka hre tawh thin ka tih kha, tunah chuan ka hre chhuak tawh." a rawn ti chhuak hlawl mai.

Midang ho chuan an en nghal thap a, "Enge awmzia?" Peka chuan a lo ti vat a. Bza chu a han ngawi leh vang vang phawt a, "Kan naupan deuh lai khan...ka nu te hian an sawi thin. Kum 20 chuang kal ta khan he Mukpui luiah hian mi an kal thin a, mahse a kal apiangte chu an bo zel a ni. A chhan enge an hre lova, an ruang takngial pawh an hmu ngai lo. Chuvang chuan huai nei angin an sawi a, a hrang angin an sawi thin. Chuvang chuan kal phal a ni ta lova, kum 20 chuang chu tumah an kal tawh ngai lo." a han ti zawi sap a.

Za lo tih hriat tak hian Peka chu a khi lui sak a, "An bo zelna chhan chu tunah chuan a chiang tawh mai alawm, hrang tak tak zawk ta se kan tan pawh a him zawk ang." tiin a mittui chu a han hru leh zeuh va. Siama pawh chuan, "A kal apiang an bo zel, tunah keini kan awm ve ta chu ania, Euniki chu kan chan ta phawt chu ania...enge kan chungah hian thleng leh zel ang aww.." a ti vawng vawng mai.

Tap tep chung hian, "Euniki kha apa in kal a phal lova, mahse keiman ka va dil luih sak a. Lo kal lo ta se, him dam takin inah a awm ni mai tur. Keimah vang, keimah vanga thi ni berin ka hria." Muani chuan a han ti tham tiak a. Siama chuan lo hnem vatin, "Nilove, nangmah vang a ni lo. Tu thiam loh mah a ni lo, hetiang thil hi kan tawk dawn tih tuman kan hre bik hleinem." zaidam tak chuan a han ti a.

Kun ngawih ngawih pah hian Muani bawk chuan, "Lo damchhuak ta pawh ni ila, engtin nge Euniki chhungte bulah kan sawi tak ang? Keichu ka rilru a hah emai, thih hi ka la duh lo asin mawle.." a han ti leh vawng vawng a. PEka chuan rum zet hian Muani chu melhin, "Tunge i thi dawn ti a? Tumah kan thi dawn lo, nunna dang chan kan awm tawh tur a ni lo. Engemaw chu kan tih angai a ni, engemaw plan mumal tak kan siam angai." a han ti leh hlur a.

Siama chuan thinrim deuh tak hian, "Eng vak nge kan tih anga, a hrim hrimin nangpawh tinge hmeichhia te i hruai reng reng a? Mau hmuna i kal pawh khan nangmah in kal mai ta che, hmeichhe awmnem zawk leh dawih zawk i kal pui a...Euniki nunna in a tawrh phah ta chu a nih hi." a lo ti ve hrep mai.

Chutah Peka chu a thinrim ta, "Engmaw i sawi a, keimah vanga thi angah i lo ngai amaw?" tiin a ding ta hluai mai. Siama lah chuan a lo hlau bik lo nasa, "Aw ni e...ani ai kha chuan nangmah zawk hi saphai khan lo la daih che sela tha tur...i inti thu em em ringawt a, mahni pawn mau lakna mai mai ah pawh kal ngam mang si lo." tiin a ding ve nghal a.

Bza chu rawn ding ve in, "A tawk...hetah buaina kan tawk mek a ni a, nangni leh zel chu lo intibuai lo teh u." a han ti deuh thak a. Peka thinrim chu a insum zo tawh lo, "Chuti chuan min ti reng reng suh aw, Lalremsiam...helai hmunah hian saphai emaw, sanghal emaw nilovin keimah ngei hian ka that ang che, i hria em?" a ti vin ta khur khur mai a.

Sangsangi chu lo inrawlhin, "Peka, i tawngkam kha fimkhur rawh aw...a mawi lo thin emai." tiin a lo khap ve vat bawk a. Muani pawh chuan, "Thu mai mai rawh, Siama..nang tal chu in control tum teh." tiin Siama chu a lo pawt ve vak vak bawk a. Siama pawh a la pawr nasa mai, "I ngam chuan min thah chu han tum chhin teh, Peka...hliam ka tuar a, nikhaw hrelovin ka awm. Mahse keichuan saphai a awm tih ka hre lawk vek, ka harh hun han nghak leh hram la chu Euniki hi tunah hian kan bulah ala awm ngei ang." a lo ti let ve sak sak mai a.

Bza chuan a ning ta, "A tawk...in pahnih khan ngawi rawh u. Ngawi tawh rawh u, helai hmun hi kan chhuahsan ang. A hma a kan thil plan kha kan kal tlang pui ang, mau kher lo pawh...thing dang pawh kan zawng anga, hriam takin kan suih anga, kan keng theuh ang. Engpawh chu nise, inhnial buai tawh suh u...ka hne lutuk." a han ti vin thak a, Peka leh Siama te pawh chu an inbeng dai thei ta hram a.

***********************************

Bza pa, Pu Biaka chuan a fapa in a la rawn call miah loh avang chuan mak a ti deuh a. Sana a han en a, dar 6 a pel duai tawh mai si. Inchhunga tei kual pah chuan, "An thlen thu te emaw, chanchin engemaw tal rawn sawi tur ania. Reh vung vung zel mai, nachang hre lo lutuk." tiin a phun nuah nuah a.

An nu, Pi Kimi inbual zo chu bathroom atang chuan a rawn chhuak a, a hmai hruk fai pah chuan, "Enge i lo phun bul bul a?" a rawn ti a. Pu Biaka chuan a phone chu a han en a, "Ka message pawh a chhang thei bawk silo, a la tlang lo zui. Call i tum ve tawh em? BAwiha hi...chanchin engmah pawh a rawn sawi bawk silova." a han ti a.

Pi Kimi chuan ngaihsam tak hian, "Aww...luiah an awm a, signal te a chiang lo ve a niang chu mawle. I mangang hma thei lutuk, naktukah kan rawn haw dawn a tih kha.." a lo ti mai a. Pu Biaka chuan an nu chu a han melh run a, "I ngaih te lah hi a sam thei sia maw, i hahthlak thin teh e." a han ti nang nang a.

Pi Kimi lah chuan, "Enge ngaihsam a nihna, call a lak theih miau loh te chuan tihngaihna a vang alawm. Min rawn call mai ang, an la hlim ve te pawh a ni mahna." a lo ti vin hlur mai. Pu Biaka chu a thu a, "Tunlaiah tui tla hlum an tam tawh si...keichu ka ngaih hi a tha thei thin lo tiangah hian...tunah phei chuan phone tlang theih a ni bawk si lo." tiin a han thaw deuh halh a.

Pi Kimi chu roomah lutin a inthlak a, chutia a inthlak mek lai chuan a phone a rawn ri a. A fapa, Bza a nih ringin beisei tak chuan a han en a. Mahse Bza thiannu, Sangsangi nu, 

Pi Rini zawk a lo ni daih mai. Phone chu a la a, "HEllo, Pi Rin....enge ni ta, tehmial che chuan?" a han ti kual deuh duah a.

"HEllo, Pi Kim...enteh, Bza hian chanchin vel a rawn sawi tawh em?"

"Engtia chanchin maw....an lui kal kha maw?"

"Aw ni e, hei Sangsangi lah hi kan phone tlang thei silova."

"E anih chu, engmah a la rawn sawi bik lo."

"A nih chu mawle, keichu ka hlauthawng deuh va. Sangsangi hi khawiah pawh chhuak dawn se an thlen chin emaw, a awmna thlengin engkim hi min hrilh thlap thlap thin a. Tun tum hi a reh hmak bawk mai si a, ka han hlauthawng deuh mawle."

"Ekhai, nula tlangval an ni ve tawh a, hlauthawng duh suh. Chubakah an awmna lai kha lui a ni dawn a, signal chu a vang ve viau ang."

"Umm..anih chuan chanchin kan han ngaichang leh rih ange, Bza'n a rawn phone che u chuan min lo hrilh ve hrim hrim ru aw.."

"Awle..ka lo sawi dawnnia."

Phone chu an dah a, Pi Kimi inthlak zo pawh chu room atang chuan a chhuak leh a. Pu Biaka chuan lo melh hraw in, "Tunge a?" a lo ti khur khur a. "Aww..Pi Rini mawle, Sangsangi'n ala phone bik lova, chu chu a rawn hlauthawng a, Bza'n min rawn phone leh phone loh min rawn zawt a nih kha." tiin Pi Kimi chuan a lo chhang a.

Pu Biaka chu a ngawi ta vang vang mai, "Engemaw an tawk te hi a ni lo maw...Peka pa hi ka han phone chhin dawn em mawni le? Keichu ka ngaih a tha hauh lo ania, zing karah an chhuak a, engemaw tal chanchin rawn sawi loh rikngawt chu a dik lo." a han ti nuah nuah a. Pi Kimi lah chuan, "Ava ho tak...a rawn phone mai ang, ngaihtuah lutuk duh suh." a lo ti ve chhen bawk a.

**************************************

Zan a lo ni tawh bawk nen, chhun lamah sa tha viau mahse Bza te thian ho chuan vawt an ti tawh khawp mai. Mahse zanthim hnuaia ramhnuaia kawng han zawn chawp chu thil tih chi niin an hre bawk si lo, chu mai bakah saphai chauh nilo, sanghal pawh engemaw zat a la awm ngei an ring bawk si.

Loh theih lovin an puan in chu an kaih ta ringawt a, mahse pakhat chauh an kaih thung. Peka chuan thing chu a suih mawlh mawlh a, zu bang tlem lo la awm chu inchhawpin a lem zeuh zeuh bawk a. Tent ah chuan Sangsangi leh Muani te chu an mu a, a bul lawkah chuan Bza chu a thu ve bawk a, a muthlu teuh thei khawp mai, a bu leh uih uih thin a.

Peka thing suih lai chu Siama chuan ava pan a, a bulah chuan ava thu a. Peka chuan zawi te hian, "I lem ve duh mi, lo inthlit mai rawh." a lo ti a. Siama pawh chuan a han in ve a, "Enteh PEka, nichin kha ka tihpalh lutuk aw...kan mangang em a, ka tawngkam a lo na deuh a ni." a han ti zawi sap a.

Peka chu a lo khi suk a, "A ho lutuk, keipawh ka thinrim insum zo lovin thah hial che ka tum kha..haha, engahmah ngai suh." a lo ti a. Siama pawh chu a han nui suk a, "Min ngaidam dawnnia, helai hmun hi kan chhuahsan ngei ang. KAn tanrual chuan...a ni lawm ni?" a han ti leh a.

Peka pawh chuan a lu a lo bu nghat nghat a, "Tehreng mai, eng ang ramsa kawlh pawh awm belh zel mahse...kan beilet ang, helai hmun atang hian kan chhuak em em ang." a lo ti ve bawk a. AN han ngawi dun vang vang a, "Ka lo suih chhawk ve dawn che em ni?" Siama chuan a han ti a.

"Angai lo...hei ka suih zo tep." tiin Peka chuan a lo hnial vat. Siama chuan a chhuhsak lui a, "Saw...Bza chu va be harh rawh, a muthlu leh luk luk thin ania. I chau tawh awmsia, ka lo suih chhunzawm ang." a tih tlat avang chuan Peka pawh chuan a kian ta a. Bza bulah chuan ava thu a, a va be harh lui hram hram a.

*******************************

TO BE CONTINUE