MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 5

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 5

************************************

Indawm kun run hian Rina chu a thu tum bur a, a bulah chuan Amir-a chu a vei sek bawk. Chung lam a han melh cho vang vang a, "RAMPAGE.....Henry-a, a ngalah khan ka han hlap ve ringawt chu ania. Min hmuh hun chu ka thi ngei dawn a nih hi, ka va han mawl tak." a ti vawng vawng mai.

Rum zet hian Rina chuan a melh hraw a, "I mawl tak hle mai, rawn hlap lo ta la min rek hlum dawn asin. Ka nunna i chhan tih hre ta che, i lo mawl tak tak a nih hi." a han ti deuh hrep a. Amir-a chu a han thaw hak a, "Top fighter a nih kha, champion lai anih kha. Engti kawng mahin i hneh dawn lo, tunah chuan..." a han ti ve hlur a.

Rina chu a lo khi suk mai, "Anih nakinah chuan ka hneh dawn tihna em ni? Amir, kha mihring khan damdawi a ei lai ka hmu chiang a ni. Kha thil a ei hnu khan a rawn chak vak alawm, ka hre chiang lutuk." a han ti leh khur khur a. Amir-a chuan vin deuh tak hian, "Aw ka hria, Necro a nih kha...Russia ram atanga an siam, mum khat pawh US Dollar nuai 5 ($500k) man lai a ni." a lo ti ve bawk.

Rina chu a han ding hluai a, "Damdawi a lo hman thin vang mai mai a nimaw, top fighter a lo nih theih?" a han ti nuah nuah a. Amir-a chuan a lu lo thingin, "Ni lo, thenkhat chuan an thih pui thin. Henry-a chu a taksa a fit tha a, a skills a tha bawk a. A taksa in a mil bik alawm, fighter nazawng tih chi pawh a ni lo." tiin a lo chhang a.

Rum zet hian Rina chuan Amir-a chu a melh a, "Kha mihring beih nan khan damdawi engmah ka mamawh ve lo, ka hlau lo emai." tiin a insehruh nasa mai a. "Engpawh nise khapa chauh kha an ni dawn lo, Pu Mukesh-a hian Necro damdawi hi fighter 3 chiah ei a phal, chupawh amah tibuaitute lak a hmanah chauh a ei tir thin." Amir-a chuan a lo ti leh a.

Rina chuan hriatthiam loh hmel tak hian, "Enge awmzia?" a lo ti hu mai. "A awmzia chu match an neih in, street fight emaw, main rooster ho inbeihna, ring chhungah te...tah kha chuan ei a phal bik lo, Razor...Mad Dog leh Henry-a te chiah hi ei a phal a ni." tiin Amri-a chuan a chhang a.

Rina chu a han ngawi vang vang a, "Damdawi chuan side effect a nei em?" tiin a han zawt a. Amir-a chuan a lu a lo bu nghal nghut nghut a, "A neih vang alawm, a nazawngin a fighter te hi a ei tir ngai lo. A chhan chu he damdawi hi a chak em a, pain killer a ni nghal bawk a ni." tiin a lo chhang leh a.

Rina pawh chuan a lu a bu nghat nghat mai, "Rina, kan dinhmun hi ala chhe rih lutuk. Engpawh nise, hmun dangah kan awm a ngai. Kan appartment awmna hi Pu Mukesh-a khan a hria a, chuvang chuan helai hmun hi chu kan tan a him lo." Amir-a bawk chuan a han ti leh a.

Rina chuan phawk hru hian a melh a, "Kan tlanchhia ang maw? Khawiah mah kan kal lovang, khamite lakah khan ka tlanchhe dawn lo. Mizo tlangval ka nih hi, vai mai mai lakah ka tlawm lovang." a han ti pung pung a. Amir-a chuan a chal dawm vang vangin, "Nilooo Rina, kan tlanchhe rei dawn lo. Tunah chuan kan tan a hlauhawm, Mumbai Don hlawhawm ber ber te zinga mi a nih hi, Pu Mukesh-a hi.." a han ti vin hlur a.

Rina pawh chu a han ngawi deuh vang vang a, "Anih khawiah nge kan kal dawn? Fighter thar ka ni ve tan dawn chauh va, ka bansan leh mai ang maw? Pawisa hlawh chhuah ka la duh alawm, thildang enge kan tih chuan anga?" tiin a han zawt a. Amir-a lah chuan, "Aw...chungte chu ka lo buaipui vek mai ang." tiin a chhang ve leh a.

*************************************

Motor hnungah chuan an thawmhnaw vel chu an dah a, chhuak tur chuan an inruahman mek a. Chutah Rina chu a han phu deuh zuk a, "Vawiina ka jacket lei thar kha verandah ah khan a zar daih a, ka theihnghilh daih. Ka han la leh lawk ang, motor chhungah lo awm rawh." a han ti a.

Hlauthawng rilru tak chung si hian, "Awle, mahse hmanhmawh la aw...Pu Mukesh-a te hi kan appartment lam pan hian an rawn kal ka ring tlat, kan fimkhur angai." Amir-a chuan a han ti khur dar dar a. Rina chu a tlan chho leh nghal a, Amir-a chu motor chhungah chuan a thu lut a.

Motor hnunglam ah chuan engemaw ri dup hi a hria a, a phu nasa kher mai. Rang takin a chhuak a, motor hnunglam chu ava enfiah vat a. MAhse tumah a hmu lo, mak a ti angreng kher mai. Let leh a tum chiah chu a hma zawnah chuan Henry-a a lo ding reng mai.

Amir-a chu a phu leh nasa ngang mai, mahse rang tak hian Henry-a chuan a hmui chu rawmawlin a hup sak a. Amir-a chu a zawi tial tial a, nikhawhrelovin a let ta der mai. Henry-a chuan Amir-a let reng mai chu a han en vang vang a, a bulah chuan Pu Mukesh-a chu a rawn phei a.

Amir-a chu a han en ve vang vang a, "Ka motor trunk ah va dah rawh." a han ti thum bul bul a. Henry-a chuan Amir-a chu a pawm lawp a, a kal pui ta daih a. Pu Mukesh-a pawh chuan a zui ve a, Amir-a chu an phuar hlawm a, motor trunk ah chuan dah in an khar hnan ta hmak mai.

***********************************

Rina chu a rawn chhuk a, "Amir...i sana i theihnghilh daih alawm. Hei ka rawn laksak nghal che...ka rei em?" tiin a rawn tawng thla nghal mawlh mawlh a. Mahse motor seat kawngka lo inhawng huah a hmuh chuan a ding chat mai, "Amir..Amir?" tiin a tlan thla nghal a.

Motor chhung chu a en a, mahse tumah a hmu ta hauh lo mai. A han hawi kual a, "Amir, khawnge i awm?" tiin a au vak vak a. Chutah motor hnunglam atang chuan Henry-a chu a rawn chhuak thut mai, mahse Rina chuan hnunglam a hawi avangin a hmu lo.

Fimkhur tak chung chuan Rina chu ava pan phei zel a, hnunglam atang chuan ava rek thut mai, rawmawl bawk chuan a hmui chu a han hup sak leh a. Rina pawh chu a zal nghal riai riai a, a thal ve ta tawp mai. Pu Mukesh-a leh Ajay-a te chu an rawn kal hnai a, "Main rooster ah pawh top 10 a ni pha hial ang ka ring, skills a nei tha reuh emai." Ajay-a chuan a han ti nuah nuah a.

Pu Mukesh-a chu a lo khi suk a, "Chutin ala hriat ngawt hleihnem, fighter tha tak tak hmachhawn tur ala ngah dawn chauh." a lo ti thung a. Ajay-a pawh chu a han nui ve suk a, "E taka, Amir-a saw engtin nge kan tih ang?" tiin a zawt a. Pu Mukesh-a chu a han ngawi vang vang a, "Nakinah kan buaipui dawnnia." tih ringawt chuan a chhang a.

Henry-a chuan Rina pawh chu a han pu leh ang lawp a, motor seat hnung lamah chuan an mut tir a, an phuar hlawm ve bawk. A hmui an tuam sak bawk a, Henry-a chuan a veng nghal a. Motor hma lamah chuan Ajay-a leh Pu Mukesh-a te chu an chuang a, tichuan chak takin an tlan a.

************************************

Rina chu a harh a, hall zau tak, thim reih ruih, light chhe te chauh eng vet vet, bal ve tak mai ah hian a lo awm a, chhuatah chuan a lo mu reng mai. A thu chhuak a, a kut chu hnunglamah awmin a lola inphuar reng a. Chutiagn bawkin a ke pawh phuarbeh a ni, a theih tawp chuan a han tal vak vak a.

Mahse hrui chu a hrawl lutuk tlat, a nghet em em mai bawk si. A hmui pawh tape a tuam a lo la ni bawk a, thei leh thei lo hian a kut chu hmalama dah ngei a tum ngar ngat a. A ke pahnih chu a han khai kang vak a, a tawp a tawpah chuan a lut chu hmalamah a dah thei ta.

A hmui tuamna chu a phelh nghal a, a ke phuarna pawh chu a phelh thei mai a. Mahse a kut phuarna erawh chu phelh a har tak zet, a han seh vak vak thul. Chutia phelh a tum buai lai tak chuan a mal te te hian light chu a rawn in on a, a rawn eng telh telh mai.

A han eng chhuak vek mai chu hall chhung chu a lo zau ngei mai, chutah kawngka chu a rawn ri rak a. Mumbai Police ni awm tak, mi panga vel chu an rawn lut a. Rina chuan mak ti tak hian a lo en hu mai, a bul an rawn thleng chuan an ding thap a. Rina chuan a hrethiam lo takzet, "Enge thil awmzia, khawnge ka awm?" tiin a han zawt hlawm a.

Inspector chu rawn pen chhuakin, "Lalrinzual, Russian tlangval Makar Volkov-a tual thihna ah nang hi pawikhawihtu a puh i ni a, chuvang chuan man i ni e." a ti ta mai a. Rina chu a ka hau ringawt, "Eng a? Makar Volkov...chu chu tunge ni a?" a han ti leh hu mai a.

Inspector chu a khi suk a, "I hre tawh nange? Nizan lawkah Makar Volkov nen in intibuai a, tichuan a thih thlengin i hnek hlum thak a nih kha...video pawh a awm vek alawm." tiin phone a phawrh a, video pakhat chu play in Rina chu a entir a. Rina chu a thaw hak mai, "Inspector, kan intibuai a ni lo. Kan inbet a, street fight a ni. Chuan ka that lo bawk, a la dam....min bum an tumna mai mai a ni." tiin a insawi fiah nghal mawlh mawlh a.

Inspector chuan thlalak pakhat chu hmet chhuak lehin, "A nih leh hei hi enge awmzia ni ta ang?" tiin Rina chu a hmuh tir leh a. Rina chuan mak a ti kher mai, Makar-a ruang thalak niin mitthi dahna hmuna a mu lai thlalak a lo ni. Rina chuan a hrethiam lo kher mai, "Ni lo...thil awihawm loh lutuk a ni. Ka thah a ni lo, tu emawin min puh a ni." tiin a mangang kher mai.

Inspector chuan hand cuff a la chhuak a, "Lawyer i neih chuan i vannei mahna, abak chu court ah kan sawi dawnnia. Lo kal rawh le, min zui angai." tiin ava pan phei a. Mahse Rina chu lo hnung tawlhin, "Ngawi lawk teh u, tiang ngawt chuan min man thei bik lovang." a lo ti vin thak mai.

Police dang ho chuan tiang an rawn phawrh ta sap sap hlawm a, "Tharum hmanga hnuh chhuah nge i duh, thawih taka min rawn zui?" tiin Inspector chuan a pistol phawrh chhuakin a han tin a. Rina chu a han maimitchhing vang vang a, "Inspector, tihnat che u ka duh lo ania. Ka thusawi hi ngaithla rawh u, Makar-a kha ka thah a ni lo." a han ti zawi leh sap a.

Inspector chuan a hmaiah chuan a beng hawi sawk mai, "A ve khanglang chuan...nang hian min khawih anga maw?" a ti khur khur mai. Rina thin a thawk ta tlat mai le, rum zet hian a rawn hawi let a. Inspector chu hnai set sawtah chuan a en a, chutah a chal chuan a tauh ri ta chawk mai le.

Inspector pawh chu a eu dawrh a, a pistol ken lai chu thlauhvin a kal pai khut khut mai. Chuveleh Police dang ho chu an rawn tlan a, Rina chu rawn vuak an tum ta. Mahse a kut pahnih phuar beh a ni chung pawh chuan Rina chu an hneh lo hle a, a lo tlawh thal tawp tawp hlawm mai.

Inspector chuan pistol chu a chhar a, Rina chu a tin lehnghal. Mahse Rina chuan midang ho a lo beih mek avang chuan a che kual zawk zawk reng a, Inspector chuan a tin fu hleithei tlat lo. Ring tak hian, "Che tawh suh, che tawh suh ka tih chu. A nih loh chuan ka kap ang che, ding nghal rawh." a ti vak vak ringawt a.

Rina chuan police dang pali ho chu a thal fai ta vek mai, chutah Inspector chu ava melh leh a. Inspector chuan tin ran chung hian, "Ka kap tak tak dawn che, min rawn pan tawh suh." a ti khur dar dar a. Rina chuan a hlau lo kher mai, ava tlan ta thut mai a.

Inspector pawh chuan duh thlan tur dang nei hek lo, silai chu a hmet puak ta dur mai. MAhse a hmeh puah hma chiah chuan Rina chu boruakah chuan a invawrh bin phei a, silaimu chuan Rina kut phuarna hrui hrawl tak mai chu a fu zawk ta hlauh mai. Rina chu a ding leh chat a, hrui chu a la thla nghal sawk sawk a.

A khi suk a, "I kap thiam chat chat hle mai." tih pah chuan ava zuang phei leh a, Inspector dulah tak chuan ava tlawh chawrh mai a, ani pawh chu a thal tual mai. Police dang pahnih an rawn tho leh a, mahse awlsam tak hian Rina chuan a lo thal rang leh kher mai.

A hawi let leh a, tuemaw hian a awmah a rawn tlawh pawp mai. Rina chu a let phei tawp tawp a, na a ti ngang mai. A han hawi chhuak leh a, Sikh palian em em mai, sek zet leh hmul ngah tak mai hi a lo ding luau mai a. Ft 6'7 vel lai a sang a ni a, a hming chu Balvinder Singh niin Punjab mi a ni a, a ring name chu RAzor a ni.

Tichuan a hnungah chuan Ajay-a, Mukesh-a leh Henry-a te chu an rawn kal ve bawk a. Rina chu a awm dawm vawng vawng chung chuan a rawn tho leh a, "Tunah chuan ka hrethiam ta e, nangmahni hi ani maw...in thil tih vek hi animaw?" tiin a han khi suk a.

Mukesh-a chu a nui huah huah a, "Naupang, khatia ka kal liam tir mai che kha i ring em ni? Tunge ka nih hi i hre lo a nih hi, tunah chuan ka thuhnuaiah i awm tawh tih hria ang che." a lo ti a. Rina chuan thinrim tak hian, "Khawiah nge Amir-a a awm?" a han ti khur khur a.

Mukesh-a chuan cigar chu a han t(r)an leh a, "Amir-a..Amir-a chu fakin awm rawh se. Amah vang hian alawm tunah hian kan man theih che, Amir-a vang alawm." a han ti chu Rina chuan mak a ti kher mai. A ngawi vang vang a, "Amir-a...Amir-a'n min bum amaw?" a ti nuah nuah mai.

Ajay-a chu rawn tawng ve in, "A bum che angah i ngai tiraw, tunah khan? Hahaha...chutiang lam a ni lo, Rina. Amir-a khan in address kha kan bulah a sawi a, tichuan kan lo man ta che u a ni." a rawn ti ve a. Rina chuan phawk hru hian, "Anih chuan khawnge Amir-a chu...ka hmu duh a ni." a han ti leh a.

Mukesh-a chu a khi suk a, "Thu awih phawt la, tha deuh khan min rawn zui rawh. I awmdan tur chu kan hrilh chawp dawn che nia, tichuan Amir-a chu i hmu thei ang." tiin a chhang a. Rina ngaihdan chu a ni lo nasa mai, "Nangni phalna ka lak angai lo, khawihah mah ka kal bawk lovang." a lo ti zawi sap mai.

Nui chung hian Pu Mukesh-a chuan a lu a han bu nghauh nghauh va, "A tha e, RAZOR...sawisa rawh le." a han ti deuh vak a. Razor pawh a lo khi suk mai, a tawnzau hak lai chu a han pawt thler a. A sek phiar ngat ngat khawp mai, hlauhawm tak a ni.

Rina chu ava tlan a, kick tumin a han zuang vak a. Mahse a ban sei tak mai chuan Rina awmah tak a lo hnek ri dup mai, Rina pawh tukhum vaw chawrh chuan chhuatah chuan a tla thum dut mai a. Na a ti kher mai, Razor-a chuan a kawr awmah chuan a tham tho lawp a, a paih leng lawp mai.

Rina chu a let phei tawp tawp a, a kiu te chu a pilh hrup tawh. Thei leh thei lo hian a rawn ding chhuak leh a, Razor-a lah chuan a rawn pan leh a. Rina chuan a hmaiah a lo hnek ri chawk mai a, mahse Razor-a chuan na a tih hmel loh kher mai. A lo la nui suk zui, Rina pawh chuan mak a ti angreng khawp mai.

Hnek leh a han tum a, mahse Razor-a chuan a kut chu a lo man sak a. A rek kang ta vu vu mai, tichuan bang deng dawt khawp chuan a theh leng leh ta dawr mai a. Rina chu chhuatah chuan a tla bawk thlawp mai a, a ka atang chuan thisen a rawn chhuak hial tawh.

RAzor-a chuan ala duh tawk lo, a pawm kang lawp a. A kut khinghnih chuan a chawi kang ta vu vu mai a, chhuat laiah chuan a vawt phei leh tawp a, Rina chu a let phei leh ta tawp tawp mai. A chau tawh takzet, a thaw hrawk hrawk a. Razor-a chuan va pan leh a tum a, "RAzor, a tawk e." Pu Mukesh-a chuan a rawn ti a.

RAzor-a pawh chu a ding a, Pu Mukesh-a chuan Rina chu ava pan hnai a. Rina chuan a lo la melh rum ngang mai, "Rina, Amir-a hi ka duh chuan ka that thei tih hria ang che. Nung dama i hmu duh a nih chuan ka thu chu zawm mai rawh, TOP PUNCH main rooster ah chuan i tel tur a ni." a han ti a.

Rina chu muang chang chuan a rawn ding chhuak a, "Enge ka tih ngai? Chuan police te khan jail-a dah min tum si a, enge awmzia?" tiin a zawt a. "Ni e, jail i tan a ngai alawm. Chu jail hming chu Black CAstle a ni a, chuta jail tang thenkhatte chu Underground Battle ah an tel a, chu chu Top Punch...ka enkawl mek hi a ni." tiin Pu Mukesh-a chuan a chhang a.

Rina chu a han thaw halh halh a, "Pawisa ka hlawh dawn em?" a han ti leh a. Pu Mukesh-a pawh a khi suk ringawt, "Tehreng mai, street fight ai hian a tam daih zawk ang. Chuvang chuan min rawn zui mai rawh, abak chu a hmunah kan inhrilhfiah dawn nia." tiin a lo chhang leh a.

Rina chu a rawn bai phei auh auh va, "Ka pawm e." a ti zawi sap a. Pu Mukesh-a pawh a thaw huai mai, a nui nghal var var bawk. Rina lah chuan Razor-a, Balvindar-a chu a han en ang vung vung a, a hmaiah chuan chil a han chhah khum leh kher a. Razor-a insum hman lo chuan na em em hian a hnek siah mai, nikhawhrelovin Rina chu a let der mai a.

Mukesh-a chuan rum zet hian Razor-a chu a en a, "Enge khatia i tih kher a?" a han ti vin thak a. Razor-a lah chu lungawiloh hmel tak hian, "I hmuh kha, chil min chhak khum a nih kha." a lo ti vin ve hlur mai. Pu Mukesh-a chu a thaw hak a, "Motor ah rawn dah ang che." tiin a kalsan a, Razor-a pawh chuan lungawi lo tak chuan Rina chu a pawm nawlh a, motor lam pan chuan a pu phei a.

*************************************

Rina chu a cell tur lam pan chuan a thawmhnaw kengin a kal phei mek a, jail tang dangte chuan vai tawngin an lo au pawr nasa hlawm khawp mai a. A cell chhungah chuan a han lut a, a cell-mate tur chu ava hmu ta. Rin loh tak mai hian naupan hmel tak hi a lo ni a, a hmel en reng reng pawhin mi pawi a sawi loh hmel khawp mai.

Rina pawh chuan a han en hu a, "Hello...Varun-a ka nia, i cell mate tur ka nih hi." tiin chibai a lo tum a. Mahse Rina chuan ngawi rengin a en ringawt, inthlahrung tak chuan Varun-a chuan a kut chu a dah thla zal zal a. A han nui lui suk a, "Ka tawng i hrethiam lo ami, khawi atanga lo kal nge i nih a?" tiin a han zawt leh a.

Rina chuan ala chhang chuang lo, khum chhawng chu a han en vang vang a. Rina hian a hriatthiam loh vangin a chhang lo pawh a ni mahna, a chhan chu Varun-a chuan vai tawngin a be miau a ni. Varun-a bawk chuan, "A chungah kha chuan ka mu a, a hnuaiah i mut a ngai ang." a lo ti leh a.

Rina chuan a han melh hrawk a, "Aaa..ihh..i duh chuan a chungah pawh khan i mu thei tho a nia." Varun-a chuan a lo ti leh nghal vat a. Mahse Rina chuan a hnuaiah zawk chuan a thawmhnaw te chu dah in khum chu a han phah tha nghal mawlh mawlh a, "Hindi i thiam lo em ni?" tiin Varun-a bawk chuan a han zawt leh a.

Rina chu khumah chuan a thu a, "English i thiam em?" tiin a zawt ve ta a. Chuveleh Varun-a chu a han nui vel huah huah a, "Aww...ka tihpalh lutuk. Hindi i thiam emaw ka tia, english ka thiam alawm." a lo ti leh nghal zung zung a. Rina chu a han thaw hak a, "Mut hahchawlh ka duh, min be hrih suh ang che." a ti hmuk a.

Khumah chuan mu in a maimitchhing nghal vang vang mai, "Aaahh..awle, ka..ka tibuai lovang che." Varun-a chuan a han ti bah deuh nuai a, thutthleng te takte ah chuan a thu a. Rina muhil chu a han en vang vang a, "Tualthah vangin maw i lo luh?" tiin a han zawt leh hram a.

Rina chuan rum fe hian a melh a, "Hehe..an sawi ka hria a. Tualthattu ang chi ho hi chu a hranpa in an khung thin sia, ka bulah i rawn awm sia. Chuvang mai mai mawle, a ho lutuk. Min...ih, min thah ve loh chuan a ho lutuk." Varun-a bawk chuan a han ti leh nghal zuah zuah a.

Rina chu a thaw hak a, mahse a chhang let chuang lo. a maimitchhing leh a. Varun-a chu a han ngawi ang vung vung a, "Ka mu ve mai ange aw.." a han ti leh hram a, tichuan a chungah zawk chuan a mu ve a. Rina chu a rawn meng a, a la naupan hmel si a, chutia jail tang a ni mai chu mak tiin a ngaihtuah zui vauh vauh mai.

*******************************************

Zing a ni a, ground ah chuan tang hote chu an tei suau suau hlawm a. Rina pawh chu amah chauh chuan a thu vauh vauh va, a melh ngai chu a melh ran mai. A bulah chuan VArun-a chu a rawn thu a, Rina chuan a lo melh no lo kher mai. An ngawi dun vang vang a, "Dar 7 ah zing chaw kan ei thin a, rin ai takin a tui lo hran lo asin." tiin a han khi ang vur vur a.

Rina chuan tum hmuk hian, "Ka zawt che ami?" a lo ti hmuk mai. Varun-a chu a ngawi chiang ngei mai, "Ka biak loh che chuan zawhna min zawt chhen tawh suh." Rina chuan a han ti leh khur khur a. Chutia an inbiak lai vel chu jail tang ve tho, gang pakhat...member pasarih te chuan ral khat atang chuan an lo en reng mai a.

Rina chuan a khawngaih leh deuh nge ni, "Tual ka that lo, thildang vanga lo tang zawk ka ni." tiin a be ve ta a. Mak tih hmel tak hian Varun-a chuan a en hu mai a, "Tualthah vang an tiin ka hre bawk sia, enge awmzia? Engvanga lo tang nge i nih, a nih chuan?" tiin a zawt nghal a.

Rina chu a han thawk hak a, "Top Punch i hria em?" tiin a zawt a. Varun-a chu a han inngaihtuah vang vang a, "Lei hnuaia insualna hmun, an kalna thin khu ani lawm ni?" tiin a lo zawt let a. Rina chu a khi suk a, "Leihnuaiah a awm tih pawh ka lo hre hleinem, engpawh nise...khu battleground ngei khu a ni ka sawi chu." tiin a chhang a.

"Anih chuan engtin zel?"

"Khumite zingah khuan ka tel ve dawn a ni."

"I insual ve dawn maw?"

"Fighter zinga mi ka ni ve dawn...mahse ka duh vanga tel ka ni lo."

"Enge i duh vanga tel i nih loh na?"

"KA thianpa nun chhan nan, chuvang chauh va tel chu ka ni." a han ngawi deuh dat a, "PAwisa nen." a han ti zawi sap a. Varun-a chuan a lu a bu nghat nghat mai, "Anih nang engvanga tang nge i nih?" tiin Rina chuan a han zawt ve leh a. Mahse a chhan hma chuan gang rualte chu an rawn kal hnai a, an boss ber chuan VArun-a tukhumah chuan a rawn beng pawp mai.

Varun-a chuan a hlauh hmel em em a, engtin mah a khawih let ngam lo. Rina erawh a ngaihdan a lo ni vak lo, chumite chu a lo melh rum ngang mai. Boss ber chu Varun-a bulah chuan a rawn thu a, a mal chungah chuan a ke bal tak mai chu a han hlang a. Nui vun chung hian, "Han hmet teh le, BAwiha. Thian thar i lo nei animaw, tunge a hming te min hrilh ve la?" a rawn ti vel ham ham a.

Hlauh hmel tak hian, "Rina a nih hi....Rina." a lo ti khur dar dar a. Gang Boss leh a hote chu an in en a, an nui dar dar hlawm mai. Rina chu a thu tum deuh hmuk a, chumite chu en pawh a en lo. Boss chuan nui chung hian, "Rina maw....a hming ava mak ve!" tiin Rina chu ava en a.

Ring tak hian, "Hey, nangkha...enge i hmingpum? Khawi atanga lo kal nge i nih a....Indian mi pawh i va ang si lo ve?" tiin hmuhsit hmel tak chuan a han au khum vak vak a. Rina chu a hawi eih lo, hrelo ang hmiah chuan a awm reng a. Varun-a chu lo inrawlh vatin, "English chiah a thiam a, hindi a thiam lo." a lo ti a.

Chutah Boss chuan Varun-a chu a tukhumah chuan a han beng bu leh lawp a, "Enge i lo tawng ve a, lo ngawi mai mai rawh." tiin a vin hrep mai. Tap deuh tuau hian Varun-a chuan, "Sorry Boss." tiin ngaihdam a dil nghal mawlh mawlh a. Boss chuan Rina chu a han en leh ang ren rawn a, "English kan thiam ve der mai silova, engtin nge kan inbiak tak ang? English lo thiam dang i nei em? Urdu...Bengoli....Tamil..Telugu...Assamese...Bojpuri..eng ber nge i thiam?" tiin a han au khum leh vak vak a.

A naute chuan hmuhsit hmel tak hian an lo nuih tiah tiah bawk, mahse Rina chuan a la chhang chuang lo. En pawh a en lo, "A pawi love, hei..kan nau, kan duata hi a awm alawm. Min lehsak zel anga a nimai alawm...tiraw Duatpui...kid thar i rawn siam a, i ti lawmawm hle mai." tiin Boss chuan Varun-a chu a han beng leh pawp pawp a.

Rina chuan chiang fek fawk hian, "Vawikhat han beng leh teh, i ha hmai kha a bal nghal ang." a rawn ti a, mizo tawng ngeiin a sawi bawk. Boss chuan hrethiam hek lo, "Engmaw i sawi a?" tiin a ding nghal a. Rina pawh chu a rawn ding ve a, "He naupang hi vawi khat pawh han khawih leh teh, i ha hmai pahnih kha i chan nghal ang." mizo tawng bawk chuan a han ti leh a.

Boss chu a khi suk mai, "Hey naupang, enge a sawi hi han let teh." tiin Varun-a chu a han en a. Mahse Varun-a chuan mizo tawng a lo thiam bik si lo, "Enge a sawi ka hrethiam lo, Boss." tiin a lo chhang a. Boss chu a thinrim ta mai, "Engmaw i sawi a? I inla engemaw ve khanglang em ni?" tih pah chuan a beng leh siah mai.

Varun-a chu a tap pur tawh, "SAwi rawh, enge hepa hian a sawi?" tiin ben leh a tum a. Rina chuan a kut a lo man sak a, "Ka hrilh lawk che a ni lawm ni?" tih pah chuan Boss ha hmai pahnih bal hlawk khawp chuan a hnek ta siah mai, Boss pawh chu a thal nghal tawp a.

Rina chuan Varun-a chu a en a, "Tah sawn lo va awm rawh." a han ti vin thak a. Varun-a chu rang takin a tlan nghal a, Rina chuan a kut chu a han elh ri tuar tuar a. Gang rualte chuan an hual ta thap mai, mahse awlsam lutuk hian Rina chuan a thal fai nghal deuh vek mai a.

Jail tang dang ho pawh chuan an rawn hmu a, an rawn phur hlawm nasa mai. Rina chuan gang ho chu a sawp tak meuh meuh chuan a sawp hrep hlawm mai a, mahse reiltoeah guard an rawn kal a. Rina chawnah chuan pakhat chuan a rawn hlap pawp mai, Rina pawh chu a thingthi hnawk a.

An hnungkhirh nghal a, hand cuff bun tirin an hruai phei nghal a. Office pakhat ah chuan an thut tir a, "Tikhan che lo khan lo awm ang che..tang thar ve chauh si, buaina te i siam nghal le...sawisak deuh i ngai a ni." tiin guard pakhat chuan a han vau khur khur a, an chhuahsan ta a.

**********************************

TO BE CONTINUE