MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 3

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 3

******************************

(Pics ka dah thin ho hi anmahni tak tak tihna a ni lova, ka ziah laia ka imagine atanga a nih duh hmel ber ber ho google images atanga ka thlan chhuah mai mai te an ni tih kha min lo hriat pui ula. An incheina leh an hmel zawng zawngte nen a inhmeh ho ka thlang mai chauh a ni a, chhiar pah a mit tih tlei nana dah mai mai chauh ka ni tih min lo hriatsak dawnnia.)

**********************************

Buka chu a han thle ri deuh tuar tuar a, Rina lam chu ava pan a. An inveh den den a, Buka chuan a rawn vai zeuh va, mahse Rina chuan a kutin a lo dang a. A kut chu a tuai deuh vat vat a, Buka kutthlak chu ana hle a ni tih a hrethiam nghal bawk. Rina chuan a nak ah kick a han tum a, mahse Buka chuan a ke chu a lo ben thlak sak hman tlat mai.

"Tang ta che, naupang.." tiin Buka chuan a han nuih vel a, Rinzuala erawh chu a ngawi reng thung. Chutah Buka chuan Rina lu ah chuan pet a tum a, a ke chu a han khai vak a. Mahse Rina chu lo kun hmanin Buka ke chu a pet sak pawp mai, Buka pawh tukhum vaw chawrh chuan a thal thuai mai a.

Amir-a lo lawm lutuk chuan, "Yess...a tha Rina, sawp hrep rawh." tiin a lo au vak a, Ajay-a chuan a lo melh rum nasa mai. Buka chuan a lu chu tuai vut vut chung hian a rawn tho leh a, a thinrim hmel kher mai. RAwn tlan thutin Rina hmaiah chuan hnek tumin a rawn vai buan buan a, Rina chu a lo indang ve char char bawk.

Mahse Buka kutthlak a nat em avang chuan Rina kut pawh chu a na ve hle a, a indang zo ta bik lo. Buka chuan a mit kovah chuan a hnek sak siah mai a, Rina pawh a thle sawk mai. A lu a hai ve deuh chhawk a, chu chu remchangah la in Buka chuan a dulah a khup chuan a do leh siah a.

A lu ah chuan a kuai bet tlat bawk, chumi pah chuan a khup chuan Rina dul chu a do siah siah mai. Rina chuan a chawi thut a, leiah chuan a paihthla ri dup mai. Buka chu rang takin a rawn tho leh nghal, Rina chuan lo hnek a tum nghal a. Mahse Buka chu lo indangin Rina bekah chuan a hnek ri chawk mai a, lehlamah chuan a hnek leh nghal.

Vawi li vel lai mai chu Rina biang dinglam leh vei lam chu a in ri chhawk sawk sawk mai a, a ding hleithei tawh lo. Chutah Buka chuan a la duh tawk lo, Rina chu a chawi kang lawp a. Leiah chuan a paih thla thum ve ta dut mai, Rina chuan na a ti takzet. Mipui chu an au dur dur a, "BUKA...BUKA..." tiin an au rual a.

Buka lah chu inla pawr tak hian a hawi kual a, a han au vak vak a. Rina chuan a chil a han chhak pharh pharh a, "Ve mai mai chuan..." tiin a phun sap a. A rawn tho leh ta, Buka chu a han leh hawi a. Rum zet hian Rina chuan a lo melh run mai, Buka chu a han khi suk a.

Kut a han beng vel a, Rina chu ava pan phei a. Chutah rang zet hian Rina chuan a bekah chuan a lo hnek siah mai, Buka chu a inring hman lo nasa. A hnawng tawlh dawrh a, mak a ti lutuk chu a hawi a hru ringawt. Rina lah chuan mit khap miah lo hian a lo la en ran mai a, thinrim zet hian Buka chuan ava pan a.

Hnek a han tum ve a, mahse Rina chuan lo bumin a hnarah chuan a lo hnek sak leh siah mai. Buka chu a dak awrh mai a, a hnar chu a rawn thi nghal zawih zawih a. Thinrim tak hian a han au vak a, Rina hnek tum chuan a va vai leh ta buan buan mai. Mahse Rina chuan a lo bum zat zat a, chutah a ban pahnih chu a man sak thut a.

A elh sak ta vak mai, Buka na ti lutuk chu a t(r)e ring nasa mai a. Rina chuan Buka chalah tak mai chuan na em em hian a han tauh chawrh a, Buka chu a hai chhap mai. Rina chuan a thlah a, Buka chu a kal pai ta tuang tuang mai le. Rina chuan na em em hian a han hnek ri thlawp thlawp a, vawi 6 vel lai a hnek hawi sawk sawk hnu chuan Buka pawh a tlu ta tual mai.

Tho leh tur a awm tawh lo, nikhawhrelo chuan a awm ta der mai. Mipui ho pawh chuan mak an ti nang aniang, an ngawi thup mai a. Chutah ring tak hian Amir-a chu a rawn au vak a, mipuite pawh chu an au chhunzawm ve nghal bawk. Amir-a chu ava tlan phei a, "A chak zawk chu Rina a ni, ka fighter a nih hi." tiin a intithei kher mai.

Ajay-a pawh chuan mak ti tak hian Rina chu a en hu mai a, "Engtin nge a thlen theih zawk?" a ti nuah nuah mai. Mipui ho chuan Rina hming chu an chham rual thup thup mai a, Ajay-a chuan ava pan a. Amir-a chuan intithei tak hian, "Ka sawi reng kha...Boss, fighter tha tak a ni ka tih kha. Ka train tha alawm, min ring tawp rawh ka tih kha." a lo ti nghal chiam chiam a.

Ajay-a chuan Rina chu a han en vang vang a, "I laktlak dawn riau mai, sum tam zawk hmuh i duh anih chuan ka number hi la thla la, i inchhir lovang." a han ti a. Rina chuan a kut rawn dawh chhuakin, "Khawi ka pawisa tur, Buka an bet-na zawng zawng nen, a vaiin nuai 1 leh sing 2 a ni." a lo ti daih mai.

Ajay-a pawh chuan mak a ti angreng kher mai, "Awle a tha e, kha le i pawisa chu.." tiin cheque a phawrh a, a sign thlap bawk a. Rina chuan a lo la a, a kal nghal hmak mai. Inthlahrung tak hian Amir-a chuan, "Hehe Boss, lo hrethiam hram hram rawh aw...a hun tawn hi a harsa ve lutuk a." tiin a lo sawi mawi nghal char char a.

Ajay-a chu a han thaw hak a, "Amir, Rina kha Top Punch Main Rooster atan ka duh a ni." a lo ti daih mai. Phawk hru hian Amir-a chuan Ajay-a chu a en a, "Boss, mahse ani hi chu ka fighter ania. Ka business ka tan ve dawn chiah a, chubakah hetiang tur hian contract kha ka sign pui lo asin." a han ti nuah nuah a.

Ajay-a chu a khi suk a, "Engzah in nge hralh i phal ang? I tana hlawk vek tur a ni tih hria la, main rooster ah a tel lo anih chuan tiang streetfight mai mai tur atan chuan a uiawm deuh hret ka ti a ni." a lo ti leh a. Amir-a chu a ngawi vang vang mai, "Ka lo inngaihtuah ange." tiin a kalsan ta a.

*************************************

Motor ah chuan Amir-a chu a lut a, "Enge kha putar khan a sawi a?" tiin Rina chuan a lo zawt nghal a. Amir-a chu a han nui lui deuh suk a, "Engmah ni love, kha kha Top Punch Board member zinga mi ania. I that zia a sawi a nih kha, a fak khawp mai che." tiin a lo chhang a.

Rina chuan rum fe hian Amir-a chu a melh a, "A pawl zawm turin min ti em ni? I lak atanga keimah hi min lasak a tum tiraw?" tiin a zawt leh a. Amir-a chuan sawi tur reng a hre lo, "Chutiang tur chuan contrat ah khan engmah a inziak lo, tuna ka awmdan hi ka duhdan pawh a ni. Midang ka zawm leh zawm loh chu ka thu thu a ni, a chiang em?" Rina bawk chuan a han ti leh khur khur a.

Amir-a chuan a nuih tlawn a, "Nia..nia, Rina...kha chu nakinah kan sawi dawn nia. Engpawh nise bank ah kal ila, pawisa i va la chhuak teh ang." tiin thil dang a sawi pui nghal vat a. Rina chu a han thaw deuh hak a, "Engzatin nge kan insem dawn...50-50 bawk em ni?" a lo ti leh a.

Amir-a chu a han ngawi vang vang a, "Ka tawng che hi ka lawm, ka vannei hle bawk in ka hria. Chuvang chuan tun tum chu sing 7 hi chang la, keiin sing nga hi ka chang mai ang." tiin a chhang a. Rina chu a khi suk a, "Ka lawm e, Amir." tiin a chhang a. Motor chu Amir-a chuan a start a, bank lam pan chuan an kal ta a.

An tlan lai chuan Amir-a phone chu a rawn ri a, "Hello Sudeep Bhai, enge ni ta?" tiin phone chu a pick up nghal a. Sudeep-a hi Top Punch street fight ah hian manager zinga pakhat a ni ve a, fighter pawh pathum lai a nei a ni. Sudeep-a chu a rawn nui huah huah a, "Pu Ajay-a'n min rawn phone a, nizan lawkah i fighter thar chuan KAran-a a hneh zawh hnuah tun lawk khan Buka a lo hneh leh tih ka lo hria a.." a rawn ti a.

"Nia, hei ka fighter thar hi Mizoram ami ania. Fighter tha tak a ni, ka chhuang ania." inti thei tak chuan Amir-a chuan a han ti vel a, a nui deuh vur vur reng mai. "Ka lawmpui lutuk che, theih tawp i chhuah a...tunah chuan fighter tha i tawng ve ta anih kha." Sudeep-a chuan a rawn ti leh a.

"Ka lawm e, Bhai...a hrim hrimin tinge min rawn phone a?"

"I fighter kha ka hmu ve duh a ni."

"I la hmu em em ang, Bhai. Mahse tunah chuan kan buai deuh va, nakinah ka la hmuh tir ang che."

"Nilove Amir, a hranpa a hmuh ka duh lo."

"Anih enge i sawi awmzia?"

"A fighting skills ka hmu duh a ni."

Amir-a nui hmel chu a tawp chat mai, "Bhai, a zawnin vawi hnih ngawt a opponent a nei tawh a. Tunah chuan ka fighter hi chawl ve se ka ti a ni, min hrethiam rawh." tiin a chhang a. Sudeep-a chu a han thaw deuh hak a, "Ka fighter pathum te hi vawikhat bet manah cheng nuai khat zel an ni tih i hriat kha, lo inngaihtuah chiang ang che. Zanin ah, dar 11 ah...garage ah nang leh i fighter hmel hmuh ka lo inbeisei ang." tiin phone chu a dah hmak mai.

Amir-a chu a inngaihtuah vung vung a, an tawng hre lo mahse Rina chuan thil awmzia a lo man nghal vat a. Amir-a chu a han en vang vang a, "Min challenge an awm animaw?" a ti nghal nalh mai. Amir-a chuan rang tak hian, "Nilove Rina, chutiang lam engmah a awm lo." a lo ti nghal vat a.

Chiang kek kawk hian Rina chuan a han melh a, "Amir, zep kual angai lo. Min hrilh rawh, tunge a nih?" tiin a han zawt leh a. Amir-a chuan a zep ta bik lo, "Sudeep-a ania, Top Punch Street Fighter te zinga fighter tha hlang pathum neitu ania. An man pawh a to, challenge mai mai chi an ni lo." tiin a chhang ta a.

"Chuan...vawikhat bet ah engzat nge a chhiar?" tiin Rina chuan a lo zawt leh nghal a. Amir-a chuan zawi sap hian, "Cheng nuai khat zel, mahse hneh loh an la nei mang lo. Heng a fighter pathumte hi Mumbai fighter top 10 zingah an tel vek a ni." tiin a lo chhang leh a.

"Chuan sawi zel rawh, enge Sudeep-a chuan a rawn sawi?"

"Zaninah Battle Dround garage ah lo kal turin min ti a, mahse kan kal lovang."

"Engvangin maw kan kal loh teh lul ang, pawisa hmuhna tur a nih chu?"

"Rina, i indim deuh hlek chu angai a ni. Tunah pawh hliam i tuar mek a nih kha, i mit ko te kha a kak nasa lutuk. PAwisa hmuhna a ni tih chu ka hria, mahse i taksa kha ui ve deuh rawh." tiin Amir-a chuan a han hrilh mawlh mawlh a. Mahse Rina chuan a thuthlukna chua  sawh sawn duh lo, "Kan kal ang, cheng nuaikhat te chu pawisa tam tak alawm a nih." a ti leh ta tlat mai le.

Amir-a chuan a lu a han dawm vang vang a, "Rina, garage ah hi chuan hmanraw hman phal a ni. An bula hmanrua an hmuh hmuh chu fighter ten an hmang thin, thihna pawh a thlen phah fo ania." mangan hmel tak chuan a han ti leh a. Rina chu a khi suk mai, "Anih phei chuan ka chance a tha hlei hlei a nih chu.." a lo la ti ta deuh deuh va.

Amir-a ngaih chu a ngam hlawl lo, "Cheng nuai khat man an ni a, mipuite phei chuan an bet bawnra thei lutuk. Zan kahtah nuai fe te an hlawh thin, chuvang chuan fighter thar phei chu kal chi inla ni lo." a han ti chu Rina ngaihdan a ni vak lo kher mai. Rum fe hian Amir-a chu a melh a, "Anih chuan i fighter hi min ring tawk lo tihna em ni?" a ti ta khur khur mai le.

Amir-a chuan a mit a han chhing vang vang a, "Nilo, ka sawi awmzia i man lo a nih kha. Tunah hian cheng nuai khat lai bet tur chuan ka pawisa neihin a tlin hrih lo, hei aia tenau atangin kan la t(r)an chhoh bek bek angai dawn. Tunah pawh i kal thui tawh lutuk, kan fimkhur deuh a ngai a ni." tiin a han hrilhfiah leh mawlh mawlh a.

Rina chuan a hma zawn chu enin a nui sak a, "I pawisa neih in a tlin lo anih chuan ka pawisa hlawh ho kha engmah ka la hmang hleinem, ka lo chaklo a nih pawhin ka pawisa nena belh khawm chuan nuai khat chu a tling mai ang." a ti leh ta tlat mai a, Amir-a pawh chuan a hnial peih ta lo.

*********************************

Top Punch Fight Club neitu, Pu Mukesh-a chu a room nuam leh zau takah chuan thutthleng mawi leh nalh em em maiah hian a thu a. A bulah chuan nula chhelo tak tak pali vel an awm bawk, a room kawngka chu a rawn inkik dat dat a. "Lo lut rawh." tiin a lo chhawn vat a.

Ajay-a chu a rawn lut a, Pu Mukesh-a bulah chuan a rawn thu a. Mukesh-a chuan a lo en vang vang a, "Buka chu a harh chhuak tawh em?" tiin a han zawt a. Ajay-a chuan a lu thingin, "La harh chhuak lo, engtikah nge a harh chhuah dawn hriat ala ni lo." tiin a lo chhang a.

A ipte atang chuan Pu Mukesh-a chuan cigar lian tha nelh nawlh hi a phawrh a, a hmawr chu cigar cutter chuan a han chep chhum hmawk a. A han zu khu hluah hluah a, "He naupang Rina hi...engtin nge Amir-a te ang ber kher hian a hmuh zawk le? A takah kha chuan ka hmu ve ngei tawh a, a vawikhat fight naah Karan-a ber kher ala hneh zui a, a chanchin hriat i nei em?" tiin a han zawt leh a.

"I hriat chin bak kha ka hre bik lo, Boss. Mahse zanin hian garage lamah Sudeep-a'n a cho a ni awm a, Amir-a'n min rawn phone zo chiah a. Chumi hrilh tur che chuan ka lo kal anih hi, chuan Boss...Rina hi kan bum thlu thei anih chuan Top Punch Main Rooster ah kan hlangkai thei ngei ngei ang, hman tangkai dan a awm ang." Ajay-a chuan a han ti leh nuah nuah a.

Pu Mukesh-a chu a lo khi suk  a, "Main rooster em a han tel tir tur chuan a skills in ala pha lovang, i hriat kha...Top Punch te chu anni ang naupang deuh tan phei chuan hremhmun ani ringawt dawn asin." a lo ti leh a. Ajay-a chuan thutak fe hian, "Nilo Boss, a fight skills kha...another level hi a ni ringawt. Chutia hmuhsit mai mai chi a ni lo, Amir-a hi a tul chuan kan vau deuh angai dawn ani." a lo ti leh a.

Pu Mukesh-a chu a han ngawi vang vang a, "Zaninah chuan garage ah chuan an rawn kal dawn chiang em?" tiin a han zawt leh a. Ajay-a chuan a lu lo bu nghatin, "Dawn e, alan dan chuan Rina zawk khan a duh a ni awm e. Kan fighter chhuanvawr Buka pawh a hneh thei ania, minute 3 pawh a hmang tling lo. Kan chher leh deuh anga, top fighter zingah kan hlang kai theih ka ring tlat a ni." tiin a lo chhang leh a.

Pu Mukesh-a chu a han ngawi vang vang a, "Zaninah chuan ka lo kal ve ang, ka mit ngei hian a fight ka hmu ve duh a ni." a han ti a. Ajay-a chu a ding hluai a, "Zanin hian fighter chak tak leh tha tak a ni tih a proof ngei ang, Sudeep-a fighter te pathum zinga pakhat a bei dawn a. Hmanraw hman phal a ni leh nghal a, a chiang mai ang." a lo ti ve leh a.

Pu Mukesh-a chuan a lu a han bu nghauh nghauh va, "Foreigner vek an ni lehnghal a, Rina chu eng ang chiaha tha nge a ni tih chu kan hre thei ang. Tichuan keimah pawn thuthlukna chu ka lo siam thei mai ang, Amir-a te mai mai chu ka kutah dah rawh." tiin a chhang a, Ajay-a chu a chhuak ta a.

***********************************

ZAn a lo thleng a, Amir-a leh Rina te pawh chuan garage lam chu an va pan ta. He garage hi public garage a ni lova, Top Punch Street Fighter ho inbeina hmun tur hrim hrim a siam niin hmun fal tak a awm tho a ni. Sawi tawh ang khan illegal business ani a, Mumbai sawrkar chuan a do reng tho a ni.

Lirthei pawh chu hmuna insual en thinte leh fighter te chauh chuan an dah thin, mipui pawh an lo pung khawm leh nasa tawh mai. Rina te chu motor atang chuan an chhuak a, inbeihna hmun lam chu an va pan phei nghal a. A lo inbei mek te a han en chuan Rina chu a ding chat mai, a chhan chu mipa nilovin, hmeichhia leh hmeichhia an lo insual mek vang a ni.

An lo insual pui riap riap khawp lehnghal a, hmeichhia e ti lo chuan a sek pawh an sek narawh e. Rei fe an insual hnuah chuan hemichhe sam buang zawk chu a chak a, pawisa chu an manager te nen chuan an inpe fel a. Sudeep-a chuan Amir-a te chu a rawn hmu a, "Ekhai..Amir Bhai, ilo kal dawn tih hi ka hria alawm, min ti lunghnur dawn lo tih ka hria alawm." tiin Amir-a chu a rawn kuah vel a.

Amir-a chuan Rina chu a kawk a, "Hei hi ania ka fighter chu, Rinzuala a nih hi." tiin a inhmelhriat tir a. Sudeep-a chuan ngaihnep hmel tak hian Rina chu a han en a, "Rina maw...umm, a hmel pawh a that khawp hi le." tiin a han nuih suk a. Amir-a chuan inthlahrung tak hian, "Bhai, i fighter te nilo...midang zawk kan lo challenge dawn em ni ka lo tia...a chhan chu nang chuan experience nei ngah tawh leh skills bawn tak tak vek i nei a.." a tih lai chuan Sudeep-a chu a nui ta huah huah mai.

"Engvangin maw...i hlau em ni? I fighter hi a chak loh i ring animaw?" tiin a elhsen kher mai. Amir-a chuan Rina chu a han melh zeuh zeuh va, "Aaa..chutiang lam nilo, Bhai..ihh, englo.." a sawi zawh hma hma chuan Sudeep-a bawk chuan, "I sawi chak viau kha....i intihtheih pui viau ani lawm ni?" a lo ti leh a.

Amir-a chuan sawi tur pawh a hre tawh lo, mahse RIna ngaihdan chu a ni hauh lo. Sudeep-a chu rum zeta melh pah hian, "Hey, english i thiam chuan lo ngaithla rawh. I fighter pathumte zinga mi, a tha ber rawn thehchhuak ang che. Ka tiam ngam che, ka chak ngei bawk ang." a ti ta siah siah mai.

Sudeep-a pawh a ngawi hmak a, Rina chu a en vang vang mai. A lu a han bu nghat nghat a, "Eheu, tlangval leh....chuti khawpa ropui ah chuan maw i lo inngaih a? A tha e, a tha ber chu ka rawn tir em em ang. LO inring rawh, lo in warm up rawh." tiin a kalsan nghal a.

Amir-a chu a hlauthawng leh tan ta, "Rina, i ti awm ang lo thei emai. Tute nge an nih i hre lo, hei chu Buka leh Karan-a te ang mai mai khan an ni lo ania. Foreigner an nih hi, a then te phei chuan MMA an lo khel tawh thin ania." a han ti nghal chiam chiam a, mahse Rina chuan chhan pawh chhang lo chuan insualna lam ground chu a pan san daih mai a, "Huiham.." tiin Amir-a chu a thaw hluai a, ava zui ve nghal bawk.

*************************************

Announcer leh Sudeep-a te chu an inbe mek a, chutih lai chuan car nalh tak leh sei zen zawn tak mai hi a rawn tlan a. Mipui ho chu an reh thuap mai, car chu a rawn ding a. A chhung, driver seat lam atang chuan Ajay-a a rawn chhuak a, passenger seat chu a han hawn sak thlap a.

Chutah Top Punch Fight club neitupa, Pu Mukesh-a chu a rawn chhuak ta a. Mipui chuan kut an lo beng a, an lo haw haw dur dur mai. Pu Mukesh-a leh Ajay-a te chuan Rina chu an rawn pan nghal chat a, "Good Evening Boss, in lo kal pawh ka lo ring lova." Sudeep-a chuan zah tak hian a lo be nghal mawlh mawlh a.

Pu Mukesh-a chu a han khi suk a, "Kan fighter thar, lar em em mai...Rina chu a fight ka hmu ve chak alawm." tiin Rina chu a han en deuh kher a. Amir-a chu a ding ngawi reng ringawt, Rina chu a chak loh mai a hlau takzet a ni. Sudeep-a chuan Pu Mukesh-a chu zah tak hian chibai a han buk a, "Kan lo t(r)an dawn chiah a, boss." inthlahrung tak chuan a han ti leh a.

Pu Mukesh-a pawh chuan a lu a lo bu nghat a, "Awle..a tha e, tan rawh u." tiin a ding hla deuh va, Ajay-a chuan a zui ve zel bawk. Tichuan announcer chuan Sudeep-a fighter, African mi...dum zet mai leh sek tle hlarh mai, ft 5'11 vela sang, Khalon-a chu a han ko chhuak a.

Khalon-a hi kum 30 a upa niin street fight ah hian hneh loh pakhat chiah ala nei a, chu chu thailand mi, MAD DOG tia an hriat lar a ni. Kg 95-a rit niin a infit em em a, a zuan a zang thauh thauh hle bawk. A ngai te ang bawk chuan Rina lamah chuan tuman an bet lo, Khalon-a lamah hlir chuan an bet leh ta a.

An inbet-na awmsa, cheng nuai  khat nena belh khawm chuan pawisa tlingkhawm zawng zawng chu nuai 2 leh tlem a ni. Khalon-a chu a phur hmel zak zak tawh kher mai, a han zuang deuh thauh thauh va. A chang leh a han invawrh vel zak zak thul, Rina chuan a ei vak loh hmel kher mai.

Insual chu an t(r)an dawn ta, "Khai le Khalon, zanin chu kan hausa haw leh lawih dawn nih hi. Han sawp hrep teh, kha naupang kha.." tiin Sudeep-a chu a lo au nasa mai. An inbei tan ta a, Amir-a hlauh ang ngei ngeiin Rina chuan Khalon-a chu speed ah a pha ta tlat lo.

Rina a chet ve dawn pawh chuan Khalon-a chuan a lo khawih hman zel a, bum hneh tak a ni. Minute 2 dawn lai an inbeih hnu pawh chuan Rina chuan a khawih fu ve mang ta hauh lo mai, mahse inveng reng reng a bei a nih avang chuan Khalon-a pawh chua chuti lutuk chuan a khawih na thei bik lo.

A chan a tha zawk zel a, mipui lah chuan Khalon-a chu an au phur nasa tawh mai a. Khalon-a chu sang takah zuangin Rina bekah tak mai chuan a han kick thle sawk mai a, Rina pawh a thal leh ta tual mai. Amir-a chu a mangang takzet, mahse Rina chu a rawn tho leh nghal.

Khalon-a chuan posi chu a han lak khum leh vel a, a invawrh bin leh ta thak thak mai. Chutia a han in-show kual vel lai tak chuan Rina chu tlan thutin ava zuang vak a, na em em hian Khalon-a hmaiah chuan ava hnek ri chawrh mai. Khalon-a lah a lo invawrh bin lai a ni bawk nen, chhuatah chuan a ri thum dawt mai a.

Thisen a chhak chhuak nghal bawrh bawrh mai, mahse chuti khawpa hun remchang a neih hnuah pawh Rina chuan a bei zui duh lo. Khalon-a thawh hun chu a han nghak a, Mukhesh-a pawh chuan mak a lo ti angreng kher mai. Khalon-a chu muangchang chuan a tho va, a khuh kharh kharh a.

Sudeep-a mangang chuan thir pipe bung, chang tha nelh nawlh chu chharin Khalon-a hmaah chuan ava lir phei a. Khalon-a chuan a lo chhar nghal, "Vaw hrep rawh, han vaw hlim law law teh khapa kha.." tiin Sudeep-a chu a lo au pawr nasa ngei mai. Khalon-a chuan Rina lam chu ava pan leh ta a, Rina erawh chuan hmanrua engmah a nei ve lo.

Khalon-a chuan hlap tumin a han vai fua fua a, mahse Rina chuan a lo bum zak zak mai. Mahse a bum reng thei bik lo, sawi tawh ang khan Rina hian speed ah a pha lo kan tih tawh kha. Rina nakah chuan a hlap fuh ta, na a ti lutuk chu a kun deuh ngal a. Chutah a luah rawn vuak leh a tum a, Rina chuan a kutin a lo dang a.

A kutah zawk chuan a hlap sak a, Rina na ti lutuk chu a th(r)en chawk chawk mai. Chutah a rawn vai leh fua a, Rina tukhumah chuan a hlap fuh ta. Rina chu a hawi sawk a, a thingthi hnawk mai. A lu chu a dawm vang vang a, thisen a rawn chhuak ta hial mai a.

Khalon-a chu intithei tak chuan a ban a han phar a, a au vel vak vak a. Sudeep-a lah a lo hmanhmawh tawh, "Khalon, vaw leh rawh. Vaw hlum nghal law law rawh, tunah khan.." a lo ti leh chiam chiam a. Chutah Khalon-a chuan a pipe ken lai chuan Rina chu a han tin vang vang a, mipui chu an au ring tawh kher mai.

Amir-a mangang chu a hawi kual nasa mai a, chutah a bula ding chu ava en a. A kawnghren buckle ah chuan brass-knuckle a lo invuah hlauh mai, zah pawh dawn lo chuan ava phawi sak ringawt a. Tichuan Rina chu a au va, "Rina, kha le.." tiin ava vawr a, Rina chuan a lo dawng chat mai.

Khalon-a chuan lo hmu hman hek lo, Rina vuak tum chuan ava vir kual leh vel zak zak a. Chutah a vuak hma chuan Rina chuan brass knuckle chu bunin Khalon-a hnar ngulah tak mai chuan a lo hnek siah mai a, a hnung tawlh dawrh mai. A lu chu a hai muai muai a, a aia chiang hian Rina chuan a hnarah bawk chuan a han hnek sak leh pawp mai a.

Khalon-a hnar ruh chu a tliak tih chiang tak hian a sawi bawih mai a, a hnar kua atang chuan thisen a rawn luang chhuak nghal zawih zawih bawk. Chutah dimna nei lek lo hian Rina chuan brass knuckle vuah reng chung chuan a hnek hawi ta sawk sawk mai a, Khalon-a hmai chu thisenin a bual a ni ber mai.

A ding ngil thei tawh lo, a pai nasa tawh lutuk. Rina chuan a brass knuckle chu a paih a, a kut lawng chuan na em em hian Khalon-a hmaiah chuan a han hnek leh siah mai a, thisen a per chhawk mai. Chhautah chuan a tlu bawk thlawp mai a, tho leh tur a awm tawh lo, a che tawh eih lo hrim hrim.

Sudeep-a mak ti lutuk chu a ka hau mai a, a fighter dang pahnihte pawh chuan mak tiin Rina chu an en ngawih ngawih ringawt mai. Announcer chu rawn pen chhuakin Khalon-a chu a han check chiang a, chutah a rawn a rawn hawi chhuak a. Rina ban chu phar tirin, "A chak zawk chu Rina a ni e." tiin a han au lauh lauh va.

Rina chuan a vawithum nan hnehna a chang leh ta, Amir-a lawm lutuk chu a hnuk a ulh titih hial mai a. Sudeep-a pawh zak angreng tak chung chuan a rawn phei a, Rina chuan a lo melhrum ngei mai. Sudeep-a chu a rawn la chapo lui hram a, "A va ropui em, ropui tak a ni." tiin kut a rawn beng phei vel a.

Rina hmaah chuan a ding a, "KA fighter zinga tha ber a ni lo, Rina. Chubakah Khalon-a kha a la dam chiang lo, a fight hnuhnung berah a inhliam avangin i hneh mai mai a nih kha. Chak ber amaw inti hauh suh ang che, midang pahnih an la awm ania." a han ti nghal zuah zuah a.

Rina chuanrum zeta melh chung hian, "Khawi le, ka pawisa tur chu? Cheng nuai 1 man chu ka tuk zal ta phawt a, mipui ho bet-na zawng zawng nen a vaiin cheng nuai 2 leh sing 4 a ni." a lo ti ve zat zat mai. Sudeep-a chu a khi suk a, cheque ah chuan pawisa chu sign-in Rina chu a pe a, Rina chuan Amir-a chu a pe let ve nghal bawk.

Sudeep-a chu a thinrim laklawh tlat, "La haw suh ang che, Rina. Ka fighter pakhat zawk hian hemi zawh hian match a nei dawn, next-ah chuan chupa chu i bei dawn. I chak dawn lo, chuvang chuan i lo inzir nan lo en ve reng reng teh." tiin ala chapo arh arh khawp mai.

"Bhai, kan hmanhmawh deuh va...chutiang fight dang vel chu kan en hman tawh lovang." Amir-a chuan a lo ti vat a. Mahse Rina chuan chiang fek fawk hian, "Tehreng mai Putar, kan hman alawm, zankhuain kan hman. Kan lo en ange, kan haw lovang." a lo ti daih mai.

Amir-a pawh chuan a hnial let tawh lem lo, Sudeep-a lah chu a han nui huah huah a. A lu bu nghat nghatin, "A tha e, ka duhzawng tak i ni." tiin a kalsan ta a. Sudeep-a fighter dang pakhat chu Russian mi niin a hming chu Makar a ni a, announcer-in a han ko chhuak a.

Rina chuan a lo en vang vang a, Makar-a chu palian lutuk chu a ni lo. Mahse a sek phiar nalhin a move en reng reng pawhin Martial Artist thiam tak a ni tih a hriat ngawih ngawih. A  beih tur pa lah pate tak te a ni bawk nen, a chak dawn tih chu a chiang reng mai.

**************************************

TO BE CONTINUE