MUKPUI LUI (MIZO FICTION STORY) Written by : Aaron Malsawmdawngzuala Chapter - 2

 MUKPUI LUI

(MIZO FICTION STORY)

Written by : Aaron Malsawmdawngzuala

Chapter - 2

****************************

An eitur te an ei zawh meuh chuan Bza te thian ho chu an puar hle mai, chet pawh an che tha peih hrih lo. Rei vak lo an han thut chawlh deuh hnu chuan bungbel vel chu hmeichhe ho chuan an sil fai mek a, "Motor ah khian thildang theihnghilh kan la neih takin ka han en lawk ange..." tiin motor awmna lam pan chuan Peka chu a chho va.

Bza leh Siama chu meizial zu in an lo titi tui kher mai, "Sangsangi hi tunlai hi iva care deuh ve a, engemaw kan hriat veloh thil te hi a lo awm reng a ni lo maw?" tiin Siama chuan Bza chu a han kheuh zeuh va. Bza chu a lo khi suk a, "Mipa dangin buaipui in tum ve bawk si lova, keiman ka buaipui mai loh chuan.." tiin a lo chhang a.

Siama chuan Bza hmel chu a han en vang vang a, rilru nawmlohna riau nei ni hian a hre tlat mai. "E taka...Mukpui Lui tih hi hriatna ka nei tawh i ti khan ka hria, i hrechhuak tawh em?" tia a han zawt chu Bza pawh a phu zuk mai. A han ngawi vang vang a, "Aaa..ihh enlo, ka...ka hrechhuak zo ta lo." tiin a chhang bah nuai mai.

Siama pawh chu a nui huk ringawt, "Engvak a ni lovang....mi an kal thin anga, an ti tawp lutuk anga, chuvang chuan kal phalloh an ti tawp aniang." a han ti leh a. Bungbel vel te chu hmeichhe ho pawh chuan an sil zo ta, Sangsangi chu rawn bai phei auh auhvin Bza bulah kher chuan a rawn thu a.

Ham bai bai chung hian, "Keichu kan zu in khan min charge riau mai, ka puar bawk si nen. KA mut a chhuak ngawih ngawih, kan kalna tur a la hlat hmel si." a han ti nuah nuah a. Bza chuan zaidam tak hian, "Aww..muhil rih la, reilote chu i chhing sek hman ang chu....a hmanhmawh thlak tut tut hleinem." a lo ti vat a.

Hmeichhe dang pahnih, Euniki leh Muani te pawh chu an rawn phei a. An motor awmna lam han hawi chhoh vang vang pah chuan, "Peka chu a lo la kir na nge?" Muani chuan a han ti a. "Kan motor awmna kha a han hla ve reuh em alawm, ke a chhoh phei chuan a hahthlak duh fu ang." tiin Siama chuan a lo chhang a.

*********************************

Peka chuan motor awmna chu a han thleng a, "Ka va han ui tak e aww...ka pa chuan min beng dawn chiang lutuk ringawt..." tiin a motor chu a han en leh vang vang a. A chhungah chuan lutin eng eng emaw pawimawh an dah ho chu a han la khawm a, chhuk leh mai a tum chu a hnung lam atang chuan thawm a hre ta tlat mai.

Rang lutukin a hawi let vat a, mahse engmah chu a hmu chuang lo. A hawi kual vel lai tak chuan sir lam atang chuan thawm a hre leh thut a, a va hawi leh vat a. Mahse engmah a hmu chuang lo, "Engthil phiangsen nge maw ni le?" tiin a phun nuah nuah a. A han thaw deuh hak a, "Huiham....kal vat zawk teh ang." tiin a chhuk ta a.

A thiante bul chu a zuk thleng vat a, "Kan inpeih fel thawkhat tawh em? Kan kal dawn em ni?" a han ti nghal lauh lauh va. Siama chu a han ding hluai a, "Nia...i hmanhmawh vat teh ang u. Hun kan khawhral chuan kan buai mai mai zawka ng, kan awmna lai hi khawi lai nge pawh kan hre bawk si lo." a lo ti ve bawk a.

Bza pawh chu a rawn ding ve a, "Keichu ka ngaihdan chuan kan bungbel vel hi kan ken tel zel chuan kan rit lutuk ang, ke in kan kal dawn bawk si. Motor ah khian kan han dah leh vek zawk dawn amawni le...heta dah tawp chu a chi awm si lova." a rawn ti ve leh a. Peka chu a ner nung mai, "Ava buaithlak thin e aw...ka han chhoh hma te khan sawi tur alawm." a lo ti vin hlur mai a.

Siama chu a han ngawi vang vang a, "Ngawi teh u, motor awmna a han chhoh leh a, tha han sen leh vak ai chuan hetah hian dah mai ang. Tumah an kal ngai chuang lo ang, kal phalloh a ni tih kan hriat tawh kha." a rawn ti ve leh a. Peka pawh chuan, "Nia...tihian a pawimawh zual hi keng ila, tanpuina kan dil vat kha a finthlak zawk." tiin Siama thusawi chu a lo support khawp mai.

Bza pawh chu a thaw hak a, "Nia..a nih chuan i kal vat teh ang u." a ti ve ta a. Tichuan an insiam fel nghal sawk sawk a, bungbel vel leh an tent(puan in) te pawh chu thlep felin lui sir ah chuan an dah tha a. Sangsangi chu a ke a la nat deuh avang chuan Bza chuan a kuah a, tichuan an kal ta a.

*********************************

An kal mek pah chuan an titi nasa hlawm kher mai, "Kan plan chu a fail chiang kher mai, han enjoy kan tum tehreng nen.." Euniki chuan a han ti nuah nuah a. Muani chuan a phone chu a en deuh chhen a, "Signal hi a la awm chuang lo reng reng, tiangte chuan kan thleng har ngawt ang." tiin a lo phun ve sek bawk.

Peka chu a han chek deuh hlur a, "Phun phun lo mai teh u, keitak hi ania rilru hah chu ni. Ka motor lah a chhe bawk, kan kalsan tawp ania. Thirlen an lo hungna chin atang kha chuan a hla vak tawh lovang, kawngpui pawh kan pawh chho mai ang." a han ti vin deuh thak a. Chutih lai chuan Siama chu a hawi kual leh deuh hru hru zel a, Bza chuan a han en leh deuh vung vung thin a.

Khik deuh suk pah hian, "Tinge a, Siama? I va hlauhthawn hmel ve, i hawi kual ang hruk hruk zel a?" tiin Bza chuan a zawt ta nge nge a. Siama chu a han thaw hak a, "Ahma a Peka nena kan kal khan...helai vel kan thlen khan hnim buk kar velah hian engemaw thil dum lian pui, tleng phei fua ka hmu in ka hre tlat a..chuvang chu mawnle." tiin za lo tak chuan a han nui a.

Peka lah chuan rum ve hian a lo melh hru a, "Amak e aw, Dawiha...ramhnuai a nih hi, eng eng emaw ramsa te pawh an awm ve ang chu..kan accident-na chhan pawh kha ramsa nikhua lo lutuk kha a nih kha...engmah hlauhthawn tur a awm lo, mipa i nih kha hre reng rawh." a lo ti leh hrep mai.

Euniki pawh chuan, "Dik chiah mai, a hmeichhia zawk te min thlamuan ang chu tih lai a, a mipa zawk khatia i awm ten, kan dinhmun a va tha awm lo ve.." tiin a lo fiam zui ve bawk a. "Sawi takah chuan ko pang atanga rawn zuangthla kha, eng ramsa nge a nih ang le....keichu ka hmuhdan chuan vawk a ang ka ti, mahse a rawng kha a uk vek bawk sia." Muani chuan a lo ti ve nuah nuah mai.

Bza chu a lo khi ve suk a, "Sanghal te chi a nih hmel, keipawn ka hmu chiang vak hman biklo." a lo ti ve bawk a. An kal zel a, "Ka inthlahrung viau nangin, chawl lawk teh ang u. Ka ke hi a na tawh lutuk, reilote tal hi hahchawl zawk teh ang u." Sangsangi chuan a rawn ti chhuak hlawl mai.

Peka ngaihdan chu a ni leh vak ta lo, "Kan kal dawn chauh amaw tia aww...i tuar mai thei lo ami? Kan chawl hma lutuk, hetia kan chawlh zel chuan thim thlengin kawng zawng reng rengin kan buai ange.." a lo ti vin leh hlur mai a. Sangsangi pawh a ngaihdan a ni vak lo, "I ke a na ve lova, i hrethiam lo a nih kha." tiin a lo chhang ve sak mai.

Bza chuan dim te hian thingkung nghengin Sangsangi chu a thuttir a, "Tah hian hahchawl hrih rawh....minute 10 vel hnuah kan kal leh dawnnia." zaidam tak chuan a han ti a. Siama chuan inla polite tak hian, "Ka lo paw mai dawn che em ni?" a rawn ti zeuh va. Chuveleh Muani chu a lo meng no lo kher mai, "Hehe..angai lo...tu emaw a thinrim ang." tiin Muani melh zeuh chung chuan Sangsangi chuan a lo chhang a.

**********************************

Minute 15 vel zet an chawlh hnu chuan Sangsangi ke na pawh chu chhe te chuan a zia deuh ta, an kal leh tan ta a. Rei pawh an kal hma chuan Siama chuan hnim buk kar vel chu a en leh zeuh zeuh va, engemaw phei zuai hi a hmu leh ta tlat mai. A ding chat a, "Saw...sawta saw..ka hmu leh tawh." tiin a au deuh vak a.

Hmeichhe ho chu an chiai nghal kher mai, "Engmaw...engmaw i hmuh leh tak a?" tiin Peka chuan a vin leh hrep mai. Siama chuan a kawk a, "Tah sawn...a len hmel lutuk." tiin a hmel atang chuan a fiamthu hauh lo tih a hriat theih. Bza chuan Sangsangi chu a en a, "Eunik..Sangsangi hi lo kuah lawk teh." tiin va phei a tum a.

Mahse Sangsangi chuan a lo phal lo nasa mai, "A ngai lo...ramsa kawlh deuh te a lo ni ange...a chi loh, va kal suh." tiin Bza chu a kawrah chuan a pawt tlat mai. Peka ning lutuk chu a han thaw hak a, "Keiman ka va en ange, nep hlawm lutuk." tiin thing bung pakhat chu a chhar a, ava pan ta a.

Midang chuan an lo en thap a, "Peka, va kal hnai lutuk suh aw...inlak pa na chi pawh a ni lo ania." Siama chuan a lo ti deuh chhen mai. Mahse PEka chuan engah mah angai lo, hnimk kar vel chu a han keu va. Mahse engmah a hmu lo, "I hmu chiang amaw, Siama?" tiin a rawn hawi let a, ngeiawm tak hian a la rawn nuih zui.

Siama lah chuan, "KA hmu chiang alawm, dawt ka sawi lo. A lian lutuk, ka hmu chiang lutuk ringawt." a lo ti hlur mai a. Peka chu a khi suk a, "Hei engmah a awm loh hi.." tia a han en leh chu hnim kar atang chuan sanghal lian ve angreng tak mai hi a rawn zuang chhuak thut mai a, Peka thing ken lai chu a rawn hap chat mai.

Hmeichhe ho chu an t(r)e nasa mai a, "Nilo..Peka..Peka...lo phei vat rawh." tiin Siama chu a rak nghal chel chul mai a. Peka chuan a thing ken lai chu thlah vatin a thiante lam chu a pan nghal a, chu sanghal lah chuan thing bung chu a seh sawm vek mai. Chutah Bza te lam chu a rawn en a, a ngho lah chu a hriam tha in a sei em em mai lehnghal.

A thaw halh halh mai a, chutiang em em a sanghal lian leh hlauhawm chu Mizoramah a awm ang tih reng reng an ring pha hauh lovang le. Muangchang chuan a rawn kal hnai a, "Tlan..tlan ru..tlan ru." tih leh Peka chuan tlan a rual nghal a, midang pawh chu an tlanchhe ve nghal.

Sangsangi ke na bawk si chu a tlan tha ve thei si lo nen, a tlu tawp mai. Rang takin Bza chuan a pawm tho nghal a, a darah chuan pu nawlhin a tlan pui ve ta nghal a. Chutah Sanghal chuan a rawn la um zui ve bawk, an za vai chuan an tlan hrang ta nuai mai a, an buai nuai nuai kher mai.

*********************************

Bza leh Sangsangi te chu an tlan muang bik lo thei lo, sanghal lah chu a rawn tlan chak mai bawk si a. Bza tihnghaihna hre lo chu an sira hnim buk tak maiah chuan Sangsangi chu a zuan luh pui ta ringawt mai a, kawng awih vak lo chu lo niin, an lum thla dun ta tup tup mai. Mahse a sang lo hlauh va, a zawl lai chu an thleng thla thuai a.

Mahse vanduai thlak takin Sanghal chuan anmahni pahnih ber kher chu a rawn umzui leh ta tho va, a rawn tlan thla ve nghal. Bza chuan Sangsangi chu thingkung pakhat, lian tak mai phenah chuan a bihruk pui a. Sangsangi hmui chu a hup sak a, Sangsangi lah a ke na chu a sawh nat belh leh ta nghal a.

A na ti lutuk, au ngam bawk si lo chu a mittui a tla zawih zawih mai. Rei lo teah chuan chu sanghal pawh chu a rawn thleng thla ve nghal bawk a, a nguk leh hruih hruih thin a. Thawm nei miah lo chuan Bza leh Sangsangi chu che miah lo hian thingkung phenah chuan an biru reng a, sanghal thawm pawh chu an hre reng.

Sanghal lah chuan a zawng kual a, a la kal sawn mai lo zui. Sangsangi ke chu a na tawh takzet, a mittui chu a tla zawih zawih mai a. Bza chuan a hmui chu a hup sak char char a, thawm an chhuah a nih vaih chuan sanghal chuan a rawn bei nghal dawn tih chu an hre ve ran a.

Minute 2 vel lai chu sanghal chuan a zawng kual a, mahse Euniki au ri chuan sanghal chu a ti phu zawk mai. Thawm lo chhuahna lam pan chuan rang takin a tlan phei ta nghal a, Bza pawh chuan Sangsangi hmui a hupna chu a thlah ta a, a thaw huai mai. Sangsangi na ti tawh lutuk chu a tap nghal zawih zawih a, "Ka ke hi...ka sawh nat belh aniang, a na lutuk, BZ.." tiin a inhnit feih feih a.

Bza chuan a thiama ang tawk chuan a lo hmeh sak a, "Bengchheng hrih suh...kan thawm a la rawn hre pha thei ania, a lo let leh thei reng ania." tiin a khap nghal vat a. Sangsangi chuan tap pur hian, "Haw vat ang...helai hmun hi ka awm duh tawh lo, Bza, keichu ka hlau ania." tiin a mangang kher mai.

Bza chuan a lu lo bu nghat nghatin, "Ka hria alawm, Sangsang...mahse kan thiante kha kan kalsan ngawt thei lovang. KAn puih angai, kan zawn angai." tiin a lo chhang a. Sangsangi chuan tap tuau chung hian, "Engtin nge kan chhan theih ang, kei ka ke a na bawk...kan pahnih tal hian haw vat ila, tanpuitu kan ko mai dawnnia." a han ti leh hluam hluam a.

Bza chu a han hawi kual a, "Sangsang, kan awmna lai hi khawi lai nge pawh kan hriat loh hi...engpawh nise kan pahnih chauhvin haw kan tum a nih pawhin, a kalkawng kan hre bik lo." tiin a chhang leh a. Sangsangi mangang chu a tap zawih zawih mai, "Engtin nge kan awm tak ang?" tiin a lu a dawm vawng vawng ringawt mai a.

****************************

Euniki chu amah chauhvin a tlan hrang tih a inhria a, a han hawi kual a. A mangang takzet, "Bz...Siama..Muani..khawnge in awm? KA hlau ania...min chhan  ru." tiin a au vak vak ringawt mai a. A awmna lai chu khawilai nge pawh a hre der mai si lo, a tap pur tawh mai. "Siama...Peka..min chhan ru." tiin a han au leh vak vak ringawt a.

Chutah le, a hnunglam atang chuan vawk nguk ri hruih hruih ni awm tak hi a hre ta. A ding chat a, khur dar dar chung chuan muang chang hian hnunglam chu a hawi let a. A thinphu chu a rang nghal hle mai, kha sanghal ngei mai kha a awmna atanga pen 30 vela hla ah chuan a lo ding ran mai le.

Euniki thlan fim chu a hmaiah a luang zawih zawih mai, "Nilo..min...min tina suh, khawngaihin min ti na suh." a han ti zawi sap a. Mahse chu sanghal chuan mizo tawng a thiam ve tlat lo nge ni, muang chang chuan a rawn pan hnai zel a. Mittui tla zawih zawih chung chuan Euniki chu a tawlh hnung ve zel a, "Nilo..lo kal tawh suh..khawngaihin lo kal tawh suh." tiin a ngen mawlh mawlh mai.

Mahse sanghal chuan a rawn pan zel avang chuan Euniki pawh chu a tlanchhe leh ta ringawt a, sanghal chuan a rawn umzui ve leh nghal bawk. Tlan pah chuan Euniki mangang leh thlaphang lutuk chu a au tuar tuar a, sanghal lah chu a la rawn tlan chak em em zui. Hnunglam a hawi let zeuh zeuh avang chuan a tlanna tur chu Euniki chuan a en tawh lo, thingkung lian tak mai chu a la su chawrh zui a.

A hnar a la tauh zui, a thal tawp mai. Mahse rang takin a tho leh a, sanghal chu chak takin a rawn tlan a. Euniki chu rawn sut ngei a tum niin a lang, mahse Euniki ban chu tu emaw hian a rawn pawt vak a, a per dawrh mai. Sanghal lah chu ding hman tawh hek lo, chu thingkung chu a su ta chawrh mai a.

A hai ve chhawk aniang chu, a thal tawp mai. Mahse rang takin a rawn tho leh a, a lu chu a thing ang nawk nawk a. Euniki erawh chu hnim karah pawh luh a ni a, a pawt luttu chu tudang nilovin Peka a lo ni. Euniki beng bulah chuan, "Keimah..keimah Peka, bengchheng suh aw..ngawi hmak rawh." tiin a hrilh nghal a.

Euniki pawh chu a ngawi reng a, sanghal chuan a zawng nasa ngang mai. Reiloteah chuan sanghal chu a kalsawn leh ta a. Chuveleh Euniki chuan, "Peka, kha kha enge..kha thil kha enge a?" a ti nghal chel chul mai a. Peka chuan vin deuh tak hian, "In bengdai rawh...thawm dim ta che..sanghal a nih kha, midang ho a bei leh ngei ngei ang." a ti hlur mai.

Euniki chu a thla a phang takzet, "Engtin nge kan tih ang? Tinge hetiang thil hi kan chungah a thlen? A van pawi tak, ka lo kal ve kher kher a ni." tiin  a tap pur tawh mai. PEka chuan a kuah a, "Lungngai suh, lui lamah khan kan let leh mai angai ang...tah khan chempui a awm, ka ken theinghilh hrim hrim a..chuvang chuan kan let leh angai, invenna tur engemaw tal kan neih angai." zaidam tak chuan a han ti a.

Euniki duh dan erawh a lo ni ve hauh lo, "Aih...helai hmun hi chhuahsan vat zawk ang. A hal tawh lo i ti ani lawm ni...kan pahnih tal hian i chhuahsan vat zawk teh ang." a lo ti chel chul mai. "I mawl ami? Kha sanghal vang khan a let zawngin kan tlan leh tawh zawk a nih hi. Kal phallohna sign kha a hla leh daih tawh zawk, helai atang hian lui awmna kha a hnai zawk..min lo zui mai rawh." tiin a kai nghal dawr dawr a, Euniki pawh chuan a hnial let tawh lem lo, a zui ve ta tawp a.

************************************

Muani kutah khan a kai reng amaw a tih laiin an lo tlan hrang der tawh tih chu Siama chuan a hrechhuak zawk mai, amah chauhvin a lo awm hrang tawh hi a lo ni. A hlauhthawn em avang khan engmah pawh a lo ngaihtuah hman tawh lo, a han hawi kual chu ramhnuai reh reih ruih mai, thim mup mai ah hian amah chauh chuan a lo awm a.

"Muani...Muani khawnge i awm?" tiin a au vak vak a, mahse tumah chhangtu an awm lo. A hma zawnah chuan a han tlan leh deuh va, "Muani....Bz..khawiah nge in awm?" tiin a au pah reng bawk a. Chutah a awmna atanga hla vak lovah chuan, "Siama..Siama..khawnge i awm?" tia hmeichhe au ri chu a hre ve ta a, Muani aw ngei a ni tih a chiang bawk.

Thawm lo chhuahna lam pan chuan hnim sang tak tak te chu a han keu phei buan buan a, "Muani...Muani ka lo kal...lo au zel teh." tiin a pan phei zel a. Muani pawh chuan a lo au vel zel bawk a, an in au tawn reng a. Chutia an in auh tawn reng lai chuan Muani chu a t(r)e ta thut mai, "Ka duh lo..ka duh lo...lo kal tawh suh." tiin a au ta chel chul mai a.

Siama chu a mangang kher mai, "Muani..Muani enge awmzia?" tiin hmanhmawh tak chuan a phei zel a. Muani chu sanghal chuan a lo hmu fuh chu niin, an inum ta chiam mai a. Muani tlanchhia chuan lungte a rap hrual hlauh mai, lehlam kawng awih takah chuan a lumthla ta tup tup mai a.

A lum thui zel a, a zawl lai a zu thleng chiah chu lungtum lian tak pakhatah hian a lu chu ala sawh zui. Muani chuan na a ti kher mai, a lu chu a hai takzet. Reilote ah chuan nikhawhre lovin a awm ta der mai a. Siama pawh chu kawng hnuai lam zawk atang chuan a rawn thleng chho ve nghal a, mahse a ding chat mai.

Chu sanghal chuan Muani nikhawhrelova lo let reng mai chu a lo hnim vel mek a, a liak leh hlep hlep thin bawk. Siama chuan hlauthawng tak hian a en reng a, thawm han chhuah mai chu a ngam chiah bik si lo. A bula lung lian tak chu a la a, tichuan sanghal awmna sir lam, mau hmun pan pheina lamah chuan a theih tawp a na chuan lung chu ava vawm phei a.

Thawm a hriat veleh chuan Siama lung vawmna lam chu sanghal chuan ava melh nghal vat a, rang lutukin ava tlan phei nghal. Chu veleh Siama chu a bihrukna atang chuan a rawn chhuak nghal a, Muani chu ava buaipui nghal vat a. Muani chu a sawi vak vak a, "Muani..harh teh..ka tawng i hrethei em?" tiin a be mawlh mawlh a.

A lu chu a lo sawh kak hman chu niin, a rawmawlh chu phawrh vatin Siama chuan thisen chhuak chu tih tawp a tum nghal a. Muani chu a harh thei mai lo, a thiam ang tawk chuan a lu kak chu a tuam sak a. Tichuan a paw nawlh a, hma lam chu a pan pui leh ta ringawt a. Rei vak lo hnuah chuan lui luang ri a hre ta hlauh mai, Mukpui Lui bawk chu an hnaih leh tawh a ni tih hria in rang takin Muani chu a tlan pui ta nghal hlawk hlawk a.

**********************************

Bza chuan Sangsangi chu kuah in muang chang chuan an kal ve zel a, mahse khawi lam nge an pan erawh an hre hauh lo. Sangsangi chu a hawi kual deuh chhen a, "Bz, khawilai nge kan awmna hi i hria em?" tiin a han zawt a. Bza pawh chu a hawi kual deuh hu ringawt a, "Ka hre bik lo....mahse a let zawngin kan kal chu a ang ka ti." tiin a chhang a.

Chuveleh phawk hru hian Sangsangi chuan a han en a, "Engtia let zawngin maw?" a lo ti hu mai. Bza chu a ding a, "Lui lam pan zawngin kan kal a ang ka ti, chubakah a pilril angreng bawk sia, khawilam kawng nge han pan mai tur ka hre rih lo." tiin a lo chhang leh a. Sangsangi rilru hah lutuk chu a han thaw deuh hak a, "Engtin nge kan tih tak ang? Khawnge kan thiante kha an awm ang le?" tiin a inhnit feih feih mai.

Chutih lai chuan an awmna atanga hla vak lovah chuan thawm an hre tlat mai, mihring ke pen ri a ang ber. Bza chuan bengchheng lo turin Sangsangi chu zaizir hian a hrilh a, an pahnih chuan thingkung phenah chuan an biru nghal vat a. Thawm chu a rawn ring tial tial a, mahse mihringi inbe thawm a ni ta tlat mai.

Sangsangi leh Bza te pawh chu an birukna atang chuan an lo chhuak a, vanneihthlak takin Peka leh Euniki an lo ni hlauh mai. An han inhmu chiah chu an lawm kher mai, Euniki chu va tlan pheiin Sangsangi chu ava kuah nghal a. An tap dun nghal zawih zawih a, "Sangsang, i tha maw? Khawnge sanghal kha a awm, in lo hmu ve em?" Euniki hi chuan tap pur chung chuan a han ti a.

"Ka tha alawm...nung damin ka hmu che u chu ka van lawm tak." tiin Sangsangi pawh chuan a lo kuah let a. "Eunik..sanghal chuan a bei ve leh che u ami?" tiin Bza chuan a han zawt a. Peka zawk chuan, "Aw..bei e, mahse kan bihruksan theih hlauh va." tiin a lo chhang a. "Kan in ang chiah a nih chu...mahse hei Sangsangi hian a ke a tihnat belh a." Bza chuan a lo ti ve leh a.

Euniki chu a han hawi kual a, "Muani..Muani leh Siama hi..khawnge an awm ve tak ang?" a rawn ti chhuak hlawl mai. An han ngawi vang vang hlawm a, "Peka..helai hmun atang hian lui kha a la hla em..a kalkawng i hria em?" tiin Bza chuan a han zawt a. "Hre chiah lo...mahse a hla tawh lovang." tiin Peka chuan a lo chhang a.

Bza chu a ngawi leh vang vang a, "Lui lam chu pan leh phawt ang u, Muani te pawh lui lam panin an let leh tawh zawk pawh a ni maithei asin." a han ti a. "Nia, keipawh ka chempui ka dah daih alawm...kan let leh chu angai." Peka chuan a lo ti ve bawk a. Tichuan lui lam pan chuan an let leh ta a, Sangsangi chu Bza chuan a paw leh bawk a.

**********************************

Lui chu Siama te chuan an thleng ta, lungpui chungah chuan Siama chuan Muani chu a mut tir a. Luia tui chu bottle ah thunin Muani chu a han leih a, Muani pawh a rawn harh ta. A rawn tho chhuak thut a, "Nilo..ka duh lo..ka hlau. Khawnge, khawnge sanghal kha?" tiin a rawn rak nghal chel chul mai.

Siama chuan lo man bet vatin, "Muani..inbengdai rawh, keimah...keimah Siama.." tiin a lo hrilhfiah nghal mawlh mawlh a. Muani pawh chu a thaw huai mai, "Siama...khawnge sanghal kha a awm?" tiin a tap nghal pur mai a. Siama chuan zaidam tak hian, "A tlan bo tawh...hahdam rawh. I bulah ka awm reng alawm, hlau tawh suh." tiin a lo hnem a.

Muani chuan a lu chu a dawm a, "Ka lu hi ana lutuk, engthil nge thleng a? Engtin nge hetah luiah hian kan awm leh daih a, enge awmzia?" a ti hu mai. Siama chuan hrilhfiah in, "Sanghal khan a um che a, mahse i tlu sual palh aniang. I lu hi i sawh a, tichuan ka rawn hmu che a ni." tiin a chhang leh a.

Muani chu a ngawi vang vang a, "Anih khawnge Bza te, Euniki te..khawnge an awm?" tiin a han zawt leh a. Beidawn hmel tak hian Siama chu a han thaw hak a, "Ka hre lo, khawnge an awm ka hre bik lo." a ti zawi sap mai. Muani chuan a lu chu na a la ti em em a, "Ka lu hi a puak keh mai dawnin ka hria." tiin a dawm vawng vawng a, a lu chu a la hai muai muai kher mai.

Siama chuan fimkhur tak hian a mut tir leh a, "Tikhan muhil leh rih mai rawh, i sawh na ve reuh em a nih kha." zaidam tak chuan a han ti leh a. Muani pawh chuan muthilh leh rih chu a duh reng, mahse a ngaih a ngam hlawl lo a ni. Tap tuau hian, "Sanghal kha a lo kal leh ange..ka hlau ania." a han ti tham tiak a.

Siama chuan a lu a chul sak hliau hliau pah hian, "Lungngai suh, i bulah ka awm reng dawn alawm...ka kalsan miah lovang che." tiin a chhang a. Reiloteah chuan Muani pawh chu a muhil ve leh ta mai a, Siama chuan a kutah chuan a chelh reng bawk. Engtia awm zel tur nge a hre bik lo, a rilru chu a hah khawp mai.

Minute 10 vel hnuah chuan Muani pawh chu a mutui tawh khawp mai, a hnar suk suk mai a. Siama chuan bungbel vel an dahna sira Peka chempui chu ava hmu ta, Muani chu thawh sanin ava pan a. Chempui chu a la a, "Mizo tlangval alawm maw ka nih le, lo kal leh teh se, ka sat hlum chiang viau ang." tiin a inhrosa khur khur mai.

Lui lamah chuan chhuk leh in a han inphih fai ve a, lung tum pakhat chu la in a chempui ken chu a han tat hriam bawk a. Chutih lai chuan a hnunglam atang chuan zawi te a vawk nguk ri hruih hruih niawm tak chu a hre ve ta tlat mai, a thin a phu nghal dup dup a. Maungchang chuan a han hawi let a, a hlauh ang ngei ngeiin sanghal chu a hnungah chuan a lo ding leh run mai.

Mahse a han enchaing a, a hma a an thian zaho umtu sanghal kha a lo ni tawh miah lo, chu ai chuan hmul a ngah a, a uk nilovin a dum a ni tawh bawk. Chulai hmunah chuan sanghal pakhat chauh a awm lo tih chu a chiang ta reng mai, a chem chu hum nghet sauh sauhvin Siama chuan tlanchhiat chu a tum tawh bik hauh lo.

An inveh ta dan dan mai, chutah le..sanghal chu a rawn tlan phei ta thut mai a. Siama chuan a chem chuan a lo vai pawp mai a, mahse a thawi tlat mai. Siama banah chuan a hap fu ta, Siama na ti chu a au vak vak a. Sanghal lah chuan a la thlah mai duh lo zui, a chempui ken lai chuan hnungzangah chuan a sat ta a.

Sanghal na ti lutuk chu a nguk vak vak a, a thlah ve ta. Mahse a thlah rei lo, Siama a insiamrem hma hma chuan a pheikhawkah chuan a seh sak le ta a. A thing ta vak vak mai, Siama lah lo cher chhe ban ve bawk nen. A leng lawp a, lungpui lian tak pakhat ah chuan a lu chu a sawh ve ta.

A hai chhawk mai a, mahse a la harh tho. A che thei tawh lo, sanghal lah chuan a rawn pan leh ta mai a. Chempui lah a thlauh daih tawh bawk si, a lu lah a hai muai muai mai bawk si nen. Invenna engmah a nei tawh lo, sanghal chu chilthli fan duai duai hian a rawn kal phei zel a.

A thi ngei dawn niin Siama chuan a ring nghet bur tawh, sanghal chu a rawn hnai tawh khawp mai. Mahse mak tak maiin sanghal chu a ding thut a, hnunglam atang chuan engemawni hian na em em hian a rawn pawt let pawp mai. Siama pawh chu a la harh reng avang chuan thil thleng chu a hmu ve vek a, mak a ti kher mai.

Chutah sanghal lo pawt let tu a han hmu chiah chu a meng phawk nasa kher mai, saphai lian em em mai hian chu sanghal chu a lo vial mek a. Sanghal chu a nguk nasa kher mai, mahse chu saphai chu a len em avang chuan sanghal chu a nguk rei lem lo. A zial hlum ta der mai a, Siama hmuh lai ngei chuan a dawlh bawk.

A dawlh zawh thleng chuan Siama chuan a en reng a, mahse a khawhmuh chu a fiah lo tulh tulh. Lui lama saphai tleng lut leh zul zul chu chiang lo ruai hian a hmu thei a, tichuan a khaw hmuh chu a thim tulh tulh a. Zawi sap hian, "Muan...Muani..tlan..tlanchhe rawh." tih chiah a sawi thei, nikhawhrelovin a awm zui nghal a.

*******************************

TO BE CONTINUE