MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 2

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 2

*******************************

Rina chu ke chuan a haw hnak hnak a, rein fe a kal hnu chuan kawng reh lai deuh hi a thleng a. Pu Sena fapa Dinga chu a thiante pahnih nen an bike nghengin an lo ding a, Rina chuan kal pel mai a tum a. Chutah ring zet hian Dinga chuan, "Hey Hmela, ding teh." a han ti vin tuar a.

Rina pawh chu a ding ve mai bawk, Dinga chuan ava pan a. Rum zeta melh chung hian, "Ka pa kha Zawng putar i ti ngam ve amaw? Ka pa vanga hnathawh tur nei ve mai mai i nih kha i hria em? Eng angin nge i lo inngaih a, khawngaih vanga chhawr che kan nih hi i hria em?" tiin a han vin leh hrep mai a.

Rina chu a ngun ngal a, "I awm tih ka hre lova, ka tihpalh a ni." a han ti zawi sap a. Dinga chuan hmuhsit hmel tak hian a han nuih huk a, "Tlangval fel tak ka ni hlauh va, ka kaltir hram ang che. A lehpek ah khatia tawngkam i lo nei ve leh khanglang a nih chuan...ka beng hreh miah lo che ania." a han ti leh hrep a.

Rina chuan a chhang lo, en pawh a en lo bawk. Kal mai a tum a, "Lo ding leh lawk teh." Dinga chuan a han ti leh a, Rina pawh chu a ding ve leh mai bawk a. Dinga chuan a rawn pan a, "Kha hei hi la rawh....tikhan i hlawh chu ka lo ti pung ve animai." tiin cheng 500 a pe a.

Rina chuan han tih vak ngaihna pawh a hre lo, a en hu ringawt mai. Dinga chuan a  nuih suk a, "I taima tih ka hria alawm, i hlawh tlem tih pawh ka hria. Tikhan ka lo pe ve angah che ngai rawh, i tawngkam erawh fimkhur tawh ang che." tiin a kalsan a, bike chuan a thiante pahnih nen chuan an tlan ta vang vang a.

Rina chu a ngawi vung vung a, pawisa chu a han en vang vang a. Rang takin phone a phawrh a, Amir-a card chu a phawrh tel nghal bawk. Tichuan number chu a chhuthla ta a, Amir-a chu a call ta. Amir-a chuan a lo chhang vat a, "Hello...." a rawn ti a. Rina chuan chaing fek fawk hian, "Amir, thuthlukna chu a siam tawh e, zanin dar 8 ah inah lo kal rawh." tiin phone chu a dah leh nghal hmak a.

*******************************

Zanah chuan Amir-a chu ava kal ta ngei a, inhma tawn chuan an thu dun a, an inmelh dun ran mai. Amir-a chu a han thaw hak a, "I rawn pen lut tawh anih chuan, i inhliam emaw, i thi te a nih ngawt loh chuan i duh hun hunah min tawp san mai mai thei dawn lo ania." a han ti a.

Rina chu a lo khi suk a, "KA theih chhung chu ka tel ang, ka tiam a che." tiin a chhang a. Amir-a chuan a bag chu a phawrh a, paper hi a la chhuak a. Rina hmaah chuan a va dah a, "I pawm ngei a ni tih hriat nan hetah hian sign rawh." tiin pen a pe a. Rina chuan paper chu a han en vang vang a, a chung berah hian TOP PUNCH tih hi a lo inziak a.

Rina chuan mak tih hmel tak hian, "Top Punch...hei hi enge awmzia?" tiin a zawt a. "Kha kha kan fighting club hming chu a nih kha, manager zingah ka tel ve a. Tunah phei chuan ka rethei ber tawh, a chhan chu fighter ka neih ve loh vang a ni." tiin Amir-a chuan a lo chhang a.

Rina chuan rules vel chu a han chhiar a, english vekin inziak mahse hriatthiamloh engmah a nei lem lo. A chhiar zawh hnu chuan a sign ve mai bawk a, "HEtah pawh hian sign rawh, a in ang reng." tiin paper dang pakhat hi a pe leh a. Mahse hindi vekin a lo inziak a, Rina chuan hindi thiam hek lo, "A in ang chiah amaw?" tiin a han zawt deuh kher a.

Amir-a chu a lo khi suka , "Min ring rawh, hindi in a inziak a, chuzawng chu a nimai." tiin a lo chhang leh a. Rina chu a han ngawi vang vang a, a sign ve leh mai bawk a. Amir-a chu a lawm hmel kher mai, "Ka lawm lutuk e, Rina. I inchhir lovang, ka tiam ngam che." a han ti nghal mawlh mawlh a.

Rina chuan Amir-a chu a han en vang vang a, "Tiang khawp hian mizo tawng i thiam ania, engtin nge i thiam zawk a, i pai miah lo leh nghal?" tiin a han zawt a. Amir-a chu a lo khi leh suk a, "Ka nu hi mizo a lawm, enge ka thiam lohvang." tiin a chhang a, Rina chuan a en hu mai.

Mahse engmah a zawh chhunzawm tawh lem lo, "Naktuk atangin Mumbai ah chuan kan thlawk thla nghal ang, engmah sum i sen ve a ngai lo. Ka kutah dah vek rawh, i hausa dawn, Rina. Kan pahnihin theih tawp kan chhuah ang, lo inpeih fel vek ang che." Amir-a bawk chuan a han ti leh a, tichuan a haw san ta a.

****************************************

Mumbai chu an thleng ta, khawi khawi ah emaw Amir-a'n Rina chu a kal kawi pui hnu chuan Hotel lian leh changkang takah hian an lut ta a. Room nuam leh zau tak mai ah chuan a luhpui leh a, "Hei hi i riahna tur aw...naktukah nilengin han hahchawl la, zan atangin fight chu a awm tan ang." tiin a hrilh a.

Rina chu a han ngawi vang vang a, "Amir, tunge ka insualpui tur chu a hriat lawk theih loh em ni?" tiin a han zawt a. Amir-a chu a han thaw deuh hak a, "Rina, a hmunah kan kal anga, tah chuan challenge kan va nei ang. Fighter tha leh lar sa ho an awm nual a, chung ho chu an bet tam bik thin tlangpui bawk." tiin a lo chhang a.

Rina chuan a lu a bu nghat nghat a, "A tha e, anih naktuk zan chu dar engzat ah nge a tan theih ang?" tiin a han zawt leh hu a. "Zan rei lam hi a ngai thin a, dar 10 atangin kan chhuak tan dawn nia." tiin Amir-a chuan a lo chhang leh a, Rina pawh chuan zawhna a zawt zui tawh lem lo, Amir-a chuan a chhuahsan ta a.

Rina pawh an zinkualna vel avang chuan a chau ve angreng hle a, a thil tih tum mek chu thil tha ber a ni angem, a inchhir phah angem tih thleng chuan a la inngaihtuah nasa ngang mai. MAhse hming a sign tawh si a, chutia rilru han sawh sawn leh nghal ngawt chu a theih tawh bik si lo, chutia a inngaihtuah nauh nauh chung chuan a muhilo ve mai bawk a.

A tuk zingah chuan hma takah a tho va, ni pawh a la chhuak full lo. Hotel Room verandah ah chuan axer la in a work out nghal mawlh mawlh a, a vawikhatna tur a ni bawk a, chak loh nghal ngawt chu a tum lo bur. Amir-a nen tuk thuan ei dunin tih dan tur leh an awmdan tur vel chu sawiin an titi dun mial mial a, nilengin a roomah chuan Rina chu a awm a, Amir-a erawh buaipui tur dang tiin a chhuak nileng ve thung a.

******************************************

Zan a lo thleng ta, Rina chu a helh hawlh nge a hlauthawng zawk ni, a thu hle hle thei lo. Room ah chuan a tei kual sek mai a, Amir-a lah chua  reh vang vang mai bawk si. Sana a en a, dar 9 a pel tawh. Amir-a chu a han call thin, mahse a la thei reng reng lo mai a.

Dar 9:30 a rik meuh chuan a mangang tan tawh khawp mai, "He vaipa hi min lo bum reng amawni le..." a ti nuah nuah a. Khumah chuan a thu hnawk a, chutah kawngka a rawn inkik thut mai. Rina chu a phu zawk a, "Come in." a han ti ve mai a. Amir-a leh vai putar, sual hmel angreng deuh hi an rawn lut a.

Amir-a chuan Rina chu kawkin chu vaipa chu hindi in a be mawlh mawlh a, Rina chuan engmah a hrethiam lo. Vaipa pawh chuan Rina chu a han en vang vang a, vai tawng bawk chuan a tawng veleh a. A lan dan chuan Amir-a chuan Rina chu a hmelhriat tir a, a fak hle bawk a nih hmel.

Vai putar chuan Rina chu a va pan hnai a, Rina pawh chu a lo ding a. Vaipa chuan a han en vang vang a, "Do you speak English?" tiin a han zawt a. Rina chuan a lu lo bu nghatin, "Yes." tiin a lo chhang a. Vaipa chu a khi suk mai, "A that chu, english tal i thiam chuan." a han ti zawi sap a, hetah hian mizo tawngin a tawng tihna a ni lova, english tho a hmang a ni.

Amir-a chu vaipa nen chuan hindi bawk chuan an inbe leh a, tichuan vaipa chu a chhuak ta a. Amir-a chuan kawngka a khar a, "Tunge kha putar kha?" tiin Rina chuan a lo zawt vat a. Amir-a chuan hlim hmel tak hian, "Khapa kha Top Punch club neitupa, Pu Mukhesh-a a nih kha. Mi hausa, a ruka billionaire a nih kha." tiin a lo chhang a.

"Anih chuan enge in sawi kha?"

"Ka hmelhriat tir che anih kha, ka fighter thar i nih thu ka sawi a nih kha."

"Chuan nileh enge ka chungchang a sawi kha, engthil nge a sawi a?"

"Zaninah kan hria ang chu, fighter tha a ni nge ni lo chu...a ti a nih kha."

Rina chu a han thaw hak a, "Anih chuan Amir, ka inpeih e." tiin a kut chu a han elh ri nghal rap rap a. Amir-a chuan a lo nuih sak a, "A tha e....anih chuan i kal ang hmiang." a han ti a. Tichuan an chhuak dun ta a, Amir-a chuan car a khalh a, khawi atanga a neih nge ni a, engtik laia a lo lak nge tih chu Rina chuan zawh duh viau mahse, a zawt ta lem chuang lova.

*************************************

Thui fe an kal hnu chuan hmun fal tak mai hi an thleng a, music a lo ri dup dup mai. Car atang chuan Amir-a leh Rina te chu an chhuak dun a, hmun khata mipui lo zi nuai nuai chu Rina chuan a han en vang vang a. Amir-a chuan Rina darah chuan a han beng thak thak a, "Kal ang le." tiin a kal a, Rina chuan a zui ve nghal bawk.

Mipui awm khawmna chu an va thleng a, en reng reng pawhin Pathian thu awih tak leh mi fel tak chu an nih hmel hlawm loh kher mai. Hmeichhe awm ho lah chu an la naupan hmel hlawm em em mai a, an inha bul ngang hlawm mai. Chutih rual chuan hmeichhe upa lam pawh an awm nual bawk a, mahse a tam zawk chu mipa an ni thung.

Mipa pahnih hi an lo insual mek a, light weight lampang an nih hmel. An palian lem lova, an sang lutuk lem lo bawk. Tlem chuan pakhat chu a lian deuh zawk a, mahse a te zawk chuan a sawp hneh ngang mai. A tawpah chuan a te zawk chu a chak ta nge nge a, announcer chuan chak zawk chu a puang a.

Chuveleh a manager chu a rawn chhuak a, a chak lo zawk manager chuan pawisa a pe a. Announcer chu Amir-a te lam a rawn pan a, "Amir Bhai, i dam thin maw? Hei fighter thar i rawn nei leh tawh em ni a, i daih rei pui lo thei si?" hmuhsit hmel tak chuan a rawn ti a, hetah pawh hian hindi thovin an inbia a ni.

Amir-a chu za lo tak chuan a lo khi suk a, "Nia, hei ka fighter thar, Mizoram ami a nih hi...Rina a nih hi, zanin hian challenge tur kan rawn zawng a.” tiin Rina chu a kawk a. Announcer chuan Rina chu a han en vang vang a, “Mizoram ami maw? Tun tum chu ava dang ta ve, North East lam daih daih...ala naupan hmel si, thalai ho hi i that mai mai ni hian ka hria.” tiin a han nui tiah tiah a.

Rina chuan amah hmusit zawngin a tawng tih chu a hrethiam nghal mai, a melh rum nasa mai a. Amir-a chu lo inrawlh vatin, “Aaa..nia, mahse hei chu a tha viau ang. Tunah amah hi han introduce la, cheng sing khat atangin ni rawh se.” a han ti a. Announcer chuan a lu a han bu nghat nghat a, “Awle a tha e.” tiin a kalsan ta a.

Ring tak hian, “Awle Guys, fight dang hmuhnawm turu a awm leh nghal dawn e. Kan manager te leh kan fighter te kha lo kal khawm ula, zanin hian fighter thar a rawn inlan dawn a. A hming chu Rina a ni a, North East lam atanga lo kal a ni.” a han ti a, Rina chu ava pen chhuak a.

A kawr chu a han phelh a, mipui ho chuan an lo ‘boo’ khum nasa mai. Announcer bawk chuan, “Cheng singkhat atangin a bet theih e, kan fighter te kha....tunge bei ngam ang le...cheng singkhat..cheng singkhat.” tiin a han au leh lauh lauh va. Chutah vai putar pakhat hi a rawn pen chhuak a, “Ka fighter te zinga ka chhuan em em, Karan The Destroyer hian zirtirna han pe hlak teh se. Mahse singkhat lek a ni dawn lo, singhnih in ka bet ngam e.” tiin a rawn chhang a.

Chuveleh Amir-a chu rawn pen chhuak in, “Ngawiteh Boss, tunah chuan chutiang zat zat chuan ka bet ngam lo, a vawikhatna chauh ala ni a..” a tih lai chuan vai putar chuan, “AMir Bawiha, lungngai suh. I cheng singkhat bak kha ka laksak lovang che, abak chu mipui hian Karan-a lam hi an bet vek dawn tih hre ta che.” hmusit tak hian a lo ti a.

Amir-a pawh chuan a chhang let tawh lem lo, “Khai le...Rina lamah tunge bet dawn?” a han ti a, mahse tumah chuan an bet lo, an ‘boo’ vak vak ringawt mai a. Mahse Rina chuan ngatan mah a ti lo, a kut chu a tuam tha mawlh mawlh a. Chutah a tumpui tur, Karan-a chua  rawn chhuak ta.

Ft 6’2 vel laia sang a ni ngei ang, vai palian tak mai hi a lo ni a. A sek em em mai lehnghal a, tihbuai mai mai chi chu a ni lo tawp ang. A khabe hmul lah chu a buk chhup mai a, rum zet hian Rina chu a rawn melh a. Rina chuan a hlauh loh hmel kher mai, muangchang chuan ava pan a.

Karan-a chuan a kut chu a han elh ri tuar tuar a, “In inring maw? Khai le...nih leh Karan-a lamah tunge bet dawn?” tiin Announcer chu a han au leh vak a. Mipui chuan pawisa an rawn phawrh sup sup mai, Amir-a pawh a confi chiah lo, a chhan chu Karan-a ber kher chu an rawn chhawp chhuah a lo beisei loh vang a ni.

Amir-a hian KAran-a hi a hre chiang a, fighter tha tak leh kutthlak na tak a ni tih a hria. A zam ru angreng khawp mai a, Karan-a lama pawisa an bet tlingkhawm chu cheng sing 5 chuang lai a ni mai a. Announcer chuan fighter te pahnih chu a han indinhnaih tir a, “Nikhaw hrelova pakhat a awm hma emaw, a tlawm thu a sawi hma chu eng rules mah a awm lo. Thisen chhuah phal a ni a, phalloh awmchhun chu inthah a nimai.” a han ti a, an insual tan dawn ta.

****************************************

Karan-a chuan Rina chu posi lak khumin a han veh dan dan a, Rina chuan mit khap miah lo hian Karan-a che vel chu a en vang vang a. Chutah Karan-a chuan a rawn vai fua mai, Rina chuan a lo bum hman hlauh mai a. Posi chu a han la ve ta, an han inveh leh den den a.

Karan-a chuan a rawn vai leh fua a, a ngai te ang bawk chuan Rina chuan a lo bum leh a. Rina chuan a dinglam chuan hnek tum ni awm takin a han phar zuau va, bum tum fahran hian Karan-a chu a lo thle zeuh va. Mahse Rina chuan a vei lam zawk chuan a bekah a hnek ri chawrh mai, Karan-a pawh a hai chhawk mai a.

A thinrim kher mai, a han rum nghut ngut a. Rina chu va hnek tumin a va vai fua fua a, Rina chuan a lo bum zat zat mai. Karan-a thinrim tawh lutuk chuan a pawm ta nawlh mai a, nghet em em hian a kuah bet ta vak mai. Rina chuan na a ti em em a, mahse a mitah tak chuan a hnek sak a.

Karan-a pawh chuan a thlah ve nghal vat a, Rina chu a thal deuh tual a. Karan-a chuan rawn pan lehin Rina samah chuan a tham kang lawp a, a hnek ri chawk mai. Rina chu a thal leh tual a, Karan-a chuan a dulah a rawn chhuih leh a. Rina chu a vial  deuh ngawng ngawng a, Karan-a chuan a rawn pan leh nghal a.

A run kun hniam chu Rina chuan a dulah a lo tlawh sak a, Karan-a na ti lutuk chu a dul dawmin a kun ngawih ngawih mai. Chuveleh a hmaiah chuan Rina chuan a han tlawh leh chawrh a, Karan-a pawh a thal ve ta tual mai. Rina chu a inperh tho nghal a, Karana rawn tho tuah tuah chu a bekah chuan a khupin ava do siah mai a.

Karan-a chu a let tawp tawp a, a thaw hrawk hrawk mai. Mahse thirnim hmel tak hian a rawn tho va, a han au vak vak a. Tichuan a rawn tlan phei ta, zuan pah chuan Rina chu rawn hnek a tum a. Mahse a ai rang hian Rina chu a rawn zuang ve a, thle zeuhvin Karan-a awmah tak mai chuan a hnek siah mai.

Karan-a chu a thingthi hnawk a, thisen a rawn phu chhuak thawt mai. Thei leh thei lo hian a tho leh tual tual a, a khuh ang kharh kharh lehnghal a. Rina lam chu ava en leh a, Rina chu a lo la zuang zak zak mai a, ala ingit hmel khawp mai. Karan-a chu a ding ngil hleithei tawh lo, chuveleh Rina chuan a va pan a.

Chiang em em hian a hmaiah tak chuan hnung zawng chuan a kick leh chawrh mai a, a back-kick a nih ber chu. Karan-a chu a hawi sawk mai a, tukhum vaw chawrh chuan a tlu ri thlawp mai. Tho leh tur a awm tawh lo, nikhaw hrelovin a awm ta der mai. Chutah mipui ho chuan Rina zawk chu an au leh ta dur dur mai a, Amir-a pawh a rawn kal vat a.

Announcer pawh chuan mak a ti lutuk chu han au mai ngaihna pawh a hre lo, Rina chu a en vung vung a. A khi suk a, “A chak zawk chu fighter thar, Rina a ni e.” tiin a han au lauh lauh va. Amir-a chuan Karan-a manager bulah chuan, “Engzat nge an bet khah.....min lo pe rawh le.” chapo tak chuan ava ti ve ngat a.

Rum zet hian chu putar chuan pawisa chu a pe a, “Amir, i vanneih vawikhatna leh a tawp berna tur a ni nghal ang tih hre rawh. Karan-a chauh saw fighter ka nei lo, a aia tha tam tak an la awm tih hria ang che.” a han ti khur khur a. Amir-a chu a lo khi suka , “Awle...ka lo hria ange.” tiin a chhang a, pawisa chu a laksak ta a.

*********************************

Motor chhungah chuan Amir-a leh Rina chu an awm dun a, pawisa chu an insem mial mial a. Amir-a chu a hlim kher mai, “Ava han nuam em, i che tha khawp mai. First fight ah lehnghal, chupawh Karan-a..fighter tha lutuk leh chak loh la nei tlem em em mai kha ania, i awlsam em em mai lehnghal.” tiin a pawisa ken lai chu a han hnim vel vang vang a.

Rina chu a han ngawi vang vang a, “Amir, Karan-a manager khan i bulah khan enge a sawi a?” tiin a loz awt daih mai. Amir-a chu a khi suk a, “Ngatan mah ngai suh, a thaw ve mai mai a nih kha.” a lo ti sam et a. Mahse RIna chuan thutak zet hian, “Enge a sawi min hrilh rawh...ka hre duh.” a ti chang fak mai.

Amir-a chu a han thaw deuh hak a, “Phuba lak a tum a nih kha, a chak loh ala na ve hrim hrim a nih kha.” tiin a lo chhang leh a. Rina chuan a lu a han bu nghauh nghauh va, “Anih zanin atan khami fight chauh kha em ni?” tiin a han zawt leh a. Amir-a chu a nui huk a, “Rina, khabak kha a ngai hrih lo. Hahchawl phawt la, naktuk zanah kan kal leh dawnnia. Hei zanin pawh kan hlawh ania, zan khatah cheng sing 5 lai kan hlawh thei ania.” tiin a lo chhang a.

“Kha aia hlawh hnemna a awm em?” Rina chuan a rawn ti leh. Amir-a chuan a en hu a, “Enge i sawi awmzia?” tiin a lo zawt let hu mai. Rina chuan AMir-a chu rum zet hian a han en a, “Helaiah chauh hian em ni TOP PUNCH hian fighting ground in neih?” tiin a han zawt leh a.

Amir-a chuan bah nuai hian, “Aa..ih, nilove...Mumbai ah lo pawh, state hrang hrang ah a awm a, Mumbai khaw chhungah pawh hmun 10 vel ah kan nei thin. Hei hi i first nan chuan a tha ber ang ka tia, chuvang chuan hetah hian ka kalpui phawt che a nih hi.” tiin a lo chhang leh a.

Rina chu a han thaw hak a, “Naktuk zingah ka duh leh...naktuk zingah.” a ti leh ta nghal mai a. Amir-a pawh chuan mak a ti kher mai, “Rina, i chiang amaw? I hliam te kha enkawl phawt la, hahchawl phawt rawh.” a han ti dek dek chu chiang fek fawk hian, “AMIR..” Rina’n a han ti chu Amir-a tawnglai pawh a ngawi chat mai.

“Naktuk zingah ka duh...a awm angem?” tiin a han zawt nawn leh a. Amir-a pawh chu a han thaw deuh hluai a, “Pedder Street ah a awm ang, mahse ramhnuai lam hnaih deuhvah ania, a hla ang.” tiin a chhang ta a. Rina chuan a lu han bu nghat nghat a, “Dar engzatah nge?” tiin a han zawt leh a.

“Zing dar 4:30-7:00 am thleng.”

“Dar 5 rik hma a thlen ka duh.”

“Awle a tha e, anih chuan tuna ka mut loh chuan thawh ka hai palh ang.” tiin Amir-a chuan motor chu a start a, “Zanin chu enjoy ka duh asin le..” ti nuah nuah chung chuan a tlan ta a. Hotel-ah bawk chuan an let leh a, Amir-a chu a mu nghal daih a. Rina erawh a muhil thei mai lo, a pawisa hlawh chu a en ngawih ngawih a.

**************************************

Zing dar 4:50 velah chuan fighting ground chu Amir-a leh Rina chuan an va thleng ta a, mipui pawh an lo awm leh nual mai. Chumi hmuna mawhphurhna changtu ber, Pu Ajay-a chuan manager dangte chu a lo be mek hlawm a. Rina leh Amir-a lo phei mek a hmu chu a han en vang vang a, Amir-a te chuan an rawn pan hnai a.

Ajay-a chuan RIna chu a han en vang vang a, “Amir, hei hi em ni nizana Pu Mukesh-a min hrilh, Mizoram ami kha?” tiin a han zawt a. Amir-a chuan inthlahrung hmel tak hian, “Aw ni e, Boss. Ka fighter thar, Rina a nih hi.” tiin nui sang hian a lo chhang a. Ajay-a chu a khi suk a, “Karan-a minute 1 leh second 50 chhunga hneh thei kha hepa hi maw....a that dawn riau hi.” tiin a han nui deuh huk a.

“Nia Boss...ka rawn inhmelhriat tir ve che a nih hi.” Amira chuan a lo ti zawi leh sap a. Ajay-a chuan Rina chu a han enchiang leh deuh va, RIna lah chuan mit khap eih lo leh zam hauh lo hian Pu Ajay-a mitah tak chuan a lo en ve a. Ajay-a pawh chuan mak a ti ru angreng kher mai, “Anih leh hetah enge in rawn tih a?” tiin Amir-a chu a han zawt leh a.

“Boss, ka fighter RIna hian fight dang hmachhawn leh a duh a ni.” Amir-a’n a han ti chu Ajay-a pawh a meng phawk hru mai, “Eng a? Nizan lawkah a beih tawh kha, tunah a duh lehnghal amaw?” a ti hu mai a. Amir-a’n a chhan hma chuan Rina chu a va phei a, Ajay-a mitah tak chuan a en a.

Chiang fek fawk hian, “Cheng sing nga...cheng sing nga ni rawh se. Tupawh, eng fighter pawh...a lian emaw, a te emaw. Ka chak lo a nih chuan a pung nen lam ka pe let vek ang che, cheng sing nga leh mipui atanga bet telin ni bawk rawh se.” tiin english chuan a tawng chhuak ve ta a.

Amir-a chu a lo inthlahrung kher mai, Ajay-a lah chuan hmuhsit hmel tak hian a nuih tiah tiah a. Rina darah chuan a han beng thak thak a, “Naupang, Karan-a i hneh avang khan chak ta berah i inngaih em ni? A ni aia tha hi helai hmunah hian an tam mai nilovin, amah aia chunghnung vek anni helaia fighters ho hi chu...i confi bawk a, i ngam tak tak amaw?” tiin a han zawt vel a.

Rina erawh a nuih a lo za ve hauh lo, “Ka dilna chu min pawmsak dawn em, nge ni min bei ngam tur awm ang fighter i hmu lo zawk?” a lo ti let ve ngat mai a. Ajay-a chu a thinrim kher mai, “A tha e, i duh anih chuan.....cheng singa maw? A tha e, lo nghak rawh.” tiin a phei san a.

Chuveleh Amir-a chuan, “I mawl em ni, Rina? KA kutah dah thin rawh, lo tawng ve vak vak suh. Mi hausa a nih kha hre ta che, an hnuaia sum hmu ve mai chauh ka nih hi.” tiin a lo hau nghal chiam chiam a. Rina chuan Amir-a chu a en a, “Hna zawh fel vat a, sum hmuh vat ka duh zawk.” a lo ti hmuk mai.

******************************

Mipui chu Ajay-a chuan a au khawm a, “Ngaithla rawh u, nizan khan Karan The Destroyer ti a kan hriat lar, fighter tha tak mai Karan-a kha minute 2 pawh tling lovah fighter thar pakhatin a hneh a, kan hre vek ang ti rawh u. Tunah chuan kha fighter kha hetah rawn kalin fighter dang a rawn cho leh dawn a ni awm e, cheng sing nga a bet nghal bawk a nih chu.” a han ti lauh lauh va.

Amir-a chuan a lu a dawm vawng vawng a, “I chak loh vaih chuan awww...cheng sing nga vel bak kan hlawh loh kha mawle, ka hmang nual tawh lehnghal a. Pek tur kan nei dawn miah lo ania, min that duh mai ang, Rina.” tiin a hlauthawng kher mai. Rina chu a khi suk a, “I hausa dawn min tih kha...hausa turin alawm ka zui che.” tih pah chuan mipui awmna lam chu ava pan phei a, Amir-a chuan a zui ve nghal bawk.

Ajay-a chuan Rina lo phei mek chu a va hmu a, “Ava huaisen reuh ve mawle, he nau chu..” tiin ama hriat tham leh chuan a han phun zawi sap a. A aw a han thian kharh kharh a, “Heta hi kan challenger chu a ni e, tunge bei dawn le? He naupang hi zirtirna pe hlak duh kan awm em aww...rawn chhuak teh u.” tiin a han au leh lauh lauh va.

Chutah mipui kar atang chuan aw thum tak mai hian, “Keiman ka lo bei ange, khawnge chu naupang chu a awm?” a rawn ti a. Mipui ho chu an kawl sawn a, Buka The Bull an tih thin, Tamil atanga lo kal, fighter lar ber pawl chu a rawn pen chhuak a. Ft 6 chuang daiha sang niin a palian em em a, kum 35-40 inkar vel a ni.

Meizial a rawn la zu khu luih luih zui, a pian chu a sek tha ngang mai. Rina chu a en vang vang a, “Ka khawih na mah mah ang che tih chu ka hlau khawp mai, ila naupang ropui si ahh..” tiin a han nuih vel a, mipui ho chu an lo nui ve dur dur bawk. Rina chuan a kawrlum leh t-shirt hak lai chu a phelh nghal a, tawnzau erawh a phelh ve lo, a hlauh loh hmel t(r)iah t(r)iah  kher mai.

Buka pawh chu a khi suk a, “Rin aiin i huai zek mai ka ti, khawnge ka han sawp nek law law teh ang che.” tiin a kawr chu a han phelh ve a, a sek phiar nalh rem rem khawp mai. Amir-a chu a hlauthawng rilru khawp mai a, “Rina, hei chu i rin ang ngawt a ni dawn lo ania. A chak zia ha hipa an sawi thin kha ania, fimkhur hle ang che.” tiin a chah mawlh mawlh a.

Rina lah chuan a kut chu a han elh ri ang tuar tuar a, “PAwisa lak lo inring nghal ang che, reilo thei ang bera beih ka lo tum dawnnia.” a lo la ti sam et zui. Ajay-a chuan ring tak hian, “AWle tunah fight kan tan ang, inseh loh tur a ni a, a tlawm zawk emaw, pakhat zawk nikhawhrelova a awm hma chu rules a awm lo, duh duh chen a inbeih theih e.” a han ti leh lauh lauh va.

Mipui ho chuan a hma zan ang bawkin Buka lamah chuan pawisa chu an bet leh sup sup a, Rina lamah chuan tuman an bet leh ta chuang lo. Buka han in warm up lai vel chu Rina chuan chiang tak hian a lo thlir reng a, Karan-a ai chuan a speed a rang deuh a ni tih a hmu thei nghal.

Buka lama pawisa an bet, tlingkhawm zawng zawng chun cheng sing 7 vel lai a ni a, an man inchawi pangngai cheng sing nga nena belh khawm phei chuan avaiin cheng nuai 1 leh sing hnih lai a ni tihna a nih chu. Rina chu a confi khawp mai, Buka pawh a inring ta, inbei tur chuan an inhma chhawn ta ran mai a.

****************************************

TO BE CONTINUE