MUKPUI LUI (MIZO FICTION STORY) Written by : Aaron Malsawmdawngzuala Chapter - 5 (LAST)

 MUKPUI LUI

(MIZO FICTION STORY)

Written by : Aaron Malsawmdawngzuala

Chapter - 5

(LAST)

*********************************

Muani ruang chu kuah in Sangsangi chu a tap zawih zawih mai a, "A van pawi tak, Muani...a ni thei lo." tiin a inhnit hlawp hlawp mai. Peka chu thei leh thei lo hian a rawn tho va, "Muani..Muani..i harh em?" tiin a rawn sawi ve vak vak bawk a. Mahse Muani chuan nunna reng a nei tawh lo tih a hriat chuan Peka pawh chu a maimitchhing vang vang a, a mittui a tla zawih zawih mai.

Bza chu saphai bulah chuan a lo la awm reng a, beidawn hmel tak hian Muani ruang chu a rawn thlir ve ngawih ngawih bawk. Peka chuan a bula thingkung chu a hnek vak vak ringawt a, "Engvang nge? Enge kan tihsual, engvangin nge hetiang hi kan chungah a thlen bik?" tiin a au vak vak ringawt mai.

Muangchang hian Bza chu a rawn phei a, Muani ruang bulah chuan a thingthi hnawk a. Tunah chuan pathum chauh an bang ta, inhnem bik tur awm chuang lo hian an beidawng lutuk chu an inhnit feih feih hlawm mai. Bza chuan a mittui chu a hru hul a, "Peka, ala hla em?" tiin a han zawt a.

Peka chuan mit sen rum chung hian, "Kilometer 1 leh tlem vel chu ala ngai ang." tiin a lo chhang a. Bza chuan lung zum, saphai a vih hlumna ngei mai chu a han la leh a, tichuan thing khawng tha ve tak mai, a bula mi ah chuan a tawn bet a. Hrei thar chu a siam ve ta, "Kan kal zel dawn em? Muani ruang hi tihian kan hnutchhiah tawp dawn em ni, engtin nge kan awm zel dawn?" tiin a han ding hluai a.

Sangsangi chu a la tap bang hleithei lo, "Keimah vang ni mai hian ka hria, lo chawl lovin lo kal lui hram hram zawk ila chu Muani pawh ala dam tur." a lo ti tham tiak a. Chuveleh Bza chuan, "Chawl lo pawh ni ila, saphai khan min hmu daih tawh tihna ania. Min umzui dawn tho tho, inthiamlo duh suh." a lo ti vat a.

Peka chu a rawn ding ve a, "Engpawh nise, kan kal zel phawt ang. Chempui ber lah kha tent-ah khan kan kalsan daih bawk si a, tunah chuan Bza hmanraw siam thar leh chiah hi invenna kan nei tawh. Kan hma ah sawn ramsa engzatin nge min la bei dawn kan hre lo, chuvang chuan SAngsang, nangpawh thingbung engemaw tal keng rawh." a han ti a.

Sangsangi chuan a han zawng kual a, thingbung pakhat chu a chhar ve mai bawk a. "Inveng ran a kan kal zela ngai tawh ang, Sangsang..i kal thei angem?" tiin Bza chuan Sangsangi chu a han zawt a. Sangsangi pawh chuan a lu lo bu nghatin, "Um, ka kal thei em em ang." tiin a lo chhang a.

*****************************

An kal leh char char a, minute 20 dawn lai an kal hnu chuan an hnunglam atang chuan thawm an hre leh ta. Rang lutukin Bza chu a hawi let a, "Enge..Enge a?" tiin Sangsangi chuan a lo zawt vat a. Bza chu a han hawi kual a, "Thawm dim lawk teh u, engemaw hram ri hum hum ni awm tak ka hria." a han ti a.

Peka pawh chuan a lo hre ve a, "Nia...keipawn ka hria." a lo ti ve bawk. An thing bung ken lai chu SAngsangi leh Peka chuan an han hum nghet sauh sauh va, Bza pawh a hrei keng ran chung chuan a inring khawp mai. Mahse an rin loh tak maiin Bza bul lawk, hnim kar atang chuan engemaw hian Bza chu a rawn la daih mai.

Peka leh Sangsangi te pawh chu an phu nasa kher mai, "Bza..Bz..khawnge i awm?" tiin Sangsangi chu a au nghal tuar tuar a. Peka chuan lehlamah chuan a hel nghal vat a, "Enge awmzia? Bz, khawnge i awm?" tiin ani pawh chu a au vak vak ringawt mai. Chutah sanghal lian tak mai hi hnim kar atang chuan a rawn zuang chhuak thut a, Bza kekawr chu lo seh in a tlan pui ta vak mai a.

Sanghal chu a tlan chak em avang chuan Peka pawh a su thal tawp mai, "Peka, Peka..." tiin Sangsangi chu a rawn tlan phei ve bawk. Sanghal lah chuan Bza chu a hnuk kual ta hrep mai a, a la thing vak vak zui. PEka chu rawn tho leh vatin sanghal lam chu ava pan ve leh a, a theih pa tawp chuan a vua a.

Mahse sanghal chuan a lo su leng leh lawp mai, Peka chu a thal leh ta tual mai a. Bza erawh chuan a hrei chu a lo la hum reng a, chutah thei leh thei lo hian hnuai lam zawng chuan a han vai pawp ringawt a. Ama ke a chek fuh teuh ngei mai, mahse sanghal beng chhungah tak chuan a chek tlum thawih mai.

Sanghal pawh chuan zuang vak chung chuan Bza kawkawr a seh chu a tlah a, Bza pawh a leng dawrh mai a, mahse a insawh na vak lo hlauh. Sanghal lah chuan a hliam chu na a ti em em a, a tlankual vak vak ringawt mai. Chutah na em em hian thingkung lian tak chu a la tauh chawrh zui a, a thal tawp mai.

Mahse a rawn tho leh nghal a, Bza te lam pan ta lo chuan a hma zawn ah chuan a tlan phei ta vak mai a. Bza te chuan an va umzui a, sanghal thawm chu zawi zawi hian a reh tial tial a. An va thlen meuh chuan sanghal chu a hliam tuar lovin a lo thi der tawh, hrei chu BZa chuan a hak pawt chhuak leh a, a lo lut thuk deuh tawh nen pawh chhuah chu a har phian lehnghal.

Bza chuan tawnzau chauh a ha bawk si nen, a tawnzau hnung chu a pawp hruah mai. A hnungzang pawh chu tlem azawng a pilh a, hnim a tam hlauh va, lung nawi hlir chu nise chuan ana ve khawp ang le. Sangsangi chuan Bza hnung chu a han en a, "AWi...a thi nuai mai, ana em?" a han ti nghal chung chung a.

"Na love, ka tha alawm." tiin Bza chuan a lo chhang a. "I ke te kha a seh hliam lo maw, a hnuk vak bawk che sia." tiin Peka chuan a lo zawt ve bawk a. Bza chuan a hnungzanga hliam chu na a ti ve deuh ani ngei ang, "Aih...ka ke a seh lo, ka kekawr zawk alawm." tiin a han th(r)en deuh chawk chawk a.

Peka chu a han thaw deuh hluai a, "Huiham, engzat tak awm ang maw, sanghal ho lah hi? Ti hian pathum lai chu an thi tawh chu ania, saphai lah lo awm ve chhen bawk nen...." a han ti vin hlur a. "Ramsa dang pawh an awm angem a hriat miah loh ania, inven fimkhur hle chu a ngai tawh ang." Bza chuan a lo ti ve bawk a.

SAngsangi chu a beidawng tawh takzet, "Tiang reng reng chuan engtin nge damin kan chhuah theih ang ni? Keichu kan damchhuah pawh ka ring lo, kan thi vek ang ka ring." a lo ti t(r)uau mai a. Bza chuan a kutah chuan ava vuan a, "Lugnngai suh, kan damchhuak em ema ng. Beidawng suh, kan beilet zel dawn alawm." tiin a lo hnem vat a.

"Engpawh nise i kal leh phawt mai teh ang u, kan tlai zel dawn. Enge kan hmaah hian kan tawh leh dawn hre lo mah ila, heng ramsa kawlh ho eitur atan mai mai hian engmah ti lova awm reng hian awmzia a nei dawn chuang lo. Kal leh phawt ang u, inring rengin awm ila." Peka chuan a rawn ti ve leh a, tichuan an pathum chuan an kal leh ta a.

**********************************

Police ho chuan rei fe an chhui zel hnuah leh Bza te thain ho phone an theih ang tawka tracking an han tih kual vel hnuah chuan an accident-na hmun chu an tleng ve thei ta hram a. Kham awih vak lo, Bza te tlan liamna ah chuan police pali vel chu ke in an han chhuk a. Peka bolero, thingkung bula lo awm sawi bawi mai pawh chu an zu hmu ve ta.

Motor chhung chu an han check a, mahse mihring tumah an hmu lo. An zinga Sub Inspector, Pu Engmawia chuan a hmun chu a han enkual vel a. Chutah engemaw ri a hre tlat mai, "Chu..in hre ve em, lui luang ri ava ang ve?" a han ti nuah nuah a. Constable pathum, Rickya, Dinga leh SAngtea te pawh chuan an han ngaithla chiang a.

"Anih chiah chu, kan zu en chhin dawn em ni, Sir?" Sangtea chuan a han ti a. SI Engmawia chuan a lu lo bu nghatin, "Nia, zu enchhin teh ang u." a lo ti a, an zu chhuk ta hlawm a. An rin ang ngei chuan Mukpui lui, zau leh lian tak, mawi em em mai chu an zu hmu ve ta. Lui kam a, Bza te thian ho tent zawng zawng te leh bungbel vel lo let nuai mai te chu an zu hmu thei bawk.

SI Engmawia chuan ring tak hian, "Aw... khutah khuan an awm ngei a nih khu, a chiang vek alawm khu...hetah hian accident-in khulamah khuan an riak a ni ngei ang, chhuk nghal ang u." tih leh tlan thlak a rual nghal a, constable pathum te chuan an zui ve nghal bawk. Lui chu an zuk thleng a, tent chhungte chu an han en a.

Lui lam pan thlakna thleng chuan an han en kual hnu pawh chuan mihring tumah an hmu der lo mai, "Ava mak ve...khawnge an awm ang le?" a ti nuah nuah mai a. In then hrang meuh chuan police pali te chuan an han zawng kual leh a, "Sir Engmawi, helamah hian lo chhuk lawk teh u." tiin lui luh thlakna bula lo zawng kual mek, constable Rickya chu a rawn au lauh lauh va.

Rang lutukin SI Engmawia te leh midang pathum te chu an zuk chhuk ve nghal vat a, constable Ricky-a bul chu an zuk thleng a. "Enge ni ta, Ricky?" tiin SI Engmawia chuan a han zawt a. Ricky-a chuan a bula lung liam pui pui chu a kawk a, "Enteh Sir, hei...thisen ava ang ve.." a han ti a.

SI Engmawia chuan a han en chiang a, "Ava nih hmel ve, a awmzia chu helai hmunah hian khang thian ho te khan buaina an tawk a ni chiang mai." a han ti a. "Engtin nge kan tih ang, Sir?" tiin constable zinga mi, Dinga chuan a lo zawt a. Engmawia chu a han ngawi vang vang a, "Chho leh phawt ang u, ramhnuai lamah sawn an kal pawh a ni mahna." tiin a chhang a.

An pali chuan an chho leh a, ramhnuai lam pan chuan an lut phei ta a. SI Engmawia ten thisen an hmuh kha Siama thisen a ni a, Siama'n Muani lui lama a pawm phei hnu a, sanghal leh Siama inbeihna a Siama thisen ngei kha a ni. Police ho pawh chuan ramhnuai chu an han luhchilh ve ta ngawi a, ramhnuai chhungah chuan eng thil hlauhawm nge awm tih lah an hre ve der mai si lo.

**************************************

Bza te pawh chu an kal zel a, "Peka, kan thleng tep tawh em?" tiin Sangsangi chuan a lo zawt chhen mai a. Peka chu dingin a han hawi kual deuh vut vut a, "A hla vak tawh lovin ka hria, helai pangpang sen awm buk luih hi Siama nen khan kan chhinchhiah lai ber kha ania. Heta tang hi chuan a hla tawh lovang, kal zel phawt ang u." tiin a lo chhang a.

An kal leh ta zel a, mahse hma hruaitu ber Peka chu a ding ta thut mai. Mak tih hmel tak hian Sangsangi chuan, "Tinge a? Tinge i din leh tak thut a?" tiin a lo zawt vat a. PEka chu a rawn hawi let a, "Shhh..bengchheng su, saw..sanghal pakhat ka hmu leh tawh." tiin thingkung phenah chuan a biru nghal a.

Bza leh Sangsangi te pawh chu an biru ve nghal bawk, PEka chu a han dak dek dek a. Sanghal lah chuan a bula hnim vel chu a lo hnim kual dun dun a, "Engtin nge kan beih leh tak ang?" tiin Bza chuan a huphurh tawh khawp mai. Peka chu a han ngawi vang vang a, "Thawm nei lo thei ang ber khan a sir atang hian i hel mai ang u, fimkhur ila." a han ti a.

Tichuan an pathum chuan a sir lam atang chuan chu sanghal en pah reng chuan fimkhur tak hian hel chu an tum ta a, mahse a kual angreng em avang chuan hel chhung pawh a rei angreng kher mai. Minute 5 vel dawn lai thawm nei lo thei ang bera an hel hnu chuan an hel chhuak ve thei dawn ta, sanghal hmuh phak lohna lamah chuan kal zelin an hel tluan thei ta hram a.

An him ta emaw tiin an thaw huai mai, mahse kawng kawia an kal liam hma chuan sanghal chuan a rawn hmu hman ta tlat mai le. Muang chang chuan ava zui ve ta mai a, reiloteah chuan ava pawh pha nghal mai bawk. Sangsangi chu a han hawi let zeuh va, sanghalin muang changa a rawn zui ve mek chu a hmu fuh ta.

Ring takin a au va, "Saw..saw min rawn zui ania." tiin a hnung tawlh nghal dawrh a. Bza leh Peka te pawh chuan hnunglam chu an hawi nghal a, Peka chuan Bza hrei ken lai chu laksak thutin sanghal hmaah chuan ava ding ran mai. Sanghal pawh chu a ding ve a, Peka chu a melh ran mai a.

Bza chuan hrethiam lo tak hian, "Peka, engthil nge maw tih i tum le?" a ti hu mai. Peka chuan rum zet hian sanghal chu melh ran pahin, "Ka kham tawh, ka hne tawh lutuk. Bz, kan thleng tep tawh ania. He sanghal hi chu ka lo dahtha mai ang, Sangsangi nen khan tlan rawh u." a ti khur khur mai.

Mahse Bza chuan a lo duh bik tlat lo, "Nilove Peka, ka kalsan tawp bik lovang che. Ka lo bei ve ang, kan pahnihin kan bei dun ang." a lo ti ve tlat a. Peka chu a rawn hawi a, "Nilo Bz, Sangsangi kha hmun him lam pan pui zawk rawh. Keichu ka thih leh ka thi animai, mahse nangni pahnih tal chu in damchhuah angai. Ka rawn umpha vat ang che u, khawngaihin kal rawh u." a lo ti leh a.

Bza chuan a dik bik hauh lo, "Sangsang, i tiang kha keng reng la. Lo va kal rawh, hmun him lam lo va pan rawh." tiin Sangsangi chu an hrilh a. Sangsangi chuan a huphurh kher mai, "Nilo, in tello te chuan engtin nge ka kal ngam bik anga?" tiin a lo tap tuau mai. "Lugnngai suh, kan rawn zui vat dawn che alawm." Bza chuan a han ti leh a.

Hreh chung chung chuan Sangsangi chu a tlan ta a, "I va han mawl tak, Bz. Tinge amaha i kal tir, hmeichhia a nih kha.." tiin Peka chuan a lo vin hlur mai. Bza chuan Peka chu a han en a, "Nangmah chauhva i beih ka duh bik hleinem, he vawkpui hi kan pahnihin kan that ang chu le." tiin a han nui lui sak a.

Chutah sanghal chu a rawn kal phei ta, Bza chuan thing bung chu a hum ran a, chutiang bawkin Peka pawh chuan hrei chu a hum ve ran bawk. Sanghal chu rawn tlan thutin Bza chu a rawn bei hmasa ta, a thing ken lai bung hmawk khawp chuan Bza chuan sanghal chu a lu ah tak mai chuan a lo hlap ri pawp mai a.

A bawk deuh thlawp a, mahse a rawn ding chhuak lehnghal vat a. Chuveleh PEka chuan hnunglam atang chuan sanghal nakah tak mai chuan a hrei hmang chuan a han chek tlum leh pawp mai a, sanghal pawh chu a per deuh dawrh mai. Thisen a rawn chhuak nghal zawih zawih a, mahse ala thi lo nasa mai.

A rawn tho lehnghal a, mahse a hliam avang chuan a che tha hleithei tawh bik lo. Lung tum lian tak chu Bza chuan a chhar a, sanghal chuan a rawn pan leh nghal. Bza chuan a theih tawp ana chuan sanghal chu a han vawm chawrh mai a, a mitah tak ala vawm fu hlauh zui. A pai leh deuh dawrh a, chuveleh a chaldarah tak mai chuan Peka chuan thisen per chhawk khawp chuana  chek tlum leh ta pawk mai a.

Sanghal pawh chu a bawk ta thlawp mai, dimna nei miah lo chuan PEka chuan a han hrei chua  phawi ri leh hrawk a. Sanghal bengah chuan a han chek leh thuai mai a, sanghal pawh chu a thal ta der mai. A thaw hrawk hrawk a, a nguk hruih hruih bawk a. MAhse a thaw muang tial tial a, a tawp a tawpah chuan a thi ve leh ta.

Bza leh Peka chu an hah ngang aniang, an thaw dun hlawi hlawi mai. Bza chuan hrei chu a chhar a, "Sangsangi..SAngsangi kha, kan va um zui vat angai ania." tih leh tlan a rual nghal a. Peka pawh chuan a zui ve nghal a, mahse Sangsangi chu an hmu leh ta mai lo tlat. An au vak vak a, mahse Sangsangi chuan a chhang hauh lo.

**********************************

Sangsangi chu a lo tlan thui hman tawh hle mai, a hah em avang chuan a chawl a. Thingkung pakhat chu vuanin a thaw hrawk hrawk mai a, a ke lah chu a rawn na leh tan tawh bawk nen. A awm dawm meuh chuan a han thaw vak vak a, a ziawm deuh hnu chuan a han ding ngil a.

A awmna chu a han enkual a, kalkawng a hre ve  bawk si lo nen a bo leh ta der mai. Chuta karah a vawn mek thingkung chu a han en a, rul teureuhte a lo la awm zui. A phu nasa lutuk leh hlau lutuk chu a au vak a, a tiang ken lai chuan a han hlap pawp ringawt a. A la vaw fuh chat zui a, chu rul lu ah tak chuan a vaw pherh duai mai.

Mahse a tawlh hnung dawrh a, a ke na tawh bawk nen lungte a rap pial a. A bul a khur zau takah chuan a tla lut teuh kher mai, mahse a vannei hlauh. Khur a zuk dak thla chu a meng phar ta awn awn mai a, khur chu a lo zau angreng hle mai a, mahse ft 8 vel baka thuk a ni lo thung.

Chu khur chhungah chuan rul tam em em mai hi an lo awm teuh mai a, panga vel chu saphai, mihring dawlh thei tur khawpa lian an ni bawk. Sangsangi chu a khur nghal zawih zawih mai, mahse a au ri ngam lo. A tho nghal vat a, khur chhunga saphai pakhat chuan a rawn hmu hman tlat mai.

Rang lutukin a rawn tleng chhuak a, SAngsangi keah tak mai chuan a rawn hap hman ta tlat mai a. SAngsangi chu a bawk thlawp mai a, saphai chuan hnuh luh a tum ta a. Sangsangi chu  a au vak vak a, "Nilo...min chhan ru, PEka..Bz..min chhan ru." tiin a au vak vak a, hnimah chuan a inpawt tang tawk tawk a.

Mahse saphai chu a chak em avang chuan Sangsangi chuan a pawt hneh zo ta lo, a hnuk lut dawn ta mai a. Mahse Bza chu a rawn thleng a, saphaiin khur chhunga SAngsangi a lo hnuk lut mek a hmuh chuan a hrei chu a thlauh nghal a. Va tlan vatin, "Sangsang.." tiin a va bawk phei nghal rawk rawk a.

Sangsangi kutah chuan ava man hman a, chu tih rual chuan Peka pawh a rawn thleng ve nghal bawk. Hrei chu chhar vatin saphai nghawngah tak mai chuan a rawn chek chawrh mai a, saphai pawh chuan SAngsangi chu a thlah rang kher mai. Khua chhungah chuan a tleng lut nghal zal zal a.

Mahse saphai dang pathum vel lai chu an rawn tleng chhuak leh ta mai a, a hma a saphai an hmuh ho ai daih khan a lian bawk a, ft 17-19 vel laia sei an ni lenghal. An chetdan atang reng reng chuan an che rang in an chak dawn tih a hriat em em bawk, chutih lai karin Peka vuak zawh chiah saphai kha a rawn tleng chhuak veleh bawk.

An pathum chuan chung saphai ho chuan an en kar hlawm mai a, tlanchhe eng ang mahse an man hman dawn tih chu a chiang reng, an awmna lai chu hnim deuh vek niin an tleng chak dawn ropui mai bawk si. Peka chuan Bza chu a en a, "Thianpa, Sangsangi hi him takin helai hmun atang hian chhuah pui ang che." a ti ta mai a.

Bza chuan a hrethiam lo kher mai, "Enge i sawi awmzia, PEka?" a lo ti hu mai a. PEka chu a han nui lui sak a, "Ka thian i ni hi ka lawm takzet, ka nu leh pate kha min lo mangtha sak dawnnia, in pahnihin, mangtha ule." tiin saphai ho awmna lam pan chuan ava tlan ta thut mai a.

Bza chuan va umzui a tum a, "Hey, Peka..i mawl ami?" tiin a au zui vak vak a. MAhse Sangsangi chuan PEka chu a lo dang nghal a, PEka chuan hrei chu lek kangin saphai ho chu a va vai vak vak a. Mahse saphai pakhat chuan a hrawkah a lo hap nghal chat mai, chutah pakhat chuan a lo vial nghal bawk.

Saphai ho chuan Peka chu an inchuh leh ta nghal a, PEka ruh chu a tliak ri rawp rawp mai. Bza chuan tap chung hian, "Nilo..Peka, MAwla..tinge hetia i tih?" tiin a vin hrep hrep a. Sangsangi chuan mangang tak hian, "BZ, tlan ang, tlan mai ang." a lo ti ve chhen bawk. Chutah saphai zinga pakhat chuan Bza leh Sangsangi te chu a rawn melh ve leh ta, Bza pawh chuan Peka kalsan hreh chung chung chuan Sangsangi chu a tlan pui ta tawp a.

Saphai chuan a umzui lem lo, tichuan khur chhungah chuan Peka chu an luh pui ta a. Sangsangi leh Bza te chu an tlan zel a, mahse rei pawh an tlan leh ta chiang lo. An hma takah chuan sanghal pakhat hi a lo ding leh ta run mai, an ding chat a. Sanghal lah chu a lo la lian phian zui, a hma ami te aiin a ngho pawh a sei bawk.

Bza chuan hlauh pawh a hlau peih tawh lo, "Lo kal rawh...min rawn ei rawh..in hneawm lutuk mai." a ti vin hlur tawh. Sangsangi erawh chuan a lo la hlau khawp mai, Bza hnungah chuan a biru nghal a. Sanghal chuan muang chang hian a rawn pan a, Bza erawh chuan tlanchhiat a tum tawh hauh lo, hmanrua pawh engmah a nei tawh lo bawk.

SAnghal chu a lo hnai zel a, mahse silai a puak ta dur mai. Sanghal chu a bawk thlawp a, a chal dar chu a lo kaw huau a, thisen a chhuak zawih zawih mai. A rawn tho leh a, mahse silai chu a puak leh ta dur mai a. Sanghal mit veilam zawk chu a rawn kek pawp mai a, thisen a per chhawk mai.

SAnghal chu a thaw hrawk hrawk a, reiloteah chuan a thi ta. Silai puahna lam chu Bza leh SAngsangi te chuan an va en a, SI Engmawia te an lo ni. Rang takin an rawn tlan phei a, "In tha em?" tiin Ramenga chuan a rawn zawt nghal a, thil awmzia te chu a han zawt a. Tichuan Police ho chuan him dam takin an haw pui ta a, chu lui anchhedanwg leh hlauhawm tak mai atang chuan Bza leh Sangsangi te chauh chu dam chhuak awmchhun an ni ta a ni.

***********************************

THE END