MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 1

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 1

****************************

(MAMMON awmzia : Ramhuai, duhamna a khat leh tawp chin nei lo tihna a ni a. Mahse he thawnthu ah erawh hi chuan Mammon ramhuai lam kan thailang dawn lova, a hming chauh hi kan hmang tangkai mai chauh dawn a ni.)

***************************

"Tun kar chhung chiah hun ka pe tawh ang che, kar leh Thawhtanni ah ka lo kal leh ang. Chuta i la nei lo a nih chuan i chhuak chiang tawh ngawt ang hre rawh, police ka lo bawk ang." tiin Pu Zara chu a ang nasa ngei mai. Rina chuan hnuailam a melh reng a, "Ka hria e, Pu Zar...lo neih hman ngai ka tum ang." tiin a chhang zawi sap a.

Pu Zara chuan ngei hmel tak hian a han melh khur a, "Rina, i la naupang a, i la chak tha bawk. Hetia nung mai mai tur hi i ni lo, hna te hi zawng ve rawh. I chhungte pawn an hnawhchhuah chhan che chu hei vang hi ania, i tet te atanga ka hriat chian i nia. Ka khawngaih mai mai che a nih hi, harh chhuak ve tawh rawh." a han ti leh hrep a.

Rina chuan a chhang tawh lem lo, Pu Zara chuan chhuah pah chuan, "Kar leh Monday chu pawisa lo inring ang che, a nih loh chuan i chhuak vang vang tawh ang." a han ti zui leh hram a, a kalsan ta a. Rina chuan kawngka chu a khar a, a in luah zimte chu a han en kual a.

Thutthleng ah chuan thu in a hmel chu a ngui takzet, "Ka la hausa khawp ang, engtin emaw tak chuan ka la hausa ve khawp ang." a han ti nuah nuah a. Rina hi a hmingpum chu Lalrinzuala a ni a, tlangval kum 25 mi niin hmelchhe lem lo tak a ni. Drug addict a ni thin a, mi awm thei ve pangngai tak chhungkua atanga rawn sei lian a ni.

Mahse kum 17 vel a rawn nih chhoh atang khan khawvel lamah a tlan t(r)an a, drugs te khawih chhovin chhungkaw blacksheep diktak a rawn ni chho ta a. A chhungte pawhin tih ngaihna an hre tawh lo, vawikhat chu a nau hmeichhia kut a thlak avangin apa ning lutuk chuan a hnawtchhuak ta tawp mai a ni.

A chhungten an tuithlar tawh a, Pu Zara hian a khawngaih avangin a in ruak chu a luah tir a. Mahse pawisa a thawhchhuah tlem theih em avang leh amah Pu Zara pawh pawisa mamawh tho a lo nih ve avang chuan a khawngaihna in a tlin tawh bik lo, nitin mai chuan a vau reng mai a ni.

Rina pawh inchhir viau mahse, a chhungten an tuithlar ta mai chu a lung nilovin a thinrim em em a. Let leh chu a tum tawh bik lo, a chhungte laka phuba lak a, amah ngeia pawisa thawh chhuah chu a tum ve bur tawh thung a ni. Damdawi tih a bansan a, a theih theih naah inhlawh in a phak ang tawk chuan a taima ve tawh hle thung a ni.

MAhse hna mumal nei hek lo le, mamawh a lo tam ve thin bawk nen, inluah man cheng 3000 lek pawh chu a pe tha hleithei der lo mai a. Chuvang chuan a rilru a hah in pawisa thawhchhuahna tur chu nitin mai hian a zawng kual reng a, mahse tun thlengin a la hmu lo chu a nih hi.

*************************************

Zan a lo ni a, Rina chu kawtah chuan a tei kual a tei kual ringawt a. In luah man chu ni reilote chhunga pek a ngai bawk si, mahse pawisa lah a la nei der mai si lo. A rilru a hah em em a, ruk han ruk em bik chu a duh si lo. Chutia mangang leh rilru hah taka a inngaihtuah lai chuan kawngpui lamah chuan thawm a hre ta tlat mai, intibuai an awm niawm tak a ni.

"Engthil nge maw thleng le?" tih nuah nuah pah chuan ava pan hnai ve a, ava thleng chu a ding chat mai. Tlangval pathum hian vaipa pakhat hi an lo sawisak rawn mek hi a lo ni. Rang takin ava pan a, "Enge awmzia? Intibuai suh u...tawp rawh u." tiin ava thleh a.

Tlangval pathum zinga pakhat chuan a lo nam sawn dawr mai, "Nang ve kha, kan buaina bul engmah i hre lo. Lo inthiarfihlim rawh, hnek ve i duh loh chuan." a lo ti khur khur mai. Rina chu a han thaw hak a, "Nia engmah ka hre lo, mahse in that mai anga sin...enge in buaina te chu min hrilh ve ula..." zaidam tak chuan a han ti a.

Pakhat leh chuan pawr tak hian, "I hriat a ngai lo, kal bo rawh. Anih loh chuan nangpawh kha kan sawisa ve ang che, kha vaipa khan kan pawisa a ru tih i hria em?" a lo ti ve hlur bawk a. Rina chuan vaipa chu a en a, "I ruk sak em ni?" tiin a han zawt a. Vaipa chu a hnar a lo thi phung tawh mai, "Aih...aih, ka ruk sak lo...dawt an sawi a ni." tiin th(r)en chawk chawk chung chuan a lo chhang a.

Tlangval pakhat leh chuan thinrim hmel tak hian, "Dawt te chu ala sawi ngam, vai te te si..lo kal teh.." tiin va pan a tum leh a. Mahse na deuh tak hian Rina chuan a lo nam sawn dawrh mai, "A tawk...insum hram hram teh u." a lo ti vat a. Chutah tlangval ho chu an thinrim zual ta kher mai, "Min nam sawn ve khanglang amaw? I pawr a mi? Khawih ve i duh ami?" tiin a namsawn ber pa chu a pawr kher mai.

Rina chuan zaidam tak hian, "AWle..ka tihpalh. Mahse khatia mizo tlangval pathum laiin vai mai mai in sawisak rawn chiam mai a, a mizo lo emai. Inbengdai ula, tha deuhvin kan sawi fel dawnnia." a han ti leh a. Tlangval pakhat chuan, "Kan pawisa a ru a, duh leh kan that hial ang. Ilo inrawlhna tur a awm lo, i kal sawn vat a nih loh chuan kan khawih ve tak tak ang che." a ti leh khur khur mai.

Vaipa lah chu a rawn tho va, "In duh leh min check ula, in pawisa ka ru lo. Ka mamawh lo bawk, daw heh hlawm lutuk." tiin ala rawn vin ve pang pang mai a. Tlangval pathumte chu an insum thei tawh lo, pakhat chu a rawn tlan a. Vaipa chu rawn khawih a tum a, mahse Rina chuan a kawr hnungah chuan lo pawt betin a theh thal tawp mai.

Thinrim tak hian a rawn tho leh nghal a, "Min lo khawih ve ngam amaw, Zawnga?" tih pah chuan a va pan a. Chutah a hnunglam atang chuan a thiante pahnih chu an rawn kal ve bawk, "Nang hian he vai mai mai hi ilo chhan amaw...khawnge, ka han sawisa ve law law teh ang che." tiin pakhat chu a rawn tlan phei veleh a.

Rina chu rawn hnek a tum a, mahse a lo bum rang kher mai. A thianpa zawk chu a hnararh a hnek ta siah mai a, a thal leh ta tual mai. Chutah pakhat chu rawn kal leh in rawn khawih ve a tum a, mahse Rina chuan a lo bum lehnghal a. An pathum chuan an beihrawn ta, mahse Rina chuan khawih let ve mang lo chuan an mahni leh an mahni chu a inkhawih tir a ni ber mai.

Vaipa chuan Rina chetdan vel chu hmuhnawm a lo ti kher mai, a lo en dauh dauh ringawt a. Rina chuan a khawih let mang lo, a bum kawi char char hlawm hi a ni ringawt. REi fe hnuah phei chuan chung tlangval pathumte chu an hah tawh ngang mai a, anmahni inkhawihna lamah an thi phung tawh leh nghal.

An thaw hlawi hlawi a, "Haw rawh u....helaiah vawikhat mah buaina rawn siam tawh suh ang che u." tiin RIna pawh chuan a han vau ve ta khur khur a. An zinga pakhat chuan thaw hlawp hlawp hian, "Ila hre khawp ang, nang kha...i hmel ka chhinchhiah tih hre rawh. Kal ang u, ala hre khawp ang." tiin an kal liam ta a.

Rina chuan vaipa chu ava en a, "I tha maw? An khawihna viau che em?" tiin a han zawt a. Vaipa chu rawn kal hnaiin, "Thianpa, ka lawm lutuk aw...min chhan avangin, ka lawm takzet." a ti nghal mawlh mawlh a. Rina chuan vaipa chu a han en chiang a, "I hmai a pem nual a nih kha...saw lai lawk saw ka inluah ania, lo lut rawh, damdawi ka lo hnawih ang che." tiin a sawm a.

VAipa chuan inthlahrun hmel tak hian, "A ngai lo, min pui a ka lawm lutuk. Engtin nge lawmthu ka sawi ang pawh ka hre lo, enge i duh, thiana, lawmthu sawi nan enge ka pek ang che?" a lo ti daih mai. Rina chu a khi suk a, "Engmah a ngai lo, ka inah min lo zui lut phawt teh." tiin a kal ta daih mai a, vaipa pawh chuan a zui ve mai bawk.

**************************************

Inchhungah chuan an lut dun a, "A hnawk deuh maithei a, a rem chang lai ah khan lo thu tawp mai rawh. Damdawi ka han la ange, thingpui te kan in dawnnia." tiin RIna chuan first aid box chu a zawng kual a. Vaipa chuan inchhung chu a han en kual a, a lu a bu deuh nghat nghat mai.

Damdawi bawm chu rawn la in vaipa hma takah chuan a va thu a, a hmai hliam te chu damdawi a hnawih sak a. Vaipa chuan a han en vang vang a, "Thianpa, tunge i hming?" tiin a han zawt a, chu vaipa chu a hmel atang chuan kum 35-40 vel laia upa a ni tawh hial ang.

"Rina ka nia, Rinzuala...Rina tiin min ko mai dawnnia."

"Anih chuan Rina, tinge min rawn chhan a?"

"Mipa puitling pathum laiin an sawisak rawn che a, hmuhnawm ti taka ka lo thlir reng ringawt i ring em ni?"

"Mahse keichu hnamdang ka ni bawk si a, chubakah i mizo puite zawk an nia, keichu hnamdang ka nia.."

"Hnamdang i nih avang khan i sual bik tihna a ni hleinem, chubakah khang zurui ho kha chu an ngeiawm ve thei hrim hrim alawm."

Vaipa hmai a hliam chu a tuam zova, "A hrim hrimin i skills vel kha ava bawn ve a, khawi atanga i zir nge?" tiin vaipa chuan a han zawt leh a. Rina chu a nui huk mai, "Khawiah mah ka zir lo, Pathian min pek, ka talent ve aniang." tiin a chhang mai a. VAipa chu a han khi var var a, "Hna i nei em?" tiin a han zawt leh a.

Rina chu a tho va, "Nei lo...pawisa hlawh chhuah theih dan tur ka zawng mek chu a nih hi." tiin choka lam a va pan a, thingpui a lum a. VAipa chuan a lu a han bu nghauh nghauh va, "Anih leh i inluah hi a man a to em?" tiin a han zawt leh a. Rina chuan mak ti angreng tak chung chuan vaipa chu a han en a, "To lo ve, tinge min va zawt chik ve?" tiin a zawt let a.

"Aaa..engvak nilove. I fel em a, engemaw zawng taka puih che ka duh alawm."

"Eng hna nge min offer theih i neih a? Pawisa hlawh chhuahna tur a nih te chuan a pawi hleinem, mahse diklo taka sum lakluh erawh ka duh lo ania."

Vaipa chu a ngawi vung vung a, "Engtia han puih tur che nge pawh ka hre chuang lo, mahse i chungah ka lawm em a, chuvang chuan ka han sawi ve mai mai ania." tiin a chhang a. An han ngawi dun vang vang a, Rina chuan thingpui no hnih thliin vaipa lam chu ava pan leh a, thingpui chu ava pe a.

A han thaw deuh hak a, "Tunge i hming ni ve reng reng?" tiin a han zawt a. Vaipa chu a khi deuh suk a, "Amir-a ka nia...Mumbai atangin sumdawng turin ka lo kal a." tiin a chhang a. Rina chuan a lu a bu nghauh ngauh va, "Anih tak chu mawle, nihleh khang tlangval ho pawisa kha i ru tak tak em ni?" tiin a zawt ta daih mai.

Amir-a chu a phu deuh zuk a, "Aaa...ru tak tak love, ka pawisa ruk an tum...anmahni khan, an tum zawk mawle.." a ti bah deuh nuai mai. Rina pawh chuan a rinhlelh hmel angreng viau va, mahse engmah a zawt zui lem lo. Amir-a bawk chuan, "Tunah hna engmah i nei lo amaw?" tiin a han zawt ve leh a.

Rina chuan a lu lo bu nghatin, "Aw...hna mumal ka nei lo. Khawi khawiah emaw ka inhlawh kual vel mai mai rih a nih hi, inluah man lah ka pe tha thei bawk si lo. Ka inluahna neitu, Pu ZAra lah hian nitin mai hian min rawn vau reng mai bawk si a. Karleh ah ka pe lo a nih chuan min hnawtchhuak dawn a, ka inkhawl mek a nih hi." tiin a chhang a.

"Engzat nge a, thla khatah?"

"Cheng 3000."

"Cheng 3000 lek pawh chu i nei miah lo tihna em ni?"

Rina chu a nui huk a, "Cheng 3000 te chu nei ve e, mahse inchhung mamawh leh thildangah a ngai ve bawk si a, a inren thei ang bera ka chet angai alawm." tiin a chhang a. Amir-a chuan thingpui chu a in zova, "Anih ka kal phawt ange, min pui a, ka lawm lutuk ania." tiin a tho deuh hluai a. Rina pawh chuan, "Kawngka thleng ka lo thlah ang che." tiin a ding ve a, an inzui chhuak a.

********************************************* 

Amir-a chu kal mai a han tum a, mahse a rawn hawi let leh a. "Enteh Rina, lawmthu sawi nan hei hi la rawh." tiin a wallet a phawrh a, cheng 5000 lai mai chu pek a tum ta mai a. Rina chuan a lo la duh lo, "Ni love, a tam lulai emai. Ka mihring pui i ni a, ka tanpui angah che ngai mai rawh." tiin a lo hnar a. MAhse Amir-a chuan, "Kha la rawh, nangpawh ka mihring pui ve tho i ni a. Mizoramah hnamdang ka lo kal a, i hnapuite lakah min chhanhim a. Ka rul let angah che ngai rawh, la hram rawh." tiin a pe lui tlat mai.

Inthlahrung tak chuan Rina chuan pawisa chu a la a, "Ka lawm e, Amir. Ka inluah man chu nangma zarah ka pe thei dawn ta a nih hi, ka lawm lutuk." tiin lawmthu a hrilh nghal mawlh mawlh a. Mahse Amir-a chu kal mai ala tum lo, "Rina, hna pakhat chu ka hmuhsak thei ang che." a ti ta zeuh mai.

Rina pawh a meng kawk mai a, "Engtin maw? Eng hna nge?" a lo ti nghal vat a. Amir-a chu a han ngawi vang vang a, "Mahse i duh ka ring lo, chuvang ania ka sawi hreh deuh ni." a han ti leh te te a. Rina lah chu a phur tawh khawp mai, "Eng hna nge sawi rawh, hna zahthlak tak a nih pawhin ka hreh hauh lo ania, a hahthlak viau a nih pawhin ka hreh chuang lo." a lo ti leh nghal chiam chiam a.

Amir-a chu a han thaw hak a, "Ihh...street....street fighting a nia." a han ti chiah chu Rina hmel pawh a danglam nghal vek mai. Mak tih hmel tak hian, "Eng a? Street fighting a?" a ti hu mai. "Aw ni e, ka rualin Mumbai ah lo kal ve la. Hlawh pawh a tha a, ka fighter i ni dawnnia." tiin Amir-a chuan a lo chhang leh a.

Rina chu a ngawi ta vang vang mai, "Mak i ti ang tih ka hria, min ring lovang tih pawh ka hria. Hnamdang ka ni a, keini ang ho hi chu nangni mizo ngaihdanah chuan mi bum hmang kan ni tih pawh ka hria. Mahse ka bum lovang che, Fight Club pakhat a awm a, chutah chuan fighter tha kan thlang khawm thin. KEi hi ka fighter-in min phatsan tawh a, chuvang chuan fighter nei lovin ka awm mek a ni." Amir-a bawk chuan a han ti leh a.

Rina chuan rum zet hian AMir-a chu a melh a, "Chu business chu a ruka kalpui nge, sawrkar phalna thlapin in run mek?" tiin a han zawt a. Amir-a chuan bah deuh nuai hian, "Aa..engtin nge, chutiang te..insual lam a nia, sawrkar phalna a nih theih ang?" a han ti nuah nuah a.

Rina chu a thaw hak a, "Anih chuan ka duh lo, kha...i pawisa pawh hi la let leh rawh." tiin pek let a tum a. Mahse Amir-a chuan a lo la let duh hauh lo, "Ngaithla rawh, Rina. Han inngaituah chiang teh. Mi inluah in i awm a, hna i nei lo bawk. Mahse tunah i tan kawng a inhawng tan mek dawn a nih hi, i fighting skills kha a tha ka ti lutuk. I thiamna, Pathianin a pek che kha pawisa hmuh nan i hmang ngei tur a ni dawn lawm ni?" tiin a han thlem kual vel a.

RIna chuan chhan ngaihna a hre lo, a ngawi vung vung ringawt. Amir-a bawk chuan, "Tun atanga ni 3 hnuah hian ka haw dawn a, chumi hma chuan chhanna min pek vat angai. Kan hlawhtling dawn, kan hlawhtling em em ang. PAwisa pawh fair takin kan insem dawnnia, 50-50 in kan insem ang. Ka promise ngam che, min ring mai rawh, i ti sual lovang." a han ti leh a.

Rina chuan a lu a thing a, "Min hrethiam rawh, Amir. Ka thei lo, chuan ka ring lo bawk che. I pawisa min pek avang hian ka lawm e, mahse i mi sawmna hi ka pawm thei lovang. Chuvang chuan la let leh mai rawh, i pawisa hi." tiin a chhang ta daih mai.

Amir-a chu a khi suk a, "Nilove...kha pawisa kha chu i ta a ni tawh alawm." tih pah chuan a wallet phawrh leh in card pakhat chu a pe a, "Hei hi ka card ania, ka number a awm ang. I rilru i thlak thut a nih chuan min lo be dawnnia, mahse ni 3 chiah hun i nei ania." tiin kalsan a tum a.

Mahse a han ding leh det a, "I duh ta ngang lo a nih pawhin a pawi lo, pawisa kha chu min puihna ka rul let angah che ngai mai rawh." a han ti leh a, a kalsan ta a. Rina chuan kawngka chu a khar a, a inngaihtuah nasa kher mai. Amir-a card chu a han en a, a number chu a lo awm ngei bawk.

*******************************************

Rina chu a muhil hlei thei thak lo, a bengah chuan Amir-a sawmna chu a ri nawn tlut tlut mai a. Drug addict a nih laia apa in, "Nang ang fapa ka lo nei che hi ka zak kher mai, engtikah mah i hlawhtling ve ngai lovang." tia a ankhum lai te chu a hrechhuak a. A inluahna neitu Pu Zara'n, "Hna neilova tlangval pui i awm mai mai te kha zak rawh, i nu leh pate pawn an tuithlar hial che hi." tia hmusit tak taka a tawngkhum lai te chu a hrechhuak bawk.

Khumah chuan a let a let ringawt mai a, a rilru chu a insual buai nasa kher mai. Muthilh tum eng ang mahse a thei thlawt lo, a mut chu a chhuak hlawl lo a ni ber mai. A tawp a tawpah chuan a tho chhuak ta nge nge a, light on nghalin a inchhung zim te, tawp leh hlui tawh tak mai chu a han enkual a.

"Rina, kan hlawhtling ang, kan hlawhtling em em ang." tia Amir-a thusawi chu a bengah chuan a rawn ri nawn leh thin a. Hausak tum reng reng a kawng dap mek a ni a, mahse tuna a hna tur erawh hi chu a zuam lo lam nilovin, thil dik a niin a hre si lo. Amir-a chu a ring ngam chiah lo pawh a ni mahna, mahse hna dang han hmuh mai tur lah a hre bawk si lo.

A inluah chhung zimte ah chuan a tei kual a tei kual ringawt mai a, Amir-a'n card a pek chu a en leh rih thin. Call chu a han tum tut tut a, mahse a ngam chiah bawk si lo. Pawnah te chuan a va tei kual thul, ngaihdan siam thiam har a ti ngang mai. Insual reng reng a ei han zawn tawp mai chu thil dik a ni ber angem, a fuh ber angem tiin a rilru chu a buai ngang mai.

A thil tum ber chu apa mit hmuh lai ngei a, mi hausa tak leh hlawhtling tak a nih thu va hrilh a, va hmuh tir kha a ni. Chutiagn thil tithei tur chuan tuna a awmdan nen chuan vana rah ang a la ni bawk si, Amir-a sawmna chu pawm mai a duh rum rum tawh, mahse chumi zan chuan Amir-a chu a call ta chuang lova, zing dar 4 velah chuan a muhil ve thei ta hram a.

***********************************

A tuk zingah chuan hma takah Rina chu a tho va, inbual fai sawk sawkin chaw pawh ei hman lo chuan a inhlawh mekna, insak naah chuan a kal leh dawn ta a. A inluahna neitu, Pu Zara te in zawn a thlen chuan a han ding deuh chat a, a hma zana Amir-a'n lawmthu sawi nana a pek, chengs 5000 chu a han phawrh a.

Cheng 3000 chu thliar hrangin a bak cheng 2000 chu a ak leh a, Pu Zara te in kawngka lam pan chuan ava phei ta a. Mahse a thlen dawn tep chuan amah Pu Zra zawk chu a rawn chhuak hlawl mai, Rina a han hmu thut chu a ding deuh chat a.Rina chuan inthlahrun hmel tak hian ava pan phei zel a,. Pu Zara lah chuan a lo tum khum deuh hmuk mai.

PAwisa chu Rina chuan a hum ran a, Pu Zara bul ava thlen chuan a ding chat a. Kun deuh ngul chung hian, ""Pu Zar....englo, ka inluah.." a sawi zawh hma hma chuan Pu Zara chuan, "Aih, ka ngaidam thei tawh lo che. A theih tawh loh, a em em tawh lutuk. Chhuak mai rawh, zaninah inpu chhuak nghal ang che," a lo ti nghal zung zung mai.

Rina chu a han khi suk a,"Nilove Pu Zar, chutiang lam a ni lo." tiin pawisa chu a pe a. ZAh hmel tak hian, "Kha kha ka inluah man ka bat chu aw....a thleng leh tawh ngai lovang, ka tiam a che." tiin kal a tum a. Pu Zara chu a ngawi vang vang a, "Rinzual, lo ding teh." tiin a au let a.

Rina pawh chu a ding a, Pu Zara chuan a va pan a. A han thaw deuh hak a, "Hei hi chu a hmasa a i bat kha a ni, i him tihna a la ni lo ania." a rawn ti leh ta daih mai. Rina chuan mak tih hmel tak hian, "Enge awmzia, Pu Zar?" a lo ti hu mai. Pu ZAra chuan rum fe hian a han melh a, "Thla hnih chhung i ba tawh, hei hi a thla khatna. Thla khat dang min la rul lo, ka thuthlukna kha ala ngai reng. Kar leh monday ah ka lo kal anga, i pek tlak loh chuan i chhuak ang. Midang luah duh an tam, pawisa chu lo ngaihtuah vat ang che." tiin a vin hrep a, inchungah chuan a luhsan daih mai.

Rina chu a hrilhhai kher mai a, a thinrim hle bawk. Ngawi reng chuan a ding a, rang takin a ipte chu a zen a. A hma zana Amir-a pek, a card chu a han phawrh chhuak a. A en vang vang a, a thinrim em avang chuan a khur zawih zawih mai.. A phone chu a phawrh chhuak leh a, Amir-a number chu a type lut nghal.

Mahse a han inngaihtuah chiang leh a, a phone chu a switch off leh nghal daih a. Kal a han tum chiah chu kawng sir lehlamah chuan Amir-a lo ding reng mai chu ava hmu a, Amir-a chuan a rawn pan phei a. Rina chu a han nuih suk a, "Ka card en a min arwn call ngai lovin, i hmaah ka din reng hi...Rina, enge i sawi duh chu ni a?" tiin a han zawt vel a.

Mahse Rina chuan a lu thingin, "I ngaih ang kha  ani lo, ka thuthlukna chu ala ngai reng. I offer hi ka duh lo, hna dang thawh tur ka zawng mai ange." tiin kalsan a tum a. Chutah vin deuh tak hian Amir-a chuan, "Anih chuan engvangin nge ka card kha i phawrh chhuah? Engvangin nge min rawn call i tum?" a han ti khur khur a.

Rina chuan sawitur a hre lo, a ngawi reng ringawt. Amir-a bawk chuan, "Hun i ngah lo ania, Rina. Pawm mai rawh, pawisa i duh anih chuan pawm mai rawh." a han ti leh hram a. Rina chu zawi muang hian a va hawi let a, "I number ka nei alawm, ka lo be mai ang che." tiin a kalsan a, Amir-a chuan a en zui vawng vawng ringawt.

******************************

Tlai lam a lo ni a, Rina pawh chu a bang ve thei ta. A ni khat hlawh chu in neitupa, Pu Sena chu a han dil a. Pu Sena chuan cheng 300 chiah hi a lo pe a, Rina chu a lung ni chiah lo kher mai. Inthlahrung tak chung chuan, "Pu Sen, cheng 300 chiah maw? Cheng 500 i ti a ni lawm ni, nimin pawn naktuk atang chuan a ni tawh ngei ngei ang i tih kha..." a han ti nuah nuah a.

Pu Sena lah chu a lo khi suk a, "Min lo hrethiam leh mai teh, Vala. Kan buai a nih hi, karleh atang law law in animai." a lo ti sam et a. Rina chu a thaw hak mai, "Kar hmasa atangin i sawi tawh a, hetiang lek lek chuan engtin nge ka awm ang? Kar khatah vawi 2-3 vel bak min chhawr duh bawk si lo, pawisa ka mamawh teh mai ania." tiin a han phun ve deuh va.

Chutah Pu Sena chu a thinrim ta thut mai, "Ve khanglang che chuan, i phun ve ngam animaw? I duh leh hmun dangah va thawk daih la ti nia, a zah pawh i zak lo amawni le? Drug addict i ni thin tihte hi ka hrelo amaw i ti ange, ka hre vek ania. Ka khawngaih che a, ka thawh tir ve em em che a, thiam nei mumal mang silo. I duh chuan hmun dangah thawk rawh, lo thawk tawh suh." tiin a lo vin hrep mai.

Rina chuan a chhang ngam tawh lo, a kal nghal nal nal a, "Zawng putara mai mai chu.." tiin a phun sup a. Pu Sena chuan hrepha lo mahse an in gate bula bike lo hru mek, Pu Sena fapa Dinga chuan a lo hre pha tlat mai. Rum zet hian Rina chu a lo melh a, Rina pawh chu a phu zuk mai.

Mahse Dinga pawh chuan engmah a sawi lem lo, Rina pawh chu inthlahrung ru tak chung chuan a kal tlang mai a. Dinga chu a bike ah chuan a lawn a, chak tak chuan a tlan thut a. A hron chu a hmet vak a, Rina chu a phu nasa kher mai. A la su tep zui a, Rina chuan rum tak hian a melh zui vawng vawng ringawt.

**************************************

TO BE CONTINUE