MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 4

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 4

********************************

Makar-a leh fighter pakhat chu an inbei t(r)an ta, Makar-a chuan a sawp hneh kher mai. Mahse a tumpuipa chu rin ai tak chuan a tlawm har zek a, chu chuan Makar-a chu a ti thinrim khawp mai. Sudeep-a lah chuan, "Hnek rawh, that law law rawh." tiin a lo au phur reng bawk a.

Chu fighter khawngaihthlak tak chu a che tha hleithei tawh lo, Makar-a chu vawikhat mah a khawih fu ve lo bawk. A hmai chu thisen hian a bual huh vek tawh a, a mit chu a vung luk tawh bawk. Chhuatah chuan a tlu thal tawp a, Makar-a chuan ala duh tawk chuang lo.

Sudeep-a lah chuan a lo au phur chhen bawk a, dimta tel hauh lo chuan Makar-a chuan chupa chu a thutchilh ang ren rawn a, a hnek ta siah siah mai. Thisen chu a per chhawk chhawk a, a che tawh eih lo. Rina ngaihdan a ni ta lo, va chhan a tum ta mai a. Chuveleh Amir-a chuan a lo dang nghal, "Engthil nge tih i tum a, Rina?" tiin a man bet a.

Rina chuan vin zet hian, "I hmu lo em ni? Tuman tih tawp an tum loh saw, a that mai anga sin..." tiin kal a han tum leh a. Mahse Amir-a chuan a lo dang leh a, "Rina, hetah hian rules a awm lo. Thih phah tam tak an awm, mahse tuman an chhuichhuak ngai lo." tiin a hrilh fiah a.

Mahse Rina chuan Amir-a chu a nam sawn dawrh a, ava kal lui ta a. Makar-a chuan chupa chu a lo la hnek mial mial a, hmel hmuh tlak awm lo khawpin a sawisa tawh a ni. Rina chuan MAkar-a chu ava tlawh thal tawp mai a, "Zawnga, thah i tum em ni a?" tiin a vin vak mai.

Amir-a chu rawn tlan lut vatin Rina chu a rawn dang nghal a, MAkar-a pawh thinrim tak hian a rawn tho va. Rina lam chu va panin a au phei ta vak vak mai a, Sudeep-a chuan a rawn dang ve bawk. Mahse Rina chuan Amir-a chu a nam thlu tawp a, Makar-a lamah chuan ava zuang phei a.

A hmaiah chuan thei leh thei lo hian a va hnek buan buan a, fighter dangte hial an inrawlh a ngaih phah ta. Rina leh Makar-a chu an pawt hrang nghal a, an chak dun bawk aniang, t(r)helh an har khawp mai. Chutah Pu Mukesh-a leh Ajay-a te chu an rawn kal a, Makar-a chu a inbeng dai thei ta hram a.

Pu Mukhesh-a a lo kal meuh chuan Rina pawh chu a inbengdai ve thei hram, mipui ho pawh chu an ngawi thuap mai a. Sudeep-a chu rawn pen chhuakin, "Boss, thil fair lo tak a ni. Ka fighter-in midang a beih laiin a rawn inrawlh a, ama thiam loh vek hi a ni." a han ti nghal zuah zuah a.

SAptawnga sawi a nih avang chuan Rina chuan a lo hrethiam ve tlat, "Fair lo a? He business ah hian fair lo a awm lo a ni lawm ni? Mi nunna laksak hial khawpa insawisak te chu phal a nih te chuan enge nang khan fair chungchang i sawi ve a, i fighter dangte pawh hi rawn tir chhuak rawh...ka lo sawisa vek ang." tiin a lo vin ve hrep mai.

Pu Mukesh-a chuan Rina chu ava pan a, "Engmaw i sawi kha? Fight dang ila hmachhawn ngam tihna em ni?" tiin a rawn zawt a. Rina'n a chhan hma hma chuan Amir-a chu rawn kalin, "Ni lo, Boss....a thinrim vang mai mai a nih kha. Ka lo hrilh ang, keiman ka lo hrilh fiah ang." tiin a lo inrawlh vat a.

Mahse Rina chuan ring tak hian, "Aw a duh apiang chu lo kal rawh u, ka fight vek ang. An vaiin lo kal rawh se, a mal te te in ka fight vek ang." a lo ti leh pung pung mai. Makar-a thinrim chuan ring tak hian, "Hey, keimah bak i fight dawn lo. Nang hneh tur hian keimah hi ka tawk fu a ni. Kan inbei ang, tunah kan inbei nghal ang." a rawn ti ve khur khur mai.

Rina lah chuan a lo cho nasa mai, "Aw...i inrin hun hunah a ni mai. Lo kal rawh, ka fight em em ang che." tiin a lo chhang a, an pawr dun khawp mai. Sudeep-a chu rawn pen hnaiin, "A tha e, chutiagn chu ni nghal rawh se. Cheng nuai 5 pawh ka bet ngam, Makar...he naupang hi that rawh." a rawn ti ve pang pang bawk a.

Chuveleh Rina chuan ring zet hian, "Hey Sudeep, inthah chu a thiang chiah a maw? Anih chuan i fighter Makar hi a thih thlengin ka sawisa ang, chu chu i pawm em?" tiin a han vin khur khur a. Sudeep-a chuan a lo pawm khawp mai, "Ni e, i theih phawt chuan i that dawn nia." tiin a lo chhang a.

Chutah Pu Mukesh-a chuan a ban a han phar a, an ngawi thap mai. Pu Mukesh-a thuthlukna chu an nghak thap mai, "No Holds Barred." a han ti zawi sap a, mipui chu an au ta dur dur mai. A awmzia chu eng hmanrua pawh, chemte thleng pawhin hman thiang a ni a, nunna chan an awm a nih pawhin a leng vek tihna a ni.

*************************************

Rina chuan a kawr chu a han phelh a, a hma a Khalon-a lo vuakna, a dul vel chu a la duk thluah mai. A mit ko pawh chu a kak thuk angreng khawp mai a, mahse insual chu ala inring ran ran khawp mai. Makar-a chu a rawn pen chhuak a, a thinrim hmel takzet, a rum nghut nghut mai.

Chutah inbeihna chu an t(r)an ta, force na em em hian Makar-a chuan a rawn vai deuh fua fua a. Rina chuan a lo bum zak zak mai, Makar-a dulah chuan a tlawh pawp a. Makar-a pawh a hnung tawlh deuh dawr a, a thinrim zual kher mai. Rina chu a chawi kang thut a, car pakhat hmaah tak mai chuan Rina hnugnzang chu a ri bur mai a.

Rina chuan a kiu hmang chuan a tukhumah chuan a han chhun siah siah a, MAkar-a chuan a thlah a. Car hmaah chuan Rina chu a kut veilam chuan a rek bet a, a kut dinglam chuan hnek a han tum a. Mahse Rina chu a lo indang a, Makar-a kut chu a lo man chat mai.

MAhse Makar-a chuan a rek na em a, Rina chu a tang rei thei lo. A khup chuan Makar-a dul chu a do pawp a, Makar-a chuan a thah hram a, a dul chu a dawm vang vang mai. Rina pawh a khuh vak vak a, Makar-a chu ava pan leh ta. Mahse Makar-a chuan Rina chu a lo pawm leh thut a, zo em em hian a kut khinghnih chuan a chawi kang lawp mai.

Chutah car hmaah tak chuan a vawm hian a han vawm a, Rina chuan car hma glass chua  delh keh vek mai. A rawn let thla a, chhuatah chuan a tla thla tawp mai a. A thi nasa tawh kher mai, Makar-a lah chu amah leh amah inbengin ring tak hian a au vak vak a, "A tha lutuk, Makar...han sawisa hlum law law teh." tiin Sudeep-a chu a lo au leh nasa mai a.

Makar-a chuan a va pan leh a, Rina samah chuan thamin a kek tho lawp a. A hmaiah chuan a hnek ri chawk mai a, Rina chu a thal leh tual mai a. Chutah Sudeep-a tang lutuk chuan chain hrawl zet leh sei tak mai hi a va la a, Makar-a chu a pe ta a. Amir-a chu a mangang takzet, hmanraw dang hman mai tur chu a han zawng ve a, mahse ala hmu mai lo zui.

Rina chu a rawn tho leh tual tual a, din ngil chu har a ti tawh khawp mai. Makar-a chuan chain chu a han vai vir vut vut a, Rina lamah chuan ava theh phei a. Rina hrawkah tak mai chuan a invet a, chutah Makar-a chuan a pawt ta vak mai le. Rina chu a thaw tha hleithei lo, a kal pai chhawn chhawn a.

Makar-a lah chuan a pawt na tulh tulh a, chain chu a hrawl em avang chuan Rina chu a inchhanhim thei dawn lo tlat mai. A chak tawh dawn lo amaw an ti vek tawh hial ang, mahse Rina chuan tlawm a lo la tum lo nasa mai a. Chain chu na em em hian a theih tawp chuan a han pawt let ve a, Makar-a pawh a rawn inchhuih phei khut khut mai.

Chutah a kut dinglam chuan na em em hian Makar-a nak nem laiah chuan a hnek ri chawk mai a, a fawn deuh hlur thei hial. Makar-a chu a ding chat a, thisen a rawn phuh chhuak thawt thawt mai. A thingthi hnawk a, chain chu a thlah ta. Rina chuan chain chu a la sawn vat a, Makar-a chu a en ran mai.

Makar-a chu muangchang hian a rawn hawi chhuak a, a ka atang chuan thisen a lo chhuak zawih zawih mai. A ban chu a phar a, a tlawm tih chu a chiang ta. Rina chu a khi suk a, Pu Mukesh-a chu ava en a. Pu Mukesh-a chuan a lu a lo bu nghat mai. Sudeep-a chu ava en leh a, Sudeep-a chuan mak tiin a lo en hru ringawt mai.

Mahse RIna chuan thah a tum loh hmel, na vak lo hian Makar-a bawkkhup ngawih ngawih chu a dulah a han tlawh sak leh deuh chawrh a, Makar-a chu a thal tual mai. Rina chuan a khawih zawm duh lo, Pu Mukesh-a chu va enin, "Tulathah hmang ka ni lo, ka that lovang." a ti ta daih mai a.

Tichuan Sudeep-a chu ava en leh a, "Ka pawisa nuai 5 chu min rawn pe rawh le." a han ti zawi sap a. Chutah Sudeep-a fighter pakhat, la inbei ve lo awmchhun chu a rawn thinrim thut mai le. Rina chu ava pan ta mai a, "A tawk..." Pu Mukesh-a chuan a han ti deuh thak a.

Chupa pawh chu a ding ve ta, Pu Mukesh-a chu a rawn phei a. Sudeep-a bulah chuan, "Pawisa chu pe rawh le, Rina hi hnehna chang zawk chu a ni." a han ti a. Hreh hmel tak chuan Sudeep-a chuan a pe a, Amir-a chuan a lo ak tha leh nghal vat a. Pu Mukesh-a chuan Rina chu a han en vang vang a, "Biak che ka duh a ni." a han ti a.

Mahse Rina chuan a lu a lo thing a, "Tunah chuan titi mood-ah ka awm hrih lo, ka hman hunah Amir-a kal tlangin ka rawn hrilh mai dawn che nia. Amir..kal ang.." tiin a kal ta daih mai, inthlhrung tak chung si chuan Amir-a pawh chuan a zui ve a. Car ah chuan an lut a, an tlan ta daih mai.

**************************************

Sudeep-a chu a ding ngawi reng a, "Show a zo tawh e, in haw thei tawh ang." Mukesh-a chuan a han ti a, mipui chu an haw darh ta hlawm a. Mukesh-a chuan Sudeep-a chu a han en vang vang a, "Nangni pawh haw tawh ru." a han ti zawi leh dap a.

Sudeep-a chuan Makar-a chu buaipui ava tum a, mahse Pu Mukesh-a chuan a lo dang tlat mai. Mak ti tak hian Sudeep-a chuan a en hu a, Pu Mukesh-a chuan a beng bulah chuan engemaw chu a han hrilh ru zauh va. Chutak Seudeep-a chu a meng phawk ta hru mai, "Nilo...Boss, khawngaihin...khawngaihin..." a ti nghal lawm lawm a.

Mahse Pu Mukesh-a chuan a ngai pawimawh lo, "In kal thei, haw rawh u." a han ti vin leh thak a. Sudeep-a chu a lungawiloh hmel kher mai, a fighter la awm chhun nen chuan an kal ta a. A hma a MAkar-a'n a sawisak pa kha chhuatah chuan a lo la mu ve reng a, body guard lo la awm ho chuan motor ah chuan an zawn lut a.

Nikhawhrelova let reng, Makar-a chu Pu Mukesh-a chuan ava pan a. Ring tak hian, "Rampage...lo chhuak rawh le." a han ti lauh lauh va. A motor seat hnung kawngka chu a rawn inhawng a, coat suit ha pa pakhat, hmelchhe lem lo tak leh pian pangngai tak hi a rawn chhuak a.

Pian pangngai tak a ni a, ft 6'1 vel niin a taksa pawh a lian lutuk lem lo. Chupa chu German mi, Henry Wackner niin Pu Pukesh-a personal security guard a ni a. Insual thiam tak, infit tak, experience ngah tawh em em mai a ni a. Street fight atanga bul tan chho ve tho niin a kaisang zel a, Top Punch main rooster ah lut chho zelin tunah chuan Pu Mukesh-a personal security guard a ni pha hial tawh a ni.

Tuman an la hneh lova, champion ni lai mek a ni. Top Punch main rooster fighter ho zawng zawng leader a ni a, a ruala mi 10 in an beih rawn pawhin an hneh ngai chuang lo a ni. Tiang khawpa che rang leh skills ngah chu a ni a, fighter bei ngam awmchhun chu MAD DOG chiah a ni.

Mahse Mad Dog nen chuan an la inbei hauh lova, a chhan chu Henry-a hnuai chiah ah hian Mad Dog hi a awm vang a ni, an tang dun daih tihna a nih chu. Mad Dog chu Thai tlangval, hmel rorum ve tak mai hi a ni a. Mad Dog an tihna chhan pawh a tumpuite reng reng hi dimna tel hauh lovin a sawisa thin a, pawh sawn te a ngai hial thin a ni.

Henry-a chu a rawn kal phei a, "That rawh le.." Pu Mukesh-a chuan a han ti zawi sap a. Henry-a chuan kutkawr a bun a, tichuan Makar-a hnar chu a zu hup bet a. MAkar-a chu a tal vak vak a, mahse a zawi tial tial a, reiloteah chuan a thi ta der mai. Pu Mukesh-a chuan a phone chuan Makar-a ruang chu thla a han la a, "Lo buaipui ang che." tiin Henry-a chu a pe a, tichuan ruang chu an kalsan ta a.

***********************************************

Zingkar a ni a, RIna pawh a chauh ve deuh tawh avang chuan a mutui ngang mai. A room kawngka chu a rawn inkik karh karh a, peih lo tak chuan a tho tual tual a. Kawngka chu ava hawng a, Amir-a a lo ni. A arwn lut nghal a, "I tho thei maw, i hliam te kha ala na em?" tiin a rawn zawt a, suitcase hi a rawn keng lut bawk.

Rina chu a han ham bai bai a, "Na tawh love, tlemin ka sil ve deuh a, chuzawng chu a nimai." tiin a han zi mar vel talh talh a. Chutah suitcase chu a en hu mai a, "Kha kha enge?" tiin a zawt a. Amir-a chu a han khi vur vur a, "Hei hi pe tur che in ka lo kal a, ka ta tur chu ka roomah a awm." tiin suitcase chu a mal chungah chuan a dah a.

A han hawng chiah mai chu Rina pawh a meng kawk mai, pawisa hlir hian a lo khat a. Amir-a chuan hlim hmel tak hian, "Nuai 2 leh sing nga, nizana Makar-a i hneh man kha a nih hi. Keipawn nuai hnih leh sing nga ka kawl ve bawk, i lawm em?" a han ti vel a.

Rina chuan suitcase chu a la a, pawisa chu a en ngawih ngawih mai. Chutiang em em a tam chu a la hmu ngai lo, a ta tur ani tih a han hre ngat phei chu mumang a awm a ti hial zawk. A han khawih vel chhin a, "A...Amir, hei hi...pawisa tak tak a ni em?"  a han ti bah nuai a.

Amir-a chu a lo nui huah huah a, "Tehreng mai, Rina. I pawisa, i ta...pawisa tak tak a nih kha." tiin a lo chhang a. Rina chuan a lu a bu nghat nghat a, "Tunah chuan ka hausa ve ta, ka hausa ve ta...eng atan mah hman tlak loh chu ka ni tawh bik love...Ka pa, i fapa hi ka lo kir leh dawn." tiin a phun zawi sap mai.

Amir-a lah chuan, "Engtin maw i tih?" a lo ti hu mai a. Rina chu a khi suk a, "Amir, ka la duhtawk lo." a han ti zawi leh sap a. Amir-a pawh chuan a lu a lo bu nghauh nghauh va, "Nia...kan kal zel ang, a thui thei ang ber kan kal ang." tiin a lo chhang a. Rina chuan Amir-a chu a han en a, "Hei aia tam hi ka duh, ka duh belh zel. A theih theih naah insual ka duh, khawiah pawh ni rawh se." a han ti leh a.

Amir-a chu a nui tawi ta tak mai, "Aw nia, Rina...tunah chuan kan enjoy ve hrih ang chu...pawisa kan ngah thawkhat tawh alawm. Chuan hotel ah hian kan awm reng tawh lo bawk ang, apartment luah tur ka hmu tawh ania." tiin thil dang a sawi pui vat a. Rina pawh a lo nui suk mai, "Engtik nge kan insawn chhuah ang." tiin a han zawt leh a.

"Zanah mi kan ruai vek dawnnia, kan chet hah ve angai lo. A ho lutuk, tunah chuan kawr thar te, phone thar te, pheikhawk thar te kan lei ve ang chu. Tiraw...bazar ila?" Amir-a chuan a han ti zawi sap a, a han nuih tlawn deuh bawk a. Rina pawh a nui huk ringawt, "Anih chuan kan bazar anga, zanah kan party bawk ang." tiin a han nui var var a.

*********************************************

Chumi nileng chuan Rina te thiandun chu an bazar a, eng enge maw an lei teuh bawk a. Zanah chuan Night Club ah an kal nghal bawk a, Rina pawh chutiang chu a tawng khat tawh bawk a, nuam a ti ngang mai. MAhse an hriat miah loh chu Pu Mukesh-a leh a naute chuan an lo zui ru ve reng a ni, an enthla reng a.

Party-na hmunah pawh chuan an awm ve bawk, Rina pawh a kai tawh khawp mai. Pu Mukesh-a chuan a bula hmeichhia chu a han hrilh ru zeuh va, tichuan a kal sawn nghal a. Chu nula chuan hmeichhe dang lo awm ho chu a han au khawm a, Amir-a amah-a lo awm hrang chu ava kawk a.

Hmeichhe ho chuan an va pan ta, zei tak leh thiam tak hian Amir-a chu an han zut kual vel a. Room pakhatah an luh pui daih mai, Amir-a lah lo rui ve tawh bawk nen nuam a lo ti nasa mai. Rina erawh chu mipui zingah chuan a lo la lam nasa mai a, hmeichhe chhelo tak tak chuan an lam pui bawk.

Chutah Pu Mukesh-a body guard pali te chu lam tualah chuan an va lut ve ta, Rina chu a ruka man an tum a ni. Body-guard zinga pakhat chuan a ipte atang chuan syringe te tak te hi a phawrh chhuak a, Rina chu en ran chung chuan ava pan hnai zel a. Rina chuan mi hang nula pakhat, chhelo zet mai hi a lo lam pui mek a.

Guard chu a rawn thleng hnai zel a, Rina hnung lawkah chuan a awm tawh. A ban chu a han phar chhuak a, Rina chu syringe chuan a tin ta vang mai. Rina chuan a lampuinu sunglass atang chuan hnunglama guard pakhatin a rawn tin lai chu a hmu thei ta, a awm sawn hman hlauh mai.

Mihangnu lah chu lo awm sawn hman ve tawh hek lo, guard chuan chunu hrawkah chuan syringe chu a han chhun tlum pawk mai a, a damdawi lah chu a han hmet lut hman hram a. Chunu chu a ding ngil nghal at a, a khur cher cher ta mai. Tichuan a tlu tawp mai a, lam ho dang pawh chuan an lo hmu ve bawk.

Guard tih ngaihna hrelo leh che lai lutuk chuan Rina chu hnek a han tum ringawt a, mahse Rina chuan  a lo bum vat a. Chupa bekah chuan a kick siah mai, a dulah chuan hnung zawnga vir pah chuan a han tlawh leh siah a, a thal tawp mai. Chuveleh a hnunglam atang chuan body guard dang pakhat chuan a rawn zuan leh a, mahse rang lutukin Rina chuan a phi thla nghal pawp a.

Midang pahnih chu an rawn lang a, Rina chu mipui karah chuan a bi bo nghal daih mai. Lam an tam si a, a tawt bawk nen. An in um ta chiam mai a, tlan pah chuan Rina chuan Amir-a chu a zawng kual pah nghal bawk a. Mahse Amir-a chu hmuh tur a awm lo, "Amir...Amir..khawnge i awm?" tiin a au vak vak a.

**************************************

Amir-a chu nula ho te nen chuan an lo lam nasa mai a, mahse kawngka awng atanga Pu Mukesh-a lo hawi kual vauh vauh a hmuh chuan a harh kawk mai, a ngaih a tha chiah lo. Rina a kalsan daih tih a hre chhuak thut a, "Ladies, min lo hrethiam lawk teh u." tih pah chuan a tlan chhuak ve nghal a.

Pu Mukesh-a hmuh loh theih tur ang ber chuan a hel kual a, Rina chu a zawng kual ve ta. Rina chu pawnah chuan a tlan chhuak a, body guard ho chuan an rawn um chhuak ve bawk. Rina chu an um char char a, mahse Rina chu a ding thut mai. Bodyguard pali te chu an ding ve nghal bawk a, Rina chu a thaw hlawi hlawi mai.

"Eng vangin nge maw ka han tlan chhiat chiam le?" tih vin deuh thak pah chuan a han hawi let a, body guard pali te chuan posi an lo la thap mai. Rina chuan a mal te te chuan a han melh kual den den a, "Tute nge in nih?" tiin a han zawt hlawm a. Mahse a tu a te mah chuan an chhang lo, "Buaina in duh tak tak ani maw?" tiin Rina chu a khi suk a.

Chutah a va tlan phei thut a, a zuang vak a. Lei a rah hma chuan zuang chung chuan chumite pali chu a mal te te in a kick thlu hman vek a nih chu, a speed chu a rang takzet. An zinga pakhat chu a rawn tho lehnghal a, mahse Rina chuan a lo tlawh thal leh nghal tawp mai.

Midang lo tho leh tur pawh chu a lo khawih thal nghal tawp tawp zel mai a, chutah body-guard thar pakhat chu rawn lang thutin Rina chu hnung lam atang chuan a rawn tlawh pawp a, Rina pawh a bawk thlawp mai. Rang takin a tho lehnghal a, chupa chu Pu Mukesh-a personal security, RAMPAGE tih a an sawi thin, Top Punch Main Rooster champion lai, German tlangval, Henry-a a lo ni.

Rina chuan a han en vang vang a, "Tu phiangsen nge i nih?" a han ti vin thak a. Henry-a chu a lo nui khi suk a, "I hre mai ang, lo kal phawt rawh." tiin posi chu a lo lak khum a. Rina chu a thinrim hmel kher mai, "Min chhan vat ka beisei." tiin ava tlan phei a.

Zuang pah chuan va kick a tum a, mahse Henry-a chuan lo bumin Rina hnungzangah pawh chuan a vir zeuh pah hian a lo tlawh leh pawp mai. Rina chu a tlu teuh kher mai, mahse a insiam rem hman hlauh va. A va hawi let leh nghal, theih tawp chuan ava bei leh a.

MAhse Henry-a chuan a duhtawk chuan a lo bum a, Rina chu a khawih ta zek mai a. Rina pawh chuan chutia Henry-a insual a lo thiam ta bik lutuk mai chu mak a ti angreng kher mai, "Khazawng kha em ni, Naupang....i tlawm der em ni a?" tiin elhsen tak hian Henry-a chuan a han nuih vel a.

Rina thinrim lutuk chuan khawih fuh ngei tumin a va bei leh a, mahse RIna speed leh a chet vel dan chu Henry-a chuan a lo hre lawk vek amaw tih mai tur a ni. Rina chuan a hneh ngang lo, a thal leh tual tual thin a. Mahse tlawm mai chu ala tum lo, a han zuang leh thauh thauh va.

Chutah an han insual leh ta chiam chiam a, Rina chan a tha ve leh ta tlat mai. Henry-a speed chu a man deuh tan a, Henry-a chu a dak ve ta awrh awrh mai. VAwi thum vel chu Rina chuan a han thal ta thak thak mai a, Henry-a pawh chuan mak a ti hial zawk. A inperh tho a, Rina chu a va vai buan buan mai.

Mahse Rina chuan lo bum zak zak in a kick thal leh ta der mai a, Henry-a pawh thisen a chhak chhuah ta pherh pherh mai. Thinrim tak chuan chhuat chu a chum vak vak a, tichuan a ipte atang chuan damdawi mum niawm tak, tereuhte mai chu a han hmawh zeuh va.

Rina chuan a lo hmu chiang ngang mai, mak a ti em em a. Chutah Henry-a chu a rawn tho leh ta, ama lu chu a beng ang deuh chawrh chawrh a. A au vak vak a, chutah a rawn meng sen te rum mai. Rina chu a rawn pan leh ta a, Rina chuan a bekah chuan a  lo hnek leh chawrh chawrh a.

Mahse na ti awm ang pawhin Henry-a chu a lang lo, a hawi sawk sawk ringawt a. Mahse a dinna ngaiah chuan a ding reng a, rum zet hian Rina chu a melh reng ringawt. Rina pawh chuan mak a ti kher mai, a han khawih leh hrep hrep a. MAhse milim(statue) ang mai hian Henry-a chu ala ding khawng ar mai, chutah Rina chu a rek ta thut mai a.

A kut khing khat chauh chuan a rek kang ta mai a, Rina chu a che hleithei ta der lo mai. A ang hlawi hlawi a, henry-a lah chuan thlah a tum der lo lehnghal. Chuta che thei lova a awm reng lai chuan tiang phel phawk khawp chuan tu emaw hian Henry-a ngal chu a rawn hlap pawp mai, Rina chu a thlah nghal a.

Rina chu a thal thla tawp mai, a hrawk chu dawmin a khuh uak tuar tuar a. Henry-a ngal rawn hlap tu chu tudang nilovin Amir-a a lo ni reng mai, Rina chu a rawn kai tho vat a. Na ti tak hian Henry-a chuan a ngal chu a han tuai vat vat a, "Rina, tlan ang..tlan ang." tiin Amir-a chuan Rina chu a pawt nghal dawr dawr a.

Rina pawh chu a tlan ve mai bawk, mahse Henry-a te chuan an rawn umzui lem lo. Car-ah chuan Rina te thiandun chu an lut a, an tlan ta vang vang mai. An tlan liam chiah chu Mukesh-a a rawn thleng ve chiah a, Rina te tlan liam mek chu a han thlir zui vawng vawng a.

Henry-a'n a han hmuh veleh chuan ding vatin, "Ka tihpalh, Sir. a lehpekah chuan ka man tawh ngei ngei ang, ka tiam ache." a lo ti nghal vat a. Pu Mukesh-a chu a han khi suk a, "A pawi lo, tikha chuan ruahmanna ka nei chiah e." a han ti zawi sap a. Ahay-a pawh a rawn thleng ve nghal, "Boss, kan umzui dawn lo ami." a han ti a.

Mahse Pu Mukesh-a chuan a lu a lo thing tlat mai, Ajay-a pawh a t(r)awng zui tawh lem lo. Pu Mukesh-a chu a han ngawi vang vang a, "AMir-a..Amir-a'n min beilet ngam amaw? A tha e, Rina saw ka ta..ka fighter thar tur a nih saw. A hre khawp ang, AMir-a sawn a hre khawp ang." a han ti chan fak fak a.

********************************************

Rina leh Amir-a te chu car chuan an tlan mek a, Amir-a zawk chuan a khalh a. Rina chuan a kamsir pilh chu a han hmet vang vang a, "Amir, tute nge ni a?" tiin a han zawt a. Amir-a chu a thlan a tla bawrh bawrh mai, "Pu Mukesh-a, Pu Mukesh-a te an ni." a han ti hluam hluam a.

Rina chuan mak ti tak hian, "Eng a? Top Punch neitupa kha maw? Tinge keimahni kher min beih a?" a ti hu mai. Rilru hah hmel tak hian, "Nangmah hi an duh che a ni, Rina. Ka lak atang hian lei chhawn che an tum a ni, chu chu ka phal loh vangin min rawn bei zui a nih kha.." tiin a lo chhang a.

Rina chuan a hrethiam lo kher mai, "Amir, enge awmzia? I fighter ka ni ani lawm ni, engtin nge min lei chhawn an tum theih?" tiin a han zawt a. Amir-a chuan sawi fiah vak ngaihna a hre bik lo, a ngawi reng ringawt a. Rina lah tlemin a lo kai tawh bawk nen, "Min hrilh ta che, Amir. Kei hi duh duh lei chhawn theih, bungrua ang maiah min ngai tihna em ni?" tiin a han vin leh vak vak a.

AMir-a chuan motor chu a tiding tawp,  "I hre thiam lo a ni, Rina. Top Punch hi street fighting chauh a ni lo, street fighting hi chu a side ve mai chauh a ni." a han ti a. Rina chuan mak ti tak hian Amir-a chu a en vang vang a, "Anih chuan enge awmzia tak ni a, street fighter turin ani lawm ni kei hi min sawm?" tiin a thinrim lek lek tawh mai.

Amir-a chu a han thaw hak a, "Top Punch chungchang hi zep then ka nei a ni, Rina. Min ngaidam rawh, fighter te hi an thleng sang telh telh a, main rooster ah an tel thin a ni. Chuta main rooster tur chuan an duh che a, ka lak atang hian lak sawn che an tum a ni." tiin a hrilhfiah ta a,

Rina chu a thinrim kher mai, "Amir, min bum tihna em ni?" tiin a thinrim lutuk chu a khur dar dar thei hial mai. Amir-a chuan inthaim loh hmel tak hian, "Rina, min ngaidam rawh. KA sum duh lutuk vang vek a ni, tiang em em a fighter tha i  nih hi ka lo ring lova. Mahse Main rooster atan an duh che si a, lei chhawn che min dil a. Mahse ka phal bik lo che, a chhan chu ka fighter i ni." tiin a chhag a.

Rina chu a han thaw halh halh a, "Engpawh chu nise, kha chu ka kutah dah rawh. Zawhna pakhat ka la nei, kha body guard kha tunge, ka hneh miah lo lehnghal?" tiin a han zawt a. Amir-a chuan Rina chu beidawn hmel tak hian a han en a, "He buainaah hian ka hnuk lut che ,a ka tihpalh takzet." a han ti zawi sap a.

Chutah vin zet hian Rina chuan, "Amir, ka zawhna chu chang mai rawh. Tunge kha bodyguard kha...tunge a nih min hrilh rawh." a han ti leh khur khur a. Amir-a pawh chuan a zep peih tawh lo, "Awle awle, khapa kha RAMPAGE a ni. RAMPAGE tiin a nickname a phuah a, a hming tak tak chu Henry-a niin German mi a ni. Top Punch main rooster-ah champion lai a ni a, hneh loh a la nei lo." tiin a chhang ta a.

Rina chu a han thaw hak a, "Um, abak chu apartment ah kan sawi dawnnia. Ka zawhna ber zawk chu....kha mihring khan eng damdawi emaw a hmawm zeuh a ni. A tir kha chuan ka hneh lova, mahse a move kha ka en vang vang a. A chetdan ka man hnu kha chuan min hneh bik lo, mahse damdawi kha a ei a. Ka khawih pawhin na ti awm angin a lang lo, khavang mai mai khan min rek thei mai mai zawk a nih kha." a han ti leh a.

Mak tih hmel tak hian Amir-a chuan, "Drugs an hmang a nih chu, a hming kha ka hre thei tawh mai lo. Rina, kan fimkhur angai." tiin a mangan hmel kher mai. Rina chu a khi suk a, "A pawi lo, ka kutah dah rawh. I fighter ka ni a, ka ni reng bawk ang." tiin Amir-a darah chuan a han beng thak thak a, an apartment thar lam pan chuan an haw duh ta a.

********************************

TO BE CONTINUE