MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 6

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 6

*******************************

Minute 10 hnu velah chuan kawngka chu a rawn ri rak a, Pu Mukesh-a leh a nau Ajay-a te chu an rawn lut a. Guard pakhat chuan a rawn zui ve bawk, Rina chu Pu Mukesh-a chuan a han en vang vang a. A han thaw deuh hluai a, "Ava buaithlak tak." tih vawng vawng pah chuan guard chu rum tak hian a melh a.

"Zanin atangin fight a nei dawn a, enge maw i lo vuak hliam leh t(r)alh le aww..." tiin a vin hrep mai. Guar lah chuan, "Kha chu ti tur anga min hrilh dan ania, i sawi vek kha." a lo la ti zui. Pu Mukesh-a chu a han maimitchhing vang vang a, "Chhuak teh....lo va chhuak mai teh." a han ti hlur a.

Guard pawh chu a chhuak ve mai bawk a, Rina chu a han en leh vang vang a. Rina lah chu a lo khi suk a, "Zaninah match ka nei dawn maw? Zanin atang in maw?" a lo ti vin hlur a. Pu Mukesh-a chuan a lo a lo bu nghauh nghauh va, "A dik alawm, zaninah Kaito Smirnov nen in inbei dawn." tiin a lo chhang a.

Rina ngaihdan chu a ni lo kher mai, "Ka ke hi kha security guard khan a khawng tliak lo chauh a nih hi, engtin nge ka beih theih ang?" a lo ti leh hlur a. Pu Mukesh-a chu a han thaw hak a, "Ka book fel tawh che, i beih angai." tiin a lo chhang leh hmak mai. Rina chu a han ngawi vang vang a, "Tumaw a hming?" tiin a han zawt leh a.

"Kaito Smirnov, Japanese leh Russian thlahpawlh a ni. A ring name chu The Butcher a ni a, sumo wrestler a ni." tiin Pu Mukesh-a chuan a chhang ta mai a. Rina chu a meng phawk nghal hru mai, "Sumo wrestler a? First opponent ah Sumo wrestler maw?" a ti hu mai.

Pu Mukesh-a chuan a lu  alo bun nghat a, "Aw ni e, sumo wrestler. A lian lutuk, mahse i hneh thei tih ka hria alawm." a ti a, Rina'n a chhan let hma chuan a chhuahsan ta  daih mai. Guard chu a lo lut leh a, Rina chu a rawn kai a. Rina thinrim laklawh chuan, "Min kaih kher ka ngai lo." tih pah chuan a chalah chuan a tauh pawp a, a thal tawp mai.

Guard lah chu nikhawhrelovin ala awm nghal daih zui, Rina chuan a han en vang vang a. Thinrim hmel tak hian, "Aww..kha kha i chan tawk a nih kha. Sumo wrestler nen zaninah kan inbei dawn a, ka ngalah i la hlap na em em mai lehnghal...tikhan mu hle hle rawh." tih pah chuan a kalsan daih a.

************************************

Zan a ni ta, Rina chu Underground Battle neihna hmunah chuan hruai thlak a ni a, jail tang dang tam tak te chu mipui angah tangin an lo haw haw dur dur mai. Match hmasa ho chu khelh mek a ni a, fighter tam zawk te chu foreigner niin Japan, South Korea, China, Indonesia, Thailand, USA, Russian leh German an ni tlangpui.

Rina te inbeih hun a thleng tep a, Rina chu room pakhatah chuan Pu Mukesh-a nen an lo inbe mek a. Pu Mukesh-a bulah chuan Henry-a, Rampage-a tia an koh thin kha a awm ve bawk. Rina chuan a kut chu a tuam tha mawlh mawlh a, "Rina, ngaithla teh. HE match hi i chak a nih chuan nuai 1 i hlawh nghal dawn ania, fighter tha tak tak i hneh zel a nih phei chuan khitah i awm thei dawn ania." tiin a han fuih mawlh mawlh a.

Rina chuan en miah lo hian, "Jail chhungah ngatan nge pawisa kan tih vak anga, ka tan awmzia a awm lo emai." a lo ti hmuk mai. Pu Mukesh-a pawh chu a nui suk a, "Ka thu awih la, ka train chho zel che anga. KA personal security ah i inhlang kai thei a nih chuan i zalen ve tawh ang a, nuamsa deuhin i hmang tawh ang." a han ti leh a.

Rina chuan Henry-a chu a han melh a, "Khipui..a tha tawk viau lo ami khipa khi...engatan nge security te i tih, i neih sa reng khi." ngeiawm tak chuan a han ti leh kher a. Henry-a chuan a lo melh no lo kher mai, "Nakinah i hrethiam mai ang, i inring tawh em?" Pu Mukesh-a chuan a han ti leh a.

Rina chu a ding a, "Amir-a chu engtikah nge ka hmuh theih ang?" tiin a han zawt a. Pu Mukesh-a chu a han thaw hak a, "I hmu em em ang, tunah chuan sumo wrestler champion lai i bei dawn tih inhria la. Abak chu i chak hunah kan sawi dawnnia, chuan engtin nge i ring name hi kan sawi dawn?" tiin Pu Mukesh-a chuan a lo zawt let daih mai.

Rina chu a han ngawi vang vang a, Henry-a chu rum zet hian ava melh leh a. Henry-a lah chuan posi a lo la titih nghal ringawt a, Rina chu a khi suk mai. Pu Mukesh-a chu a han melh leh run a, "MAMMON." chiang fek fawk chuan a han ti a, a kal pah chuan Henry-a chu a han su lui deuh kher a.

***********************************

Light chu a thim ruih mai a, ring chhung bik te chauh chu a eng a. Ring chhungah tak chuan announcer chu a rawn lut ta a, "Tunah chuan zanin atana kan last fight, main event kan lo thleng leh ta der mai. A hmasa in mi thar, street fight club atanga rawn kal, Top Punch Future star tura ngaih, North East India atanga lo kal a ni a. Tunah lo chhuak rawh se, THE MAMMON..." tiin a han au vak a.

Mipui kar atang chuan Rina chu a rawn chhuak a, a hnungah chuan Ajay-a leh Henry-a'n an rawn zui a. Pu Mukesh-a erawh official ho thutna, a sang lamah a thu thung a ni. Fighter te hi hetiang battle ah hi chuan pheikhawk bun phal a ni lova, kekawr bul chiah hak phal a ni bawk.

Rules phei chu bon tak a ni ringawt, hmanrua engmah hman phal a ni lo nachungin ruh intih tliah sak te, hmai hmuh tlak loh khawpa insawisak te, inthah te thlengin phal vek a ni thung. Chu chu Rina pawh chuan a hre lawk ve vek a, pawisa vang em em pawh a ni lo, Amir-a nunna chhanchhuak tura tel a ni mah zawk.

Ring chhungah chuan a lut a, a han in warm-up ve ang thauh thauh va. Mipui ho chuan an 'boo' nasa kher mai, mahse Rina chuan a care vak hmel loh kher mai. Chutah Announcer bawk chuan, "A opponent tur hi sumo wrestling champion lo ni tawh, a weight puiah phei chuan hneh loh ala nei ngai lo. A len em avang leh a chak em avangin THE BUTCHER tiin an ko thin, tunah lo chhuak rawh se...Japanese leh Russian thisen kai.....KAITO SMIRNOV." a han ti leh vak a.

Chutah le, mipui kar atang chuan a rawn chhuak ve ta. A len dan em em chu sawi thiam pawh a har zawk, kg 200 chu a pelh loh chuan a mak khawp ang. A thau mai pawh a ni lo, a puar hian a puar vek hi a ni mah zawk. Rina pawh chuan a en hu mai a, a huphurh ve deuh ngang ni tur a ni.

A sam ala sei zui a, sumo wrestler te ang thovin a t(r)awn ve bawk. A kal pah chuan a dul leh hnute vel te chu a fawn hlur hlur mai a, han beih chu huphurhawm tak a ni. Ring chhungah chuan a rawn lut a, a kal zawng te chuan ring chu a che luih luih thei. Rina chu a han en vang vang a, hmuhsit hmel tak hian ala nui huah huah zui.

Ajay-a chuan Rina dar chu a han beng thak thak a, "Henry-a hian minute 2 chhungin a hneh thei ania, saw sumo wrestler saw...i thei ve tih ka chiang, zam reng reng suh ang che." a'n lo ti ve deuh duah a. Rina chuan Ajay-a chu enin a khi suk a, "Keichu minute 1 leh a chanve chauh a ni ang, lo chhinchhiah rawh." tiin a lo chhang deuh sak mai.

***********************************

Inbeihna chu an t(r)an dawn ta, mipui thawm pawh a ring ngang mai. Bell a ri ral ral a, Rina chuan a position chu a han siam rem nghal sawk sawk a, fight chu t(r)an a ni ta. Rina chuan a speed rang thei ang ber chuan Kaito chu a han hnek siah siah a, a chet muan leh a thau em avang chuan Kaito chuan a hnek fu ve thei lo.

Rina chuan a lo bum hman zel a, mahse vawi 10 chuang a nakah te, a dulah te leh hnungzangah te chuan a hnek pawp pawp hnuah pawh chuan Kaito chu na ti awm ang pawhin a la awm lo. Rina pawh chuan mak a ti kher mai, a han kick leh nual a. Mahse Kaito chu a nui vel mai mai, a taksa chu a fawn hlur hlur ringawt.

Chutah a bekah hnek tumin Rina chuan a theih patawp chuan a han vai leh pawp a, mahse a kut chu awlsam takin Kaito chuan a lo man chat mai. A hmer sak vak a, Rina na ti lutuk chu a th(r)en chawk chawk a. Chutah Kaito chuan a rek thut a, ring corner deng dawt khawp chuan ava theh phei a.

Ring chhuat laiah chuan Rina chuan a hmai sawh chawrh in a tlu bawk tual mai, mahse a tho leh vat a. Va tlan pheiin Kaito dulah leh nakah te chuan ava hnek leh siah siah a, mahse Kaito chuan a lo rek leh chat mai. Ring tak hian Rina hmai zawnah chuan, "Min hneh chuang lovang nang naupang khan..." tiin a chawi kang lawp a.

Ring pawnah chuan a theh chhuak ta mai a, Rina chuan na a ti kher mai. HEnry-a lah chuan a lo nuih suk a, "Minute khat chu a tling tawh e, second 30 i la nei." a lo ti deuh kher a. Rina chu a thinrim ngang mai, a inperh tho leh nghal a. Ring chhungah chuan a va zuang lut leh nghal, Kaito chuan a lo nuih leh vel huah huah a.

Chutah Rina chu a zuang vak a, Kaito darah chuan a han pakai chat mai. Chutah dim baksak lo chuan Kaito chhip chu a kiu chuan a han tauh siah siah mai a, vawi 5 vel a tauh hnu chuan Kaito chuan ring chhuatah chuan hnungzang ri dawt khawp chuan Rina chu a paih thla thum dut a.

MAhse Rina chu a tho leh nghal, Kaito hnunglamah chuan vir phei zeuhvin a chawnah chaun a han pet sak pawp a. Kaito pawh a thingthi hnawk a, chuveleh RIna chuan a bekah te, a hmaiah te chuan a hnek siah siah mai. BAnga time kal mek chu a han en a, minute 1 leh second 20 a lo ni tawh.

Minute khat leh second sawmthum ni tur chuan second 10 ala nei, a thutiam chu hlen ngei a tum bawk. Second 10 chhung chu chawl miah lovin Kaito chu a han hnek siah siah mai a, vawi 7 vel a hnek hman. Kaito hmai chu thisenin a bual khat vek tawh, chutah Rina chuan a tawp nan tiin Kaito hmaiah bawk chuan a han spin-kick leh siah a.

Kaito chu a thal ta tual mai a, refree chu lo tlan lut nghalin Kaito chu nikhawhrelovin a awm tih a rawn fiah nghal a. Rina ban chu phar sakin, "Champion...MAMMON." tiin a au lauh lauh va. Mipui chuan an lawm kher mai, "MAMMON....MAMMON.." tiin an au rual a.

Henry-a leh Ajay-a te chu an ka hau mai, "Minute 1 leh second 30 chhungin..knock put hmangin Mammon a chak zawk a ni. REcord thar a ni e, record thar..." tiin annoucer chu a rawn au ve lauh lauh bawk. Rina chuan Ajay-a leh Henry-a te lam chu ava pan a, "An sawi chu inhria maw...record thar...record thar a nih chu." tiin a han nui suk a.

************************************

Official ho, mi hausa ho thutna atang chuan Pu Mukesh-a pawh a lo nui var var mai. A bula mi, USA ami, Top Punch Fight Club Official pakhat, Pu ROnley-a chuan mak a ti kher mai. Pu Mukesh-a chu a en hu a, "Khawi atanga i hmuh nge ni a, ava han bon em em ve?" tiin a han zawt a.

Intithei tak hian Pu Mukesh-a chuan, "Ka top fighter tur a nih khu, ala tha dawn chauh. Amah ah hian rinna tam tak ka nei a ni, fighter bon tak a ni." tiin a lo chhang a. Pu Ronley-a chuan phawk hru hian, "Ala tha dawn chauh a? Kaito SMirnov khu tunge a nih i hre chiang ber. Mi zawng zawngin an hlau va, main rooster fighter tam zawk hian boss en tak meuh meuhvin an en asin." a han ti chiam chiam a.

An bula mi, official zinga mi ve tho, Indian pa, Pu Samir-a pawh chuan, "Ni e, Kaito SMirnov hi Top Punch main rooster zat ve aia tam hian an hneh lo, record awmchhun, tuma la break theih loh chu tuna fighter thar hian a rawn khum der ania. Minute 2 chhungin kan top fighter neih mek, Henry-a khan a hneh a. MAhse Rina hi chuan minute 1 leh a chanve chhung chauhvin a hneh thei, thil mak chu a tling a ni." a lo ti ve bawk a.

Pu Mukesh-a chu a han nui huah huah a, "KA tum ber chu kei leh ka gang te zinga hruai luh hi a ni a, tunah chuan a la duh bik lo. Mi chapo ve tak mai a ni a, mahse ka la thlem thlu thuai ang. Ka thuhnuaia a awm theih hunah chuan khawvela business tycoon leh mafia hausa ber ka la ni ngei bawk ang, Henry Wagner, Mad DOg, Razor..chuan tunah, Rina...MAMMON." a han ti chang fak fak a.

A zu no ken lai tlak sak pah chuan Pu Ronley-a chuan, "A tha dawn e, a next fight ah hian tunge kan beih tir leh ang aw?" a han ti vawng vawng a. Pu Samir-a chu rawn inrawlh ve leh in, "BEAST emaw...SEVEN nen inbei se a tha ang." tiin a rawn tawng ve a.

BEast an tih hi chu fighter top 10 zinga mi a ni a, Seven an tih pawh hi top 10 zinga mi tho, champion lai a ni nghe nghe. Pu Mukesh-a te fighter pathum, Razor, Mad Dog leh Rampage te hi chu top 10 ah pawh an tel tawh lo, Pu Mukesh-a personal bodyguard ah an inhlang kai tawh a ni.

Pu Mukesh-a chu a han tho va, "Next match chu ka kutah dah rawh u, a tumpui tur chu keiman ka thlang ang. Chuan mi 10 a beih tlin hunah a chak dan a zirin rank kan khawih danglam anga, a bak chu nakinah ka hrilh leh ang che u." a han ti a, a kal sawn  ta daih a.

*******************************************************

Locker room ah chuan Rina chuan a nghawng na chu vur tlang hian a lo dep mek a, Pu Mukesh-a chu a rawn lut a. A rawn khi lut vur vur mai, "Bravo...nice match. I khel tha lutuk ania, Rina. KA chhuang che, i la ropui ang." tiin kut a rawn beng vel a, Rina chuan a lo melh rum nasa mai.

Lungawiloh hmel tak hian, "Khawnge AMir-a a awm? Ka hmu duh....chuan helai hmun atang hian engtikah nge ka chhuah dawn? Match engzat fakau nge ka la neih? I duh ang chuan ka awm tawh a ni lawm ni?" a lo ti vin hlur mai. Pu Mukesh-a chu a han nui leh huah huah a, "Rina, i hmanhmawh a nih kha." tih pah chuan cheque a la chhuak a.

Cheng nuai 3 lai mai chu a ziak a, "Hei hi naktuk zing dar 10 hnu lamah warden office ah i kal pui anga, ka lo bia ang. Zanin atana i hlawh a nih kha, Amir-a chu theihnghilh rih rawh." tih pah chuan cheque chu a pe a. Rina chuan cheque chu a la a, "Warden chuan engtin nge min lo tih dawn?" tiin a han zawt leh a.

Pu Mukesh-a chuan a pen leh cheque vel chu a ipte ah chuan a ak leh a, "Pawisa in a lo thleng sak ang che, ka be lawk vek mai ang." tiin a chhang a. Rian chuan cheque chu a en a, nuai 1 tur ni reng si, nuai 3 lai mai a lo inziak chu mak a ti kher mai. Pu Mukesh-a chu en in, "Nuai 1 i ti amaw ka tia, tinge nuai 3 lai a nih a?" a ti hu mai.

Pu Mukesh-a chu a lo nui suk a, "Kan official te zinga mi pahnih, Pu Samir-a leh Pu Ronley-a ten Kaito-a lamah khan nuai khat ve ve an bet a. Tikhan nuai 3 i hlawh tihna a nih chu, zan khat hlawh atan chuan tam ve thawkhat tak chu a ni." tiin a lo chhang a. Rina chuan chutiang khawpa pawisa tam, zan khat leka a hlawh chu a rilru a dang leh ta vek mai.

Duhamna hlir chuan a khat leh ta, "Anih a hma a, AMir-a nena kan pawisa zawng zawng kha khawnge a awm?" tiin a han zawt leh a. Pu Mukesh-a chuan a cigar chu a han phawrh leh a, "Lungngai reng reng suh, kha pawh kha ala awm vek. Cheng khat lek pawh kan khawih chingpen lo, Amir-a ta tur leh nangma ta tur kan dah hrang thlap alawm." tiin a t(r)an a, a zu khu leh ta hluah hluah mai.

Rina chu a ngawi vang vang a, "Amir-a hi in that nge, ala dam?" tiin a zawt ta daih mai. Pu Mukesh-a pawh chuan mak ti tak hian, "Eng a? Engvangin nge kan thah ngawt ang? Kan nau te zinga mi, ka thawh pui tho alawm. Ala dam e, mahse ila hmu thei rih lo. Enge a chhan min zawt hrih suh, i future ngaihtuah hrih rawh." tiin a lo chhang a.

Rina chu a khi suk a, Pu Mukesh-a chu ava pan phei a. A cigar zuk lai chu a lak sak a, "Naktuk zanah fight ka nei leh nghal duh ania, anih loh chuan prison ground ah naktuk zing atangin buaina ka chawk chhuak ang. MAn to deuh, nuai 3 atanga nuai 5 man ka fight duh bawk. Ka sawi chiang thawkhat viau chuan ka hria, muttui le.." tih pah chuan cigar chu a han fawp ling vat vat a, locker room chu a chhuahsan ta daih mai.

Pu Mukesh-a pawh chu a nui huk ringawt a, "Naupang leh....pawisa hi chuan i mit a ti del chiang a ni. Lo nghak reng rawh, nang hi ka hmang tangkai khawp ang che. I duh emaw duh lo emaw, ka hausakna tur i nih kha...ka ta i ni tawh." tiin a han phun sap a, locker room chu a chhuahsan ve ta a.

*******************************************

A tuk zingah chuan VArun-a chu a harh a, a ham bai bai mai. A khum hnuai lamah chuan zu dak thla in, "Good Morning, Rina...i tho tawh em?" tiin a zu dakthla a, mahse Rina chu a lo awm hauh lo. Ani chu ground ah exer a lo la leh zak zak tawh chu niin, hetiang hi a theih bik nachhan chu Pu Mukesh-a'n a duhsak bik em vang a ni.

Tuk thuan ei a hun tep tawh a, Rina chu a lo la let reng reng lo mai. A chhungte hnena lehkha thawn tur chu Varuna chuan a han ziak thla malh malh a, chutih lai chuan gang pakhat, foreigner hlang, African American ho, mi hang palian tak tak pali vel lai mai chu an rawn lang thut mai.

Cell kawngka lah chu guard pakhat chuan a rawn hawng a, gang leader chuan pawisa a pe zeuh va, guard chu a kal lehnghal daih. Varun-a chuan a hlau rilru kher mai, cell chhungah chuan chumite pali chu an rawn lut a. An leader ber chuan Varun-a chu a han en vang vang a, "HEtah chicks chhelo lutuk a lo awm reng anih hi, kan va hre har ve.." tiin a han nui vel huah huah a.

HEngtiang gang ho, a bik takin foreigner ho hi an hlauhawm thei hle a. Jail tang naupang deuh emaw, taksa te deuh leh vun ngo deuh lam chi hrim hrim hi chu hmeichhia an lo rawp tawh thin nen, an pawngsual rawn mai thin a ni. Hetiang tih ching hi an tam em em lehnghal a, guard te zinga mi tamtak hian pawisa hlawh nan a rukin an pui thin bawk.

Leader chu ava kal hnai a, Varun-a chuan a lo hlau kher mai. Bangah chuan a nam bet a, "I va han itawm reuh ve a, ila naupang si. Zanin chu kan ta i ni dawn, kan cell ah lo riak rawh aw..bawihte.." a han ti kual vel a. Varun-a chuan a ten takzet, "Tuai ka nilo, kal bo rawh u." hlau chung chung chuan a han ti khur dar dar a.

Chutah gang ho chu an han in en a, an nui tiah tiah mai. LEader bawk chuan VArun-a chu bangah chuana  rek bet thut a, a sam te chu a han hnim kual vel a. Maimitchhing vang vang chung hian, "Ka cahk tawh lutuk, zanin chu ava nuam dawn em. Naupang, tuai i nih kher a ngai lo, zanin atan chuan kan BITCH i ni dawn." tiin a han vin hrep a.

A thiante pathum chu an lo nui leh huah huah a, chutah cell pawn lam atang chuan tu emaw hian, "Nilove...in pali khan vawiin chu ka BITCH in ni zawk dawn, kha naupang kha chu theihnghilh rawh u." a rawn ti a, an va hawi phei chu Rina a lo ni reng mai.

Cell chhungah chuan a rawn lut a, gang ho chu hlauh loh hmel tak hian a rawn kal pel mai a. A kawr chu a phelh a, a hnungzangah chuan lian em em leh mawi em em mai hian ramhuai niawm tak, vantirhkoh ang taka thla nei lem hi tattoo a lo inchhu a. Chu milem rapawm tak mai chu MAMMON lem entirna niin, Rina ring name, a nick-name thar tihna a nih chu.

Gang leader chuan a han en hu a, "Tu nge maw ni a i inhriat le, i pawr ve deuh a mi a?" a han ti khur khur a. Rina chu a khi suk a, "Nat in duh lo a nih chuan chhuak vat rawh u, hei chaw ei a hun dawn.." tiin Varun-a chu a han en a, "HEng pussy ho hian an lo tibuai che em ni a?" tiin a han zawt a.

Varun-a chuan a chhang lo, "Zawnga...min en teh. Tunge ka nih i hria em, tute nge kan nih i hria em?" tiin LEader chuan a han vin leh hrep a. Rina chu a thaw hak a, chupa lam chu ava pan a. Chiang tak hian a en a, "Nula pali, hmeltha lem lo tak...chu chu ka hmuhdan che u chu a ni." tiin ala chhang zui.

Leader pawh chuan Rina zam hauh lo a hmuh chuan mak a ti lutuk chu a nui huk mai, "A ni maw...tun chiah warning ka pe ang che. Chhuak rawh, i cell mate hi biak lawk kan duh. Anih loh chuan nangpawh hi kan khawih tel ve ang che, a chiang em?" a han ti leh khur khur a.

Rina chuan nui chung hian gang leader chu a han en vang vang a, "I hnar ngul chu a nalh hle mai, ka hnar ngul hi nalh ka tih ve tehreng nen ka tluk lo che a nih hi." a ti daih mai. LEader pawh chuan a hrethiam lo kher mai, a thiante chu a han en hu ringawt a.

A thiante pawh chu an lo hawi hu mai, "Enge i sawi awmzia?" tiin a han zawt hu a. Rina chu a lo khi leh suk a, "Ka sawi awmzia chu maw...hmelchhe hle mahla i hnar ngul kha a nalh reuh ka ti. Ka hnar ngul aiin a nalh, mahse ka lawm lo. Ka hnar ngul hi he jail chhungah hian a nalh ber tur a ni, chuvang chuan i hnar ngul kha tih chhiat deuh angai a nih kha." tiin a chhang leh a.

Mak tih hmel tak hian gang leader chuan, "Engmaw?" a ti hu mai. Chutah Rina chuan chupa hnar ngul ah tak mai chuan a hnek siah mai a, a tliak chiang ngang mai. A dar awrh a, a hnar ruh chu a sawi bawih mai. A lu a hai muai muai a, a ding tha hlei thei der lo bawk.

Chutah Rina chuan a tukhum ah chuan thamin jail bang, chang tak mai chu a tauh tir leh pawp mai a. Thi phung chung chuan gang leader ber chu chhuatah chuan a let der mai, a thiante chu an che ngam tawh eih lo. Rina chuan nui chung hian, "Khu..en ru. A nalh tawh loh zia khu...ti kha chuan ka hnar ngul a nalh ber tawh e." a han ti vel ham ham a.

Midang pathum te chuan Rina chu hlauh hmel tak hian an en a, "Enge min en...in boss hi hnuk chhuak rawh u. Chaw ei a hun dawn, tukin chu chaw  a nghei dawn a nih hmel kha..." Rina chuan a han ti leh a. Chumite chuan an leader chu an zawn chhuak a, an rawn kal leh tawh eih lo.

Mak ti tak leh ka hau chung hian Varun-a chuan Rina chu a lo en hu a, "Enge khatia min en?" tiin Rina chuan a han zawt a. Hlauh hmel tak hian, "Ihh..englo, a dik chiah. A dik vek, i sawi apiang ka pawm." a lo ti bah nuai mai, a khur deuh dar dar bawk. Rina chuan hriatthiam loh hmel tak hian, "Eng chu maw dik?" a lo ti leh hmuk a.

VArun-a chu a thlan a tla bawrh bawrh a, "Ihh..englo, ihh...i hnar....i hnar ngul kha a nalh fe zawk." a ti ta daih mai. Rina pawh chu a nui huk ringawt, "A lawmawm e, ka lawm e. Hawh, chaw ei phawt ang." tiin kawr dang chu a ha a, tichuan a chhuak a, rang lutukin Varun-a chuan a zui ve nghal bawk.

***************************************

Tuk thuan chu an ei a, jail tang ho dangte pawh chuan chaw an ei suau suau mai. Rina leh VArun-a te chu an thudun a, an bulah chuan tumah an thu hnai ve lo. Rina chuan Roti(chappatti) chu a han th(r)ial tuam tuam a, "Ka zawhna kha min la chhang miah lo, engvanga tang nge i nih?" tiin a han zawt a.

Varun-a chu za lo deuh hian a khi suk a, "SAwi pawh a zahthlak zawk, mi zahpuiawm tak ka nih hi." a han ti zawi sap a. Rina chuan a han en vang vang a, "Min han hrilh la...enge a chhan?" tiin a han zawt leh a. Varun-a chu a han ngawi vang vang a, a mittui a rawn hnam nghal sak mai.

"Drugs addict ka ni a, kum 19 chiah ka la ni bawk. Damdawi ka tih duh luatah chhungkuaah buaina te ka siam thin a, ka pa in min thihsan tawh a. Ka nu hian min hmangaih a, min duat em em a. Mahse damdawi ka tih atang khan min hlau ta em em thung a, tunah hian ka nu chu ka nau nen an khawsa dun mek a ni. VAwikhat chu ka damdawi chak tawh lutukin ka nu pawisa ka dil a, min pe phal silo chu kut ka thlak ta a ni. Tiangin a lu ah ka vua a, nikhawhrelovin a awm phah a. Ka patea ten FIR an thehlut nghal a, Attempt to murder case in kum 10 chhung chu ka tang dawn a nih hmel." tiin a chhang a.

Rina thin chu a rawn phu dup dup mai, ani pawh drug addict a lo ni ve tawh thin a nih kha. A ngawi reng a, a mitthlaah chuan a unaunu kut a thlak lai te, veng chhung tana a hnawksak theih zia te chu a ngaihtuah let a. "Ka nu chu ka nauvin a awmpui a, a dinhmun a tha lo viau lehnghal. Mahse khami hnu khan damdawi ka khawih leh tawh lo, tuna jail ka tang pawh hi...ka chantawk a nih hi." Varun-a bawk chuan a han ti leh a.

Rina chuan ala chhang chuang lo, a la ngawi reng a. Chutih lai chuan jail tang ve tho pakhat, lukawlh tul mai hi an bulah chuan a rawn thu ve a. Varun-a thlenga rotti la awm, pahnih chu a rawn la ringawt mai. A thlengah chuan a dah a, "Dinner ah chuan pathum ka rawn la tawh dawn nia, i hria maw?" tiin kal leh mai a tum a.

Rina chuan ring tak hian, "DAh let leh nghal rawh." a han ti vin thak a. Midang ho pawh chu an ngawi thap a, dining hall pum mai chu a reh hian a reh thuap mai. Lukawlh pa pawh chu a ding a, "Engmaw i lo sawi ve a?" tiin a rawn hawi let a. Rina chu a ding a, ava pan a.

Chiang tak hian a en a, "Dahlet leh rawh ka ti." a han ti vin leh hlur a. Chupa chu a nui ta huah huah mai, "Engvangin maw ka dah let ang?" a lo ti let ve sak a. Rina chuan rum tak hian a melh a, "I chan tawkah lungawi rawh, dahlet leh rawh." a han ti leh a. Lukawlh-a chuan a roti ken lai chu a pawt nawi a, Rina hmaiah chuan a vawm a.

"Kha..tikhan a tha em? Ve khanglang che chuan le...i pawr a mi?" tih pah chuan hnek a tum a. Rina chuan a kut chu a lo man chat mai, a elh ri tuar a. Lukawlh-a na ti lutuk chu a au vak vak a, Rina chuan a dulah a tlawh sak pawp a, a thal tawp mai. Chutah rawn thawh leh a tum a, mahse guard ho an lo lang nghal a.

Tumah chu an che ngam ta lo, Rina chu a thutna ngaiah chuan a thu leh a. Midang ho pawh chu an thutna ngaiah chuan an thu sap sap hlawm mai, "KA lawm e, Rina." Varun-a chuan a rawn ti zawi sap a. Rina chuan a chhang lo, chaw pawh chu ei chhunzawm tawh lovin a kham hmak mai.

***************************************************

TO BE CONTINUE