MUKPUI LUI (MIZO FICTION STORY) Written by : Aaron Malsawmdawngzuala Chapter - 4

 MUKPUI LUI

(MIZO FICTION STORY)

Written by : Aaron Malsawmdawngzuala

Chapter - 4

****************************

Zan dar 9 a ri tawh a, Bza te thian ho zawng zawng pawh chu an muhil vek tawh. Tent pawh pakhat an kaih belh leh a, inhnaih takin an dah dun a. Pakhatah chuan hmeichhe pahnih an mu a, pakhat zawkah chuan mipa pathum an mu thung. Peka zun chhuak chu a rawn harh hlawl mai a, a bula chempui a dah chu la in zung tur chuan a chhuak ta a.

Puan in atang chuan a chhuak a, a chhuah rual rual chuan Muani pawh a rawn chhuak ve nghal a. A mit a rawn nuai nauh nauh va, "Ehe Peka, khawnge i kal dawn a?" tiin a han zawt hu a. "Ka zung dawn, khawnge i kal dawn zawk?" tiin a lo zawt let ve a. Muani chu a han ham bai bai a, "Keipawh ka zun a chhuak a, tu emaw ber rawn kaih thawh che u ka tum dawn chiah a." tiin a lo chhang a.

"Lo kal rawh..ka lo zunpui ang che." Peka chuan a han ti a, tichuan an tent awmna atanga hla vak lovah chuan Peka chu a han zung a. A zung zo chu Muani chu a zung ve nghal bawk, an kal leh tur chiah chu Peka zawk chuan thawm a hre tlat mai. Muani erawh chuan a hre lo, a kal tlang nul nul a.

Peka chuan hnunglam chu a han hawi a, mahse a thim em avang chuan engmah chu a hmu tha thei chuang lo. Mahni a va en fiah chu thil tih chi a ni lem lo tih a hriat avang chuan Muani chu a zui leh mai a, thawm pawh chu a awm zui tawh chuang lo. Muani chuan tent chhung a luh hma chuan, "Peka...mahniin khawiah mah kal hrang su aw, tui taka mut a har teh mai ania." a han ti zawi sap a.

PEka pawh chu a lo nui khi sak a, "Tehreng mai, thlamuang tak khan mu ru. Hei...mipa ho hi kan lo in men chhawk ang, hlauthawng lo ula." tiin zaidam tak chuan a lo chhang a. Tichuan Muani chu tent chhungah chuan lutin a va mu leh a, PEka pawh chu an riahna lamah chuan a lut ve nghal bawk.

********************************

Computer hmaah chuan Bza pa, Pu Biaka chu thu in hna a thawk mual mual a. Chutih lai chuan a phone a rawn ri thut mai, a han en chu a fapa Bza thianpa, Siama nu a lo ni. Mak ti tak hian a en a, "Ehe..Pi Tluangi chu...Bawiha te chungchang bawk em maw ni dawn le?" a han ti nuah nuah a.

"Hello Pi Tluang, enge ni ta?"

"Pu Biak, Bza'n a rawn be tawh che u em? I call tlang thei em?"

"THei bik lo, tukin zinga an kal atang khan engmah a la rawn sawi lo, call lahin a tlang thei bawk si lova, keini pawh kan mangang ru khawp mai."

"Hei...kan huana kal tur ang khan an insawi si a. Kan huanah hian kan driver a riak mek a, kan han phone theih loh takah chuan tiin kan driver kan phone a, an lo kal lo reng reng a ti a."

Pu Biaka chu a ding nghal zawk mai, "Enga? An lo kal lo a ti amaw?" a ti hu mai. Pi Tluangi chuan mangan hmel tak hian, "Aw chu chu ania, tun deuh lawk khan kan driver chu ka phone a. Hei Siama pa nen phei hi chuan kan mang a an khawp mai, police hnenah kan report mai dawn em mawni le te kan ti hial a." tiin a lo chhang leh a.

Pu Biaka rilru hah lutuk chu a han thaw deuh hak a, "Um..a nih chuan kan nu nen kan rawn phei nghal ange. Tikhan lo awm ula, midang ho..Pi Rini te pawh phone kual ila, Police Station ah chuan kan kal dawn nia." tiin phone chu a dah a. An nu, Pi Kimi erawh thlamuan hmel tak hian a lo hnar suk suk tawh thung a.

Sawi vak vak pah chuan, "Kimi..Kimi harh teh, hei thu lawmawm loh deuh mai a awm ania." Pu Biaka chuan a han ti a. Pi Kimi pawh chu a rawn harh ve mai a, "Eng thil nge ni a?" tiin a han ham bai bai a. "Bawiha te kha..Siama te huanah an awm miah lo a nih chu." a han ti mai chu Pi Kimi pawh a meng phawk chiang kher mai.

"Eng a? An awm lo amaw? Enge awmzia?" a ti nghal hu mai a. Pu Biaka chuan vin lek lek hian, "Ka hlauh ang ngei ngei ani, i ngaih a sam leh lutuk thin a. Siama nu in min rawn phone a, an driver hi tunah Siama te huanah a riak mek a. Vawiin nilengin tumah an lo kal lo a ti a nih chu, Police hnenah kan report dawn." a han ti deuh hlur a.

Pi Kimi chu rang lutukin a zuang tho nghal a, "Awii ka duh thei lo, engtin nge an awm ang le? Khawnge an awm ang le, Police Station ah chuan i kal vat teh ang." tiin a hlauthawng ber ber ah chuan a t(r)ang leh lawi si a, a insiam nghal sawk sawk mai. Pu Biaka pawh chu insiam nghalin motor chahbi a la a, an nupa chuan an chhuak ta nghal a.

******************************

Peka chu a muhil leh mai thei tawh lo, lui lamah saphai lian lutuk a awm bawk, an bul lawk ramhnuai ah lah sanghal an awm bawk nen. Chutia a inngaihtuah mek lai chuan thawm bawk chu a hre leh ta, an tent awmna atang chuan a hla vak lem lo tih a hrethiam nghal bawk.

A han ngaithla chiang a, vawk nghuk ri hruih hruih ri ni awm tak a ni. A hrethiam nghal a, "Sanghal bawk maw...engzah chiah nge maw awm le?" tiin a lu chu a dawm vawng vawng ringawt. Rang takin, thawm dim tak si chuan a han tho nghal vat a. Fimkhur tak hian zipper chu a han hawng a, a han dak dek dek a.

A rin ang chiah in sanghal lian tak mai, anmahni umtu sanghal ngei mai kha a lo ni. Bza leh Siama te chu a kai tho nghal a, anni pawh chu an rawn harh ve nghal bawk. "Enge...saphai kha a lo kal ami?" Siama chuan a rawn ti nghal hru mai. Bengchheng lo tur chuan zaizirin Peka chuan a lo hrilh vat a, "Kan tent awmna atanga hla vak lovah sawn sanghal a awm, mahse kan lam chu a rawn hawi lo." a han ti su su a.

Bza chu a han dak ve dek dek chhin a, sanghal chu anmahni hnungchhawn zawnga awmin lei chu a lo hnim kual dun dun a. An han ngawi vang vang hlawm a, "Engtin nge kan tih ang, tihian a kal sawn hun kan nghak tawp mai dawn mi?" Siama chuan a han ti a. Peka chuan a lu thingin, "Nghah tawp chu a chi lovang, kan hnawh kiang angai ang. Min rawn bei thut ta se, kan hneh dawn lo rapthlak bawk si." a lo ti a.

Bza chu a han inngaihtuah vang vang a, "Kan hmeichhia te hi ti harh lo law law ila, an harh vaih chuan an chiai nasa dawn emai. An harh hma a saw sanghal saw kan hnawh kian angai ang, plan mumal tak kan siam angai a ni." a han ti a. Siama chu a lo ner nung a, "Engtin nge maw sawtiang sanghal lian lutuk te kan hnawh kian theih ang le?" a lo ti nuah nuah mai.

Peka chuan a mutna sira a hmanraw siam pakhat, tiang a suih, a hmawra lung zuma a t(r)awn beh chu a han la chhuak a. Siama chuan mak tih hmel tak hian, "Ehe...engtik laiin nge kha kha i siam a?" a lo ti hu mai. Peka chu a khi suk a, "In mut hnu khan ka siam leh alawm, hei hi chuan saw sanghal saw chu a chek hlum thei ngei ang." tiin a lo chhang a.

Plan chu an siam ta, an han sawi ho nak nak hnuah chuan fimkhur tak leh thawm nei lo thei ang ber chuan tent chu an pathum chuan an chhuahsan ta a. Sanghal awmna lam chu Siama chuan ava pan a, an hmanraw siam, thing hmawr zum chu inven nan a hum ve ran bawk. A va pan hnai zel a, "Hey nang vawkpui kha....lo hawi teh." a han ti vin tuar a.

Sanghal pawh chu a rawn hawi a, Siama a han hmu chiah chu a nguk leh ta chhur chhur mai. Siama chuan zam leh hlau ru chung chung chuan, "Lo kal ta che...ka ban lehlam hi i thianpa in a seh tawh a, lehlam hi rawn seh ve leh la.." a han ti leh a. Sanghal chuan beih tumin a pan a, Siama chu muangchang chuan a hnung tawlh ve zel a.

Sanghal pawh chu a rawn kal chak tawlh tawlh a, chutah Siama chu a tlan ta thut mai. Chuveleh rang lutukin sanghal chuan a umzui ve nghal bawk a, ramhnuai luhna lam pan chuan Siama chu a tlan phei a. Thingkung lo awm hmasa ber ava thlen chuan a zuang vak a, "Peka, tunah.." tiin a au nghal tuar bawk.

Chuveleh sanghal chu a rawn thleng chawpchilh ve nghal a, thingkung phen atang chuan PEka chu a rawn lang thut mai. Sanghal chaldarah tak mai chuan a hrei siamchawp hmang chuan a han chek pawp a, mahse sanghal chu a rawn tlan chak em avang chuan Peka chuan a hrei ken lai chu a vuan nghet zo ta lo.

Sanghal chalah chuan a bur ta va mai a, a tal nasa ngang mai. A lu chu a thing vak vak a, mahse lung zum chu a lut thuk hman em a, thisen pawh a per chuai chuai mai. Chuveleh hnim kar atang chuan Bza chu rawn chhuak ve leh in sanghak nghawngah chuan chempui hmang chuan a han sat ta siah siah mai a, sanghal lah chu a lo chak nasa mai.

Vawk talh nen chuan a lo in ang chiah lo ni tur a ni, thisen chhuak hnem tawh hle mahse Bza chu a nek per lawp mai. Mahse a chalah hrei a la bur va bawk, a nghawng lah a thler duai tawh bawk nen, a che tha hleithei bik lo. Siama chu rawn che ve leh in sanghal mitah tak chuan a thing hmawr zum chuan a han vit tlum pawk mai a, sanghal pawh chu a che tha thei ta lo.

A let tawp a, a thaw hrawk hrawk a. Reiloteah chuan a thi ta der mai. Siama thinrim laklawh si chuan, "Ve mai mai a....nang vawkpui mai mai." tiin a han chhir zui hrep a. Bza pawh chu a rawn tho leh a, "I tha maw?" Peka chuan a lo ti vat. Bza chuan a dul chu a rawn dawm phei vawng vawng a, "AW..ka tha e...khai, ava na ve..a thi tawh maw?" a rawn ti nuah nuah a.

Peka chu a lo thaw hak a, "Umm..a thi thei hram e." tiin a lo chhang a. Sanghal ruang chu an pathum chuan an en thap a, an han ngawi deuh vung vung hlawm phawt a. Peka chuan Siama chu a han en a, "Tinge nichin khan i biak vak kher a, i thusawi lah kha a vai film ropui lehnghal." tiin a han nui huk a.

Siama pawh chu a lo khi suk a, "Sawi tur dang avang em alawm, hawh u..kan thawm an hre palh ang, hmeichhe ho kha kan kalsan tawp bawk si...va let vat ang u." tiin a kal nghal daih a, an hmanrua te chu la khawm leh in Bza leh Peka chuan an zui ve nghal bawk. An riahna hmun chu an thleng a, vanneihthlak takin an lo la muhil hlauh mai.

********************************

Zing dar 4 vel a ni a, Bza te thianza ho pawh chu tui takin an muhil mek a. Rei vak lo hnu chuan Sangsangi chu a rawn harh a, "Awii..ka zun a chhuak lutuk." tiin Muani chu kaihthawh a han tum a. MAhse mipa lam riahna atang chuan thawm a hre tlat mai, tent atang chuan a chhuak a.

Bza chu a lo chhuak ve chiah a, "Bz... ila meng elaw?" tiin Sangsangi chuan a zawt nghal vat a. Bza chu a lo khi suk a, "Ka muhil char char zawk a, tun deuh lawk khan ka harh a. Ka han dak chhuak mai mai mawle, kan dinhmun check pahin." tiin a lo chhang a. Sangsangi chuan ava pan a, "A that chu...min zun pui nghal law law teh." a lo ti nghal a.

Bza chuan a zun pui a, tichuan mu leh nghal mai lo chuan an puan in bulah chuan an thu dun a. An ngawi dun vang vang a, "Va mu rawh...i chau awm si. Keichu tihian ka lo meng hrih ang, mipa ho hi kan inmen chhawk deuh va." Bza chuan a han ti a. Sangsangi chu a mu duh mai bik lo, "Aih a ngai lo, ka mut chhuak a reh vek alawm." a lo ti tlat a.

An ngawi dun leh vang vang phawt a, "I ke chu enge a an, ala na em?" tiin Bza chuan a han zawt leh a. Sangsangi chuan nui sang hian, "Na vak tawh lo, kan kal nasa lutuk a, a reh huai zawkin ka hria." tiin a chhang a. Eng engemaw ho te te chu sawiin an titi tui dun phian a, "Taka Bz, sawi chu a hun lo viau maithei a...ihh, Rosie nen khan enge in inthenna chhan min hrilh ve thei angem?" Sangsangi chuan a rawn ti chhuak hlawl mai.

Bza nui hmel pawh chu a tawp nghal a, a kun ta ngal mai. Sangsangi chu a inthiam leh chiah lo kher mai, "Ka tihpalh aw...i sawi duh loh chuan sawi a ngai lo ania, ka zawt mai mai che nih kha." tiin thupha a chawi nghal mawlh mawlh a. Za lo tak hian Bza chu a nui lui a, "A ho lutuk...inthiamlo duh suh. Englo ania, kan inthen a hun tawh aniang e." a han ti zawi sap a.

"Tu zawkin nge then hmasa, nangmah nge amah?"

"Hehe, tuzawk nge i rin?"

"Amah aniang....amah a ni chiang lutuk."

"Hmm..engtin nge i hriat?"

"A chiang mai alawm, nang te chuan i duh ngawih ngawih e.....i tuar nat zia pawh kan hre vek alawm."

Bza chu a han khi deuh suk a, "Keiman ka then...keimah zawkin." a ti ta daih mai a. Sangsangi chuan mak tih hmel tak hian Bza chu a en hru mai a, "Eng a? NAngmah zawkin maw? Avan mak, mahse i van tuar na si ve?" a ti hu mai. Bza chu a han thaw hak a, "Tuar na ang chu...ka chunga a thil tih kha a na em a, ka tuar na lo thei lo alawm." a lo ti zawi leh sap a.

"Engthil nge i chungah a tih a? A bum che mi? A kawp che mi?" tiin Sangsangi chuan a zawt leh mawlh mawlh a, a hriatchak hmel takzet. Mahse Bza chuan a chhang mai lo, "Ihh...ka hriat ve a ngai lo a nih chuan pawi chuang lo." Sangsangi bawk chuan inthlahrung tak chuan a han ti leh nghal zung zung a.

Bza chu a nui deuh vur vur a, "Amak thawt thawt thin..ka sawi dawn alawm." tiin na lo te chuan Sangsangi chu a han kuk fawk a. Sangsangi chu a inthiamlovin a lai lek lek mai, "Englo ania..a hma atang daih tawh khan kan boruak kha a fu lo lutuk a, chuan ka ringhlel thin bawk." tiin a han ngawi deuh dat phawt a.

A han thaw leh deuh huai a, "Chuan...vawikhat an ina len a, va surprise ka tum a. Mahse mipa dang a lo awm a, an lo inthuthnaih em em mai lehnghal. Kawngka kha kik hmasa lovin ka lut deuh thut a, min lo kawp reng tih ka hre ta a ni." tiin a han sawi chhunzawm a. SAngsangi chuan a khawngaih hmel kher mai, Bza chu a hnuk a ulh deuh tih a hre thei nghal bawk.

A va tawlh hnai a, Bza chu a kuah a. Bza chuan a lo kuah let ve mai a, mahse an awmdan chu a danglam ta tlat mai. An in en vang vang a, chutah zawi muang chuan an inhnaih telh telh a. A tawp a tawpah chuan an inkiss ta ringawt mai, an duhthawh zel a. An kal thui dawn veleh chuan Sangsangi zawk chu a han meng zeuh va, lui atanga saphai rawn tleng chhuak zul zul chu a hmu fuh ta.

Rang lutukin Bza chu a nam sawn a, "Bz...Bz...sawww.." a ti khur nghal dar dar mai. Bza chuan ava en ve a, "Khai...khai aww." tih leh a zung tho nghal a. A thiante chu kai tho nghalin, "Hey..Hey...saphai, saphai kha a rawn tleng chhuak ania." tiin a au vak vak a. Chutiang bawkin Sangsangi chuan a thiannu Muani chu a lo kai tho ve bawk, midang ho pawh chu an rawn harh a.

Peka chuan a hrei siam chawp chu a chelh nghal a, tent atang chuan an vai chuan an chhuak a, an mangang leh hlau lutuk chu an insu buai nuai mai lehnghal a. Bza chu a va hawi phei a, saphai chuan an lam a rawn la pan zui. Mangang tak hian, "A lo kal...a lo kal ania." tiin a au vak vak a.

Tichuan tent chu an chhuah san a, an tlan chhe ta nghal a. Loh theih lohvin ramhnuai lam an pan nghal a, mahse an thlen thui hma chuan Bza chu a ding a. A thiante chuan an hrethiam lo kher mai, "Tinge..tinge i din?" tiin Peka chuan a lo vin nghal hlur mai. Phawk hru hian Bza chu a rawn meng a, "Siama..khawnge Siama, kan kalsan tihna mi?" a ti ta hu mai le.

Midang ho pawh chu an han in en kual hlawm a, Siama chu a lo awm ve der lo mai. Muani chu a hlauthawng takzet, "A awm ve lo..Siama, Siama kan kalsan." a ti nghal chel chul mai a. Peka chu a thaw halh halh a, "Kan..kan let leh angai, kan let leh angai." tiin a hrei siam chawp chu a hum nghet sauh sauh va.

Lui lam pan chuan a tlan leh nghal a, loh theih lovin midang pawh chuan an zui ve leh nghal bawk. Lui bul an va thleng chu an ding chat mai, "Nilo...Siamaa..Siama.." tiin Muani chu a au ta vak vak mai a. Siama chu saphai chuan a lo zial mek hi a lo ni a, chu mai ala ni lo. Saphai chu pakhat chauh a lo ni reng reng lo, pahnih lai an lo ni.

Pakhat zawk chuan Siama chu a zial bet nghet khawp mai, Siama ruh chu a tliak ri rawp rawp mai a. PAkhat zawk lah chuan a lo chuhpui leh nghal a, "Peka...chan ru, khawngaihin chhan ru.." tiin Muani chu a rak hian a rak chiam chiam hi a ni ber mai. Bza chuan ava hnaih deuh va, "Thlah rawh...Zawnga, thlah vat rawh." tiin lung chuan a vawm vak vak ringawt a.

Mahse saphai pakhat zawk chuan a rawn hmu a, Peka chuan Bza chu a pawt phei lehnghal. Muani chu va kal a tum ta mai a, "Hey....Muana kha thlah nghal rawh." tiin ava rak chiam chiam ringawt mai. Mahse Sangsangi chuan lo man betin, "Nilo..Muani, kan tlan angai. Kan tlan vat angai, va kal suh." a lo ti ve bawk a.

Chutah saphai pakhat zawk chuan midang ho chu rawn beih a tum leh ta, chuveleh Muani chu an manbet a. An tlan pui ta ringawt a, ramhnuai lamah chuan an tlan lut a. Hnim karah chuan an biru thei hram a, Muani chu Peka chuan man betin a ka chu a hup sak ringawt mai. SAphai pakhat zawk chuan a rawn umzui a, mahse reiloteah a let leh nghal.

Bza chu a han dak dek dek a, Siama zial mek tu saphai chuan Siama chu a lo dawlh tan mek hi a lo ni. A en rei thei lo, midang pawh chu en a phal ve lo tawp. Saphai pahnih te chu muang chang chuan lui lamah chuan an tleng thla leh a, chuveleh Bza te thian ho chu an bihrukna atang chuan an chhuak a.

******************************

Zing dar 5:30 a ni a, ramhnuai chhungah chuan Bza te thian ho chu an thu ngawi thap mai. Muani tap nasa lutuk chu a mit a bui vek tawh a, a thu tum bur mai. Khua pawh a rawn var deuh tan tawh a, mahse chhete chuan a la thim deuh va. Peka chu a han thaw halh a, "Khua hi han var chiang se, kal phallohna an tarna lam kha kan pan tawp tawh dawn nia." a han ti zawi sap a.

Sangsangi chu a rawn hawi chhuak a, sanghal ruang, an bul atanga hla vak lova lo let reng chu ava hmu a. A phu deuh zuk mai, "Ehe..saw..saw sanghal saw a thi tihna mi?" tiin a hlau angreng khawp mai a. "In muthilh lai khan, nizan khan a lo kal a, kan lo that alawm." tiin Peka chuan a lo chhang a.

Bza chu a han thaw deuh hak a, "Siama thah a ni mah zawk, Siama khan kan vai tan a nunna a thap ngam a ni. Sanghal chhaih buaitu pawh amah, a thattu pawh amah." a lo ti tham tiak a. Muani chuan a mittui chu hruk pah hian, "Keipawh ka nunna min chhanhim sak, mahse keini chuan kan chhan ve thei ta si lo." tiin a han inhnit leh feih feih a.

An han ngawi leh vang vang hlawm a, "Rul pangngai emaw, eng anga tur hlauhawm nei rul pawh nise...he saphai ai hi chuan a hlauhawm loh daih zawk ang mawle. Rul hi chuan mihring an hlau va, mihring an chuk nachhan pawh hi anmahni inven nan ania. Mahse saphai chu an ni ve lo, reculated python an ni a, mihringte hi an chaw amaw min ti thin a ni." Bza chuan a han ti leh nuah nuah a.

Chutih lai chuan Muani chuan an awmna atanga hla vak lova saphai, ramhnuai lama rawn tleng lut zul zul chu ava hmu leh ta. Chiai vak ta lem lo chuan a han maimitchhing vang vang a, "Bz..saw i reculated python sawi chu." a han ti zawi sap ringawt a. Bza chu ava hawi nghal, "Ehe..saw, alo kal leh tawh." tiin an vai chuan an biru lehnghal thap a.

Saphai chuan chaw a zawng leh tawh a ni ngei ang, a tleng kual dun dun a. Chutah a rawn tleng hnai zel a, "Thawm nei su aw, tumah kha bengcheng su." Peka chuan a han ti su su a. Saphai chu rawn hnai zelin sanghal ruang chu a rawn hmu ta hlauh mai, a han zial kual vel phawt a.

Tichuan muangchang chuan sanghal ruang chu a dawlh ta a, sanghal chu a lian tha bawk a, a dawlh chhung pawh a rei khawp mai. A dawlh zo chiah chu a che hleithei ta bik lo, a awmna ngaiah chuan a awm ta vung vung mai a. Bza chu a tho chhuak a, "Ka hriat ve danah chuan, saphai hian thil lian tak an dawlh hi chuan an che mai thei ngai lo, hei hi kan thahna hun tha tak a ni." a han ti chang fak a.

PEka chu a rawn ding chhuak vein hmeichhe pahnihte bulah chuan, "In pahnih khan lo che miah suh ang che u, hawh le...Bz, kan thiante pahnih, Euniki leh Siama te phuba chu va la ang le." tiin a hrei siam chawp hum ran chung chuan ava kal ta a, Bza chuan a zui ve nghal bawk. An han hel kual phawt a, hnunglam atang chuan an va pan ta a.

Saphai chu a puar bawk aniang, ala che eih lo. Chutah Peka chuan a han din chilh ren rawn a, hnunglam atang chuan saphai lu ah tak mai chuan a hrei hmang chuan a han chek ta siah mai a, thisen pawh a per chhawk mai. Saphai chu a han tal ve deuh va, mahse Bza chuan lungtum lian tak hian sapai luah bawk chuan a chhu ta chawrh chawrh mai a.

Rei lo teah saphai chu a thi ta, Muani leh Sangsangi pawh chu an rawn kal ve a. Muani thinrim chuan lungtum chu la ve in saphai thi tawh chu a lu ah chuan a han chhu ve chawrh chawrh mai a, "Hei hi Siama dawlhtu kha a ni lo, a rawng atang hian...pakhat zawk kha a ni." PEka chuan a lo ti a.

Bza chuan saphai chu a han en vang vang a, "Mihring pakhat lek pawh dawlh nan chuan darkar chuang chuang an hmang a, mahse tukina Siama a dawlh kha chuan hun a hmang rei lo takzet. Engemaw awmzia le, tuna sanghal a dawlh pawh kha a rei lo kher mai." a han ti nuah nuah a.

Peka chuan chiang leh zual hian a han en a, "Saphai naran a ni lo, tiang em em a saphai lian hi a takah ka la hmu lo." a lo ti ve bawk a. Bza chu a han ngawi vang vang a, "A awmzia chu saphai hi tam tak an awm pawh a ni thei, pakhat chauh nilovin pahnih chu kan hmu tawh phawt a. Pakhat chu tihian kan that tawh a, engzat tak la awm ang maw?" a han ti vawng vawng a.

"Nia, pahnih chauh an nih ka ring lo. Pai tawih nan pawh a thla a thla chuang an bei thin niin ka hre sia. Pahnih chauh chu awm se Euniki dawlhtu ringawt pawh khan ala pai tawih teuh lo mai, chuan tunah hei, pakhat chu kan that ta phawt chu ania." Sangsangi chuan a lo ti ve bawk.

Peka chu a han ngawi vang vang a, "An luak chhuak leh te a nih ngawt loh chuan....saphai awmna, a bu pui a awm tihna a nimai. Lui saw a thui angreng a, khawi emaw lai berah sawn a bu pui a awm a ni mahna." a lo ti ve bawk a. Khua pawh a rawn var chiang ta, tichuan an pali chuan chulai hmun chhuahsan tum chuan an kal leh ta a.

**********************************

Minute 40 vel chawl miah lova an kal hnu chuan Sangsangi ke na chu a rawn chhuak leh ta tlat mai, "Awii, ana tawh lutuk. Chawl lawk mai ang u, ka kal hleithei tawh lo." tiin Sangsangi chu a thu hnawk a. Bza chuan buaipui nghal vatin, "Ana viau em ni? Hawh, ka lo paw mai ang che." a lo ti a.

Mahse Sangsangi chu a inthlahrung ve deuh bawk si, "A ngai lo, reilote chawl ila kan kal leh thei mai ang." tiin a lo chhang a. "Aww..Bza nen kan puak chhawk mai dawn che lawm, kan kal vat angai zawk." Peka chuan a lo ti vin leh hlur mai a. Sangsangi pawh chuan chutia amah vanga chawlh zel mai chu nuam a ti chiah tawh bik lo, "Nia...a inthlahrunawm ve a..anih chuan kal ila." a ti ve ta a.

Mahse Muani chuan, "Aih...keipawh ka chau alawm. I chawl teh ang u, tui in tur awm bawk si lo nen, riltam tawh bawk nen, a hrehawm emai." a lo ti tlat mai a. Chawlh chu an remti tlang ta nge nge a, Muani chau lutuk chu thingkung nghengin a thu hnawk mai. Mahse a thingkung nghen lai ber kher ah chuan saphai dang pakhat a awm tih tuman an hre der lo, mahse chu saphai chu ahma a saphai dangte ai chuan a te deuh zawk thung.

Te zawk eng ang mahse, mihring dawlh thei tur khawpa lian chu a ni tho tho. Thing zarah chuan a in vial tuau mai a, Muani chu a chhuk en ta ran mai le. Muani chu a han thaw halh a, maimitchhing chung chuan a han dak chho vang vang a. Chutah zawi muanga a han meng leh chiah chu amah hnaih takah hian saphai chuan a lo melh kur mai, "Awii ka duh thei lo..." tih chiah a sawi hman.

Saphai chuan a lu ah chuan a hrawkah tak chuan a rawn hap thawih mai a, rang lutukin thingkung lamah chuan a pawt chho nghal lawp mai. Midang chuan an rawn hmu a, "Muani.." tiin Peka chu a zuang tho nghal. A hrei ken chu chuh vatin thingkungah chuan a lawn chho nghal a, mahse saphai chuan a mei chuan a lo hlap pawp a.

A tla thla leh nghal a, a hrei ken chu ala bung zui a, chumai nilovin a lung hriam suih pawh chu a inphelh daih mai. Sangsangi lah chu a au tuar tuar ringawt mai a, tih theih dang nei ve hek lo. Peka chuan a lu a sawh a, a tho hleithei ta tlat lo. Saphai lah chuan thingzar ah chuan Muani chu a zial hnan a, dawlh a tum ta mai.

Rang lutukin Bza chuan lung hriam chu a la a, thingkungah chuan a lawn nghal a. Saphai chu a vit ta siah siah mai a, saphai pawh chuan na a ti ngang a niang. Muani a zial lai chu a thlah a, Muani chu a tla thla tawp mai, a la thi lo hlauh. Saphai pawh chu a tla thum ve dawp mai a, Bza chu a rawn zuang thla ve nghal bawk.

Chutah a va pan leh a, "Thi rawh..thi nghal rawh." tiin saphai chu a lu ah a vit ta siah siah mai a, chawl miah lo leh au vak vak chung chuan vawi 30 lai chu a vit nawn siah siah mai. Saphai lu pawh chu a sawp deuh vek a, a thi chiang hle bawk. Muani chu Sangsangi chuan ava buaipui nghal a, mahse a hrawk chu a lo pawp hrup mai.

Saphai khan Muani hrawk chu a lo seh hman chu niin, Muani chu a thaw tha hleithei lo. Chumai bakah thingkung atanga a tlak kan a ring a sawh khawlo bawk nen, "Muani, Muani...i tha em?" tiin Sangsangi chuan a be mawlh mawlh a. Mahse Muani chu a thaw muang tial tial a, a tawp a tawpah chuan a thi ta der mai.

Muani chu an chan leh ta, Muani dawlh tumtu saphai kha ball python chi khat, a lian chi niin mihring dawlh thei tur khawpa lian a lo ni. Ball python te hian cm 1 vela sei ha, hriam tak an nei a, mahse tur an nei lo thung. Muani thihna chhan ber zawk chu a ring a sawh tliah vang a ni a, saphai sehna chauh kha chu nise a dam chhuak ngei ang.

**********************************

TO BE CONTINUE