MUKPUI LUI (MIZO FICTION STORY) Written by : Aaron Malsawmdawngzuala Chapter - 1

MUKPUI LUI

(MIZO FICTION STORY)

Written by : Aaron Malsawmdawngzuala

Chapter - 1

*********************************

Alarm ri ral ral chuan Bza mu lai chu a kai tho va, peih loh hmel tak chuan Bza chu a tho chhuak a. A han zi mar vel a, a hmel atang erawh chuan a hlim lo tih a hriat hle. Bza hi kum 23 leka upa niin college zirlai a ni a, ni 3 vel kal ta khan a bialnu Rosie nen an inthen a ni. Thian ngaina tak a ni a, mahse a bialnu nen an inthen meuh chuan chhuah pawh a chhuak tha peih ngai lo.

A thiante pawhin theih tawp chhuahin hnem an tum thin a, mahse mahnia awm chu a duh ber zawk a ni. Chumi tuk chuan apa in bungrua va lam turin a tir a, peih lo tak chuan pazar lamah chuan a bike nen chuan a inkhalh phei a. A tir tur a tih zawh hnu chuan a haw leh tur chu a thianpa, Peka a hmu hlauh mai.

Peka chuan rawn pan nghalin, "Ehe, khawnge i kal a?" tiin a rawn be nghal a. Bza chu a lo khi suk a, "Hei...bungrua chhete ka han lam khawm lawk a nih hi...khawnge i kal zawk a?" tiin a lo zawt let a. Peka chu a han thaw huai a, "Siama te inah ka va kal a, group-a kan sawi kha...hei kan plan chho mek a...nang lah hi, engmah i rawn sawi ve ngai si lova...i reh reng ringawt mai." a han ti nuah nuah a.

Hriatthiam loh hmel tak hian Bza chuan, "Eng thil maw in plan a, ka hre ve lo reng reng?" a ti hu mai. Peka chuan a thianpa chu a han melh deuh run a, "Ni reng ang chu, group te hi en ve thin ta che. Rosie nena in inthen vang mai a, ina tawm ngawt ngawt tur pawh a ni lo." tiin a hau deuh hrep mai.

Bza pawh chu a khi suk a, "Ka hringnun hi a wow lo em ani, tunlai chu....engthil nge in rel hrim hrim a?" tiin a han zawt leh a. "Siama te huanah khan kal kan tum a, hmanah pawh kan kal tawh kha." tiin Peka chuan a chhang a. "Um..a nih chu mawle, nuam deuh khan in zu kal dawnnia." Bza chuan a ti zawi sup ringawt.

Peka chuan vin lek lek hian, "A mak thin e aw...i lo kal ve ang chu, in tur pawh a tam ang. Rilru tih thawven nan a ni mai alawm, peih lo mah la ka rawn sawm dawn tho tho che." a ti hlur mai. Bza chu a nui leh deuh suk a, "Ka tel lo pawn in hlim tho ang chu, engtika kal nge in tih hrim hrim a?" tiin a lo zawt let leh a.

"Naktukah...zing chaw ei kham veleh kan move nghal ang."

"In lamah ka lo awm zawk ang, tunlai chu ka chhuak peih thlawt lo."

"A fair lo, i lo kal loh chuan kan tlem dawn lutuk."

"A hma pawn ka kal tawh tho alawm, chubakah in lamah kan buai ve angreng sia."

"Daw lo mai teh, Lalbiakzual. I intihthawven ve te angai alawm, chubakah a hma in kal tawh tho mah la, tun tum te chu zan riakin alawm kan kal dawn."

"Huiham...ka zawi viau asin..hehe."

"I awm zawi mai mai a nih kha, kan thian hovah nangmah chiah i lo kal lo tihna a ni dawn nia. Midang phei chu an lungawi vak lo tehmai ania aw...lo kal ngei ngei rawh."

Bza chu a ngawi vang vang a, "Nia...zaninah ka rawn hrilh dawn che nia..ka kal phawt ange." tiin a bike-ah chuan a lawn a. Peka pawh chuan, "Ka rawn be leh ang che, kan ring dawn che ania." tih pah chuan a kalsan a. Bza pawh chu a tlan a, "Naktuk zingah ka rawn sawm ang che aw.." tiin Peka chuan a la rawn au zui hram a.

*********************************

Zan a ni a, Bza chu a bialnu Rosie ngaiin a mood a la fu hlei thei lo. A thiante ruala luia kal ve mai chu a chak ve reng, mahse Rosie bawk chu a rilru ah chuan a rawn lut leh thin a. Chutia sitting room tukverh bula ngawi renga a thut vauh vauh lai chuan message a dawng hlauh mai, a han en chu a thianpa Peka a lo ni.

"Enge i chanchin?" tiin a rawn zawt a, mahse Bza chuan a reply mai lo. A nu leh pa TV en lai chu a va melh a, inthlahrung tak chuan ava pan a. A pa bulah chuan, "Ihh.. pa, naktuk ah Siama te huanah, luiah kan kal dawn a, ka kal ve dawnnia aw.." tiin a han dil a. Apa chuan a lo melh run a, "I va sawi tlai thin ve...naktuk chu khum kan siam dun ang chu ka lo tia.." a lo ti nuah nuah mai.

Inthlahrung tak hian Bza chuan, "Ka kal lo thei tho va, mahse zan riak kan ni dawn a. Ka kal ve chak deuh mawle, a hma a kan kalna tho a nia." a han ti zawi leh sap a. "ZAn riak a? In va ngaihtuah awm thin tak em aww...luiah phei chuan fimkhur a ngai asin." apa chuan a lo ti nuah nuah mai.

Anu chu rawn inrawlh vatin, "Kal ve rawh... kal ve rawh, i chhuah thawven angai a nih kha. Fimkhur ula, in exam chawlh lai a ni tho alawm." a lo ti hlauh mai. Apa pawh chu a han ngawi vang vang a, "Anih chuan i ken tur vel te tifel zung zung la, zaninah inpeih thlap ang che. Thiante nghah nih bik reng te hi a mawi lo, va intifel vat rawh." tiin a phalsak ta a.

Bza chu room lamah chuan  a lut a, "Ka hman e, dar engzatah nge chhuah tur?" tiin Peka chu a va reply ta a. PEka pawh chu a lawm khawp mai, "Dar 7 velah chhuah kan tum dawnnia, paruk chiah kan ni thova, kan bolero ka rawn thawhchhuah pui mai ang." a rawn ti ve leh a. Peih chiah lo mahse ina tawm reng ai chuan tiin Bza pawh chuan kal ve a tum ta a, a insiam ta a.

*******************************

Zing a lo ni a, dar ruk leh a chanve ah chuan Bza chu an inkawtah a thil ken tur te nen a lo in ready thlap tawh, rei lo teah chuan Peka chu a rawn thleng a. Bolero chhungah chuan hmeichhe pakhat hi a lo chuang ve a, chunu chu Sangsangi a ni a, Bza te thian zinga mi tho a ni.

Motor tukverh atang chuan rawn dak chhuakin, "Bza chu, i rawn kal ve dawn lo maw ka tia. Group ah i reh char char thin bawk sia, a hunah chuan i lo inready leh thlap si a ni maw?" tiin a han fiam a. Bza pawh chu lo nui ve in, "Drinks a awm dawn te chuan...kan hnial phal nang." tiin a lo fiam let ve a.

Peka chuan Bza bungrua leh bag vel te chu hnung lama dah sak pah hian, "Sangsangi hi ka va lam leh lawk a, chuvang chuan ka rawn rei deuh mawle. Euniki leh Muani leh Siama te chu kan va lam phei diat diat tawh mai dawnnia." a han ti a. Bza pawh chu motor chhungah chuan a lut a, tichuan an tlan leh ta a.

An tlan zel a, an thian dangte chu an lam phei zel a, a tawpah chuan an kim ta. An thian ho hming chu Bza, Peka, Siama, Euniki, Sangsangi leh Muani te an ni a, vengkhat vek erawh an ni lem lo. Tu a te mah hi an inngaizawng lo bawk a, thian inkawmngeih tak vek an ni nachungin Siama leh Muani te erawh hi chu an inthianthat dan a dang deuh thung.

*********************************

Darkar 2 dawn an tlan tawh a, an la hlimin an la zai nasa hle. Chuti lutukin phur ve lo mahse Bza pawh a nui ve leh suk thin a, hla chu ring takin an play a. Chutia hlim taka an zai lai chuan motor chu a rawn su uih uih mai, a engine chu a rawn ri thlurh thlurh a. Mak an ti hlawm kher mai, chutah a thi ta hmak mai a.

"Enge awmzia?" tiin Muani chuan a lo zawt vat a. Motor chu Peka chuan start a han tum leh a, mahse a nung thei lo. "A van mak em em...engemaw awmzia le?" tih nuah nuah pah chuan Peka chuan a han try leh ngat ngat a. Reiloteah chuan a rawn nung ve leh mai a, "A tha hma leh hle bawk sia, engemaw awmzia le?" Siama chuan a lo ti ve bawk.

Peka chu a han thaw hak a, "Kal leh nghal ang aw, a la thui ve angreng bawk sia." tiin an tlan leh ta nghal a. Mahse Bza ngaihtha chiah lo chuan, "En chiang deuh teh...engemaw dik lo lai a awm a ni lo maw?" a lo ti a. PEka chuan a ngaipawimawh tawh lo, "Kal vat zawk ang u, ke a chhukna tur thui deuh a awm kha..a tha leh mai ang." a ti sam et mai.

Ti chuan an tlan zel a, tape chu play chhunzawm leh in an zai leh nasa mai a. Mahse thui pawh an tlan hma chuan an motor chu a rawn ri leh ta tuk tuk mai, chutah an hma zawn takah chuan sanghal ni awm tak, vawk ang tak mai, lian lutuk lo hi lehlam ko pang atang chuan a rawn zuang thla thut mai a.

Kawng chu a rawn cross a, Peka chu a tal buai ta. An phu nasa hlawm hle a, motor chu a kawi ta zawr zawr mai. "Ding rawh...a break rap rawh.." tiin Bza chu a au vak vak a, hmeichhe ho lah an t(r)e ring nasa mai. Chutah le, kawngsir lehlam ah chuan an tlan thla ta mai a.

Motor chu chak mangkheng hian tlan thla in an in sawh thla nawk nawk hlawm a, chu ti lutuk a kham awih a ni lo chu an vannei letling hle. Ft enge maw zah a tlan thlak hnu chuan thing kung lian tak mai hi an su chawrh mai a, thawm pawh a reh chiang kher mai. Motor hma chu a khu vut vut a, Peka chu a rawn harh chhuak hmasa ber a.

A lu chu a dawm vang vang a, "In tha em? In harh hlawm em?" a han ti a. Midang ho pawh chu an rawn harh liam liam hlawm a, vanneihthlak takin hliam na lutuk an awm lo hlauh. Mahse Sangsangi chuan tap tep hian, "Ka..ka ke..ana lutuk." a rawn ti chhuak a. Rang takin Bza chu motor atang chuan a chhuk a, Sangsangi chu a pawm chhuak nghal.

Midang pawh chu an rawn chhuk a, Sangsangi chu an rawn buaipui ve nghal bawk. Siama pawh chu a rawn bai chhuak deuh auh auh va, "Midang na nei in awm em?" a rawn ti a. Leiah chuan Bza chuan Sangsangi chu a nghat a, "Khawi lai ber nge na?" tiin a han zawt a. Sangsangi chuan a ke rek chu khawihin, "Helai hi a na....ana lutuk." tiin a mittui a tla zawih zawih mai.

Bza chuan Sangsangi ke chu a han hmet a, "Tikhan a na em?" a han ti leh a. Sangsangi chu a th(r)en chawk chawk a, "Aw..ana lutuk...dim deuh teh." a lo ti vat a. Bza chuan a lu a han bu nghat a, "A tliak lo, a ulh deuh mai mai a nih kha." tiin a bag chu a la a. Bandage phawrhin a tuam sak a, chutih lai chuan Peka chuan a motor chu ui hmel tak hian a lo en tlawk tlawk mai.

A mittui pawh a tling teuh thei hial, "Ka va ui e aw....kha ramsa mai mai chuh.." tiin a insehruh nasa mai a. Mangan hmel tak hian Muani chuan, "Engtin nge kan tih tak ang?" tiin a tah a chhuak nghal der mai. Kawngpui lam pawhna chu Siama chuan a han en chho vang vang a, "A va han sang em em ve...kan lo tlan liam thla thui hle mai, kawngpui pawh a han hmuh theih hleih nem le.." a ti vawng vawng mai.

Euniki chuan a phone chu a han en a, "Signal pakhat mah a awm lo lehnghal, kan awmna lai lah hi a laklawh si...tiang te chuan kan bo mai anga sin mawle." a lo ti ve nuah nuah bawk a. Bza chu a han thaw hak a, "Check leh phawt rawh ka tih mawlh mawlh kha.." tiin Peka chu a han vin hlur a.

Peka lah chuan a aia vin hian, "Kha ramsa rawn tlan thla thut vang kha alawm, nilo se chu ka buai lovang." a lo ti let ve hlur bawk. Siama chu rawn inrawlh vatin, "Engpawh chu nise inhnial buai a hun lo, signal awmna kan zawn angai. Tanpuitu kan zawn vat angai, plan mumal tak i siam vat teh ang u." a rawn ti a.

Bza chuan thawk a han la leh te te a, "Umm...mipa pahnih kan kal ang..hetah kan bungrua vel kan la dah vek sia. Pakhatin hmeichhiate hi lo awmpui se, pahnihin signal kan zawng ang." a han ti a. Chutia ro an rel lai chuan Sangsangi ber chuan, "Ngawi lawk teh u, chu...in hre ve em?" a rawn ti chhuak hlawl mai.

An vai chuan an ngawi thap a, an han ngaithla chiang a. Chutah phawk hru hian an meng hlawm a, "Lui..lui luang ri a ni em?" Muani chuan a rawn ti chhuak nghal. Siama chu a tho thut a, "Ka zu en lawk...tikhan lo awm ru." tiin a tlan thla nghal a. Rei loteah a rawn chho leh a, "Lui..lui lian deuh a awm...a rem lutuk." a rawn ti lauh lauh mai.

Peka chuan a aw a han thian kharh kharh a, "Engpawh nise, hei Sangsangi'n hliam a tuar bawk si a. Chuvang chuan luiah chuan i zu kal phawt teh ang u....kan bungua te hi keng thla vek ila, a bak chu nakinah kan ngaihtuah leh mai dawnnia." a han ti a. Midang pawh chuan an lo pawm tlang hlawm khawp mai, tichuan an inzui thla ta a.

*****************************

Lui chu an thleng a, Siama sawi ang ngeiin a zau nuamin a hmunhma pawh a rem khawp mai. Mahse meichhemna hnuhma emaw, mihring sulhnu emaw, bawlhhlawh tawih thei lo ang chi hrim hrim engmah hmuh tur a awm lo. Sangsangi chu Bza chuan a paw thla tawp a, motor-a an bungraw dah zawng zawng te chu an keng thla tel vek bawk a.

An zu ken lah bur hnih lai chu an lum thlakna lamah a lo keh lehnghal, mahse an keng tam hlauh zawk a. Lui luang te chu a fim tha em em a, a hmun chu a reh hian a reh ngawih ngawih hi a ni ber mai. Peka chuan a han enkual a, "Ka la kal ngai miah lo, khawi atanga kal tur nge maw ni reng reng le?" a ti nuah nuah a.

Lui awmna bul atang hla vak lovah chuan thing lian lem lo tak pakhat inphun hi Bza chuan ava hmu a, ava pan nghal a. Midang ho chuan an rawn zui ve bawk, thing inphun ah chuan thing phek hi a lo inkilh bet bawk a, MUKPUI LUI tih hi a lo inziak bawk. Siama chuan a en vang vang a, "Mukpui Lui...ehe, ka vawikhat hriatna..." tiin a han khi deuh suk a.

Bza chuan a han ngaihtuah vang vang a, a hming chu hriat tawhna a nei tlat a ni. Mahse han ngaihtuah viau mahse, a hrechhuak zo tlat lo. Petera chu a inphelh nghal sawk sawk a, "Eng pawh chu nise...rilru tih thawven nan ka han inchiah dai phawt teh ang." tih leh luiah chuan a zuang thla nghal ringawt mai.

Midang ho pawh chuan an bungrua te chu an dah fel a, Sangsangi erawh a ke a nat avangin ala thu reng thung.  Hmeichhe dang pahnihte pawh chu inphelh ve nghalin tuiah chuan an cheng ve a, Bza erawh chuan Sangsangi chu a buaipui chhunzawm nghal a. An phone ah pawh chuan signal engmah ala awm chuang lo, Siama chuan zu chu a thli nghal karh karh mai.

*************************************

Darkar chanve vel hnuah chuan Bza chuan a thiante chu a ko khawm a, "Kan awmna lai hi khawilai tak nge kan la hre thei bik si lova, chuvang chuan hetia kan awm mai mai hian hun kan khawhral mai mai zawkin ka hria. Hmeichhe hovin rawng chu lo bawl tho se, a tul chuan tah hian chaw kan ei mai ang. Mahse mipa pahnihin signal awmna lai kan zawn a, kan kal hran tho chu angai a ni." a han ti a.

Peka chu a ding thut a, "Kei leh Siama kan kal anga, hmeichhe ho hi i lo awmpui mai dawnnia." a ti a. Tichuan Peka chu a inha sawk sawk a, Siama nen chuan tanpuitu ko turin an kal ta a. Sangsangi chuan a ke na chu a hmet a hmet a, a bulah chuan Bza chu ava thu a. Chutih lai chuan hmeichhe dang pahnihte chuan eitur an lo siam mek a, zu chu an in ve zeuh zeuh bawk.

Zaidam tak hian Bza chuan, "A la na em?" tiin Sangsangi chu a han zawt a. Sangsangi chuan a lo nuih sen sen a, "A zia deuh tawh...rah hian ala na a, chuzawng chu nimai." tiin a lo chhang zawi sap a. Bza chu a han thaw hak a, "Tliak chu nise kha ai khan na i ti ang, tikhan indim la, a dam mai ang." a han ti leh a.

Sangsangi pawh chu a khi suk a , "AWiii... nichin kha chuan a tliak amaw ka ti hman alawm, ana ngawih ngawih." tiin a han nui var var a. Bza chuan a chhang lem lo, "Ka lawm e aw, Bz...min buaipui a.." Sangsangi bawk chuan a han ti leh a. Bza pawh chu lo khi sukin, "A ho lutuk...thiante chu kan tanpui ve bawk ang chu.." tiin a lo chhang sam et a.

Sangsangi chu a han ngawi vang vang a , "Ka lo kal kher kher a ni, hetiang kan tawk dawn tih hria ila chu ka kal miah lovang mawle." a han ti nuah nuah a. Bza chu a rawn nui huk a, "Hetiang kan tawk dawn tih hria ila tumah kan kal bik nang." tiin a lo fiamthu a. Chutih lai chuan Muani leh Euniki te chu an rawn phei a, zu an la rawn keng zui.

Bza hma ah tak chuan Muani chuan zu chu a han chhawp a, "Kha..in ve rawh u. Kan la nghah rei hmel si a, engtin nge kan awm zel dawn pawh kan hre bawk si lo." tiin an bulah chuan a rawn thu ve a. Bza chuan a lo thli ve mai bawk, "Sangsang..va inchiah dai ve la..i ziaawm maithei asin." tih pah chuan Euniki pawh chu a rawn thu ve a.

Sangsangi chu lo ner sakin, "Aih..ka che thei lo. Ka rap ngam hrih lo, tunah pawh a la tur deuh ut ut a, nakin deuhah a nimai." tiin a lo chhang a. Bza chu a tho va, "Ka han inchiah dai ve mai mai ange." tiin a inphelh a, "Ilo kal ve duh lo maw..ka va paw phei ang che." tiin Sangsangi chu a han sawm a.

Sangsangi chuan inthlahrung tak hian, "Aih...a ngai hrih lo mai. Nakin deuhah ka rawn join ang che, tunah chuan ka'n hahchawl phawt ange." tiin a lo chhang a. Bza chuan a chhang let tawh lem lo, tui cheng tur chuan lui lam chu a pan a. Sangsangi chuan a en zui deuh vawng vawng a, Bza chu tuiah chuan a zuang thla ri burh mai.

**********************************

Siama leh PEka te chuan signal awmna lai tur chu an zawng phei zel a, mahse an hmu zo hauh lo. Peka chu a tum bur tawh mai, "Ka pa'n min va han hau nasa dawn tak em...kha ramsa kha enge maw a nih reng reng le..ka phu chiang em a ni, motor rawn ri leh tuk tuk bawk si nen khan.." a ti nuah nuah a.

"Nia..tinge khatia motor kha a awm a? A chhait awm i hria em, a hma in?" tiin Siama chuan a lo zawt a. Peka chuan a lu thingin, "Hre lo...engvanga khatia awm thut nge a nih ka hre lo. Keipawn a mak ka ti, kha ramsa vang vek kha.." a han ti leh a. Kal zel pah chuan an ngawi dun vang vang a, "Sanghal a ni maithei..vawk a ang emai." Siama chuan a rawn ti chhuak thut a.

Peka lah chuan, "Sanghal e nghal love...ka motorin a tawrh phah alawm. Chubakah in huan kalkawng kha ala hla si a, ka hmanhmawh tawh nen. Tunah tiang hian kan awm leh a, rin ai hian kan buai phian ang tih ania ka hlauh ni." a lo ti vin hlur mai. Siama pawh chuan a be chhunzawm tawh lem lo, an kal zel a.

Reiloteah chuan thir len inzam teuh hi an hmu thut mai a, "Ehe..saw..enge awmzia?" Siama chuan a ti nghal vat a. An pahnih chuan an ding chat a, engemaw hi thirlen lai takah chuan a intar bawk a, "Engemaw a intar....hawh va kal vat ang." tiin Peka chu ava tlan nghal a, Siama chuan a rawn zui ve nghal bawk.

An va thleng a, hma lama inziak a nih avang chuan enge intar an hmu thei lo, thirlen ah chuan lawn liam a ngai tlat mai. Peka chu a lawn liam nghal a, "Helai hmun hi kal tlang phal a ni lo, MUKPUI LUI-a kal hi khap tlat a ni." tiin a han chhiar nauh nauh va. Siama chu a lo khi suk a, "A leh ngawt zel a, enge maw an khap tlat zel le? A hrang a ni lo maw.." tiin a la nui zui.

Peka chuan a lu a han bu nghat nghat a, "Umm..helai hi kal phallohna chin a nih chuan heta tang chuan a hla tawh hauh lovang. Khua a hnai tihna  a nimai, va let leh ila..kan thiante kan hrilh vat dawnnia." tiin a lawn liam lehnghal a. Tichuan an thiandun chuan an let leh ta a, kal phalloh a nihna chhan awm ang engmah an ngaihtuah hauh lo.

********************************************

Bza tui han hleuh vel lai chu Sangsangi chuan a en vung vung a, chutih lai chuan Euniki chuan a rawn nghawk thut a. Sangsangi pawh a phu nasa kher mai, "A va hmuhnawm awm ve a...Bza tui cheng lai chu.." tiin a han chhaih a. Sangsangi pawh chu a lai ve lek lek mai, "Aa...a bialnu nen an inthen zo chiah sia, ka khawngaih ve deuh mawle." tiin a lo chhang a.

Chutah Euniki leh Muani chu an inen a, an nui dun tiah tiah mai. No khat han tlak leh pawp pah chuan Muani chuan, "I chhuanlam a thing lutuk, sawi tlang ve mai la...i duh tih hi hman atangin kan  hre tawh alawm." a lo ti a. "A va awihawm loh tak...thian ang bakin ka en lo hrim hrim." tiin Sangsangi chuan a lo pha nasa mai.

Euniki pawh chuan, "Zep kual duh lo mai rawh...i duh thu hi hrilh mai la, ani pawh hian a duh ve em em ang che, a care em che hi." a lo ti ve bawk a. Sangsangi chu a khi suk a, "Mi hi in dem peih sia e, amah hi ka ngaina em a, chuzawng chu a ni mai." a lo ti leh a. Muani chu a ner sak a, "Mi a kan ni bik lo, Lalsangsang...thian ang ngawt chuan i en lo tih hi kan hria alawm." a lo ti ve leh a.

Sangsangi chu a nui suk a, "Nangpawh Siama hi chu thian ang chiahin i en bik lo tiraw?" a han ti let ve deuh kher a. Euniki pawh a nui huk mai, "Ngawi mai teh...keini chu kan lang tlang law law a, nang chu i han inzep kual vel kher hi lawm.." Muani chuan a lo ti deuh hlur mai.

Chutia an titi lai chuan Bza tui cheng zo chu a rawn phei a, "Khai...ka harh vek alawm le..khawimaw ka lo in leh teh ang." tiin no khat chu a rawn tlak nghal pap a. A han hawi kual a, "Eitur kawr vel takngial pawh a awm lo mawle...meichhemna hnuhma pawp awm bawk si lo, tumah an la kal ngai lo amawni le.." a han ti nuah nuah a.

"Nichin khan a lui hming hi, Mukpui Lui tih hi hriat tawhna ka nei i tih kha...i hrechhuak tawh em?" tiin Euniki chuan a lo zawt a. Bza chu a ngawi vang vang mai, "I sawi takah chuan ka naupan deuh lai khan sawi thawm a awm tlat a ni, ka nu leh pate sawi zawk amawni...ka hrechhuak zo tawh lo." a han ti nuah nuah a.

Muani lah chuan, "A tha lam nge a chhe lam?" a lo ti pek a. Bza chu za lo tak hian a khi suka , "A tha lam nge a chhe lam pawh ka hre tawh lo, a chhe lam chu nilo hram rawh se..tunah pawh engtin nge kan awm zel dawn pawh a hriat der mai silo." tiin a lo chhang a. Sangsangi chu a han zi mar talh talh a, "Siama leh Peka te pawh chu an lo va thleng har ve mawle.." a han ti nuah nuah a.

***********************************

Siama leh Peka te pahnih pawh chu lui lam pan chuan an rawn let leh mek a, "Kan zu kha an lo in pup pup ange....chi miah lovang aw.." Siama chuan a han ti nang nang a. Peka lah chuan, "I ngaihtuah ho lutuk, mi mah rilru hah mahnak alaia. Zu ringawt lo buaipui suh, a dang pawh ala tam kha...bur hnih vel kha a keh a nimai a, zu heh thlak lutuk." tiin a lo vin deuh hrep mai.

Siama chu a han ner nung a, "Chutiang lam a ni lo, an lo in pup pup chuan an kai lutuk dawn asin. Kal let na tur a thui bawk si, buaipui ngaiin an awm vak ang tih ka hlau alawm." a han ti ve hlur bawk a. Peka chuan nui suk chung hian, "I bialnu Muani bak a rui nawi leh lovang, midang chu kan normal vek zel tho." a lo la tih khum hrep zui.

An kal zel a, lui pawh an hnaih tan tawh. Chutia an kal mek lai chuan an sir lampang chu Siama chuan a va mit sir zeuh va, engemaw lian tak, tleng phei fua hi hnim karah chuan a hmu thut mai. A phu nasa lutuk chu a zuang dawr a, Peka pawh a lo phu ve nasa mai. Phawk hru hian Siama chu a en a, "Enge..teh vak che chuan?" tiin a zawt a.

Siama chuan a han enchiang leh a, mahse a hmu tawh miah lo. Hnim kar chu a kawk a, "Tah sawn... tah sawn engemaw a rawn tleng phei zuk mai...a dum vek." a ti khur dar dar mai a. PEka chu a thaw hak mai, "Huiham, ava han buaithlak thin tak. I dawih lutuk, thehlei vel bak va ni suh." a lo ti mai a.

Mahse Siama chuan a lu a thing a, "Thehlei tiat lek a ni lo chuan ka hria, a lian lutuk." tiin a chhang a. Peka chu a khi suk a, "I hmu chiang hman a mi?" tiin a han zawt leh a. Siama chuan thaw dep dep hian, "Enge a nih chu ka hmu chiang hman lo, mahse a lian takzet a ni tih erawh ka hria." tiin a chhang leh a.

Peka chu a han thaw leh hak a, "Ka va enfiah ange.." tiin ava kal phei ta mai a. Siama chuan lo dangin, "Va kal suh...ramsa kawlh deuh te pawh a lo ni thei ania." a lo ti vat a. Peka chu a kal lui tho, hnim kar vel chu a han keu a. Mahse engmah a hmu lo, "I dawih emai, engmah ka hmu lo." tiin a rawn let leh a.

Siama ngaih chu a tha chiah lo kher mai, "Engemaw tak chu ka hmu alawm, ka chiang lutuk." a han ti leh hram a. Peka chuan ngaihsam zet hian, "Aw engpawh chu ni rawh se, let leh phawt mai teh ang. Hei a tlai dawn, ril a tam tawh bawk si." tiin a kal nghal daih a, ngaih tha lem lo tak chuan Siama chuan a zui ve leh ta a ni.

***************************** 

Peka leh Siama te chuan lui chu an va thleng leh ta a, "In va rei angreng ve.." Bza chuan a lo ti nghal a. Muani pawh chuan, "Signal chu in hmu thei ta em?" tiin a lo zawt ve nghal bawk a. Ner nung chung hian Peka chuan, "Hmu lo...mahse heta tanga km 2 velah sawn thirlen a inhung a, tah chuan kal phal loh tih an ziak a." tiin a lo chhang a.

Phawk hru hian Bza chuan, "Kal phal loh a?" a rawn ti hu mai. "Aw...khap a ni tih vel a lo inziak duah alawm, tuna kan kal vat a nih chuan an thirlen hungna saw kan pel anga..chuta tang chuan kawng pawh a awm zel tawh mai ang." tiin Siama chuan a lo chhang a. Bza chu a ngawi vang vang mai, thil engemaw hriat chhuah zawk a nei tlat.

Euniki lah chuan, "Keichu km 2 vel va phei leh ai chuan inhnawh puar phawt ila...kan lum thlakna ah khan kan chho leh zawk dawn a mawni le, chutia kal phallohna te a nih chuan engemaw hlauhawm a awm ani maithei asin." a lo ti nuah nuah a. Peka chu a lo khi suk mai, "Hlauhawm lam a ni lo, sangha man tih vel leh private ram vel a nih vang bak va ni suh." a lo ti sam leh et mai.

Siama pawh chuan lo sawi zawmin, "Nia...chubakah kan tlak thlakna khi a sang ania, heta tanga km 2 phei char char a kal te chu a nuam daih zawk ang...i rin aiin a sang ania kan tlakna khi, chho zawnga kal a ni bawk si, a awih angreng bawk si nen, i thleng zo lovang, km 100 vel kal angah i inngaih mai ang." tiin a lo khi ve suk bawk.

Bza chu a ngaih a that loh hmel kher mai, "Anih chuan insiam ila...kal vat teh ang u. Peka motor khi chu tanpuina kan dil hunah tihdan a awm mai ang, hmanhmawh zawk teh ang u." a ti ta nghal chung chung mai a. MAhse Muani chuan, "Naa...km 2 kan kal anga, chumi hnuah in kan thleng nghal dawn pawh a ni lo. Enge kan hma hun pawh kan hre bawk si lo, kan ril a tam lutuk ang. Eitur kan siam tawh ta sa sa, ei law law teh ang u." a lo ti vat a.

PEka pawh chuan, "Nia...kan ei anga, keiphei chu inchiah dai leh law law teh ang. Ka hah emai, tichuan kan move zawk dawnnia. Kan muangchang dawn tihna pawh a ni lova, tuna kan chet tut tut chuan kan chau mai ang. Zing chaw pawh tuman kan la ei silo, i han ei phawt teh ang u." a lo ti ve bawk a.

Bza chuan hnial let chak viau mahse a thiante chu a khawngaih ve bawk si, Sangsangi thu ngawi reng chu a zu en a. Sangsangi pawh chuan zaidam tak hian, "Nia, Bz...thil ei phawt ila, kan kal vat dawnnia." a lo ti zawi sap a. Bza chu a thaw hak a, tichuan a remti ve ta a. Zu te chu in bleh leh in an eitur siam te chu an ei a, buaina tawk mek e ti lo chuan an titi tuiin an nui leh dar dar thin a.

***************************************

TO BE CONTINUE