UNHOLY CONFESSIONS - II (Mizo Horror/Slasher Story) Written by : Aaron Malsawmdawngzuala WARNING : 18+ Chapter - 6 LAST

 UNHOLY CONFESSIONS - II

(Mizo Horror/Slasher Story)

Written by : Aaron Malsawmdawngzuala

WARNING : 18+

Chapter - 6

LAST

*************************

Abawihi chu a tlan zel a, thla eng chauh chu a eng neih chhun a nih avang chuan a fimkhur hle. Khawi lam nge kawng pui lam pawh a hre bik lo, a hma zawn, thla eng in a eng phak chinah chuan a hreite hum reng chung chuan a kal ve zel a. A tawp a tawpah chuan motor ava hmu ta, rang takin thingkung phenah a biru nghal vat.

Thawm a awm leh awm loh ngaithla in a han ngawi vang vang a, mahse car bul velah chuan tumah an awmloh mai bakah a reh thiap mai. Muang chang chuan car awmna lam chu ava pan phei a, a hreite pawh a la hum reng bawk. A va pan hnai zel a, a thlen meuh chuan chu motor chu police car a lo ni reng tih a hre ta.

Pu Rinawma te car ngei kha a ni, car hnung hawnna ah chuan chahbi pawh a lo la invuah thlap mai. Motor chhung te chu a han bih kual a, mahse tumah a hmu chuang lo. Car a khalh thiam der mai si lo, mahse bihruk nan chuan a tha dawn riau chuan a hria a. Car hnungah chuan hmanrua invenna tur dang a hmuh tak mialin tiin a han hawng a, a au tuar mai.

Rang takin a tawlh hnung a, Mama ruang chu a hmu chiang ngang mai. A hmui a hup a, "Nilo..hetah MAma ruang? A awmzia chu...kha police kha Shadow X tihna em ni?" tiin a inzawt nghal a, mak a ti kher mai. Chutah car awmna atanga hla vak lo atang chuan torch light rawn eng phe zawk zawk chuan Abawihi chu a ti phu chiang kher mai, "Hey..nangkha, ding rawh." tiin au ri a hre nghal.

Abawihi chuan hreite a la keng reng bawk, a hmaiah an rawn en a, a meng hlei thei lo. Chumite chu tudang nilovin Inspector Rinawma leh Constable FEla te an ni, "Ehe Sir, Abawihi ava ang ve...a ni em?" Fela chuan a lo ti vat a. "A nih saw..tlan ang." tiin Fela chu Pu Rinawma chuan a tlansan daih mai.

Abawihi hlau chu a hreite hum chung chuan a tlan chhe ve nghal bawk, "Abawih, Abawih hlau suh...police kan nih hi.." tiin Pu Rinawma chuan a au zui vak vak a, mahse Abawihi chuan a ngaithla tawh lo. Chak tak chuan a tlan zel a, Pu Rinawma pawh chuan a umzui ta lo. Motor bul chu ava thleng a, "Aww...ava han buaithlak tak." tiin a lu a dawm vawng vawng mai.

A hnu deuah chuan FEla pawh chu a rawn bai pheu auh auh va, "I man hman nange?" tiin a rawn thaw hluam hluam mai. "Hreite a ken kha i lo hmu ve em?" tiin Pu Rinawma chuan a lo zawt let daih mai. "Aw hmu e, Abawihi a ni ngei tih ka chiang bawk." tiin Fela chuan a lo chhang a. "Amah vek hi a lo ni reng lo maw?" Pu Rinawma chuan a han ti nuah nuah a.

"Nia, hreite te kha a keng sia. Chuan hei, kan car hnung lah a inhawng huau bawk a."

"Enge maw awmzia ni dawn le? A tlanchhe daih bawk sia, mahse amah a nih chu ka ring chiah si lo."

"Umzui vat zawk ila, Sir..nge hetah hian kan ding reng dawn?"

"Umzui ngawt chi pawh a nilo, hriamhrei a ken ve tho kha. Chubakah kan in hliam khawlo anga, thihna hial te pawh thleng thei a ni tlat."

"Anih engtin nge kan awm zel dawn?"

"Tunah chuan kan pahnih chauh chuan kan indaih ngang lo tlat, nanglah i hliam bawk si."

"Sir, ka tha alawm...ka ti thei ang, min ngaihtuah suh."

"Nilove Fela, tunah chuan back-up nghak phawt hrih teh ang."

***************************

Dr Sanga pawh chu thawm ri rek rek chuan a thi harh a, a rawn meng kawk mai. A hmui chu tuam sak a lo ni a, thutthleng ah phuar beh in a lo awm bawk. A thlan a lo tla buah buah mai a, a awmna hmun chu a lum hle bawk. A hma zawnah chuan X-a chuan amah hnung chhawn zawng hian engemawni hi a lo chawk ruk ruk a, Sanga chu a tal nghal vak vak a.

A thawm chu hria in X-a pawh a rawn hawi let a, "E..i lo harh tawh animaw?" tiin a thil chawh lai chu a rawn lek kang a. Glass jar chhungah chuan tui fim hnang tak, fan thluah thluak mai chu a lo chawk mek hi a lo ni. Sanga chuan chu thil chu hlauh hmel tak hian a en a, X-a chuan ava pan phei a.

Sanga mitmeng hlau tak chu a hmuh chuan X-a chu za lo tak hian a khi suk a, "Hlau suh, hei te chu thil hlauhawm a ni lo. Sugar syrup a nih hi, chini tui....a thlum tui ania aw.." tih pah chuan a chawhna fian chu lehlam hawi pah chuan a mask chu phelh zeuhvin a han fawp vel a. Mahse lehlam a hawi tlat avang chuan a hmel diktak erawh Sanga chuan a hmu thei chuang lo, lehlam hawi leh pah chuan X-a chuan a mask chu a vuah tha leh a.

"Umm a thlum tui e..." tih pah chuan thutthleng dang chu la in Sanga hma takah chuan a thu vang mai. A chini tui chu chhuatah chuan a dah a, “Engtin nge i sawi khah? Ka that tho to ang che i ti tiraw khah?” tiin Sanga mitah tak chuan a en a. Sanga chu a tal vak vak ringawt a, tawng chhuah chu a chak takzet a ni tih pawh a hriat hle bawk.

Mahse X-a chuan, “I tawng dawn lo, a hunah chauh i tawng ang. Tuna ka tawng tir che chuan i han inla pa kual ve leh khanglang anga, hun a hek mai mai.” tiin a hmui tuamna chu a phelhsak duh hauh lo. “Le..ngun tak khan ngaithla rawh aw...a rei dawn lo ania.” tiin X-a chu a han thu tha te te a.

“Dr Lalsangliana, Doctor hausak tak leh hmeltha tak i ni a. I thiamna te avangin Mizoramah na na na pawh i lar thawkhat hle tih pawh ka hria, kha tah kha chuan i ropui ka ti...ka fak khawp mai che.” a han ti leh phawt a, chutah chini tui chu la in a thutna atang chuan a tho thut a. “Mahse i sum duh luat vangin fake report i siamchawp a...tichuan mi pakhat nunna chu engah mah ngai lovin pawisa nen i thleng ta mai a tiraw?” tih pah chuan chini tui chuan a leih ta mai.

Sanga chu a tal nasa hle mai, a rum vak vak a. A leih pah chuan X-a chuan sawi zawm zelin, “Tu chanchin ber nge ka sawi i hre kher lovang, a chhan chu i sum duh luat avangin damlo tam tak i tihlum tawh a, a then chu chhanhim theih reng, i chhanhim duh lo lui a ni tih pawh ka hre bawk.” a han ti leh a.

A leih zo thak a, Sanga taksa zawng zawng ah chuan chini tui hnang em em mai chu a pherh vek mai. Chutah X-a chu a hma zawnah chuan ava ding leh a, Sanga mitmeng atang chuan zawhna tam tam a awm tih a hmu thei. A kun hniam a, “LAlnunpuii, Nutei...rannung seh anga fake report i siam kha, lethal injection hmanga a pasal nen in chiu hlum...i la hria em?” a ti chiah mai chu Sanga chu a meng phawk nasa kher mai.

A hmelah chuan a aia nasa in hlauhna a rawn awm leh a, mahse chu chu X-a tan chuan hmuhnawm tak a ni zawk. “Doctor, i thiamna te hi a tha zawngin i hmang ve mai thei lo em ni? Kha i chiu hlum tak kha tunge a nih i hria em? tuna i hmaa ding mek tan hian mi hlu tak a ni asin, ka neihchhun a ni.” tiin X-a mittui chu a rawn tla hial mai.

Sanga erawh chuan a hrethiam lo, X-a chu tunge a nih a hre tlat lo a ni. X-a bawk chuan lehlam hawi chung chuan, “Ngun takin ngaithla rawh, i insawifiahna engmah ka ngaithla peih lo. I thil tih man, nunna i lak man chu tunah hian i hmu dawn. Hremna i tuar ve dawn, i tuar chhuak zo lo anih chuan nangpawh i thi hial ang. Mahse chance erawh i nei, chu chance atan chauh chuan tawng chhuak ang che.” tiin thimzingah chuan ava kal a.

Chutah glass box lian tak, a chhunga khuai awm khat vek mai chu dawhkan nawr lirh theih ah chuan a rawn nawr lir phei ta mai. Chung khuai te lah chu en reng reng pawh chuan an zuk a nat hmel em em a, an tam takzet bawk. A chunga hook ah chuan X-a chuan hrui a hling a, ahmaa Zorema thang a kam ang chiah khan inchung thing lo inkhampheiah chuan hrui chu a bat liam leh a.

Tichuan chu khuai bawm chu a pawt chho leh ta a, “Camera hmaah chiang takin Nutei chunga i thil tih zawng zawngte kha i sawi anga, zep then engmah awm lovin inpuang ang che.” tih pah chuan hrui a suihna ban hnuaiah chuan bati chu a dah leh a. “Engkim i inpuan zawh hunah mi zawng zawgin tunge i nih an hre tawh dawn, a chhan chu live in i inpuang dawn tlat a ni.” a han ti leh a.

Sanga chu a hlau tawh kher mai, a rilru a mangang takzet. A hma takah chuan tripod hi X-a chuan a rawn dah leh a, camera a fit nghal bawk. “Hei hi live a ni a, i thawhpui zawng zawngte, i chhung leh khatte pawhin an hre vek dawn. Chu chu i duhlo anih chuan nat i thlang zawk tihna  ani ang.” tiin bati chu ava kawk a.

“Saw bati saw ka chhi alh anga, hrui saw a alh kai anga, a chah vaih chuan khi bawm khi tla kehin a chhunga africanized bee tam tak, an vawikhat seh pawh darkar 24 chhung patling khawsik hluah hluah theihna khawpa tur nei tha, khi khuai 20,000 lai te khian i taksa a chini tui thlum tui tak hi an rawn hip sak dawn che a ni.” a han ti leh khur khur a.

Sanga chu a tal vak vak a, a lu thingin a tap pur tawh mai. A hma takah chuan a ding leh a, “He hrui chah hmaa i inpuang vek a nih chuan i dam chhuak dawn, engmah hliam pawh i nei lovang. I inpuan zawh veleh i malchungah hian chemte a rawn tla anga, nangmah in i inchhanchhuak ang. Mahse i kut phuarh beh chung chuan a har viau ang, chuvang chuan rang takin inpuang ang che, inchhanhim nan hun i ngah zawk ang.” tiin a hmui tuamna chu a phelh sak a.

Chu veleh Sanga chuan thaw hluam hluam chung chuan, “Nilo thianpa..ka pu...khawngaihin min that lul suh. KA hna ka chan mai ang, min khawngaih hram rawh. Enge i duh? I duh duh ka pe ang che, engzat pawh sawi rawh. Min ti mualpho lo hram rawh, i duh zah sawi la tunah i account ah ka lo thun nghal vat ang.” a rawn ti nghal chiam chiam mai.

Mahse X-a chuan a ngaithla duh lo, bati awmna lam chu panin lighter a phawrh chhuak a. “Nilo ka pu, ka tihpalh. Ka siamtha leh vek ang, min ngaidam hram rawh. Engpawh ka ti ang, i duh apiang ka tihsak ang che.” tiin a ngen leh chiam chiam a. Chutah rum zet hian X-a chu a rawn hawilet a, bengchheng lo tur chuan zaizir hian a hrilh a.

Sanga pawh a ngawi nghal hmak mai, mahse a tah a chhuak takzet. Mittui tla zawih zawih hian, “Khawngaihin ka pu, khawngaihin..” tiin a ngen leh a. X-a chuan bati chu a hal ta, hrui chu a hliau tan nghal bawk. X-a chuan ava pan leh a, camera chu a on a. Sanga chu enin, “Inpuang rawh le, a nih loh chuan i thi ang.” tiin a kalsan ta daih mai.

“Hey..Zawnga, min lo chhuah vat rawh. Tunge ka nih i hria em?” tiin a vin zui vak vak ringawt a, a mangang takzet. Han inpuan mai chu a hreh bawk si, a hawi kual vak vak ringawt. Tal chhuah a tum a, mahse a phuartu hrui chu a hrawl em em a, chumai bakah a nghet em em mai bawk si nen, tal chhuah chu sawi lo, a che thei tawk tawk chauh a ni.

Camera lam chu a en a, “Min pui ru, khawngaihin min pui ru...misualin min man a, min thah a tum a ni. Engmah tihsual ka nei lo, mi that angin min puh a ni.” tiin tap chung chuan a han au chhuah pui vak vak a, mahse awmzia a nei der mai silo. Bati chu ava en thin, hrui chu a chanve lai a lo kang der tawh mai.

“Ka thah a nilo, Zorema khan ti turin min tih vang chauh a ni. Min vau a, min thah a tum a, tih theih dang ka nei lo a ni.” tiin dawt te a han sawi thul. Mahse eng chemte mah chu a machungah chuan a rawn tla der silo, “Ihh...ni e, keiman ka chiu. Mahse kha damawi kha ka chah a nilo, damdawi amaw ka tih vang a ni.” te a han ti thul.

Mahse engmah awmzia a awm chuang lo, a thinrim bawk si, mangang bawk si chu a tap pur tawh mai. A tawp a tawpah chuan ring tak hian, “Ni e...ka thah a ni. Pawisa ka duh avangin Zorema nupuin Nutei kha lethal injection hmangin ka chiu hlum a ni, keima thah a ni.” a ti ta vak vak mai a.

Mahse a rinloh tak maiin chemte chu a la rawn tla chuang lo, “Hey, khawnge chemte chu? A fair lo lutuk, khawiah nge chemte chu a awm?” tiin a au vak vak a. Mahse X-a chu hmuh tur a awm tawh lo, chutah bati alh chuan hrui chu a ti chat ta. Glass bawm chu chhuatah a rawn tla keh chuai a, khuai sehna chi, africanized bee tam tak te chuan Sanga taksa a chini tui chu an rawn pan ta.

Sanga taksa ah chuan an khat vek a, mahse Sanga hlau che vak vak chuan khuai ho ruai kil lai cu a tibuai a ni chek ang chu. An zuk ta sup sup mai, Sanga na ti lutuk chu a au vak vak a. Chung khuai tam tak chuan an zuk nasa kher mai, chutih lai chuan pawn lamah chuan X-a chuan in chu khawnvar tuiin a lo leih mek bawk.

Minute 20 vel a nghah hnu chuan Sanga au thawm a reh ta, X-a chuan beekeeping suit, khawizu la thin ho ina khuaiin an zuk loh nana an hak thin, suit var hlai hlup mai chu a helmet nen chuan a inbel nghal mawlh mawlh a. Tichuan inchhungah chuan ava lut ta, Sanga chu a rin ang ngeiin a na tuar lovin a lo thi der tawh.

A hmai vel pawh a lo vung bur tawh mai a, a hmel chu hmuh tlak pawh a awm tawh lo. Tichuan a va kal hnai a, camera chu a la a. Chu camera chu on pawh a lo in on lova, live pawh a lo ni hek lo. A awmzia chu X-a chuan Dr. Sanga chu thah a tum hrim hrim zawk a lo ni a, mahse ama kut ngeia thah a duh loh vangin khuai zuk tirin tikhan dawt a lo phuah chawp mai mai a lo ni.

Inchung atanga chemte rawn tla tur lah a awm hek lo, Sanga a thi tawh bawk a, a hna chu a zo ta. Tunah chuan tu chungah mah phuba lak a tum tawh lo, Abawihi hnena inpuan chiah a hmabak tawh. A tum dan tak chuan Abawihi hma ngeia Zorema leh Mama leh Sanga hi inpuan tir a tum kha a ni a, mahse a plan a fuh tak loh avang chuan amah ngei chu va inpuan ve a tum ta a ni.

Inchhung atang chuan a chhuak leh a, in chu a hal ta. A alh hluah hluah a, a han kal hla deuh va. Ral khat atang chuan chu in chhunga Sanga ruang leh khuai zawng zawngte alh ral vek thleng chu a thlir vawng vawng a, ahmaa Teruata ruang ang bawkin Sanga ruang chu ruh ro nen chauh a awm ta a, khua pawh a rawn var tan der tawh.

***********************

Back-up team pawh an rawn thleng tawh a, Inspector Rinawma chuan thil thlen dan zawng zawngte chu police dang te ho bulah chuan a hrilh ta hlawm a. Mahse an zinga pakhat chuan, “Sir, kan rawn chhuah hma deuh hret khan mibo report pakhat a awm leh a.” a rawn ti chiah chu Pu Rinawma pawh a ngawi chiang kher mai.

“Enga? Mibo a?” a ti hu mai. “Aw ni e, Sir. Ihh..Doctor Lalsangliana, nangmahni veng Hospital ami kha ania..Hospital lamin an rawn report a.” a ti leh a. Chutah Pu Rinawma leh Fela te chu an in melh a, Mama’n a thih hmaa Doctor tih a sawi zeuh kha, a awmzia an hre ta chiah mai. “Anih tunah tunge buaipui?” tiin a han zawt leh a.

“SI Mawitea leh mi pahnih an kal..helamah back-up i rawn ko bawk sia.”

“Dar engzat vel khan nge?”

“Dar 2:30 vel khan an rawn report a, a phone ah pawh an call tlang thei lo a nih hmel.”

"Dar engzat atangin nge an hmuh tawh loh, an rawn sawi em?"

"Aw...sawi e. Dar 10 vel chauh ala ni an ti...pawna a chhuah kha chuan."

"Duty lai tihna em ni?"

"Aw ni e, night tur a nia."

"Duty lai si tinge a chhuah a, CCTV te a awm khan ka hre sia..tah chuan a check theih em em ang."

"Motorah ah a phone zu la tura a kal kha a lo la let leh miah lo a ni awm e."

Pu Rinawma chu a ngawi vang vang a, "Kidnapper chu tupawh lo ni se, Shadow X tho a ni tih ka chiang. SI Mawia chuan CCTV vel check-na chang te a hre ve em ang chu maw, ani pui roh hi.." a ti deuh nuah nuah a. Chutah amah bawk chuan, "Um engpawh nise tunah chuan Abawihi chu kan zawn chhunzawm leh angai, rorel vat ka ngai." tiin zawn dan turte chu a han sawi mawlh mawlh a, tichuan an inthen hrang ta hlawm a.

Thenkhat chuan Mama ruang chu post mortem turin an la phei a, chung zingah chuan Fela pawh a inhliam avangin a haw ve nghal bawk. Chu ramhnuai pilril tak maiah chuan police 10 rual vel chuan Abawihi chu an zawng ta luih luih mai a, chutih lai karin hmun danga Abawihi te veng YMA ho pawh an lo buai ve nak nak hlawm khawp mai.

********************************

Zing dar 4 leh a chanve a ri tawh a, khua pawh a var ve tan ta. Mahse ni chu a la tlang sang lo bawk nen, ramhnuai a ni bawk nen, duhthusamin a la eng chiah lo. Abawihi chuan engemaw kang puak ri tuah tuah hi a hria a, thawm lo awmna lam chu ava pan nghal vat a. Hmun zawl pakhat, zau ve tak ah chuan ava chhuak hlawl mai.

In pakhat, a chanve aia tam mah tawh lo kal chhe nuai mai chu ava hmu ta. Ruang pakhat a hmu bawk, Teruata ruang ang chiah khan thutthlengah ruho vek ni tawhin a lo thu thle bar mai a. A rap lutuk chu a au chhuak teuh ngei mai, kang mei chu a nasat vak tawh loh avang chuan ava pan phei a.

Ruang chu ava en chiang a, tunge a nih hre thei lo mahse X-a next target chu Dr. Sanga a ni tih a hriat avangin Dr. Sanga ruang a nih a ring thiam nghal mai. A awmna hmun chu a reh em em a, meikang puak ri tuk tuk leh thereng hram ri bak chu ri dang a awm lo. Khua a var kim tep tawh tih a hria a, chuvang chuan khawvar nghah a, khaw en pangngai hunah kawngpui lam zawn mai chu a tum ta a.

A hreite chu a bulah dah in leiah chuan a thu vang mai a, a chauh em avang chuan a mut pawh a chhuak kher mai. A taksa te chu a na them thum tawh a, a hma a, farm house a tukhum vawchawrh khawpa a tlukna avang pawh khan a lu chu na a la ti takzet. A taksa chauh tawh em avang chuan Abawihi chu a muthlu leh riai riai thin a, a harh leh zuk zuk thin bawk.

Mahse a taksa chu a control thei ngang tawh lo, a tawp a tawpah chuan thu chung chuan a muhil ta nge nge a. A hnar nasa mai, a bu deuh luk luk bawk a. Minute 10 vel dawn lai a mutthluk hnu chuan zangthal zawnga a tlu tur chu a harh zawk a, a thu tha hman hram. Mahse a hmaah chuan mipakhat a lo ding reng mai, rang takin a hawi chho vat a.

A hlauh ang ngei ngeiin Shadow X a lo ni reng mai, a hreite chu ban a han tum nghal a. Mahse a lo awm tawh miah lo, rang takin a tho nghal a. Mahse X-a chuan a man bet a, a tihdan ngaite bawkin a ipte atang chuan rawmawl a phawrh a, Abawihi hmui chu a hup sak nghal a. Abawihi pawh chuan rawmawl a chloroform liquid chu a hip hrawk a, nikhawhrelovin a awm ta der mai.

**********************

Puipuia pawh a harh zawk a, a motor chhungah chuan a muthlu chu niin. A hma zana Abawihi thiannu, Mimi leh Stacy ten Abawhi bo thu an hrilh hnu a, Teruata vuina atanga a haw kha kalna tur hre silo,  Abawihi zawn ve a duh bawk si chu a bike a dah hnu in an motor-in a lo tlan kual ve chiam hi a lo ni a, a awmna lai chu kawng reh tak a ni bawk.

A hriat miah loh chu a dinna lai tak chu Abawihi bo mekna ramhnuai kalkawng bul chiah chiah a ni reng mai, sana a han en a, dar 5 a lo ri dawn tawh. A phone te chu a han check nghal bawk a, mahse Inspector Rinawma hnen atangin eng news mah a lo la awm lo, "Ava buaithlak tak e aw.." tiin a phun nuah nuah mai.  

A motor tukverh chu a hawng a, meizial te chu a han zu hlat hlat a. Khua pawh a rawn var kim tan dawn ta, meizial chu a zu zo va. A phone chu a han check leh a, chutah Dr Lalsangliana duty lai a bo thu an post chu a hmu fuh ta tlat mai le. Mak tih hmel tak chuan, "Ehe..mi bo dang bawk maw?" a ti deuh hu mai.

Chutah a car hma front mirror a han melh zeuh chu a hnungah chuan Shadow X chu a lo thu reng mai a, a phu nasa kher mai. Mahse chet a la hman tawh lo, Shaodw X chuan hnunglam atang chuan chlorofor hmang chuan a rawn hrai rui ve nghal a, Puipuia pawh a zal raih raih a, nikhaw hrelovin a awm ve ta ran mai.

X-a chuan Puipuia chu a en vang vang a, motor atang chuan a chhuk a. Driver seat lam chu ava hawng leh a, Puipuia chu a pu nawlh mai. Tichuan ama motor awmna lam a pan phei pui a, motor seat hnung lamah chuan a dah a. A bulah chuan Abawihi pawh nikhawhrelovin a lo awm ve mek bawk, "Engkim puan zar a hun ta." tiin a thaw hak a.

**************************

Chutih lai chuan Pu Rinawma te team pawh chuan Dr. Sanga ruang awmna chu an thleng ve chiah a, a lo kang zo vek tawh thung. Khua pawh  avar pangngai chu a ni tawh mai, Pu Rinawma chuan a han en vang vang a. A rin ang ngeiin ruang bulah chuan hruihrual kang bang niawm tak chu a lo awm leh chiah bawk, "Umm..Shaodw X tih ngei a ni." tiin a lu  abu nghat nghat mai.

Chutih lai chuan phone call a dawng a, team pahnihna te zinga mi constable pakhat a lo ni. "Aw sawi rawh, Muana..." tiin a lo chhawn vat a. Constable Muana chuan, "Sir, farm house chu kan hmu chiah e, mahse engvak mah kan la check lo. A chhung a ruak vek a, kawngka pakhat chiah a awm a, kan la lut lo." a rawn ti a.

"Awle, fimkhur tak khan lut ula..engkim report min rawn pe leh vek ang che u."

"Awle Sir, hei tunah kan check dawn chiah e."

"Engzat nge in nih reng reng?"

"Pali kan ni e, Sir."

"A that chu, chanchin ka lo ngaichang dawnnia."

Phone chu an dah a, police dang ho chuan chu in kangbang chu an han enfiah hlawm a. Pu Rinawma te team hi pa 3 an ni a, amah leh constable Liantea leh Marema te an ni. Team thumah inthenin team pahnihna te hi sawi zawh tak chiah ang khan pali an ni a, team pathumnate chu pathum an ni ve bawk.

An enfiah fe hnu chian constable Liantea chu lo kalin, "Sir, hei hi kan hmu a." tiin sarang chhunga hreite chu a rawn hmuh a. "I kutlawngin i khawih lo tiraW?" tiin Pu Rinawma chuan a lo zawt vat a. "Aw Sir, khawi lo...lehkha hmangin ka la." tiin Liantea chuan a lo chhang a. "Abak in hmu lo maw?" tiin a han zawt leh a.

"Aw Sir, thildang hnuchhuinaa min pui theitu tur engmah kan hmu lo." tiin a lo chhang leh a. Pu RInawma chuan hreite chu a han en a, Abawihi kenlai nen a in ang tlat chuan a hria a. A lu a bu nghat nghat a, "Umm a tha e, anih chuan hei khua a var tawh bawk a. Kal zel phawt teh ang u, hmanhmawhin." a han ti a, tichuan an kal leh ta a.

**************************

Farm house lam pan bawk chuan X-a chu a inkhalh phei leh ta a, mahse a rin loh tak maiin farm house thlen hma hretah chuan police jeep a hmu ta tlat mai. A ding chat a, "Khai aw...police an lo kal amaw?" a ti deuh nuah nuah a. Minute 10 vel chu a han nghak phawt a, mahse farm house ah chuan a luh ngei a ngai si.

A motor dash board chu a hawng a, pistol a la chhuak nghal a. Tichuan motor chu tinungin farm house lam chu ava pan ta. Thawm dim thei ang ber chuan motor atang chuan a chhuak a, mahse inchhung chu a lo reh diak mai. Tukverh ah chuan fimkhur tak chuan a han dak leh a, chutah police pahnih lo tlu reng mai chu ava hmu ta.

Rang lutukin kawngka chu a hawng nghal a, chuveleh maimawm pahnih an rawn vak chhuak nghal. Police pahnih lo tlu mek bulah pawh chuan an lo awm nual mai a, rang takin ava tlan phei a. Maimawm lo awm ho chu a rap hlum vek a, chung police pahnih te chu an lo thi der tawh. An hmai te chu a vung bur a, a tui hluam bawk.

A hrethiam ta chiah, kawngka an lo zuk hawng a, Zorema ruang awmna ah zu kalin maimawm chuan a lo seh tih a hrethiam ta. A inthiam lo kher mai, "Ava pawi tak..a va pawi tak em!" tiin a lu a dawm vawng vawng mai. Maimawm dangte pawh a khat tawk chuan kawngka la inhawng huau atang chuan stepah an rawn vak lawn zel a, X-a chuan rap hlum lehin kawngka chu a khar hmak mai.

Enge han tih mai tur pawh a hre lo, a phuba lakna avanga pawisawi lo leh zelin an lo thih pui chu pawi a ti tak zet. Chubakah police an ni leh nghal, a ding ngawi reng ringawt. Chutah hnunglam atang chuan, "Zawnga, tunge i nih?" rawn ti ri hi a hre thut mai, a phu nasa em em lehgnghal. Hnunglam a hawi vat a, police pakhat hi a lo ni.

Chu police chu tudang nilovin a hma deuh lawka Pu Rinawma phone tu, constable muana a lo ni. A tiang chuan a tin a, "ZAwnga..tunge i nih ka tih chu?" a ti leh a. X-a chuan Muana hmel chu a han enchiang a, diklo a awm tih a hre nghal. Zawi muang chuan X-a chuan a ban a phar a, "Ka pu, i tiang kha dah thla rawh. Misual ka nilo, misual ka nilo ania." zaidam tak chuan a han ti a.

Muana chuan thaw hluam hluam hian, "Ka hria che, i inchei dan zawng zawng te...kan hmelma zawnlai Shadow X tia an sawi nen khan, in inchei dan pawh a inang vek. Khawiah nge..khawiah nge i mi mante i dah? Khawiah nge Abawihi a awm?" tiin a vin leh a, a rawn vai deuh thuak thuak mai.

Mahse X-a chuan Muana awmdan diklo chu a hmuh hmaih hauh lo, maimawm pakhat chuan a lo seh ve hman ni ngei tur a ni. A bai deuh auh auh a, a kal pai tan bawk. A mittui a tla phung a, a hmai a sen deuh t(r)ulh bawk. "Ka pu, hliam i tuar ania. Ka pui thei che, khawngaihin inbeng dai rawh..khawngaihin." X-a chuan a han ti leh a.

Muana taksa chhunga maimawm tur chuan hna a thawk chhunzawm zel a, a tawpah chuan a tlin ta lo. A thal ta tawp a, X-a chuan ava buaipui nghal. "Ka pu, ka pu...engzat nge in nih? Maimawm hian mi engzat chiah nge a seh?" tiin a han zawt a. Muana chuan thei leh theilo hian, "Pa..pakhat chiah a seh lo...min..min pui rawh." tiin a thaw tha hleithei ta lo.

A rawn khur leh cher cher a, a chil phuan a rawn tla ta vak mai. Tichuan a thaw zawi tial tial a,a  tawpah chuan a thi ta. Thil awmzia chu hei hi a ni...Muana te chu farm house kawngka chu kar chhia in a chhung chu an check a, mahse tumah an awmlo avang chuan kawngka lo awmchhun, Zorema ruang awmna lamah chuan an chhuk a.

Zorema ruang pawh an hmu ngei a, mahse khang black widow spider ho khan ril an lo zam nasa nuai nuai tawh em a, an lo inthlah pung hman niawm tak a ni. Va lut deuh thut an nih avang chuan maimawm thenkhat chuan an zinga pahnihte chu an lo sehna hman viau a, mahse Muana leh a thianpa Tetea erawh an tlan chho hman a.

Tetea chu maimawmin a seh avang chuan a chi ai em em a, chuvang chuan pawnah a tlan chhuak a, a bike ah chuan chuangin a tlan ta ringawt a ni awm e. Midang pahnihte pawh chu stepah chuan an rawn vak chhi hram hram a, Muana ber zawk erawh tanpuitu au turin a chhuak ve nghal a.

Mahse a hmuh mai loh avang leh a rilru a chiai em avang chuan a let leh a, chutah chuan X-a hi a va hmu ta a lo ni. X-a chuan pawi a ti kher mai, "Hun khawh ral thei ka ni tawh lo...thil pawi a thleng hnem dawn tlat." tiin a motor lamah a va let leh a, pertol chu la in farm house chu police ho ruang a hnuh chhuah vek hnuah a hal leh ta tawp mai a ni.

*********************

An chauh deuh tawh avang chuan Pu Rinawma leh a naute pahnih, Liantea leh Marema te pawh chu an thu chawl rih a. Hma lak zeldan tur te ngaihtuah in an titi nasa ngei mai, chutia an titi lai chuan bike tlan ri niawm tak an hre ta. "Chu...chumi ri chu inhre ve em?" tiin Pu Rinawma chu a tho vut a, midang pahnihte pawh chu an rawn ding ve nghal bawk.

"Bike ri ava ang ve, Sir?" Marema chuan a han ti ve leh a. Chutah an han ngaithla chiang a, a rawn hnai tawlh tawlh mai. Pu Rinawma chuan a pistol a phawrh a, "Inring ru." tiin a hum nghet nghal sauh sauh va. Bike ri ni ngeiin an hre ta, chutah chu bike chu a tlu ni ngei tur a ni. A ri deuh tawk a, mihring na tuar a rum ri an hre chhunzawm nghal bawk.

Rang takin an va tlan phei a, an bul deuh lawk chu a lo ni tawh. An va hmu ta, an thianpa constable pakhat, Constable Muana te zinga mi, maimawm seh ve tho, Tetea a lo ni. A kut dinglam ah chuan maimawm sehna hnuhma chu a lo lang kulh mai a, a hmai pawh a dang vek tawh bawk.

Pu Rinawma chu ava kal hnai vat a, "Tete..Tete..enge awmzia? Engthil nge thleng a?" tiin a zawt nghal chiam chiam a. "Sir..Sir..maimawm..maimawm in min seh." Tetea chuan a lo ti tawk tawk mai. "Enga? Maimawm a?" Pu Rinawma chuan a ti hu mai. Thei leh theilo hian Tetea chuan, "Aw Sir, ruang..ruang a awm bawk. Farm house ah..Sir, midang..midang pawh.." a sawi zawm thei tawh lo.

A chil a rawn phuan bawrh bawrh a, a thi ta der mai. Pu Rinawma thinrim chu  a ding chhuak a, "Hrep tak chuan a...Hmela mai mai chuh.." tia vin khur khur pah chuan chung lamah a silai chu a kap puak vak vak ringawt mai. Chutah thawm an hre leh a, chawp leh chilhin chu thawm chu a rawn ri hnai nghal em em bawk.

Mahse tudang nilvoin, team pathumna te an lo ni reng mai, police pathumte chu an rawn thleng a. An leader SI Zara chuan, "Enge puak kha?" a rawn ti hu a. Chutah Tetea ruang chu a hmu leh a, "Ehe..Tetea em ni?" a ti leh hu mai. "Aw ni e, maimawm seh vangin a thi a nih hi. Shadow X...Shadow X thil tih vek a ni." tiin a thinrim kher mai.

******************

X-a chu a motor lamah chuan a let leh a, a seat hnunglam ava en chu tumah an lo awm tawh hauh lo mai. "Ehe..khawnge..khawnge an kal?" tiin a mangang nghal kher mai. Chutah a hnung atang chuan Puipuia chuan a rawn zuan thut a, a motor side glass tla hlawk khawp chuan X-a chu a intauh va.

Leiah chuan a bawk thlawp mai, Pupuia chuan thut betin a hoodie lukhum chu a phelh sak a, a mask phelhsak a tum nghal bawk. Mahse X-a nge nge, a che rang lutuk tlat. Puipuia chu a lehthal nghal vat a, "Che suh..che tawh suh. Puipui, keimah ka nih hi.." a ti vak vak a. Chutah a hnung zang chu a rawn ri thum dawt a, a hnag titih nghal.

Lehlam a va hawi chu Abawihi chu thing tum lian tak nen a lo ding a, X-a chu a lo tin ran mai. Abawihi chuan a han vaw leh a, mahse X-a chu a lo indang hman hlauh. MAhse a kutah chuan a vuak sak a, a na ti lutuk chu a tawlh hnung nghal. Puipuia chuan rawn beilet tumin a rawn tho va, hnek tum chuan X-a chu a pan lehnghal.

Mahse X-a chuan a lo nam vak a, Abawihi lamah chuan a bawk phei thlawp mai. X-a pistol thlauh chu Abawihi chuan a la vat a, a tin nghal. "Che tawh suh...a nih loh chuan ka kap ang che, ka kap khawp ang che." tiin a vin nghal khur khur a. X-a chuan a ban pharin, "Nilo Abawih, min kap suh..keimah, keimah ka ni." tiin muang chang chuan a mask chu a phelh thla ta.

Abawihi leh Puipuia mak ti lutuk chu an ka hau mai, "PA RINTE?" an ti rual nghal. Chutah an pahnih chuan an han in en leh a, "I hre ve maw?" Abawihi chuan a ti hu mai. "I hre ve zawk elaw?" tiin Puipuia chuan a lo zawt let ve bawk. Shadow X chu tunge a nih an hre ta, Abawihi pate Zorema nupui, Nutei unaupa, Rintea a lo ni reng mai.

"Aw keimah..kei hi Shadow X chu ka ni." tiin Rintea chuan a ban a la phar reng a. Abawihi leh Puipuia mak ti lutuk chu tawng ngaihna pawh an hre lo, Abawihi pawh chuan pistol chuan ala tin reng bawk. "Abawih, pistol kha dahthla rawh...i Pa Rintea ka nih hi.." zaidam tak chuan a han ti a. Mahse Abawihi chuan vin zet hian, "Ka dah thla lovang, engvanga ti nge i nih sawi rawh." tiin mittui tla phung chuan a vin hrep mai.

"Awle..awle ka sawi ang. In pahnih hi chuan tihnat che u ka tum lo, in phuba ka laksak mai chauh che u a ni." a han ti a. Thinrim tak hian Puipuia chuan, "Anih leh engvanga Abawihi nen hian min kidanp nge i nih?" tiin a vin hrep mai. "Thudik hrilh dun che u ka duh vang a ni, chuvang chauh chu a ni." a han ti leh a.

"Eng thu dik maw?" Abawihi chuan a lo ti ve leh hlur bawk. Rintea chu a ngawi vang vang a, "Puipui, tunge ka nih a, engtia min hria nge i nih han sawi teh le, Abawihi bulah khan..." a han ti dam diai a. Abawihi chuan, "Engtia inhria nge in nih?" tiin Puipuia chu a lo zawt ve nghal bawk. "Ka nu leh pa an inthen hnu khan ka pa chuan nupui dang a nei tih ka hria a, khatih lai khan kan inah a lo leng thin a ni." tiin Puipuia chuan a chhang a.

Abawihi chuan, "Ka pate Zorema nupui, Nu Nutei u anih hi.." a lo ti ve bawk a. "Ni e, Puipui...i nu Rinpuii kha ka thiantha tak a ni thin a, school kan lut ho thin a, college kan kal khan kan inngaizawng ve tan ta a ni. Mahse loh theih loh avangin kan inthen a, tichuan i pa nen khan inneiin nang hi i lo piang ta a ni. Mahse i pa nen khan an inthen ta si a, keichuan hman atang tawh khan ka la hmangaih reng a. Theih tawp chhuah in ka hnem a, nupuia neih pawh ka la hreh chuang hauh lo." tiin a hnuk chu a ulh tih a a hriat ngei mai.

A han inhnit deuh feih feih a, "Tichuan ka hna thil avangin thla 6 lai ka zin angai ta a, chutia ka zin hlan chuan i thianpa, Teruata khan khatiang thil ka a lo ti ta si a. Keilah ka rawn haw mai thei si lo, internet ah a video zawng zawng te kha ka lo hmu ve a, ka na takzet asin. Ka lo haw meuh chuan i nu kha biak tlak a ni tawh lova, mi a chiah chiah a ni tawh. Nikhat chu amah tlawh turin Mental Hospital ah chuan ka kal a, ka thian ang tawkin ka dawp a. A tawp a tawpah chuan i thianpa Teruata thil tih vek a nih thu min hrilh ta a, ka thinrim lutuk khan a tir chuan thah nghal mai ka duh a. Mahse police hnena thlen zawk chu tha in ka hre ta a, ka rilru a la dam thei chuang lo. Tichuan police hnena thlen lo chuan phuba lakdan tur ka ngaihtuah a, na thei ang ber hrem ka duh a ni." tiin a sawi chhunzawm leh a.

Abawihi chu a en leh a, "BAwihte, min ngaidam ang che. Zorema kha ka ring em em thin a, ka nau Nutei a thih pawh khan rannung seh an tih avang khan ka awih mai a, a chhan chu i pate Zorema kha ka unaupa ang chiah a ka en thin vang a ni. Ka nau Nutei thih lai khan Rinpuii vanga ka nat em em lai a lo ni leh zel bawk nen, ka kehsawm vek a ni ber mai. Mahse zan khat ka hna avanga office ka ban tlai khan ka haw lam chu kawngsirah hian i patea leh zirtirtu Sir Mama te chu an lo awm a, zu an lo in a. Ka bike chu tidingin va join ve hial ka tum a, mahse an thusawi chuan min tiding chat mai. Rui taka ka nau Nutei kha rannung seh vang nilova, an mahni inthurual avanga an thah thu ka hre leh ta a. Kha tah khan ka na lutuk kha chet mai nachang pawh ka hre lo, ka din khawng reng lai chuan an lo tlan hman daih a. Nilose chu an pahnih khan khatilai hmunah khan ka that dun nghal chiang ngawt ang, tichuan inah ka haw a. Ngaihtuahna ka seng nasa a, a tawp a tawpah chuan nangmah ngeiina min hrilh thin, i bialpa hlui Nghaka, Shadow-X tih hming invuah a phuba a lak thin dan chu ka ngaihtuah chhuak ta a ni." tiin a hrilhfiah ve leh thung a.

Abawihi pawh chuan a pistol ken lai chu a dahthla ta a, Puipuia pawh chuan a thing tum ken lai chu a dahthla ve bawk. Rintea chuan sawi chhunzawm zelin, "A hmasa berah chuan Teruata chu ka bitum ta phawt a, nitin mai ka zui ru a. Kha zan, ruah sur bur bur zan khan remchang ka hmu ta chiah a, tichuan thianpa Zara puihna hmangin Zara farm house ah ka inpuan tir a, Puipui...a rawn phone che kha i hre ngei ang tiraw?" tiin Puipuia chu a han en a.

Abawihi chu en leh in, "Tichuan ka hna pakhat ka zo ta a, a dawt leh chu i patea te thiandun kha a ni. I chhuah hlan khan i patea kha ka man leh a, chumi zawh ah Sir Mama. Tichuan ka farm house lei thar, tumah ka la hrilh lohna hmunah chuan ka kalpui leh a, tikhan ka hrem leh ta a ni. Mama erawh kha chu a kidnaptu chauh a nih avangin a unna chu zuah ka tum a, mahse ka thinrim insum zolovin ka that ta a ni. I patea bulah khan ka hmel ka tilang duh lo, a chhan chu a chhungkaw mi leh sa ngei thil tih a nih kha hriat tir ka duh loh vang chauh a ni. I hmuh laia inpuan tir ka duh a, mahse rin ain kawng i rawn bo rei ta si a, ka nghak ta lo mai che a ni. BAwihte, hlau taka ka siam che avang khan min ngaidam dawnnia, ka thinrimna avang hian ka a zo tawh a ni. I tawlhthlukna turin chhuat ka ti nal lui a, i phone leh i scooty chahbi pawh ka laksak nghal che a. Tihnat che ka duh lo, thudik i hriat ka duh mai chauh a ni. Dr. Sanga ka man leh a, tichuan rannung seh anga an lantir avangin rannung tak tak seh avangin an thi ve thung a nih kha. In inah pawh ka va kal ngei a, a chhan chu inlamah boruak enge thleng ve tih ka hriat duh vang chauh a ni. Mahse i pi khan i phone an trace mek thu ka hriat khan farm house ah khan ka rawn let leh nghal a, i phone chu ka tichhia a, ramhnuaiah ka paih bo ta daih a ni. In hmaa inpuan ka duh avangin ka man che u a ni, tihnat che u ka tum lo. Mahse ka rin loh tak maiin police pathum lai an thih ve phah a, a pawi ka ti takzet. He khawvelah hian ramhuai hi an awm tak tak a, mahse a pawi ber chu, chung ramhuaite chu keimahni ang chiah chiah an lo ni ve hi a ni. Tunah chuan ka phuba lakna avangin pawisawi lo an thih phah a, keipawh chung ramhuai zinga mi chu ka ni ve ta a nih hi." tiin a kun tlawk tlawk mai.

Abawihi leh Puipuia te chu an ngawi reng a, pistol chu Rintea hmaah chuan Abawhi chuan a theh thla a. "Kha la rawh PA Rinte, tlanchhe rawh..tlan bo rawh, anih loh chuan police hnenah ka report ang che." tap teuh chung chuan a ti zawi sap mai. Puipuia pawh chuan, "Ni e, Pa Rinte...engmah sawi tur ka hrelo, phuba min laksak avangin ka lawm e...Abawihi sawi ang chuan tlan chhe mai rawh." a lo ti ve bawk.

Rintea chuan pistol chu a chhar a, "Min ngaidam dawnnia." a ti zawi leh sap a. Chutah an bulah chuan mihring engemaw zat tlan ri tuk tuk hi an hria a, a rawn lang chiah mai chu Pu Rinawma te leh a naute an lo ni. Pistol chuan Rintea chu an tin nghal thap mai, "Zawnga che tawh suh, i silai kha paih nghal rawh." tiin Pu Rinawma chuan a vin nghal khur khur mai.

"Nilo..kap suh u..khawngaihin.." tiin Abawihi chu a lo au vak nghal vak vak bawk. Mahse Rintea chuan Abawihi chu enin a lu a thing a, za lo tak chuan a nuih sak bawk. Shaodw X hmasa zawk, Nghaka tih ang chiah chiah chuan a pistol maxine chu a hmet tla a, chutah Pu Rinawma chu kah tum niawm tak chuan a tin lehnghal a.

Chuveleh Rintea chu police ho chuan an kah rawn ta nghek mai, "Nilo..kap tawh su." tiin Abawihi chu a au vak vak a, a tap nasa hle bawk. Rintea chu a thi phung mai a, Abawihi en reng chung chuan a thal tawp mai. Abawihi chuan va pan a tum a, mahse Puipuia chuan a lo man bet vat.

Zawite hian Rintea chuan, "Baw..Bawihte, min ngaidam ang che." a ti zawi sap a, a chatthla zui nghal. Abawihi tap vak vak mai chu Pu Rinawma chuan a ngaihna a hre lo kher mai, a han zawt chiang nghal a. Mahse Abawihi leh Puipuia chuan engmah thudik an sawi duh thak lo, tichuan Rintea ruang chu an phur liam ta nghal a ni.

********************************

THLA THUM HNUAH CHUAN

Inspector Rinawma chu an inah chuan a insiam mawlh mawlh a, a police form chu uluk hmel tak hian a han chul hliau hliau va. A hak zawh hnu chuan a sam te chu a han siam leh mawlh mawlh a, tichuan pawnah chuan a rawn chhuak a. A motor bul thleng chuan a nupui leh a fanu te chuan an thlah a, tichuan motor ah chuan lutin a tlan san ta.

Kil khat atang chuan Abawihi chuan motor chhungah chuangin a lo en reng a, a melhrum kher mai. Station lam chu Pu Rinawma chuan a pan nghal a, Abawihi chuan a zui ve reng bawk. Station chu an thleng a, Pu Rinawma pawh motor atang chuan a chhuk nghal a. Abawihi erawh motor chhungah chuan ala awm reng thung, Station kawtah chuan police an lo ding tlar thap mai.

Chumi ni chu Pu Rinawma te Police Department ten Station enkawltu tur, incharge-thar an neih na ni tur tak a lo ni. Reilote hnuah chuan police motor nalh tak pakhat hi a rawn kal a, police dang, pawna lo ding mekte chu an ding ngil at hlawm mai. Motor atang chuan police pakhat hi a rawn chhuk a, chu police officer chu Abawihi chuan a lo en ngun ngang mai.

Chu chu tudang nilovin a bialpa hlui Alex-a pa, Officer Pu Rintluanga, Shaodw X hmasa zawk Nghaka kaphlumtu ngei mai kha a lo ni reng mai. Police ho chuan zah tak hian salute an lo pe sap sap a, Pu Rinawma nen chuan an han inchibai a. Chutia an inchibai lai tak chu Abawihi chuan a phone camera chuan a lo la a, a nui sak mai.

"Lung pakhatin sava pahnih perh thlak a ngai dawn a nih hi." a han ti zawi deuh sap a, tichuan a hoodie dum hak lai chu a lukhum a khum a, face mask dum a vuah bawk. A hoodie hmaa thil inziak chu a en a, chiang taka SHADOW X tih inziak chu a nuih leh sak mai. Tichuan motor chu a ti nung a, Police Station chu a tlansan leh ta a ni.

**********************

THE END