KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-6

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-6

*************************

Silas-a chuan a thiante pahnih, Lazarus leh Magnus-a te chu hmun fianrial tak mai pakhatah chuan a t(r)um pui a. Lazarus chuan hrethiam lo tak hian, "Tinge? Ngatinge min rawn dan a? Kha kha Keichala thlarau chu a nih kha, enge maw i hriat le?" tiin a phun nuah nuah mai. MAgnus pawh chuan, "Kha mihring kawchhunga a thlarau kha kan la chhuak thei dawn chiang asin mawle, tinge khatia i rawn tih a?" tiin Silas-a chu a lo hau ve bawk.

Silas-a chuan a lu a thing a, "Nilo, kha tlangval kawchhungah khan eng thlarau mah a awm lo." a ti ta mai a. Lazarus leh Magnus chu mak tiin an in en hu ringawt, "Ni e, a chhan chu kha keimi bul ka thlen hnaih khan mihring rim chauh ka hria a ni...thlarau a awm tel lo." Silas-a bawk chuan a rawn ti leh a.

Lazarus-a chu a khi suk a,"Thlarauvin rim an nei reng reng em ni?" a han ti deuh kher a. Chutih lai tak chuan bak tam em em mai hi an rawn thlawk leh ta sup sup mai, an bul hnaiah chuan an rawn in vial tuau tuau a, mihring pianzia ah rawn insiam in an boss Zeros-a a rawn lang ve leh ta. Zah takin an pathum chuan chibai an lo buk nghal a, Zeros chuan a naute pathum chu a han en vang vang a.

Chutah thawk a han la te te a, "Silas khan a sawi dik a ni." a rawn ti ve ta a. "Enga? Ka Lalpa...kha kha Keichala thlarau a ni lo tihna maw?" tiin Magnus-a chuan a rawn zawt ve leh nghal a. "Aw ni e, kawrkilh hmang hian ka rawn hre nghal a ni. A awmzia chu kha tlangval kha keimi tura thlan a ni, Keichala thlarauvin keimi ni turin a thlang a ni." tiin Zeros-a chuan a chhang ta mai a.

LAzarus chu a ngawi vang vang a, "Keichala ang mai mai kha a ni lo, vampire 13 chuang thiltihtheihna ka nei a, darkar khatah km 300 chuang ka tlan thei, tiang kahwpa tuan rang chu ka ni. Mahse kha keimi khan min man hman tho, keimi danglam tak a ni." a ti khur dar dar mai. Zeros-a chu a nui huah huah a, "I hlau em ni? I hlau a maw kha keimi kha...tunge kan nih i hria em? Tuma hneh theih kan ni lo, BElzebula tak ngial pawhin min hneh lovang. Thiltihtheihna tam tak kan nei a, Pu Vana kawrkilh 50 zinga pakhat kan nei bawk." tiin a vin hrep mai.

Lazarus chuan inthlahrung tak hian, "Ka hlau lo, ka Lalpa...keimi chak tak a ni tih ka hria, chuvang chuan fimkhur a ngai ka tihna mai chauh a ni." tiin a chhang a. Magnus-a chu rawn inrawlh ve in, "Fimkhur tur chu keini nilovin, kha keimi zawk kha a ni. Silas-a hian min rawn dang lo phei se chuan ka that chiang tawh viau ang, ka pawt sawm vek ang." a han ti khur khur a.

Zeros-a chu  angawi vang vang a, "Tunah hian Belzebul-a'n a naute tirin kawrkilh hi a rawn zawng mek a, kha ramhuai awmze nei lova kum tam tak min khawh ral saktu ramhuai tlaktlai lo khan he kawrkilh hi rawn neih let leh a tum a ni. A thu hnuaiah kan awm tawh lova, hremhmun atang pawhin a dinhmun ka la paih thlak sak khawp ang. Chuvang chuan kha keimi kha nangni pathum hian in buaipui angai, keichuan hremhmun ramhuai ho hi ka lo buaipui ang." tiin a thlawk bo leh ta daih mai.

Silas-a chuan eng rim emawni chu a hre leh ta tlat mai, "Nilo..rim ka hria...mihring leh sakei rim inpawlh a ni." a ti ta mai a. Midang pahnih pawh chu an inring nghal, "Enga? Kha keimi kha a lo let leh tihna em ni?" Lazarus chuan a lo ti nghal. Magnus chuan thinrim tak hian, "Lo kal rawh se...ka lo that law law ange." tiin a hawi kual nghal a.

Boruak chu a reh thap a, keimi chu vampire pathumte chuan an lo chang thap mai. Chutah LAzarus chu rang lutukin a phe zeuh va, a awmna zawnah tak chuan keimi chu a ranw t(r)um chat mai. A awmzia chu LAzarus hi a chet ran em avangin keimi rawn zuang thla tur chu a lo hmu hman a, a kal sawn hman tihna a ni.

Keimi chu a thinrim em em a, a mitmeng te chu a sen hian a sen vut mai. Ring lenglawng hian, "Tute nge in nih?" a ti thum chhur chhur a. Magnus-a chuan a va zuan tlu nghal a, leiah chuan an lum dun tup tup mai. A tawpah chuan a chung zawkah Magnus chu a tang ta tlat mai, keimi chu rekin a ngawngah chuan seh a tum a.

Mahse keimi chuan a hmaiah a lo ham sak a, a dulah chuan na tak hian a han hnek pawp a. Sang takah Magnus chu a vawrh chho lawp mai, chutih lai chuan Silas chuan rawn beih a tum ve leh a. Mahse keimi chuan a duhtawkin a lo sawp zek mai, MAgnus lah keimi hnekna force na lutuk avang chuan khitah a lo la thlawk vang vang.

Lazarus a rawn che ve leh, keimi hmuh hman loh tur thei ang ber chuan rang tak hian a hma ang bawkin a taksa rem lai laiah chuan a han khawih leh zauh zauh va. Keimi chuan a khawih fu ve hman silo chu a thinrim a zual leh ta, ring tak hian a ha hum vak vak a. A awmna lei chu a chum vak a, an awmna tlang chu a nghing luih mai.

Chu force chuan LAzarus-a speed chu tibuaiin a tluk phah a, chu chu keimi chuan remchangah la in ava tham tho lawp a, kham lamah chuan a vawm thla daih mai. Magnus-a pawh a rawn tla thla a, awlsam lutuk hian keimi chuan a lo rek leh chat a. Leiah chuan khuar dawk khawp hian a paih chawrh mai, dim baksak lo chuan a hmaiah chuan a hnek siah siah mai a.

LAzarus chu kham atang chuan a rawn thlawk chho leh a, a tuan tanna hmang chuan keimi chu a rawn khawih fu thei hram a, a hnek leng dawrh mai. Chutah Silas-a chuan a thianpa MAgnus chu rawn kai thovin an pathum chuan an thlawk bo leh ta daih mai, keimi chu a rawn tho ve leh nghal bawk.

Mahse a hmelma te pathum chu bakah changin an lo thlawk bo mek tawh a, a thinrim kher mai. Tlang hmawrah chuan a ding a, ring tak hian a hahum vak vak a. Ramhnuai a ni bawk nen, a khawk hian a khawk rum rum mai a, a trapthlak hle bawk. MAhse khua a var tep tawh avang chuan khamah chuan keimi chu a zuang thla a, chak takin a tlan vak vak a.

*************************

Khua a lo var a, "Tlangval..tlangval, i tha em? Harh teh..i tha em?" tia patling aw in a biak mawlh mawlh ri chu Daniel-a chuan a hria a, a rawn harh ta. Patling pakhat hi a bulah chuan a lo thu a, a hnugah chuan zing exer la niawm tak, nula leh tlangval sawm vel hian an lo en thap bawk. Daniel-a chu a hawi kual a, a awmna hmun chu a hma zana a accident-na tho kha a lo ni.

KAwr ha lovin a lo awm a, a kekawr pawh a lo t(r)et nual bawk. "I lo harh thei maw? I tha em?" tiin patling chuan a han zawt leh a. Daniel-a chu a rawn tho va, "Aw..aw ka tha, ka tha e." a ti bah nuai mai. "Engtin nge i accident reng reng a?" tiin chupa chuan a lo zawt leh a. Daniel-a chu a hawia hu tawh mai, "Ihh..ka hrelo..engtin nge ka awm a?" tiin a la zawt let zawk zui.

"Hei..kan zing walk in kan hmu che a nih hi...damdawiin pan a ngai angem?" a han ti leh a. Daniel-a chuan a taksa te chu a han inkhawih chhin a, engmah na a nei der mai si lo. Mak a ti em em a, a thawmhnaw lah a t(r)et hnuang mai bawk si. A scooty hmaah chuan a phone pawh a lo la awm thlap, rang takin ava la a.

A han en a, missed call a lo tam ngang mai. Melody miss call 20 vel a awm a, anu miss call 50 chuang leh apa miss call 30 chuang a lo awm bawk. Hlauthawng tak hian, "Ka kal angai..ih..ka lawm e, ka lawm lutuk min puih avangin.." tiin scooty chu a tung ding a, rang lutukin a inkhalh haw nghal.

Chung exer la ho pawh chu an hrilhhaiin mak an ti kher mai, an en zui vawng vawng ringawt. Daniel-a chu an in a thleng a, anu leh pate chu in atangin an rawn chhuak chiah a. An fapa an hmu chu mak tiin an en reng a, "Mama..khawnge i bo vang vang a?" tiin Pi Zualtei chuan a lo zawt nghal a.

Chutah vin zet hian apa chuan, "Nizan i lo haw lova, call i la thei bawk si lo. Enge awmzia? Khawnge i bo vang vang...chuan tinge i kekawr kha ava t(r)et nasa ve, i kawr lah a bal bawk si...enge awmzia?" tiin a hau hrep mai. Daniel-a chu a ngawi vang vang a, sawi tur pawh a hre lo.

"Inchhungah lo lut teh." Pu Malawma chuan a han ti vin leh thak a. Inchhungah chuan an inzui lut ta hlawm a, "Insualnaah i tel em ni?" tiin anu chuan a han zawt a. Inthlahrung tak leh hlauh hmel tak hian, "Aih..tel lo..ihh...ka accident a." tiin Daniel-a chuan a chhang a. "Nizanah khawnge i awm?" tiin a zawt leh a.

"Ihh..englo, Fran..Francis-a te inah." tiin dawt a phuahchawp ringawt. Apa chuan awihloh hmel tak hian, "Francis-a a? Tunge chu chu?" tiin a lo zawt leh nghal. "Ka thianpa..kan class ami." tiin a lo chhang leh a. "Tinge i chhuah danwah i sawi loh...i lo haw leh vat dawn emaw tia..kan ngaihtuah zia che hi i hria em?" tiin Pu Malawma chuana vin leh hrep mai.

"Kan hmu zo silo che a, i thianpa Robert-a kan phone a, i awm bawk silo. I thiannu MElody number kan dil ringawt a, ani lahin a lo kal lo a ti bawk si. Police hnen a report turin chhuah kan tum a, i lo lang leh hlawl bawk si." tiin Pu Zualtei chu a lo phun ve nuah nuah bawk. "Francis-a te inah chuan i leng takzet maw?" tiin apa chuan a han vin leh thak a.

"Aw leng e."

"Anih enge i va tih?"

"Ihh..games, games kan khel a, kan rei deuh va, ka riak ta ringawt alawm."

"Anih leh Francis-a te chhungkua chuan i thawmhnaw an lo zai t(r)eh sak che tihna em ni?"

"Aih nilo."

"Anih chuan tinge i thawmhnaw kha ava thler nasa ve?"

"Ka accident na-a mi ania.."

Pu MAlawma chu a ngawi vang vang a, "Anih chuan Francis-a chu han call teh, dawt nge thudik i sawi kan hre mai ang." a ti ta mai a. Daniel-a chu a mangangin a zam kher mai, "Phone..phone kher angai helinem, thudik alawm ka sawi, Pa.." a han ti dek dek chu vin zet hian Pu Malawma chuan, "Phone rawh ka tih chu.." a ti leh khur khur a.

Daniel-a chu a inngaihtuah vang vang a, "Ka..ka phone a chhia a, ka accident-na lamah." a ti leh ta ringawt mai. A nu leh pate chu an in en leh hu ringawt a, an awih chiah loh hmel khawp mai. "Anih khawimaw i phone chu lo la chhuak teh." tiin anu chuan a han dil a. Daniel-a chu a thlan a tla buah buah a, a phone chu a chhe der mai si lo.

A ipte chu a zen a, a hlau bawk si zam bawk si chuan a phone chu a hum vak ringawt a. Chutah a ri thet a, a hum keh ta vek mai. A hre chuak thut, tha tam tak a nei tih leh tlangval chak tak a ni tawh tih chu a hre chhuak thut mai. A thaw deuh huai a, a phone a hum keh zawh chiah chu a phawrh ta.

"Hei..a keh vek alawm." tiin a han lek kang a. Apa chu a ngawi vang vang a, "Anih leh riak dawn pawh ni la, nizanah min rawn phone lawk ve tur alawm." a han ti leh a. DAniel-a chuan a chil a lem dawk a. "Ihh englo, nia..nizan atang tawh khan ka phone hi a chiang tawh lova, tukin ka rawn haw lamah ka la ti chhe belh nen, a zia lo tak tak." te a ti kual ta vel mai mai a.

Apa chu a thaw hak a, "Na i nei em?" a han ti leh a. "Aih nei vak lo, ka ke hi tlem tlem a pilh a, chuzawng chu a ni mai." tiin a fapa chuan a chhang a. "Coolege kal i hreh em?" tiin anu chuan a lo zawt veleh a. "Aih, ka kal thei ang." tiin a chhang leh a. "Umm, inbual fai la, chaw ei la..kal ang che, chuan vawikhat mah tiang hian awm leh tawh suh." tiin Pu Malawma chuan a hau leh hrep a.

******************************

Scooty khalh mek pah chuan Daniel-a chuan a chunga thil thleng chu han ngaihtuah let a tum a, mahse engkim mai chu a mang hriat ruai ruai vek a. Kha ti taka a kawr lo thler nasa te kha mak a ti em em a, "Ka van tlu na awm em em, mahse ka taksa chutin a na over si lova." tiin ama hriat tham leh chuan a phun leh sup thin.

Gate a thleng dawn tep tih ah chuan a lo inngaihtuah muk lutuk deuh nge ni, a scooty khalh lai chu a ngaihtuah tawh lo reng reng. Dawnga pawh class a rawn kal ve leh tawh chu niin, a hnar erawh tlem a la kawi deuh. Dawnga te thain pathum bawk chuan gate bulah chuan meizial an lo zu a Daniel-a chu a rawn tlan mek bawk.

An inchhaihna lamah Dawnga chuan a lighter chu a thlauh ta hlauh mai, kawngpuiah chuan a lir phei daih mai a. KAwng kawiah chuan Daniel-a a rawn lang thut mai a, Dawnga lah chuan lighter chu chhar tumin kawngpui a lo pan ve mek bawk. Daniel-a ngaihtuahna kal thui lutuk chuan kawng chu a lo en chiang bawk si lo nen, Dawnga lighter chhar tuma kun mek chu ava hmu thut a.

A phu nasa lutuk chu a break hman a, mahse a head light chuan dawnga lu chu a su ri chawrh mai. Chutia su na chu nilo mahse Dawnga luh chu a ri pawp a, na  ati lutuk chu a tlu thelh nghe nghe a. Alu chu tuai vut vut in, "Ana lutuk...ZAwnga, i kalna tur en ta che." tih pah chuan rum tak hian a melh a.

Daniel-a a ni tih a hmu chu a aiin a thinrim leh zual a, "Eheu, kan intawng leh ta maw...Nepa, khawnge i security guard hmeichhia kha? Nangmah chhantu che kha, i rawn hruai nange." a han ti chhunzawm nghal zat a. Isaka leh Peka te pawh an rawn kal phei ve nghal a, "Kan pawi hi sawi i tum ve hrim hrim a ni tiraw, Lalhriathlu..." tiin Peka chuan a rawn vau ve nghal bawk.

DAniel-a chu DAwnga chuan a scooty atang chuan a tham chhuak leh nghal a, grass ah chuan a paih thal leh ta tawp mai. An pathum chuan an hual thap a, "Khawnge Melody a awm? Khawnge kha hmeichhe kawlh zet kha, rawn inchhan tir leh la...ko ta che." tiin DAwnga chuan a vau nghal pung pung mai.

DAniel-a chu a rawn tho chhuak a, a han tho chhuak a. Thawk a han la te te a, "U Dawngte, intihbuai ka peih tawh lo ania. Khawngaihin min kal tir rawh u, ka ti tak tak ania." a han ti a. Chutah ISaka chuan pawr zet hian, "Anih loh chuan enge? Enge i tih vak anga?" a lo ti nghal pung pung mai.

Nui suk chung chuan Peka chuan, "Aww..a boss Melody a ko leh dawn aniang chu.." tiin a lo hmusit kher mai. DAwnga chuan a va pan hnai a, "Anih loh chuan..engtin nge min tih ang nang hian.." tiin deuh sawh tak hian na lo te te in a hmaiah chuan ava beng thek thek a. Daniela thinrim chu a maimitchhing vang vang a, chu lek pawh chu Dawnga chuan a ei lo kher mai.

A nem pawp a, Daniel-a pawh a tawlh hnung dawr mai. "Sawi rawh..engtin nge nang khan min tih ang?" tiin a han vin leh hrep a. DAniel-a chu a thinrim tawh kher mai, "Anih loh chuan maw...in vai khan ka sawisa vek ang che u." a ti ve ta sak mai. Chu veleh Dawnga te thianho chu an nui tiah tiah mai a, "NAng khan min sawisa anga maw..nauva leh." tiin Peka chuan ava pan a.

Daniel-a darah ben thak thak pah chuan, "Min han khawih hmasa ber teh keimah hi...lo en chhin ang hmiang." a han ti leh vel a. Chuveleh Daniel-a chuan a kut chu man sakin lei vaw chawrh chuan a bin ta mai a, a che rang takzet. Dawnga leh Isaka nui lai pawh a tawp chat mai, student dang ho pawh an rawn kal khawm leh tan der mai.

"Ehe..i khawi let ve ngam amaw?" tih pah chuan ISaka chu a va tlan phei ve a, mahse a aawmah tak chuan force na lutuk tak mai hian DAniel-a chuan a lo hnek leh siah mai, Isaka chu aleng dawrh a, Dawnga chu ava delh tlu zui. Student dang ho chuan chuti tak maia Daniel-a lo chak zek mai an hmuh chuan mak an ti a, an ka hau ringawt.

Daniel-a chuan ala duh tawk lo nasa, ava pan leh a. DAwnga chu a tham tho va, "Enge ka sawi khah? Enge ka sawi fo khah? Mawhh..min tibuai tawh suh ka ti anilawm ni?" tih pah chuan a hnek ta siah siah mai a, a duh aiin a hnek na ta. A hnar ngul lo tliak tawh, dam pawh la dam chiang lo chu a hnek kawih sak leh ta vek mai.

Isaka leh Peka te chu an rawn tho leh a, "Khawih tawh suh,...duhtawk rawh." tiin rawn dan an tum a. Mahse DAniel-a chuan a lo vai pawp a, a vawikhat ban vai ah pawh an thal dun leh tawp mai. Student dang ho pawh chuan an rawn thleh ta hial a, DAwngtea hnar chu a thi phung tawh a, "Min..ngaidam..ngaidam..khawngaihin." tih bak a sawi thei lo.

A tawpah chuan Sir TEtea chu rawn kalin a rawn pawt hrang ta a, DAwnga chu a thiante chuan office lamah a thi nasa lutuk chu an phei pui nghal. Sir TEtea chuan mak ti tak hian Daniel-a chu a en a, "Daniel, enge awmzia? Tinge khatia i sawisak vak vak mai le?" tiin a zawt a. Thinrim tak leh vin tak hian DAniel-a chuan, "Anni pathum khan vawi engzat nge min sawisak rawn tawh? Chu chu i ngaihtuah ve em?" tiin a vin let hrep mai.

Student dang ho chuan an en thap mai si a, Sir Tetea ber pawh chuan chhan let ngaihna a hre lo. Daniel-a pawh a thinrim a rawn reh tan a, a han hawi kual chu a zak leh hnuhnawh kher mai. Chutah Principal Pu Saidinga chu a rawn phei a, a rawn thinrim hmel kher mai. "Khawnge DAniel Lalhriathlua chu a awm?" a rawn ti ta khur khur mai a.

Sir Tetea chuan lo chhan vat in, "Englo ania Sir, an tibuai hmasa a, Dawngtea ten...a khawilet ve a nih kha." a lo ti nghal a. Mahse Pu Saidinga chu a thinrim laklawh tawh tlat, "Chupawh nise thi lek leka insawisak tur em ni? Ka office ah lo kal nghal ang che, Lalhriathlu..chuan i nu leh pate ka phone nghal bawk ang." tiin a phei leh daih mai.

DAniel-a chu an en thap mai a, "Thil thlen dan engkim leh ahma a an tih dan zawng zawng che kha sawi vek la, i thiam loh a ni lova, an tibuai hmasa thin che tih i sawi vek dawnnia." tiin Sir Tetea chuan zaidam tak chuan a hnem nghal mawlh mawlh a. DAniela pawh chu ngawi rengin office lam pan chuan a kal a, student dangte pawh chu an kal darh ve ta a.

*****************************

Pu Chhuma chu Police Staion ah chuan duty mekin engemaw hi a ziak fel mawlh mawlh a, chutih lai chuan a office kawngka chu a rawn inkik dat dat a. "Lo lut rawh." tiin a lo chhawn vat a, constable pakhat hi a rawn lut a. "Enge ni ta?" tiin a lo zawt leh a. Constable chuan zah tak hian salute a han pe te te phawt a, "Sir, hmu duh che an awm a." a rawn ti a.

"Lo luh tir rawh." tiin Pu Chhuma chuan a lo chhang leh a, constable chu a chhuak leh nghal. Second 10 vel hnuah chuan putar pakhat hi a rawn lut a, "I lo dam maw, Officer?" tiin polite tak chuan chibai a rawn buk a. Pu Chhuma chuan mak tih hmel deuh hian chu putar chu lo en in, "Ehe...Pu Simon...nang maw?" a lo ti hu mai.

Chu putar chu retired Police Officer niin kum 10 kal ta atang khan Dustin Malsawmzuala, SADIST vangin an lo buai dun hrep tawh a ni. "Nia, inhmuh  akhat khawp mai." tiin Pu Simona chuan a lo chhang a. "Lo thu rawh, khawngaihin." tiin Pu Chhuma chuan thutna a lo kawh hmuh a, a hma zawn takah chuan Pu Simona chu a thu a.

"Enge i rawn tih ve mial a?"

"News kha i hria tiraW?"

"Eng news maw, Dustin-a jail atanga tlan chhuah kha em ni i sawi?"

"Aw ni e, Pu Chhum...tunah hian chhui mek a ni a, mahse ka hlauh ang ngei ngei in police pahnih chu an thi leh der tawh."

"Anih enge chu chu min hrilh chhan?"

"Ka rawn kal chhan awm ang chu i hre mai lawm ni?"

Pu Chhuma chu a thaw hak a, "Enteh Pu Simon, ka thian...SAdist-a case hi chu ka kut a ni tawh lo, fanu pakhat ka nei a, ka enkawl a ngai a ni. Kan nu lah a la dam tha bawk si lo nen, engtik lai pawh a zankhat mitchhin tawk thei kan nia, inrin reng a ngai asin." tiin a chhang a. Inthlahrung tak hian Pu Simona chuan, "Kha mihring tualthah ching avanga ka retire kha ka inchhir a ni, ka thian." a han ti chuai raih a.

Mahse Pu Chhuma chuan a chhang lo, a ngawi reng ringawt. Pu Simona bawk chuan, "KA tlawm hle a ni, ka thian...chuvang chuan retire ve lo nang i la awm a, nang lo chuan an chhui chhuak dawn chuang lo." a han ti leh a. Pu Chhuma chu a nui suk a, "Pawi sawilo tamtak in an tuar a, nunna an chan a...keimahni vangin khaw pum a buai a, kha kha ka duh tawh lo. Patling ka ni tawh, ka hman tawh lo a ni." tiin a lo chhang leh a.

"Pu Chhum, patling i nih tawh avang leh fanu i neih tawh avang ringawt khan SADIST-a lakah hian i tlawm mai ang maw? Nang anga huaisen hi mi tam tak chu awm se ka mamawh lovang che, ka hna a ni bik lo. I hmuh ang hian Retired Police Officer mai chauh ka ni tawh, mahse keichuan kha SADIST kha man ka duh a ni." a han ti leh a.

Pu Chhuma chu a ngawi vang vang a, "Awle, ka lo inngaihtuah anga ka lo be dawn che nia." tiin a chhang a. Pu Simona pawh chu a tho va, "Ni e, ka lo ngaichang reng dawn che nia." tiin a chhuahsan ta a. A chhuah hnu chuan Pu Chhuma chu a inngaihtuah vang vang a, a rilru a buai kher mai.

*****************************

Pu Malawma chu inthlahrung tak hian a thu kun ngawih ngawih a, "Ka tihpalh takzet a ni, Pu Saiding...khawngaihin a ai awhin kei apa hian ngaihdam ka dil che. Khawngaihin hnawtchhuak lo hram rawh, ka ngen a che." tiin Pu Saidinga chu ngaihdam a dil mawlh mawlh a. Pu Saidinga chuan a melh rum kher mai, kil khatah chuan Daniel-a pawh a ding kun nghal mai.

"Damdawiinah a vawi hnihna atan a luh leh a ngaih phah a, i fapa hian mi tihbuai ringawt ami hetah hian rawn zir a tum? Tunah pawh kan bulah a awm ve thei lo, damdawiinah a hnar ruh tliak avangin zai a ngaih phah asin." tih pah chuan DAniel-a chu a han en a, "Insual chu a awm thei na meuh mai, Dawngtea hi ka fapa a nih vanga tan em em ka ni lo. Mahse hnar ruh tliak vek khawpa in sawisak kha chu..eng ang rilru nge maw i put le?" tiin a han vin ve leh hrep a.

ZAwi te hian DAniel-a chuan, "Aman min khawih hmasa thin a, tukin pawh khan ka su palh a, mahse ngaihdam ka dil hma hma in min khawih nghal alawm." a ti sap a. Pu Malawma chuan thinrim tak hian, "Tawng tawh suh Lalhriathlu, a tawk...ngawi rawh, i thiamloh a nih kha." tiin a lo khap vat a.

Chu veleh office chhunga awm ve, Peka chu rawn tawngchhuakin, "Dawt dawt sawi suh, kalkawng en ta che u, i pawr a mi tiin DAwnga kha i khawih nghal a nih kha." a lo ti zuah zuah mai. Pu SAidinga chu a ding hluai a, "A tha e, ka ngaidam hram ang che. Mahse ngaihdam dilna lehkha rawn ziak la, tunkar chhung zawng suspend i ni bawk ang." a ti ta hmiah mai.

"I'm sorry, Sir." Daniel-a chuan a han ti ve mai a. "A lo ziak em em ang, ka pu. Ka lo hmanhmawh tir vat ange, kan lawm e." tiin a fapa chu a kai chhuak nghal deuh dawr dawr mai. Pawn an chhuah veleh chuan Pu MAlawma chuan, "Engmah sawi suh, motor ah va lut rawh." a ti nghal a.

Daniel-a pawh chuan thuawih takin motor ah chuan a lut ve mai bawk a, apa chuan tukverh atang chuan Pu Saidinga chu a va en a. A thinrim hmel kher mai, rum zet chuan a melh deuh ngar ngar a. Tichuan a car lam chu ava pan ve ta a, a chhungah chuan a lut a. Daniel-a chuan a lo hlauthawng kher mai, "Pa..min khawih hmasa tak tak alawm."  a tih lai chuan apa chuan a lo pawt chat nghal a.

"Lawk..BAwiha, ngawi lawk teh..enge kan lakah hian zep i neih?" tiin a zawt ta tawl mai. Daniel-a chuan hriatthiam loh hmel tak hian, "Engmah? Engmah zep ka nei lo." tiin a lo chhang a. Apa chuan a han en vang vang a, "Khamite pathum, palian zet zet te kha i sawisa vek maw?" tiin a han zawt leh a.

"Ihh...ka..ka thinrim khan ka khawih fuh deuh hlawm aniang." a ti bah deuh nuai mai. Pu Malawma chu a ngawi vang vang a, "A zialo khawp mai, ka ring che alawm. I nu pawh ka hrilh tawh a, i lamah a tang reng ania. Lungnai reng reng suh, in lamah i nu i pui thei tihna a nimai." zaidam tak chuan a han ti a.

*****************************

Zan a lo thleng a, Melody chuan call reng reng a chhang duh tlat lo mai. DAniel-a chuan vawi tam a text a, a call bawk a. MAhse a la titau ni ngei tur a ni, engtin mah a chhanglet duh lo. A mangang em em a, an ina va phei mai chu a duh hial a. Mahse a mark chhiat lai a ni bawk si nen, in chhuahsan chu a ngam tawh rih bawk si lo.

Chutih lai chuan a phone a rawn ring a, Melody a lo ni hlauh mai. A lawm kher mai, rang lutukin a la nghal a. "Hello, MElo...tihpalh lutuk aw nizan kha.." a tih lai chuan Melody chuan vin zet hian, "Lalhriathlu..nizan i accident ami? Chuan tinge an suspend che? Dawngtea te thian ho i sawisa an tia, a nih ka ring chiah silova..enge awmzia?" a rawn ti nghal chiam chiam mai.

"Aww..ihh, ka, ka khawih hrep hlawm alawm."

"Nang khan i khawih amaw? An pathum khan maw?"

"Aw..englo, tiang..tiang ka chhar a, ka vaw thlu hlawm vek a."

"Ehe..i vaw hlum palh mai anga sin. Chuan nizan i accident em ni?"

"Aw accident e, tuin nge hrilh che a?"

"Robert-a'n min hrilh a, i na em?"

"Na lo ve...tinge i reh vang vang a?"

Melody chu a ngawi deuh vang vang phawt a, "Ka titau alawm, apa pawh hian a rin loh phah vek ang che tih ka hlau...zankhatna atangin i rawn tlai nghal ania." a lo ti bul bul mai. "Min hrethiam rawh...ka accident vang vek ania, mahse engmah ka na tawh lo...ka dam vek tawh." tiin Daniel-a chuan a lo chhang a.

An inbe thui zel a, an inngaih zia thu chu an inhrilh dun leh mawlh mawlh a. DAniel-a chuan a room tukverh chu hawngin a han dak chhuak a, thla chu a en vang vang mai. Full moon zan tho ala ni a, thla pawh a bial tha kher mai. Chutia an inbiak tui lai tak chuan thla bial kulh mai eng lai a takah chuan bak lian em em mai hi a rawn thlawk ta mai a.

DAniel-a chuan a hmu chiang ngang mai, bak tih dawnin a lian em em mai bawk si. "Melody, nakinah kan inbe dawnnia, ka nu puih lawk angai a." tiin dawt a sawi ta ringawt a, phone chu an dah ta a. Chu bak lah chuan a thla hlai tak mai chu a zap hluau hluau bawk a, mahse a thlakw hla hle thung.

DAniel-a chuan a ngaihtuah a, "Hmuh tawh na ka nei." a ti vang vang a. A tawpah chuan a hrechhuak ta hlauh mai, "Moon Monster...Moon Monster kha.." tiin a phone ah chuan Thailand Moon Monster thalak chu a hmet chuak a, a bak hmuh mek nen chuan a en kawp ta a. A inang chiah chiah mai, "Anih chuan Moon Monster hi tak tak em ni?" tiin a hlauthawng tan nghal der mai.

Chutah a lu a rawn na leh vak mai a, a taksa chu a rawn dik lo leh tan ta. Darthlalangah chuan a in en a, a ha chu a lo hriam nasa mai. A kawr a phelh nghal a, a awm pawh sakei hmul a lo awm leh tan der tawh. A hlauthawng lutuk chu sakeia a chan tak tak hmain a room chu chhunglamah a kalh a, light off in tukverh ah chuan a zuang chhuak daih mai.

An huan lam pan chuan a tlan thla nghal vang vang a, huan mawngah chuan a tawp chat. Chutah meuh chuan keimi a ni fel der tawh mai. A ding a, a thaw ri hruk hruk a. A hnungah chuan tu emawni hi a awm tih chu a hria, hnunglam ava hawi thut a. A hma zawn takah chuan Zeros-a a lo awm a, keimi nen chuan an inhmachhawn ta ran mai.

*************************

TO BE CONTINUE