KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-7

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-7

************************

Zeros-a chuan a han thlek vang vang a, Pu Vana kawrkilh chu a la chhuak leh a. A rawn eng vet vet a, keimi nihna chu a hre thei ta. Hmuhsit hmel tak hian, "Daniel Lalhriathlua, kum 20 a upa. I nu hming chu Lalhmangaihzuali a ni a, i pa hming chu Vanlallawma a ni." a ti ta zat zat mai. Keimi chuan hrethiam lo tak hian, "Tunge i nih? Engtin nge min hriat?" a ti khur khur mai.

Zeros-a chuan ava pan hnai a, "Ngaithla rawh, Daniel. I kawchhungah hian keimi pakhatin keimi thlarau a dah a ni, a fapa thlarau. Chuvang chuan nang hi keimi i lo nih ve phah ta a ni, chu keimi hming chu.." a sawi zawh hma chuan keimi chuan a inrin loh lai tak chuan a pawm nawlh a, leiah chuan a rap bet ran mai.

"I thusawi ka ngaithla peih lo, tunge i nih ka tih chu...sawi mai rawh." a ti thum chhur chhur mai a. Zeros-a chu a che tha thei der lo mai, mahse kawrkilh chu a lo la hum hlauh mai. A han hmet vang vang a, chutah keimi ke chu man betin a vawrh lawp a, keimi pawh chu a leng dawrh mai. Mahse rang takin a rawn tho leh a, an inbei leh ta.

Mahse kawrkilh neitu zawk Zeros-a chu a che thei zawkah a tang ta tlat mai, an han inhneh tawk dawn viau thin a, mahse a tawpah chuan Zeros-a chuan a khawih thal leh tawp zel. Chutah keimi koki ah chuan a va zuang kai a, a lu chu man betin thuai chhum a tum ta mai a. Keimi chu a lo tang ve nasa, kawrkilh thiltihtheihna nen hmang mahse keimi chu a la tang thei zel tho mai.

Zeros-a pawh chuan mak a ti angreng hle a, chutih lai tak chuan hnimbuk kar atang hian keimi dang a rawn zuang chhuak a, Zeros-a chu a rawn bawh thal tawp mai. Keimi pawh chuan ama anpui a hmu ve ta mai chu mak a ti kher mai a, "Keichal..nang maw?" Zeros-a chuan a lo ti hu mai.

Keimi pawh chuan mak ti tak hian, "Keichala...nang hi maw Keichala chu?" tiin a lo en ve bawk. Chu keimi chu Keichala ngei a lo ni a, a thlarau chu genie lim atanga a chhuah hnu khan Pu Vana chuan taksa thar pe leh in nunna a pe leh a ni. "AW keimah..Keichala ngei kha ka ni. Zeros, ka thil sawi kha ila hria em? Ala tawp lo, phuba ka la leh ngei ang ka tih kha." tiin Keichala chu a rawn tawng chhuak ve ta a.

"Enge awmzia? Nang hian keihi min dawi tihna em ni?" tiin keimi chuan zawhna a lo ngah ngang mai. Mahse Keichala chuan a chhang lo, "I theih hunlai khan min that law law la ni tur ania, tunah chuan i tlanchhe thei tawh lovang." Zeros-a en chung chuan a han ti leh a. Zeros-a chu a hrilhhai kher mai, "Mahse engtin?" a ti hu mai a.

"Khami zan..kan khua in rawn run zan khan, ka nupui khan kawrkilh inlak hma khan a thiltihthaihna kha a hmang hman a ni..chu chu a pum chhunga naute thlarau kha ka taksa chhungah a dah hman a ni. Tichuan ka fapa thlarau nen chuan kum 172 lai milim chhunga kan tan hnuah ka fapa thlarau chu minung ni ve tawh turin Daniel-a kawchhungah hian ka thawn ta a ni." tiin Keichala chuan a chhang a.

Zeros-a chu a nui vak vak a, "I lo hria em, Daniel..he zawhte putar hian a dawi ngei che a nih chu...i hria maw? Kei nilovin amah zawk hi i hmelma chu a ni, keichuan hrilhfiah che ka tum mai chauh a ni." tiin keimi chu ava en a. Keimi erawh a ngawi reng, a thu hriat chu mak a tih em avang chuan sawi tur pawh a hre lo.

Zeros-a bawk chuan a lu a han bu nghat nghat a, "A tha e, a nuam dawn tan e. Kan inhmu leh khawp ang, lo inring reng ang che u." tiin bak ah a inti chang a, a thlawk bo ta daih mai. Chutah Keichala chu mihringah a inti chang a, zawi zawiin keimi pawh DAniel-a a rawn ni leh ta. DAniel-a chuan a kut te telh telh te chu a en a, "Mak ti lutuk tawh suh...i nihna i pawm thiam tawh alawm." Keichala chuan  alo ti a.

Daniel-a chu mihringah a chang zo ta, "Engmaw i sawi kha?" tiin Keichala chu a han en leh a. "I nihna kha i thunun thei tawh, i kutah ka dah tawh a ni." tiin a lo chhang leh a. DAniel-a chuan va pan hnaiin, "Nilo..nilo, i insawifiah angai...engthil phiangsen nge ka chungah hian thleng? Min hrilh rawh...ka hrethiam lo." tiin a vin lek lek mai.

Keichala chuan zaidam tak hian, "Daniel, inbeng dai rawh..inbeng dai rawh. Ka hming chu Keichala a ni a, ka fapa thlarau i kawchhungah a awm mek a ni." a han ti dam diai a. DAniel-a chu a thaw hak a, "Huh..Keichala chu i hming tak tak maw? LAlruanga leh Keichala tih ami kha nangmah ami?" a han ti deuh hu a.

Keichala chuan sawi mai tur pawh a hre lo, "Ni..nilo ve..Nilo, ka hming hrim hrim a ni." a ti bah nuai mai. "Anih khapa, Zeros-a i tih ka tunge?" tiin a lo zawt leh a. "Thudik i hriat a ngai tawh takzet a ni, DAniel. Nang hian phuba min laksak turin ka duh che a ni." Keichalah chuan a han ti leh a.

"Phuba a? Eng phuba maw?"

"Ka phuba...ka chhungte phuba."

"Engvangin nge kei kher min thlan?"

"A chhan chu nangmah vangin ka thlarau, kum tamtak chhung muhil tawh chu kaihthawh in a awm a. Phuba la tura ka thlan ngei i ni...i duh emaw duh lo emaw, min tihsak angai."

Daniel-a chu a ngawi vang vang a, "Kha Zeros-a kha eng ramhuai nge a nih a?" tiin a zawt leh a. "Vampire a nih kha, vampire ah pawh a bik liau liau an ni. Chuan a thil ken lai, lunghlu pawl kha vanram lunghlu atanga siam a ni a, thiltihtheihna tam tak a nei a ni." tiin a lo chhang leh a. Daniel-a chuan a hrethiam lo tulh tulh mai, "Vanram lunghlu a?" a ti hu a.

"Aw ni e, vanram lunghlu atanga siam a ni a, Pu Vana kawrkilh 50 zinga pakhat a ni." tiin Keichala chuan a chhang leh a. Daniel-a chu a han khi suk a, "LPS Pu Vana maw?" a han ti deuh hu a. Keichala pawh chuan hrilh hai hmel tak hian, "Enge LPS chu?" a lo ti ve hu bawk. "Ihh..Pu Vana chu tunge?" tiin Daniel-a chuan a lo zawt let ve leh a.

"Pu Vana chu Paradise neitu a ni a, Pathian hnuai chiah a ni."

"E aw..i sawi awmzia chu..Pu Vana chu PAthian tihna maw?"

"AW..PAthian tamtak zinga pakhat a nia, a kawrkilh pakhat chu venghim turin min ti a, ka thei ta lo a ni."

"Pu Vana te chu Pathian a ni mai lo em ni?"

Keichala chuan Daniel-a chu a han en deuh hu a, "Daniel, kum engzat nge i nih?" tiin a han zawt a. "Kum 20...anih nang?" tiin a lo la zawt let nghal zui a. Keichala chu a han thaw deuh hak a, "Kum 240." a han ti a. DAniel-a chuan mak a ti kher mai, "Pu  Keichal, a aia chiang deuhvin min han hrilh teh." tiin Daniel-a chuan a zawt leh a.

****************************

KEICHALA THUSAWI :

1840 lai khan British in Mizoram a awp a, mahse kahtah khan mi 80 vel lek chu Pu Vana puihna hmangin hmun pakhatah kan tlanchhia a. Chutah chuan khua kan din a, engtik lai pawha beihna kan tawh hunah pawh kan inralrin reng nan tiin keimi ah min chantir vek a ni. Keimi khua tiin kan khaw hming chu kan vuah a, tichuan kan ram min rawn laksak tum apiang te chu kan lo beilet ve zel ta a ni.

Kum 10 a liam a, buaina kan tawk ta a ni. Kum 10 chhung khan Hremhmun vengtu Belzebula chuan Pu Vana kawrkilh ka kawl lai chu min lo chhuhsak a lo tum ve ngar ngar hi a lo ni a, min run tu thenkhatte phei kha chu Belzebula tirh an lo ni a. Mahse Pu Vana vantirhkoh ten an lo dang thin a, chuvanga him mai chauh thin chu kan lo ni reng mai a.

Tichuan Belzebula chuan ruahmanna dang a nei ta a, vampire zinga phakar em em mai, Zeros-a..kum 5000 chuanga upa tawh chu a hote nena kan khua run tur chuan a rawn tir thla ta a. Vampire dangte ang lo takin nisa leh meialh haw ve thei lo tur leh vampire dangte aia chungnung bik tur chuan Zeros-a leh a naute chu thiltihtheihna a pe a. Kawrkilh an pe let thei a nih chuan hremhmunah chuan dinhmun sang tak pek a, thiltihtheihna tam tak pek chu Belzebula chuan a tiam a ni.

Tichuan min rawn run ta ngei mai a, hnehna kan chang ta lo a ni. Pu Vana bulah khan, "Min ring rawh, he kawrkilh hi ka veng him anga, ka pe leh ngei ang che." tiin ka tiam a, mahse ka nupui thahsakah min vau avang khan ka pe ta ringawt a ni. Mahse ka nupui chu min thahsak ta tho va, vanneihthlak takin ka nupui khan kawrkilh kha a rukin a lo hmang hman hlauh mai a, ka fa, a pai mek thlarau chu ka kawchhungah a rawn dah hman a ni.

Tichuan ka mite zawng zawng ka hmuh laiin an hal hlum bawk a, tichuan milim ah min siam ta a ni. Kan khua kha tuma chenna a ni ta lo reng a, kum 1900 hnu lamah khan Thailand ram in an ram zauh nan an rawn hmang a, Rayong Mai tiin an ram huam chhungah an siam ta a ni. Tichuan ka lim chu an ker chawp a, genie pakhat lim angin an siam ta a nih kha, nangpawn i hriat kha.

Keimi nih i duh thu i sawi khan ka thlarau muhil lai chu ka harh a, tichuan ka fapa thlarau chu i kawchhungah ka rawn thun thei ta a ni. Khami hnu khan keipawh ka chhuak ve a, Pu Vana chuan min ngaidamin hun min pe leh a, he taksa hi darkar tlemte hnuah chuan a ral mai dawn. Taksa pangngai ka nei thei tawh lo, chuvang chuan ka neih chhun i ni.

*********************

DAniel-a chu a ding deuh hluai a, "Ka duh lo...khawngaihin min lak kir sak la, mihring pangngai a nun leh ka duh zawk." a ti ta daih mai. Keichala chu a ngawi vang vang a, "Daniel, i duh emaw duh lo emaw, Pu Vana hnenah ka tiam tawh." tiin a chhang a. "Ka chhungten buaina an tawh phah ang, ka duh lo." tiin a chhang leh a.

"I chhungte i venghim thei zawk dawn asin, ngaihtuah chiang rawh. Ka neihchhun tak meuh meuh i ni asin, chubakah laksak thei che ka ni tawh lo, duh pawh ni ila." tiin Keichala chuan a han hrilh fiah leh a. "Enge awmzia? Nangmah thil tih a ni a, min laksak thei tawh lo maw?" Daniel-a chuan a han ti leh hu a.

"Aw, kawrkilh kha kan hman a ngai a ni. Tunah chuan keimi thlarau kha nangmah ah a bet tawh a, keimi i ni reng tawh dawn. Kawrkilh hmang lo chuan ka laksak thei tawh lo che, Pu Vana khan thiltihtheihna vawikhat chiah min pe a ni." tiin Keichala chuan a chhang a. DAniela rilru chu a buai kher mai, "Kei kher? Tinge keikher?" a ti nuah nuah ringawt a.

Keichala chuan ava pan hnai a, "Ka tihpalh takzet, mahse ka mamawh che a ni. Ka tiam a che, kawrkilh saw min lak sak la, tichuan mihring pangngai ah ka siam leh ang che. I nun atangin ka kal bo vang vang bawk ang, Zeros-a hi min thah sak rawh." a han ti leh a. "Tual thah ka duh lo." tih ringawt chuan Daniel-a chuan a lo chhang a.

"I that der tawh, i la hria em? Nizan khan, mipa pakhat chu i seh hlum kha. Vawiin ah pawh a chanchin a lar hle kha.." Keichala'n a han ti chu DAniel-a chu a meng phawk nasa kher mai. "Engmaw? Kha kha keima thah maw?" a ti hu mai a, a mitthla ah chuan a rawn lang nghal tuar tuar mai.

"Aw ni e, chuvang chuan i rilru siam fel vat rawh. Duh thlan tur i nei lo, keichu thlarau ah bawk ka kir leh vat ang. Khawngaihin ka ngen a che, Daniel..phuba chu min laksak rawh." tiin Keichala chuan a ngen leh a, tichuan a ral riai riai mai. DAniel-a chuan a en vung vung a, "SAkei maw ka nih a?" a ti zawi sap mai.

*****************************

Zing dar 6 a ri a, Daniel-a chu a tho daih tawh. Exer la ngai mang hlei lo chu a phur thar tlat, a tlan thui tawh em em mai leh nghal. A infit zia te leh km 10 chuang chawl miah lova a tlan hnu pawh a, a hah mang miah lo te chu nuam a ti em em a. Kawngsir thingkung ah te chuan a han lawn chhin a, awlsam tak tak chuan a lawn thei zel mai.

A kut te chu a en a, keimi a ni tih a inhrethiam tawh chu a hlim kher mai. Tichuan sikul hlui pakhat bula tlang lamah chuan a han tlan chho va, tlang pawng bulah tak chuan a ding a. A han hawi kual a, tumah an awm lo tih a hriat chuan a kawr a phelh a, a kekawr pawh a phelh a. Boxer nen chauh chuan a awm a, tichuan a maimitchhing vang vang mai.

Chutah keimi ah a rawn chang thut a, tun t(r)um chu a rang tawh kher mai. Na pawh engmah a tuar tawh lo, a in en a, nuam a ti hliah hliah ringawt mai a ni. Tlang pangah chuan a han ding vang a, ring takin a hahum vak vak a. A let thla leh a, mihringah chuan a inti chang leh a. A nihna  a thunun thiam tawh bawk a, a nun chu a hlim kher mai.

Kekawr chu a ha tha leh mawlh mawlh a, a pian te chu a nalh sawt hian a hre hial mai. Kawr a hak hma chiah chuan thawm a hria a, lehlam a hawi nghal vat. Rosy i a lo ni, Dawngtea bialnu Rosy ngei kha. Kawr ruaka a lo awm tau mai a hmu chu mak a tih hmel em em a, DAniel-a chu a zak kher mai.

A kawr pawh chu hak mai nachang ala hre chuang lo, harh chhuak thut niawm tak hian Rosy chu a phu deuh zuk a. "Ih...min, min hrethiam la, Daniel-a i ni tiraw?" tiin a han zawt a. DAniel-a zak bawk si, hamhaih bawk si chu a lai kher mai. "E...ih, aw..a lum lutuk a, chuvang chuan ka kawr ka lo phelh a." tih pah chuan hak a han tum a.

Rosy chuan va pan hnaiin, "Aih, ha duh suh.." tiin a banah chuan a va vuan nghal ringawt. Daniel-a chu a zam leh nghal ringawt mai, "Nga..ngatimaw?" a han ti bah nuai a. "Tikhan i mawi alawm, enteh..Dawnga i hnek hrep kha ka lo hria a, an suspend phah che alaw?" a han ti vel hlawi hlawi a.

DAniel-a chu a khi suk a, "Nia, a pawi tak tak." tih ringawt chuan a chhang a. Rosy lah chuan a ban chul deuh pah hian, "A pawi lo, kan inthen tawh alawm. I pa ka ti tawp, tuma khawih ngam loh kha i han sawp nek mai ania. Diktak chuan maw, ka hne tawh lutuk a." a han ti kual vel a. Daniel-a chu a lai tulh tulh mai, "Aa..anih chu, ih..i walk..i walk ve tihna ami?" a han ti bah leh nuai a.

"Um a nih hi...ka hmu reng che a, tlang lam i pan chho kha. Inhmelhriat pah nan ka tia ka rawn zui chho che a, mahse i van thleng hma awm em em. I infit tih ka hre mai, e chuan ka rawn chhoh lampang khan engemaw ri hum hum a awmin ka hria..i hre ve em?" tiin Rosy chuan a han zawt leh a.

Daniel-a chu a zam nghal der, "Aa..eng..engmah a nilovang." a tih lai chuan a sir chu ava melh a, a thianpa Robert-a chuan a lo en reng mai. Daniel-a lah kawr a lo ha si lo, Rosy lah chuan a track jacket chu a lo ha tha mek bawk nen, Robert-a tan chuan rinhlelhawm tak a ni. Rang takin DAniel-a chuan Robert-a chu nuih tlawn pah hian a kawr a ha tha nghal sawk sawk a, "Ehe, thiana..i walk ve em ni?" tiin ava pan nghal.

Rosy chuan Robert-a chu a melh rum kher mai, "Aw nia, enge hetah in tih a?" tiin Robert-a chuan a lo zawt a. "Enge i lo tih ve zawk a?" tiin Rosy chuan a lo vin deuh hlur mai. "Englo ania, thawm mak deuh ka hria a, ka rawn chho va." inthlahrung tak chuan Robert-a chuan a chhang a. "Tlang ah hian han insawi zawi ka duh a, Rosy nen hian kan inthurual lo. Hehe, a lo chho ve mai mai. A lum ka tia, kawr ka phelh a nih kha." tiin Daniel-a chu a insawi fiah nghal zung zung mai.

Rosy chuan DAniel-a chu a han melh no vel a, "Anih ka kal phawt ange aw." tiin a han siai zeuh va, a kal ta a. Robert-a chuan lungawiloh hmel tak hian ,"Hmela, Melody nen in ni tan dawn chauh amaw tia, i cheat lehnghal der amaw?" tiin a vin deuh hrep mai. A aia vin hian Daniel-a chuan, "Ngawi mai teh, i ngaih ang ngawt kha a ni lo." a lo ti ve hlur bawk a.

"Anih enge awmzia? Kawr i ha lova, in indin hnaih em em lehnghal....enge awmzia?"

"Ka sawi ang kha animai, insawi zawi turin tlang hawmrah hian ka kal a, a lo chho ve a nih kha."

"I ti tak tak maw?"

"I thianpa hi min ring ta lo em ni?"

"Nilove bro, ka ring che alawm."

DAniel-a chuan rum deuh hian Robert-a chu a melh a, "Melody han hrilh vaih teh, i chak lo viau ang." a han ti khur khur a. Robert-a chu a nui suk a, "Ka hrilh lovang, taka...thawm ri mak deuh kha i hre ve em?" tiin a han zawt a. "Eng thawm mak deuh maw?" tiin DAniel-a chuan a lo zawt ve leh nghal a.

"Sakei rum ang deuh niin ka hria." tiin Robert-a chuan a chhang a. "Sakei rum i hre tawh ami?" tiin a lo zawt leh deuh kher a. "Aw film velah te pawh...i hre ve em min chhang tha mai mai teh." Robert-a chuan a han ti vin leh hlur a. "Ka hre lo...haha, keimah ka nih kha." tiin DAniel-a chu a han nui vur vur a.

"Huiham biak tlak loh lutuk, suspend mek i nih kha, zak rawh." tiin Robert-a chuan a lo fiam a. "Haw ang, tak takin bro, Melody hrilh suh aw.." Daniel-a chuan a han ti leh hram a. "Ka hrilh maithei a ni, i sual chuan.." tiin a thianpa lahin a lo fiam zui bawk. An titi dun bawrh bawrh a, an haw ve ta a.

********************************

Chhun dar 1 a ni a, Zeros-a chu mihring ah inti changin kawng sira waiting shed-ah chuan a thu a. Tumah midang thu ve an awm lo, a hnu deuhah chuan Silas, Magnus leh LAzarus te pawh mihring pangngai angin an rawn lang ve a, a bulah chuan an rawn thu a. "Ka hre tawh e, naute u..kha keimi kha tunge a nih ka hre tawh e." a rawn ti chhuak hlawl mai a, a nui var var mai.

Chuveleh pawr zet hian MAgnus-a chuan, "Tunge a nih? Khawiah nge a awm? Min hrilh rawh, Ka Lalpa..ka va kal anga, ka va that nghal a." a ti nghal pung pung mai. Mahse Zeros-a chuan a lu thingin, "Ani iva thah ringawt khan awmzia a nei lo, ka sawi tawh kha...Keichala thlarau chuan taksa thar a nei leh daih tawh, chuvang chuan a hma aia kan fimkhur angai." tiin a lo chhang a.

"Enge awmzia? Keichala chuan taksa thar a nei amaw?" MAgnus-a chuan a lo ti hu mai. "Keichala chuan kha rawlthar kha keimi ah a hmang ka tih kha, a thlang a ni. He kawrkilh hmang hian a keimi nihna saw laksak theih a ni lo, a chhan chu kawrkilh thiltihtheihna hmanga siam a nilo, saw kei mi saw Pu Vana thiltihtheihna hmanga siam a ni." tiin Zeros-a chuan a chhang leh a.

Silas-a chu rawn inrawlhin, "Ka Lalpa, i sawi awmzia chu Keichala chauh, a hmangtu chauh chuan keimi anihna saw a hlip thei i tihna em ni?" tiin a lo zawt ve a. "Aw ni e, he kawrkilh hi tunah min chuhpui mek a ni, Keichalah chuan tunah chuan puitu a nei hlauhawm khawp mai. Saw keimi saw, keimi ka hriat tawh ah chuan ala chak ber." tiin Zeros-a chuan a han chhang leh a.  

Anih chuan engti kawng mahin Keichala chuan keimi thar hi a thlah lul lovang, min bei ngei ngei dawn anih chu." tiin Lazarus chu a rawn tawng chhuak ve bawk a. Zeros-a chu a ding a, "Lungngai suh u...a hming chu Daniel Lalhriathlua a ni a, kum 20 lek a upa a ni. Chutah chu kan hmang tangkai ang, naupang mai chauh ala ni." a han ti charh charh a.

MAgnus-a chu a han thaw deuh hak a, "Kan lama tang turin kan thlem ang i tihna em ni?" a lo ti nghat chat a. Zeros-a pawh a nui sak, "Ni e, Magnus...i fing khawp mai. A duh lo ve khanglang anih chuan a chhungte leh thiante thah ah kan vau anga, a tul chuan kan that mai ang." a han ti leh a, an pali chuan an kal bo leh ta a.

Waiting shed hnungah chuan tu emaw hian an thusawi zawng zawng chu a lo ngai thla vek mai, an kal liam hnu chuan a rawn chhuak a. Chupa chu tudang nilovin serial killer, jail tang tlanchhuak, Dustin Malsawmzuala, SADIST tia an hriat ngei kha a ni. Lungkham neih loh hmel tak hian waiting shed ah chuan a thu a, a phone a phawrh a.

Number pakhat chu hmet chhuakin a call nghal a, a bialnu niawm tak a ni. "Hello BAWihte, news tha deuh ka nei ania." tiin a han nui nghal huah huah a. A ngawi leh vang vang a, "Englo..ihmaw, ramhuai pali titi ka ngaithla ru..haha, vampire an ni in ka hria. Awle, ka lo haw tep." tiin phone chu a dah a.

A ding hluai a, "Eng ang khawvel nge maw ni ngai le, kan khawvel hi zawng." tiin a faifuk rut rut a, a car nalh em em mai, Mizoramah pawh kan la hmuh ngai zen zen loh tur khawpa changkang lam chu a pan a. Chak takin a tlan ta a, Dustin-a hian khang vampire pali te kha mihring an nilo tih a hre nghal chat a, a hun hmasa lamah engemaw tak a lo experience tawh tih a hriat mai.

*****************************

Ni 2 vel a liam leh a, mahse Zeros-a leh a naute chu an rawn inlan tak ngailoh avang chuan DAniel-a pawh a thla a muang rih hle a, a thiltihtheihna neih thar chu a hlim pui em em ringawt mai a. A mood fuh thei lutuk leh a hlim thei em em mai chu a nu leh pa te pawh a chang chuan an ngaih a tha lo hial thin, chutiang bawkin Melody pawh.

Zan khat Melody te in lam atanga a haw chu ngaihthatlohna riau hi a nei a, scooty pawh a keng tawh ngai lo. Melody te in chu ke in a kal ngat tawh zel, a chhan pawh engmah hahna a nei tawh ngai lo hrim hrim a ni. Kawngsira a bula rawn kal ve chu a han melh leh zeuh zeuh va, a hmelhriat ngai pawh a ni chuang lo.

Mahse rinhlehna riau a nei a, a ngaih a ti tha lo takzet. Chupa chuan a zui ve zel a, a tawpah chuan DAneiel-a chuan a hre chhuak ta, street light an pel chiah chu chupa thla(shadow) chu a han en chiang a, mihring thla a ni hauh lo. Bak lian em em mai thla hi a lo ni reng mai, Zeros-a te zinga mi a nih a ring nghal.

Thawk leh khatah bang deng dawt khawp chuan Daniel-a chuan a reh chilh thut mai, chuveleh rang lutukin chupa hmel chu vampire ah a rawn inthlak nghal a. A rin ang ngeiin Zeros-a naute zing ami, Magnus-a a lo ni. "Min rawn zui ru amaw? Nang hi tunge i nih ka hria che. I thil duh pawh ka hria, Keichala thlarau a ni tiraw? Khawnge a  awm ka hre lo, thih i duh loh chuan tunah hian thlawk bo nghal rawh." tiin a vau khur khur mai.

Chutah Magnus-a chuan a awmah chuan a nam pawm a, Daniel-a pawh chu a leng lawp mai. Mahse lamlianah chuan a tum chat a, keimi ah a lo chang der tawh mai. Magnus-a pawh chuan a ha zum tak chu rawn ti chhuakin a han inlakpa khum ve a, keimi chuan  alo hlau lo nasa mai. An insual nghal bur bur a, lehlam khamah chuan an la tla dun zui.

A mawng tapah chuan an lumthla a, tuikhur lam an thleng hial a. Magnus-a chu chak viau mahse keimi a che rang zawk tlat, a khawih ve hman mang lo hrim hrim. Keimi chuan a ham hliam nual a, MAgnus-a taksa chu a keh nel nual tawh mai. Keimi insum zo lo chuan leiah chuan a rap bet a, thingkung vuak nan ten a hmang a.

A sawp hneh hle mai, a tawpah phei chuan a hrawkah seh sakin a lu chu a thuai chhum hmawk mai. MAgnus-a chu a thi ta, keimi chuan a that der mai. Chutah rang lutukin mihringah a chang nghal a, Daniel-a a ni leh ta. MAgnus-a ruang chu a en vang vang a, a lubung lah chu a la meng kuau mai.

Thisen pakhat mah a awm lo bawk a, Daniel-a chuan mak a ti kher mai. Chutia a that ta ringawt mai chu engtia han awm zel tur nge pawh a hre mai lo, a ruang chu a bul khamah chuan a paih ta ringawt a. Tichuan rang takin ramhnuai karah chuan a tlanchhia a, keimi ah inti chang leh nghalin chu ramhnuai pilril tak mai chu a chhuah san ta a.

***********************

REilote hnuah chuan Zeros-a leh a naute pahnih, Lazarus leh Silas te chu an rawn thleng ve ta. Kham mawngah chuan an t(r)um a, an unaupa ruang an hmu chu an thinrim hlawm kher mai. Silas chu a thingthu hnawk a, MAgnus-a ruang chu a en vawng vawng a. Thinrim tak hian, "Khawnge kha keimi kha..ka that dawn." a ti pung pung mai.

A tho thut a, kal a tum nghal ta mai. Zeros-a chuan  alo dang vat a, "Nilo...Silas, kal suh." a lo ti a. "Ka unaupa a that a, ka chhuah dawn lo reng reng. Ka that ve dawn, a rim pawh ka hre pha nghal. A chak lovang, ka nuai sawm vek ang." tiin a in hrosa nasa ngang mai. "Insum rawh, Silas....kan fimkhur angai a ni." Zeros-a chuan a lo ti leh a.

"A chak a ni, zep thu a awm lo. Keimi dang ang kha  ani lo, a chak a ni." LAzarus chuan a lo ti nuah nuah mai. "Pu Vana thiltihtheihna hmanga siam a ni a, kawrkilh hmang nilovin. Chuvang chuan keimi satliah a ni lo, mi bik a ni." Zeros-a chuan a lo ti ve leh a. "Anih chuan engtin nge kan tih dawn?" tiin Silasa chu a vin hlur tawh mai.

Zeros-a chu a ngawi vang vang a, "Tihdan dang ka hria alawm, lungngai reng reng suh u. Kan unaupa min laksak bawk a, chuvang chuan ani pawh a hmangaihte kan laksak ve ang. Phuba chu kan la ang, Magnus-a phuba hi kan la ngei ang tih ka tiam a che u. Keichala thlarau pawh kan zawng leh anga, kan man anga, hremhnunah kan thawn chho ngei bawk ang." a han ti vin deuh thak thak a.

Tichuan Zeros-a bawk chuan Pu Vana kawrkilh chu a la chhuak leh a, an unaupa thi ta, Magnus-a ruangah chuan a nam bet a. KAwrkilh chu a rawn eng leh vak a, MAgnus-a ruang chu a ral ta riai riai a, boruakah chuan a thamral ta a. An pathum chuan bak ah an intichang leh a, an thlawk bo leh ta a ni.

*********************

TO BE CONTINUE