KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-1

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-1

******************

(He thawnthu hi a tak behchhan emaw, thawnthu pangngai ang tura ziah a ni lova. Naupang atanga pitar putar thleng pawh a chhiar/ngaihthlak a him zawk nan a chhunga thu te pawh hi thenkhat tan chuan a hovin a awihawm loh viau maithei a ni.)

********************

Nu nau tap thawm a tam hle a, mei a alh hluah hluah bawk. Kum 1850 a ni a, khaw pakhat chu mihring mak tak tak mai, dum veka inchei leh vun dang var vek mai te chuan an rawn run thut mai. In a kang hluah hluah a, chung mimak ho chuan hnehna an chang ngei bawk. Chu khua a pasaltha tamtakte chu hmun tin maiah chuan an ruang a let pheng phung mai a, chu khuaa hmeichhia leh naupang la damte chu chung mimak ho chuan bawmah an khung hmiah hmiah mai.

Chutah chung mimak ho zinga an Lalpa ber, Zeros tia a hming invuah chu sakei niawm tak, mihring pian ang nise chu a lo sawisa mek a. Chu keimi chu  ahliam nasa tawh kher mai, leiah chuan Zeros chuan a rap bet a. "I hun a tawp tawh Keichal, i chak lo a ni." tiin a mitmeng sen rum mai chuan a en ran mai a.

Keichala chu zawi zawiin mihringah a rawn chang riai riai a, thei leh thei lo hian, "I...i chak..i chak ngai lovang." a la ti tawk tawk a. Chutah Zros-a naute pahnih chuan nu pakhat raipuar mek hi an rawn hruai phei a, an dim lo kher mai. Keichala'n a han hmuh veleh chuan, "Nilo...nu-i, khawngaihin...khawngaihin tina suh u." tiin a mangang kher mai.

Zeros-a chuan leiah chuan Keichala chu a rek bet leh nghal a, "I nupui hi a dam ila duh a nih chuan khawiah nge ka thil duh a awm? Min rawn pe var rawh, anih loh chuan ka that a nimai." tiin a vau khur khur mai. Keichala nupui chuan, "Nilo pa-a, pe suh. Pe reng reng suh, pe pawh nila min that dawn tho tho." tiin pe lo tur chuan a lo ngen ve bawk.

Keichala rilru chu a buai hle mai, "Min pe dawn em?" chiang fek fawk chuan Zeros chuan a han ti leh a. A nupui rai mek chu a ngaihtuah em avang chuan hreh tak chung chuan, "Ka nupui awrh lai saw a ni e." a ti zawi sap a. Keichala nupui th(r)i awrh lai chu an han en a, lunghlu niawm tak chu a lo tle vet vet mai.

Rang takin Zeros chuan a pawt thla nghal a, a en vang vang mai. A nui suk a, "Rin aiin ava te leh si ve..." tih nuah nuah pah chuan a awrh a. "I duh chu i hmu tawh a, ka nupui kha chhuah rawh." Keichalah chuan a han ti ve leh a. Zeros pawh chuan a nau te chu chhuah turin a ti a, keichala nupui pawh chu a pasal lam panin a tlan phei nghal.

Mahse a thlen dawn chuan Zeros chuan a lo pawt ding a, a kuah bet ta tlat mai. Keichala chu thawh a tum a, mahse Zeros-a nau te chuan an lo man bet a, leiah bawk chuan an rap bet leh ta. "I duh chu i hmuh tawh kha...ka nupui kha chhuah rawh, chhuah vat rawh." tiin a vin hrep mai a. Mahse Zeros-a chu a nui nasa ngei mai, "Keimah ngei pawh ka rin ring zo lo ania, nang hian min ring em ni?" tih pah chuan a nupui nghawngah chuan a seh sak ta vak mai.

Thisen a chik zawr zawr a, Zeros-a ha hriam takah chuan thisen a kai nuai mai. Chawp leh chilhin Keichala nupui chu a thi nghal, chutah Zeros chuan ala duh tawk mai lo. Nu leh naupang la dam awmchhun te pawh chu an dahna bawm chawp chuan a hal hlum leh ta vek mai, a khaw mi leh sate chutia a chan ta vek mai chu Keichala chu a rilru a na kher mai.

En pawh a en tha ngam lo, "Lalpa, min chhan rawh.." tia an au ri te chu atan chuan hriat a nuam lo takzet. Chutah thinrim tak hian Zeros-a chu a en a, "Phuba chu ka la rawn la khawp ang, ka tiam a che. Kei hi min that pawh ni la, phuba chu tu emaw tal chuan min la laksak khawp ang." tiin a la zam duh hauh lo.

Nui chung hian Zeros chuan, "I khua leh tui i chan tawh a, i chhungkua leh i mite zawng zawng ka that vek tawh bawk. Chuti chung chuan ti khan i la tawng ngam amaw? A tha e, i thi lovang. I thlarau chu a nung reng ang, mahse phuba la tur pawhin i che sawn thei tawh lovang." tih pah chuan a thi awrh lai chu a pawt thla a.

Keichala chu rek betin a awm zawnah chuan th(r)i chu a nem bet a, engemawni hi a chham ta vak vak mai. Chutak th(r)i chu nasa takin a rawn eng vak mai a, Keichala na ti chu a au vak vak a. A mitmeng a rawn pawl vek bawk. Zeros chu a tho va, Keichala erawh leiah chuan a la tal vak vak mai.

A rawn tho kang a, a taksa te chu a rawn lian tual tual a. Chutah a vun te chu lungah a rawn chang a, a lian telh telh a, a tawpah chuan Keichala chu ft 20 vel laia sang, milim rapawm tak maiah chuan a chang ta daih mai. Chu milim chhungah chuan Keichala thlarau chu a la awm a, a chhuak thei reng reng lo mai.

Milim chu Zeros chuan a han en vang vang a, "Tikhan i theih chuan phuba chu han la ta che, ka lo nghak reng dawn nia." tiin hmusit tak chuan a nuih vak vak a. Tichuan a hote nen chuan an ding khawm a, an puan dum sin lai chu zar pharhin an zap hluau hluau a, a huho chuan van chung sang takah an thlawk ta daih mai a ni.

*************************

(172 YEARS LATER)

Kum 20 leka upa, tlangval fel tak leh ruih theih thil pawh tilo. Hmaifang chhe vak lo leh a hmel en reng reng pawh a mi pawisawi lo tih hriat tak mai, Daniel Lalhriathlua pawh college lam panin a scooty neih chhun, Rodeo dum, tawng ve tak nen chuan a inkhalh phei ve hnak hnak a. College bul velah student ho lo awm khawm a hmuh chuan a hrilhhai kher mai, a scooty dah meuh chuan ava phei a.

Zirlaite chu an lo ding bial a, a then an lo au deuh dur dur mai. A va en chian nak chuan senior sual tak pahnih, Dawnga leh Peka te chuan a thianpa neihchhun, a kawm ve ber Robert-a chu an lo sawisak rawn chu niin. Chhan tumin a ke chu a han pen deuh uk a, mahse Dawnga leh Peka chu an senior a nih mai bakah an palian dun em em a, a hlau deuh bawk si.

"Min lo report vel amaw? Nang hian min lo hek vel amaw? Tawngthei lutuk mai, i pawr ve ngam khanglang leh nghal." tiin Dawnga chuan a chhir leh hrep mai a. A thianpa Robert-a na ti hmel chu Daniel-a chuan hmuh hrehawm a ti tak zet, "U Dawngte, enge awmzia? Khawngaihin duhtawk tawh rawh u..." inthlahrung tak leh hlau tak chung chuan a ti khur dar dar mai.

Student dang ho chuan an en thap mai, Dawnga leh Peka pawh chu an rawn hawi a. Dawnga chu inla pa tak chuan Daniel-a chu ava pan a, "Lo inrawlh reng reng suh ang che, i thianpa hi zirtirna kan han pe hlak ange." tiin a kalsan leh a. Robert-a lam chu ava pan leh a, "Enge buaina ni reng reng a? Enge inchungah a tihsual a?" tiin DAniel-a chuan a au zui a.

Dawnga chu a thinrim tawh kher mai, rum tak hian a melh a. A va pan phei leh a, "Lo ngawi hmak rawh...vawikhat pawh i tawng leh a nih chuan nangpawh hi ka sawisa ang che." a ti khur khur mai. Tichuan a let leh a, chhuatlaiah chuan Robert-a chu thutbetin, "Ka tihpalh tiraw...ngaihdam min dil rawh." tiin a vau ve leh a.

Mahse Robert-a chu a ngawi tlat, chhan pawh a chhang duh lo. DAniel-a ngaihdan a ni tawh bik lo, "Chhuah rawh u, enge in buaina chu ni a?" a ti vin ta thak mai. Boruak chu a reh nghal thiap mai a, Dawnga leh Peka te chu an inmelh a. An khi dun suk a, "Tunah khan min vin ve tihna em ni?" ngaihnep hmel tak chuan Dawnga chuan a han ti a.

Daniel-a chu a inchhir leh angreng khawp mai, "Ihh..ih..a tihpalh ve a nih kha, ngaidam ve mai ula." a han ti bah deuh nuai a. "Hmela leh, ka sawi kha i hre tawh lo vem ni? Vawikhat pawh i rawn tawng leh anih chuan ka sawisa ang che ka tih kha." tiin Dawnga chuan ava pan phei a. Mahse DAniel-a chuan a chhang tawh lo, chutah chiang zet hian a bek chu a ri chawrh mai.

A hawi sawk a, "I pawr ve khanglang ami?" tih pah chuan Dawnga chuan a biang dinglamah chuan a hnek leh siah mai. Daniel-a pawh a thal thuai mai a, chuveleh Robert-a chu rawn thovin Daniel-a bulah chuan a va thingthi a, "Nilo U Dawngte, hnek tawh suh u. Ka tihpalh, ka tihpalh takzet...ka ti leh tawh ngai lovang, min ngaidam ru." a rawn ti ta nge nge a.

Mahse Dawnga chuan hnek leh ala tum a, ava pan leh a. A thianpa Peka chuan lo dangin, "Duhtawk tawh rawh, khaa...ngaihdam min dil tawh kha." a lo ti hlauh mai. Chutah an zinga tuai pakhat chuan, "SU ho an lo kal ania...Sir Tetea pawh a tel." a rawn ti deuh chiam chiam a. Chutah an college SU Leader leh a thiante chu rawn kalin, "Enge thil thleng awm a?" tiin an Sir Tetea chuan a rawn zawt hlawm a.

Daniel-a rawn ding tuah tuah lai chu SU Leader Muanawma chuan a va en a, "Daniel, enge awmzia? In insual em ni?" a han ti a. Mahse DAniel-a chuan a chhang lo, "Buaina i siam leh tawh em ni a, Dawnga?" tiin Dawnga chu a han zawt ve leh a. Vin zet hian, "Siam lo, siam lo. Lo siam pawh ni ila, min hau turin tunge i nih a?" a lo ti hrep mai.

Muanawma lah lo thinrim ve bawk, "Enga? SU Leader ka nihna ang hian ka hau thei che i hria em?" tih pah chuan a va pan ta mai. Dawnga pawh a lo pawr nasa mai, "Lo kal la, ka han hnek ve nghal law law teh ang che." tiin a pan phei ve bawk. Mahse an Sir Tetea leh midangte chuan an lo dang vat a.

"In va zak lo ve, faculty hetah ka awm ve reng a. Ka mithmuh ah insual inla tum amaw? Dawnga, buaina hi tu tan chhuah nge? Sawi rawh...sawi vat rawh." tiin Sir Tetea chu a thinrim ngang mai. DAwnga chuan ngeng tak leh ngeiawm zet hian, "Campus chhunga zu pai lutah min puh ve khanglang a, zirtirna ka han pe deuh hlak a nih kha." tih pah chuan a thiante chu a hui khawm a, an kal daih mai.

Sir Tetea pawh chuan tihngaihna a hre bik lo, a en zui vawng vawng ringawt. Daniel-a te thiandun erawh an la ding reng a, "Engthil nge thleng a, Robert? Kha nangpawh...i va duk nasa thleh thluah ve?" tiin Sir Tetea bawk chuan a han zawt ve leh a. Inthlahrung tak hian Robert-a chuan, "Englo ania, Sir. Nimin khan ka bag ah zu an lo dah a, principal hnenah ka insawi fiah nghal a. Chu chu an hria a, tukin khan gate bulah min lo chang a, min sawisak rawn a nih kha." tiin a lo chhang a.

"An mahni dah ngei a ni tih engtin nge i hriat?" tiin SU Leader Muanawma chuan a lo zawt ve bawk a. "Class awl laiin an in a, chu chu ka hnung chiah ah an thu bawk sia. Sir Williama class lak laiin Sir khan a rim a hria a. Kan bag theuh a check a, ka bag ah an rawn dah a. An dah lai chu ka hmu lo, mahse kan thutna hnung rawn ri rawk rawk kha chu ka hria. Ka hnung chiahah hian ka bag ka dah tawp a, anmahni rawn thun bak a ni lovang." tiin a lo chhang leh a.

Sir TEtea chu a han thaw hak a, "Aw...engpawh nise, class in rawn luh hma in office ah damdawi rawn hnawih ang che u, kha in pem nasa si. Dawnga te chungchang pawh chu kan lo ngaihtuah dawnnia, hei class tan a hun dawn, lo lut vat ang che u." tiin Muanawma nen chuan an kalsan ta a.

"Ngati nge min rawn chhan i tum ve reng reng a, ngawi reng khan awmla chu i tuar ve lo nimai tur." Robert-a chuan a han ti nuah nuah a. "I na tuar lai ka lo en reng ringawt ten a dik nang...ka thianpa neihchhun an lo sawisa mek che sia." tiin Daniel-a chu a khi suk a. "U Dawngtea hi chu a buaithlak khawp mai, Principal fapa a nih avang hian tupawh hi a thuhnuaia dah hi a tum a." tiin Robert-a chu a lungawiloh hmel kher mai.

"Sir Tetea pawh khan tih ngaihna  ahriat miah loh kha, U Muanawma pawh kha  atawng ve vak ringawt a, an sawisak rawn maithei a ni."

"Principal bulah insawifiah turin min tia, keilahin a fapate thianho thil tih a nih thu ka lo sawi hmiah mai a. A hau a ni chek ang chu, keimah ah a tuan leh daih a..college danga luh mai ania ka duh ni."

"A ho lutuk...an chhuak tep tawh alawm."

"An pass ve zel mai chu a ni sia, subject ba pawh a nei ve ngai miah lo hi chu a awihawmloh lulai deuh chu a ni."

"Engpawh nise lut ang hmiang, khitah khian ka scooty a awm a, ka rawn khalh thla ang."

Daniel-a chuan a scooty chu a rawn khalh thla a, ground ah chuan park tha in Robert-a nen chuan class ah an inzui lut ta a ni. Dawngtea hi a hmingpum chu Laldawngkima a ni a, BA final year zirlai a ni. Princilpal Pu Saidinga fapa niin an hausa em em a, student tamtak pawhin an tlawn hlawm reng bawk a ni.

****************************

Ban hun a lo ni a, Daniel-a te thiandun pawh an rawn inzui chhuak ve hnak hnak a. "Ka rualin i lo haw dawn lo maw?" tiin Daniel-a chuan a han zawt a. Nuih suk pah hian Robert-a chuan, "I scooty hian kawng chhovah min zo mang tawh lo ania, lo haw lo mai ang." tiin a lo chhang a. "Bus bawkin em ni i haw dawn?" tiin Daniel-a chuan a han zawt leh a.

"Aw...kan in a hnai thova, bus in ka haw mai ange." tiin a lo chhang leh a. Tichuan an thiandun chuan an inthlah liam ta a, Daniel-a pawh a scooty neihchhun tawng tak nen chuan inlam panin a inkhalh phei ta a. Mahse rei pawh a tlan hma chuan collenge peng, in tlem deuhna laiah chuan Dawnga leh PEka leh an thianpa pakhat, Isaka te an lo ding tlat mai.

Daniel-a chuan engah mah ngai lo luiin tlan tlang mai a han tum a, mahse a hma zawnah tak chuan Dawnga chu a rawn ding leh chat mai. Daniel-a pawh chu a ding ringawt a, "Enge in duh a?" tiin a han zawt a. Dawnga chuan ring zet hian, "Nangmah vangin tukinah ka pa bulah complain a luh lehnghal kha i hria em, Zawnga?" tih pah chuan scooty hma chu a han kick deuh kher a.

"Chu chu enge ka thiam loh a nihna?" Daniel-a chuan a han ti leh a. "I thiam loh a ni nge nilo maw? I hre duh em ni?" tih pah chuan scooty atang chuan a phih chhuak lawp a, scooty pawh a thal tawp mai. KAwngsir hnimah chuan a theh thal tawp mai a, Daniel-a chu a rawn tho lehnghal.

Mahse DAwnga chuan a rawn hnek thal leh tawp mai, "Tikhan tu thiamloh nge i hre tawh em? Thiamlohna nei lola ka khawih lovang che, zanin atangin min grounded dawn tih i hria em, nangma lo report vang vek a nih kha. I thianpa Robert-a lahin min puh tawh bawk, tunah nang i lo lang leh a. In thiandun hian in hnawk khawp mai, ka sawisa hlum law law dawn che amawni chu le." tiin a vau leh khur khur mai.

Peka pawh chuan Daniel-a tlu mek chu a samah chuan a tham tho va, "Dawnga hi vawikhat mah lo tibuai tawh suh ang che, i hria maw?" tih pah chuan a khup chuan Daniel-a dulah chuan a do siah siah mai. DAneil-a na ti chu grass ah chuan a vial ngawih ngawih mai a, "Duhtawk tawh ru..i kal tawh ang u." tiin an thianpa pakhat, Isaka chuan a rawn ti a.

"Nia..tun tum chu duhtawk phawt mai teh ang." Peka pawh chuan a lo ti ve bawk. An kal pah chuan Dawnga chuan scooty tlu mek chu a han tlawh leh hram a, "Ka sawi kha aw...Zawnga, vawikhat pawh ka pawi sawi leh teh...i na tawh viau ang." tiin a vau zui leh hram a, an kalsan ta hram a.

DAniel-a chuan na a ti kher mai, a taksa na ai mah chuan a rilru chu a na takzet zawk. A mittui a tla hial a, "Engmah thiamlohna ka nei lo, engemaw min huat em em ringawt le?" tia phun nuah nuah chung chuan a tho taih taih a. A scooty lam a va pan chuan hmeichhe pakhat hian a scooty chu a lo tundin sak mek a, DAniel-a chuan mak a ti kher mai.

A va kal hnai a, chu hmeichhia chu an college ami tho, chhe lem lo tak, mahse nu lem lo tak nibawk, Melody a lo ni. Melody hi patil chu nilo mahse hmeichhe nu tak chu a ni lem lo tih a incheina atang pawhin a hriat hle a, a sam a boys cut bawk. A pian erawh a inkhai thli nalh fu a, mahse kekawr tlawn lo chu a ha ngai lo.

Pawnfen a feng ngai lova, T-shirt ah pawh mipa T-shirt niawm tak tak hlir a ha thin a, mi a kawm khat hle bawk. A class mate te leh student dangte pawhin an kawm ngai lo, a chhan chu amah Melody hi mahnia awm nuam timi niin mi introvert tak a ni. Dawnga pawh hian a lo bem tawh a ni awm a, a beidawng thak a ni awm e.

A scooty chu va dawm pahin, "Ka lawm e.." Daniel-a chuan a ti zawi sap a, mahse MElody chuan a chhang lo. Kal leh mai a tum chu Daniel-a chuan, "Melody tiraw i nih kha?" tiin a au ding leh a, Melody pawh chu a ding ve mai bawk. A rawn hawi let a, a lu a bu nghauh ringawt. "Ihh..ka lo thlah dawn che em ni?" a han ti leh a.

Mahse Melody chuan a lu a thing a, "Saw lai lawk saw kan in ania, ka lawm tho ve.” tiin a chhang leh a. Daniel-a pawh chuan a be zui tawh lem lo, a kal liam thleng chuan a en zui vung vung ringawt. A hliam te chu a han en chiang a, a mit a lo duk chur mai. A scooty chu tinungin a tlan a, inah chuan a haw ve ta hram a.

**************************

Tlai dar 4:30 a rik meuh chuan Daniel-a pa, Pu Malawma chu a rawn haw ve ta a. "Ehe Mama pa, i lo van haw hma ve rinaain?" Daniela nu, Pi Zualtei chuan a lo ti a. A bag te chu a lakthlak sak a, "Bawiha a lo haw tawh em?" tiin Pu Malawma chuan a zawt nghal a. "Dar 3:30 vel khan a rawn haw daih tawh, room ah a awm." tiin an nu chuan a lo chhang a.

Pu Malawma chu a fapa room ah chuan a va lut a, Daniel-a chuan a computer tawng ve tawh tak, ben nun chawp ngai ang chi chu a lo khawih ve mual mual a. Chutia mahni room lum a computer khawih mai mai ina jumper lukhum nei a ha tlat mai leh lukhum a khum tlat mai chu Pu Malawma chuan mak a ti angreng hle a, ava pan hnai a.

"Bawiha, lum i ti ve lo em ni? Tinge kawrlum i hak deuh tut a, i damlo em ni?" tih pah chuan a sirah chuan a va ding a. Chuveleh Daniel-a chu a lo kun nghal a, "Ka..ka hritlang deuh alawm mawle, pa." a ti bah nuai mai. A hmai a thukru deuh tih chu apa chuan a hai mawlh lo, "Khawimaw, han dak teh." a ti nghal a.

Daniel-a chuan hlauh hmel tak hian, "A ho lutuk, Pa..engmah a ni lo." a han ti khur dar dar a. Mahse apa chuan chiang fek fawk hian, "Dak teh ka tih chu.." a han ti vin deuh that a. Daniel-a pawh chuan a lukhum chu ti thla in a dak chho ta a, a hmai duk kulh mai, hnekna tih hriat tak mai chu a pa chuan a hmu chiang ta.

A thaw deuh hak a, "Tunge?" a han ti leh a. "PA..englo, insualnaah ka tel miah lo ania. Tumah ka sual ve lo..ka thianpa.." a tih lai chuan apa chuan lo pawt chat lehin, "Ka hria alawm, insualnaah i tel ve dawn lo tihte chu ka hria alawm, tuin nge hnek che?" tiin a han zawt leh a. Daniel-a chu a ngawi vang vang a, "Kan Principal fapa, U DAwngtea'n." a ti zawi sap mai.

Pu Malawma chuan a lu a han bu nghat nghat a, khum lamah chuan ava phei a. "Bawiha, ka bulah hian lo thu teh." tiin a ko va. Daniel-a pawh chu thuawih tak chuan a va phei ve a, apa bulah chuan a thu ve a. Apa chuan a darah a han beng thak thak a, "A chhan min hrilh ka ngai lo, i thiamloh a nilo tih hi ka chiang alawm." a han ti dam dap a.

"Principal fapa te a ni bawk sia, kan zirtirtu pakhat, Sir Tetea pawn a hmu vek. Mahse engtin mah a ti ngam lo, pahnih lai annia, ka khawihlet ve duh lo mai mai." tiin Daniel-a chu a phun ve nasa kher mai. "Khawilet ve rawh ka ti hleinem, anni aiin i chak fe a ni tih hre rawh." tiin a awmah chuan a kut chu a dah a, "Hei hi..hei hi a chak fe zawk." tiin room atang chuan a chhuahsan a.

Daniel-a hi fapa mal niin a nu leh pa nen an pathum chauh chuan an cheng a, khawsak harsa em em ni silo, nghei chuang silo ang chi, chhungkaw pangngai ve tak an ni tihna a nih chu. Apa, Pu Malawma hian Sawrkar hna chhete a nei ve a, a hlawh hmang chuan an nung ve tawk tawk a ni. An chhungkua hian an inlungrual tlang bawk a, thenkhat tan chuan chhungkaw awhawm tak chu an ni ve mahna.

An fapa neihchhun a nih ang bawkin Daniel-a hi an duat em em a, mi fate neih ang a nei ve lovang tih hlauvin a tette atangin an enkawl tha em em a. Ama DAniel-a hi apa a chhun ve hrim hrim nge, thutha a dawn hnem vang zawk, mifel tak a ni ve hrim hrim. Ruihtheih thil engmah a ti ngai lova, zuk leh hmuam lah a ti hek lo.

Pu Malawma room atanga a lo chhuak chu, "Enge a lo tih a? A rawn haw tirh atang khan roomah a lut tlang nghal daih a, a lo la chhuak miah lova. KA buai em avangin ka be ta miah lova, a damlo em ni?" tiin rawngbawl pah chuan Pi Zualtei chuan a lo zawt nghal a. Pu Malawma chuan thudik chu a han hrilh a, Pi Zualtei chu a sa kher mai.

"Keichu ka ngaihdan a ni tawh lo, ka ngawi mai mai tawh dawn lo. Hmanni lawkah pawh a bag an lo zai chah sak tawh a, a zep hram hram zawk a. An principal chu ka phone dawn, ngaihdam rawn dil rawh se a fapa chuan.." a ti nghal khur khur mai. Mahse an pa chuan lo dangin, "Khai khai, a mak thin emai. Mi hausa an nia, keini tan tih theih vak a awm lo. Ngawihsan mai mai rawh, an chhuak tep tawh alawm. Keiman ka lo bia ang, Pu Saidinga chu." tiin a hnem hram hram a.

"Principal fapa nih avanga duh duh a chet mai, police hnenah ka report nghal loh." tiin Pi Zualtei chu ala phun nasa mai a, room ah chuan a lut tau nghal a. Pu Malawma hi Pathian mi lutuk mai a ni a, a fapa DAniel-a fel em em nachhan pawh hi a enkawl that em vang a nih hmel hle bawk. DAniel-a hi History subject la a ni a, lehkha a thiam theiin history lam chu engthil pawh nise a hre thukin a hre ril hle a ni.

**************************

A tukah chuan Daniel-a chu a scooty tawng tak nen chuan a inkhalh leh hnak hnak a, college gate a thlen hma hret chuan ke-a lo kal mek, Melody chu ava hmu a. A zawn a thlen chuan dingin, "I lo chuang duh em?" tiin polite tak chuan a han sawm a. Melody chuan nui sang chung hian, "Duh love, saw ka thleng tep tawh tho alawm." tiin a lo chhang a.

"Lo chuang rawh, ka ding ve laklawh tawh." tiin Daniel-a chuan a sawm leh a. Melody chu a nui sak a, "Um..i tih tlat chuan le." tiin a chuang ta nge nge a. Reiloteah college gate chu an thleng a, "Kum khat dawn chu kan kal tawh a, kan class a in ang bawk a, thian i kawm ngai awm pawh ka hre lo." tiin class room lam pan pah chuan Daniel-a chuan a han ti a.

Za lo deuh a khik suh pah chuan, "Nia...mahnia awm nuam timi ka nia..tumah hi ka be ngai lo, ka zakzum lutuk a." tiin Melody chuan a lo chhang a. Daniel-a pawh chuan nui sang chung hian, "Keipawh thian ka nei hleinem, Robert-a hi a nimai." a han ti ve leh a. "Ila vannei a nih chu, keichuan tumah ka nei hleinem." Melody chuan a lo ti ve leh a.

Daniel-a chu a ding thut a, Melody pawh chu a ding ve nghal. DAniel-a chuan Melody mitah tak chuan enin, "Thian kan ni tawh alawm tiraw, hei.." tiin a han nuih a. Melody chu a hrilhhai angreng kher mai, "Nia..hehe." tiin a lai kher mai. An inchibai a, chu chu ral khat atang chuan DAwngate thianho chuan an lo hmu kar mai.

"Thla khat chuang ka bem hnuah pawh ka bem hlawhtling thei lo kha ania, saw sanep nen sawn enge an tih a? An va innel hel deuh ve, khanglang chuan.." tiin Dawnga chu a phun nuah nuah mai. Nui chung hian Peka chuan, "An inngaizawng lovang, lungngai suh. NAngte chuan Rosy i neih kha, a hmelthat em kha." a lo ti a.

Isaka pawh chuan, "Melody te chu tomboy alawm, mipa ngatan mah a ti lo." a lo ti ve bawk. "Anih chuan enge an tih saw...saw, an indin hnaih em saw..engemaw tak chu a awm hrim hrim." tiin Dawnga chu a vin hlur mai. Chutih lai chuan a bialnu Rosy chu a lo kal a, "Laldawnglian, ka zawn nasat zia che hi i hria em?" a rawn ti chiam chiam a.

Rosy ho hmeichhe sang tha tak, ft 5'8 laia sang, pian thiam tak leh ngo sen suah mai hi a ni a. Dawnga hi Principal fapa a ni tih leh hmeichhia ah a chak lo tih a hriat kiau avanga ngaizawng a ni an ti, a mizia en atang chuan thudik a nih hmel khawp mai. "Class ah lut ang u...mi tihbuai tur zawng reng suh." tiin Dawnga chu a kai dawr dawr a, a thuhnuaiah chuan a dah ve chiang a ni.

Class ah chuan an chho va, mahse Dawnga chuan a thla a thla chuang a lo bem hlawhtlin theihloh, a mi hmuhsit leh ngaihnep em em mai nena an lo ding dun leh innel hmel taka an lo inbia a hmuh chuan a tlawmngaiin a thinrim hle mai a, a en zui vawng vawng mai. Daniel-a leh Melody pawh chu class ah chuan an inzui chho va, class chu an la a.

**********************

Chhun chawlh hma period ah chuan Sir Tetea chu a rawn lut a, Thailand ah summer internship neih a ngaih thu a rawn sawi a. Student te chu nuam an tiin an phur ngei mai, mahse phur ve teh chiam lo pathum an awm, chu chu Daniel-a, Robert-a leh Melody te an ni. Third Semester an ni tawh a, internship atan an zin a ngai a, report an ziah a ngai dawn tihna a ni.

DAniel-a, Robert-a leh Melody te chuan an huphurh chhan ber chu sum tam tham tak an ken a ngai dawn tih an hriat vang a ni pakhat a, mi khawsa thei tak an ni lem lo vek bawk nen. Chubakah an pathum hian mi introvert lutuk tak mai vek an ni bawk si, an hmel chu a tum deuh bar hlawm mai.

Daniel-a erawh chuan a zirna thil a nih vang leh Historical thil a ngaihhlut em avang chuan kal chu a chak takzet, Thailand rama kal te pawh chu chak lo a ni bik lo. Mahse anu leh pate hlata a awm tur ringawt pawh chuan a hnuk a ti ulh nghal titih der a, thla 3 chhung lai an cham dawn lehnghal.

"Chhungkaw harsatna avanga kal ve thei lo tur in awm em?" tia Sir Tetea'n a han zawt chiah mai chu an pathum chuan ban an phar rual nghal vek a. Sir Tetea chuan an thutna lam chu va pan hnaiin, "In pathum khan naktukah in nu leh pate rawn hruai ula, kan lo titi pui hlawm ange." tiin a hrilh a, class chu a chhuahsan ta a.

Lunch Break a nih chhunzawm nghal bawk, lunch an ei zawh hnu chuan ground bul thutthleng ah chuan an pathum chuan an thu a. An inkawm ngeih nghal hlawm hle a, an rilru lah a inmil hlawm bawk. Thailand-a zin an hreh thute chu an sawi liam liam hlawm a, "Ngawi lawk teh u." Robert-a chuan a rawn ti chhuak hlawl mai.

"Teh thut a? Enge a?" tiin Daniel-a chuan  alo zawt vat a. "KA pum a nuam lo, ka inthiar dawn." tih pah chuan a kal daih mai, DAniel-a leh Melody chu an in en a, an nui ringawt. An titi chhunzawm leh a, "Coffee i in duh em, ka va la ang aw.." tiin DAniel-a chu a tho vut a. "Duh tho e, canteen ah law law va in ila." tiin Melody chuan a lo chhang a.

"Angai lo, hetah hian thutdun pahin in zawk ang. Ka va la ang, ka lo treat ang che, coffee ah na na na chuan pawisa ka nei ve alawm." tiin DAniel-a chu a han fiamthu zauh va, coffee la tur chuan a va kal ta a. Canteen ah chuan lutin coffee chu a order a, a kut lehlam lehlamah kengin grond lam chu ava pan leh a.

Mahse canteen pawn ah chuan Dawnga te thian ho chu an lo ding thap mai, kal pelh mai a han tum a. Mahse a kalna turah chuan an lo awm zel mai a, "Tu ta tur nge pakhat kha...i bialnu thar Melody em ni?" Dawnga chuan a han ti deuh kher a. Daniel-a chuan melh pawh a melh ngam lo, "Khawngaihin ka kal duh..min kal tir rawh u." a ti zawi sap a.

"Ka zawhna kha chhang phawt rawh." tiin Dawnga chuan kal a la phal tlat lo. Kal luih a tum a, "Min chhang dawn nge ka hnek leh dawn che?" tiin a lo vau leh a. "Ka bialnu a ni lo." tih pah chuan a kal tlang lui a, DAwnga chu a thinrim kher mai. A coffe kenlai thlauh baw vek khawp chuan hnung lam a tang chuan a tlawh pawp a, Daniel-a chu a bawk thlawp mai.

Sudent dang ho pawh chu rawn kal khawmin an rawn en leh ta sup sup mai a, Daniel-a kawr ah chuan coffe chu bua in a huh vek mai. Thinrim tak chuan a tho kang a, "Mi chak tak i ni, anni aiin i chak fe tih hre rawh." tia apa hrilh chu a bengah chuan a ri nawn mawlh mawlh mai. A kut a hum ruh a, rum zet chuan Dawnga chu a melh let ve ta ran mai.

**************************

TO BE CONTINUE