KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-4

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-4

*******************

A tuk zing atang chuan college student ho pawh Thailand lam pan tur chuan an chhuak ta hlawm a, ni khat leh darkar 10 vel transportation hrang hranga an chuan kual hnu chuan Rayoung Mai khawpui, Zeros-a awm mekna hmun ngei mai chu an thleng ta. Prachinburi venga resort pakaht, tlawm teah chuan an thleng khawm ta a.

An chau deuh bawk aniang, a then chu an muhil nghal. Daniel-a pawh chu a zawi hle a, a taksa pawh a chau ve takzet. A rilru ah chuan Melody chu ala awm reng tho va, a hma zan lawka a rawn kiss zeuh te chu a mithla ah chuan a lang nawn sek mai. Melody chu thian ang chauh nilovin, a duh hian a duh hliah hliah a ni tih chu a pawm thlap tawh.

Sir Tetea, incharge ber pawh chu a chauh deuh avang chuan han chhuah khawm nghal mai chu a peih chiah bik lo. "Hahchawl phawt ila, keipawh ka chau emai. Hei tunah zan dar 7 a ri der tawh a, tlai chaw erawh hotelah kan ei tawh kha. Chuvang chuan chhuah vah a hun tawh lo, mut vat in tum dawnnia." tiin a zirlaite chu a hrilh a.

A tam zawk chu an an room theuh panin an mu nghal a, an hnar nghal bawrh bawrh hlawm mai. Hmeichhia leh mipate chu a hrangin an riak a, room zau deuhvah panga te an awm ho va, room zim deuhah pahnihte an awm thung. Daniel-a pawh room zim zawk ah chuan awmin a roomate chu Thartea a ni a, tawng tam lem lo ve tho a ni.

Zan dar 10 thleng pawh chuan Daniel-a chuan MElody rawn call hun chu a nghak tang tang a, mahse ani erawh chu a reh hmak mai si. A message lah a seen thei der mai si lo, a ngaih chu a tha lo rum rum hial a. Thartea pawh chu a la meng a, chip ei pah chuan laptop ah thailand news vel chu a lo en a.

Roommate ta na na na chu an inbe ve lo thei lo, "Englam nge i en a?" tiin DAniel-a chuan a han zawt a. "Hei thailand breaking news ka en vel mek a, ni 5 vel kal ta atang khan Rayong Mai khaw mipuite hi an bo zeuh zeuh an tia." tiin Thartea chuan a lo chhang a. Daniel-a pawh chuan a phone chu a dah a, laptop chu a han en ve a.

"Engtia bo nge? Kidnap lam em ni?" tiin a han zawt leh a. Thartea chuan a lu thingin, "Nilo..an rinhlelh chu thisen dawt thin ramhuai an tia, mahse ka awih chiah lo." a lo ti leh a. Daniel-a pawh chu a nui huk a, "Thisen dawt thin a? Dracula ang hi maw?" a han ti ve leh a. "Kan chhiar tha zel phawt." tiin Thartea chuan a han chhiar thla zel a.

"Kum 18 mi, Achara Nong chuan a mit ngeiin a hmuh thu a sawi a, a thla la in social media ah a post a, ngaihven a ni hle bawk..." tiin a han chhiar thla leh zel a, thlalak chu an han en a. Awih loh hmel tak hian Daniel-a chu a ner suk a, "Bak thlalak mai mai a nih khi...an khaw mipui bote hmang hian sum hai luh a lo tum a nih ka ring." tiin a nui huah huah a.

"Nia keipawh ka awih kher lo, mahse ruang hmu tur pawh a awm lo an ti bawk sia." Thartea chuan a lo ti ve leh a. An ngawi dun vang vang a, chutah Thartea chu a rawn nui huk mai. "Enge a?" Daniel-a chuan a lo ti hu a. "He nula chu ava over e, a hming pawh a phuah a nih hi." tiin a lo chhang a.

Daniel-a chuan a han chhiar ve leh a, "MOON MONSTER...ava local tak..pa deuh te pawh phuah tal tur ania." tiin a han fiamthu chhunzawm veleh nghal a. REilote an titi leh hnu chuan dar 11 a lo ri dawn reng mai, "Ehe, hei 11 a ni mai dawn. Naktukah dar 7 ah chhuah tur a ni sia, mut kan kham lo palh ang. Keichu ka mu dawn ania, i duh hun hunah rawn mu ve tawp mai rawh." tiin Thartea chuan a mut san ta a.

Daniel-a erawh ala muhil thei mai lo, Melody phone call chu ala nghak reng. A beidawn tep hnuah chuan a phone chu a rawn ri ta nge nge a, Melody a lo ni ngei bawk. Rang takin a la vat a, "Hello Melody, i va buai awm em em ve...enge i tih a?" tiin a zawt nghal a. Zawite hian, "In thleng tluang maw?" a rawn ti sap mai.

"Aw tluang a nimai, i phone call ka lo nghak char char a." a lo ti leh a. Tah aw tuau hian Melody chuan, "Um nia, ka buai em a ni." a rawn ti chu Daniel-a ngaih a tha lo kher mai. "I tap em ni? Melody...i tap ami?" tiin a zawt leh nghal a. MElody chu zawi te hian a tap ri kerh kerh a, "Ka nu...ka nu a thi tep a, ICU ah kan dah lut nghal a. A mar an hmu lo va, a natna hi a zual tulh tulh mai." tiin a rawn a inhnit feih feih mai.

Daniel-a chuan a khawngaih kher mai, "Ava zialo ve aw..tunah enge a an?" tiin a lo zawt ve leh vat a. "Tunah chuan a zia tawh, mahse biak theih a ni chuang lo. Ihmaw, ka nu hian brain tumor a nei a. Stage sang ber a ni tawh a, a dam chhuah pawh ka ring tawh lo." beidawn hmel tak hian Melody chuan a rawn ti leh a.

"Ngati nge min hrilh loh, damlo satliah ang khan i sawi sia."

"Nia, sawi a nuam lo em a, ka sawi lo mai mai a nih kha."

"A tha leh mai ang, Pathian in a ti dam leh mai dawn alawm."

"Ka ring tawh lo, Pathian hian min laksak ka hlau takzet a ni."

Chutin sawi mah ta che, a damchhuak leh dawn alawm."

A thiam ang tawk chuan DAniel-a chuan a hnem a, a kal dawn zana an inkiss thu vel te chu sawipui a chak teh lul nen, a hun loh em avang chuan a sawi ta lova. DArkar khat dawn lai an inbiak leh hnu chuan an duhtawk ve ta a, Daniel-a chu a rilru a nuam lo kher mai. A men leh hrep phah nghe nghe, dar 2 a rik meuh chuan a muhil ve ta hram a.

***********************

A tuk zingah chuan dar 7 ah chuan an chhuak ta hlawm a, hmun hrang hrang an tlawh hnuah Museum lian ve tak pakhat, Erauan Museum ah chuan an lut leh ta a. Guide pakhat, english thiam chuan a guide zel a. Buddhist lim tak tak a intlar phei thleh thluah mai a, thil hlui hlut hmel tak tak pawh a tam hle bawk.

Chung an item neih te chu guide chuan a sawifiah zel a, a tobul te chu a hrilh bawk a. Daniel-a pawh chu a tang hle mai, a note book leh pen nen a lo ziak thla zat zat a. An en zel hnu chuan milim lian ve tak pakhat bulah chuan guide chuan a hruai phei leh a, chu lim chu a lianin a mawi kher mai.

Guide chuan sawifiah leh in, "HE lim hi hmanlaii Thai thawnthu a genie pakhat, Bodosa lim a ni. Bodosa hi genie sual tak mai a ni a, kum nuai tel tehmeuh magic khawnvar chhunga a tan hnuah RAyong Mai tlangval pakhatin khawnvar chu a chhar hlauh mai a, tichuan Bodosa hi a chhuah zalen ta a ni. Tichuan chu genie chuan a duh chu a zawt a, chu tlangval chuan hausakna a dil ta a. A hausa ngei bawk, mahse a hnuah chuan chu genie vek chuan bumin a that leh ta a ni." tiin guide chuan english-in a han hrilh leh hlawm a.

Thartea chu rawn tawng chhuakin, "Alladin thawnthu a genie ang deuh kha em ni?" tiin a lo zawt a. Guide chu nui sakin, "Aw ni e, mahse Bodosa genie ang hi chu ramdangah pawh an awm nual a, sawi tak ang khan hmanlai thawnthu a mi a ni a, a dik nge dik lo pawh hriat a ni chuang lo." tiin a lo chhang a.

Chu lim chu Daniel-a chuan a han en vang vang a, "Ka hmu tawh a ni." a ti zawi sap mai. Chutah a lehkhabu pakhat zawk, history lama research a lo neih sa ho te chu zawngin a keu nghal a, a tawpah chuan a hmu ta. Source hrang hrang leh website hrang hrang a lakkhawm atanga zan 2 zet a lo buaipui tawh, THE UNKNOWN STATUE tia a hming an vuah ngei kha a ni tih a hre ta.

Chutia guide-in a sawifiah mawlh mawlh lai chuan, "Dawt a ni, he lim hi genie lim a ni lo." a rawn ti ta nalh mai. An vai mai chuan Daniel-a chu an en thap a, "Engmaw i sawi? Genie lim a nilo a?" tiin guide chuan a va pan hnai a. Confi tak hian DAniel-a chuan, "Aw nilo, he lim hi a tam zawk chuan Bodosa lim, hmanlai thai history ami angin an ngai a. Mahse a ni lo, he lim hi 1890 hmalam daih pawh khan a awm tawh. Rayong Mai khawpui din a nih hma hian helai hmun ah hian he lim hi a awm char char thin a, tichuan mi hrang hrangin in sak hnanin kum 100 chuang a liam leh hnuah milim hi Rayong Mai mipui hmasa ten an ker tha a, tichuan kum 1905 khan a hming an phuah chawp a, Bodosa lim tiin thawnthu dang an phuah chawp a ni." a rawn ti ta zat zat mai.

Guide chuan Daniel-a chuti taka amah ai mah pawha english thiam taka a rawn dak zat zat mai leh a hre thui em em mai chu a ngaina vak lo, "Khawi internet website ami nge i hmuh? I vawikhat hmuh naah i ring nghal mai em ni?" tiin a zawt leh a. "Pakhat mai nilo, source 200 chuang leh webiste hrang hrang 300 chuang ka fang kuala ka lut kual, chutmi atang chuan ka hria." tiin a chhang leh a.

Guide chu a nui suk a, "Animaw? Sir, RAyong Mai khaw mipuite aia thil hre hnem i lo kawl reng animaw?" tiin an Sir Tetea chu a melh deuh kher a, midang ho chu an lo nui deuh sap sap bawk. Hmundangah chuan an kal leh a, Sir TEtea chuan Daniel-a chu a khak deuh hlak nghe nghe. Midang ho zawng an kal hnu pawh chuan DAniel-a chu ala ding reng a, a lungawi lo kher mai.

A dik zawk a hria a, a sawi ve a ni mai a. Chuti taka thai guide-in a hmusit chu ala na takzet, an Sir Tetea'n ala hauh phah zui. Rum zet hian a hma a milim chu a en a, "Nang milim tlaktlai lo lutuk vanga ka zah hrep chu le..anih chuan chutia genie lim i nih chuan ramhuaiah min siam law law la. Sakei ang maia chakin min han siam teh, mawh...Nilo, sakei min nih tir law law rawh, keimi ka ni duh." tiin ama hriat tham lek chuan a phun nuah nuah a, chu milim chu a hau hrep mai.

Chutah le, milim chhunga kum 172 zet lo tang tawh, Keichala thlarau muhil lai chu a rawn harh ta zawk mai. Daniel-a chu a hmu ta, chuveleh chu milim mit pawh chu a rawn che zuk mai. Mahse Daniel-a erawh chuan a hmu hauh lo, Keichala chuan DAniel-a tawng ri a hriat chuan ngun leh zual chuan a han ngaithla a.

DAniel-a lah chuan, "Sakei nih ka duh, sakeiah min ti chang ta che...chutia genie i lo ni te a nih chuan.." tiin a lo la phun nasa mai. Chutah Keichala thlarau chu a tawngtai ta a, "Pu Van, tun chiah i chakna in min thuam leh rawh. Thiltihtheihna chu ka thlarau ah hian a tawp nan vawi khat chiah luan tir leh rawh, he tlangval thil duh hi thlen tir ngei ka duh a ni." tiin a chham ta mual mual mai.

Chutah milim chu a rawn che deuh dut a, Keichala thlarau chu a chhuak tawh tihna a ni. Daniel-a chu a phu zuk mai, a hlauh deuh avang chuan midang ho bulah chuan ava tlan phei vat a. A thlen dawn tep ah chuan a hnungzang chu a rawn hik zawk mai, "Ehe.." tiin a au thut a, a thianpa Thartea chu a va bawh deuh rawk rawk mai.

"Enge a? Ngati nge? I tlu ami?" tiin Thartea chuan a lo zawt vat a. Hnunglam hawi deuh hu hu pah chuan, "Tu emawin min rawn khawih amaw ka tia lawm le...a hnungzang a rawn hik thut mai." tiin Daniel-a chuan a lo chhang a. Tichuan Museum an fan zawh hnu chuan an lodge lamah an phei a, zanriah an ei nghal bawk a.

****************************

DAniel-a chu a harh zawk mai, rang takin a tho chhuak nghal a. A awmna hmun chu room a lo ni awkawng lo, in tamtak kang hluah hluah te chu a hmu a. Chutah ruang let rem rum mai te chu a hmu leh a, mei khu dum a tam hle bawk a, chulai hmun chu a thim hian a thim ruih mai. A chhak lawkah chuan pa pakhat, kawrdum fual ha leh vun dang var pup maiin a lo rap bet lai chu a va hmu a.

A bulah chuan chupa ang deuh chiah mi 10 vel an awm ve bawk, a hlau lutuk chu lungpui phenah chuan a biru nghal a. Fimkhur tak chuan ava dak dek dek a, tawng mak tak tak a an inbia chu a ngaithla reng a. MAhse eng tawng nge a hre lo thung, chutah chu ramhuai chuan lunghlu niawm tak, pawl vat mai chu a sawisak mek, patling awmah tak chuan a dah a, a rawn eng pup mai.

Zawi zawiin chu patling pawh chu milim ah a chang a, DAniel-a chuan a rap takzet. Ramhuai ho chu van sang lamah chuan an thlawk chho sup sup mai a, DAniel-a pawh a bihrukna atang chuan a rawn chhuak a. Milim chu a en vang vang a, chutah a rawn meng thut mai. Chiang kelh kawlh hian, "Phuba chu min laksak rawh, ka fapa." a rawn ti thum chhur chhur ta mai.

Daniel-a phu nasa lutuk chu a zuang dawr a, a tlanchhe nghal. Mahse a inchhuih a, a bawk thlawp mai. Chutah a taksa chu a rawn danglam tan a, a ban te chu a rawn hmul ther thur mai. A mangang leh hlauthawng chu a tap lek lek mai, "Nilo..enge ka chungah thleng?" tiin a au vak vak a, a tin te chu a rawn hriam telh telh mai.

A mumang ram atang chuan a rawn harh chhuak zawk mai a, a thu chhuak hlawl mai. A thlan chuan a bual huh vek a, a thaw hrawk hrawk bawk. A han hawi kual a, khua a lo var vek tawh. A sana chu a han en a, zing dar 6 a lo ri tawh a. A bul lawka khumah chuan Thartea chu a lo la hnar nasa mai, a mumang a ni chu a thaw huai bawk.

A nui suk a, "Nimina milim bawk kha animaw ka vei leh tlut tlut tawh ni, mai mai chuan.." tia phun nuah nuah chung chuan a tho va, a inphih harh nghal a. REiloteah chuan midang ho pawh chu an rawn tho sap sap a, tukthuan te chu an ei a. An eikham hnu chuan hmun dang fangkual leh tur chuan an inkokhawm a, an chhuak khawm leh ta a ni.

**********************************

Zeros-a pawh chu a hahchawl tawk tawh bawk a, mihring lah a that hnem thawkhat tawh bawk. A chawlh hman chu duhtawkin mihringah insiam leh in Keichala thlarau tanna milim chu a zawng leh ta a, tun tum erawh a naute chu a hruai tawh lo thung. Pu Vana kawrkilh pawh chu a hmang thiam telh telh a, reiloteah chuan a awmna chu a hre ta.

Erauan Museum ah ngei a awm tih a hre ta a, chumi lam pan chuan a kal ta vang vang a. Museum kawt a thlen chuan banga news paper lo intar chu a en a, a tualthat lai lo hmutu, Achara-i thil sawi an tarlanna a lo ni. A hming an phuahsak chu a han en a, "Moon Monster...hmm, a nalh loh hran loh hi." tiin a khi deuh suk a.

Museum chhungah chuan a lut a, milim chu a zawng nghal bawk. Pu Vana kawrkilh thiltihtheihna chu a hmang tangkai leh a, khawi lim ber nge a lim lo siamchawp kha tih chu a hre dik leh thei ta chat mai. An lo chei danglam a hmuh chuan a nui leh suk a, "Bodosa Genie...eng Bodosa Genie mah a nilo...hei hi Keichala thlarau ka khungna ngei a ni." tih pah chuan milim mitah tak chuan a en a.

A ipte zenin pu Vana kawrkilh chu pawrh chhuak lovin, a ipte chhanah chuan a han hum vang vang a. Tichuan kawrkilh pawh chuan thiltihtheihna a rawn pe leh ta, Keichala thlarau chu biak a tum tihna a ni. Mahse chu milim chhungah chuan eng thlarau mah a awm tawh lo tih a hria a, mak a ti kher mai.

Kawrkilh pawh chu a thlah nghal a, Keichala thlarau pawh chu a awmna zawn a tum leh nghal vat a. Mahse a thei leh ta hauh lo, "Hrep tak chuan le...enge awmzia? Engtin nge a chhuah theih?" tiin a phun nuah nuah a. Kawrkilh thiltihtheihna chu hman leh a han tum ngial a, mahse mihring kawchhungah a lut tih chiah a hriat tir thei tlat mai.

Thinrim tak chuan pawnah chuan a chhuak a, "A tha e, khawi hmunah pawh awm rawh...khawiah pawh bihruk tum rawh, ka man chhuak tho tho ang che. I thlarau chu hremhmunah khian ka thawn chho dawn tho tho, ka thawn chho khawp ang. Tichuan kei hian he kawrkilh hi ka nei kumkhua tawh anga, vampire zinga thiltithei ber ka ni tawh ang." tiin a inhrosa khur khur mai.

**************************

(After 2 weeks)

DAniel-a pawh Mizoram lamah chuan a haw ve leh thei ta, zan dar 10 dawna thleng an nih avang chuan a chau deuh bawk nen, inthlak pawh inthlak lo chuan a mu tlang a. A tuk zingah chuan dar 9 velah hian a tho va, a phone a han en chu miss call 5 lai a lo awm a. "Ka lo silent animaw...ava pawi tak." a ti nuah nuah mai.

Melody miss call vek a ni a, a inthiamlo kher mai. A call back nghal a, vanneihthlak takin a lo la hlauh mai. "Hello Melo...nizan ka lo muhil daih a, ka thlen hun pawh ka hre lo, ka chau lutuk a." tiin chhuanlam chu a han siam nghal zung zung a. "Nia ka ring deuh va, ka ngai tawh che sia ka rawn call nawn tluk tluk che a nih kha." Melody chuan a rawn ti ve bawk a.

"Chawlh a ni tawh bawk a, khawnge kan len dawn?"

"Vawiinah hian maw?"

"Aw...kan inhmu khat tawh sia, kan inhmu dawn lo mi?"

"Inah keimaha awm a ngai dawn a, lo leng mai la."

"Animaw? Nangmahin maw?"

"AW keimahin, lo leng rawh."

"Awle, dar engzatah?"

"Chaw eikham hunah, i hman hun hun a nimai."

"Awle."

Daniel-a chu a phur kher mai, a chauh zawng zawng pawh a reh vek thei. Sawi tawh ang khan Daniel-a hi hmeichhe bulah phei chuan dawihzep ve tak a ni a, tuna Melody nena an inkar pawh hi ala kar 2 liam ta chhung zawng pawh khan inbe zeuh zeuh reng mahse a la sawi chhuak ngam chuang lo a ni.

************************************

A scooty tawng ve tawh tak nen chuan dar 11 velah chuan a inkhalh chhuak ve leh ta a, Melody te inlam chu a pan nghal a. A thlen hma deuh hret chuan kawngsirah chuan gang ni ve awm tak, kum 25-30 vel, addict rual panga vel hi an lo thu a. Daniel-a kawng kawia a rawn tlan lai tak chuan addict zinga pakhat, tawnzau var ha chu a ruih em vang chuan a lighter ken lai chu a thlauh hlauh mai.

Chhar tum chuan kawngpui lam chu a pan phei chhut chhut a, a kal pai em em lehnghal. Chutih lai tak chuan Daniel-a chu scooty in a rawn tlan mek a, kawng lai taka chu addict pa lo awm a hmu thut chu a phu nasa kher mai. A balance chu buai phahin a kawi deuh zawr zawr a, adidict pa chu a su teuh ngei mai.

A thianpa chuan hnunglam atang chuan a rawn pawt hman hlauh mai, Daniel-a chuan a lighter chu a chil puah sak pup mai. DAniel-a pawh chu a ding a, "I tha em? Ka tihpalh lutuk aw.." tiin thupha a chawi nghal mawlh mawlh a. Chupa lah chu a lo pawr nasa mai, "I khalh thiam lo em ni? I khalhthiam lo a nih te chuan khalh loh mai tur alawm, ka lighter i su puak lehnghal." tiin a lo vin hrep mai.

A thiante pawh chu an rawn ding ve nghal a, an thianpa thelh a hnekin an la rawn pawr pui zawk a. An zinga kawr sen ha chuan Daniel-a kawr awmah chuan a rawn tham a, "Hek i dum ami?" tiin a tin nghal ur ur mai. PAkhat leh chuan a helmet a lo phelh sak bawk, scooty atang chuan an pawt chhuak a.

An din hual ta thap mai, "Enteh u, thiante u...ka tihpalh takzet. Lighter thar leina chu ka pe leh ang che u, khawngaihin min kal tir ru." tiin Daniel-a chuan a ngen a. MAhse kal tir mai chu an la tum loh hmel khawp mai, "Lighter man lek kan duh lo, hnek i duh loh chuan i pawisa ah lai zawng zawng rawn phawrh rawh." tiin tawnzau var ha chuan a han vau khur khur a.

A ipte atang chuan cheng 100 tlang chu phawrhin, "Kha la rawh u, hei bak hi ka nei lo." tiin DAniel-a chuan pek a tum a. Kawrsen ha chuan laksak pah chuan, "A dang rawn phawrh leh rawh..i la nei, i la nei tih ka hria." a han ti leh nghal chiam chiam a. "Ka nei tawh lo, ka nei tawh lo tak tak." tiin DAniela chuan a chhang leh a.

"I phawrh dawn em?" tiin an zinga palian ber chuan a melh run mai, "Ka nei tawh lo tak tak..thianpa, min kal tir ru." tiin DAniel-a chuan a ngen leh a. Chutah chupa, an zinga lian ber chuan a theipa tawp chuan DAniel-a bekah chuan  a han hnek chawrh mai a, DAniel-a hlau lutuk chu a maimitchhing nghal.

Mahse tho rawn fu ang lek chauh a ni, a la hnek lo emaw a ti hial zawk. Chupa zawk chu a then chawk chawk a, a kut chu a dawn vawng vawng mai. Chutah ring mang kheng hian a rawh au vak a, "Ana lutuk..ka kut...ka kut ruh a tliak." tiin a tap lek lek mai. Midang ho pawh chuan DAniel-a chu an en thup ringawt, kawr sen ha chuan hnek a han tum ve leh a.

Mahse DAniel-a chuan lo bumin rang lutuk maiin a dulah chuan a hnek zauh mau, mahse a na hle thung. A jacket hak lai chawp chuan a chawi nawlh a, paliana bulah chuan ava theh phei lawp mai a. An thiandun chuan an inbawh tlu ruk ruk mai, midang ho chuan mak ti tak hian an en tlawk tlawk ringawt.

MAhse anni ai maha mak ti zawk chu amah, DAneil-a ngei a ni, a kutte chu enin a ka hau ringawt. Chutia a inrinloh lai chu chuhin kawngsira tiang lian tak mai chu tawnzau var ha pa chuan a chhar a, a theihpatawpa na chuan Daniel-a chu hnung lam atang chuan a hlap pawp mai. Tiang pawh chu a bung hmawk a, mahse DAniel-a chuan a vua tih pawh a lo hre lo.

Tiang bung lehlam rawn thlawk lawp a hmuh chuan  a hre ve chauh, hnunglam a hawi a. Tawnzau var ha chuan a tiang bung chuan vuak leh a han tum a, mahse Daniel-a chuan a lo man chat mai. Tiang chu a laksak a, awlsam tak hian a hmet tliak a, a hmawlhte elhtliak ang vel lek a ni.

Chutah rawn hnek a tum leh a, a kut chu mo man sakin a hmer sak ta vak mai. Chupa chuan na  ati hle a, "Ana lutuk, thlah rawh...kan tihpalh..kan tihpalh." tiin a rak tuar tuar mai. Daniel-a chuan a thlah a, addict dang, a kut la tuar ve lo ho chu hlauvin an tlan chhe nghal vek a. A la tlu mekte pawh chuan an en thap ringawt, rawn thawh leh chu an ngam tawh hlawh lo.

Daniel-a ber lah chu a hrilhhai em em a, a hawi deuh hu hu ringawt mai. Kawngpuia a cheng za lo tla chu a chhar a, a ipteah chuan a ak leh a. A scooty chu a tinung a, mak a la tih em avang chuan a la pangngai thei lo. A melh ngei te chu a han melh leh vung vung thin a, a tawp a tawpah chuan a tlan ve leh ta hram a ni.

************************

MElody pa, Pu Chhuma chu Station ah chuan a duty mek a. Pu Chhuma hi Police Officer niin, DSP rank lai a ni tawh a ni. A nupui dinhmun tha lo telh telh avang chuan a rilru a hah hle a, a thianten an biakna te pawh chu a aw e liam vel mai mai hi a ni ber. A fanu Melody lah college kallai ala ni bawk si, a hlawh hi tlem tak chu nilo mahse a nupui zai nan chuan cheng nuai fe a sen a ngai dawn tih chu a hria a.

Doctor-in, "Kan zai vat lo anih chuan i nupui hian ni tam a nei tawh lo, mahse zai pawh ni ila a damchhuak kher angem hriat a ni lo bawk. A damchhuah theihna chance hi 100% ah 10% vel bak a ni lo. Chuvang chuan a chhe thei ang ber tawng tura in inpeih pawh a ngai ang, a pawi kan ti khawp mai." tia a hrilh lai te chu a bengah chuan a ri nawn sek mai.

Chutih lai tak chuan a office ah chuan constable pakhat hi a rawn lut a, "Sir, bad news lutuk mai a awm." a rawn ti a. "Eng bad news maw?" tiin a lo zawt let vat a. "Dustin Malsawmzuala nizanah jail atangin a tlanchhuak." a rawn ti chiah mai chu Pu Chhuma pawh a thutna atang chuan a tho chhuak zawk mai.

"Enga? Dustin-a  a tlan chhuak amaw?" a ti hru mai a. "Aw Sir, nizanah a tlanchhuak a. Plan pawh a nei mumal viau ni tur a ni, hnumhma pawh a thup thiam lehpek khawp mai." tiin a lo chhang leh a. "Tlanchhuahpui a nei em?" tiin Pu Chhuma chuan a han zawt leh a. "Aw nei e, a cell mate te pahnih nen an tlan chhuak." tiin constable chuan a lo chhang leh a.

Pu Chhuma chuan pawi a ti hle mai, "Dustin Malsawmzuala...kha Sadist kha vawi engzat nge man tuma ka beih tawh? Thi tep tep khawpin amah man theih nan tha ka thawh a, mai mai chuan le." tiin pawi a ti lutuk chu a chal a dawm vawng vawng mai. A nupui lah thih leh dam kara awm mek a ni a, chutih lai karin kum 10 chuang zet misual a lo um tawh, a man atanga kum thum lek hnua a tlan chhuak leh tih thu a hre bawk nen, a rilru hahna a zual kher mai.

Dustin MAlsawmzuala hi Pu Chhuma hian Sadist a tihna chhan chu tualthah hmang leh drug dealer niin misual tak a ni a, mi thah hrehna nei miah lo leh khawngaihna nei hauh lo a ni a, a thil atchilh ber leh duh ber chu pawisa a ni. Mi hlauhawm tak mai a ni a, chuvang chuan Pu Chhuma hian a hming vuah in SADIST a ti a ni.

*************************************

Melody leh DAniel-a te chu an thudun a, an inngaih thin zia te leh kar 2 lek chhung pawha an khawhar dun thin zia te chu an inhrilh dun mawlh mawlh a. Melody chuan a banah chuan a kuah deuh reng bawk a, DAniel-a chu a hlimin nuam a ti kher mai. A huaisenna zawng zawng sawm khawmin thawk a han la te te a, "Melody, ihh...kan awmdan hi ka hrethiam lo." a han ti zawi sap a.

Melody pawh chuan a ban chu thlahin a thu tha a, "Engtia kan awmdan maw? Enge i sawi awmzia?" tiin a lo zawt let daih mai. "Ihh..kha..ka zin hma zan khan..ka hmuiah min kiss kha.." zak chung chung chuan a han ti bah nuai a. Melody chu a khi suk a, "Ka sawi tur zawk tak a ni i sawi ni." a han ti leh daih a.

"Enge awmzia? Engtia i sawi tur maw?"

"Kan awmdan hi ka hrethiam lo tih lai tak kha...ka sawi tur niawm zawk tak a ni."

"Anih chuan i hrethiamlo ve tho tihna mi?"

"Huiham...a mipa zawk i nia, ka hriatthiam theih nan min hrilhfiah ta che."

"Aww..ka zawt che alawm. Hria ni ila ka zawt nang che.."

Melody beidawng lutuk chu a han thaw huai a, "Min duh em?" a ti ta hmiah mai. DAniel-a lah chu a lai laklawh lutuk chuan, "Duh e." tih ringawt chuan a chhang a. "Anih chuan tinge i sawi loh?" tiin Melody chu a vin hlur tawh mai. "Nangmah pawh...i sawi si hleinem." Daniel-a chuan a lo la ti ta deuh deuh va.

"Ava hahthlak tak...mipa zawk i nih kha...pa takin min hrilh tur alawm."

"Umm..anih nang?"

"Enge kei chu?"

"Min duh ve em?"

A lu a va kuk lawlh pah chuan, "Duh lo che ila ka kiss dawn che em ni? Chet i la har si, a hmeichhia zawk ka nia, chet ka la hmasa duh lo alawm. Chubakah keichu ka nu lo ve ropui sia, ka incheidan zawng zawng nen pawh, min duh ka ringlo alawm." tiin Melody chuan a chhang a. DAniel-a lah chuan, "Nia...keipawn patil amaw ka ti che alawm, ahma chuan.." a la ti zui.

Melody pawh a nui tawi tak mai, a zak ve deuh bawk si chu han sawi leh tur mai pawh a hre lo. "Nia..an ti fo alawm." a ti ringawt a. "Ihh..sawi ka duh thin a. Mahse min duh ve lo ta la, ka zak dawn lutuk a." Daniel-a chuan lai tak chung chuan a han ti leh sup a. Melody chu  anui a, va thuthnaihin, "Tun tum chu che ve tawh rawh." a han ti a.

Daniel-a chuan a lo hrethiam mai lo, mahse Melody hmui no nalh tak, sen chuk mai a hmuh chuan a hrethiam ta. A nui sen sen a, "Maimitchhing rawh." a la ti hram. Melody pawh chu a maimitchhing ve mai bawk, tichuan Daniel-a chuan a hmuiah chuan a fawp ta a. Tun tum chu a hma ang lo deuhvin, an infawp rei ve ta khawp mai.

*****************************

TO BE CONTINUE