KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-8

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-8

*******************

A tuk zingah chuan Daniel-a chu a walk leh ta a, a tlan thui leh par par khawp mai. A haw leh lam chu a hnung atang chuan tu emaw hian a rawn su palh a, "Ka tih palh lutuk." tiin ngaihdam a rawn dil nghal vat a. Daniel-a'n a han en chiang chu sakeia a chan hmasak ber zana, drug addict pakhatin a lo tihbuai nu, Sangtei ngei kha a ni.

SAngtei chu a kal leh mai a, Daniel-a chuan a en zui vawng vawng mai. Mahse Sangtei chuan hre ve awm ang pawhin a lang lo, a chhan chu Daniel-a hi tunge a nih a hre lova, keimi  anih lai chauh a hmuh vang a ni. Va zui a tum deuh uk hman a, mahse a han ngaihtuah chiang a. Chutia hmeichhe kawng kal lai va zui ngawt chu a dikin a hre si lo, va bia pawh nise sawi t(r)an tur lah a hre hek lo.

Chutia a din ngawih vung vung lai chuan a hnung atang chuan DAwnga bialnu, Rosy bawk chuan a rawn barakhaih thut mai. DAniel-a pawh a phu zuk a, "Ekhai, min ti phu chiang lutuk." a lo ti vin tuar mai. Inla no tak hian Rosy chuan, "Awi ka tihpalh lutuk aw, BAwihte...zing exer i la khat animaw? Ka hmu ngai miah lo che, nge min hmuh i duh loh vang zawk?" a lo ti deuh huam a.

"Aih chutiang lam a ni lo, hmun dangah te ka tlan ve thin a." tiin DAniel-a chuan a lo chhang a. Rosy chuan a banah a han vuan nghal ringawt a, "Hawh..chawl ang..saw laiah sawn va thu lawk ang." tiin a pawt phei nghal dawr dawr mai. Nuam lo a tih avang chuan DAniel-a pawh a ngawi reng a, a kal ve mai bawk.

A thianpa Robert-a'n a hmu leh ang tih chu a hlau khawp mai, a hawi kual leh zuk zuk thin a. Waiting shed ah chuan an thu a, "An la suspend che ami?" tiin Rosy chuan a han zawt leh a. "Aw..karleh atangin ka kal thei tawh ang." tiin a lo chhang a. Rosy chuan a han tawlh hnaih deuh hret a, "Ka rin ai daihin i lo palian reuh va, i sa pawh a nalh khawp mai." tih pah chuan DAniel-a ban te chu a han khawih vel a.

DAniel-a chu a awm sawn nghal vat, "Rosy, ka kal leh phawt ange...ka tlai lutuk palh ang..ka nu rawngbawl pui angai sia." tiin a tho vut a. Rosy chuan tum hmuk chung hian, "Min hlau ami a? Tinge min hlat em em a...ka duh thu che hi hrilh kher i ngai em ni?" a ti ta vak vak mai a. DAniel-a chu a hrilhhai hle mai, "Engmaw? Min duh maw?" a ti hu mai a.

"Duh e...ka duh vang che alawm ka hel ka hel che ni." tiin Rosy chu a vin deuh tuar mai. DAniel-a chu a ngawi vang vang a, "Ka tihpalh, bialnu ka nei." tih pah chuan a tlan leh ta daih mai, Rosy chu a tah a chhuak takzet. Chutih lai chuan ral khat atang hian tu emaw hian a lo en reng a, chupa chu Lazarus a ni.

A khi suk a,"Saw saw a bialnu a ni ngei ang maw? An intithiam vak lo a nih hmel? A nuam dawn e..." tiin a nui var var mai. Mi hmuh lohna tur lai ah chuan a phei a, a khu tulh a, bak ah bawk a chang leh a. Tichuan a thlawk leh vang vang a, an inhmuhkhawmna bak pukah chuan Zeros-a ava hrilh ta vek a ni.

*****************************

Chhun dar 1 a ni a, Daniel-a leh Melody chu tlangah an leng dun a. An hlim dun kher mai, titi pawh a tui bawk aniang, darkar fe an awm tawh. "E taka, zanin chu lo leng tak tak tawh la. Ka pa pawh a mood a fuh deuh tawh ang, a hlauhawm tawh lovang." tiin Melody chuan a han sawm leh a.

DAniel-a chu a ner deuh nung a, "Ka inthlahrung em alawm, in inhnaih ah pawh ka lo kal ngam tawh hleinem." a han ti nuah nuah a. "I va han over tak." tiin Melody chuan a kuk fawk mai. "Tak tak alawm, i pa hmel ka hmu ngam lo." Daniel-a chuan a lo ti leh a. Melody chu a thaw hak a, "Hmm..hmm..i dawi emai." tiin a tum khum ta hmuk mai.

"Titau lo hram la, hmeltha an thinrim ngai lo." tiin a han thlem ve ngial a, mahse Melody chu a lungngawi duh hauh lo mai. A tawpah chuan DAniel-a chuan, "Awle a tha e, zanin chu ka pa ka puih a ngai dawn a, naktuk zanah ngei ngeiin ka lo leng ang." a ti ta nge nge a. Melody chuan titau mitmeng tih hriat zet hian a han melh a, "I lo len loh vaih aww.." a han ti leh hlur a.

"Leng em em ang, nui tawh rawh le." tiin DAniel-a chuan a hmaiah a han fawp zauh va, Melody pawh a nui ve leh thei ta. An titi leh fe hnuah chuan haw turin an chhuk thla ve ta a, scooty lam an pan dawn chiah chuan Rosy a rawn kal phei mek bawk, DAniel-a'n a han hmu thut chu a phu deuh zuk mai.

Ngaihnep hmel tak hian Melody chu a rawn en a, "Eheu..ka lo va hre har ve..hei hi nimaw i bialnu chu..DAniel..patil amaw ka lo ti char char a." a han ti deuh kher a. Melody chu a lawm lo kher mai, mahse a insum hram hram thung. "Awi Melo BAwihte, haw suh aw...ka ngei vang che a sawi ka nilo ania." a han ti leh zuah zuah a.

DAniel-a pawh sawi tur a hre lo, a ngawi reng ringawt. Rosy bawk chuan, "Anih chuan ka kal mai ange..in inhmeh khawp mai." a han ti leh hram a, a kalsan dun ta a. "DAwnga bialnu kha tiraw?" tiin a kal veleh chuan MElody chuan a zawt nghal a. "Aw ni e, min star deuh aniang...mi be sek mai." tiin Daniel-a chuan a lo chhang a.

Melody chu a khi suk a, "I duh mai lawm ni?" tiin a han fiam a. "Ngawi mai teh a, ani ang duh ila inchei angai nang." tiin DAniel-a pawh a lo fiamthu ve bawk. Scooty ah chuan an inphur leh a, tichuan an tlan ta a. "Naktuk zan chu rawn leng ngei ngei ang che." tiin Melody chu a vin deuh hlur reng a, tichuan an haw ta a ni.

************************

Zan a lo ni a, DAniel-a leh Pu Malawma te pafa chuan an carpet thar chu an phah dun mek a. An phah dun mawlh mawlh lai chuan an bakcheh hman lai chu Pu Malawma chuan a ti chhe ta hlauh mai, "Aww..engtin nge maw i tih chhiat theih le, kha bak kan nei lo asin." tiin Pi Zualtei chu a rawn phun nghal chiam a.

ZAidam tak hian Pu Malawma chuan, "A hlui ve tawh hrim hrim a, a thar ka rawn lei ang ka tia, ka theihnghilh leh thin alawm mawle." a lo ti dam diai a. "Phah tur a la tam si, engtin nge kan tih dawn?" Pi Zualtei chuan a lo ti leh chung mai. Pu Malawma chuan a wallet a phawrh a, "BAwiha, kha..Pu Hminga te dawrah va lei mai teh..hmanhmawh la aw..a theih ang ang ka lo phah zung zung ang." tiin a fapa chu a tir a.

DAniel-a pawh chu a kal ve nghal mai a, scooty erawh a hmang lo. Ke chuan a kal a, a kal chak khawp mai. Chutih lai tak chuan kawnglaia Rosy, pawnfen chhing mang kheng nena a lo ding chu ava hmu a, phone a lo hmang bawk. A hmu ang tih a hlauh avang chuan a ding chat a, mi in bang phenah a biru nghal.

A va bih leh dek dek a, Rosy awmna bula bak pakhat, a letling zawnga lo inkhai meng kur mai a hmuh chuan a ngaih a tha lo kher mai. A han en chiang deuh va, a rin ang ngeiin bak satliah a ni lo tih a hre nghal. Mahse ala chhuak mai lo, a han en leh ngar ngar phawt a. Rosy lah chu a ruih hmel em em lehnghal, a ding ngil hleithei lo.

Chutah bak chu meikhu dum vekah a rawn chang a, Lazarus a lo ni reng mai. Rosy phone be lai chu hnunglam atang chuan a man thut a, bak lian em em maiah intichangin a thlawh pui ta daih mai. Mi kawng kal awmloh lai tak a ni a, Daniel-a tih loh chuan tuman an hmu lo. Kawngsir kham lamah chuan a thlawh thlak pui a, Rosy chu au pawh a au hman lo.

Chuveleh rang lutukin DAniel-a chu kham lam panin a zuang thla ve nghal a, keimi ah intichang nghalin kham mawngah chuan a tum chat mai. Thingkungah pakai phei zelin LAzarus-a thlawk mek chu a zui zel a. LAzarus-a pawh chuan a lo hre nghal, a aia chak chuan a thlawh pui nghal a. A aia chak chuan keimi chu a tlan ve zel bawk.

A um pha dawn lo takngialin a hria a, thingkung sang bik ho zarah chuan a han zuang kai phei leh zat zat a, thingkung pakaht lerah chuan a ding a. A zuang vak a, LAzarus-a chu a va zuan fuh ta hlauh mai. Lazarus chuan Rosy chu a thlauh nghal a, rang takin keimi chuan a kuah nghal a. Lei delh zawng chuan amah zawk chu a inbawh tir a, an ri thum dup mai.

Rosy pawh chuan engmah na a nei lo hlauh, keimi hmel chu a hmu chiang kher mai. A hlau lutuk chu a au vak a, tlanchhiat a tum nghal. "Nilo..Rosy, lo ding teh." tiin a au zui a. Mahse Rosy chuan engmah a ngaithla tawh lo,  a hma zawnah chuan a tlan phei pawp pawp ringawt a. "Min pui ru....min chhan ru." tiin a au phei vak vak mai.

Mahse a hma zawnah chuan LAzarus chu a rawn ding leh thut mai, Rosy pawh a ding chat a. Tlan let leh a tum a, mahse keimi a lo awm ve leh thung bawk si. A hlau lutuk chu a hawi tawn sek a, a thidang ta ringawt mai. Keimi chuan Lazarus-a chu a va pan a, "I thianpa tawrh ang kha i tuar ve duh deuh animaw? Thih i duh ve em ni?" tiin a vau phei khur khur a.

Lazarus chuan hlauh loh hmel tak hian a lo nuih suk a, "Magnus-a ka nilo, kei chu Lazarus ka ni. Nang hian min that lul lovang, mahse tunah nilo...zanin chu i vannei hle mai." tih pah chuan rang takin a tlan phe zeuh va, a bo leh daih mai. Keimi chu mihringah a intichang leh nghal a, Daniel-a a ni leh ta.

Rosy chu a pawm tho va, kawngpui lam a pan chhoh pui a. Waithing shed ah chuan a mut a, "Rosy, i harh em? I harh em?" tiin a han sawi vak vak a. Rosy pawh chu a rawn harh a, a rawn thu chhuak thut mai. "Enge? Khawnge ka awm? Khawnge sakei kha?" a ti nghal chel chul mai. "Eng sakei maw? Enge i sawi awmzia?" tiin DAniel-a chuan a han hrethiamlo der vel a.

"DA...DAniel..Daniel, enge hetah i tih?" tiin Rosy chu a hrilhhai kher mai. "I lo muhil a, ka rawn kai tho che. Hei zan a ni bawk nen, nangmah chauhvin i lo mu a." tiin DAniel-a chuan a lo chhang a. Rosy chuan a melh ngai a melh vung vung a, "Anih chuan..kei..kei hi, kha zawng zawng kha ka mumang vek maw?" a han ti leh hu a.

Chutih lai chuan ral khat atanga DAwnga motor rawn tlan chu DAniel-a chuan ava hmu nghal chat, "Saw..i bialpa DAwnga pawh a lo thlen tawh saw.." tih pah chuan a kawk a. Rosy chuan ava en a, "Nilo..DAniel, kal suh, min kalsan suh.." tia a hawi let leh chu Daniel-a chu a lo bo daih tawh.

"Ava rei ve mawle aw...enge maw ke tea a kal reng reng le?" tiin Pu Malawma chu a lo phun nasa tawh mai. A sawi zawh rual chiah chuan Daniel-a chu inchhungah a rawn lut hlawl mai a, "Kha le...dawr a hla lutuk a.." tiin a thaw hluam hluam a. A nu leh pate chuan an en hu ringawt a, an hau ta lem chuang lo.

*****************************

A tuk zingah chuan Pu Chhuma pawh duty tur chuan a insiam mawlh mawlh a, "Zanin ah chuan a lo leng tak tak tawh em ang chu maw?" tiin a han nui vur vur a. "A lo leng tak tak tawh ang, hman zan kha chuan a accident a, a haw leh tawp alawm." tiin Melody chuan a lo sawi mawi nasa mai.

"A that chu...i thianpa chauh maw ni a, i bialpa a nilo tak tak maw?" tiin a han zawt leh a. Zawi te hian, "Bialpa chiah hrih lo..thianpa ani mai." Melody chuan a lo ti sap mai. Pu Chhuma pawh a nuih a za angreng kher mai, "Engpawh nise i nu awmpui turin i u Ruati han thlak vat rawh aw..ka kal ania." tiin a chhuah san ta a.

A car dahna a va thleng chiah chu a ding chat mai, motor hma darthlalangah chuan lehkha them hi a lo inzep a. Pu Chhuma chu va kal hnaiin a han enchiang a, "Tu dah nge mawni le?" tih nuah nuah pah chuan a han chhiar a, "MY HERO Officer Pu Chhum...Pu Simon-a sawmna che kha khawngaihin hnar ang che. Nang nena hmelma nih hi ka duh tawh lo, a tawk tawh. Min mantu i ni a, jail-a min dahtu pawh nangmah i ni. Mahse phuba lak ka tum lo, chuvang chuan rawn inrawlh tawh suh ang che. Anih loh vaih chuan, i inla pa a, i inti changtupa kual vel a nih vaih chuan a pawi ngawt ang. Fanu hmeltha tak i nei tih ka hria ania, a nih phawt le..from SADIST." tih hi a lo inziak a.

Pu Chhuma chu a thinrim kher mai, lehkha chu a pawtthler vek a. Inah chuan a let leh a, "Bawihte..ka han thlah law law ang che...taxi-a kal vel chu pawisa a hek mai mai." tiin a fanu chu a han tur nghal chung chung a. Melody chuan a hrethiam lo kher mai, "NGati maw? Ala hma alawm." a lo ti hu a.

"Hma tawh lo, i u ruati pawh a chau tawh ang. Inah nangmah chauhva i awm hi ka ngaih a ngam thei lo...insiam vat rawh."

"In thlak hun pawh ala ni lo, chutin a inthlak theih ngawt loh."

"Aww ka dilsak mai ang che...in hi chu kalh ila, i U Ruati pawh a thiannu te inah thleng mai rawh se. Kan in hi chu a buaithlak, tlaiah ka rawn lam leh ang che."

"Pa, ngati tut tut nge? Thil dik lo a awm em ni?"

"Awm lo ve..insiam la nimai."

Melody ngaih chu a tha mawlh lo, mahse a hnial duh ta lem lova. A insiam ve mai a, tichuan apa rual chuan damdawiin lam chu an pan ta a. Duty te bulah chuan a sawi sak a, Police Officer lai te a lo nih ve si avang chuan damdawiin lam pawh chuan a dilna chu an lo zah sak a, Melody chuan anu chu a awmpui ve ta thung a.

***********************

Bak puk chhung thim leh rimchhe tak mai, bak thlawh nuai nuaina karah chuan Zeros-a leh a naute pahnih chu an ding khawm a, "NGati nge min koh ve mai loh? Tinge min hrilh vat loh, ka sawisa hrep nimai tur." tiin Silas-a chu a inhrosa nasa mai. "Tihdan tha zawk ka hria alawm, Silas..insum rawh." tiin Zeros-a chuan a lo hnem a.

"Amah bei lova ka lo let leh nachhan pawh ka ngam loh vang a ni lo, bei lo tura hriattirna ka dawn vang zawk a ni." LAzarus-a chuan a lo ti ve bawk. "ZAninah kan che chhuak ang, ka sawi tawh kha...Magnus-a a thi tawh a, in pahnih chauh in ni tawh. Ka hriat loh hlana lo va pawngpaw beih ngawt kha thil dik a ni lo, ka thu ngaichang hram hram rawh u." Zeros-a chuan a lo ti ve bawk a.

"Ka Lalpa, keimah chauh pawn ka ngam...ka hlau lo hrim hrim. Thu min pe rawh, saw keimi lu saw i hnen ka rawn thlen ngei ang." tiin Silas-a chu ala pawr nasa mai. "Nilove Silas, an chenna hmun ka hre tawh a..duh duh hunah phuba chu kan la thei tawh. MAhse tuna tih tut tut chu a chi hrih loh, Belzebula te lamin min la tibuai reng a, kan fimkhur angai." tiin Zeros-a chuan a chhang a.

"Anih chuan engtik nge kan chet chhuah dawn? Tiang hian i thupek hun kan lo nghak tawp mai dawn em ni? Ka unaupa MAgnus-a min laksak tawh a, phuba chu keimah ngei hian ka la duh a ni." tiin Silas-a chu a lo ang leh pung pung mai. "I unaupa chauh a ni lo, Silas...kan unaupa pawh a ni ve tho. I nat ang chiah khan kan na ve, mahse nghak hram hram rawh." tiin LAzarus pawh a rawn tawng chhuak ve a.

"Tunah hian mahniin Belzebula ramhuaite ka bei mek a, kawrkilh hi nei lo phei ila chu keipawh ka hliam nual tawh ang. Chuvang chuan lo nghak phawt rawh u, saw keimi saw chu kan dahtha em em ang. Silas, nangpawh insum tawh rawh. I phuba chu i la ngei ang, kan vaiin kan la ang." tiin Zeros-a chuan a hrilh fiah mawlh mawlh a.

*****************************

ZAn a lo ni a, DAniel-a pawh Melody te ina leng tur chuan a insiam malh malh a. Anu chu room ah a rawn lut a, "Ehe, khawnge i kal dawn?" a rawn ti lut nghal a. "KA leng chhuak dawn, Melody te inah." tiin Daniel-a chuan a lo chhang a. "Bawiha, zanin chu chhuak lo mai teh. Ka kawng ana riau mai a, ka che hleithei silova. I pa lah nise office hna a ngah si, chhuak lo mai rawh." tiin a han ngen a.

Mahse DAniel-a chuan tum hmuk hian, "Ka chhuak khat emai, zanin chiah te chu ka chhuak ve duh alawm mawle." a lo ti vin hlur mai. "ZAn dangah pawh i leng thei tho alawm, zanin te chu min awmpui ve la mawle.." anu chuan a lo ti leh a. "Zan dangah ka awm pui ziah che alawm, chubakah ka lo sawi ve laklawh tawh sia. Ka kalloh leh chuan a nuam lo emai, ka lo haw har lovang." tiin a chhuak lui ta tho va.

Anu chuan a en zui vawng vawng ringawt a, DAniel-a tlan chhuak chiah chu an inchung rangva ah chuan bak pahnih hi an rawn t(r)um a, DAniel-a chu an en zui ve vawng vawng a. A tlan liam chiah tih ah chuan leiah an t(r)um dun leh a, mihring pangngai anga langin an rawn awm leh a, Zeros-a leh LAzaris-a te an lo ni.

"Khawnge Silas?" tiin Zeros-a chuan a han zawt a. "Chaw ka zawng phawt dawn a tia, ramhnuai lamah a thlawk phei." tiin Lazarus chuan a lo chhang a. "A rawn kal ve tur thu a sawi em?" tiin a lo zawt leh a. "Aw sawi e, ka rei lovang a ti." tiin Lazarus chuan a chhang leh a. Zeros-a chu a thaw hak a, "Ka thu lovin tinge chutia a lo awm aw.." a ti vawng vawng mai.

Tichuan Daniel-a te inlam chu an han hawi dun a, "Nghak lo mai ang, phuba chu i la tan ang hmiang." Zeros-a chuan a han ti lauh lauh va. Lazarus pawh chuan a lu a lo bu nghat mai, tichuan mihring ang thei tur ber chuan Pu Vana kawrkilh hmang chuan an vun dang var pup mai te chu an thlak danglam a, tichuan kawngka chu an kik ta karh karh mai.

**************************

ZAn dar 8 leh a chanve a ri tawh a, Melody leh DAniel-a chu an la hlim dun ngang mai. "Dawr ah han kal ila.." Melody'n a han ti chiah chu room-a lo awm mek, apa Pu Chhuma beng a rawn verh zawk mai. "Bawihte, dawr a inkhar vek tawh ang." a lo ti nghal vat a, a chhan pawh SADIST-a lakah a veng reng tawh a ni.

"An la inhawng ang, Nu Kimi te pawh an la inhawng ang." Melody chuan a lo ti ve leh nghal vat a. Pu Chhuma chu room atang chuan a rawn chhuak a, "AW kha..i thianpa kha han lei tir zuai la, kal ve kher angai ami?" a rawn ti leh a, DAniel-a chuan nuam lo a lo ti khawp mai. Melody chuan rum zet hian apa chu a melh a, "Amahin nuam a ti nang." a ti vin hlur mai.

Inthlahrung tak hian Daniel-a chuan, "Ka han kal thei alawm." a lo ti vat a. Mahse MElody chu a tho lui a, "Hawh kal dun ang, kan rei danw hleinem." tih pah chuan a kai chhuak nghal a. "Lo haw leh vat ru aw.." tiin Pu Chhuma chuan a au zui lawm lawm a, kawngka bul thleng chuan a en zui a.

An kal pah chuan DAniel-a chuan, "NGati nge i pa kha? Min ning tawh ani chiang mai, haw turin min ti chiang." a han ti nuah nuah a. "Chutiang engmah nilo, a zia ve hrim hrim a nih kha." tiin Melody chuan a lo sawi mawi vat a, mahse Daniel-a chuan nuam chu a ti chiah tawh lo kher mai.

Thil chu an lei ta ngei a, mahse Melody chuan an in lam pan pui lovin school hnung lam a panpui ta daih mai. "Ngati nge tah min hruai a?" tiin Daniel-a chuan a zawt deuh hu a. "Haw ka la peih lo, ka ngai ve che alawm." tiin Melody chuan  a kuah nghal deuh bawrh bawrh a. Dar 9 leh a chanve a rik dawn thleng chuan an awm dun a.

Daniel-a phone chu a rawn ri a, anu call a lo ni. "A va ninawm tak." tiin a la duh lova. "Tinge la ta che?" Melody chuan a lo ti vat a. DAneila chu a khi suk a, "Lo haw rawh tih vel bak a ni lovang." tiin a chhang a. A sawi zo chiah chu a rawn ri leh a, apa call zawk a ni. Mahse a la la duh chuang lo, "La rawh..thil pawimawh aniang chu." Melody chuan a lo ti leh a.

"A ni lo..lo haw rawh tih bak an sawi dawn lo. Ka chhuak khat emai, duh leh min hau rawh se." tiin DAniel-a chuan a la pick up duh tlat lo. Melody phone a rawn ri ve leh thung a, "Keipawh ka pa in min rawn call, ka la peih bik lo." a han ti ve ngawt a. "Nang chu la rawh, kan haw tep tawh tho alawm." Daniel-a chuan a lo ti a.

Melody chuan a la ta a, "Aw PA, kan lo haw mek. Engmaw? Awle..kan lo kla nghal." tiin phone chu a dah a, a mangan hmel kher mai. "NGati nge a?" tiin DAniel-a chuan a lo zawt vat a. "Ka nu a zual thut a, ICU ah an dah lut a nih chu." tiin a lo chhang a. DAniel-a chuan phawk hru hian, "Ehe..ka nu leh pate min rawn call nachhan pawh kha a ni ang a, haw kal vat ang." tiin an kal nghal a.

Damdawiin thleng chuan Daniel-a chuan a zui chho ve a, "I nu leh pate zu hrilh ve rawh." tia Pu Chhuman a tih tlat avang chuan DAniel-a pawh chu a haw ve leh mai bawk a. Damdawiin atanga a chhuk lam, kawng reh lai takah chuan a hma takah Silas-a a rawn t(r)um thut mai. "Khawiah nge kal i tum a, Zawnga..ka unaupa min thahsak man hi i hmu dawn khawp mai." a ti khur khur mai.

Daniel-a chu Scooty atang chuan a chhuk a, "Hun ka nei lo ania, nang nena intihbuai hi ka hman lo. Nangni Pu Vana kawrkilh tih vel mai mai kha ka buaipui ve hman lo, i thianpa anga thih i duh loh chuan thlawk bo nghal rawh." tiin a vau nghal a. Silas-a chu a thinrim kher mai, "Nang..nang hian min that anga maw?" tih pah chuan ava zuan nghal a.

Rang lutukin Daniel-a pawh keimi ah a intichang nghal a, a lo zuan let ve nghal. Kawng sirah chuan an inbawh phei a, an lum phei tawp tawp mai. Silas-a chuan keimi chu a meiah pawtin lamlianah chuan a hnuk hrep mai a, keimi pawh a na tuar a rum ring kher mai. Chutah Silas-a bawk chuan a vaivir pawp pawp a, kawngsir zun in bang khi thawt khawp chuan a deng leh dawt mai.

Keimi chu a rawn tho leh nghal vat a, a thinrim kher mai. Silas-a chu a rawn zuang leh a, mahse keimi chuan lo zuang khalhin lamlian khuar duk khawp chuan a t(r)um ta mai a, a hmaiah chuan a hnek siah siah mai. Silas-a hmai chu a keh nasa tawh hle a, keimi chuan a rekbet a. "Khawnge Zeros-a chu a awm? Khawnge in boss chu...ka lo that ve nghal law law teh ang." a ti khur khur mai.

Silas-a chu hliam na tawh hle mahse a la rawn nui hram a, "Ka Lalpa hi i hneh thei lovang, haha...min that rawh. I duh chuan min that rawh, mahse i nu leh pate nunna pawhin an tuar ve ang." a ti ta mai a. Keimi chu a thinrim zual sauh va, "Enga? Ka nu leh pate...enge an chungah thleng? SAwi rawh..." tiin a vin leh vak vak a.

Thei leh thei lo hian Silas-a chuan, "Va..va kla la, va en ve mai rawh." tiin a nuih tiah tiah mai. Keimi thinrim chuan Silas-a ban pahnih chu a pawt hmung bawk a, thisen erawh pakhat mah a awm lo. Silas-a na ti chu a au ring kher mai, chutah ala duh tawk lo. Lamliamanah chuan a lu chu a tauh tir vak vak a, a tau keh vek mai a.

Chutah rang takin mihringah a inti chang leh a, Daniel-a a ni leh ta. Rang takin a scooty ah a tlan lawn a, an in lam pan chuan  a tlan nghal ta vang vang a. A thin a phu dup dup a, a mangang kher mai. Silas-a thusawi kha a bengah chuan a ri nawn mawlh mawlh a, a tap pur thei hial bawk.

******************************

An in chu a thleng ta, a hlauh ang ngei ngeiin an inchhungah chuan mipui an lo khat vek a, pawnah pawh mi an lo awm nuai nuai bawk. Rang takin ava tlan phei a, a thianpa Robert-a chuan a lo hmu a. Vin zet hian, "Khawnge i bo daih a? I nu leh pate chunga thil thleng hi i hria em? Tinge ka phone pawh i la theih loh?" tiin tap teuh chung chuan a lo hau nghal chiam chiam a.

"Robert, Robert khawnge ka nu leh pa? Khawnge an awm?" tiin DAniel-a chuan mangang tak hian a zawt a. Mahse Robert-a chuan a chhang thei lo, a tap zawih zawih ringawt. An thenawmpa Pu Liana a lo kal a, "A pawi khawp mai, Nialpui...a lan dan chuan in inah suam hmang an rawn lut a, i nu leh pate hi an rawk a nih hmel." a ti ta mai a.

Police pakhat lo kalin, "DAniel-a i ni em?" a rawn ti a. DAniel-a chuan a chhang lo, inchhungah chuan a tlan lut nghal a. A nu chu thisen nena inchiah piah nuai hian choka ah chuan a lo let der mai, "Nu...nu, anu..nilo.." tiin DAniel-a chu ava tlan phei a, thingthi in a nu chu a kuah nghal. Mahse anu chuan nunna reng a lo nei tawh lo, a lo thi tawh.

A sawi vak vak a, "Nu..nilo, min kalsan suh, khawngaihin min kalsan suh." tiin  a fawp ngawih ngawih a, midang ho chuan pawh sawn an lo tum a, a chhan pawh forensic lam hovin enfiah an duh vangin khawi danglam lo se an ti a ni. Chutia a tah hawm hawm lai chuan sitting room atang chuan police doctor pakhat hian, "Pu Malawma hi ala dam ania." a rawn ti lauh lauh mai.

Chuveleh DAniel-a chu a zuang tho titih nghal a, "Pa...apa.." tiin a va tlan phei ve leh nghal a. A lo la thaw hlauh mai, "Pa..nilo, nang tal chu tho rawh..khawngaihin." tiin a kuah a, apa chu a rawn meng tawk tawk a. "Bawih..Bawiha.." a rawn ti chhuak thei hram. "Aw pa..pa, sawi rawh...sawi rawh." tiin Daniel-a chuan a kutah a lo vuan nghal a.

"Bawiha..hre..hre reng rawh, i chak zawk...i chak ber." tih chiah a sawi thei, a chatthla zui nghal a. Daniel-a rilru na lutuk leh hrehawm ti lutuk chuan apa ruang chu a kuah a, a awrawl zawng zawng chuan a tap a. Chung lam hawi chhovin a rak hian a rak vak vak ringawt mai, "Min ngaidam rawh u..nu..pa, in tellovin engtin nge ka awm ang?" tiin a tap hawm hawm ringawt mai a ni.

DAniel-a chu an rawn buaipui nghal a, police leh tlangval thenkhatte chuan pawnah an kuah chhuak hial a, thenawm khawvengte chuan an hnem mawlh mawlh a. Mahse a tap bang hleithei lo, "An tellovin..an tellovin engtin nge ka awm tak ang?" tiin a tap zawih zawih mai. Chutah an inkawtah chuan car pakhat hi a rawn ding a, Pu Chhuma car a ni.

Car atang chuan Melody chu a rawn chhuak a, DAniel-a nen chuan an inkuah nghal. "MElo..ka nu leh pa..ka nu leh pa an awm tawh lo." tiin a insum zo lo chu a tap hawm hawm mai. Police dang te pawh chuan Pu Chhuma rawn chhuak chu salute an lo pe sap sap hlawm a, ruang chu a han enfiah ve a.

Dimna nei miah lova thah an ni ngei a ni tih a chiang bawk a, "DUSTIN MALSAWMZUALA BAWK ANI MAW.." a ti vawng vawng mai. Chutia Melody'n kuah chunga a hnem mawlh malwh lai chuan kawng sir atang hian Zeros-a leh LAzarus-a ten an lo en reng chu DAniel-a chuan ava hmu a. An thil tih a ni tih chu a hrethiam sa vek tawh, an rawn la nuih vur vur bawk a.

TO BE CONTINUE

(Next chapter last)