UNHOLY CONFESSIONS - II (Mizo Horror/Slasher Story) Written by : Aaron Malsawmdawngzuala WARNING : 18+ Chapter - 4

 UNHOLY CONFESSIONS - II

(Mizo Horror/Slasher Story)

Written by : Aaron Malsawmdawngzuala

WARNING : 18+

Chapter - 4

**************************

Farm house chhungah chuan Zorema leh X-a te chu an la awm reng a, "Khawngaihin min chhuah rawh...ka thil tih sual zawng zawngte kha ka siamtha vek ang. Ni e, ka inpuang ang. Ka thah alawm, lethal injection hmangin kan that a ni ka nupui kha." tiin Zorema pawh chu a inpuang ve ta nge nge a.

"Khawi atanga i neih nge lethal injection chu?"

"Doctor min pek ania, dark web atanga a chah a ni."

"Doctor chu tunge a hming?"

"Dr Sanga ania, ka...ka thurualpui ania."

"Engzat nge i pek?"

"Cheng nuai 10."

"Khawia pawisa nge?"

"Kan..kan nu pawisa vek a ni."

X-a chu a thinrim hmel kher mai, "Min chuah tawh rawh, thudik engkim i hre tawh a, min chhuah tawh rawh, khawngaihin.." tiin Zorema chuan a ngen leh mawlh mawlh a. Mahse X-a chuan chhuah mai a tum lo kher mai, "I inpuan avang ngawt khan ka chhuah mai che i ring em ni? Tih ve tur i nei, i nunna chhanhim nan." a la ti ta cheu mai.

Zorema pawh a tap pur tawh, "Eng...enge ka tih ngai? Engthil phiangsen nge ka la tih ngai cheu va?" tiin a vin khur khur mai. "I nupui a chhungte...i nupuia chhungte i phone ang. Tu ber nge i phone dawn ngaihtuah chiang vat la, tichuan ngaihdam i dil ang, kei nilovin. An ngaidam che a nih chuan i him anga, a nih loh chuan i thi ang." a ti leh ta mai.

Zorema chu a mangang kher mai, a ngawi reng ringawt. Phone pakhat chu X-a chuan Zorema bulah chuan ava theh thla a, "Kha phone hmang khan phone vat rawh...in puang la, i inpuang duh lo a nih chuan i thi ang." a ti leh a. Zorema chuan phone chu a la a, mahse a call ngam mai hrih lo.

Tichuan khum hnuai atang chuan glass jar pakhat hi X-a chuan a rawn la chhuak a, mahse puanin a intuam avang chuan a chhungah chuan enge awm tih Zorema chuan a hre thei lo. "Dark web hmangin lethal injection in chah a, chutiang chiah chuan kei pawh thil ka chah ve a ni." tiin puan chu a phelh a.

Chutah glass burah chuan maimawm lian em em mai, tur ngah tak, Black Widow spider an tih chu panga vel lai an lo awm a. Zorema chuan a hlau kher mai, "Hey, nilo...eng..enge kha kha?" tiin a khur nghal char char. X-a chu a khi suk a, "Rannun seh angin i nupui kha in that a, tunah chuan nangma hun a ni ve tawh. Rannung seh tak tak i ni ve thung ang, i hun a intan e." tiin a chhang ta a.

Zorema chuan phone chu a en vang vang a, a thih ve mai a hlau bawk si. X-a lah chuan maimawm awmna bur chu hruiin a lo ven mual mual a, Zorema awmna chung chiah a thing in khamphei ah chuan a bang liam a. A hrui hmawr lehlam chu khum bulah chuan a suih a. Hrui hnuaiah chiah chuan bati a chhi bawk a, bati alh chuan hrui chu a hliau nghal bawk.

"Hun i nei tlem ania, ti vat rawh." tiin X-a chuan a chhuah san daih mai. "Nilo..min kalsan suh. Min chhuah rawh, nilo.." tiin thawh a tum a. A ke a thlunna chain chu a mar veleh chuan current a kal a, chu current chuan Zorema taksa pum chu a shock ta mai. A khur cher cher a, a thal tawp mai.

Chutah a hrethiam ta, chain ah chuan X-a khan current a lo kal tir reng hi a lo ni. A chhuah hma chiah khan plug pakhat kha a on a, chu chu current ti kaltu ber a ni tih a hrethiam nghal bawk. Bati chu ava en a, hrui chu a hrawl that em avang chuan a la kang chat mai dawn lo tih chu a hria, mahse hun rei tak erawh a ngai dawn lo tih a hre bawk.

Hrui chu a chat a nih vaih chuan glass bur chu a rawn keh anga, a chhunga Black Widow spider te chuan an seh hlum ngei dawn tih pawh a hria. Mahse a taksa chu a chauvin na a ti ngawih ngawih, a chhan chu kha current shock kha a na em a ni. Mahse chhuah chu a han tum leh a, chain a mar deuh apiang chuan current chu a kal zel bawk si.

Police call chu a tum ta, mahse police number a chhu lut a, a tlang thei hauh lo. A chhungte number a chhut luh pawh chuan engmah a tlang thei lo. A tawp a tawpah chuan a nupui Nutei u, Rintea chu a call ta nge nge a. Phone chu a rawn in pick-up ve mai bawk, "Rina..Rina, kei..keimah i u Zorema...enteh, min puih angai. Khawngaihin, khawngaihin min pui rawh." a ti nghal vak vak a.

Phone atang chuan Rintea chuan, "Enge ni vak vak a?" a rawn ti dam diai a. "Ihh...i u...Nutei, ka nupui kha. Rannung seh vanga thi a nilo, rannung seh vang a ni lo." a han ti leh hluam hluam a. Rintea chuan zawite hian, "A nih engvang nge?" a rawn ti sap mai. Hreh hmel tak leh mittui tla zawih zawih chung chuan, "Ka..ka thah a ni. Damdawi chak tak hmangin kan jection a...khawngaihin min ngaidam rawh. Ka duham vang a ni, Rina...pawisa ka duh luat vang a ni." tiin Zorema chu a tap zawih zawih mai.

Mahse Rintea chu a reh vang vang mai, "Rina..ka tihpalh. Min ngaidam hram rawh, a nih loh chuan ka thi mai dawn..thih ka la duh lo." tiin Zorema bawk chuan a ngen leh a. Mahse Rina chu ala ngawi reng, Zorema chuan bati chu ava en a. Hrui pawh a lo hliau chat tep tawh, a mangang tawh takzet.

"Rina..khawngaihin min ngaidam rawh. Anih loh chuan ka thi dawn...ka thi tak tak dawn ania." a han ti leh chiam chiam a. A tawpah chuan Rina chuan tah aw tuau hian, "U Zorem...i thi dawn lo, keimah zawk hian ka rawn that dawn che." tih pah chuan phone chu a dah nghal. "Nilo..HEllo, Rina, dah suh." tiin Zorema chu a rak chiam chiam a.

Chutah bati alh chuan hrui chu a hliau chat ta, glass bur chu a rawn tla keh chuai mai le. Maimawm panga te chu an rawn chhuak ta a, Zorema chu a mangang ta kher mai. Mahse a phone hmang chuan a lo kal hnai apiang chu a lo chhu hlum zel a, mak tak maiin a chhu hlum vek mai.

Amah pawh chu a thaw huai a, a thu hnawk mai. A him thei ta ah inngaiin a lawm rilru hle mai a, tunah chuan chu a chain chauh chu phelh a ngai ta. Tih dan a han zawng a, mahse chutia a hawikual lai tak chuan a hma zawn, a hma a Mama mutna khum hnuai atang chuan khatiang maimawm tur ngah ang chi tho kha tam tak an rawn vak chhuak ta sup sup mai.

A then bangah te chuan an vak kai chho va, tam tak an ni. An rawn chhuah belh zel a, a then chuan ril te an zam nghal bawk. A thenin Zorema chu an rawn pan bawk a, a hlau lutuk chu a mangang kher mai. Tlan sawn a tum lah in a chain ah chuan cuurent a rawn kal zel mai si a, a vawikhat shock lah tluk thal tawpna tham khawpa current chak a ni bawk si.

Current in a man loh nan chuan chain chu a lose deuh angai, mahse maimawm ho lah chuan an rawn pan zel mai si. A theih ang angin a phone hmang chuan a lo kal hnai ho chu a lo chhu pawp pawp hlawm a, mahse an tam lutuk tlat. A then a chain ah te chuan an rawn vak kai a, a tawp a tawpah chuan a pakhat chuan a chawnah a seh ta.

A na ti lutuk chu a zuang awrh a, a thal nghal tawp. Chuveleh maimawm dang tam tak chu a del pherh nuai hlawm a, a chungah chuan an rawn lawn kai ta sup sup mai le. Pathum vel chuan an seh leh a, a na ti lutuk talna lamah chain chu mar leh in current a kal leh ta. Maimawm seh vanga na bawk, current in shock bawk, a taksa chu a na chhuak vek a ni ber mai.

Chutah maimawm tur tamtak a kawchhunga lut te chuan an hna an rawn thawk tan ta a, a chil phuan a rawn chhuak tan ta. A khur cher cher a, maimawm dang chuan an seh tawh lem lo. A chhan chu heng maimawm te hian mihring tih nat hi an tum ngai lem lova, mahse thah tuma tihbuai an nih erawh chuan an seh ta mai thin a ni.

Zorema chuan a na chu a tuar zo ta bik lo, a thi ta nge nge a. A thih veleh chuan X-a chu a rawn lut leh a, Zorema ruang chu a rawn en vang vang mai. A phone a phawrh a, "I tlai tawh na chungin i lo thleng tep tih ka rawn hrilh mai mai che, lo thleng law law rawh. Mahse thil duhawm loh tak hmu turin inpuah chah lawk ang che, kei erawh chu min hmu lovang." tiin Abawihi chu ava text leh a, farm house chu a chhuahsan leh ta a ni.

*****************************

Dar 10 a lo pelh tawh avang chuan dawr zawng zawng pawh a lo inkhar vek tawh, Puipuia leh Pu Rinawma te pawh chuan Abawihi chu khawi ber nge an in an hre tawh ta bik lo. "Khawi lam atangin nge a rawn kal reng reng?" tiin Puipuia chu a han zawt a. "Saw lam atang sawn a rawn kal ni maiin ka hria...ka lo en chiang lova." tiin Puipuia chuan a chhang a.

Chutih lai chuan phone a rawn ri a, "Hello Sir, mibo an rawn report a..hei Station atangin kan rawn hrilh che." tiin constable pakhat chuan a rawn hrilh leh ta mai a. Pu Rinawma pawh a phu zawk mai, "Enga? Mibo dang leh maw?" a ti hu mai. Puipuia pawh chu a lo mangang kher mai, "Station ah kan let leh vat angai." tiin Pu Rinawma chuan a phone chu a ak tha a.

A han inngaihtuah vang vang a, "Fela, nangin delivery girl kha lo chhuichhuah tum la. Kei Station ah ka va let leh ang, chuan Puipui..nang chu inlamah haw rawh." a han ti leh a. Puipuia chu a han ngawi deuh dat a, "Ih...Teruata te in lamah ka va phei ve zawk ange." tiin a chhang a. "Awle, anih chuan ka kal ania." tiin a kalsan dun ta a.

"Engtin nge ka han zawn chhunzawm ang aww...chu nula chu a hming i hre reng reng em?" tiin Fela chuan a han zawt a. "Aih..engmah pawh kan inhrilh hman lo. Sawi tak ang khan ka nu kha a rawn zual thut bawk sia, ka hmanhmawh em a ni." tiin Puipuia chuan a lo chhang a. "Aw a nih, keipawh kan kal phawt ange." tiin Fela pawh chuan a kalsan a, Puipuia pawh Teruata te in lam pan chuan a kal ve leh ta a.

Pu Rinawma pawh chuan Station chu a thleng thuai a, Abawihi pu leh a cousin te an lo awm kim thap mai. Abawihi patea, Zorema bo thu an rawn report a lo ni. Thil awmzia an han sawi chuan Pu Rinawma chuan a thuttir hlawm a, "Zorema thlalak chu ka lo en thei angem?" tiin a han dil a. Abawihi Pu, Pu Duha chuan an chhungkaw thalak chu a phone ah chuan hmetchhuakin Pu Rinawma chu a entir a.

Zorema chu kawk in, "Helaia kawrsen ha hi ania, kha aia chiang zawkin a thlalak chu in lamah a awm daih a, tah pawh khan a hmel a lang chiang tho ang chu maw.." a han ti deuh nuah nuah a. Mahse Pu Rinawma chuan reilote bak Zorema thlalak chu a en lo, a bul deuh lawka mi, Abawihi lo ding ve chuan a mit a la takzet.

Abawihi zawk chu kawkin, "Hei i tunge?" tiin a zawt ta daih mai. Pu Duha leh Abawihi cousin, Kima chu an in en hu a. "Ngati nge, ka pu? Kha chu ka tunu Abawhi a nih kha, i hria em ni?" tiin Pu Duha chuan a zawt let a. "Henu hi ka hmuh angai, khawiah nge a awm?" a ti leh a. "A mu tawh a, room ah a awm ang." tiin a cousin Kima chuan a lo chhang a.

Mahse Abawhi chu a roomah chuan a awm hauh lo tih an hre lo, a chhan pawh a ruka a chhuah vang a ni. A chhuah lai khan a pate Zorema a bo avangin an buai em a, Abawihi chu an lo ngaihsak hman lo a ni. "Ka pu, engthil nge ni reng reng a?" tiin Pu Duha chuan a zawt leh a, Pu Rinawma chuan a hrilh fiah ta vek a.

Mahse Pu Duha te putu chuan mak an ti kher mai, "Shadow X chu kan hre ve alawm, mahse a thi daih tawh. Kum 3 vel kal ta daih tawh khan kah hlum a ni tawh, a thlanah pawh ka tunu hi a kal fo asin." tia Pu Duha'n a chhang chu Pu Rinawma pawh a meng bial kawk mai. "Enga? Shadow X chu tunge a nih in hre ve amaw?" a ti hu mai.

"Hria e, a victim te zingah pawh ka nau Abawihi hi a tel ve a ni. Mahse thudik a zep ruk a hrilhfiah duh vang a ni a, tun thlengin kan chhungkua hian kan sawi darh duh lo. Mahse tiang a nih takah chuan ka han sawi ange, Shaodw X chu a thi tawh alawm." tiin Kima chuan a hma a Nghaka phuba lakna zawng zawngte chu a hrilh ta vek a.

Pu Rinawma chuan mak a ti kher mai, "Engpawh chu nise in nau Abawihi chu ka biak angai, in fapa Zorema bo pawh kan chhui awlsam thei deuh mahna." a han ti a. Lungawilo deuh tak chuan Pu Duha chuan, "Anih chuan kan fapa Zorema hi Shaodw X thar chuan a man ve angah i ngai tihna em ni?" a han ti deuh kher a.

"A man chu ka tilo, mahse hei tunah tlangval pakhat a nung chunga hal hlum niin a DNA atangin tunge a nih kan hre thei chauh a ni a, boruak a ral muang lo mek chu a nih hi. He Shadow X thar hi a hmaa mi ang khan thil tisual te chauh a hrem nilovin, tual a thah duh hrim hrim vangin X-a chet dan hian a che mai mai a ni thei bawk, tuma hriat a nilo." tiin Pu Rinawma chuan a vin let hrep mai.

Kima chuan a pu chu a darah a beng thak thak a, "Pu, a sawi dik alawm." tiin a pu chu a hnem a, Pu Duha pawh chuan a chhang let ta lem lo. "Ka pu, kan kal ang...Abawihi chu i hmu dawn nia." Kima bawk chuan a ti leh a. Pu Rinawma chuan constable Fela chu a phone a, thil chinchang a hrilh fiah hnu chuan Abawhi te in lam pan chuan an kal ta a.

*****************************

Abawihi chuan farm house chu a hmu ve ta hram e, sana a han en a, dar 10:30 a lo ri daih tawh. Dar 9 a thleng tur kha darkar khat leh a chanve laiin a tlai tih a inhriat chuan a patea chu dama a hmuh pawh a beisei tawh bik lo, mahse a pan ta tho va. Kawtah chuan scooty chu a ti ding a, kawngka chu a va pan hnai a.

A han kik karh karh phawt a, mahse chhangtu an awm lo. Vawi 5 chuang a kik hnu pawh chuan chhangtu an la awm chuang lo. A reh vung vung mai si a, hawn a han tum a. A lo inkalh hauh lo mai, Abawihi pawh chuan mak a ti angreng kher mai. Hlau rilru tak chung chuan inchhung ah chuan a lut a, mahse a lo ruak vek.

Kawngka pakhat chiah a awm a, a bak zawng chu bungrua engmah awm lovin inruak satliah ang chiah a ni. Kawngka lam chu ava pan a, hawn a han tum leh a. A lo inkalh lo leh ngei bawk, mahse a hawng chiah chu a rin loh lutukin step chhukna a lo awm nghal a. Step tawpah chuan kawngka dang a lo awm leh bawk, Abawhi chu a la chhuk mai lo.

A hlau bawk si, a patea a ngaihtuah bawk si. Tin, Shaodw X chu tunge a nih a hriat chak em avang pawh chu a ni tel bawk. Tichuan a huaisenna zawng zawng sawm khawmin step ah chuan muangchang hian a chhuk thla a, a khur deuh dar dar mai. A zuk thleng thla a, kawngka chu hawn leh a han tum a.

Mahse tun tum chu a hawng mai thei lo tlat, a han nam deuh vak vak a. Mahse a inhawng thei chuang lo, a chhuih deuh thuai a. A inhawng rawk mai, chutah a thil hmuh avang chuan a ding ngil nghal at a. A au vak a, a hmui a hup nghal. A patea ruang, maimawi vak nuai nuai kara chil phuan nena lo let reng mai chu a en rei thei lo.

A maimitchhing vat a, maimawm thenkhat chu a lamah chuan an rawn vak phei a. Rang lutukin step ah chuan a chho lehnghal vat a, inchung lam chu a thleng chho rang kher mai. PAwnah chhuah leh a tum a, mahse thil nal tak rapin a tlu hlauh mai. A tluk pah chuan cement chhuat chang lutuk ah chuan a lu a vaw chawrh a, nikhawhrelovin a awm nghal.

*************************

Abawihi te in lamah chuan Pu Rinawma te leh Abawihi pute pawh chu an thleng ve nghal a, Abawihi pi chuan, "Zorema chu in hmu tawh em?" a lo la ti nghal chul zui a. "Khawiah nge Abawihi a awm?" tiin Pu Duha chuan an nu chu a zawt nghal a. Abawihi Pi, Pi Thangi chuan, "A roomah a awm aniang chu." a lo ti sam et a.

"Keiman ka va ko ange." tiin Kima chu a nau Abawihi room lam pan chuan a kal nghal a. "Engthil nge ni reng reng a? Khawnge Zorema chu, a chinchang chu in hre ta em?" Pi Thangi chuan a han ti leh a. "Duhtak, an zawng mek a. Abawihi hi engemaw thilah hei, police te hian an be duh a, hlauhthawn chiamna tur a awm lo ania." tiin Pu Duha chuan a lo hrilhfiah vat a.

Chutia an inbiak lai chuan Kima chu rawn tlan let vatin, "Abawihi a awm lo, ka hmu lo." a rawn ti ta mai a. Room lam pan chuan Pu Rinawma chu a tlan phei ve nghal a, midang chuan an zui ve bawk. Abawihi room chu an han en a, Kima sawi ang ngeiin Abawihi chu hmuh tur a awm lo. "Khawnge a awm? A chhuak lai hmu in awm em?" tiin Pu Duha chu a vin nghal hlur mai.

"Pi, engtik laiin nge a chhuah, i lo hmulo em ni?" tiin Kima chuan api chu a zawt a. "Kan buai nuai nuai a, midang dang kha i pa Zorema zawng turin in chhuak a, a lo la haw velo te pawh a ni maithei asin. Roomah a awm reng turah ka ngai mai a, ka lo hre bik hleinem a chhuah lai..." tiin Pi Thangi chuan a chhang a.

Constable Fela lah chuan, "Shadow X? Shadow X bulah a awm a ni lo maw?" a lo ti zauh pek a. Chuveleh Kima chu a hlauthawng hle mai, "Nilo..Sha..Shadow X bulah chuan a awm lovang. A thi tawh, kan sawi mawlh mawlh kha." a ti vin deuh hlur a. "Tunge chupa chu? Tumaw a hming?" tiin Pi Thangi chu a lo hrilhhai nasa mai.

Abawihi pi, Pi Thangi hi lung tha lo nei a nih avangin ahma a Abawihi chungchang zawng zawngte kha engmah an hrilh ve lo a ni. "Ngawi rawh u...Abawihi chu tu emaw ber khan han phone teh u." Pu Rinawma chuan a han ti vin deuh thak a, an ngawi ta thiap mai. Kima bawk chuan a phone nghal a, mahse a in-ring quit thak thak mai.

"A la thei lo." a ti zawi sap a. "Han call leh teh, room ah hian a phone a lo awm mial maithei asin...han ngaithla chiang teh u." Pu Rinawma bawk chuan a han ti leh a. Kima chuan a han call nawn leh a, a ring lai chuan an vai chuan Abawihi room chu an dap a. Mahse an dap chhuak vek a, an la hmu chuang lo.

"Motor ah tracking device a awm." Fela chuan a rawn ti hlauh mai. Chuveleh Pu Rinawma chuan, "Inah hian lo awm ula, kei leh Fela hian Abawihi phone chu kan lo trace nghal dawn ania." a ti a. Tichuan Abawihi phone number chu an pe a, Inspector Rinawma leh Constable Fela te chu an chhuak ta nghal a.

***************************

Abawihi chhuata let reng chu X-a chuan a lo hmu kar mai,  a ruahmanna vek a lo ni. Abawihi chu thudik hrilh a duh a, amah ngeiin kawl ngei a duh vangin thang a lo kam lawk a lo ni. A patea ruang chu a hmu anga, tichuan a rawn tlan chhe chho nghal dawn tih pawh a hria. Chuvang chuan Abawhi chu Farm house a rawn luh lai zawng zawng te, a patea ruang lam a pan thlak lai zawng zawngte chu a lo hmu vek tihna a ni.

Khatia a patea ruang awmna lam a pan lai khan X-a chu inchhungah a lut a, Abawhi tawlh thlukna turin kawngka bul chiahah chuan thil nal a tat hi a lo ni. Hetiaa tihna chhan chu Abawihi kutthlak a duh loh vang a ni ber zawk, mahse a tlan chhuah chuan engkim police hnena a sawi a hlau bawk si a ni.

Tichuan chhunglam atang chuan farm house kawngka chu tala hian a kalh a, tichuan Doctor Sanga, Zorema nupui thihna a inhnamhnawih ve, doctor tenawm tak chu that ve tur chuan Abawihi chu a kalsan leh ta phawt a. A car thuhruk lam pan chuan farm house hnunglam chu a pan a, tichuan motor ah chuan lutin khawnchhung lam pan tur chuan a tlan chhuak ta.

Chutih lai chuan Mama pawh a rawn harh hlawl mai a, a rawn thaw nghal hrawk hrawk mai. Thisen a hloh hnem tawh em avang leh a ban ruh veilam tliak bawk si nen chuan han thawh mai a tum chu a tho hleithei lo, "Ka ban...ana lutuk, ka ban." tiin a then sawk sawk a. Thei leh thei lo chuan a tho tawk tawk a, a ban na lam chu a dawm bawk.

Chu chu X-a chuan a lo hmu vek a, a bul deuh lawkah chuan motor chhungah la awm reng chung chuan a lo enthla reng mai. Motor light eng chu Mama pawh chuan a hmu a, rang takin ava pan nghal. "Min..min pui ru...khawngaihin min pui ru." tiin a au vak vak a. X-a chuan mittui tla zawih zawih chung chuan, "I dam ve hi ka remti hlawl lo aniang nge, kan intawn leh chat danah hian a chiang mai." tiin za lo tak chuan a khi suk a.

Chutah a motor chu a han ti nung a, chak mang kheng chuan Mama lam pan chuan a tlan phei ta. Mama chuan chu motor, a lama lo tlan phei chu a speed atang chuan amah puih tum nilova thah tum zawk a ni tih a ring thiam nghal mai, a tlan let leh nghal vat a. MAhse X-a chuan a umpha thuai a, a su leng lawp mai.

Mahse ala thi lo, a hmai chu thisen hian a bual khat vek a. X-a motor hma zawnah chuan a let reng a, dimna tel hauh lo chuan X-a chuan MAma keah chuan a chil leh a, a ruh pawh a tliak ri rawp rawp mai. Au chhuak tur takngial pawhin chakna a nei tawh lo, X-a lah chuan a tlan liam san daih mai bawk si.

**************************

Abawihi chhungte chu mangang tak chuan inah chuan an la awm reng a, anni mai nilovin an inchhungah chuan thenawm khawveng te pawh an pung leh nasa tawh mai. Zorema bo thu chu Pi Thangi chuan a thian, nuho thenkhat te a lo hrilh hman hi a lo ni. Nu ho beng a thleng tawh bawk a, thenawm khawveng ten chuti taka an hre tam chak chu a awm lo hran love.

Chuta karah Abawihi pawh a bo tel thu an han hre thar leh zel nen, Pu Duha pawh a zak letling zawk khawp mai. Thenkhat lahin zeldin titi an lo vawrh bawk, police dangte hial pawh an inah chuan an rawn kal a ngaih phah a. YMA hruaitute lam pawh chuan engtia tih chi nge tiin rorel dan thiam har an ti ngang mai, case khawihtu ber lah Abawihi phone trace in a kal bo daih mai bawk si nen.

Chutia an buai luai luai lai chuan motor pakhat hi an inkawtah chuan a rawn ding a, thinrim hmel tak hian tlangval pakhat, kum 30-35 vel niawm tak hi a rawn chhuak a. Mahse in bul vela mipui lo tam em em mai chuan a tih hrilhhai hmel hle. A hawi deuh hu hu a, inchhungah chuan a lut a. Pi Thangi chuan a lo hmuh veleh chuan, "Rinte, i lo hre ve a nimaw?" tiin a rawn pan nghal.

Chupa chu tudang nilovin Zorema inpuanna lo ngaithla zo chiah tu, a nupui thi ta Nutei unaupa Rintea a lo ni. Thudik engkim a hria a, chumi thinrim chu Zorema chhuahchhal tur leh sawisa tura lo kal a nih hmel. Hriatthiam loh hmel tak chuan, "Engthil maw? Khawnge Zorema a awm?" tiin a lo zawt let daih a.

Pu Duha pawh chu lo kalin, "I hre lo amaw? Zorema leh Abawihi an bova." a lo ti ve bawk. Rintea chu a meng phawk nasa kher mai, "Enga? Chuvang em ni heng mipui zozai hi an lo kal?" tiin a han zawt leh a. "Nia, polcie henah pawh kan report tawh. Tunah Inspector Rinawma Abawihi phone trace-in an chhui mek a, chanchin kan lo nghak tawp mai a ni." tiin Pu Duha chuan a lo chhang leh a.

Rintea chuan mak a ti tulh tulh mai, "Enga? A..Abawihi a bo bawk maw? Police..Police ten a phone an trace mek a? Enge awmzia?" a ti hu mai. "Zorema phone chu trace theih pawh a ni lo, sim card nen lam a chhe vek a nih hmel. Mahse Abawihi erawh a ring quit thak thak ringawt a, chu chu an trace..hei kan mangang khawp mai." tiin a chhang leh a.

Rintea chuan sawi tur pawh a hre lo, a mi huat em em, a unaunu thattu, Nutei pasal Zorema ngei mai chu a lo bo tih a hre leh zel chu awmdan thiam har a ti ngang mai. Chutah Abawihi a lo tel ve zel bawk nen, darkar khat vel liam ta mai khan Zorema nen chuan inbia in ngaihdam rawn dilin a rawn inpuang kha a ni si a.

"Enge i rawn tih reng reng a? Zorema leh Abawihi bo thu i hriat vanga lo kal ve turah ka lo ngai che asin?" Pu Duha bawk chuan a rawn ti a. Rintea chuan chhan mai ngaihna a hre lo, "AA..ihh..ka rawn, ka rawn tlawh mai mai che u mawle. Mipui an..an lo tam sia, mak ka ti renga." a ti bah deuh nuai a.

"Patea nen engtik nge in inbiak hnuhnun ber?" tiin Kima chuan a rawn zawt veleh a, Rintea chu a phu deuh zuk mai. "Ihh..kan..kan inbe lo." tiin dawt a sawi ta ringawt a, thudik puan chhuah vek chu a la hun hrih lo angah a ngai te pawh a ni mahna, "Pa Duh, ka chhungte ka va hrilh ve ange." tiin Rintea bawk chu a kal leh daih mai.

Pu Duha te pawh chuan engmah an sawi hman lo, Rintea chu a motor lamah chuan a phei a. Motor chhungah chuan lutin a rilru chu a buai hle mai, a thudik hriat zawng zawng khan a tih nat tawh nak alaiin, a rilru tibuai zual turin Zorema ber a lo bo daih si, chutah pawi sawi ve lo Abawihi a lo bo tel ve bawk nen.

A motor chu ti nungin a tlan ta vang vang a, Pu Duha te pawh chu an hrilhhai angreng kher mai. "Enge maw a hriat le?" a ti deuh hu a. Kima chu a ngawi vang vang a, "PA Rintea hmelah khan dik lo a awm?" a han ti sap a. "A thawng ve deuh te pawh a ni maithei asin." Pi Thangi chuan a lo ti ve bawk a.

"A thawn vang chu thudang nise, tinge a kal leh nghal daih? Chubakah min chhang bah deuh nuai bawk a, engemaw tak hriat chu a nei a ni chiang mai." tiin Kima chuan Rintea chu a ringhlel ta tlat mai. Chutih lai chuan YMA hruaitute pawh chuan tlawmngai thenkhatte chu veng mawng lamah leh ngaw hmun velah te chuan an lo tir liam thla vek bawk a, veng pum mai chu an buai tlang kher mai.

****************************

Abawihi chu a rawn harh a, a lu chu na a ti takzet. Zawi muang chuan a tho chhuak a, a lu chu a la hai deuh muai muai bawk. A awmna chu a han en kual a, farm house ah a lo la awm reng tih a hriat chuan a hlauthawng nghal kher mai. Kawngka lam pan chuan a tlan phei vat a, mahse hawn a han tum chu pawn lam atangin a lo inkalh daih mai.

A ipte a han dap a, a phone chu a hmu ta hauh lo mai. "Nilo..khawnge ka dah hman? Ka thlauh em mawni le?" tiin a inzawt nghal a. A patea ruang awmna lam, step ah chuan a tlanchhiat pah khan a thlauh ngei a nih a ring ta. A zu hawi thla a, mahse eng phone mah a hmu lo. Hreh tak chung leh tap teuh chung chuan muangchang hian a chhuk thla leh a, mahse a hmu hauh lo.

A patea ruang awmna room kawngka chu a han melh vang vang a, "A chhungah kha chuan ka thlauh lo tih ka chiang, a chhan chu ka chhuah pah khan ka ipte channah hian ka la dap fuh ngei a ni." a han ti nuah nuah a. Step ah chuan a chho leh a, inchhung chu a enkual a. Mahse bungrua pakhat pawh awmlohna inruak ah chuan a phone chu a awm lo tih chu en mai pawhin a lang chiang hle, a han inngaihtuah vang vang a.

"Kawngka pawn lamah a inkalh, a awmzia chu tu emaw a lo lut. Ka phone...ka phone min laksak a ni." a ti zawi sap mai. Rang tak chuan kawngka lam chu a pan leh a, pawh hawn a han tum a, mahse a thei lo nasa mai si. A chhum vak vak a, "Min pui ru.l..khawngaihin min pui ru." tiin a au vak vak a.

MAhse chulai ramhnuai pil ril tak atanga a au thawm chu tuman an hre der si lo, a thu hnawk a. Kawngkhar chu ngengin a tap zawih zawih mai, chutia a tah hawm hawm lai chuan tukverh pakhat ava en chu tukverh bar leh a glass inkara bawm ang deuh mai, tetakte lo inzep chu ava hmu fuh hlauh mai.

Rang lutukin ava pan nghal a, a va enchiang a. Voice recorder tetakte, naute kuttum tiat vel lek hi a lo ni. A han play a, a pate Zorema aw ngei chu a rawn ri chhuak ta. "Lethal injection hmangin kan chiu a, tichuan rannung seh anga a lan theih nan Doctor Sanga'n rannung sehna hmuamhma a siam chawp a ni." tia a patea'n a nupui Nutei a thah dan zawng zawng chu a ngaithla ta vek mai.

Abawihi mak ti lutuk leh rilru na bawk si chu awmngaihna pawh a hre lo, X-a'n a patea a manna chhan leh Mama a manna chhan chu a hrethiam ta chiah. A nel em em, a patea nupui, Nutei chu tudang nilovin hmeichhe dang vang leh sum vang chauhvin a patea ngei mai chuan a lo that reng mai si.

A thingthi hnawk a, a tap hawm hawm mai. Chutah engemaw hriatchhuah nei zawk ang mai hian a tap bang hmak a, "Doctor..Dr.Sangtea...a dawt leh chu Doctor Sangtea a ni." tiin a tho nghal vat. Tukverh chu tihchhiat theih a ni em tiin a han en a, mahse glass chang tha chi veka siam a lo ni bawk si.

Chhuah ngei chu a tum ruh nasa, mahse chhuah theihna awmchhun tukverh lah chu a glass a chang tha chu thuhran nise, iron bar a lo la awm tel zel bawk nen. Tukverh tihchhiatna turin hmanrua engmah a awm silo, in chu a ruak hian a ruak vek mai bawk si. Bathroom ah chuan a lut a, mahse ventilation awmna chu a sang lutuk mah mah, a mangang lutuk chu a tap pur ringawt tawh mai a ni.

*************************

TO BE CONTINUE