KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-2

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-2

************************

Chutia a rawn melh rum let ve ngam tih Dawnga'n a hmuh chuan a nuih a za kher mai, "Eheu...mi melh ve ngam ka ti." tih pah chuan ava pan phei nghal a. A theihpatawp chuan Daniel-a chuan a han vai ve deuh pawp a, mahse a thelh chiang ngang mai. Dawnga chuan a lo bum a, a khawih leh ta zek mai.

Chhuatah chuan Daniel-a chu a thal leh tual a, "Min khawih te i tum ve amaw? Khawnge, khawih nat deuh hlek i ngai a nih hi.." tiin hnek leh tum chuan a han tin uai a. Mahse a kawrhmaah chuan artui hel a rawn keh pherh nuai mai, a va hawi phei chu Melody a lo ni. Artui pahnih hi a lo la keng a, "I ngam chuan han khawih leh teh, artui hi i head tawh ang." a lo ti ve pang pang mai.

Dawnga mak ti bawk si leh thinrim bawk si chu a khi suk a, "Hey, nang patil kha...he minep hi i rawn chhan dawn tihna em ni? Nang hmeichhia khan...a ve lutuk che chuan.." a han ti deuh hrep a. "Aw chhan e, chhan tehreng mai. I ngam chuan khawih leh rawh, Hmela." tih pah chuan ava vawm leh a, Dawnga kekawrah chuan a pherh leh thlawp mai.

Dawnga chu a thinrim tawh hle mai, "Nang hmeichhia kha...nang patil kha i chak dawn lo." tih pah chuan ava tlan phei a. Melody lah chuan artui pakhat, ala ken lai chuan a han vawm leh a. DAwnga chuan a head siah mai, a hmaiah chuan a fan thla duai duai a. A then an lo nui a, Melody chet dan an hmuh chuan DAwnga thiante pawhin chet ngaihna an hre lo, an lo en tawp mai a ni.

"Hmeli, engvangin nge min vawm ve khaglang a?" tih pah a hnek tuma a tin uai lai chuan Melody chuan confi zet hian, "Min hnek la, min khawih rawh. IPC Section 354, mipa in hmeichhia kut khawlaiah kut a thlak a nih chuan kum nga chhung i tang ang." a lo ti zat zat mai. Student dang te pawh chu an ngawi thiap a, chutia Melody tawng zuah zuah mai chu an vawikhat hmuhna a nih vang pawh a ni mahna.

Dawnga chu a han nui lui leh sak a, "Hetah tumah police an awm lo, hnek vung bur che pawh ni ila prove a awm loh chuan eng jail ah mah ka tang lovang." a han ti leh khur khur a. Chutah hnung lam atang chuan Daniel-a chu rawn tawng ve in, "Nia, i duh tawkin khawih rawh. Hei evidence ka lo la zel ang." tiin a phone camera chuan a lo record reng mai.

Student dang ho chu an nui tet tet tawh hlawm a, Dawnga chu a zak angreng kher mai. Isaka chu rawn pheiin, "A tawk e, Dawngte...hei dar a ri dawn, lut zawk teh ang." tiin a rawn pawt sawn a. DAwnga chuan Melody leh Daniel-a te chu a melh rum dun kher mai. Class ah chuan an chho san t aa, student dangte pawh chu an kal dar ve mai a.

Melody chu an en hrek hrek hlawm mai, "I tha em?" tiin Daniel-a kawra coffee kai huh vek te chu a rawmawl chuan a hruk sak thuak thuak a. "Ka tha alawm, i chungah ka lawm khawp mai." tiin Daniel-a chuan a lo chhang a. "I kawr a huh vek bawk sia, class kan la nei bawk sia, engtin nge kan tih ang?" Melody chuan a han ti leh a.

"A pawi lo, a huh chung hian ka ha mai ang."

"A chi loh, a huh chung te chuan...chubakah coffee rim a nam rum rum reng dawn asin."

"Tih ngaihna dang a awm tawh chuang hlei nem."

"Kawr lum i pai lo ami? A hlangin ha mai la?"

"Pai lo, khua a lum em hi...a pawilo ka tih chu, tihian a ro mai ang."

"A ro mai ang tih ringawt a ni lo, a rimchhe dawn asin, chubakah i ban chuap mai ang."

"A baw hnem em em lo, rimchhe lovang."

"Ka kawr hi i ha duh mai em?"

"A chi nang, kawr i ha dawn lo asin."

"Aih, ka hak thuah alawm. I ha tawk em em ang, kha ha rawh."

Melody chuan a kawr chu a phelh a, a lai rawn lang zeuh chu Daniel-a chuan a lo hmuh hmaih lo nasa, a en vung vung mai. A t-shirt chung zawk MElody-i'n a phelh chuan a hnuai zawk ami chu tlem lo inhlimin a lai chu a lang ta reng mai a, amah ber lah chuan a hre tawh hauh si lo. Daniel-a lah chuan a en vung vung mai a, "Kha le." tiin T-shirt chu Daniel-a pek tum chuan a han lek kang a.

Daniel-a lah a lo la en tui deuh nge, hnuailam chu  alo la thir ngar ngar mai. Melody mak ti deuh chuan a kawr chu a han en chiang ve a, a lai lo lang a hmuh chuan a kawr chu a pawt thla rang nasa. DAniel-a pawh a phu zuk a, "Ih..aa..e, aw..ih, ka lawm e." a ti bah nuai mai. Melody pawh chuan sawi mai tur a hre lo, "Nia..ih..ha rawh." a lo ti ve leh ringawt a.

"Khitah..bathroom ah ka han inthlak ange." tih pah chuan bathroom lam pan chuan a tlan nghal daih a. MElody chu a nui deh var var a, "Class room ah ka lo awm ang." tiin a au zui a. A mitthla chuan Daniel-a'n a lai lang a lo en vung vung lai chu a han hmu nghal a, amah pawh chu a lai lek lek mai.

**************************

BAthroom chhungah chuan a kawra artui kai vel tifaiin Dawnga chu kawr phelh tung hian a thiante nen chuan an awm mek a, a thinrim chu bathroom chhungah chuan a tei vut vut mai. Bang chum deuh bur pah chuan, "Kha patil mai mai kha, a ve lutuk chuan a...mi ti zak kher mai." tiin a phun nuah nuah a.

"A rapthlak reuh khawp mai, hmeichhia lehnghal. A nasa ngawt ang, a den emai." Peka chuan a lo ti ve bawk. "Hmeichhe pangngai ni hek lo, patil a nih kha...a nasat lovin, bialnu pawh a nei chhelo thei phian ang chu mawle." Isaka chuan a lo ti ve bawk. "Rosy'n a rawn hmu lo chu ava pawi ve aw...han hmu se chu Melody nen khan an insual nghal ka ring." tiin PEka chu a lo khi vur vur mai.

"A la hria ang, a la hre khawp ang." tih pah hian Dawnga chuan a kawr huh chu a han thing vak vak a. Chutih lai tak chuan MElody t-shirt keng chungin Daniel-a chu a rawn lut ve hlawl mai. Dawnga te a hmu chu a ding chat a, "Michhe sawi chu koh aiin a hnai an tih thin kha, hei a thleng dik chiah a nih hi." tiin Isaka chu a lo khi suk mai.

Rum tak hian Dawnga chuan a melh khur a, a va pan hnai a. "Nepa, dawihzep pa. Mipa ve si, hmeichhe chhan ngaia awm...mipa diktak i nih chuan vawiin tlaiah gate bulah ka lo nghak ang che, i hlau a nih chuan i thiannu kha i lo hruai leh dawnnia." tiin a nuih vak vak a, a thiante pawh chu an lo nui ve bawk.

Mahse Daniel-a chuan engtin mah a chhang lo, a ngawi reng ringawt. "I lo kal ngam lo a nih chuan i nep hle aniang." Peka chuan a lo ti ve leh a. A kawr la huh deuh hnuang chu Dawnga chuan a ha tha mawlh mawlh a, "Kan inhmu dawnnia aw...i duh chuan nachhawkna te kha ei lawk la." a han ti deuh kher a.

Tichuan an pathum chuan an chhuahsan ta a, Daniel-a chu a lungawi bik lo kher mai. A kawr chu a phelh a, Melody kawr chu a ha a, a lo ha tawk ve mai bawk. A rilru tak chuan dawihzep a inti hle a, mahse Dawnga nena insual tur chuan a thisen chuan a ngam chiah si lo. A kawr bal zawk chu scooty hnuaiah ava dah a, tichuan class ah chuan a let ve leh a.

*****************************

Class banah chuan DAniel-a leh Robert-a leh Melody te chu an thu muang chang hrih a, a rukin Daniel-a chu a hawikual deuh sek mai. Reilote hnuah chuan MElody chuan, "Ka haw mai ange, tlaiah ka chhungte tumah an awm dawn silova, rawngbawl ka ngai dawn." tiin a kalsan ta a, Robert-a pawh bus ah chuan a thu lut ve nghal.

DAniel-a pawh chuan a scooty chu a han start a, a zam kher mai. Gate lam pan chuan a tlan phei zel a, a thinphu pawh a rang tha khawp mai. A rin lawk sa leh a hlauh ang ngei ngeiin gate pelh hret ah chuan Dawnga te thian pathum chu an lo awm leh ngei a, kawnglaiah tak chuan an lo ding a.

Daniel-a chu an lo tiding leh nge nge a, "Eu, ava huai sawt ve....a thiannu a rawn hruai lo nghal ringawt nia, ava pa tawh tak em." tiin Peka chuan a nuih tiah tiah a. Dawnga chuan scooty chhir pawp pah chuan, "Lo chhuk rawh le, ti chiah ila." a ti nghal khur khur mai. Daniel-a chuan a chil a lem dawk a, "U Dawngte, insual ka duh lo." a ti zawi sap a.

"I duh emaw duh lo emaw, vawiina in thil tih man kha chu in hmu dawn tho tho." tih pah chuan scooty atang chuan a tham chhuak nghal a, grass ah chuan a paih thal nghal tawp mai. PEka leh Isaka te chuan an lo chhuih rawn ve nghal bawk, "Han ti ding teh u...vawiina ka hnek hman loh aiah na tek tawkin ka han hnek ange." tih pah chuan a kut chu a elh ri a.

Hnek a tum chiah chu a kut chu tu emaw hian a rawn man sak a, an rinloh tak maiin Melody a lo ni. Dawnga dulah chuan a khup chuan a do pawp a, a maiah chuan a kick zui bawk. Dawnga hnar chu a thi a, "Ehe...min pet ve ngam amaw?" tih pah chuan DAwnga chuan a va pan leh a. MAhse Melody chuan self defense a lo thiam ngang mai, chumai nilovin insual a lo thiam takzet.

Palian em em chung si chuan Dawnga chu a dak awrh awrh reng mai a, Peka leh Isaka pawh chuan ka hau hian an en ringawt. Melody chuan Dawnga chu a vawi 6-na atan a bekah tak chuan a han kick hawi leh sawk mai a, grass ah chuan a thal tawp mai. PEka chu va pheiin, "I va che thei reuh ve..nangte hi.." tiin va khawih ava tum ve leh a.

Mahse Melody chuan a lo bum rang kher mai, tukhum vaw chawrh khawp chuan a lo thal der mai a. Chutah Isaka chu ava melh leh ta, Isaka chu a lo pawr tawh lo nasa. Melody chuan ava pan phei a, "Hey hey...hmeichhia i nia, ka khawih duh lo mai mai che a nih hi. Kalsawn vat rawh, ka tih duh miah loh ka ti mai tur ania." a lo ti khur hlak hlak a.

MAhse Melody chuan a pan hnai zel a, Isaka chu a tlanchhe titih hial mai. A tawpah kawngsira tiang pakhat chu la in Melody chu vuak a tum ta mai, mahse a lo bum hnehsawh lehpek kher mai. A tiang chu a laksak a, Isaka chu tiang tliak rum khawp chuan a hlap ve leh hrep mai a. Dawnga te thian pathum chu tumah tho tur an awm tawh lo, Melody chu mak tiin an en thap ringawt mai.

Daniel-a pawh chuan mak ti tak hian Melody chu a en tlawk tlawk a, "I na em?" tia a zawhna pawh chu chhan mai ngaihna a hre lo. "I tha em? I na em ka tih chu?" tiin Melody bawk chuan a han sawi vak vak a, Daniel-a chu a phu deuh zuk mai. "Aw..aih, ka na..na lo." a ti bah nuai mai. "Hawh min lo thlah rawh." tiin a scooty lam pan chuan kal phei a.

Daniel-a chuan a zui vat a, "Kal vat ang, student dangin min hmuh hmain.." Melody bawk chuan a han ti leh a. Dawnga te grass-a let reng chu melh zauh zauh pah chuan Daniel-a chuan scooty chu a ti nung a, an kal ta a. An inkawt thleng chu a thlah a, "Naktukah kan inhmu dawnnia." tiin Melody chuan a luhsan nghal daih mai. Daniel-a pawh chu a hrilhhai hman kher mai, a haw ve nghal mai a.

**************************

Principal, Pu SAidinga chu hmanhmawh tak chuan damdawiinah chuan a tlan kual vak vak a, chutah DAWnga thiante pahnih, ISaka leh PEka te, pilh pheng phunga an awm chu ava hmu a. Rang takin ava tlan phei a, "Khawnge BAwiha chu a awm?" tiin a zawt nghal. "A chhungah hian." tiin Peka chuan ward chu a kawk a.

Pu Saidinga chu a lut nghal a, Peka te thiandun pawh chuan an zui lut ve nghal bawk. Dawnga chu a hnar an lo tuam a, a vung luk a, a sen tur bawk. Melody chuan lo khawih na mah mah in a hnar ruh a lo hnek khawlo deuh a ni awm e, "Dawngte, engtia i tihnat nge? Kutthlakna ava ang ve, tu tih nge?" tiin a zawt nghal chiam chiam a.

Chhang mai lo chuan DAwnga chuan a thiante pahnih chu a han melh run a, Peka leh Isaka chu an meng kual zuk zuk ringawt. ZAwi sap hian, "Ka hre lo, face mask an vuah vek a." tiin dawt a sawi ringawt, hmeichhe kut tuar nih chu a zak ve pawh a ni mahna. "Tuten maw?" tiin apa chuan a lo zawt leh a.

"Kan insual puite, min rawn tibuai ringawt a."

"Chuan tu ber nge hnektu che chu i hre lo amaw?"

"Aw hrelo, an tlanchhe lehnghal vek alawm."

"Huiham, enge insualnaah hian i tel leh thin? Nangmah vanga ka mualpho nasat tawh zia hi i hria em? Colloge hi rawn kal ve tawh lo mai rawh, a hahthlak emai."

"Kan thiamloh a nilo ka tih chu...kan zo tep tawh a, ka kal awm emai a."

"I thiamloh pawh nilo mahse an pawi i lo sawi leh hmasa tawh a niang chu mawle, mi buaina thlentu mai i ni."

"A ninawm, na tawrh lai lai a min lo vin sek."

Rilru hah hmel tak chuan Pu Saidinga chu a thaw halh a, "RAwn peng kawi tawh suh ang che u...lo haw nghal ang che." a ti vin deuh hlar a. Doctor chu lo lutin, "E Pu Saia chu...i lo kal duh kher a, hei a tha lutuk alawm." a rawn ti a. "Anih a dam har angem?" tiin Pu Saidinga chuan a lo zawt let veleh a.

"Thla khat vel chhung chu indim se, a theih phei chuan pawn chhuak lo se a tha. A indim viau loh chuan a ruh hi a tihnat belh thei a, college pawh kal hrih lo mai se ka ti khawp mai." tiin Doctor chuan a lo chhang a. Pu Saidinga chu a ngawi vang vang a, "Doctor, pawn lamah ka lo be lawk che." tiin pawnah chuan a chhuak a, doctor chuan a zui ve bawk.

Ward chhungah chuan Dawnga te thian pathum chauh chu an awm a, "Ka va ngei mai mai tak em, college kal theih dawn loh phah ringawt." tiin DAwnga chu a phun nasa kher mai. "Dawt i lo va sawi thiam ve a.." tiin Peka chu a lo nui suk a. Thinrim tak hian Dawnga chuan, "Lo fiamthu suh, hmeichhe sawpa i awm kha zak ngawih ngawih rawh." tiin a vin hrep mai.

Peka chu a khi suk a, "Nangpawh a sawp ve tho che kha...engtin mah i khawih let ve loh kha." a lo ti ve leh a. A aia vin hian Dawnga chuan, "Chupawh nise, fiamthuna chi pawh a nih loh kha. Ngawi reng khan awm mai mai rawh, bialnu tur a lei a leisak ngai i nih kha." a ti leh hrep mai a, Peka pawh a ngawi chiang kher mai.

"Engemawni skills tak chu a zir a nih kha....a che rangin insual a thiam emai." Isaka chuan a lo ti ve nuah nuah bawk a. Rum tak hian a melh ngai melh tlawk tlawkin, "Phuba chu ka la tho tho ang, ala na ve khawp ang. Ka han dam anga e, ala chak dawn lo alawm." tiin DAwnga chu a inhrosa hlur mai.

***************************

Pi Zualtei rawng bawl mek lai chu Daniel-a chuan ava pan a, "Nu...englo, thil hrilh duh che ka nei a." a va ti a. Anu chuan a chawhmeh chhuan lai off meuhvin, "Enge ni i sawi duh a? Lo thu la..sawi dun ila." tiin an chawei dawhkan chu an kil dun a. "Ihh...internship kha kan neihna tur a chiang tawh a." a han ti leh a.

"Animaw, khawiah nge?" tiin anu chu a lo phur nghal hle mai. Hreh hmel tak hian Daniel-a chuan, "THailand-ah." a ti zawi sap mai. "THailand-ah daih maw?" Pi Zualtei chuan a lo ti hu mai. "Umm ni e, pawisa pawh a ngai hnem viau ang. Chuvang ania, ihh..kalloh mai ka duh a." a han ti leh a.

"Mahse i kal ve loh te chuan, internship te chu a pawimawh a ni lawm ni?"

"Pawimawh lutuk tho va, mahse pawisa kan neih ve miau loh chuan tihngaihna dang a awm hleinem."

"Mahse i pass ve dawn lo asin?"

"Aizawlah tih theih dan ka zawng mai dawn lawm, kan zirtirtute chu ka dil mai ang."

"An van ti awm ang lo ve in zirtirtute pawh chu...khawsak a in ang lo tih an hre ve vek awm sia, THailand daih daih han tih kher, a fair lo ve deuh a nih chu."

"Harsatna nei chu kan bulah sawi ru chu an ti tho amaw? Mahse a inthlahrunawm em a, kalloh mai ka duh."

Pi Zualtei chu a ngawi vang vang a, "Nia, i pa lahin hlawh a la la der bawk silo. Ani pawhin pawisa chu a nei lo viau ang, tunah phei chuan. Engtik nge in kal dawn reng reng a?" tiin a zawt leh a. "Thla leh ni 5 ah, kar 2 tha zen zawn bak a awm tawh lo." tiin a fapa chuan a lo chhang leh a. "Kalloh chu i hreh viau em?" tiin a zawt leh a.

"Hreh love, mahse kan zirlai atan a pawimawh dawn sia, kal chu ka chak ve tho." tiin a lo chhang a. "Nia, chutia i kallo hreh em em i nih loh chuan pawisa a ngai hnem dawn bawk si nen, Aizawla engtin emaw tih dan pawh chu i ngaihtuah mai angai dawn a nih chu." anu chuan a lo ti ve leh a.

"Um, a nih chuan kan Sir te pawh ka lo be leh ange. Anih chuan maw Nu, apa hrilh kher suh aw.." Daniel-a chuan a han ti a. "Awle, ka hrilh lovang." tiin anu chuan a lo chhang a. Roomah chuan a lut a, a ruk tak chuan kal chu a chak ve reng, a chhan pawh a tuina zawng tak, history chungchang vanga kal an nih dawn vang a ni.

***************************

Melody chu rawng a bawl mawlh mawlh a, dawhkanah chuan alu a vel mek a. Apa office bang pawh a rawn haw chiah a, "Ekhai, Station chhung chu ava lum duh ve leh." tiin a rawn phun lut nuah nuah mai. Melody pa hi Pu Chhunga niin Police Officer a ni. "Rin aiin i lo va haw hma leh si ve?" Melody chuan a lo ti a.

"Nia, rin aiin hna a tlem hlauh alawm mawle. Bawihte khawimaw, thingpui in ava chakawm ve.." a han ti thluk deuh raih raih a, "Gas ah sawn ka chhuang mek, lo va insiam mai rawh." tiin Melody chuan a lo chhang a. Pu Chhuma pawh chu choka lamah chuan rawn pheiin thingpui chu a insiam kurh kurh a, a fanu alu vel mek bulah chuan ava thu ve a.

Thingpui in pah chuan a phone chu a khawih mual mual a, chutah a fanu kut pem lai tak chuan a mit a la kher mai. A pem dan atang chuan engemaw tak chu a hnek tih a chiang hle a, a melh ta vang vang mai. A thaw deuh hak a, "Vawiinah mi kutthlak i nei em ni?" tiin a zawt ta nge nge a. Melody chuan a thil vel lai chu a tawp chat a, a kut pem chu en pahin, "Um nei e." a ti zawi sap mai.

"Tunge kut i thlak a?"

"Mipa..zaktheilo deuh mai."

"Engvangin?"

"Ka thianpa an tibuai thin a, ka thinrim a nih kha."

"Ehe..thianpa a? NAng hi...bialpa te i nei ve deuh reuh em mawni le?"

"A teuhlo, ka thianpa alawm. Ka duh zawng pawh a nilo hrim hrim...an ti kahwngaihthlak thei lutuk a, ka insum zo lo anih kha."

"Khawi ami nge i thianpa chu?"

"An veng tak pawh ka la zawt lo, hmanni deuh khan kan inbe ve chauh alawm."

"I thian neihchhun em ni?"

"Aw, ni e...a thianpa nen, kan pathumin kan inkawm thin."

Pu Chhuma chu a han thu tha te te a, "Bawihte, mi thiltithei zawk leh keini aia chunghnung zawkte hi i lo khawih tel hlauh ange. Ka hna hi hre reng la, police ka nih hi, kan fimkhur angai ania." a han ti dam diai a. Mahse Melody chuan a chhang lo, apa pawh chuan inthlak turin roomah chuan a luh san ve leh mai a.

************************

Tlai dar 5 a ri a, DAniel-a pa Pu Malawma pawh a rawn haw ve leh ta. A nupui chuan thingpui a lo siam sak nghal a, Pu Malawma chu thingpui in pahin chanchinbu a chhiar a, a faifuk rut rut mai. A fapa chu a khawngaih deuh avang chuan Pi Zualtei chu an pa bulah chuan a thu a, "Enteh Mama pa, Mama chuan hrilh suh atia, englo...internship kha Thailand ah an nei dawn a ni awm a." a va ti a.

"Chuan..ngati nge?" a lo ti hu mai. "PAwisa a ngai hnem dawn sia, apa hian hlawh ala la si lova, ka kal lo mai dawn mawni a tia, ka khawngaih reuh lutuk a." tiin Pi Zualtei chuan a chhang a. "Anih leh engtin nge i lo chhan?" tiin a lo zawt leh a. "I hreh loh chuan kal lo mai rawh ka lo ti ve tawp a." tiin a chhang leh a.

"An zirlai atan a pawimawh si a, internship te chu..chutin kal loh ngawt chu a chi nang."

"Nia, mahse pawisa hi...tunlai phei chu eng engemaw bil neuh neuh vah kan inseng hnem tawh sia. Engemaw zah kan pai ve a ngai dawn a, thla thum lai a ni bawk sia."

"Harsatna nei te tan zirtirtute an biak theih em? Chu chu a sawi tel em?"

"AW sawi tel e, mahse a inthlahrung ve leh bawk sia."

"Amah chuan ka kallo mai ang a ti maw?"

"Aw ti e, pawisa a awm loh chuan ka kal lo mai ang a tia, ka khawngaih ve bawk sia."

Pu Malawma chu a han ngawi vang vanga , "Khawnge amah a awm?" tiin a zawt leh a. "A roomah a awm." tiin Pi Zualtei chuan a lo chhang a. Pu Malawma chu a tho va, Daniel-a roomah chuan ava lut ta a. Daniel-a chuan computer-ah a games neih ve chhun, ZUMA chu a lo khel ve malh malh a.

Apa a hmuh veleh chuan a pause nghal, "Ehe pa, i lo van haw har em em." a lo ti vat a. Pu Malawma chu a bulah chuan ava thu a, "Internship chu engtikah nge in neih dawn?" tiin a zawt a. Daniel-a chu a inthlahrung ngei mai, "Anu chu aww...hrilh suh tih mawlh mawlh pawn.." tiin a rilru chuan a phun nghal char char a.

A aw a han thian deuh kharh a, "Ih..thlaleh ni 5 ah." tiin a chhang a. "Tinge kalloh i tum ngawt a?" tiin apa chuan a zawt leh a. "Pawisa i nei awm silova ka ti.." inthlahrung tak chuan a lo ti leh a. Pu Malawma chu a nui huah huah a, "Ipa hi rethei viau ah min lo ngai animaw?" a han ti fiamthu a.

"Chulam pawh a ni lo." Daniel-a chuan a lo ti nung nung mai. Zaidam tak hian Pu Malawma chuan, "History in la a, chuvang chuan ram changkang deuh deuh ah te pawh in la kal chho zel ang. Chungte chu keini nu leh pate pawhin pawisa chu kan lo huam ve angai, hetiang internship in nei dawn tih hre lawk sa vekin alawm saw college ah sawn kan luh tir che." a han ti dam diai a.

Daniel-a chuan mak a ti kher mai, apa chu a en deuh hu ringawt. Pu Malawma bawk chuan, "Hemi tur hian ahma daih atang khan ka lo inkhawl tang tang alawm, engzat nge pawisa ngai dawn a?" tiin a zawt leh a. "Ih..sing fe chu ngai ang." tiin a lo chhang a. "In zirtirtute chu zawt chiang leh la, kan inhrilh tha leh dawnnia. Lungngai suh, i kal em em ang." Pu Malawma chuan a han ti leh a.

Room atang chuan a fapa chu a chhuahsan ta a, Daniel-a chu a lawm ru kher mai. "Yes, Melody leh Robert-a te nen awmho ila, ava nuam dawn tak." tiin a phu kher mai. A thianpa Robert-a chu a phone nghal a, a kal theih tur thu te chu a hrilh a. Melody erawh a hrilh thei lo, a chhan chu a phone number ala neih ve loh vang a ni.

*******************************

A tukah chuan Daniel-a chu hma takah college a thleng a, Melody chu a hmu chak tawh khawp mai. Class room tinah te chuan a zawng kual a, mahse DAwnga te thian ho a hmu fuh leh ang tih chu a hlau rilru takzet. A hmuh mai loh avang chuan a lo la thleng ve lo niin a ngai a, ground ah chuan a lo nghak a.

A nghak lai chuan a phone a rawn ri a, a thianpa Robert-a a lo ni. Vawiin class a kal theih loh tur thu ala rawn hrilh zui, phone a dah leh hnu chuan a sira mipa pahnih titi chuan a beng a verh zawk mai. "Ka hre bik lo, ka zawh lahin a thinrim hlur bawk sia. A hnar chu hmu ve la maw, i nui ve thovang." tiin pakhat zawk, kawr var ha zawk chu a nui tiah tiah mai.

A thianpa, a bula mi, kawr dum ha zawk chuan, "A van hnek na awm em em, hnar ruh kawi vek khawp te chuan a..anih leh college a rawn kal thei lo rei dawn em?" tiin a han zawt leh a. "Thla khat vel chu ka chawl dawn a tih kha, junior ho tan chuan a hahdam thlak huai dawn a nih hi." tiin a thianpa chuan a lo chhang a.

Chu thu a hriat chuan Daniel-a chu a khi suk mai, "Chawh lutuk." a han ti zawi sap a. Chutih lai chuan MElody pawh chu a rawn thleng a, Daniel-a a hmuh rual rual chuan a bulah ava thu nghal. "I va hma awm ve?" tiin Daniel-a chu a han nek deuh talh talh a. "Enteh, news lawmawm deuh ka lo hria a.." Daniel-a chuan a lo ti vat.

"Eng news maw?"

"Ka nuih aza lutuk, nichin khan ka bulah mi pahnih an rawn thu a, an rawn sawi a."

"Eng chu...min hrilh vat la mawle."

"U Dawngtea kha a hnar ruh i hnek tliah sak tep a ni awm e, thlakhat chhung a lo kal thei dawn lo."

Melody chuan a hmui a hup a, an nui dun nasa mai. "Awi, ka van hnekna awm em em. Ka kahwngaih letling ea, ka nuih a za lutuk." tiin a nui huah huah mai. "Bang hma deuh ila aw...vawiin chu class ka kal peih lo mange." Daniel-a chuan a han ti nuah nuah a. Melody pawh chuan ner nung chung hian, "Kan inang chiah a nih chu...ka mood a fuh lo bawk nen." a lo ti ve bawk.

"Tinge a? Chhungkaw lam a mi?" tiin Daniel-a chuan a lo zawt vat a. "Aaa..ka sawi peih hrih lo...class lak ka peih lo, chuzawng chu." tiin a lo chhang hmuk a. "Keipawh." tih ringawt chuan Daniel-a chu a han phun ve leh sup a. An ngawi dun vang vang a, "Daniel, attandance ah enge i an?" tiin Melody chuan a han zawt deuh thut a.

Mak tih hmel tak hian Daniel-a chuan a en hu a, "Ka la kal kim, 100% aniang...tinge?" tiin a lo zawt let vat a. "Keipawh 100% ania...nikhat tal chu..bunk ve ila." Melody'n a han ti chu Daniel-a chuan a awih lo hial zawk. "I ti tak tak ami?" a han ti leh hu a. "Ti tak tak e...hawh bunk dun ang." tiin Melody chuan a lo sawm leh a.

"Khawnge kan kal anga?"

"Ka hre lo, petrol ka lo tum ang...inphur kual ang."

"I duh tak tak maw?"

"Duh duh duh...min zawt zing, bun dun ang."

"Umm..i duh te chuan, bunk ve ila nimai lawm."

"Mahse..Robert-a?"

"Min rawn phone alawm, i lo thlen hma khan. A lo kal dawn lo, harsatna engmah kan nei lo." tiin Daniel-a chuan a han nuih seih a, Melody pawh a tho nghal. "Mahse khawnge kan kal dawn?" tiin DAniel-a chuan a han zawt nawn leh a. "Ka hre bik hleinem, kal phawt ang." tiin MElody chuan a vin hlur tawh mai.

"Umm anih chuan kal ila." tiin Daniel-a pawh chuan a bag chu a han ak tha sawk sawk a. "Melo, petrol ka nei tlem ania." a han ti leh su su a. "Amak...ka tum ang, petrol ka lo tum ang ka tih mawlh mawlh kha ahma pawn, khawnge i beng a awm?" a ti vin leh hlur mai. "MAhse a inthlahrunawm alawm." DAniel-a chuan a lo ti leh a. 

"A ninawm i tawng peih lutuk, ka bunk pui lo mai tur che asin." tiin MElody chuan a nuih sak a, Daniel-a pawh a tawng  chhunzawm ta bik lo. An pahnih chuan inkaiin scooty dahna lam an pan phei dun nghal a, Rodeo scooty tawng ve tawh takah chuan an inphur a, khawilam nge an pan dawn pawh hrelo chuan gate chu an tlan pel vang vang mai.

**************************

TO BE CONTINUE