UNHOLY CONFESSIONS - II (Mizo Horror/Slasher Story) Written by : Aaron Malsawmdawngzuala WARNING : 18+ Chapter - 5

 UNHOLY CONFESSIONS - II

(Mizo Horror/Slasher Story)

Written by : Aaron Malsawmdawngzuala

WARNING : 18+

Chapter - 5

************************

Pu Rinawma te pawh farm house atanga hla vak lovah chuan an thleng ve ta a, an tracking device chu ramhnuai pilril lai takah a tawp daih mai. Tichuan Abawihi phone ngei chu an hmu ta a, mahse a hmai a lo keh vek. Pu Rinawma chuan on a han tum a, mahse a thei thak lo. "Sir, Abawihi'n a thlauh a ni ngei ngei ang, a awm hlat vak ka ring lo heta tang hian." Fela chuan a han ti a.

"Abawihi hi nung damin a la awm angem tih zawk hi ka zawhna chu a ni, Fela. Shaodw X chuan a that tawh ang nge, a la thukru tih tuman kan rhe der silo." tiin Pu Rinawma chuan a lo chhang a. Fela chu a han inngaihtuah vang vang a, "MAhse Sir, Abawihi chhungte leh Puipuia sawi dan kha chuan Shadow X chuan thil tisualtute chauh a that thin an ti sia. Abawihi lah Shadow X hmasa zawk bialnu an ti bawk a, thahna chhan tur a nei ve dawn mi?" tiin a han zawt leh a.

"Abawihi hi tunge a nih a, engthil nge a tih thin leh enge a tihsual tih hi nang leh kei hian engmah kan hre lo, engthil emaw tak vang pawhin X-a chuan a lo that daih tawh thei bawk." Pu Rinawma chuan a han ti leh a. Chutia an inbiak lai chuan an bul atanga pen 30 vel leka hla atang chuan mipa na tuar, rum tuah tuah ri hi an hre ta tlat mai.

"Chu i hre ve em?" Pu Rinawma chuan a ti nghal vat a, Fela pawh chuan a lu a lo bu ve nghal vat a. Pu Rinawma chuan a pistol chu a phawrh nghal a, zanlai dar 12 a ri dawn tawh a, ramhnuai a ni bawk nen, a thim ngang mai. Bengchheng lo tur chuan Pu Rinawma chuan Fela chu zaizir hian a hrilh a, tichuan fimkhur tak leh thawm siam lo thei ang berin thawm lo chhuahna lam chu an pan dun ta a.

An thleng tep tih ah chuan thawm chu a reh leh ta daih mai, chutak zawi taka thaw ri set set ri chu an hre leh a. An pan hnai zel a, thaw ri pawh chu a ring ve tial tial bawk. An va thleng a, light a en pah chuan Pu Rinawma chuan, "Che tawh suh." a han ti vak a. Pistol chuan a tin nghal bawk, mahse an thil hmuh chu an rinloh lam daih a ni.

Mama chu a lo la thi reng reng lova, thei leh thei lovin a kut chu tih chet a lo tum nasa chu niin. An va tlan phei nghal a, "Ehe...thianpa, thianpa, ka tawng i hre thei em?" tiin Fela chuan a bawihsawm nghal vat a. Mama chu a la meng tawk tawk a, "Do..Do..Doctor.." tih chiah a sawi thei.

"Engmaw? Doctor i ti em ni?" tiin Fela chuan a han zawt leh a. Mahse Mama chuan a chhang thei tawh lo, a hliam tam tak chu a tuar zo ta bik lova, a thaw vak vak a. A thaw muang tial tial a, a thi ta der mai. Fela chuan Pu Rinawma chu en in, "A thi." a ti zawi sap a. Pu Rinawma chu a ngawi vang vang a, "Doctor a ti tiraw?" tiin a han zawt a.

"Aw Doctor a ti maiin ka hria." tiin FEla chuan a lo chhang a. Pu Rinawma chu a han thaw deuh hak a, "Awmzia a nei ngei ang, awmzia a nei chiang lutuk. Enge ni ang? Enge awmzia ni ang?" tiin a inngaihtuah nghal nasa hle mai. "Sir, tualthattu..ka sawi awmzia chu...Shaodw X hi doctor a ni tihna a ni mai lo maw?" tiin Fela chuan a han zawt a.

"Ka hre lo, a ni thei thova. MAhse awmze dang pawh a nei, enge a sawi tum ber kan hre hman bawk silo. Ngaihtuah thiam a har kher mai, engpawh nise ruang hi motor ah sawn dah phawt teh ang." tiin Pu Rinawma chuan a chhang a. "Chuan enge kan tih zel dawn? Back up kan ko dawn lo em ni, Sir?" tiin Fela chuan a lo zawt hu mai.

Pu Rinawma chuan a lu thingin, "Kan kal chhan ber Abawihi pawh kan la hmu hleinem, kan zawng leh phawt ang chu." tiin a chang leh a. "Mahse Sir, kan motor ah hian ruang chu kan kalsan tawp dawn tihna em ni?" a lo ti leh hu mai. "Ruang kan hmu a, kan duhtawk ringawt ten...Abawhi chhungten kan kutah rinna an nghat mek tih i hriat kha." tiin Pu Rinawma chuan a vin deuh hlur mai.

"Abawihi chu khawiah nge kan zawn leh chuan anga? Hetah a phone a awm a, tracking device hi a tangkai thei tawh lo asin."

"Fela, tracking Device in helai hmun min hruai thleng a, kan haw mai anga maw? A phone nen chauh hian em ni kan haw ang? I beidawng hma lutuk, helai chheh vel te pawh hi kan dap leh phawt ang chu mawle."

"Awle Sir, anih chuan back-up chu kan ko tho dawn em?"

"Umm a pawi lo, ko lawk tho rawh."

Fela chuan back up chu kovin ruang an hmuhna hmun location te chu Station lamah a thlen a, hma la tur leh rawn che chhuak ve nghal turin Police dangte pawh chu an insiam nghal sap sap hlawm a. Ruang chu an zawn a, an motor hnungah chuan an dah ta a. Chutih lai tak chuan an bul velah chuan engemaw rawn che hrut hi a awm a, Fela chu a phu nasa kher mai.

A zuang deuh dawr a, "Engthil phiangsen nge ni ngai?" tiin a t(r)e thawt a. Pu Rinawma chuan a pistol chu a phawrh chhuak nghal vat a, hnim chu a che phei zel a. "Tunge i nih?" tiin Pu Rinawma chuan a han vin deuh that a. Chutah chak em em hian hnim chu a che phei leh ta vak vak mai, an pahnih chuan an um ta a.

Hnim karah chuan an tlan lut zel a, mahse an thil um lai chu an hmu thei tlat lo. Pu Rinawma chu a tlan chak zawk a nih avang chuan chu thil chu a um pha tep tih ah chuan leivung paihna niawm tak ah chuan an thil um lai chu a pang hmawrah a lo ding kar mai, a rinloh lutukin thehlei lian zet mai hi  alo ni.

Pu Rinawma pawh a speed a control zo lo tep a, kham ko ah tak chuan a ding a. A thaw deuh hak a, "Ava ho mai mai tak." tiin a nui suk a. Mahse a hnung ami Fela lah chuan thehlei mai mai an lo um tih la hre ve hek lo, a thim bawk si nen Pu Rinawma chu a rawn su ta mai, an pahnih chuan leivungah chuan an lum thla tup tup mai.

Vanneihthlak takin awih hle mahse a sang vak lo hlauh, leivung a tam em avang chuan an na lem lo bawk. Mahse Fela ke veilam erawh a ruh a ti kahwlo deuh lek lek a, na a ti kher mai. Leiah chuan an thal dun reng a, chutah an thehlei um chu leivungah chuan a la rawn tlan thla ve zui. An inkar takah chuan rawn dingin, hnim ve chu a han hnim vut vut a.

Rum zet hian Pu Rinawma chuan Fela chu melhin, "En rawh hei, Hmela...kan thil um hi..mi la rawn su zui." a ti deuh hlur a. Fela chu a then chawk chawk a, "Ka tihpalh Sir, mahse ka ke hi a na lutuk." tiin a rum deuh tuah tuah mai. Pu Rinawma chu a tho vat a, thehlei pawh chu a tlanchhe ve leh daih a.

"Ka kawng a na lutuk.." tiin a phun nuah nuah a, Fela chu a kai thova. "Ana viau em ni, i ke chu?" tiin a han zawt a. "Aaa..engtin nge ka sawh ka hre lo, ka ke rek hi a na lutuk, ka rap tha ngam lo." tiin Fela chuan a lo chhang a. "Khawimaw han kal tum chhin teh." tiin Pu Rinawma chuan a kuah a, zawi zawi chuan a kal ve thei.

An lum thlakna chu an han melh chho vang vang a, lawn chho leh chu a huphurhawm takzet, chutah zan a la ni bawk si. "Kan vak chho thei lovang, saw lam atanga hel angai dawn nih hi." tiin Pu Rinawma chu a han ner deuh nung a. Inthiamloh hmel tak hian Fela chuan, "Ka tihpalh lutuk, Sir." tiin thupha a lo chawi nghal mawlh mawlh a.

"A ho lutuk, i tihpalh ve a ni mai alawm. Ka pistol ka thlauh bo lo hlauh va, a zia tal alawm." tiin Pu Rinawma chu a nui suk a. Tichuan thei leh thei lo chuan an inkuah phei a, darkar khat dawn chu an kal a ngai ta ve ang. Mahse tih theih dang awm hek lo, an motor awmna lam pan leh tur chuan lehlam kawng atang chuan an hel dun ta hnak hnak a.

*******************************

Damdawiin pawn lam garage chhungah chuan car pakhat chu amahin a lo lam emaw tih mai turin a su dulh dulh mai, minute 10 ve hnuah chuan a reh ve mai a. A chhungah chuan Doctor Sanga, Zorema nupui Nutei post mortem a, fake report siamtu ngei mai chu nula kum 20 vel awrh nen chuan an lo khawsa zo dun chiah chu niin.

Dr. Sanga chuan a kawr kilh chu a kilh tha malh malh a, nula pawh chu a inha ve mawlh mawlh bawk. "Naktuk zanah ka off dawn a, hotel ah kan thleng dun leh ang chu tiraw?" tiin Dr. Sanga chuan chu nula chu a han fawp zauh va. Nula chuan tum deuh hmuk hian, "Cheng 5000 tal min belh tawh rawh, a nih loh chuan kan inhmu tawh lovang." a lo ti deuh hlur a.

Dr. Sanga chu khi sukin, "Sum i duh sawt hle mai, umm..a pawi love." tiin a inha fel zo ta a. "Chahbi spare hi lo kawl mai rawh, chuan naktuk zanah chuan min pe leh mai dawnnia." a han tih chhunzawm lehnghal a. "Min belh dawn em, cheng 500 chu?" tiin nula chuan a lo zawt leh a. "Awle awle, lungngai lo phawt la. Ka chhuak hmasa anga, minute 10 vel hnuah chauh rawn chhuak ang che, garage bulah sawn CCTV a awm ania." tiin a lo chhang a.

"Hetah hian minute 10 chhung ka lo thu ngawt ngawt dawn tihna em ni?"

"Phone la tur angin ka chhuak lawk mai chauh ania, hei ka rei tawh si. I lo chuah ve nghal chuan CCTV ah min hmu vek dawn asin, duty lai ka nih hi."

"A tha alawm, anih chuan kal vat rawh..ka awm reng peih lo ania."

"Awle, ka sawi ang khan aw...lo chhuak mai suh ang che..chuan ka car awmna zawn atang hian chhuak lo bawk ang che."

"Kal vat la ni mai."

Sanga chu a chhuak ta a, hawi kual deuh zuk zuk pah chuan gate lam pan chuan a phei a. CCTV zawn a thlen veleh chuan mi bia niawm tak chuan a phone chu a han lek kang a, mi a be der vel a. Security guard ho awmna lam a thleng tep a, CCTV cover lohna a kal pel chiah chu kawng sir, private ward thar tura an sak mek, ka sak zawh loh bul ah chuan pawisa tam tham tak chu a zu hmu a, kawngsir kawrah chuan a lo let phung mai.

A hawi kual zuk zuk a, "Tu thlauh nge mawni dawn le?" tiin chu pawisa chuan a mit a la ta tlat mai. CCTV cover phak lohnaah a awm tih a hre bawk a, pawisa lam pan chuan a peng ta zeuh mai. A va thleng a, a bul hnai vel chu a han thlir kual leh a. Tumah an awm lo tih a hria a, a lawm rilru kher mai.

Tichuan thu hniamin pawisa chu a han en a, a han thlek vang vang a. Mahse chiang leh deuh zawka a han en chuan pawisa chu a lem vek a lo ni, "Ehe, a lem a nih hi. Enge maw awmzia ni?" a ti nuah nuah a. Zawi muang chuan a han ding kang a, a hnungah chuan a thuam famkim nen X-a chu a lo ding leh ran tawh mai.

X-a chuan a ipte chu zenin rawmawl a phawrh chhuak a, Sanga hmui chu hnunglam atang chuan a rawn hup thut mai. Sanga chu a au chhuak hman lo, X-a chuan a man nghet lutuk tlat. A rawmawl chhunga chloroform liquid chu Sanga chuan a huip lut hrawk a, a zal ta riai riai mai. X-a chuan buara bag ang tak mai, lian tak maiah chuan Sanga chu a khung ta daih mai.

Tichuan a bula bawlhhlawh bawm lian tak maiah chuan a khung leh a, tichuan trolley-ah chuan bawlhhlawh bawm chu a dah a, a thawmhnaw zawng zawng chu hospital sweeper dress-in a thlak leh ta vek a. Tichuan trolley nawr chuan pawnlam a pan pui a, mahse security te awmna lam hnaiah chuan kal a ngai tlat mai.

Trolley chu ava nawr phei zel a, security pakhat chuan a lo hmu ta ngei mai. "Hey, nangkha lo ding teh." tiin a lo au ding vat a. Thuawih tak chuan X-a pawh chu a ding ve mai bawk, security chuan a rawn pan hnai a. "Khawnge i kal dawn a? Chuan..khawi atangin nge tunah khan i rawn chhuah a?" tiin a zawt a.

"Ka pu, ward sak thar lama bawlhhlawh ho ka thian fai a...puten thianfai turin min ti a." tiin X-a chuan a lo chhang a. Security naupang zawk pawh chu a lo kal a, "I rawn phei lam kan va hmu silo ve a?" tiin a rawn zawt ve bawk. X-a chuan confi zet hian, "Ka lo phei laiin min hmu lo alawm, ka pu." tiin a chhang leh mai a.

Security upa zawk chuan a sana chu a han bih zauh va, "Tunah dar 12 a pel tawh a, i va tifai rei awm em em ve?" tiin a zawt leh a. "Ka rawn kalna pawh ala rei lo reng alawm, ka pu. In duh chuan CCTV pawh en leh ula, in duh chuan keimah pawh hi min check ru, min ringhlel a nih chuan." tiin X-a chuan a lo chhang leh a.

"Check chhin teh." tiin pakhat zawk chuan a han ti zauh va. Chuveleh a kawng hnunglama a pai, pistol chu  phawrh inring ranin X-a chuan a vuan lawk nghal a. Mahse pakhat zawk chuan, "A ngai lo...ho lutuk..khawi lamah nge i kal dawn?" tiin zawhna dang a rawn zawt leh ta hlauh mai. X-a pawh a thaw deuh huai a, a pistol vawn lai pawh chu a thlah leh a.

"Khu lamah, kham tlang lamah khuan....kan dahkhawm a, naktuk zing bawlhhlawh phur motor te hnena pek mai theih turin.." tiin a lo chhang leh a, "Umm..anih chuan kal rawh." tiin security te chuan an kal tir ta hram a. X-a chu a trolley nen chuan damdawiin pawn lam pan chuan a innawr phei ta a, anihna takah chuan kha security te kha an vawikhat duty na niin an lak thar mai chauh an ni a, chu chu X-a hian a hre kar a ni.

Security lo thawk rei tawh ho chu nise an kal tir lo tawp ang tih pawh a hre lawk reng, a chhan chu hospital pawn lamah eng bawlhhlawh mah an dahkhawm ngai loh vang a ni. Security upa zawk chuan a en zui vawng vawng a, "A lo let leh hunah ka zawt nawn leh thovang, ka ringhlel deuh riau mai." a ti deuh nuah nuah a.

A nau zawk chuan, "Doctor Sanga a lo let leh tawh em, nichin lawk a ka inthiar hlan khan?" tiin a lo zawt ve a. Security guard chu a ngawi vang vang a, "A lo phei lam kha chu ka hmu ngei a, ka lo ML tui lutuk a. Ka hriatloh hlanin a lo kal tlang aniang, kha sweeper vang vek kha lawm mawle.." tiin a chhang a.

Mahse reife an nghah hnu pawh chuan X-a chu a lo la let tlat lo mai, guard te pahnih pawh chu an ngaih a tha lo tan ta riau mai. Chutah an intercom a rawn ri a, an han chhang chu nurse pakhat lo niin Dr. Sanga an mamawh thu a rawn sawi a. A lo la let miah loh thu leh garage ah a la awm em tih en tur chuan an rawn hrilh ta mai a.

An pahnih chuan an in en a, an hlauthawng kher mai. "Aw, kan en nghal e." tiin a upa zawk chuan phone chu a dah nghal a. "Thiana, Dr. Sanga lo kal phei lai chu i hmu chiang amaw?" tiin a han zawt nawn leh a. "Aw..ka hmu a, kan innuih suk nghe nghe alawm." tiin a lo chhang a. Rang takin garage lam chu an pan a, Dr. Sanga car chu enin an check kual vek a.

Mahse tumah an hmu tlat lo mai, kha nula pawh kha a lo chhuak daih tawh. "Engtin nge kan tih ang?" tiin a naupang zawk phei chu a mangang tan tawh hle mai. Chutah a upa zawk chuan thil ngaihtuah chhuak nei thut ni awm tak hian a phu deuh zuk a, "Kha sweeper, kha sweeper kha.." a ti zawi sap mai.

****************************

Abawihi chuan a theihtawp chhuah chuan kawngka chu tih chhiat a lo la tum nasa mai, hmanrua engmah a awm loh avang chuan a tha pawh a zawi tawh khawp mai. A chau tawh takzet, mahse beidawn ala tum lo. Shadow X lo let leh hma ngeia chu hmun chu chhuahsan ngei a tum a ni, tihdan tur chu a ngaihtuah vang vang a.

A tawp a tawpah chuan hmanraw awmna awm chhun, inhnuai lam, a putea ruang leh maimawm taktak awmna chu a zu pan ngei a ngai tih a hrethiam ta. Kha recorder te pawh kha a la kawl reng a, tichuan a ak tha a. Step lam pan chuan muangchang chuan a chhuk leh ta, maimawm pakhat lek pawh khan seh ta se a thih phah dawn tih a inhriat ve reng avang chuan a zam ve khawp mai.

A pan thla zel a, kawngka bul chu a thleng ta. Kawngka chu chhe te a han hawng a, chuveleh maimawm pakhat a rawn vak chhuak nghal. Rang lutukin a khar leh a, maimawm chu a rap pherh nghal vek bawk. A luh tawp chuan maimawm pakhat tal chuan a seh hman a ring a, a seh a nih vaih chuan a buai zo vek dawn bawk si.

Tihdan tur a ngaihtuah fe hnuah chuan kawng awmchhun chu a ngaihtuah chhuak ta, mahse a him phah angem tih erawh a chiang bik chiah chuang lo. A kawrlum chu a phelh a, tichuan a laiah tak chuan a pawtthler a. A pheikhawk chu a chhah thei ang ber chuan a tuam luk mai a, chu chiah chu kawng awmchhun a ni.

Tichuan kawngka chu a hawng a, maimawm ho pawh an lo la tha hnem kher mai. A patea ruang chu ava en leh a, a lo dang vek tawh a. A hmai leh kut vel, maimaw sehna te chu a rawn vung tan a, a sehna then khat phei chu hnai a rawn chhuak pur mai. A en rei thei lo, lehlam a hawi nghal vat a.

Tichuan hmanrua a zawng tan ta, maimawm lo kal hnai apiang chu a lo rap hlum zel a. A patea ruang lamah chuan an tam zawk avangin a awmna lamah chuan an rawn kal tam lem lo, mahse a chet vat vat erawh a ngai tih a rhia. Mahse hriamhrei lian tham, kawngka hawn theihna tur erawh engmah a hmu lo.

Surgical knife, forcep leh screw driver chiah a awm. Scre driver leh surgical knife chu la in pawnah chuan a chhuak leh nghal a, kawngka chu a khar leh nghal bawk. Step ah chuan rang mangkheng hian a tlan chho leh nghal vat bawk a, a ke tuamna te chu a phelh a.Surgical knife chu a ak a, tichuan screw driver chu humin tukverh lam ava pan ta.

Tukverh steer bar kilhna te chu phawi a han tum a, vanneihthlak takin a lo inmil hlauh mai. A lawm lutuk chu nui hmel pawh a pu ve thei ta, a theih anga rang chuan bar kilhna te chu a herh thlawn zel a. Herh thlawn chu awlsam viau mahse a lo inkilh hnem ngang mai, thlan thla hluama minute 10 dawn a herh hnu chuan a herh thlawn thei ta vek mai.

Rang lutukin a chhuak nghal a, pawnah chuan a scooty pawh a lo la awm ngei e. A va pan nghal a, mahse chahbi awmna a hre leh ta tlat lo mai. "Hrep taka...khawnge a dah? Khawiah nge maw ka chahbi a lo thuhruk hman phiangsen le?" tiin a ang vak vak ringawt a, a thinrim bawk si chuan a scooty seat chu a chum vak vak ringawt a.

Chutah a han hawi kual a, kawngka lu a thing hmawr niawm tak rawn lawr chu a hmu fuh a. Zuang chungin a han ban a, a ban fuh hlauh mai. Chhuatah chuan a rawn tla a, hreite(axe) a lo ni. A la nghal vat a, invenna tur tha tak a hmu chu a lawm letling zawk hial a. Mahse khawilam ber nge a pan tak ang tih erawh a zawhna a ni, a scooty lah chahbi a bo daih bawk si.

Chutih lai chuan thawm a rawn awm a, motor thawm a ni. Farm house lam a lo pan mek tih pawh a hria, rang takin ava pan nghal a. Mahse a ngaihtuah chhuak leh thut, chu motor khalhtu chu X-a a ni nge ni lo a hre lo. X-a lo ni thut ta se, buaina a zual mai mai dawn tih chu hriain a in sir a bang phenah chuan a biru ta zawk a.

Motor chu a rawn hnai zel a, farm house bulah chuan a rawn ding ta. Bang phen atang chuan Abawihi chuan a lo enthla reng a, motor atang chuan a hlauh ang ngei ngeiin X-a chu a rawn chhuak ta. Mahse tunge a nih hre turin X-a chuan a thuam famkim ala inbel tlat, tunge a nih a la hre thei chuang lo.

Tichuan X-a chuan a motor seat hnunglam chu a hawng a. Dr.Sanga chu a rawn pawt chhuak ta mai a. Doctor Sanga a ni tih pawh Abawihi chuan a lo hre nghal chat, "Nilo..Dr. Sanga.." tiin a phun sap a. X-a chuan Sanga chu a pu nawlh mai a, in lam chu a pan pui a, chutah tukverh bar lo awm lo leh lo inhawng huau mai a hmuh chuan a ding chat mai.

Abawihi chuan a rawn zawng duh mai ang tih a hlauh avang chuan thawm dim thei ang ber chuan a tawlhhnung riai riai a, X-a chuan Sanga chu chhuatah chuan a nghat a. Tichuan tala chu hawngin inchhungah chuan a lut nghal a, Abawihi chu a zawng kual nghal chiam mai. Chu chu remchangah la in Abawihi chu a tlan chhe ta a, ramhnuai pilril lamah chuan eng pakhat mah nei lovin, thla eng chu ringin a tlan ta chiam ringawt mai a ni.

X-a chu a mangang kher mai, "A la tlan hla lovang, a la tlan hla lo tawp ang." tiin ama hriat tham lek chuan a phun nuah nuah a. Pawnah chuan a chhuak leh a, Sanga chu ava pu leh nawlh a. Inchhungah luhpuiin chhuatah chuan a nghat a, pawnah chuan a chhuak leh a. Kawngka lu chunga a hreite dah chu han ban mai a tum a, mahse a ban fuh ta hauh lo.

A han dak chhova, a lo awm tawh hauh lo mai. Abawihi chuan a chhuah pahin a la tih a hrethiam nghal mai, "Hrep tak chuan le." tia vin thawtin bang chu a hnek ri bur mai. Inchhung lam ava lut leh a, mahse mak tak maiin Dr. Sanga chu a lo awm tawh hauh lo. Mak a ti chu a ding chat a, chutah hnunglam atang chuan tu emawni hian a rawn zuan tlu thut mai.

Dr. Sanga chu lo harh tawh in X-a pawn chhuah lai khan X-a thah tumin kawngka phenah a lo biru hman hi a lo ni. X-a chu a bawk thlawp a, Sanga chuan thutbetin a tukhumah chuan a hnek ta siah siah mai. A hoodie lukhum chu a phelh sak a, a mask chu phelh sak leh a tum a. Mahse X-a chuan a kut chu rawn man sakin a lehthal thei hlauh mai.

Mahse a va bawhbeh ve hma chuan Sanga chu a rawn tho leh a, an inhmachhawn ta ran mai. "Tunge i nih? Mawhh...engvanga min kidnap nge i nih?" tiin Sanga chu a thinrim kher mai, a khur zawih zawih thei hial. Mahse X-a chuan a chhang lo, huatna mitmeng nen chuan Sanga chu a en reng ringawt.

Sanga chu za lo tak chuan a khi suk a, "Aww..min chhang dawn lo maw? A tha e, i mi man tum hi tunge ka nih i hre lo a ni. Tunge i nih ka hre chhuak tho thovang, ka that nghal bawk ang che." tiin a vau chhunzawm leh nghal khur khur mai. Hnek tum chuan a va vai thuak thuak a, mahse awlsam zet zet hian X-a chuan a lo bum zel a.

A khat tawh chuan a khawih let zeuh zeuh zel a, a i vai thelhna lamah a ban tha pawh Sanga chuan a hmang zo takngial dawn. A thaw hlawi hlawi tawh a, chutah X-a chuan a khawih ve tan ta. Nasa mangkheng chuan a sawi sa a, Sanga hnar chu a thi phung mai. A tawp a tawpah chuan nikhaw hrelo khawpin a sawi sa ta a, farm house atang chuan pu chhuak lehin motorah chuan a tlan pui leh ta daih mai.

******************************

Teruata ruang tlaivar pui naah chuan Puipuia pawh chu a la awm ve reng a, mahse thlamuangin a awm thei lo. Abawihi kha hmuh leh a chak takzet a, X-a chu tunge a nih a, engvanga a nu phuba lo la ve ngawt nge a nih te chu a hre chak em em a. Teruata ruang tlaivar pui han tih ah, a ruang tak hi chu ruhro vek a nih tawh avangin inchhungah dah lovin hospitalah an dah leh rih ta zawk a ni.

Chutia rilru thlamuang lo taka a awm chu a thaw a ipik deuh va, pawnah zun ram thiar tur leh zial zu tur chuan a chhuak a. A han zung thawl te te a, tichuan meizial chu tanin a zu khu luih luih mai. Pawnah chuan meizial zu ve thenkhat an lo awm ve nual bawk, chuta hmeichhe thian dun titi te chuan an titi naah chuan Abawihi bo thu an sawi lang ta zeuh mai.

Puipuia beng pawh a verh ta zak mai a, rang lutukin ava phei nghal. Chuta lo titi te chu Abawihi thiannu, delivery girl tak tak zawk Mimi leh Abawihi thiante zinga mi tho Stacy te an ni. "Awi, awmngaihna pawh ka hre lo. Tunah YMA in an zawng mek a, police ten a phone an trace mek bawk a ni awm e..a hrehawm ka ti takzet." tiin Mimi chu a inhnit deuh feih feih a.

"Tih theih lah kan nei tlem si, a la dam em ang chu maw?" Stacy chuan mangan hmel tak hian a lo ti ve bawk. Puipuia chu ava kal hnai a, "A..Abawihi..Abawihi chu tunge? A thlalak in nei em? Khawngaihin ka lo en ve.." a va ti tawp a. Mimi te thiandun chuan mak tih hmel tak hian Puipuia chu an lo en deuh hu mai.

"Tunge i nih a?" tiin Mimi chuan a lo zawt a. "Nia, Abawihi chu i hre ve em ni?" tiin Stacy chuan a lo zawt ve bawk. "Ihh..ka thiannu pakhat hi..hemi veng thenawm ami chiah hi ania, Abawihi ve tho ania." tiin Puipuia chuan dawt a sawi ta ringawt a. Hrilhhai angreng tak chung chuan Abawihi thlalak chu an thiandun chuan an entir ve mai bawk.

Chuta Abawihi thlalak a han hmu chiah chu Puipuia pawh a phu zawk mai, a hmuh leh chak em em, a zawh fiah chak em em Abawihi, a hriat Abawihi ngei a lo ni. "Ehe..ka..ka hmelhriat kha  anih hi...engtin nge a bo a?" a han ti a. "Engtin nge in inhriat zawk a?" tiin Mimi chuan a lo zawt let ve leh a.

"Ihh..online in, kan inbe thin a...engpawh nise chu chu a pawimawh lo. Engtia bo nge, enge thil awmzia min lo hrilh ve teh u." Puipuia chuan a han ti leh a. Tichuan Mimi te thiandun chuan Abawihi leh a patea bo dan te leh an hriat ang ang chu an hrilh ta a, Puipuia chuan mak a ti kher mai.

Rang takin a kal sawn nghal a, hmun reh deuh laiah chuan va dingin a phone a phawrh a. Inspector Rinawma chu a phone nghal a, mahse a la tlang maithei lo zui. Vawi nga vel a try hnu pawh chuan Pu Rinawma te awmna a hlat vang nge, a la tlang thei chuang lo. A vawi ruk nan a han call nawn leh a, a rawn la ta hlauh mai.

"Hello, ka pu...keimah Puipuia, ka tawng i hre thei em?"

"Aw Hello, tumaw? I tawng ava chiang lo ve...Hello?"

"Keimah Puipuia, ka pu..i hre thei em?"

"Puipuia a?"

"Aw, ka pu...tunah khawnge in awm? Abawihi chu inhmu tawh em?"

"Puipui, kan la buaipui mek. Khawngaihin lo nghak hram hram rawh, tunah chuan kan la buai lutuk."

"Engatinge a bo tih min hrilh ve loh va? Thlamuang lo takin ka lo nghak reng che u asin, Abawihi chu zawn ve ka duh a ni, khawiah nge in awm?"

"Puipui, hei kan buai emai. Phone ka dah dawn, i tawng a chiang lo bawk si."

"HEllo..hello, ka pu? Inspector? Hello." tiin Puipuia chu a au vak vak a, mahse Pu Rinawma chuan phone chu a dah hman tlat mai. "Ava han buaithlak tak." tiin Puipuia chu a phun nuah nuah a. A mangang kher mai, "Ka hriat angai, keimah pawhin kawng ka dap chawp mai ang...tunge Shadow X hi ka hriat ngei ngei a ngai." tiin a phun leh sap a, mitthi in chu kalsan in a bike chuan  a tlan ta vang vang mai.

*************************

TO BE CONTINUE