KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-3

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-3

********************

Lei hnuai niawm tak, tlang kang ang maia mei so bawrh bawrh tam tak ri hluah hluah mai chunga thuthleng ling sen vek maiah chuan ramhuai hmel rapawm tak mai, ki kual rui mai nei hi a thu khur mai. A hnungah leh a sirah te chuan fei sei tak leh zum tak mai keng, hmel rapawm leh hlauhawm tak tak 10 chuang chu amah vengtu niawm tak hian an ding thup bawk.

Tap ri leh na tuar ri niawm tak thawm hi meiling so bawrh bawrh atang chuan a rawn ri chhuak nuai nuai bawk a, chung ramhuai ho zinga an Lalpa ber, thutthlenga thu ber chu ramhuai sual niin a hming chu Belzebula (Beelzebub) a ni. Chutah an hma gate sang tak mai, alh hluah hluah hmaah chuan Zeros-a leh a naute chu an rawn thlawk thleng hlawl mai.

Zeros-a chu a lal thutthleng atang chuan BElzebula chuan a lo en reng a, "Gate hawng rawh u." a han ti thum chhur chhur a. Gate vengtu ramhuai pahnih chuan gate chu an rawn hawn sak ta a, Zeros-a leh a naute chu an rawn thlawk lut a. Zeros-a chu Belzebula hma takah chuan a thingthi a, Keichala hnena a lunghlu laksak chu phawrhin a lek kang a.

"Lalpa, i mi tirh ang ngeiin kum 172 chhung tehmeuh zinkawng ka rawn zawh hnuah Pu Vana kawrkilh chu ka rawn ken che." tiin a hmaah chuan ava dah hnai a. Belzebula chu a nui var var a, "I ti tha e, Zeros." tiin lunghlu chu a la a. Zeros-a chuan a lawmman tur dawn hun chu  anghakhlel tawh khawp mai, beisei nei tak chuan ramhuai Lalpa chu a han melh ran a.

Belzebula chuan lunghlu hum ran chung chuan, "I thil duh ka pek hma che in, engtin nge Keichala chu i thah sawi phawt rawh." a lo ti daih mai. Intithei tak hian Zeros-a chu a han nui vel a, "Phuba lakah min vau ve khanglang a, a la thei nge thei lo tiin kawrkilh hmang hian anchhia ka lawh a, a thlarau chu milim ah ka chantir a ni." tiin a chhang a.

Mahse Belzebula chu a nui ta hauh lo mai, "Engmaw i sawi kha? A thlarau chu milim chhungah chuan i dah amaw?" a ti ta khur khur mai. A ngaihna hriat loh hmel tak hian Zeros-a chuan a en hu a, "Aw dah e, Lalpa. Engtikah mah a chhuak thei lovang, hrehawm takin a thlarau chu chawl hahdam thei lovin a tang kumkhua dawn a ni." tiin a han chhang leh a.

Belzebula hmel chu thinrimna hlirin a khat ta, "Ti rawh ka tih ang zelin engvangin nge i tih loh? Eng vanga ka thu zawm lo nge i nih?" a ti leh khur khur mai a. Zeros-a chuan a hlau hle mai, "Lalpa, ka tihpalh a ni. Mahse Keichala thlarau khan engmah a ti thei lo, kum 172 zet a liam tawh." tiin Zeros-a chu ala insawi thiam zel a.

Belzebula thinrim chu a lu leh a ki zawng zawng te chu a rawn alh ta hluah hluah mai, "I hna ila zo lo, chuvang chuan he hremhmun lalramah hian hmun ila chang ve thei lo. He kawrkilh hi la let leh la, tichuan keichala thlarau chu chhuah la, nangmah ngeiin hremhmunah hian rawn hruai ang che." tiin a vin hrep mai.

Lungawilo tak hian Zeros-a chuan, "Lalpa, kum 172 chhung teh meuh Hremhmuna kal tur hian kan rawn thlawk chho asin, min tirhna lamah lah kum 172 chhung tho kan thlawk thla leh bawk a. Milim chhungah chuan ala awm reng ang, a chhuak thei dawn lo." tiin a la tang fan mai. "Milim chu tihchhiatin awm ta se, a thlarau chu a chhuak dawn asin. Lungngai suh Zeros, tunah hian khawvelah ka dahthla nghal ang che." Belzebula chuan a han ti leh a.

"Tunah maw? Hun engtia rei nge ngai?"

"Chawp leh chilhin ka dah thei che."

"Mahse a hma khan engvangin nge min dah mai loh? KAn rawn haw lamah pawh engvangin nge hetah hian min dah nghal mai loh?"

"A chhan chu rin ngam i ni em tih ka fiah duh vang che a ni, mi dawhthei tak leh thuawih tak i ni a..kawrkilh hi la leh la, ka thu chu zawm la, tichuan he Hremhmun Lalramah hian dinhmun pawimawh tak ka pe ang che."

Belzebula chuan lunghlu chu Zeros-a hnenah chuan a pe leh a, Zeros-a leh a naute chu vawi leh khatah an awmna chu a thim vek a. Chawp leh chilhin hmun pakhatah an lo awm reng mai, an awmna chu khawvel a ni. Zeros-a chuan a kuta lunghlu chu a en reng a, "Min paih thla leh amaw? A tha e, i hnen a thleng leh ngai tawh lovang." a ti khur khur mai.

A naute zinga pakhat chuan, "Enge i sawi awmzia, ka Lalpa? Hremhmun lalpa Belzebula hnenah i thlen tawh lovang maw? A that mai ang che, keini pawh min that mai dawn asin." tiin a lo hlauthawng kher mai. Zeros-a chuan chupa chu rum tak hian a en a, "Nang hian min zilh ve ngam amaw?" a ti ta khur khur mai a.

Chupa chuan hlauh hmel tak hian, "Nilove Ka Lalpa, ka sawi awmzia chuh..." a ti dek dek chu Zeros-a chuan a rek thut a, a lu chu a thuai bung hmawk mai. A thi nghal bawk, mahse mak tak maiin thisen a awm miah lo. A awmzia chu Zeros-a leh a hote hi vampire chikhat an ni a, mahse vampire dangte ang lo takin nisa leh meialh te an hlau ve lova, hmun lumah pawh hmun vawtah pawh an awm vek thei a ni.

Zeros-a nau dangte chuan an boss chu an en thap mai a, "Midang min zilh duh in la awm em?" a ti leh khur khur a. An ngawi thap hlawm mai, "Kha hremhmunah kha chuan kum 1000 hi kum 1 ang vel chauh a ni a, chuvang chuan khawvelah hian thil tam tak ka ti hman dawn a ni. He kawrkilh min pe let leh hi chu a tisual khawp mai, kumkhuain ka nei tawh ang." amah bawk chuan a han ti leh a.

An zinga pakhat chuan, "Ka Lalpa, anih Keichala thlarau chu?" tiin a lo zawt a. Zeros-a chu a ngawi vang vang a, "Kha hmun kha khawilai ber nge ka hre tawh bik lo, kan zawn angai dawn a ni. Tichuan milim chu kan tichhia anga, Keichala thlarau chu hremhmunah ka thawn chho dawn a ni." tih pah chuan a thlawk nghal a, a naute chuan an zui ve nghal bawk.

*********************************

Chhun dar 12 a ri tawh a, Melody leh Daniel-a te bunk pawh kalna em em tur hre lo chu tlang pakhatah chuan an tiffin pai leh an thil leite chu eidunin an titi bawrh bawrh a. An ngawih deuh vang vang lai chuan, "E taka, khawi atangin nge khati em em a insual i thiam theih a?" tiin Daniel-a chuan a han zawt a.

Nuih suk pah hian Melody chuan, "Ka pa hi Police Officer a nia, ka tette atangin self-defence min zirtir thin a. Kum 5 ka nih atangin taekwondo class min kal tir tan a, kum 15 ka nih khan North India ah under 15 Judo Competitionah pawh hmeichhia ah pakhatna ka nia lawm. Chuan martial arts te keimahin ka zir leh a, chuvang ania ka nu vak loh ni." tiin a lo chhang a.

Daniel-a chuan mak a tih hmel kher mai, "Anih U Dawngtea te lo kha mipa dang insual pui i nei tawh em?" tiin a han zawt leh a. "Tumah ka la insualpui lo, ka sawi awmzia chu heng ka thil thiamte hi mi insualpui nan ka hmang lo, U Dawngtea te kha a vawikhatna a ni." tiin a lo chhang leh a.

"A van mak, insual zing tawh viau ang mai khan i sawp deuh hrep sia?"

"Aww ava mak, practice naah zirpuite nen kan inbuan fova, khata tang khan ka sual pawh a ni mahna."

"Midang lakah ila hmang miah silova, tinge min chhan nan i hman bik kher a?"

Melody chuan nui sen sen chung hian, "A chhan chu nangmah i nia, a ngai tlat alawm." a han ti zawp sap a. Serious hmel tak hian Daniel-a chuan Melody mitah tak chuan enin, "I tan hian ka pawimawh viau em ni?" tiin a han zawt a. Melody chuan chhan mai ngaihna a hre lo, a lai lek lek mai.

A tih ngaihna hrelo chuan, "Ehe..ava tlai tawh ve." tiin sana chu a en ringawt. Daniel-a pawh chu harh chhuak niawm tak hian a phu zuk a, "E aw..engmaw? Tinge?" a ti bah nuai mai. "Last period awm a ngaih kha.." tiin Melody chuan a lo chhang a. "Ngati maw?" tiin a lo zawt hu mai. "Ava mak, Lalhriathlu....summer internship chungchang a sawi chian dawn kha, Sir Tetea'n." tiin a han vin deuh hlur a.

"E aw nia, kha kha...i kal dawn em? Ka sawi awmzia chu....kal i tum em ka tihna.." tiin Daniel-a chuan a han zawt leh a. Lawm loh hmel tak chuan Melody chuan, "Ka sawi thei mai lo, ka nu hi a dam lo nasa lutuk a. Tunah pawh damdawiinah ala awm reng a, riahpui a ngai zeuh zeuh thin bawk nen. Kan chhungkua kan indaih lo si a, ka pa'n pawisa a thawhchhuah reng angai sia..ka rilru ala buai hrih khawp mai." tiin ngui bar chung chuan a chhang a.

Daniel-a pawh chu a hnual deuh ruih mai, "I kal loh chuan ka kal bik lovang." a han ti deuh hmuk a. "I mawl ami? Keimah vanga kal tur i ni lo, i lehkha zirna atana pawimawh anih vanga kal tur i nih kha...ka kal ve ta lo a nih pawhin kal ngei ngei ang che." Melody chuan a lo ti deuh hlur a.

Daneil-a chu a thaw hak a, "Ni e, a hun te lo thleng phawt se." phur lo fahran chuan a han ti sup a. Melody pawh chu a nui ringawt, "Hawh le, kal tawh ang...last period kan awm a ngaih kha." tiin a tho va. Peihloh hmel tak chuan Daniel-a pawh chu a rawn tho chhuak ve a, a scooty tawng tak maiah chuan an college lam pan chuan an inphur phei leh ta a.

*****************************

Zeros-a leh a naute pawh chu mihring angin an insiam a, an ngo sei tak te pawh chu lunghlu, Pu Vana kawrkilh thiltihtheihna hmang chuan an thukru vek bawk. Keichala lim awmna zawng chuan hmun hran hran ah an kal kual a, Pu Vana kawrkilh thiltihtheihna hmang chuan an awmna hmun a zirin tawng chu an thiam chawp ve zel a, mahse milim awmna tak chu an hmu mai thei lo.

Pu Vana kawrkilh thiltihtheihna hmang chuan Keichala thlarau tanna milim awmna hmun chu zawn a han tum thin a, mahse a theih ve tlat loh. Thildang tamtak chu tithei mahse, milim awmna ah a hruai thleng ve thei tlat lo mai chu Zreos-a ngaih pawh a tha lo kher mai. Mahse an zawn an zawn hnu chuan Thailand rama hmun pakhatah a awm tih chu an hre thei ta a, rang takin Thailand ram lam pan chuan an thlawk ta nghal a.

Pu Vana kawrkilh thiltihtheihna hmang bawk chuan an thlawk chak dan te chu an ti pung a, Zeros-a leh a naute chu thiltihtheihna an ngah kher mai, mihring tan phei chuan an hlauhawm takzet bawk. Thailand pawh chu darkar reiloteah an thleng thuai a, milim awmna chu an zawng leh tan ta.

Mahse an hmu mai thei leh ta tlat lo, kha milim kha chu amah Zeros-a siam ngei a ni bawk a, a hriat pawh a hrechiang takzet. An beidawn hnuah chuan Zeros-a chuan a naute chu ramhnuai pakhatah a aukhawm a, an thil zawn lai chu tawp rih a, hahchawlh rih a duh thu chu a sawi ta a. Tichuan zau tak hian a ang a, a naute chu meikhu dum vekah rawn changin Zeros-a ka chhungah chuan an thlawk lut vek mai.

Chutah Zeros-a chu a rawn meng thut a, a mitmeng pawh a var pup mai a. Zawi zawi chuan a rawn danglam tan a, mihring pangngai mitmeng ang chu a rawn nei leh thuai a. Mahse a hnungah chuan thil ri rek a hria a, a va hawi phei chu Thai putar pakhat sava veh hi a lo ding reng mai. Chu THai pa chuan Zeros-a'n a naute a ka chhunga a thun lut vek lai chu a lo hmu vek tihna a nih chu, ka hau hian a lo en a.

A hlau hle bawk, Zeros-a tih nghaihna hre ta bik lo chuan, "Hello..i dam maw?" a han ti ringawt a. Thai pa chuan anmahni thai tawng chuan, "Enge...enge thleng kha...nang, nang hi tunge i nih?" tiin khur zawih zawih chung chuan a silai ken lai chuan a tin nghal a. Zeros-a chu a han maimitchhing a, "Enteh ka pu, i mitvai mai mai a nih kha.." tiin ava pan a.

Zeros-a hian thai tawng thovin a be ve a ni, "Hey..lo kal suh...lo kal hnai tawh suh. Ding nghal rawh, anih loh chuan ka kap ang che." putar chuan a han ti khur leh dar dar a. Zeros-a chu a thaw hak a, "I ti dawn lo tih ka hria alawm." tiin a nui a. Chutah putar chuan a chaldarah tak chuan a silai ken chuan a kap ta pawp mai, Zeros-a pawh a dak awrh a.

Mahse a tlu hauh lo, rum zet hian putar chu a rawn melh ta khur mai. A char chu darthlang keh ang mai hian tereuhte hian a keh a, silaimu chu a lawr tut bawk. Zeros-a chuan a chal a silaimu chu a la thla a, a chal keh pawh chu a rawn pangngai leh nghal vek. Putar chuan a silai chu a han load tha leh a, chutih lai chuan Zeros-a chuan a rawn pan mek bawk.

A zawh fel hnu chuan putar chuan a silai chu a han hmet puak leh a, Zeros-a awmah chuan a fuh leh a. Mahse engatan mah a ngai lo, putar chuan silai chu load a tum leh lai tak chuan Zeros chuan a rawn zuan thut mai. Leiah chuan a bawhthlu nghal a, chu putar chuan a silai kenlai chu a thlauh nghal.

Chutah dimna nei hauh lo chuan Zeros-a chuan putar nghawngah chuan a seh a, a thisen chu a dawt ta kuk kuk mai. Reiloteah putar chu a thi nghal a, Zeros-a chuan a ipte atang chuan Pu Vana kawrkilh chu la chhuakin putar awm zawnah chuan a nam bet a, kawrkilh chu a rawn pawl leh ta vut vut mai.

Chvueleh putar ruang chu a rawn khal vek a, a keh ta vek mai. A kehthem te chu darthlalang vek a ni lehnghal, hmuia thisen kai nuai chung chuan Zeros-a chu a tho kang a. Ramhnuai pilril lam pan chuan chak takin a kal a, a kal chak telh telh a. Chutah a tlan thut a, a tlan chak ngang mai. SAng tawk hian a zuang vak a, a thlawk bo leh ta daih mai.

*************************

Tlaiah chuan Melody leh Daniel-a te pawh chuan last period chu an va attend ve ta hram a, an Sir Tetea pawh chu lo lut nghalin zin dan tur vel chu a rawn sawi a. Thla leh ah nilovin a kar leh lawkah an zin tur thu chu a rawn sawi ta mai. Chu chauh chu ala ni lo, thla thum nilovin kar 2 chhung zawk zin tur a lo ni.

"Lengpui Airport atangin thlawhna in kan kal nghal dawn lo ania, sum ahek dawn lutuk. A hmasa berin Capital Bus-in Silchar thleng kan kal anga, Silchar atangin thlawhna in Sivarnabhmi thleng kan thlawk leh ang.." tiin an zinkawng tur chu a sawi mawlh mawlh a. Pawisa sen zat tur zawng zawngte nen a sawi zawh chuan, "Tunge kal thei lo tur emaw, harsatna nei in awm em? Ban han phar lawk teh u.." a han ti a.

Mi pahnih leh Melody te chuan an ban chu an phar nghal a, Daniel-a chuan phar ve chu a han tum ringawt a. Mahse Melody chuan a ban chu a lo man beh sak nghal a, Daniel-a chu a lungawi vak lo. "In pathum khan HOD Office ah lo chhuk ula, abak zawng in haw thei." tiin Sir Tetea chuan class chu a chhuahsan ta a.

Thinrim tak hian Daniel-a chuan, "Tinge ka kut ilo man a? I tel lo chuan ka kal peih bik hleinem." a ti nuah nuah mai. "I mawl emai, kal ka chak em em a..keia kal dawn loh vang ringawt.." tiin Melody chuan a lo vin hlur a. Daniel-a chuan tum hmuk hian, "Nangpawh maithei i ti ringawt a, nge kal thei lo tur ang maia i ban i phar leh si?" tiin a han zawt leh a.

"Ka kal theihlohna chance a tam zawk alawm."

"I va over tak, enge a tam zawkna?"

"Chutin thinrim nghal tun tun lola, ka kal dawn lo tawp tihna pawh a ni hleinem."

"I kal peih loh vang a nih kha."

"Chulam a ni lo, ka harsatnate ka zuk sawi anga HOD bulah, min puih theih dawn vang pawh a ni maithei asin min koh ni.."

Daniel-a chuan chhan pawh a chhang tawh lo, titau niawm tak chuan a bag vel chu a siam tha mawlh mawlh a. "Ka zuk kal ange, min lo nghak rawh aw...gate bulah.." tiin Melody chuan a chhuahsan a, DAniel-a pawh chu a hnuah chuan chhuak ve in ground ah chuan a chhuk thla nghal a.

A scooty chu a tinung a, gate bul thleng chu a khalh chho va. Dawnga te a zawng ru leh nghal,  a hlauhna a la reh thei thlawt lo. Mahse a thiannu Melody'n a sawisak avangin college a kal thei dawn lo tih a hrechhuak leh thut a, amah pawh chu a nui huk mai. Reiloteah chuan Melody chu a rawn thleng a, "Enge chanchin?" tiin Daniel-a chuan a lo zawt nghal vat.

Phur lo tak chuan, "Report erawh chu theh lut la, theory angin i kal mai dawnnia min ti." tiin a lo chhang a. Daniel-a chu a lawm lo kher mai, "Anih chuan keipawh ka kal thei dawn lo tiin ka sawi ve dawn.." a lo ti hmuk mai. "Amak e aw...zanah kan sawi tha dawnnia...haw phawt ang." tiin Melody chu a hnungah chuan a chuang nghal tharh a, Daniel-a pawh chu phur lo tak chuan scooty ah chuan lawn ve in an haw ta a ni.

****************************

Zan a lo thleng a, MElody nu chu a zual deuh thut avang chuan DAmdawiin lamah Melody chu a kal ve a. A buai hrih em avang chuan Daniel-a pawh chuan a be ngam hrih lo, "Ka lo call ang che, ka hman hunah.." tia Melody'n a hrilh avang chuan a call hun chu a nghak ngat ngat a. Lehkha pawh a zir tha thei lo, a rilru ah a lut hlawl lo a ni.

Minute 10 vel hnuah chuan a phone chu a rawn ri hlauh mai, rang takin a en nghal vat a. Mahse a beiseiloh lutukin a thianpa Robert-a zawk a lo ni reng mai, "Hello Robert? Enge i an tawh, i dam deuh tawh em?" tiin a han zawt nghal a. Inthlahrun hmel tak hian Robert-a chuan, "Thianpa, bad news a awm a?" a rawn ti chuai raih mai.

"Enga? Eng bad news maw?" tiin a lo zawt vat a. Robert-a chu a han thaw deuh hak a, "Internship ka tih ve theih pawh ka ring lo." a rawn ti leh ta mai a, Daniel-a chuan a cham chu a dawm tawp. Tap tep hian, "Tinge? Nang leh zel? Melody pawh a thei dawn lova, tumah kawm tur ka nei nang." tiin a phun nghal vak vak a.

"Hei..ka khawsik a zual vak a. Vawiin khan ka pa in damdawiinah min tlan chhoh pui a, ka lo Covid reng a...ka pa pawh an quarantine nghal a, keipawh damdawiinah min admit." a rawn ti leh a. Daneil-a chuan pawi a ti kher mai, "A zia lo kher mai, anih tunah enge i an tawh?" tiin a han zawt nawn leh a.

"Tunah tak chuan ka zia tawh e, mahse ka lu hi ala na ut ut mai."

"A pawi hle mai, lo kal ve la chu kan la inkawm thei tal tur ania."

"Anih leh tinge Melody chu?"

"Anu a dam nasa lutuk a, nichin deuh khan a zual lehnghal a ni awm e."

"Chuvang chuan maw?"

"AW ni e, damdawiinah riah pui zeuh zeuh angai thin bawk sia."

"Anih tak chu, tunah ani pawh hospitalah em ni a awm?"

"Aw tunah a awmpui mek."

Rei vak lo an inbiak leh hnuah chuan phone chu an dah ta a, minute 5 hnu vel lawkah chuan a phone chu a rawn ri leh a. A phone screen-a MElody tih inziak a hmuh chuan a pick up rang kher mai, "Hello...Melo, enge chanchin? I nu chu enge a an?" a ti nghal chung chung a. "Nachhawkna chak ber chhin an chiu a, tunah chuan a muhil rih e." tiin a rawn chhang a.

"Umm a that chu...nih leh internship lampang kha?" tiin inthlahrung deuh tak chung chuan a han zawt leh a. Melody chu a ngawi vang vang a, "Min hrethiam mai rawh, Daniel...ka thei lo, ka rawn kal ve thei lo." a ti chuai raih mai. Daniel-a lungawi lo lutuk chu a tap lek lek mai, "Ka kal lo ve mai dawn." a han ti leh sup a.

"Lalhriathlu, vawi engzat nge ka sawi dawn? Mawl mawl lo teh, kumkhuaa awm tur pawh i nih loh kha." tiin Melody chuan a rawn hau leh a. "Chupawh nise, Robert-a pawh a kal dawn lo." tiin Daniel-a chu a vin hlur tawh mai. "Ehe nga ti nge?" tiin mak tih hmel tak chuan Melody chuan a rawn zawt a.

"A lo Covid a."

"A Covid a?"

"Covid e."

"Engtik khan?"

"Aww vawiinah an hrechhuak...damdawiinah an in entir a."

"Amah a serious viau em?"

"Chutia serious a ni lo, a khua a sik a...chuzawng chu animai."

"An admit em ni?"

"Aw....an la inkhung rei hmel sia, hei tunah thursday a ni tawh a, karleh tuesday kal hun an ti leh thut bawk sia."

"Nia, kan teacher te pawh hi an ngaihtuah tlem ve bawk alawm, khawsak a in ang lo sia, engmah hi an hre thiam lo."

"Ka peih lo ee.." Daniel-a chuan a han ti leh ngawih ngawih a. "A tawk, sawi tawh suh. Tha deuhin report ziak la, nakinah i experience te min la hrilh ve zawk dawnnia." tiin Melody chuan a rawn hnem a. Daniel-a pawh chu a phun tawh bik lo, darkar 2 dawn zet an inbiak hnu chuan an duhtawk ve thei ta hram a.

***********************************

Zanlai dar 12 vel a ni a, Thailand khaw pakhat, Rayong Mai khawpui chu a reh hian a reh thiap mai. Thai nula leh tlangval inngaizawng chu kawr sirah chuan an ding a, waiting shed-ah chuan an thudun a. A mipa zawk chu kum 25-28 vel niawm tak hi a ni a, a hmeichhia erawh school form la ha in a hmel en reng reng pawh chuan kum 17 ai chuan ala upat hmel loh.

Tlangval chuan a han thut hnaih a, "A nuam i ti em vawiin kan indate chu?" tiin a han nek talh talh a. Lai tak hian hmeichhia chuan, "Umm..nuam animai." a lo ti zawi sap a. Mipa chuan sana a en a, "Ehe, ava tlai tawh ve...ka va dah tawh dawn che em ni? I nu a lo mangang hman lutuk ang." a han ti leh a.

Tleirawl pawh chuan, "Nia a pawi hleinem." a lo ti ve bawk a. Thawh an han tum chu tlangval chuan hmeichhia chu a pawt thu leh a, Hmeichhia chuan a ngaihna hriatloh hmel tak hian, "Hey, enge maw i tih le?" a lo ti hu mai. Tlangval chu inla zei fahran chuan a han khi deuh suk a, "Hei leh chen kan inphur kual tawh a, kan haw dawnah tal hi chuan inkiss ve tawh ila." a han ti su su a.

Nula chu a lai kher mai, a nui sen sen ringawt a. Tlangval chuan a khabe ah a dawm chho va, "I duh tiraw?" a han ti leh a. Lai tak chung chuan hmeichhia chuan, "Umm duh e..mahse..." a han ti kual leh vel phawt a. "Enge mahse...mawh?" tiin a lo zawt leh vat a. "A bak i duh belh zel ang tih ka hlau." tiin nula chuan a lo chhang a.

Tlangval chu a nui suk a, "Mipa dang ang ka nilo, keichu ka danglam." a han ti leh a. "Mipa zawng zawng chuan tiang khan in sawi vek alawm." tiin nula chuan a lo chhang let leh a. "Bengchheng tawh suh...min ring tih ka hria." tih pah chuan zawi muang chuan ava hnaih riai riai a. Nula pawh chu a lo maimitchhing ve nghal mai a, a hmui chu a lo dawh ve mai bawk.

An inkiss tep tihah chuan an hnung kham atang chuan thawm an hre ta tlat mai, an inkiss loh phah bawk. Chutah thawm chu a rawn hnai zel a, bak tam tak, 200 chuang vel zet mai hi an rawn thlawk chho ta sup sup mai. An liam em em mai a, an thla zap ri pawh a ring ngang mai. Nula hlau chu a t(r)e deuh tuar nghe nghe a, bak chu kawngpuiah chuan an thawk kual vak vak a.

Mak ti tak chuan chu nula leh tlangval chuan an en char char ringawt a, chutah bak ho chu inhnaih tak tak hian an thlawk kual a, an vir mup mup mai. Mak tak mai hian chung bak ho chu an lian tulh tulh hlawm a, a tawpah chuan bak ho chu an bo vek a. Mihring niawm tak, hmelchhe lemlo tak leh vun dang var pup mai, dum veka inthuam hi a rawn lang a.

A rawn nui var var mai a, a ha te chu a hriam hmel em em mai lehnghal. Chupa chu tudang nilovin, Zeros-a a ni. Nula hlau chu a au vak a, a tlanchhe nghal a. Tlangval pawh chu a tlanchhe ve nghal, a bike lam a pan a. Mahse nula zawk hlau lutuk chuan bike chu tlan pelin building inkar ah chuan a biru a, vanneihthlak takin Zeros-a chuana biru lai chu a hmu lo hlauh.

A chhan chu Zeros-a chuan nula nilovin, tlangval zawk chu a bitum miau a ni. A bike bula a ding lai chu a va zuan tlu a, a duhtawk chuan a ngawngah sehin a thisen a dawt sak leh ta kuk kuk mai. Bang phen atang chuan nula chuan a en reng a, a hlau lutuk chu a hik chhuak vek thei hial a ni.

A zawh hnu chuan Zeros chuan a tihdan ngai bawk chuan Pu Vana kawrkilh chu a phawrh chhuak leh a, chu tlangval ruang let reng awmah chuan nambetin engemaw chu a chham leh ta. Chutah chu tlangval taksa chu a khal leh ta vek mai a, a keh darh leh ta vek mai. Bang phen atang chuan nula chuan a lo la hmu vek a, mak a tiin a rap ngei mai.

A mumang nise a ti em em a, mahse a tak ngeia thil thleng a ni si. Tichuan Zeros-a chu a ding a, chunglam hawichhovin thla chu a en vang vang a. A maimitchhing a, chutah a taksa chu a rawn danglam leh ta. A hnung atang chuan bak thla ang tak mai pahnih hi a rawn parh chhuak a, amah pawh chu bak lian takah chuan a chang nghal bawk.

A thla chu a zap ri hluau hluau mai a, chak zet hian van sang lamah chuan a thlawk chho leh ta fua mai. Thla lam a pan lai tak chu nula chuan a phone chuan thla a lo la hman hlauh mai, mak a ti lutuk chu ala khur char char thei. Tichuan rang takin a bihrukna atang chuan a chhuak a, in lam panin ke in a theih tawka chak chuan a tlan haw ve leh ta a ni.

*****************************

Ni 4 chiah inpuahchahna hun a nei tawh bawk nen, Daniel-a pawh a buai kher mai. Melody erawh anu a riahpui thin avang chuan college pawh a rawn kal ngai lova, Robert-a lah chuti bawk. Daniel-a chu a khua a har thei em em a, mahse Melody nen chuan an intext reng thin tho. A ni telin Melody chu a hmu tha telh telh lehnghal a, a rilru ah a awm reng mai.

Kar 2 chhung lek chauh zin dawn mahse, amah chauhva a awm tur leh thian a nei ve lo tur chu ngaihtuahin a huphurh em em a. Kal ve loh mai chu a duh leh rum rum thin, mahse Melody chuan a fuih hram hram zel a. Dawnga ber college a chawlh hrih avang chuan college ah pawh Melody tello pawh chuan DAniel-a chu a ngaih a ngam ve deuh ta, Dawnga thiante lah chuan an boss tello chuan an tibuai ngam der mai silo.

Ni 4 a liam ta a, zankhat chiah a nei ta. A thawmhnaw vel a pack fel mawlh mawlh lai chuan a room kawngka chu a rawn inkik dat dat a, "Lo lut rawh." tiin a lo chhawn vat a. Apa a lo ni a, "E hei..Mama, i thiannu a lo leng ania." a ti chu mak a ti kher mai. "Ka thiannu maw?" a lo ti hu mai.

"Aw ni e, ka rawn luh tir dawn nia." tih pah chuan, "Bawihi lo kal rawh, va lut rawh saw..a insiam mek a." a han tih zawm nghal zat a. Chutah Melody chu a rawn lut ta mai, a beiseiloh lutuk a rawn lut chu a ka hau mai a. Melody lah chuan nui sang chung hian, "Kha..i va phur tawh awm ve." tiin a rawn fiam a.

"Melody, nangmaw? Engtin nge kan in i hriat a?" Daniel-a chuan a lo ti hu mai. Laih hmel tak hian Melody chuan, "Kan vei zawng deuh hi chu...an in pawh kan hre chat mai lawm." a lo ti fiam a, a mipa zawk DAniel-a chu a lai lek lek mai. Za lo deuh chuan a nui suk a, "Lo..lo thu la, hei..khumah te pawh." a ti bah nuai mai.

"Zanin chiah i zin hma kan inhmu tawh dawn sia, college ka rawn kal theilo rei bawk sia, rawn safe journey che ka duh a."

"Umm a nih chu...i nu a zia tawh em ni?"

"Zia tih ah...a pangngai a nimai. Ka cousin Ruatpuia'n min chhawk dawn a, zanin chu..aman a riah pui dawn."

"Umm a nih chu...ih...ka tibuai che em?" DAniel-a zawk chuan a han ti daih a, a lai lutuk chu a thlan a tla bawrh bawrh mai. Melody insum zo lo chu a nui huah huah a, "Enge maw min tihbuai ngawt ang le..i insiam lai ka rawn leng a, ka tibuai zawk lo che maw?" tiin a lo zawt let a. "Tibuai love..thingpui in rawh aw, ka va lum dawn mi?" Daniel-a chuan a lo ti leh a.

"Ka awm rei hman lo..rawn kal zuai ka tum ringawt. Inah ka pa amah chauhvin a awm a, min ngaihtuah lutuk ang." tiin a lo chhang a. "Tu nen nge in lo kal a?" tiin a zawt leh a. "Kan kawmthlang ami..ka thiannu nen." tiin a lo chhang leh a. "Aw..anih chu, ahh...enge i ei duh?" te a han ti leh rih thin.

"Engmah ka ei chak lo...phei leh deuh nghal mai ka duh. Ka thiannu pawh sawn nuam a ti lovang, min nghak mek awm sia...ka phei leh mai ang." tiin a ding a. Daniel-a chu panin ava kuah a, "Ka ngai dawn emai che, kar 2 lek pawh nise.." tiin a awmah chuan a han bei thlawp a. Daniel-a chuan a lo feel veng veng mai, Melody a duhna chu a pung nasa zual hle bawk.

Melody chuan a mitah tak enin, "Thil min lo hawn rawh aw...safe journey." tiin chhuahsan a tum a, Daniel-a chuan a zui ve nghal bawk. Mahse Melody chu a ding a, "Good luck nan thilpek ka pe ang che aww.." tiin a han nuih leh sen sen a. Daniel-a chuan a lo hrethiam lo kher mai, "Eng thil pek maw?" a lo ti hu mai a.

Melody chuan ava pan hnai leh a, Daniel-a hmuiah chuan a kiss ta zeuh mai. Daniel-a chu a ding ngil nghal deuh at a, a che miah lo. "Min rawn thlah angai lo ania, ka lo nghak reng ang che...ka kal aw.." tiin a chhuahsan ta daih mai. DAniel-a chuan chet ngaihna a hre lo, ngil at chuan a khumah chuan a bawk thla thlawp ringawt.

*****************************

TO BE CONTINUE