KEIMI (MIZO FICTIONAL CHARACTER STORY) Written by : Aaron Malsawmdawngzuala Chapter-5

 KEIMI

(MIZO FICTIONAL CHARACTER STORY)

Written by : Aaron Malsawmdawngzuala

Chapter-5

**********************

Zeros-a chuan Pu Vana kawrkilh thiltihtheihna chu hman a tum nasa, mahse Keichala thlarau awmna chu a hre thei tawh tlat lo. A mangang tan tawh hle mai, ram hran hranah thlawk kualin a zawng a, mahse a hmu thei mai tawh lo. Zan khat chu a naute chu ko khawm leh a, ruahmanna tha tawk tak siam a tum ta a.

Tlang sang tak chhipah chuan a thlawk chho vang vang a, tichuan ngil tak hian a ding a. A kut pahnih chu a phar chhuak a, chutah hmin hran hran atang chuan bak tam em em mai hi an rawn thlawk khawm ta sup sup mai. Zeros-a hma zawn takah chuan an khawm a, ain in bawr luih luih mai.

Tichuan bak ho chu an thawm a reh tial tial a, a tawpah chuan an thlawk sawn ta vek a. Mahse vampire dang pathum hi Zeros-a hmaah chuan an lo awm reng tawh a, an hming chu Silas, Magnus leh Lazarus te an ni. Zeros-a chuan an pathum chuan a en vang vang a, "Nangni pathum hi ka siam in ni a, vampire dang zawng zawng chakna belhkhawmin ka siam che u a ni." a han ti a.

Chumite pathum chuan an boss ber chu an en kar mai, "Silas...nang hi in zinga rim hriatna chak ber i ni a, mihring rim tawh phawt chu hla takah pawh awm mahse, hre thei chat chat turin ka siam che a ni. Lazarus, nang chu in zinga tuan rang berah ka siam che a, Magnus...nang erawh in zinga fing ber leh chak berah ka siam thung che a ni." tiin an thiltihtheihna theuh chu a hrilh hlawm a.

Vampire pathumte chuan chibai bukin, "Thu min pe rawh, Lalpa." an ti rual thap mai. Zeros-a chuan an pathum chuan a va pan hnai a, "Kan thil zawn mek in hria, chu chu Keichala thlarau bihrukna a ni. Belzebula'n tunah hian ka phatsan tih a hre tawh a, a ramhuaite tirin min rawn bei maithei bawk. Chumi lak ata min veng tu turin ka siam bawk che u a ni tih hre tel ang che u, mahse Keichala thlarau kan hmuh hma chu Belzubula chu theihnghilh hrih ang che u." a han ti leh a.

Tichuan Zeros-a chuan an hna tur theuh chu a hrilh a, a thlawk bo san ta daih a. Vampire pathumte chu an la ding reng a, an in en deuh hru hlawm a. Chutah rang lutuk tak mai hian hmuh pawh hmuh hman loh khawpin ramhnuai lamah chuan Lazarus-a chu a phe vuai a, a bo nghal vang vang mai.

Magnus-a leh Silas-a te chu an in en a, an nui dun suk ringawt. Tichuan MAgnus-a zawk chu khamah chuan a zuang thla a, a t(r)um thawm pawh a ring thawkhat bawk aniang, a ngawr dawt mai. A la awmchhun Silas-a chuan boruak chu a han hnim vang vang a, mihring rim a hriat hnaih ber lam pan chuan a thlawk bo ve ta a.

***************************

Daniel-a pawh a vawikhatna atan bialnu a nei ve ta, chupawh a duh ruk em em leh a thiannu ni bawk Melody ala ni zui. Tlai lam dar 4 a rik meuh chuan Daniel-a pawh chuan haw a tum ve ta a, "I pa office a lo haw hman palh ang, ka haw tawh mai ange." tiin a han nui deuh suk a. "Umm nia, pawn thleng ka lo thlah ang che." tiin Melody chuan a lo chhang a.

Pawnah chuan an chhuak dun a, "ZAnah lo leng leh rawh aw, please in.." tiin Melody chuan a han ngen a. Daniel-a chuan a hnial phal ngang lo, "Awle, mahse i pa ka hlau e." a han ti nuah nuah a. "I thing lutuk, pa lo emai...lo leng ngei ngei ang che." tiin Melody chuan a lo sik vak mai. "Aiah..awle awle..ka lo leng ngei ngei ang." tiin a ban chu a tuai nauh nauh mai.

"Kan verandah ah kan thu anga, kan inkawm dawnnia. Zanin full moon a ni lehnghal a, lo kal lo vaih teh..i chak lovang." tiin Melody chuan a han vau der a. "Awle ka Lalnu..i thu ang zelin le." tiin Daniel-a chuan a lo fiamthu ve bawk. Tichuan vawi khat an inkiss leh a, tichuan DAniel-a chu a haw ta a.

Daniel-a haw hnu minute 5 velah chuan Melody te in kawngka chu a rawn inkik leh karh karh mai a, Melody chuan ava hawng leh nghal a. Mipa pakhat, ft 5'10 vela sang..sa tha ve lam hi a lo ni. A hmel en chuan kum 30-35 vel a nih a rinawm a, hang lampang leh khawsak theih hmel tak a ni bawk.

"Enge i duh aww?" tiin Melody chuan a han zawt a. Chupa chuan nui sang hian, "Pu Chhuma te in a ni em aw? Officer LalChhuma?" tiin a lo zawt let a.  "Aw ni e, mahse inah a awm lova." tiin Melody chuan a lo chhang a. Chupa chu a han nui deuh var var a, "Nia ka hria alawm, a awm lovang tih chu...a duty daih ang chu tiraw?" a lo ti kual leh vel a.

Melody chuan mak a ti angreng khawp mai, "Nia, a duty daih a, a lo bang tep ang." tiin a lo chhang leh a. Chupa chuan Melody chu a han en vang vang a, "A fanu i niang maw?" tiin a chhip atanga a ke ler thleng chuan a han melh leh vang vang mai a, Melody ngaih chu a tha lo tan. "Umm ni e." tiin a chhang ve leh mai a.

A ipte atang chuan chupa chuan envelope hi a rawn phawrh a, "Hei hi i pa ta tur ania, mahse amah chauh chhiar tir ang che." tiin a pe a. Melody chu a hrilhhai angreng kher mai, "E awle..awle." a ti bah nuai mai. Chupa bawk chuan, "Ka kal ange, i hmelhta reuh hle mai." a la ti zui hram a, a kal ta a.

Melody chuan a en zui vang vang a, a chetdan leh a thawven dan zawr zawr chu mak a tiin a eiloh hmel kher mai. Envelope chu a en a, "To my hero Pu Chhuma." tih hi a lo la inziak zui, a hnuaiah chuan "From SADIST." tih a inziak bawk. "Tu chu nge mawni?" tih nuah nuah pah chuan inchhungah chuan a lut leh a, envelope pawh chu TV chungah a dah ve mai bawk.

*************************

Daniel-a haw kawngah chuan kawngsirah chuan palian deuh pakhat, hmuihmul nei chhur leh samsei, vun dang var deuh pup mai, sual hmel em em mai hi a lo thu a, mipuite chu a lo melh kual zeuh zeuh a. Daniel-a chuan a scooty chuan a rawn tlan pel mai a, mahse chupa chuan DAniel-a chu a melh deuh vung vung mai.

Chupa chu tudang nilovin, vampire pathumte zinga mi Magnus-a kha a ni. Zeros-a'n thiltihtheihna a pek hmang chuan a aia chiang lehzual chuan DAniel-a chu a han thlek leh vang vang a, mihring pangngai a ni lo tih a hre ta. A nui deuh suk a, a tho deuh vut a. Tichuan mi in bang phen, tuma hmuh lohna turah chuan a biru a.

A maimitchhing vang vang a, a bul hnai vel chu a rawn khu rum rum mai. Tichuan thawk leh khatah bak ah a chang daih mai a, bang phen atang chuan a rawn thlawk chhuak a. A thiante pahnih leh a boss Zeros-a hrilh tur chuan a thlawk ta vang vang mai. DAniel-a lah chuan engmah a hre der mai silo, Melody ngaihtuah chung chuan nui vur vur chung chuan a inkhalh haw ve leh mai bawk.

Scooty chu a dah fel a, inchhung a luh dawn tepah chuan an thenawmte zawhte Tomtoma chu an kawngka bulah chuan a lo bawk hle hle a. An thenawmte zawhte Tomtoma hi Daniel-a te inah hian a leng fo thin a, Pi Zualtei te nupa pawh hian an duat hle bawk. Chutiang bawkin Daniel-a pawh hi zawhte lawm tak a ni a, Tomtoma pawh in a nel hle.

"Ehe Tomtoma chu i lo leng animaw?" tiin DAniel-a chuan ava pan hnai a, pawm a tum chiah chu Tomtoma chu a zuang dawr mai. Daniel-a zawk pawh chu a phu zuk a, Tomtoma chuan a melh ran mai. A hmul zawng zawng ding vek a, a tin te chu a rawn lawr chhuak a. Daniel-a chuan mak a ti kher mai, Tomtoma lah chu ala tlan daih zui.

"Tinge khatia a awm le? Tomtoma a nilo amawni le, min ham tep alawm." tiin Daniel-a chu ama hriat tham leh chuan a phun nuah nuah a, inchhungah chuan a lut ve mai bawk. Inchhungah chuan tumah an lo awm lova, "Nu...Nu..khawnge i awm?" tiin anu chu a au vak vak a. Mahse a reh hmak mai, "Khawnge maw a awm le?" ti nuah nuah chung chuan a roomah chuan a lut a.

Chutah thil ngaihtuah chhuah a nei thut mai, Melody te in lam a pan laia lo tibuaitu addict ho a khawih hrep lai chu a mitthla ah a rawn lang nghal uar uar mai. Khati fakau va a sawp hlawm thei mai kha mak a ti thar leh em em a, chutia a chak ta thut mai leh insual a lo thiam ta em em mai chu a in awihlo hial mai.

"Niel-a, i lo haw tawh ami?" tia anu tawng ri a hriat chuan a phu deuh zawk a, room atang chuan a chhuak nghal a. Anu chu inchhungah chawhmeh khai bawr teuh hian a rawn lut a, Daniel-a chuan ava pui nghal vat a. "I bazar a ni maw, nu?" inthlahrung tak chuan a han ti a. "Niang chu....nilengin min len bo san daih bawk sia, tirh tur i awm bawk silova...khawnge i chhuah char char a?" tiin anu chuan a lo vin lek lek mai.

"Thailang atangin kan rawn haw ve chauh sia, Melody te inah ka kal a, kan inngai ve em a.." tiin DAniel-a chuan a chhang a, chawhmeh te chu an chawei dawhkanah chuan a dah a. Pi Zualtei chuan sitting room lam phei pah chuan, "Melody i ti ve ziah mai ahh...in inngaizawng a nilo maw?" tiin a han zawt a.

Mahse DAniel-a'n a chhan hma chuan Pi Zualtei chu a inchhuih palh a, sitting room dawhkan, darthlalang atanga siam chu ava bawh keh dawn ta mai. DAniel-a lah choka lamah a awm daih si, ava hawi phei chu anu lo tlu tur chu ava hmu hman a. Anu pawh chuan dawhkan chu ava bawh hman tep, mahse a kawr hnungah chuan tu emawni hian a rawn vuan hman hlauh.

Rang takin a pawt ding a, Pi Zualtei'n amah chhantu a han en chu mak a ti kher mai. A fapa DAniel-a tho a lo ni a, "AWii..engtin, engtin nge..." a ti hu mai. "I van en fimkhur lo tak, dawhkan i bawh chhe tep alawm." tiin Daniel-a chuan a han hau zui a. Mahse anu chuan mak a ti takzet, "Chokaah khan i awm daih sia, engtin nge i rawn thlen phei hman a?" tiin a zawt hu mai.

Daniel-a pawh chuan a hrechhuak ve chiah, mihring pangngai tan anu kha va pawh hman ngaihna a awm lo, choka leh sitting room kha a inhlat lutuk tlat. "Ihh..ka rawn tlan." a ti deuh hmuk ringawt. "Rawn tlan pawh nila, i van rawn thleng hma ve.." tiin Pi Zualtei chuan mak ala ti tawp thei lo.

"Enge chu chu mak i tih viau a, ka tlan chak animai lawm." tiin Daniel-a chuan a chhang ta ringawt a. Mak ti tak leh hrilhhai tak chuan Pi Zualtei chuan a lu thak lo pui chu a hiat nauh nauh va, "Chaw..chaw lo chhum rawh." ti bah deuh nuaiin a room ah chuan a luhsan ringawt mai. DAniel-a ber pawh chuan mak a inti bawk, mahse a ngaih ti tha luiin chaw chu a chhum ve mai bawk a.

******************************

Dar 4:30 a pel a, Pu Chhuma duty pawh a rawn haw ve ta. Melody chuan rawng a lo bawl mawlh mawlh a, "Bawihte i buai em?" tiin a han zawt a. "Buai love Pa, i lo va bang tlai ve?" tiin Melody chuan a lo zawt let a. "Nia, ka han leng khawi khanglang mawle...ka'n inbual ange." tiin a inphelh mawlh mawlh a.

Bathroom ah chuan a lut tlang nghal a, rawngbawl pah chuan Melody chuan Daniel-a chu a ngaihtuah vawng vawng a, a nui deuh var var reng mai. Engti tih a duh ringawt nge a nih pawh ala inhrethiam chiah bik chuang lo, a vawikhatna atana mipa a duhzawng a tawng ve ta mai chu mak a inti kher mai.

Chawhmeh a chhuan mek lai chuan sitting room lamah a phei a, TV chu a en a. Reiloteah chuan apa pawh a inbual zo ve ta, bathroom atang chuan a rawn zai chhuak rut rut a. "I u Ruati chu zanin riak leh se...abak chu i chhawk tawh dawnnia aw...Lunglei atangin i nu Kimi a rawn chho mek a, naktuk zingah a lo thleng ang." tiin a han hrilh a.

"Nu Kimi a lo zin dawn maw?"

"AW...nizan khan ka hrilh ang che ka tia, ka theihnghilh daih a."

"Engti turin nge a lo zin dawn? Buai lai lai a.."

"Aww..kan buai vang alawm min pui tura a lo awm dawn reng."

"U Ruati chu tinge?"

"Exam a hnai tawh sia, a inthlahrun awm alawm."

"Umm..anih chu." tih ringawt chuan Melody chuan a chhang a, Pu CHhuma pawh inthlak tur chuan room lamah chuan a lut a. A inthlak zawh chuan a fanu bulah chuan a rawn thu ve a, a phone chu a khawih mual mual mai. Inthlahrung tak chuan Melody chuan, "Ihmaw Pa, khaa..ka thianpa, an sawisa a ka chhan ka tih kha i la hria em?" a han ti a.

"Aw hria e...tungea hming i tih khah?" tiin apa chuan a lo zawt let ve a. "DAniel-a ania, Daniel Lalhriathlua." tiin Melody chuan a chhang a. "Umm chuan..tinge Daniel-a chu?" tiin a han zawt leh a. ZAwite hian, "Zaninah a lo leng dawn a." a han ti zawi leh sap a. Pu Chhuma chu nui deuh vur vur chung chuan a fanu chu a en a, "Tinge? I bialpa em ni? In inngaizawng em ni?" tiin a han zawt leh a.

"Aih..ngaizawng kher lo, mahse mipa  a ni ve a, a lo leng dawng sia. Kei nula ka nia, chuvang chuan mak i tih takin ka sawi lawk mai mai, ka thianpa alawm." tiin Melody chu a insawi thiam nghal char char mai. Pu Chhuma pawh a nui suk ringawt, "Awle awle, lo leng rawh se." tiin a chhang ve ta a.

Chutah Pu Chhuma chuan TV chunga envelope chu a han hmu a, "Khi khi enge?" tiin a fanu chu a zawt nghal a. "E taka, khi khi mipa pakhat a lo kal a, i pa ta tur ania a tiaa, chuan a kal leh nghal daih." tiin Melody chuan a lo chhang a. Mak tih hmel tak hian, "Khi khi ka ta tur maw?" a  ti hu mai.

"Aw ni e, tunge a nih pawh ka hre ngai lo." tiin Melody chuan a lo chhang leh a. Pu Chhuma chuan a han la a, "TO MY HERO Pu Chhuma." tih lo inziak a hmuh chuan a meng nghal kawk mai, lehlam a han en leh a. "From SADIST." tih a han hmu leh phei chu a phu deuh dawr a. A fanu chu enin, "Engtik khan nge a lo kal? Khawi lam nge a pan?" tiin a zawt leh nghal a.

"Ka hre lo, nge ti nge a...i hria em ni?" tiin Melody ngaih tha lo chuan a han zawt let ve a. Pu Chhuma chu a ngawi vang vang a, "Eng nilove...i chawhmeh chhuan saw va ngaihtuah rawh." tiin room ah chuan a luh san daih mai. Khumah chuan a thu a, envelope chu a hawng ta a. Paper phek khat chu a lo awm ngei bawk, paper chu a han keu a.

A chhunga thu inziak chu a chhiar a, "I lo dam maw, Sir...Dustin Malsawmzuala chu ka lo let leh ta e. Mak ti lutuk duh suh, i hnena ka thusawi hnuhnung ber kha i la hria em? KA LO CHHUAK LEH ANG, KAN INHMU LEH ANG ka tih kha, hei tunah chuan ka lo chhuah leh tak ngei hi. I ngaihawm khawp mai, kan inhmu vat dawnnia. Chuan maw, Sir..tun thleng hian ka hero i la ni reng ania, SEE YOU SOON." tih hi a lo inziak a.

Pu Chhuma chu a mangang kher mai, lehkha chu pawt thler vekin bawlhhlawh bawmah chuan a paih a, a lu a dawm vawng vawng mai. Tunah chuan Dustin-a chuan fanu a nei tih chu  ahre ta phawt a, a fanu chu a ngaihtuah nghal hle mai. Engti kawng zawng pawhin Dustin-a laka a inven a ngai dawn tih a hria a, ani chuan engmah tih hreh a nei leh dawn lo tih a hre chiang hle bawk.

********************************

Zan a lo ni a, thla pawh a bial kulh tawh mai. Zan boruak pawh a nuam em em a, thlifim a tleh heuh heuh bawk. A theih ang tawka nalh chuan DAniel-a pawh chu a han inchei ve a, fai ser sawrin a inbual bawk a, a confi ve hle mai. Melody pa in a lo biak a, a chhan dan turte chu darthlalang hmaah chuan a han zir chhin vel a.

Tichuan a scooty tawng ve tawh tak, Rodeo chu a han herh nung leh a. Tichuan a bialnu thar Melody te in lam pan chuan a inkhalh phei ta a, nui hmel a pu deuh reng ringawt mai a ni. Mahse a thlen hma hret chuan van lam a han melh zeuh va, thla bial kulh mai a han hmuh chuan a lu a rawn na vak mai.

Zan rei tak chu la nilo mahse, a tlanna lai kawng chu in tlemna lai tak a lo nih avang leh a reh angreng em avang chuan khawlaiah chuan tumah vaivak an awm lo va, a reh hian a reh thuap mai. A luna lutuk chu a in control thei tlat lo, scooty chuan a accident ta nge nge a. Kawngpuiah chuan a tleng zar zar mai a, amah pawh a lum phei tup tup mai.

Chutah a bawkkhup a, a luna chu a aia nasa chuan a rawn na zual zel a. "Ka lu...ngati nge...ana lutuk." tiin Daniel-a chu a mittui a tla zawih zawih mai. Chutah a taksa chu a rawn na leh tan a, lamlianah chuan a vial nngawih ngawih mai. "Min pui ru, khawngaihin...ana lutuk." tiin a au vak vak a.

Mahse tumah veivak an awm loh avang leh kawng reh lai a nih avang chuan tanpuitu a hmu lo, a ban te chu a en a. A rawn eng(yellow) telh telh te hian a hria a. A tin chu a run zum tial tial bawk a, a taksa ah chuan hmul eng tamtak hi a rawn to teuh mai. A hlau lutuk chu tawng pawh a tawng hleithei tawh lo, a ang hlawi hlawi ringawt mai a ni.

Chutah a ruh te chu a rawn inherh ri rawp rawp mai a, Daniel-a na ti lutuk chu au pawh a au chhuak thei tawh lo. Kawchhunga ramhuai lut ang mai hian a eu deuh vak vak a, a kawr te chu a phelh a. A na tuar rum ri pawh chu a danglam tial tial a, a aw te pawh chu ramsa rum ri ang mai hian a ri chhur chhur tawh mai.

Bawkkhup zawng hian a awm a, a ke te chu a rawn sei tual tual mai a. A ha te chu rawn hriam vakin a hnar te chu a te tulh tulh a. A mitmeng a hring nghulh bawk a, a beng pawh a zum tial tial bawk. Amah Daniel-a tak phei chu nikhawhrelovin a awm daih tawh zawk, mahse a taksa chu ramsa ah a inthlak chhunzawm reng tho.

Minute 5 vel dawn lai chutia a taksa a danglam tial tial hnuah chuan mei(tail) hial te a rawn nei ta a, a tawp ah chuan sakei lian em em mai, mihring ang pian ni si, keimi ah chuan a chang ta nge nge a ni. Muangchang chuan a rawn ding chhuak a, a lian takzet. Ft 9 vel laia sang a ni a, kg 200 chuang vela rit a ni hial ang.

A mitmeng te chu a hrin hian a hring nghulh mai a, rang takin a scooty tlu pawh chu ngaihtuah lo hian chak em em mai hian a tlan ta chiam mai. A tlan pah chuan a rum nghut nghut bawk a, sakei lian tak, riltama chaw zawng hi a ang ber. Mahse sakei pangngai ai chuan a lian daih zawk, a rapawm takzet bawk.

****************************

Chutih lai chuan in lamah Melody chuan a lo la nghak reng a, a phone chu a bih deuh sek tawh mai. A text lahin a seen thei bawk si lo, a call lahin switch off a inti zel bawk si. Sana chu a en deuh chhen a, dar 8:30 a ri mai dawn. Pu Chhuma chu a room atang chuan a rawn chhuak a, "BAwihte, engtik nge i thianpa chu a lo len dawn a?" tiin a han zawt a.

"A rei tawh lovang, a lo thleng tep ang." tiin a lo chhang a. Pu Chhuma chuan banga an sana tar chu a han melh zauh va, "Khi dar 8:30 a ri mai dawn a, a va rawn leng tlai duh awm ve..." tiin a han phun deuh nuah nuah a. Melody pawh a inthlahrung khawp mai, "A..kan veng hi a inhlat ve em a." te a ti kual ta vel mai mai ringawt a.

Pu Chhuma chu a han thaw deuh huai a, "I call chhin lo em ni?" tiin a han zawt leh a, "A la thei lova, a lo tlan mek aniang." tiin a lo chhang leh a. Pu Chhuma chu a han ngawi deuh vang vang a, "Umm..anih chuan hna ka thawhsan dawn che aw..." tiin a room ah chuan a luhsan ta a. Melody pawh a inthlahrungin nuam chu a ti chiah bik lo, "Muan lutuk mai, Lalhriathlua hi chu aww.." tiin a phun nuah nuah mai.

*****************************

Nula pakhat, a hming Sangtei chu a duh ai chuan a haw tlai ta mah mah a. Haw na mai tur a nei tawh silo chu a bialpa chu a phone ta ringawt a, a lo nghah chhung chuan waiting shed pakhatah hian a thu chawl a. Chutih lai chuan drug addict pakhat rui haw chuan a lo hmu fuh hlauh mai, tihbuai a chak ta tlat lehnghal a.

Waiting shed ah chuan ava thu ve a, a han en vang vang a. Sangtei chuan a hlau deuh va, nuam lo a ti kher mai. Mahse han thawh nghal mai chu a inthlahrung ve deuh bawk si, ngawi reng chuan a thutna ngaiah chuan a thu reng a. Addict pa chuan a aw a han thian kharh kharh a, "I va mal ve a...kha i hmeltha si, nghah i nei em ni?" tiin a han bia a.

Tum hmuk hian Sangtei chuan, "Ka bialpa ka nghak." a lo ti deuh hmak a. Addict pa chu a nui huah huah a, "I bialpa ah min ngai mai la zanin chu...ka hmelthat em hi.." tiin ava thut hnaih ta mai a. Sangtei chu a tho nghal vat a, "Ngai lo mai rawh se." tiin a awm hla deuh va. Chupa chuan Sangtei hnung lam chu a han thlek vang vang a, a mawngbawr te chu a han en ngun bik deuh va.

"Zan khat atan engzat nge? I duh duh ka pe ang che...ka hausa alawm." a han ti leh chiah chu Sangtei ngaihdan a ni lo kher mai. Thinrim tak hian a leh hawi a, "I zak em? KS ka ni reng reng lo aw...ka bialpa lo thlen hunah ka hnek tir hrep dawn che." tiin a ankhum hrep mai. Addict chu a thinrim ve ta, dingin Sangtei samah chuan ava tham a.

"I zak zawk em, Hmeli. Nula ve si zana mahni a kawng sira lo awm kha zak zawk rawh, i inzual bak a ni lo." tiin a taksa chu khawih a tum ta mai. Sangtei chuan a banah a seh sak a, a bag chuan a bekah a hlap chawrh bawk. Tichuan a tlanchhe ta a, addict pa chuan thinrim tak hian, "Zawngi, lo ding nghal rawh." tiin a umzui ve bawk.

SAngtei chuan tlanchhiat pah chuan, "Min pui ru..." tiin a au vak vak a. Vanduai thlak takin a inchhuih a, a tlu ta hlauh mai. Kawngsirah chuan a bawk thlawp a, addict pa chuan a rawn um pha zui nghal bawk. SAngtei chu thawh a tum a, mahse chupa chuan a man bet a. A hmaiah chuan na em em hian a beng siah mai a, SAngtei chu a thal tawp mai.

A la duh tawk mai lo, SAngtei chu a thutbet nghal a. A rek a, "Min seh ve khanglang amaw? Khawnge, i bialpa nge keimah zei zawk kan en dawn em ni?" tih pah chuan kiss a tum a. Chuveleh a hnunglam atang chuan tu emaw hian a rawn man a, kawngsir bawlhhlawh bawm lian pathum del tlu vek khawp chuan a theh phei lawp mai.

SAngtei'n a thil hmuh chu mak a tiin a hlau takzet, keimi lian em em mai chu a hmaah chuan a ding khur mai. Au a tum a, mahse keimi chuan mihring ang mai hian au lo tur chuan zaizir hian  a hrilh a, a au hman teuh ngei mai. ZAizir bawk chuan keimi chuan tlanchhe turin a hrilh leh a, rang takin SAngtei chu a tlan nghal a.

Mahse a tlan haw nghal mai bik lo, bang phenah chuan biru in a en zui hram a. Keimi chuan addict pa chu ava pan leh ta a, a kawr awmah thamin bangah chuan a nam bet a, a rek kang ta vu mai. Addict pa chuan a hlau nasa mai a, "Tu..tunge i nih? Min chhuah hram rawh...khawngaihin, thih ka la duh lo." tiin a rak vak vak mai.

Hnai takah chuan keimi chuan a han melh ran a, chutah a ha hriam tak mai chuan chupa hrawkah chuan a seh ta mai a. Thisen pawh a per chuai chuai mai, chung zawng zawng chu Sangtei chuan a lo hmu vek a, a rap lutuk chu a uak tuar tuar thei. Chutia addict pa na tuara a au lai chuan Sangtei chuan police a phone nghal a, tualthahna a thleng tih chauhvin a sawi thung.

Chutah keimi chuan addict pa taksa rem lai lai chu a keih ta hmawk hmawk mai, Sangtei chuan a en thei tawh lo. LEhlam hawiin a maimitchhing daih mai a, keimi chuan chupa taksa chu a ei hek nual a, mahse chutia tam pawh a ei hman lo. Engemawni lian tak, bak ang tak maia thla nei, rang zet mai hian keimi chu rawn la thut mai a, van lamah a thlawh chhoh pui nghal daih mai.

SAngtei chuan a va bih leh a, mahse keimi chu a lo awm tawh hauh lo. Police ho lah chu an rawn thleng har a ti em em a, chet mai a ngam bawk si lo. A bihrukna ngaiah chuan ala biru reng a, thla lah chu a bial tha in a eng ut mai a, chu addict pa ruang leh a thisen vel pawh chu a lang chiang kher mai.

Melody chuan sana a en a, dar 10 a ri tawh mai dawn. A phone lahin a la thei bawk silo, a ngaihtuah hle tho nangin a ngei takzet bawk. Thinrim tak chung chuan a tawp nan MUTTUI tih ringawt chu ava thawn a, tichuan kawngka chu ava kalh hmak a. "Rinawm loh lutuk." tia phun nuah nuah chung chuan a mu nghal daih a.

********************

Chu bak lian tak mai, keimi rawn la tu chu tudang nilovin LAzarus-a a ni. SAng taka a thlawh pui hnuah chuan a thlah thut a, keimi chu a tla vang vang mai. Leiah chuan a tla ri dawt mai a, a tlakna chin lei pawh a khuar deuh duk thei hial. Na ti tak chuan a rawn tho leh tuah tuah a, a thinrim takzet bawk.

A mitmeng hring nghulh mai te chu a rawn sen vek tawh a, chutah LAzarus-a chu mihring pianzia nen a rawn inlan tawhin a hmaah tak chuan a rawn t(r)um chat mai. Rum taka melh chung hian keimi chuan, "Tunge i nih?" a ti thum chhur chhur mai a, a aw te chu a rapthlak takzet. LAzarus chu a nui suk a, "Min hre tawh lo em ni, Pu Keichal?" a lo ti a.

Keimi chuan mak a ti kher mai, "Keichala ka ni lo...tunge i nih? Engvanga ka chaw ei lai min rawn tibuai ngam nge i nih?" tiin a zawt leh a. "I lemchan kha duhtawk rawh, Keichal...mitthi i ni tawh, kha mihring kawchhung atang khan rawn chhuak rawh." tiin Lazarus chuan a vin hrep mai. "I thusawi awmze nei lo tak kha duhtawk rawh, zanin hian i sa zawk ka ei ang." tih pah chuan ava pan hnai a.

A va zuan vak a, mahse Lazarus chu a lo thlawk sawn daih mai. A zuan thelh chiang bawka, keimi chu leiah chuan a bawk leh thlawp mai. Chutah rang zet zet hian LAzarus chuan a hnek ta hrep hrep mai a, a chet ran em avang chuan keimi chuan a khawih tha ve hleithei tlat lo. Mahse chu chu a thin tirim zualtu a ni, a mimeng sen rum mai chu a aia nasa chuan a rawn sen lehzual a.

Chutah LAzarus chu a rek fuh chat mai, leiah chuan ri dawt khawpin a rek bet a. A hmaiah chuan a hnek siah siah mai a, Lazarus-a hmai chu a rawn keh tan ta. Chuveleh a hnung atang chuan keimi chu tu emaw hian a rawn tham a, thingkung pakhat deng dawt chuan a theh phei a. Keimi chu leiah chuan a tla thum leh ta dup mai, mahse rang zet hian a rawn tho lehnghal.

LAzarus pawh chu a rawn tho kang a, a hmai keh pawh chu amahin a rawn reh leh vek mai. Hlau hauh lo chuan ava pan phei a, mahse a thlen hma chuan a hmaah tak chuan Silas-a a rawn t(r)um veleh a, keimi pawh chu a lo ding chat a. Silas-a chuan a thiante lam chu ava hawi a, ava tlan a. An pahnih chuan a man lawk a, van lamah a thlawh bo pui ta daih mai.

*****************************

TO BE CONTINUE