YOUNG KNIVES (MIZO FICTION FANTASY STORY) Written by : Aaron Malsawmdawngzuala CHAPTER - 1

 YOUNG KNIVES

(MIZO FICTION FANTASY STORY)

Written by : Aaron Malsawmdawngzuala

CHAPTER - 1

**********************************************************

Emily chu ngawi rengin bathroom ah chuan a thu a, rilru hah hmel tak hian a kuta a ken lai, pregnancy test kit chu a en ngawih ngawih a. A rai ngei a ni tih a chiang hle bawk, a raitu lah chuan a duh dawn lo nasa maoi bawk si, chu chu Emily pawh chuan a hre ve bawk. A hming chu Erik-a a ni a, an school English teacher a ni nghe nghe.

Emily hi kum 18 leka naupang niin a hmeltha reuh hle a, mahse chhungkaw rethei tak atanga lo seilian a ni. Nau mipa a nei a, kum 10 mi lek niin a hming chu Amos-a a ni. Emily hi class 12 pass hlim hlawl a ni a, mahse college kal lehnghal mai na tur chuan pawisa an nei rih lo a ni.

A fa paina hi sawi tawh ang khan an English Teacher, Sir Erik-a a ni a. Emily hian class 11 an nih lai atang tawh khan a lo star ru thin hle a, an school in farewell party an neih zanah Erik-a hian a thlah a, tah chuan a hrai rui a, a khawih ta mai a ni. Emily pawh a tirah chuan han tang deuh mahse, a ruih em avang leh a lo duh ruk thin em avangin a inphal zui ve ta mai a ni awm e.

Tumah a hrilh ngam lo, a nu leh pate chu sawi loh, a thiante tak ngial pawh a hrilh ngam lo. A beidawng em em a, Erik-a lah chuan a be zui duh tawh hauh si lo. Chumai a ni lo, Erik-a hi mi tenawm tak lo niin Emily a chetsual pui lai chu video in a lo cover vek bawk a, Emily vau nan a hmang thin bawk.

Chuvang chuan an inkar chu Emily chuan a zep a, tumah a hrilh ngam ta lo a ni. A rai thu chu an Sir Erik-a chu a va hrilh ta ngei mai a. A hlauh ang ngeiin ti tla turin a lo hrilh nghal a, a ti tla lova, a sawi chhuak anih chuan a video chu tih leak out a tum thu hrilhin a vau zui nghal bawk.

Emily tihngaihna hre lo chuan a chhang tawh lem lo, a rilru a hah kher mai. A hmai hupin a tap zawih zawih mai a, chutia han tih tlak mai chu a phal bik lo. Tualthat a ni mai dawn si, pai tlang ta se chhugkaw tibuaitu, retheih sa nen, a nu leh pate rilru a tina lutuk tur chu a inthiam lo ve bawk si nen, a rilru a insual buai nasa kher mai.

*****************************************

Chumi ni vek chuan tlangval kum 25 mi, Augustine-a chu a hna atanga ban a lo ni ve chiah bawk a. An office chu chhuahsanin a scooty t(r)awng tawh tak khalh phei bauh bauhvin a rilru chu a hah hle mai a, a chhungte a hrilh ngei a ngai dawn si. A hlawh pawh an chhungkua in an kham tawk tawk a ni a, chuta karah ban ala ni zui bawk nen.

A inngaihtuah nasa kher mai, an ban chhan pawh hi an Manager fapa, staff zigna mi thovin a lo tawng khum nat deuh avangin Augustine-a insum zo lo chuan a hnek a, an boss in a ban nghal a ni. "HE Office atang hian chhuak rawh, ban nghal i ni e." tia an Pu berin a vin hrep lai te chu a bengah chuan a ri nawn mawlh mawlh mai.

Chutia inngaihtuah muk taka a tlan mek lai chuan kawngsira car ding tha hle hle lai chu a su bur mai. KAwng a lo en chiang lo ni ngei tur a ni, amah pawh chu a thal tawp mai a. Motor atang chuan tlangval pahnih hi an lo chhuak a, pakhat zawk chuan puih ahnekin Augustine-a chu a  tham tho lawp mai.

"Fimkhur ve ta che, ka motor hnung i tih ran vek hi i hmu em?" tih pah chuan a dulah a hnek ta siah mai a. A samah chuan kek lehin a hmaiah a hnek leh siah a, Augustine-a pawh a hawi sawk mai. A thianpa chu lo kalin Augustine-a kawr awmah chuan a rawn tham ve nghal a, "I tihchhiat man hi i chawi ngam dawn ami?" tiin a rawn vau ve nghal khur khur bawk.

Augustine-a chuan inthlahrung tak hian, "Tihpalh..tihpalh, ka.. ka lo fimkhur lo a ni. Min ngaidam ru, ka thiamloh a nih kha." tiin thupha a chawi nghal mawlh mawlh a. Pakhat zawk chuan pawr zet hian, "Tihpalh tih khan a that phah em ni?" tiin a han hnek leh siah mai a. A thianpa chu a lo thaw hak a, "Kan ngaidam hram ang che, mahse kutthlak erawh i tawrh angai, i phu." tih pah chuan a tlawh thal leh tawp mai.

Motor-ah chuan chumite thiandun chu an lut a, Auguistine-a chu an kalsan ta a. Augustine-a chu a thi phung mai, kawngpuiah chuan a let reng mai a. KAwnghnuai lam a nih avangin mi tumah an awm lem lova, kawng chu a reh kher mai. Thei leh thei lo hian Augustine-a chu a tho tual tual a, "In..inhmel ka chhinchiah alawm, inla hre ve khawp ang." tiin a han phun ve nuah nuah a.

*****************************************

Tlai lam a lo ni a, kawng reh tak mai, veng mawng lamah chuan Zorama chu hawi kual deuh hruk hruk pah hian chak takin a kal a. A hmel atang chuan engemaw hlauh chu a nei chiang a ni, a kal chak tulh tulh mai a. A thla a muang lo tih chu a hriat hle mai a, a thlan a tla zawih zawih bawk.

Chutia a kal hlawk hlawk lai chuan a hma zawn atanga pen 20 vela hla ah hian in pakhat hnunglam atang chuan pa pakhat hi a rawn chhuak thut mai a, Zorama hma takah chuan a ding a. Zorama'n a hmuh veleh chuan a phu zuk a, a ding chat mai. Hlauh hmel tak hian a en reng a, lehlam hawiin a let zawng chuan a kal leh daih a.

Chupa chuan a rawn zui leh ta nghal a, a hma aia chak chuan a kal leh a. Mahse rei pawh a kal lo, a hma zawn ah tak chuan mi pahnih an lo ding leh tlat mai. Zorama chu a ding chat a, kawng sir lamah chuan a va phei ta daih a. Chumite pathum chuan an rawn zui lehnghal a, Zorama chu a tlanchhe ta nge nge a.

An um nghal chiam mai, rei pawh a tlan hma chuan a hmaah chuan pahnih dang an lo lang leh a. Zorama mangang chu a bula stepah chuan a tlan thla ta ringawt a, an umzui leh nghal a. Rei fe an inum hnu chuan Zorama tlan lai chu mi pakhat, lukawlh tul mai hian a hnarah tak mai chuan a lo hnek siah mai.

Zorama chu a tukhum vaw chawrh hian a tlu thum dup mai a, a lu a hai nghal chuai chuai mai. Chu lukawlh chuan dim baksak lo chuan a samah a tham vak a, Zorama hnar chu a thi zawih zawih mai. Lukawlha chuan chiang kek kawk hian a han en a, "KA pawisa chu khawnge, vawiinah i ti a ni lawm ni? Min pe tawh ta che, lo phawrh rawh." a ti khur khur a.

Zorama chu a thaw hlawp hlawp mai a, "Pu..Pu Kim, ka..ka nei lo. Kar khat, kar khat chiah hun min pe leh rawh..ka rul tawh ngei ngei ang che." tiin a ngen lawm lawm a. Pu Kima chuan thinrim tak hian, "Hmela, vawi thum i sawina a ni tawh. Min la rul chuang lo, ka ngaidam ziah che. Tun tum chu ka chhuah tawh dawn lo che, min rul lo a nih chuan i farnu saw ka hmeiah ka siam ah tih hre rawh." a ti leh ta khur khur mai a.

Zorama chu a tap pur tawh mai, "Pu Kim, khawngaihin min ngaidam rawh. Kar khat chiah ka mamawh tawh ang, ka rul tawh ngei ngei ang che." tiin a dil leh a. Pu Kima chu a han maimitchhing vang vang a, "Tun chiah chance ka pe tawh ang che, a nih loh chuan i farnu saw ka ta a ni ang. I hria em?" a han ti vin hlur a.

Zorama chuan a lu a lo bu nghauh nghauh va, "Aw ka hria e, ka lawm e, Pu Kim." a han ti hluam hluam a. Pu Kima te chuan an kalsan ta a, hnar thi phung chuan Zorama chu a thingthi reng a. Zorama hi nu leh pa nei tawh lo a ni a, a nau hi a enkawl tawp mai a ni. A nau hi Mary niin kum 16 lek a ni a, a hmeltha reuh hle bawk.

Class 10 zirlai a ni a, a zirna tur tuakin Zorama hi a inhlawh thin a ni. Zorama hi kum 28 mi a ni a, Pu Kima hnuaia thawk thin a ni. Pu Kima hi damdawi tawlh ru thin a ni a, a hlawk hle bawk. MAhse Mary hian a u Zorama, damdawi tawlhrukna thilah a inrawlh ve a ni tih a hriat chuan a lungawi lo hle a, chuvang chuan Zorama chuan a bansan ta a ni.

Mahse a nau Mary chu a hrisello bawk si a, school a kal ve zel a ngai bawk nen. Pu Kima chu puihna dilin pawisa tam tham tak a puk sak a, mahse a rul leh hleithei silo chu Pu Kima chuan tihian a nau hmangin a vau thin ta a ni. Mahse Zorama hian damdawi tawlh chu a tum ve tawh lo bur thung a, mahse a dinhmun erawh a khirh hle thung si.

********************************************

"Min ngaidam rawh, midang ka nei tawh a ni. Min kal tir tawh mai rawh, engkim ti tawp ang." Rachel-u message hnuhnung ber chu a bialpa hlui ni ta, David-a chuan a en ngawih ngawih mai. Kar hnih lai chu liam tawh mahse David-a hian a hmangaih em em, nupui hial atan pawh a alo suangtuah thin, Rachel-i chuan chutia a phatsan ta mai chu ala tuar thiam mawlh lo a ni e.

Kum 2 chuang an inngaizawng tawh a, mahse Rachel-i hian a ning ta deuh a ni awm e. Midang a neih san a, chu chu kum 20 leka upa, David-a hian a la na hle a ni. A message hnuhnung ber, Rachel-i message chu inthenna thu mah nise a delete phal mawlh lo, nitin mai chuan a en ngawih ngawih zel mai a ni.

Rachael-i leh a bialpa thar hi David-a hian a la hmu dun fo thin lehnghal a, hei vang hian pawn pawh a chhuah that ngam loh phah hial a ni. Zan a lo ni a, rilru ipik lutuk tih ziaawm nan tiin DAvid-a chu a chhuak harh a. Dawr pakhata a lut tur chiah chu Rachel-i leh a bialpa thar, Peka te chu an rawn chhuak dun hlawl mai.

David-a chu a phu zuk a, chutia Rachel-i leh a bialpa thar, Peka te a han hmu dun thut mai chu a so bulh bulh mai a, hrehawm a ti takzet. Rachael-i lah chuan a hmu lo der hmiah a, kal sawn nghal a tum a. MAhse DAvid-a chu a insum zo ngang lo, Rachel-i kutah chuan a lo man a.

"Rachael, kahwngaihin inbe lawk teh ang." a han ti ta tawp a. Rachael-i lah chuan a kut chu a lo thinthlak sak a, "David, engmah sawi dun tur kan nei lo. Khawngaihin min hrethiam zawk rawh,...hawh..kal ang, Peka." tiin Peka chu a kai a, kal an tum a. Mahse DAvid-a chuan ring leng lawng hian, "Rachel...a rei dawn lo. Khawngaihin, hun tlemte tal min pe rawh." tiin a han ngen leh a.

Chutah Peka ngaihdan chu a ni ta bik lo, "Hey, Hmela... ka duh lo a tih tawh kha, i beng a ngawng ami? Kal vat rawh, ka khawih hma che hian..." a rawn ti ta khur khur mai a. David-a chu a thinrim kher mai, "Nang ka be lo che.. lo inrawlh suh." tiin a lo chhang let ve sak mai. Peka insum zo lo chuan a hnek ta siah mai a, David-a chu a thal tawp mai.

Rachael-i chuan PEka chu a lo pawt sawn vat a, "A zahthlak thin emai, Peka.. hawh kal ang." tiin a kai phei dawr dawrh a. David-a ka atang chuan thisen a lo chhuak a, rin aiin a lo hnek na phian ni tur a ni. Midang lo awm ve ho chuan an en thup lehnghal a, David-a chu a zak kher mai.

Rilru na tak chung leh zak tak chung chuan a tlan haw a, a roomah chuan lut tlangin a inkalh khum nghal a. A tap ta zawih zawih mai, a tlawm ngawih ngawih hian a inhria a. Chutah a tap bang thut a, rum taka meng chung hian a rawn dak chhuak a. Rachael-i vanga a natna zawng zawng te chu thinrimna in a rawn thlak ta vek mai.

A khur deuh dar dar a, "A tha e, Rachael. Ka ngawi mai mai lovang, phuba chu ka la khawp ang." tiin ama hriat tham lek chuan a phun sap a. David-a hi college kal lai a ni a, an in exam tep tawh lehnghal. Lehkha a zir theih loh phah a, attadance ah pawh a tla teuh hle a ni. A rilru ah Rachael-i bak a awm thei bawk si lo, a kahwngaihthlak takzet.

************************************************

Zan dar 8 vel a ni a, Ruatfela chu rilru hah hmel tak hian Hospital kawtah chuan a thu ngui bur mai a. Doctor-i'n, "A thluak a bawk awm hi kan zai vat loh chuan i fanu hian a nunna a chan thuai ang, mahse surgery man hi cheng nuai 2 lai a ni dawn a. Chutah lo zai thei pawh ni ila hlawhtling takin kan zai thei kher angem, a dam phah angem tih pawh thil risky lutuk ala ni." tia a hrilh lai te chu a bengah chuan a ri nawn awn awn mai.

Ruatfela hi kum 32 a upa a ni a, a nupuiin a thihsan tawh a ni. A fanu hi SAngsangi a ni a, kum 8 mi lek a ni. Sangsangi hi kum 7 a nih laiin anu chuan a thihsan a, apa hian a enkawl ta tawp mai a ni. Fa dang an la nei leh rih lo, Ruatfela nupui hi accident vanga thi a ni bawk. Ruatfela hi mistiri a ni a, a fanu nen chauh hian mi inluah in an khawsa ve tawk tawk a.

An harsa hle a, chuta karah a fanu lah chu naupang te e tilo chuan Brain tumor a nei tlat mai a. A ni tel mai chuan a nasa telh telh a, doctor an pan pui meuh phei chuan a lo tha lo tawh hle a ni awm e. A nupuia chhungte erawh hi chu mi hausa tak an ni a, mahse mi chapo tak leh mi rethei leh hnuaihnung zawk hmusit em em thin chhungkua an lo ni reng mai a.

An fanu pawh hi Ruatfela tan hian an phal lo hrim hrim a, mahse a lo rai hman tawh avangin inneih an tum ta tho va. Ruatfela nupui pawh chu a chhungte chuan an tuithlar hman mai tihna a nih chu, an tunu Sangsangi pawh a damlo tih an hre ve reng a, mahse an pui duh chuang der lo.

Ruatfela tan chuan a mangan thlak thin khawp ang le, a fanu lah chu harh chhuak miah lovin darkar 24 dawn chu a mu reng tawh mai si a. Surgery chu lo ti thei pawh nise, khawi a cheng nuai 2 mah hi a nei vat thei dawn lo, pukna tur lah tumah a hmu hek lo. Amah hi mi kawm ngai em em lo, ngawi chawi ve tak a lo ni bawk nen thian tha tia han sawi tur a nei meuh lo a ni.

A rilru tih thawven nan tiin hospital atang chuan a chhuak a, park ah a kal a. A tei kual nulh nulh a, inthah te thleng chuan a rilru ah a awm hman hial. Mahse thi ta se, a fanu chu puitu tur leh enkawl tu tur nei lovin a thi ve mai dawn si a, chu chu a ngai ngam ngang bik si lo. A mittui chu a hru a hru mai a, Pathian pawh a dem lek lek hial mai.

**************************************

Chumi park ah vek chuan Zorama, David-a, Emily leh Augustine-a te chu an rilru hah lutuk, intih thawven nan tiin an lo kal ve tho va. Mahse park chu a zau angreng hle a, thingkung a tam mai bakah zanah phei chuan a thim ve em em a, chuvang chuan tumah chu an inhmu lo. A tu a te mah hi an inhre ngai lova, park ah chuan an awm ho vek tih pawh tumah chuan an hre lo bawk.

Augustine-a chuan sikret chu a han tan a, a zu khu hluah hluah a. Chutah van lam atang chuan thawm a hre tlat, rocket thlawk ri niawm tak a ni. A han dak chho va, arsi thlawk niawm tak hi a hmu a. A la pawl vut leh ta nghal a, hmuh chian a la awl phian zui. Midang pali te pawh chuan an lo hmu ve bawk, mak tak maiin chu arsi thlawk ni awm tak chun an lam zawna rawn tla thla ang hian an hmu ta tlat mai a.

Park hnung lam hi ramhnuai vek a ni tawh a, thirlen sang tak, ft 15 laia sang a hung a ni ve thlap bawk. Arsi chu a rawn hnai zel a, park hnunglam ah chuan a rawn tla ta. A ri bur a, bomb puak ri a ang mah zawk. Chutah a tlakna lai chu a rawn eng pawl(blue) vut vut mai a, light pawl, a chho zawnga chhun hi ral khat atanga en chuan a ang ber awm e.

Thirlen inhungna pawh chu a chhe hneh hle a, a tlakna chin lei pawh ft 2 vel dawnin a kuar duk mai. Chu thil tla chu arsi a lo ni ngei bawk a, mahse eng arsi ber nge hriat a ni lo. A them chauh a lo ni a, mahse car pakhat tluk zeta lian a ni thung. Chu arsi them khi karah chuan thil tuihnang, pawl vut mai, naupang inkhualte lemna slime ang maia fan thluar thluar leh ban hmel em em mai chu a tling teuh bawk.

Ruatfela, Augustine-a, David-a, Emily leh Zorama te panga chuan chu arsi tlakna lam chu muang chang chuan an pan zel a, mahse an awmna hmun theuh atanga kal an nih avang chuan tumah chu an la inhmu chuang lova, arsi awmna lam chu an pan zel a. Chu thil eng tak mai, hnim kar atanga rawn phawt chhuak phut phut mai chu mak an ti kher mai.

*****************************************

Arsi khi kar atanga tuihnang rawn luang chhuak chu nunna nei niawm tak hian rul ang maiin an rawn tleng phei a, hmun nga ah an inthen hrang a. A hmasa ber atan Ruatfela chuan hnim kar atanga tuihnang pawl vut mai rawn luang chhuak chu a hmu a, mak a tih em avang chuan hlauh nachang pawh a hre lo.

MAhse nunna nei niawm taka alam pana a rawn luang zel mai chu a ngaih a tha lo deuh va, a han awm sawn a. MAhse tuihnang chuan a rawn pan zel mai si, "Eng..enge awmzia?" tiin a phun sup a. Chutah le, tuihnang chuan a ke chu a rawn vial chho ta mai a. Ruatfela hlau lutuk chuan ben thlak a tum a, mahse a ban lutuk tlat.

A kekawr chhungah chuan a lut chho va, Ruatfela chu a mangang kher mai. Chutah tuihnang chu Ruatfela kawchhungah chuan a lut ta, a thal tawp a. A khur hlawk hlawk a, a kawchhungah ramhuai a lut amaw tih mai tur chuan nasa tak hian a eu vak vak mai. Chutah chiang kek kawk hian a rawn meng a, a mitmeng chu a pawl phut mai.

Reilote hnu chuan nikhawhrelovin a let der mai, arsi eng pawl phut mai pawh chu tlemin a dim ta deuh va, a khi kara tuihnang pawl tling pawh chu a phai ta deuh bawk a. Emily chuan arsi awmna lam chu a pan ve zel a, chutah tuihnang luang dang pakhat chuan a rawn hmu fuh ve ta.

Emily pawh chuan a lo hmu nghal a, a ding chat mai. Chutah tuihnang luang chu rul ang mai hian a tung ta ur ur mai a, Emilt mak ti lutuk chu che miah lo hian a ding ngawi reng a, a ka hau mai. Chtuah le, rang lutuk mai hian tuihnang chu Emily ka chhungah chuan a khawh hian a inkhawh lut ta mai a.

Emily chu a che hrut a, a ding ngil nghal arh mai. A mitmeng chu a var vek a, a che ang hlawk hlawk a. Tam fe mai chu a inkhawh lut a, Emily chu a thingthi hnawk mai. A taksa chu a rawn khur der der a, t(r)e deuh thawt pah hian a rawn meng thut a. Van lam a hawi a, a mitmeng chu a pawl ve phut bawk.

MAhse reilote hnuah chuan a let tawp a, nikhawhrelovin a awm zui nghal. Tichuan arsi khi kara tuihnang pawl tling pawh chu a phai leh deuh va, eng pawl phu mai pawh chu a dim leh ta sawt mai. Emily awmna atanga hla vak lovah chuan DAvid-a chu a lo awm ve reng a, Emily t(r)e deuh thut kha a lo hre pha a, thawm lo chhuahna lam chu chhuiin a tlan nghal a.

Mahse a hnungah chuan tuihnang luang zinga pakhat chuan a umzui ve reng tih erawh a hre hauh lo. David-a chu a tlan zel a, tuihnang pawh chu a rawn tleng chak ve tawlh tawlh a. Reiloteah chuan ava umpha ta, David-a kekawr hmawr atang chuan a tleng lut a, David-a'n a hriat veleh chuan a phu zawk mai.

Mahse a tlai lutuk tawh, DAvid-a kawchhungah chuan tuihnang chu a lut hman ta tho va. David-a tlan mek lai chu a bawk thlawp mai, a khur ve ta cher cher mai a. Na tih hmel tak hian a rum vawng vawng a, a maimitchhing vang vang mai. Reiloteah chuan a rawn meng kawk a, a mit meng chu a pawl ve phut bawk, nikhawhrelovin a awm zui ve nghal a.

**************************************************

Arsi khi kara tuihnang tling chu a phai leh a, a tlem tawh khawp mai. Chu eng pawl phut mai pawh chu a dim tawh hle a, a eng che che hi a ni deuh ber tawh. Zorama chu a thleng tep tawh a, "A eng saw a dim tial tial mawle, avan mak em em?" tiin a phun sup a. Mahse a hnung lawka thingkungah chuan tuihngah chu a tleng chho zal zal tih erawh a hre hauh lo, tuihnang chu thing zarah chuan a invet kual a.

Chutah a fan thla duai duai a, Zorama samah chuan a kai ta teuh mai. Zorama chuan a sam chu a han khawih a, thil nem duak mai a khawih fu ta mai chu a phu nasa kher mai. A lu chu a thing vak vak a, tuihnang chu benthlak a tum a. MAhse a bet nghet lutuk tlat, chuti maiin a tla thei bik lo.

Chutah le, Zorama beng chhungah chuan tuihnang chu a lut ta mai a nih chu. Zorama na ti lutuk chu a meng phar awn awn a, a mitmeng te chu a sen nghal vek mai. Na a ti takzet, a thingthi dawt a. Au pawh a au chhuak thei lo, a khur hlawk hlawk a. A bawk ta thlawp mai, muang chang hian a rawn dak chhuak tawk tawk a.

A mitmeng chu a pawl phut mai, reiloteah chuan nikhawhrelovin a awm ve ta der mai a. Arsi kara tui hnang chu a zo ta a, eng pawh chu a thim hmak mai. Chutia eng a thim ta hmak mai chu Augustine-a chu a ding chat a, va kal zui zel chu a ngam mai bik lo. A kawr hnungah chuan tuihnang la bang zawng chu a lo bet tai mai a, Augustine-a erawh chuan a hre hauh lo.

Tuihnang chu a rawn vak chho tual tual a, Augustine-a chuan rannung emaw tiin han ben thlak mai a tum a. Mahse a kutah chuan tuihnang chu a rawn invial nghal tup tup mai, Augustine-a chuan a hlau takzet. A kut chu a thing vak vak a, mahse a tla thei der mai si lo. Tichuan tuihnang chu a kawr chhungah te chuan a lut a, Augustine-a chu a mangang kher mai.

A kawchhungah chuan a lut ve ta, Augustine-a chu leiah chuan a tal vak vak a. MAhse awmzia a awm lo, tuihnang chuan a luhchilh thuk tawh lutuk tlat. Ani pawh chu a khur ve ta cher cher mai a, a mitmeng chu a rawn pawl ve ta phut mai. Mahse ani pawh chu reiloteah chuan a zawi hnawk a, nikhawhrelo chuan a awm chhunzawm ve leh ta nghal a ni.

************************************

 

Zing dar 5 vel a ni a, Emily chu a rawn harh a. Park ah chuan a lo la awm reng a, zing exer la thenkhat te thawm chuan a ti harh a ni ber, mahse tuman an lo hmu lo hlauh. A tho nghal vat a, a indap chiang a. Mak a ti kehr mai, "Enge..enge ka chungah thleng, tinge hetah hian ka awm?" tiin a inbe mawlh mawlh a.

A han inngaihtuah chiang a, engemawni a ka chhunga rawn thlawk lut kha chu a awm chiang chuan a hria. MAhse a hrechiang thei tawh lo, a mang ruai mai a. Rang takin in lamah a tlan haw nghal a, a chhungte chu an lo la tho lo hlauh. A hma zan khan Emoily hi a chhungte mut hnu a, a ruka chhuak a ni.

A room ah chuan a lut tlang nghal a, a inkalh khum a. Darthlalangah chuan a han in en a, a kawr leh kekawrh chu phelh meuhvin hliam a nei nge nei lo tihte chu a han check chiang a, mahse hliam engmah a nei bawk si lo. Na engmah a nei lo bawk a, mak a inti kher mai. Khumah chuan a thu hnawk a, "Enge ka chungah thleng le?" a han ti nuah nuah a.

Chutih lai tak chuan anu chuan kawngka a rawn chum dawt dawt a, "Mami...tho teh, hei huanah ka kal dawn ania." anu chuan rawn ti a, Emily chu a phu nasa kher mai. Anu bawk chuan, "Kalh daih zel lo teh, lo hawng teh." a rawn ti leh a. Emily chuan ava hawng a, "Rawng lo bawl ang che, chawhmeh zawrh tur ka zu en dawn ania." tiin anu chuan a han hrilh leh a.

Emily chuan a lu a lo bu nghut ringawt, "I pa kha dar 7 ah kaitho ang che, a tlai palh ang, a hnathawhna in neitute an strict si...ka kal ania." tih pah chuan a kal san a. KAwngka chu a khar na deuh va, kawngka bula dawhkan chu a nghing luih a. Tui bottle, chhin loh chu a buk ta luih luih mai.

A tlut a nge nge a, tui chu a baw ta. Emily chu a inring hman lo, "AWii..khaa.." a ti vak ringawt a. A kut chu ava phar vak ringawt, mahse a ban pha lo nasa. Emily chu a meng phawk hru a, mak a tih hmel kher mai. A chhan chu, bottle atanga tui rawn bua chhuak chuan chhuat a thleng hman lo, boruakah chuan tui chu a tang daih mai a nih chu.

Emily chuan mak a ti takzet, ngawi reng chuan a en tlawk tlawk ringawt mai a. A kut chu a han vai kual a, a vai na lamah zel chuan tui chu a awm kual ve zel mai. Emily chuan a hrethiam hlawl lo, a thaw halh hlah mai a. Chutah a kut chuan tui chu a lamah chuan a hui phei leh chhin a, tui baw mek chu boruakah chuan lang del delin Emily lam chu a rawn pan ta mai a nih chu.

Emily chuan a hui hnai zel a, a ka(mouth) a lo ang a. Tui chu khawih miah lo chuan a ka chhungah chuan a hui lut vek a, a lem khawlh mai. Emliy chuan a kut chu a en a, mak a inti takzet. Thiltihtheihna a nei ngei a ni tih a hria, mahse a la ring thei mawlh lo a ni. A chian zual nan tiin a khum bula tui bottle khat parh mai la awm chu ava la a, a chhin a hawng a.

DAwhkanah chuan a dah a, a kut chu a han phar kual leh ta vel mai. Bottle atang chuan tui chu amah in a rawn chhuak leh ta mai a nih chu, a kut chuan a control vek bawk. Emily chuan a han then hrang vel a, nuam a ti kher mai. Chutah a bottle ah chuan a thun leh vek a, mahse a thiltitheihna hmang vekin a  ti a ni.

A kut pahnih chu a en a, "Thiltihtheihna ka nei...tui ka thunun thei..kei hi... super hero ka ni maw?" tiin a thaw halh halh mai a. Kha arsi tla atanga tui hnang rawn chhuak khan thiltihtheihna  a pe a ni tih chu a hai ta hauh lo, a nui deuh var var a. A mumang a ni ang tih a hlau khawp mai, mahse mak a la ti tawp thei chuang lo.

A phone chu phawrhin a en vat a, news group ah chuan arsi tla ni awm tak park hnung lamah an hmuh thute, park hungna thirlen a delh chhiat vek thu inziak te chu a hmu ta. A news pawh chu ala tharlam khawp mai. An veng hnaih tak a ni bawk a, anu in rawngbawl tura a tirh pawh chu theihnghilh thakin arsi tlakna lam pan chuan a kal ve leh ta nghal a.

*******************************************

TO BE CONTINUE