USAGI 3 : ANOTHER KILLING SPREE ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER - 2

 USAGI 3 : ANOTHER KILLING SPREE

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER - 2

***********************************************

Tlai ah chuan Esi chuan a fanu Rosy chu inah chuan a haw pui a, Isaka erawh a la rawn haw ve lo. Esi chuan a phone chu phawrhin whatsapp group vel chu a check a, news chu a han chhiar chiang leh a. A rilru a hah zual kher mai, Rsa a nih ngei a ring tlat bawk.

A fanu chu a inthlak mawlh mawlh a, Esi erawh khumah chuan thu ngawi rengin a inngaihtuah nasa ngang mai. Rosy chuan anu chu va panin, "Nu ka kawnghren hi min lo phelh teh, a tang ania." a rawn ti a. Mahse Esi chuan a lo hre miah lo, a melh ngai chu ala melh reng a.

Rosy chuan a han sawi deuh vak a, Esi chu a rawn hawi phei a. Chutah Esi chuan afanu hmel awzawng a hmu lo, Rsa...sazupui hmaikawr rapthlak tak vuah chunga lo meng kur mai chu a hmu thut a, a t(r)e nasa kher mai. A ding a, a hnawng tawlh nghal. Mahse a han enchiang a, a fanu Rosy chuan hlauh hmel tak hian a lo en kar mai.

A thaw dep dep a, a tap tep bawk. Esi chu a inngaihtuah nasa lutuk leh hlau lutuk thil a hmu sual mai mai zawk a lo ni reng mai, a thaw huai a. A fanu lo thaw dep dep a hmuh chuan ava pan vat a, "BAwihte...Rosy, ka tihpalh lutuk aw.." tiin a kuah nghal a.

Rosy chuan hrethiam lo tak hian, "Anu, tinge i au vak kher a?" tiin a zawt a. Esi chu za lo tak chung chuan a nui lui hram hram a, "Engmah nilove, pangang ka hmu emaw ka tia...alo ni leh lova." tiin dawt a hrilh ta ringawt a. A fanu chu a thlak nghal mawlh mawlh a, tichuan thingpui leh chhang te chu a han pe a.

Home-work a tih pui leh thlap bawk a, mahse a rilru ah chuan Rsa ringawt chu ala awm thung. Psychiatrist pawh pan ngai tawh lo khawp khan a ziaawm ve tawh kha ania, mahse Buleng khua a tualthahna rapthlak tak a han thleng leh chiah chu Rsa a hlauhna kha a lo let leh a ni ber mai.

*************************************

Tlai lampangah chuan a pasal Isaka pawh chu a rawn haw ve ta a, Rosy chuan ava pan nghal a. Apa chu va kuah chatin, "Apa, enge min lo hawn?" a han ti a. Isaka chuan lo pawm nawlhin, "Hei hi ka lo hawn che a..." tih pah chuan a ipte chhunga chocolate chu phawrin a fanu chu a pe a.

Rosy chu a lawm hle mai, roomah a tlan luh pui nghal a. A nupui Esi chaw ei dawhkana lo thu ngawi reng a hmuh chuan Isaka chuan ava pan nghal a, a bulah chuan ava thu a. Esi chuan a lo ngaihsak lem lo, "Tinge min va ngaihsak lo ve, i pasal ka lo haw hi?" tiin Isaka chuan a han nek deuh talh talh a.

Esi chu a han thaw deuh hluai a, "News kha i lo hre ve em, tualthahna kha?" a han ti zawi sap a. Isaka chu a han ngawi vang vang a, "Buleng khua ami kha em ni i sawi?" tiin a han zawt let a. Esi chuan muang chang chuan a lu a lo bu nghut nghut a, "Aw ni e, vawiin khan ka hre ve chiah a." tiin a lo chhang a.

Isaka chu a han thaw deuh hak a, "Nia...a rapthlak khawp mai." a ti hmuk ringawt. Esi chuan a pasal chu a han en a, "Isak, khatiang khawp a rapthlak tualthahna kha chu, Rsa te ang mi khawngaihna nei lo tan chauh va tih theih a ni, mizo ah lehnghal phei chuan...." a tih lai chuan Isaka chuan a thawh san daih mai.

Esi chu a ding ve nghal hluai a, "A ruang pawh hmuh a ni lo, kan inah khan ka pa leh Inspector Awmpuia ruang chauh hmuh a ni. Rsa erawh a bo hmak, a chin hriat a ni lo." tap lek lek chuan a han ti vin deuh hlur a. Isaka chu a ding a, "Esi..kha hming kha sawi tawh suh. I nun atanga i paih bo angai, theihnghilh rawh." tiin hnungchhawn reng chung chuan a ti zawi sap a.

Esi chu a lungawi lo kher mai, "Ni lo, Isak. Rsa bawk a ni, Rsa hi a lo let leh a ni." a ti chiam chiam mai a. Isaka chu a rawn hawi let a, "Rukrukna thil a nih kha, pawisa pawh a bo vek an tih kha. Rsa'n pawisa engatan mah a ti lo, rukru a ni lo. Rsa a ni lovang, rukru zawk a ni." a han ti ve hlur a.

Esi chuan a aia vin hian, "Rsa tih a ni lo i ti amaw? Isak, Rsa hi a la thi lo." tiin a mengrum tawh khawp mai. Isaka chu a maimitchhing vang vang a, "Ni e, a thi ka ti lo. Rsa tih a ni lovang ka ti mai chauh a ni, hahdam rawh. I bulah ka awm a, Aizawlah daih kan awm hi. Buleng khuaah alawm tualthahna a thlen, kan him em em ang." tiin roomah chuan a luhsan daih mai.

Esi tih ngaihna hre lo chu thutthlengah chuan a han thu leh hnawk a, a tap lek lek mai. A phone chu a phawrh a, whatsapp ah chuan lutin news group chu a han en leh a. Tualthahna thlenna hmun, in(house) thlalak chu a han en nawn leh a. Engtin emaw tak chuan chu inkawt vel chu a hre tawh tlat hian a hria a, thlalak chu a han zoom chiang a.

Chutah a meng ta kawk mai, rang lutukin roomah a tlan lut a. An pa chu auvin, "Isak, Isak....hei hi lo en teh." a ti vak vak a. Isaka chu a lo inthlak mek a, "Enge ni ta chiam chiam?" a lo ti vin hlur a. Esi chuan a phone chu hmuh tirin, "Hei en rawh, hei hi tualthahna thlenna hmun chu a nih hi.." tih pah chuan phone chu a pe a.

Isaka chuan thlalak chu a han enchiang a, "Chuan enge?" a lo ti hu mai. Esi lah chuan, "Enchiang rawh...kha in kha.." a lo ti leh hlur a. Isaka chuan a han enchiang a, a hrethiam ve ta. Phawk hru hian Esi chu a en a, "Helai hmun hi...." a han ti tham tiak a. Esi chuan a lu a lo bu nghat a, "AW...ama in ngei kha a ni. Kan kalna kha....Rsa kan hmelhriat tanna kha." a lo ti zawi sap a.

Isaka chuan a han enchiang leh a, mak a ti kher mai. Esi bawk chuan, "Isak, min rawn zawng leh ang. A lo let leh ang, a chhan chu kan pahnihin kan la dam tlat a ni." a han ti leh a. Isaka chu a ngawi vang vang mai, sawi tur reng a hre lo. Esi chu zawi muang chuan khumah chuan a thu a, a rilru a hah hmel kher mai.

************************************************

A thiante nena lui kal tura an tlan lai, Rsa'n a lo tihbuai tak, an zinga dam awmchhun Cindy pawh dawr nei tawhin a hlawhtling ve reuh hle mai a. ZAn dar 8 velah chuan a dawr chu a khar thin a, a bialpa Muantea'n a rawn lam mai thin a ni. Chumi zan chuan a buai deuh avangin dar 9 dawnah chuan a khar a, a bialpa Muantea chu call a han tum a.

Mahse a pick up thei miah lo mai, "Ka lo kal chiah a tihna a rei tawh tehreng nen, tuan muang lutuk mai." tiin a phun nuah nuah a. A dawr kawtah chuan dingin a nghak ngar ngar a, mahse a rawn thleng har ta phian mai. Sana a en a, dar kua a pel der tawh mai. A tlai dawn em avang chuan ke in a kal ta tawp a, "Muang lutuk mai." tiin a han phun leh sup a.

Rei pawh a kal hma chuan building pakhat phen atang chuan tu emaw hi a rawn chhuak thut mai a, sazupui hmaikawr, buara leh lehkhakhawng hmang a siam hi a vuah a. Sa chan chem hi a hum run bawk a, Cindy chu a ding chat mai. Chupa chu muangchangin a rawn hawi a, Cindy chuan a hlau takzet.

Khawlai chu a reh tawh bawk si a, mi veivak tumah an awm tawh lo. Lehlam a hawi vat a, chak takin a kal nghal. Hnunglam chu ava hawi zeuh va, chupa chu a lo la ding run mai. A thin a phu dep dep a, a kal chak tulh tulh a. Chutah kawng a cross dawn chiah tih ah chuan motor pakhat hi a rawn tlan thut a, a su teuh ther ther ngei mai.

Motor atang chuan a khalhtupa chu a rawn chhuak a, "I tha em...Cindy? Enge awmzia?" a rawn ti nghal a, Cindy bialpa Muantea a lo ni. Cindy chu a thaw hlawi hlawi a, a hlauthawng hman ngei mai. Hnunglam chu ava hawi leh a, mahse kha palian tak mai kha a lo awm tawh miah lo.

Muantea chuan Cindy chu a han sawi deuh vak vak a, "Cindy, enge i en? Ka biak che chu i hria em, i tha maw?" tiin a be mawlh mawlh a. Cindy chu a thaw huai a, "I va muang ve...ka hlauh hman zia kha i hria em?" tiin a tap nghal pur a. Mak ti tak hian Muantea chuan, "Tinge? Engin nge ti hlau che a? Mi in an tibuai che em ni?" tiin a han zawt nghal chiam chiam a.

Cindy lah chuan, "I muan vang vek...mi pakhat a ding run alawm sawlai ah sawn.." a han ti vin leh hlur a. Muantea chuan ava en a, mahse tumah a hmu bawk si lo. Cindy samah chuan a chul a, "A awm tawh lo saw...hei ka lo thleng tawh alawm. Hlau tawh suh, engmah hlauh tur a awm lo." tiin a hnem mawlh mawlh a.

Cindy chu a la lungawi tlat lo, "I va rawn tlai reng reng ve a, ka lo kal i tihna a rei tawh tawh nen.." tiin a han melh run a. Inthiam loh hmel tak hian Muantea chuan, "Nia...sawlai deuhvah khan kawng an siam kha, traffic a ti jamm ve deuh va...chuvang mawle...ka tihpalh takzet." tiin a kuah a, Cindy pawh chu a lungawi ve thei ta hram a.

******************************************

AN in thleng Muantea chuan a thlah a, a thlah zawh hnu chuan motor lam chu a pan leh mek a. A phone a rawn ri a, "Hello, min rawn call hma teuh kher mai. HEi ka thlah zo chiah a, khawiah nge i awm...ka rawn lam ang che." a han ti su su a, a awmzia chu Muantea hian Cindy chu a lo kawp reng tihna a ni.

Phone chu a dah a, tichuan motor chu startin chak takin a tlan a. A khalh pah chuan beer chu hawngin a han in vel a, motor tape chu play in a zai nasa mai. Meizial chu a han phawrh leh a, chutah a t(r)an dawn lai tak chuan hmalam ava melh zeuh va, palian tak pakhat hi kawngpuiah chuan a lo ding run mai.

Sazupui hmaikawr a vuah a, sa chan chem a hum run bawk. Muantea phu nasa lutuk chu a kawi zawr zawr a, kawngsirah chuan a ding thei hram. A beer chu a baw vek lehnghal, "HRep tak chuan le...tu phiangsen nge mawni le?" tih pah chuan kawngpui lam chu ava hawi a.

Mahse mak tak maiin khapa kha a lo bo daih mai, Muantea pawh chuan mak a ti hle mai a. Motor atang chuan a chhuak a, a motor kawngkhar pawh chu khar ta chuang lo chuan kawngpui lam chu ava pan a. A han hawi kual a, "Tumah an awm bawk si lova, mahse ka hmu chiang bawk si a, ava mak ve mawle." tiin a phun nuah nuah a.

KAwng reh lai a ni bawk si nen, a hmun vel chu nelawm loh tak a ni. Tumah a hmuh tak lovah chuan let leh mai a tum a, mahse kawngsira hnim buk pakhat che deuh luih chu ava hmu hman tlat mai. A ding chat a, a en vang vang a. MAhse a che leh tawh miah lo, fiah ngei a duh avang chuan ava pan ta ngat a.

Muangchang chuan ava pan hnai zel a, a zawn a thlen chuan a ding a. A han thlek deuh vang vang phawt a, "AWm in awm em ni, khatah khan?" a han ti ringawt a. Mahse chhanna a dawng lo, amah pawh chu a khi deuh suk mai. Mahse thawk leh khatah hnimbuk kar atang chuan Rsa chu a rawn chhuak thut mai, a chem chu a rawn lek kang nghal vu vu bawk a.

Muantea chu a phu nasa takzet, a tan inrin hman a ni lo. Rsa chuan a chem chu a rawn vai nghal deuh pawp a, Muantea chu a lo tawlh hnung hman hlauh. MAhse a kutin a lo indang pek a, a kut veilam, kutzungtang pa thum ngawt mai chu a bung hmawk mai.

Thisen a rawn pik chhuak nghal zur zur a, Muantea na ti bawk si, hlau bawk si chu a t(r)e ring kher mai. Lamlianah chuan a tlu tawp a, a kutzungtang bung chu enin a na ti lutuk chu a rum vawng vawng mai. Rsa chu a han inbeng fai ang thuak thuak a, chutah Muantea chu a zuk en ta run mai.

Muantea chuan a hlau takzet, rang tak chuan a tho va. Lung lian tak pakhat chu la in Rsa luah chuan a vawm ri chawrh mai a, Rsa pawh a dak awrh mai. Rang lutukin tap hluam hluam chung chuan a motor lam chu Muantea chuan a pan phei nghal a, Rsa chuan thinrim takin a rawn zui ve bawk.

Motor chhungah chuan a lut a, dashboard-a rawmawlh chu la in a lut chu a tuam nghal a. Thisen lah chu a tawp thei reng reng lo mai, amah pawh chuan thisen a kai nuai tawh. Motor chu start a han tum a, mahse a kut hliam avang chuan a che tha hleithei lo.

A hmanhmawh tawh bawk si chu a tap pur mai a, "Kal bo rawh..ZAwnga, tunge i nih?" tiin a vin vak vak ringawt a, Rsa lah chu a rawn kal hnai zel mai bawk si. A rawn thleng tep tih ah chuan Muantea chuan a motor chu a start thei ta, mahse front mirror chu a han melh zeuh va.

A seat hnungah chuan Dr. Manuna a lo thu reng mai, Muantea chu a phu nasa takzet. Dr. Manuna chuan pistol a lo hum reng a, Muantea chu a seat nen chuan a kah hnan ta siah siah mai a, Muantea awm zawnah chuan a tlang pawp pawp mai. Dr. Manuna chuan vawi thum vel lai a kap a, mahse Muantea chu ala thi lo.

Motor kawngkhar chu hawngin a tla chhuak hlawl mai a, thei leh thei lo chuan a bawkvak tawk tawk a. Mahse a hma zawn takah chuan Rsa a lo ding khur mai, a han hawi chho tawk tawk a. Chutah Rsa chuan a chem chu a lek kang leh ta vu vu mai a, dimna nei hauh lo chuan Muantea chhip a tak chuan a sat siah mai.

Muantea mit leh mit inkarah tak chuan a sat thla a, a lu chu a chanve ah a phel phawk hi a ni ber mai. Thisen a rawn baw chhuak nuai nuai a, a lei(toungue) thleng chuan a laiah tak a phel a, hmuh a hrehawm khawp ang le. A thluak pawh a baw nuai mai a, a thi chiang hle bawk.

Motor atang chuan Dr. Manuna chu a rawn chhuak a, Muantea ruang chu a han en vang vang a. A khi suk a, "KS kawp kual thin ania, bialnu chu a nei reng tho." a han ti zawi sap a. Muantea kekawr ipte chu a dap a, a wallet chu a phawrh chhuak a. PAwisa chu a han en a, "A hausa dawn tih ka chiang sa reng ani, hepa hi chu." tiin a khi suk a.

Rsa erawh ala ding ngawi reng a, "BAwiha...ruang hi kawngsir bawlhhlawh paihna khamah sawn va thlak thla rawh e." Dr. Manuna bawk chuan a han ti leh a. Rsa chuan Muantea ruang chu a pu nawlh a, kawngsir khamah chuan a thlakthla ta daih mai. Tichuan Rsa chu a rawn let leh a, "I thil duh chu sawi rawh le....hei pawisa pawh kan ngah tawh ania." tiin Dr. Manuna chuan a han nuih deuh sang a.

Rsa chuan a kawrhma ipte chu a zen a, thlalak hlui deuh pakhat hi a rawn phawrh chhuak a. Dr. Manuna chu a pe a, Dr. Manuna chuan a han en a. Naute thlalak hlui hmel zet hi a lo ni a, Rsa chu a en hu mai. Rsa lah chu hnuailam melhin a kun ngul mai a, chu naute thlalak chu Rsa nau, Deborah-i nautet lai thlalak a ni.

***********************************************

Deborah-i chu muhil chu a rawn harh zawk mai a, a thu chhuak hlawl mai. A thlan chuan a bual huh vek a, khawpui lah chu a ri rum rum bawk. Deborah-i pawh hian Buleng khua a tualthahna news chu a lo hre ve a, a u Rsa thil tih ngei a nih ringin a lo vei zui ve ngawih ngawih hi a lo ni.

Sana a han en a, zing dar 2 a lo pel der tawh a. A thaw huai mai, a mu leh nghal a. Mahse a muhil mai thei lo, a u Rsa mawlh mai chu a mitthla ah chuan a rawn lang zel mai. Deborah-i pawh hian a u Rsa hi kum 6 lai mai a hmu tawh lova, a thi nge a dam tih pawh a hre lo.

Mahse Buleng khua a tualthahna a thlen thu a han hriat ve chiah kha chuan a u thiltih ngei a nih a ring nghet ve bur a, a u chu ala dam ngei a nih ringin a ngaihtuahnaah chuan a awm reng a. Mut pawh a mu tha thei lo hial a, a mutthilh ve lahin a mumangah chuan a u Rsa bawk a hmu zel mai si a.

A han tho leh rih a, choka lamah chuan va pheiin a hmai te chu a han phih a. Inchhungah chuan a tei kual a tei kual ringawt mai, khawpui lah chu a ri ang dur dur bawk a. Engtin emaw tak chuan hlauhthawnna chu a nei ru reng a, a u Rsa chu hmuh leh a chak rual rualin a hlau tel bawk a ni.

Chaw ei dawhkanah chuan a thu a, bottle-a tui lo awm chu a in khawlh khawlh a. Chutah a phone message chu a rawn vibrate hlarh hlarh mai, rang takin a en a. Number hrait loh atang hian message a lo dawng hi a lo ni a, a han open nghal vat a. Message ah chuan, "Hi Deborah, Dr. Manuna ka nia...ciak duhna che ka nei a, kan inhmu thei angem le?" tih hi a lo inziak a.

Deborah-i chuan a han ngaihtuah vang vang a, "Dr. Manuna...Dr. Manuna.." a han ti nuah nuah a. "Engatan nge min hmuh duh, tu chiah maw i nih a?" tiin a reply a. Reilote hnuah chuan Dr. Manuna chuan a rawn thawn let leh a, "I u Lalruatsanga kha, kum 9 a nih lai khan ka patient a ni thin a, a doctor ka ni thin a." a rawn ti leh a.

Deborah-i chuan a hrethiam ta chiah a, a tum nghal hmuk mai. "Enga tan nge min hmuh duh, enge sawi duh i neih?" tiin a reply leh a. Dr. Manuna chuan rawn reply leh in, "I u chungchang ah ania, engemaw sawi pui che ka duh a ni." a rawn ti leh a. Deborah-i ngaihdan chu a ni lo kher mai, "Kan chhungkaw chanchin duhawmloh tak leh zahthlak tak chu hmang tangkaiin sumdawn nan i hmang a, ka u chanchin chu mawi lo tak takin lehkhabu ah ziakin i zuar kual vel a ni lawm ni? Biak duhna che ka nei ve lo, a nih phawt le." tiin a thawn let hmak mai.

A mittui pawh a tling nghal teuh va, an chhungkaw mualpho ziate chu ngaihtuah letin a zak thar kher mai. Chutah message chu a dawng leh tlat mai, "I u hi ala dam...a awmna pawh ka hria." tiin Dr. Manuna chuan a rawn reply ta mai a. Deborah-i pawh a meng kawk mai, "Min bum tum suh...ka ring lo che." tiin a han thawn let phawt a.

Reilo te hnuah chuan Dr. Manuna chuan rawn reply lehin, "Nanga min rin leh rin loh ka ngaipawimawh lo, mahse dawt ka sawi lo. Police hnenah he kan conversation hi i hrilh a nih chuan i inchhir hle ang, i rilru siam fel vat la, inhmuhna tur chu ka sawmna che i pawm hunah ka lo hrilh leh ang che." tiin a rawn chhang leh a.

Deborah-i ngaih chu a tha lo takzet, thudik nge dawt a nih a hre der si lo. A awm a ti nuam lo zual khawp mai a, room ah chuan a lut a. Khumah chuan mu in a let a let ringawt a, mahse Dr. Manuna chu reply a tum tawh lem lo, Dr. Manuna pawh chuan a rawn be tawh bik lem lo bawk a.

********************************************

Esi chu zing dar 7 velah chuan a harh a, Isaka erawh a lo tho daih tawh. A fanu Rosy chu a kai tho va, "Hawh le, BAwihte... tho tawh rawh le, school kal a ngaih kha." duat leh zaidam tak chuan a han ti a. Rosy chu a ham bai bai a, "Va inphih harh la, i uniform ka lo nawt dawnnia aw.." a han ti leh a.

Rosy chu bathroom lam pan chuan a phei hnak hnak a, "I pa chu ava tho hma ve, khawnge maw a kal le?" tih nuah nuah pah chuan rizai te chu a thlep fel mawlh mawlh a. Choka lam ri deuh ruk ruk a hriat chuan room atang chuan ava chhuak nghal a, choka lam chu a pan phei nghal a.

Isaka chuan rawng a lo bawl turh turh mai, Esi pawh a khi suk ringawt. Isaka chuan a rawn hmu a, "Ehe...Good Morning, i tho thei maw?" nui sang hian a lo ti a. Esi chuan ava pan a, "Ngati teh thut nge a, i piangthar em ni?" tiin nui chung chuan a han zawt a. Isaka chu lo nui sukin, "Nizan i mengrei sia....ka lo thawh chhawk ve che a nih hi." tiin Esi hmuiah chuan a fawp zeuh va.

A chawhmeh chhuan lai chu a chawh chhunzawm leh mawlh mawlh a, "A hmin tep, chaw pawh ka chhum tawh. Bawihtei pawh chaw ei vat se, kan kal hma dawnnia." a han ti leh nghal a. Esi chu a nui sen sen ringawt, a fanu chu bathroom atang chuan a lo chhuak a.

Esi chuan a siam nghal mawlh mawlh a, chutih lai chuan Isaka chuan chaw ei tur a lo siam ve mek bawk. Esi nu hi tunah rih chuan an bulah a awm lova, an khua Champhaiah a zin hrih a ni. An chhungkaw thum chuan chaw an ei a, tichuan school kal tur chuan an chhuak ta a, Isaka hian office kal pahin a thlah mai thin a, haw lam erawh taxi in Esi te nufa hi an haw mai thin a ni.

******************************************

School chu an thleng a, "Hawh le, Bawihte chhuk ang le..." tiin Esi chu chhuk mai a han tum a. Mahse Isaka chuan a banah a lo vuan a, Esi pawh chuan hraitthiam loh hmel tak hian a en hu mai. Isaka chu a han thaw hak a, "Esi, nimin chungchang kha.." a han ti zawi sap a.

Esi lah chuan, "Eng nimin chungchang maw?" a lo ti hu mai. Isaka chu a han thaw leh deuh hak a, "Ihh...Rsa chungchang kha...enteh Esi, ngaihtuah tawh suh. Fanu kan nei tawh a, chhungkaw hlim tak kan ni a, hetia awm reng hi ka duh. Kan him a, kan hlim bawk. Tuman min rawn tibuai lovang, ka thlen tir lovang." a han ti dam dap a.

Esi pawh chu a lo nui suk a, "Awle, ka hria e." tiin a chhang a. Motor atang chuan a chhuak ta a, a fanu nen chuan school lam pan chuan an phei a. Naupang pawh an lo tam tawh khawp mai, Esi chuan an class-room thleng chuan a fanu Rosy chu a thlah a. Nghah pah chuan nu ho dang bulah chuan ava thu ve leh a, a thiannu Tepuii pawh a rawn thleng ve chiah a.

An thiandun chuan an titi nual a, chutia an titi tui laitak chuan an bula nu pakhat chuan, "Ehe...mibo an awm a nih hi. Hey news hi en ve teh u, a motor chiah an hmu an ti." a rawn ti chhuak hlawl mai. Esi chu ava hawi zeuh va, "Khawimaw, nangmah khan han chhiar ri law law teh." tiin nu pakhat zawk chuan a lo ti a.

Chunu chuan a chhiar ri ta a, "Nizan lawk, ni 14 July, 2018 khan Lalmuanawma s/o Lalbiakdika, kum 32 chu zan dar 7 vela a chhuak chu a lo haw ta miah lova. Zing lam thlenga a lo la haw loh avang leh an call pawh a, a phone a switch off tlat avang chuan a chhungten police hnenah an report a. Tukin zing dar 6 leh a chanve vel khan police te hian an zawng nghal a, dar 8 vel khan a motor chauh chu Saizahawla Road ah hmuh a ni. Motor chhungah hian thisen tamtak hmuh a ni a, driver seat ah hian silai kahna hnuhma ni awm tak leh thisen perna hnuma ni awm tak hmuh a ni bawk." a han ti lauh lauh va.

Esi beng a verh leh ta zak mai, a thin chu a phu leh nghal dep dep a. Nu ho lah chuan an han sawi zui nak nak hlawm a, a then chuan, "Thah a ni ngei a nih chu.." te an tia, a thenin, "Thlalak pawh a awm lova, fake news mai mai te hi a ni leh lo maw?" an lo ti ve bawk.

Esi ngaih erawh a tha lo takzet, ngaihtuah loh a tum pawh chuan tualthahna rapthlak tak tak a thleng zel bawk si. Chutah news chhiartunu bawk chuan, "HEi....news update a rawn awm leh nghal...kan chhiar leh law law ange, motor awmna atanga ft 20 vela hla ah mihrign kutzungtang tan bun pathum lai an hmu a nih chu...awi ka rap lutuk." a rawn ti leh ta mai a.

Esi chu a thu ngil zat mai, "RSA.." a ti zawi sap a. Ni e, Esi hian Rsa tualthah dan chu a mit ngeiin a hmu nual tawh a, dimna pakhat mah a nei ngai lo. Rsa thil tih bak a ni dawn lo tih chu a hrechiang zual zel hi a ni ber mai, a thlan pawh a rawn tla leh nghal zawih zawih mai.

*****************************************

Chhun dar 1 velah chuan Muantea ruang chu hmuh a ni ta a, a lo lum thui lutuk lem lo a ni awm e. Mitthi chhungte pawh chu hriat tir vat niin ruang pawh chu post mortem tura phurh phei nghal a ni a. Chu tualthahna case chu police te chuan ani la la chuan an chhui nghal bawk a, ruang pawh chu an post mortem zawh hnu chuan ruang chu in lamah an phur phei leh a.

A hmai a chhiat nasa em avang chuan post mortem hnuah pawh Muantea hmel chu hmuh a hrehawm takzet, chuvang chuan a hmel lang lo law law chuan bandage in an tuam khat vek tawp mai a ni. Vuina hun program hman nghal a ni bawk a, chawochilh takin thlan laih a ngaih phah bawk.

Cindy chu ruang bulah pawh chuan a thu ve duh lo, pawn alah chuan kil khatah amah chauh chuan a thu ngawi reng a. A melh ngai a melh reng a, a mitmeng chu a sen rum a, a tah nasat em avang chuan a mit pawh a bui vek bawk. A mitthlaah chuan kawng peng a, building phen atanga Rsa rawn chhuak thut mai a hmuh te chu a rawn lang chuai chuai a.

A tir chuan Rsa a nih a ring bik chiah lo, a chhan chu a hmaikawr kha a dan tawh em vang leh mi in an fiam mai mai a nih a rin vang te pawh a ni mahna le. Mahse a bialpa Muantea haw lam chu a reh ta hmak kha a ni si a, a phone pawhin a chhang thei ta miah lo kha a nia.

A bo tih a hriat kha chuan mangang hle mahse chuti tak chuan a lungngai hran lo, a chhan chu Muantea hi chhungte hriat lohva riah chhuah a hrat ve em vang a ni. Mahse a thi tih a hriat hnuah leh, a thihdan zawng zawng, a hliam tuar dante nen police ten an han sawi chiah kha chuan kum 6 kal ta a, a hlauh em em Rsa chu a lo let leh ni ngeiin a hria a, a ring bawk.

A kut chu a hum ruh a, lui kal an tum laia Rsa'n a lo beih laite, a thiante dim hauh lova a thah laite chu a hre chhuak zawk zawk mai. A mittui a tla zawih zawih a, a khur deuh dar dar bawk. Police Inspector pakhat chu a rawn kal a, a bulah chuan a rawn thu a.

"Cindy, thu tlem zawh dun che kan nei ve a..." Inspector chuan a han ti a, mahse Cindy chuan a chhang lo. A melh ngai chu ala melh tlawk tlawk a, "Cindy, khatia i ngawih reng chuan tualthattu hi kan chhuichhuak thei dawn lo ania." Inspector bawk chuan a han ti leh a.

Chutah Cindy chu a inhnit feih feih a, chhuak em em hian, ri silo hian a tap ta zawih zawih mai a, a mittui chu a rawn far zawih zawih mai. Inspector chu a en a, ani pawh chu a hrilh a hai kher mai. Tap chung hian Cindy chuan, "Ka hria, tu tih nge a nih ka hria." a han ti khur dar dar a.

Police Inspector pawh chu a meng phawk hru mai, "Eng a? I hria maw? Tunge?" a lo ti nghal chiam a. Tah insum tak chung chuan Cindy chuan, "Sa...Sazupui....Sazupui hlauhawm tak a ni." a han ti hluam hluam a. Inspector chuan a hrethiam lo kher mai, "Sazupui a? Enge i sawi awmzia?" a ti hu mai.

Cindy chu a han inhnit leh hlawp hlawp a, "Aww....mihring a ni lo. Ramhuai a ni, a rapthlak lutuk." a han ti leh a. Inspector chu a hawi a hu tawh, "Ruat....Ruatsanga, Ruatsanga thil tih a ni. A lo...a lo let leh a ni." Cindy bawk chuan ti leh in a tah chhunzawm nghal ta chiam mai a, Inspector pawh chu a hrilhhai kher mai.

******************************************

TO BE CONTINUE