MAMMON [MIZO FICTION ACTION/THRILLER STORY] Written by : Aaron Malsawmdawngzuala Chapter - 8 (LAST)

 MAMMON

[MIZO FICTION ACTION/THRILLER STORY]

Written by : Aaron Malsawmdawngzuala

Chapter - 8

(LAST)

**********************************

Bell a ri ta ral ral a, Rina leh Lee-a chu an inveh dan dan mai a. Insual chu an t(r)an ta, an fit dun bawk a, an inbum kual dun zak zak mai. An inhneh tawk fu lehnghal, mahse Rina chu chutin ala che tha duh vak lo. Theih patawp chuan Lee-a chuan hnek fuh tumin a han bei leh ngat ngat a, mahse Rina chuan awlsam tak tak hian a lo bum zel a.

Rei fe chhung chu Rina chuan khawih let duh miah lovin Lee-a chu a bum zak zak mai a, Lee-a pawh a chau titih der mai. Rina chuan a hrethiam a, a khi sak mai. Chutah a che ve tan ta, Lee-a chu a khat tawk chuan a dak leh awrh awrh thin a. Mahse Rina chuan a khawih na vak duh lo thung, mipui ho zawng zawng chuan Rina an t(r)an vek tawh.

MAMMON hming lama an au rual dual dual mai chu a thinrim ta, a inperh tho nghal a. Ring takin a au vak a, a tlan phei ta thut mai. Rina chu ava pawm chat a, ring corner ah chuan a va nam chilh pawp mai. Chutah Rina dulah chuan a hnek ta vak vak mai a, Rina pawh chuan na a ti kher mai.

Mahse Lee-a chan chu a tha rei lo kher mai, Rina chuan lu chuan a chalah a tauh pawp a. Lee-a chu a hnung tawlh dawrh mai, chutah a dulah ava tlawh sak leh a. Lee-a chu a thal tual mai a, rang lutukin Rina chuan a awmah a zuk thut bet nghal a. Dim baksak lo chuan a hnek ta siah siah mai a, nikhawhrelova a awm thleng chuan a hnek hmiah hmiah mai.

Refree chuan a rawn dang a, Rina ban chu phar tir nghalin chak zawka puan a ni ta. Mipui chu an au dur dur a, ring chhungah chuan thisen a per nei nuai mai. Lee-a chu tho leh tur a awm tawh lo hrim hrim, Rina chu a ban a phar a, a han au pawr ve a. Mipui thawm pawh a ring kher mai, staff ho thutna atang chuan Pu Mukesh-a pawh a lo nui var var mai.

****************************************

A tuk zingah chuan Rina chu a tho va, a khum chung lam a han en chu Varun-a hmuh tur a lo awm tawh hauh lo mai. A hawi hu ringawt a, "Nizan kha chuan kan let leh dun ngei sia, enge awmzia le?" a ti nuah nuah a. Chutih lai chuan cell kawngka bulah chuan Pu Mukesh-a, Henry-a leh Ajay-a te an rawn lang thut mai.

Rina chuan rum zet a melh chung chuan ava pan a, "Khawnge Varun-a a awm?" tiin a han zawt a. Pu Mukesh-a chu a lo khi sak a, "I sawi ang ngeiin...ka chhuah zalen tawh." tiin a lo chhang a. Rina chuan mak a ti angreng kher mai, "Engtia chhuah zalen maw? Engtin nge i tih?" tiin a zawt hu mai.

"Case withdraw turin a chhungte lam ka va bia a, tichuan eng tin tin emaw ka thiltihtheihna ka han lan tir leh a, a chhuak mai mawle.." tiin Pu Mukesh-a chuan a lo chhang awlsam kher mai. Rina ngaih chu a tha chiah lo, "I ti takzet amaw?" tiin a han zawt nawn leh kher a. Pu Mukesh-a chu a nui var var a, "Tehreng mai, nakinah ka biak tir dawn che nia." tiin a lo chhang a.

Rina lah chuan, "Engtikah nge ka biak theih ang?" tiin a han zawt leh hram a. Pu Mukesh-a pawh chu a thaw hak mai, "Aaa....zaninah..MAD DOG i hneh zawh hunah i be dawn nia." tiin a chhang leh a. Henry-a chu a lo khi suk mai, "Mad Dog a hneh anga maw? Hepa hian...haha, Varun-a chu i be dawn lo tihna a nih chu." tiin a lo nuih sawh a.

Rina chuan rum zet hian ava melh a, "Tunge ka hneh dawn lo ti a? Mad Dog ka hneh hunah nang pawh kha ka la buaipui ang che, a dawt leh chu nangmah i ni ang." tiin a vin hrep mai. Henry-a thinrim chuan va khawih a tum a, mahse Pu Mueksh-a chuan a lo dang a. Rina chu a han en vang vang a, "Mad Dog hi i hneh a nih chuan cheng nuai 10 i hlawh anga, mipui leh official ho betna zawng zawng nen avaiin nuai 20 vel chu i nei thei dawn anih chu. Mahse rules kha hria la, ka lak atangin i kal hrang thei lovang." a han ti a.

Rina pawh chuan a lu a lo bu nghat nghat a, "Ka hria e." tiin a lo chhang a. Pu Mukesh-a chu a han thaw leh hak a, "Vawiinah nilengin lo inbuatsaih la, zanah chauh kan inhmu leh ang." a han ti a, "Kal ang u le." tiin a kal nghal a. Ajay-a chuan a zui ve bawk, "I la hre dawn lawm...nang naupang kha." tiin Henry-a chuan a han vau leh hram a, a kal ve ta a.

********************************************

Chumi nileng mai chuan Rina chu a inpuahchah nasa hle a, cheng nuai 20 lai mai a nei thei tur chu a rilru ah chuan a awm reng a. Varun-a chanchin pawh hriat chian leh zual ngei a duh bawk, Mad Dog chu fighter naran mai mai a ni lo tih a hria a, t(r)um dang zawng aiin a fimkhur a ni.

Mad Dog hi thai mi niin palian tak pawh a ni hran lova, a cher lampang a ni mah zawk. Mahse a pian en reng rengin a fip t(r)ang mai a, a kutthlak pawh a na in amah pawh a infit zak zak hle a ni. Henry-a nen Top Punch Main rooster zingah chuan hneh loh an la nei lova, mahse Henry-a nena an inbeih tak loh nachhan chu kan hriat tawh kha.

Bodyguard zing ami ve tho, sikh palian tak, Balwinder nen pawh Mad Dog hi an lo inbei ve hman zuai tawh a, Balwinder-a meuh pawn a hneh lo a ni. Mad Dog hi ft 5'9 leka sang a ni a, han en mai chuan a zuamawm lek lek zawk. Mahse mi khawngaihna nei lo leh insum zo lo ang chi kha a ni a, a hlauhawm hle thung a ni.

Rina hi ft 6'0 chiah chiah a ni a, a pian pawh mizo mipa ah chuan a mawi pawl tak a ni ngei ang.  MAd Dog nena an inbei tur chu jail tang ho titi ber a ni a, an nghakhlel tawh hlawm khawp mai. Thenkhat phei chuan pawisa an lo in-bet der tawh a, Rina lama bet chu awm ve nual mahse MAd Dog lama bet chu a tam zawk an ni.

******************************************

Zan a lo ni a, match ropui lutuk chu neih a ni dawn ta. Top Punch Official ho pawn an bet hnem cher cher kher mai, cheng nuai chuang chuang chu an theh chhuak a. Jail tang lam te atang pawhin bet a tam khawp mai, mipui nghahhlelh ber a ni. Mad Dog buaipuitu tur, a second men turte chu Balwinder-a leh Henry-a te an ni a.

Rina second men tur chu mipakhat chauh niin Ajay-a ni thung, mipui chu an phusa nasa tawh mai. Announcer chu a rawn chhuak a, "Khai le, khai le...tunah chuan zanin atana kan main event ropui ber tur, MAMMON VS MAD DOG chu kan hmu dawn ta e." a han ti lauh lauh va, mipui chu an au ring ngei mai.

Announcer bawk chuan, "Tunah kan koh chhuah tur chu....Top Punch Main Rooster rank #2 hun rei tak chhung lo ni tawh, Thailand ram atanga lo kal...MAD DOG...i lo lawm ang u." ring tak chuan a han ti leh a. Mad Dog chu mipui kar atang chuan a rawn chhuak ta, infit hmel tak hian a zuang auh auh va.

Ring ah chuan a zuanin a rawn zuang lut a, mipui chuan an lawm kher mai. "A tumpui tur hi tunlaia kan mega star, thla tlemte chhung lek a hneh loh la nei lo, record thar siamtu...MAMMON lo chhuak leh rawh se." Announcer bawk chuan a han ti leh lauh lauh va, Rina chu a rawn chhuak ve ta.

Mad Dog chu a phur tawh bawk aniang, Rina chu a nuih deuh vru vur reng a. Rina erawh chuan a lo melh rum ngang ngang khawp mai, a kawr chu a phelh a. Chutah Announcer bawk chuan, "He inbeihna ah hian a chak zawk chuan pawisa tling khawm zawng zawng, cheng nuai 25 lai a dawng dawn a ni." a han ti leh a, Rina beng a verh nghal zar mai.

******************************

Bell a ri ta ral ral a, inbeihna chu t(r)an a ni ta. Mad Dog leh RIna te chu an han inveh dan dan a, an fit dun bawk a, an zuang dun thuak thuak mai. Theih tawp chuan Rina chuan na taka kutthlak tumin a han vai thuak thuak a, mahse a rin ai daihin Mad Dog chu a lo che rang a, a khawih fu hleithei tlat lo.

An han inbei zel a, an inhneh tawk fu lehnghal. RIna chuan a ke chu tumin a han tleng deuh fua fua a, Mad Dog pawh chu a duh angin a che thei bik lo. An inbei zel a, Rina chan chu a rawn tha chho ta a. Mad Dog chu a dak deuh ta awrh awrh reng mai, a khat tawk chuana thal leh thuai thin a.

Mahse a rawn tho rang thei hle thung, Rina chuan a theih ang tawk chuan a han bei leh a. VAwi 5 vel dawn chu MAd Dog chu a thal tual tual mai, mahse a rawn tho leh hma thei lutuk chu RIna pawh chuan mak a ti angreng viau va. A thinrim a ti zual kher mai, au vak vak chung chuan Mad Dog chu a han vai leh fua fua a.

Mahse MAd Dog chu a lo indang char char a, a kut chu a rang takzet. Chutah Rina khabe ah chuan a dawm chho siah mai a, Rina pawh a dak awrh mai. Mad Dog chuan chu chu remchangah la in a khawih ta siah siah mai a, a kutthlak a na em em mai lehnghal. Rina hmaiah chuan vawi engemaw zah a hnek hman a, a kick hman bawk.

Chutah Mad Dog chuan na em em hian a han back-kick thuai a, Rina chil pawh a per sawk mai. Chhuatah chuan a tlu thum dup mai a, a lu pawh a hai chhak mai. A hmai chu dawm vawng vawng chung chuan Mad Dog chu a han melh chho va, ani lah chu na engmah nei lo ang mai hian a lo la zuang thauh thauh mai.

Rina chu a tho ve leh nghal a, mahse tlem chuan a lu chu a la hai deuh. A han thaw hak a, "I kutthlak ava na reuh ve mawle." tiin a khi suk a. Ava bei leh ta, mahse MAd Dog che rang lutuk chu a pha leh ta tlat lo. A dak leh awrh awrh mai a, vawi engemaw zat chu khawih fuh ve zeuh zeuh mahse a hnek na ve thei ngang lo.

A thal leh tual a, Mad Dog lah chuan rawn khawih chhunzawm tumin a rawn thut chilh a. A hnek ta siah siah mai, mahse Rina chu a kutin a lo indang tawk tawk a. Chutah bell a ri hlauh mai, round khatna chu a zo ta. Mad Dog lah chu a la tho duh mai si lova, Refree chuan a rawn pawt sawn hial a.

*********************************

Ajay-a chuan ring corner ah chuan thutthleng hniam a lo dah vat a, Rina chau lutuk chu a rawn thu hnawk mai. Ajay-a lah chuan motivate chu sawi loh, hmuhsit hmel tak hian a lo nuih suk a. Tui pek pah chuan, "Round khatna ah pawh tiang kha i nia, i hneh chu i ring takzet amaw?" ngeiawm tak hian a lo ti vel a.

Rina lah chu thinrim a hnekin a khi suk mai, "Lo en reng rawh...i hre mai ang." tih chauh chuan a chhang a. Bell chu a ri leh ta a, 2nd round a ni leh ta. Rina chu a han zi mar ve talh talh a, MAd Dog erawh inbeihna an t(r)an dawn chauh emaw tih tur khawp hian ala rawn zuang thauh thauh mai.

An inbei leh ta a, Rina bawk chu a che tha leh hleithei ta lo. Mad Dog chu khawih fuh ve nual mahse, duh angin kut a thlakna thei tlat lo. Mad Dog-a khawih fuh zeuh lai pawh chu a na bik em em zel mai a, experience leh skills ah a pha tlat lo a ni. Rina dinhmun chu a chhe telh telh zel a, a kut vai aiin a indan a tam ta zawk tlat mai.

Eng ang pawhin indang nasa mahse Mad Dog chuan a remchang lai laiah chuan a khawih fu zel tho mai a, amah pawh a thi phung tawh mai. MAd Dog erawh ala fai puak mai a, hliam awm ang engmah ala nei ve lo. Rina chu a chau angreng tawh viau mai a, mahse chutia tlawm mai chu ala tum bik lo.

A theih tawp chuan a han bei leh ngat ngat a, mahse Mad Dog chu a lo indang hneh lutuk tlat. Pate viau e tilo chuan Rina chu a bin let tawp tawp mai a, tha lah chu a lo ngah phian lehnghal. Rina hmaiah chuan a ri leh ta siah siah mai a, a thal leh ta tual mai. Rina chu a khuh kharh kharh a, thisen a phuh chhuak thawh thawt mai.

Refree chu rawn kun hniam in, "I tlawm em?" tiin a rawn zawt a. Rina chu thei leh thei lo hian a rawn thingthi chhuak a, chil a han chhak pherh pherh a. Rum zeta Mad Dog han melh chhoh pah chuan a khi suk a, "Kha chauh kha em ni? Top fighter i ni anilawm ni, i va la che na lo ve?" a la ti pang pang mai.

Mad Dog thinrim chu ava phei a, va tlawh a tum a. Rina chuan a ke a lo man chat a, pawt hma thutin a dulah chuan a hnek siah mai. Mad DOg pawh a tawlh hnung ve dawrh mai a, Rina chu a rawn tho nghal. Mad Dog-a hmaiah chuan a han kick leh pawp mai a, Mad Dog pawh chu a thal ve ta tual mai.

A pum chu a dawm vawng vawng a, a thinrim hmel kher mai. A rawn tho chhuak a, mahse bell a ri leh ta hlauh mai. An corner ve ve ah chuan an va thu leh a, Mad Dog thinrim chu a ang nasa mai. Henry-a chu a han hawikual zeuh zeuh va, a kawr hma ipte atang chuan necro damdawi chu a han phawrh zeuh va.

Mad Dog chu a signal zeuh va, Mad Dog pawh chuan a lo hrethiam nghal. Mipui hmuh loh tur ang ber chuan tui in pah chuan a han lem tel zeuh va, chu damdawi chak tak mai chu second reilote chhungin a rawn thawk chho tan ta. Mad Dog chu a maimitchhing vang vang a, "Va that rawh le.." tiin Henry-a chu a lo khi suk mai.

****************************************

Bell chu a ri leh ta ral ral a, 3rd round a ni leh ta. Rina chu a chau ru tawh viau, Mad Dog lah a damdawi ei avang chuan a taksa na te chu a reh leh vek tawh thung. Rina chuan a rawn bei leh t(r)an ta a, mahse MAd Dog chuan a lo bum awlsam kher mai. Rina chet ve hma hma chuan Mad Dog chuan a hnek nual hman ta zel mai a, a damdawi ei avanga a chak tawh em avang chuan thatchhe tak si, che rang tak si chuan Mad Dog chuan a bei a.

A chhaih kual vel mai mai a ang mah zawk, Rina chuan a khawih fuh ve thei ta eih lo mai. A khawih fuh ve theih chhunah pawh ama kut zawk chu a na zel tawh ni mai hian a lang a, MAd Dog chuan a sawp hi a ni deuh ber tawh. A thal ngun ta hle mai a, mahse a rawn tho leh hram hram thin a.

Mad Dog chuan a thal rang thei kher mai, ring chhungah chuan thisen chu a kawi nuai tawh mai a. A lan dan chuan Rina chu chak lo tur chiang sa a ni tawh, Mad Dog erawh an inbeih tir ang mai khan ala fai puak mai a, a kamsir pilh ve hlek tih loh chu hliam engmah a la nei ve lo. Rina erawh a thi phung tawh a, a taksa pawh a duk thleh thluah tawh mai.

A han tho leh hram hram a, a chauh tawh em avang chuan a ke pawh a khur hlawk hlawk tawh. Mad Dog chu ava bei leh a, mahse a ngai te ang bawkin a lo hnek tlu leh thuai mai. Mad Dog chuan ala duhtawk lo, Rina chu chhuatah chuan a rek bet a. Hmuhsit hmel tak hian a nuih sawh a, "I chak dawn lo, ka that dawn che...ZAwnga.." tiin a vin khur khur a.

Rina chu a thaw tha thei der lo mai, theih tawp chuan Mad Dog-a kut chu a lo man bet ve a, mahse a hneh lo kher mai. MAd Dog chu a t(r)awng thui ta mah mah a, "I thianpa Varun-a kha...dam taka kan kal tir mai i ring em ni?" a han ti chu Rina chuan mak a ti kher mai, a meng deuh hru mai a.

MAd Dog chu a nui ta huah huah mai a, "Aw ni e, mak i ti viau ang tiraw? Varun-a kha, thah a ni...kan that tawh, kan dahtha hmak mai mawle. Kan kap hlum, a chiang em?" a ti leh ta mai a. Rina chu a meng phawk hru mai, "Nang erawh chu ka kut ngei hian ka that dawn che...nang hian engtikah mah min hneh ve ngai lovang." Mad Dog bawk chuan a han ti leh a.

Rina chu a tham tho lawp a, chiang em em hian a han kick leh pawp a. Rina chil chu thisen nen a per leh ta chhawk mai, ring atang chuan a let chhhuak tawp mai a. A lu chu a hai takzet, mahse a rilru erawh a harhfim vek thung. A mitthla ah chuan Varun-a nena an inhmelhriat tan tirh lai vel te, a chhan thin lai te chu a rawn lang chuai chuai mai a.

A mittui a tla a, chhuata let reng chung chuan a tap zawih zawih mai. Staff ho thutna atang chuan Pu Mukesh-a chuan Rina chu a lo en vang vang a, "Dik lo a awm tlat." a han ti a. Pu Ronley-a chu lo khi sukin, "Engmah dik lo a awm lo, a hneh lo a nih khu.." a lo ti a. "Mad Dog lamah pawisa ka bet hlauh zawk a, a tihzia e. Mad Dog nge nge, Mammon pawhin a ngam lo a nih khu." tiin Pu Sharma pawh a lo nui ve huah huah bawk.

Mahse Pu Mukesh-a ngaih chu a tha lo tlat, "Nilo...nichin khan engemaw a sawi a ni, Mad Dog khuan Rina kha engemaw a hrilh a ni." tiin binocular (en lenna) chu a la a. Pu Ronley-a lah chuan, "Aww..trash talking a ni mai alawm, an nei fo alawm." a lo ti sam et a. Pu Mukesh-a chuan en lenna hmang chuan Rina hmel chu a han zoom a, Rina lo tap zawih zawih a hmuh chuan a hrethiam ta.

A ding thut a, "Ni lo...a hrilh a ni. Mad DOg khuan Varun-a kan that tih kha a hrilh a ni, Rina khu a tap zawih zawih mai." tiin a phawk hru mai a. A thiante pahnih pawh chu an rawn ding ve nghal, "Enge awmzia?" an rawn ti nghal hu mai. Chutah Rina chu a tap bang hmak a, a hmel chu thinrimna chuan a rawn thlak nghal.

Pu Mukesh-a chuan en lenna hmang chuan a han en leh a, Rina rawn tho leh chu a hmu a. Rum zet hian Rina chuan Pu Mukesh-a chu a rawn melh ta run mai, "Awhaw le....boruak chu a inthlak khawp ang." tiin a thiante pahnih chu a en a, "A hria, engkim a hre vek tawh." a han ti zawi sap a.

****************************************

Rina chuan ring lam chu a han melh chho leh a, Mad Dog lo inla pawr kual vel chu a han melh khur mai. Ring chhungah chuan a han lawn chho leh a, Mad Dog pawh chuan chutia a rawn la tho thei chu mak a ti takzet. Rina lah chuan rum em em hian a lo melh khur mai a, a mit pawh a sen vek.

A mittui chu a rawn luang leh zawih zawih a, "Awwww...mithi sun kan awm a nimaw?" tiin Mad Dog chuan a lo nuihsawh leh vel a. Rina erawh a nuih a za hauh lo, "I kal ve ang....Varun-a bulah chuan i kal ve dawn, ngaihdam i dil nghal bawk dawn ania." tiin a lo chhang let a.

Mad Dog chu a thinrim kher mai, "Ka han dahtha law law teh ang che." tiin ava tlan phei a, Rina hmaiah chuan a va hnek siah siah mai. Mahse Rina chu a lo thle deuh sawk sawk ringawt a, a la che sawn eih lo. Mad Dog pawh chuan mak a ti kher mai, Rina nakah chuan vawi 3 vel chu a han pet leh thuai thuai a.

Mahse Rina chu a din ngaiin a ding reng a, na tia awm ang pawhin a awm lo. Mad Dog mak ti lutuk chu a hawi hu ringawt mai, chutah hnek leh a han tum a. Rina chuan a kut chu a lo man chat mai, a elh sak vak a. MAd Dog na ti lutuk chu a th(r)en chawk chawk mai a, Rina lah chuan a la leh rik sak tuar zui.

Mad Dog chu a thingthi hnawk a, chutah Rina chuan a khup in Mad Dog-a hnarah tak mai chuan a do leh siah mai a. MAd Dog pawh a ding leh zawk mai, a tawlh hnung dawrh a. A hnar atang chuan thisen a lo chhuak zawih zawih a, a thinrim kher mai. Rina beih tum chuan ava tlan leh a, mahse Rina chuan dim hauh lo hian a lo hnek let siah siah mai a.

Mad Dog chu a thal ta tual tual mai le, rawn tho leh eng ang mahse Rina chuan a lo khawih thlu leh thuai zel a. Thinrimna hlirin Rina chu a khat tawh, Mad Dog chu a insual pui mai pawh a ni tawh lo, a hrem hian a hrem mek hi a ang ber tawh zawk. A rem rem ah chuan a tlawh siah siah mai a, a dim lo kher mai.

Mad Dog chu a tlanchhe titih der tawh mai a, mahse Rina chuan zui zelin a pet thal leh tawp tawp thin a. Henry-a leh Balwinder te pawh chuan mak an ti takzet, Mad Dog chu a thi phung tawh a. Mahse Rina chuan ala duhtawk hauh lo, Mad Dog chu zuang chungin a khabe ah tak chuan a khupin a han do leh siah mai a.

Mad Dog-a ha hmai pakhat chu a bal hian a, thisen pawh a chhak chhuak hem tlawrh tlawrh khawp mai. Tukhum vaw chawrh chuan ring chhungah chuan a tlu zangthal thuai mai a, thawh leh tumin a han bawkvak tawk tawk a. Rina chuan thutbetin a kut chu a rawn hnungkhirh nghal a, a elhsak ta vak mai.

Mad Dog na ti lutuk chu a au vak vak a, mahse a tlawm duh bik thak lo. Rina chuan thinrim tak hian, "I tlawm emaw tlawm lo emaw, ka that dawn tho tho che." tih pah chuan a kut chu na takin a han elh leh vak a, a ri ta thawk mai. Mad Dog-a kut ruh chu a tliak chiang hle a, a rum tliak zum pawh chuan a ban vun a rawn chhun pawng lawng thei hial.

Mad Dog chua  t(r)e hian a t(r)e vawn vawn mai a, a tal nasa kher mai. MAhse Rina chuan a lo la duhtawk hauh lo, a kuai zangthal leh a. A awmah thut betin a hnek ta siah siah mai, Mad Dog chu a thi(blood) nasa ngei mai. A hawi sawk sawk a, thisen chu a per chhawk chhawk bawk.

Nikhawhrelovin MAd Dog chu a awm tawh, mahse Rina chuan tap chungin ala hnek siah siah mai a. Henry-a ngaihdan ni lo chu va tlan luh a tum ta mai a, mahse Balwinder-a chuan a lo dang hram hram a. Refree chuan Rina chu a rawn pawt sawn a, "Chak zawk chu Rina a ni e." tiin a ban chu a phar tir a.

*****************************************************

Announcer chu a rawn ding chhuak a, "Chak zawk chu MAMMON a ni e, Record thar a siam leh ta. Tuma la hneh ngai loh, Mad Dog hnehtu chu MAMMON a ni e." tiin a au lauh lauh mai a, mipui chu an thawm a na ngang mai. Rina erawh a hnuk ala ulh a, a mittui ala tla phung mai.

Rum zet hian Official ho thutna lam chu a han melh chho va, Pu Mukesh-a chu a han en rum ngei mai. Pu Mukesh-a pawh chuan tihngaihna vak a hre lo, a lo en ve vung vung ringawt. Rina chu locker room lamah chuan Ajay-a leh staff dangte chuan an hruai phei a, midang chuan Mad Dog chu an lo zawn sawn ve mek bawk a, Rina chuan a that ta em love.

Pu Mukesh-a pawh a rilru a buai kher mai, Rina chuan Varun-a an that a ni tih a hre kar tawh mai si. Chutih lai chuan a naute zinga mi pakhat chuan a rawn phone a, "Hello, enge ni?" Pu Mukesh-a chuan a lo ti vin hlur mai. Phone a mi chuan hlauhthawn hmel tak hian, "Sir, Varun-a that tura kan naute pahnih kan kalsan kha...Varun-a ruang thlalak min lo thawn miah silova....an lo let har bawk si nen. Ka phone a, an la thei bawk silova. Kan va kal a, anmahni ruang zawk kan hmu a ni." a rawn ti ta mai a.

Pu Mukesh-a chu a meng phawk nasa mai, "Enga? Enge awmzia? Khawnge anih Varun-a chu a awm?" tiin a vin hlur mai a. Phone ami chuan, "Kan hre lo a ni, Sir. Tunah zawng turin midang an kal mek, kan hmuh vat ka beisei." tiin a rawn chhang leh a. Pu Mukesh-a rilru chu a hah zual kher mai, "Zawng vat rawh u." tiin phone chu a dah a.

Pu Ronley-a hrethiam lo chuan, "Tinge ni, Hotupa?" tiin a lo zawt ve nghal a. Pu Mukesh-a chu a thaw hak a, "Varun-a ala thi lo, a tlan chhuak a ni." a ti ta mai a. Phawk hru hian, "Ehe, enge awmzia?" Pu Sharma chuan a lo ti ve bawk. "Nakinah kan sawi dawnnia, ka kal angai." tiin a kal nghal daih mai.

****************************************

Locker room ah chuan Rina chu a inthlak mek a, Ajay-a chu a rawn lut thut a. Nui sang hian, "Ka rin phak bak i ni, i ropui e. I hlawh la turin min lo zui rawh, room lehlamah sawn." a han ti a. Rina chuan a chhang lo, a zui ve mai a. Police pahnih an lo awm ve bawk, room lehlam kawngka chu Ajay-a chuan a han hawng a.

PAwisa tam tak hi a lo awm hnur mai, "Cheng nuai 25...kan tiam lawk che ang ngeiin, i duh chuan i chhiar thei ang."Ajay-a chuan a han ti leh a. Rina chu a ngawi vang vang a, "Khawnge dahna tur?" a han ti hmuk a. Ajay-a chuan air bag a pe a, ngawi rengin Rina chuan a thun mial mial mai.

A thun zawh hnu chuan a rawn chhuak leh a, "I cell awmna pawh a hranpa a ni tawh ang, tunah chuan main rooster ah pawh rank #1 ni tawh e." Ajay-a bawk chuan a han ti leh a. Chutah RIna chuan police pakhat zawk pistol pai lai chu a phawrh sak thut a, chu police pa chu rek betin Ajay-a leh police pakhat zawk chu a tin ta mai a.

Ring tak hian Ajay-a chuan, "Rina, enge maw i tih le? I a em ni?" a ti chel chul mai a. Rina chuan thinrim zet hian, "Engvangin nge Varun-a in thah? Min tiam a ni lawm ni, tinge min thah sak?" tiin a vin hrep hrep mai. Ajay-a chuan a ban a phar a, police pakhat zawk chuan a pistol pai lai chu la chhuak nghalin a lo tin ve bawk.

"Rina, kan that lo. Ka sawifiah thei, thil atthlak engmah ti suh." Ajay-a chuan a han ti lawm lawm a, mahse Rina chuan a ngaithla duh lo. Thinrim tak hian, "A tawk...helai hmun hi ka chhuahsan dawn." tiin Police pakhat zawk chu a kap pawp a, a thi chiang kher mai. Ajay-a chuan a hlau takzet, "Rina...khawngaihin.." tih chiah a sawi hman, Ajay-a pawh chu a kap hlum ve nghal.

Locker room danga awm te chuan an lo hre phak a, an rawn tlan chhuak a. Mahse Rina chu hmuh tur a lo awm tawh lo, Ajay-a leh police pakhat ruang chiah chu hmuh tur a lo awm a. Duty dangte chuan warden office lam an hriattir nghal a, Pu Mukesh-a beng pawh a thleng ve nghal bawk.

*********************************

Rina chu police inspector chuan hnuailam garage-ah Rina'n a vau vangin a lo hruai thla mek a, CCTV ah chuan an lang chiang kher mai. Tichuan jail lam pan chhoh ngai lo chuan secret door lam atang chuan an chhuak dun a, Rina chuan pistol chuan a tin reng a. Inspector motor chu an thleng a, motor chhung an luh hma chuan Rina chuan inspector pawh chu a kap hlum leh nghal hmak mai.

A thawmhnaw chu hlipin a hak sak a, tichuan car chhungah chuan chuangin chak takin a khalh phei a. Gate duty awmna zawn chu a thleng a, heta gate hi jail pangngai gate nilovin TOP PUNCH battleground main gate zawk a ni. Gate bulah chuan a ding a, police motor a nih avang chuan duty te pawh chu an ngaih a lo tha khawp mai.

CCTV an lo en loh lai a lo ni bawk nen, face mask vuahin Rina chu duty na chhungah chuan ava lut a. Mi 4 an lo awm a, eng sawi set set lo chuan ava kap hlum leh vek mai. An silai mu te chu a la khawm a, pawisa cheng nuai 25 pawh chu motor chhungah chuan a dah ran bawk.

Tichuan a kal leh ta nghal a, a tlan thui hma hma chuan a hmaah tak mai chuan motor pali vel hi an lo ding a. Rina pawh chu a ding ve ta tawp a, chutah kawng sir kil tin atang chuan motor tam tak hian an rawn hual ta thup mai. A hma taka motor sei nalh tak mai atang chuan Pu Mukesh-a chu a rawn chhuak a, Henry-a leh Balwinder-a te chuan an rawn zui chhuak ve nghal bawk.

Ring tak hian Pu Mukesh-a chuan, "Silai kha dah la, ban pharin lo chhuak rawh. A nih loh chuan i chuanna motor kha a puah darh hma chu kan kah rawn ang, a chiang em?" a han ti lauh lauh va. Rina chu a rawn chhuak a, Pu Mukesh-a chu ava pan a. Pu Mukesh-a chu a lo thaw deuh hak a, "Rina leh...engati nge min kalsan mai i tum a? Rank #1 i ni ve chiah a, min phatsan nghal mai amaw?" tiin a han khi vel suk a.

Rina chuan a pistol chu chhuatah a dah a, "Mi dawt sawi hmang hi ka hua, ka ring che a, mahse nang chuan Varun-a i that a ni. Ka that dawn che...tunah hian keimah ngei hian ka that dawn che." a ti khur khur mai. Pu Mukesh-a chu a nui huah huah a, "RAMPAGE...RAZOR...in kutah ka dah e." tiin motor bulah chuan ava phei leh daih mai.

Chutah le, Balwinder-a leh Henry-a te pahnih chuan an rawn pan ta a. Balwinder-a zawk chuan a dulah ava tlawh pawp a, Rina chu a leng lawp mai. Balwinder-a hi Razor tia koh a ni kan tih tawh kha, Rina chu ava tham tho leh lawp a. Motor hma deng dawt khawp chuan a han paih leh thuai thuai a, mahse Rina chu a rawn tho lehnghal.

Razor-a rawn phei leh mek chu a lo melh ran a, leia vaivut chu a tham zeuh va. Chutah a mitah tak mai chuan a va vawm khu tulh mai a, RAzor-a mit chu a thip ta em em mai a. Engmah a hmu thei ta hauh lo mai, chu chu remchangah la in na em em mai hian Rina chuan a tilmu ah tak mai chuan a lo pet sak pawp mai.

Razor-a pawh a meng pawng zawrh mai a, a kap dawmin a thingthi dawt a. A hmai chu a sen nghal tawn tawn a, a khur zawih zawih mai. Rina chuan a sikh lukhum chu a phelh sak a, a tukhum samah thamin motor head light keh vek khawp chuan Balwinder-a lu chu a tauh tir pawp pawp mai a.

Thi phung hian Balwinder-a chu a let der mai, Rina chuan Henry-a lam chu va melhin a va phei leh a. Henry-a chuan a blazer chu a lo phelh nghal a, "KA sawisak chakna che hi a rei tawh lutuk, Hmela...tunah chuan a hun a lo thleng ta, lo kal rawh le." tiin a zuang nghal thak thak mai.

Rina chu ava tlan phei a, va hnek a tum a. Mahse HEnry-a chuan a lo dang a, a khupin a lo do siah siah mai. A bin leh pawp a, Rina kut chu a zakzeh a. Rina hmaiah chuan a han hnek leh pawp a, mahse Rina chuan a bekah chuan a lo tlawh ve leh siah a. Henry-a chuan a thlah a, Rina chu a rawn inperh tho lehnghal.

An han inbei leh a, Henry-a chu top fighter nge nge, Rina chuan a hneh chiah bik lo. An in vawrhbin dun zak zak mai a, chutia Rina la fit tha em em mai a hmuh chuan Pu Mukesh-a pawh chuan mak a ti angreng kher mai. Henry-a chuan a han kick thal leh thuai a, Rina chu a tlu khu luih mai.

Mahse a rawn tho leh nghal a, an inbei leh ta. Chutia an inbei lai hmuhnawm ti taka police ten an lo en thup lai chuan tu emaw hian a rukin police ho motor hnungah chuan thil engemaw ni hi a lo bel diat diat a, tumah chuan an hmu lo. Rina chu a chak lo zawkah a tang char char a, Henry-a chu a hneh lo kher mai.

PAwr zet hian Henry-a chuan, "Tho ta che, i va daih rei lo ve. Tawp mai tur atan chuan a uiawm emai, tho rawh." tiin a elhsen vak vak a. Rina chu a rawn tho leh a, a thinrim hmel khawp mai. Henry-a chuan a rawn pan a, mahse Rina chuan Henry-a chet hma hma chuan a hmaiah a lo hnek sak siah mai a.

Henry-a pawh a phu zuk a, a hai chhawk mai. Chutah Rina chu hnek a han tum leh a, Rina chu lo indangin rang zet hian Henry-a chu a hnek ri leh chawk mai a, chutiang chuan vawi 6 vel lai chu a hnek ri ta chawk chawk mai. Henry-a thinrim chuan a han vai buan buan a, mahse awmzia a nei vak lo.

Rina chuan a khawih ta hrep mai a, Henry-a chu a chau chhe der mai. Rina chuan a chawi lawp a, a hnungzang ri tuar khawp chuan a khup chuan a do pawp mai. Henry-a chu a hnang awl awl a, a che thei ta der lo. Chu veleh police ho chuan silai chuan an tin ta thap mai a, Rina chu a ding ngawi ran mai.

****************************************

Chutah le, car chu a mal te te chuan a rawn puak ta dur dur mai a. Pu Mukesh-a chu a hawi hai hle mai, police ho chu an darh phawk phawk mai. Rina pawh a tlan chhe nghal a, an awmna field chu a khu rum rum mai. Chutah police la dam awmchhun ho chuan Rina chu an kap a, mahse Rina chu a biru thei hman hlauh va.

Police ho chu an tlu ve ta pheuh pheuh mai a, Rina'n silai lo kahna lam chu a zawng a. A hmuh meuh chuan mak a ti kher mai, Amir-a chu motor phenah lo biru in pistol hi a lo keng a, police ho chu a lo kap mek a ni. Rei fe hnuah chuan a kap hlum fai deuh vek a, Rina chuan mak a ti kher mai.

Va kal a tum a, mahse a awm chu a rawn ri dawt a. Tu emaw hian a lo tlawh chu niin, a leng lawp mai. A han tho leh a, vaivit khu leh mei khu kar atang chuan Pu Mukesh-a chu a rawn lang hlawl mai a, a la thinrim hmel em em zui. Rina chu rang takin a rawn tho leh a, "Rina, nang hian khawiah mah min kalsan lul lovang." tih pah chuan Rina chu a rawn tham tho lawp a.

A paih leng leh dawr mai, Rina chu a let tawp tawp a. A chau takzet, Pu Mukesh-a chuan a rawn pan phei leh zel a. Thinrim hmel tak hian, "I tan tiin kawng ka sial sak che a, i luhlul em em lai pawhin ka dawh hram hram che a, mahse tunah min phatsan i tum leh si amaw?" tiin Rina tho tur chu a dulah chuan a han chhir sak leh pawp a.

Rina pawh chuan na a ti kher mai, "Ka thu i awih duh lo amaw? Engmah i chang dawn bik lo, eng pawisa mah i chang bik lovang. Ka thu awihlo te chu ka that thin, nangpawh ka that dawn che." tiin a rek kang a, Rina chu a thaw tha thei lo. Chutih lai chuan silai a rawn puak leh dur a, Pu Mukesh-a chuan RIna chu a thlah rang kher mai.

Hnunglam atang chuan Amir-a chuan a rawn kap chu niin, Rina chu a tho vat a. Pu Mukesh-a chu a thingthi dawt a, Rina chuan a khup chuan Pu Mukesh-a hmaiah chuan a han do siah mai a, a thal tawp mai. A che leh tawh eih lo, Rina chu ava tlan phei a. Amir-a chuan a lo nuih sak a, "Inhmuh ava khat ve?" a lo ti a.

Rina chuan mak ti tak hian, "Amir, enge awmzia? Khawnge i awm char char a, i thi tawh amaw ka tia lawm." a han ti hu a. AMir-a chuan nui chung hian, "A mak i ti viau animaw? A aia mak i hmuh duh chuan min lo zui rawh." tiin a motor bulah chuan a hruai phei a. Motor chhung chu Amir-a chuan a kawk a, motor chhungah chuan Rina chu a han dak a.

Mak tak maiin VArun-a a lo thu reng mai, "Ehe Varun, ila dam maw?" a ti hu mai. Varun-a chu a lo nui sen sen a, "Aw ka la dam alawm, Big Boss....lo chuang vat rawh, helai hmun hi kan chhuahsan vat angai." tiin a lo chhang a. Rina chu a thaw hak a, a nui suk ringawt. "Rina, kal vat ang..kan hmanhmawh angai ania." Amir-a chuan a lo ti ve bawk a.

Rina chuan pawisa a dahna motor chu ava en a, "LAwks aw.." tiin ava tlan phei a. PAwisa chu la in a rawn let leh a, "Kha kha enge?" Amir-a chuan a lo ti hu mai. Rina chu a khi suk a, "Kal phawt ila, ka hrilh ang che u." tiin a chhang a. Amir-a pawh chu a lo nui ve suk ringawt, tichuan an pathum chuan chulai hmun chu an chhuahsan ta a ni.

*******************************************

Pu Mukesh-a chu a rawn tho leh t(r)ual t(r)ual a, meikhu pawh tlem chuan a lo ziaawm deuh tawh. A awmna chu a enkual a, ruang a lo let pheng phung hlawm mai. Mahse Balwinder-a leh Henry-a te chu an lo la thi ve lo, an hliam te chu na tiin an lo vial ngawih ngawih hlawm mai.

A tho chhuak a, a dar ah kah a nih avang chuan a lo thih pui lo chu niin. A han thaw hak a, "Amir...a vawi 2 nan nang hian min bum leh ngam amaw? KA ti sual hle mai, i va han chak dawn lo tak." a ti khur khur a. A phone a phawrh a, a naute zinga mi chu phone in a awmna te chu a sawi a, phone chu a dah leh a.

A thinrim lutuk chu a khur zawih zawih thei hial mai, "Rina...Lalrinzual. Nang pawh kha, i him tihna ala ni lo ania. Kan inhmu leh ang, kan inhmu leh khawp ang." tiin a inhrosa nasa kher mai. Chutih lai chuan Henry-a chuan Balwinder-a chu a lo kai tho mek a, an pahnih chuan bai auh auh chung chuan Pu Mukesh-a chu an va pan a.

Inthiamlo tak chuan Henry-a chuan, "Boss, ka tihpalh a ni. A lehpekah chuan ka that ngei ngei tawh ang, ka tiam ache." a han ti a. Balwinder-a chuan vin zet hian, "Nilo..keimah ngei hian ka that dawn. Kan la intawng leh khawp ang, ka pawt sawm vek dawn hi a ni ringawt." a lo ti ve khur khur bawk.

Pu Mukesh-a erawh chuan a lu a thing a, "Nilove....plan dang ka nei alawm." a lo ti daih mai. "Enge i plan chu?" tiin Balwinder-a chuan a lo zawt hu mai a. Pu Mukesh-a chu a nui suk a, "He indona hi ala tawp lo, ala int(r)an dawn chauh zawk. Rina chu keimah ngei hian ka that ang, keimah ngei hian." a ti chang fak fak mai.

***************************************************

Amir-a, Varun-a leh RIna te chu an tlan mek a. Amir-a chuan Rina chu a han en vang vang a, "Engmaw kha kha..pawisa em ni?" tiin air bag chu kawkin a han zawt leh a. Rina chu a lo khi suk a, "Enge thil awmzia min hrilh phawt rawh." a lo ti daih mai. Amir-a chu a han thaw hak a, "Nia...englo, Pu Mukesh-a kha ka bum a nih kha." tiin a chhang a.

"Engtin maw?"

"Aw...ka bum mawle."

"Engtin nge i bum ka tia lawm..."

"Khatia min man hnu khan nangmah hi hman tangkai che a, hralh chhawn leh che a tum a. Chutah chuan pui turin min sawm a, ka phakar chhuahin pui tur angin ka insawi a. Varun-a that tura an hruai te khan ka tel ve reng a, mahse a hmunah khan ka awm duh ta lova. Pu Mukesh-a hian jail tang, ama tana hnawksak ni a a hriat apiangte chu tih hlumna bik hmun a nei thin a. Varun-a nena in inlaichinna pawh ka hre vek, tichuan plan ka siam ta a ni. A pawisa ka theih ang tawk a khat tawkin ka ruk sak zel a, tichuan Varun-a tihhlum an tum niah pawh khan chhuanlam siamin ka kal lova. Mahse a rukin a hmunah ka awm reng a, tihlum tura a tih pahnihte kha ruang buaipui nghal tu turte an ni a. Pu Mukesh-a te leh midang ho an awm bo chiah khan ka va inrawlh a, Varun-a hi ka va chhanchhuak ta a ni." tiin Amir-a chuan a sawi fiah ta a.

Varun-a pawh chuan, "Ni e...engkim hi nangmah vang liau liau a ni, Rina. I chungah leh Amir-a chungah, in pahnih chungah ka lawm takzet a ni. Tunah chuan ka nu pawh ka hmu ve thei dawn ta, ka tan chuan vantirhkoh in ni ringawt." a lo ti ve bawk a. Amir-a lah chuan, "Air bag ami kha enge sawi tawh teh." a lo ti chhen a.

Rina chu a khi suk a, "Cheng nuai 25...ka hlawh chhuah a nih hi. Tunah chuan Mizoramah ka haw duh tawh, ka hausak zia hi ka chhungten hre ve tawh rawh se." tiin a lo chhang a. Mak ti tak hian Amir-a chuan, "Ehe...ava tam ve..engtin nge i tih theih bik a?" tiin a zawt hu mai. Rina chu a lo nui leh sak a, "Engvangin nge ka theih loh teh luh ang ni, Amir? Keite chu mihring ka ni hleinem, ramhuai alawm ka nih....MAMMON ka ni miau alawm." tiin a chhang sak a.

*****************************************

THE END