USAGI 3 : ANOTHER KILLING SPREE ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER - 3

 USAGI 3 : ANOTHER KILLING SPREE

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER - 3

**************************************

Tlai lam a lo ni leh ta a, Esi pawh chuan a fanu chu a hruai haw a. In an thlen hma chuan eng eng emaw leiin dawr pakhatah chuan an peng kawi a, Esi phone chu a rawn ri ral ral a. A thiannu pakhat hi a lo ni a, tui taka inbia in an nui dun bawk bawk mai. Rei fe an inbiak hnu chuan an dah ta a, Esi chu a khi deuh vur vur a.

Chutah hnunglam atang chuan hmeichhe pakhat hian, "I hlim hle mai maw...." a rawn ti thut mai. Esi chu a phu deuh zawk a, hnunglam chu a hawi let vat a. Cindy a lo ni reng mai, Esi chuan tunge a nih a hre ve lo. A han en vang vang a, "Tunge i nih ka va hre lo che ve?" a han ti a.

Cindy lah chuan ngei hmel tak hian a en run a, "Ni e, tunge ka nih i hre lovang. Mahse keichuan tunge i nih chiang takin ka hria che." a ti nghal deuh khur khur a. Esi chuan a hrethiam lo kher mai, "Thiannu, min hai a ni lo maw?" a han ti nuah nuah a. Chutah Cindy chuan vin zet hian, "Ka hai lo che...Esther Lalnunmawii, tualthattu Lalruatsanga lak atanga vawi hnih lai damchhuak kha i ni lawm ni, Mizoram Wonder Woman te an tih che kha....celeb i ni tawh bawk sia, i hlim viau ang chu tiraw?" a ti hrep mai.

Esi chuan hrehawm a ti ngei mai, mahse engmah a sawi lo. Cindy bawk chuan, "TV ah te an kawm che a, i inla changtunu viau a ni lawm ni? Kha mi rapthlak, cleb i nihna chhan...Ruatsanga khan nizanah ka hmangaih ber min thah sak asin. Kum 6 kal ta khan ka thiante pahnih dimna tel hauh lovin min thah sak tawh bawk, tunah hian a lo let leh a ni." a han ti leh khur khur a.

Esi fanu, Rosy lah chuan hlauh hmel tak hian Cindy ang bawrh bawrh lai chu a lo en reng a. Esi ngaihdan chu a ni vak tawh bik lo, "Chu chu enge ka thiam lohna?" a ti ve ta sak mai. Cindy chu a thinrim zual kher mai a, "Engmaw i sawi a? I thiam lohna a awm lo amaw? Nangmah a rawn umzui vang che a nih hi i hria em? Nangmah a umzui vang che a keini lo tawrhna tur hi a awm lo, i duh leh va pan la, va inthah tir law law ta che...tikhan hlim takin i nun chu i la hmang si amaw?" a ti leh ta hrep mai a.

Esi rilru chu a na kher mai, tawng pawh a tawng hleithei lo. Vanneihthlak takin Cindy thiante chu an rawn kal hlauh va, "AWi Cindy, tinge i lo chhuah bo daih a?" tiin pakhat chuan a rawn kai nghal a. Esi chu hnuai lam melh hian a ding reng a, Cindy thiante chuan, "Kal ang..hawh.." tiin hruai phei an tum a.

Mahse Cindy chu a ding lui tlat mai a, "Esi, ka sawi kha hre reng ang che. Midang nunna in a tawrh belh tawh tur a ni lo, nangman va pan mai rawh." tiin Esi chu a melh khur a, dawr atang chuan a chhuak nghal hmak mai. Cindy thiante zinga pakhat chuan, "Thiannu, khawngaihin ilo hrethiam dawnnia." tiin Esi chu ngaihdam a dil a.

Mahse Esi chuan a chhang lo, hnuai lam melhin a la kun reng a. Cindy thiante pawh chu an kal ta a, Esi mittui chu a tla zawih zawih mai. Thaw dep dep chung hian a fanu Rosy chuan, "Anu, tinge khanu khan a hauh vak che a?" tiin a han zawt a. Esi chuan a mittui a hru a, "A fiamthu mai mai a nih kha, hawh BAwihte... i haw teh ang." tiin Rosy chu a pawm nawlh a, a haw pui ta a.

**********************************************

Deborah-i chu a roomah chuan nilenga inkhungin a diary ah chuan thu a ziak mawlh mawlh a, a unaupa neihchhun Rsa a hriat tan dan te, an chhungkaw background duhawmloh takte chu a ziak thla thin a, kum 6 chhung lai chu nitin deuh thaw ala ziak ziah a ni.

Chutia a ziah mawlh mawlh lai chuan a phone message chu a rawn ri leh ral ral a, a han en chu Dr. Manuna message bawk a lo ni. "Enge i thuthlukna chu ni ta, i unaupa chu i hmu duh em?" tih hi a lo ni, Deborah-i chu a han inngaihtuah vang vang a. MAhse reply loh chu a tum ta a, phone chu dah leh hmakin a diary chu a ziah chhunzawm leh mual mual a.

Mahse reiloteah chuan message chu a rawn ri leh a, Dr. Manuna bawk a lo ni. A han en a, "Deborah, min chhang rawh. I duh nge duh lo, i unaupa awmna hi ka hria ka tih kha.." a rawn ti leh a. Deborah-i chu a thaw hak mai, "Engvangin nge ka rin ang che?" tiin a han reply ve ta a.

"Min ring turin ka ti lui lo che, mahse thudik tak ka sawi a ni. Hlauthawng suh, engtin mah ka ti dawn lo che, i unaupa chungchang bak engthil dang mah kan sawi lovang." tiin Dr. Manuna chuan a rawn thawn let leh a. Deborah-i chu a ngawi vang vang a, "Khawi hmunah nge kan inhmuh ang?" tiin a zawt ta nge nge a.

"I hman hun sawi phawt la, tichuan location chu ka rawn hrilh leh dawn che nia."

"Zaninah chuan ka hman lovang, naktuk zan lamah kan tum dawnnia."

"A tha e, ka lo ring ang che."

Deborah-i chuan phone chu a han dah deuh thuai a, a thaw halh halh mai. Dr. Manuna chu a ring sual ang tih a hlau bawk si, mahse thudi lo sawi ta se, a u Rsa chu hmuh ngei a duh bawk si. A rilru chu a insual buai nasa kher mai, diary pawh chu ziah chhunzawm ta lo chuan a dah ve nghal daih a.

***********************************

Tlai dar 6 a pel tawh a, khua pawh a thim vek tawh. Mahse Isaka chu a lo la haw thei reng reng lo mai a, Esi pawh a mangang takzet. A call lahin a ring quit thak thak zel mai bawk si, Rosy chaw a ei tir a, mahse amah chuan a ei ve lo. Isaka chu a la nghak tang tang a, a rilru a nuam thei mawlh lo.

Rosy chuan chaw ei dawhkanah chuan home-work a ti mek a, Esi erawh Isaka a ngaihtuah em avang chuan a thu hle hle thei lo. Inchhungah chuan a vei kual a vei kual ringawt mai a, rei fe hnuah chuan a phone chu a rawn ri ta ral ral mai. Rang lutukin a ban nghal a, a han en chu a pasal Isaka a lo ni.

A pick up vat a, "I lo va haw har ve....call la thei bawk si lo." tiin Isaka tawng ve hma hma chuan a han hau nghal bawrh bawrh a. Isaka chuan zaidam tak hian, "Office ah kan buai lutuk a, kan tlai phah alawm mawle...chaw te i ei tawh em?" a rawn ti a. Esi lah chuan, "Ei lo, ka lo nghak che." a ti deuh hmuk a.

"Awww.... min lo eisan mai tur alawm, BAwihtein a ei tawh em?"

"Ei tawh...ka ngaih i ti tha lo hman alawm, i reh hmak bawk sia."

"Kan buai lutuk ka tih chu...hna a tam lutuk a."

"Chu pawh ni se, rawn sawi lawk ve tur alawm."

"Phone khawihna hman pawh kan nei lo, kan che char char."

Esi chu a han thaw deuh hak a, "Um..engpawh chu nise in bang thei tawh em?" tiin a han zawt a. "AW..hei kan bang chiah a, tunah motor ah ka awm tawh. Chanchin ka rawn hrilh che a nih hi, min lo nghak law law rawh..chaw chu kan ei rual dawnnia." tiin Isaka chuan a chhang a.

Esi chuan vin deuh tak hian, "Aw lo haw vat rawh...phone kha dah la." a lo ti leh hlur mai. ISaka pawh chu a nui tawp, "Awle awle, ka lo haw nghal e." tiin phone chu a dah a. Motor chu a start a, "Thinchhe ve bawk sia mawww.." tih nuah nuah pah chuan a khi suk a, a tlan ta a.

*********************************************

Damdawiinah hian naupang damlo pakhat chu khumah mu in nurse pakhat hian nachhawkna in a lo chiu mek a, "Tikhan damdawi khan a chhawk che ang a, tui deuhvin i muhil mai ang." zaidam tak chuan nurse chuan a han ti a, chu nurse chu Lalrempuii kha a ni.

Ward chu a chhuahsan a, a shift a zo chiah a ni. Haw tur chuan a insiam fel a, a thawmhnaw te chu a thlak a. A inthlak zo chu a phone a han check leh te te a, whatsapp group vel chu a en kual a. Chutah Muantea tual thih thu chu a hmu fuh ta hlauh mai, rang takin a chhiar nghal a.

A thlan a tla nghal bawrh bawrh mai, a hma lawka Buleng khua a tualthahna a thlen thu a han ngaihtuah let phei chuan hlauthawng tak a ni. A phone chu a hmet thim nghal a, a thaw deuh halh halh mai. Rsa thil tih a nih ngei chu a ring nghet ve nghal bur a, Rsa nena an intawn dante, Mental Assylum-a a thawh laia Nelsona leh guard pakhat ruang te, kum 6 kal ta a damdawiin atanga a chhuah zalen dan zawng zawngte chu a mitthla ah chuan a rawn lang chuai chuai mai.

A thaw dep dep a, "Rsa....a lo let leh tawh. Kei hi...kei hi min rawn zawng ve angem?" tiin a rilru chuan a inbe mawlh mawlh a, a hlau thar leh kher mai. Room atang chuan a chhuak a, hmanhmawh tak chuan Damdawi In gate chu a chhuahsan a. A rilru chu a nuam thei mawlh lo, a hma a Buleng khua a MAzuala leh a thianpa Lura tual thih thu pawh a lo hre ve tawh a, tuna Muantea tualthihna hian a ti hlau zual a ni ber.

Damdawiin kawta Taxi ding thin ho lah chu tumah an lo awm lo lehnghal a, scooty a ken loh ni tak a lo ni bawk si nen a rilru chu a hah ru kher mai. Kawngpui lam pan chuan a chhukthla zel a, thawm engemaw awm hlek pawh chu a phut pui zuk zuk tawh mai a.

KAwngpui chu a thleng thla thei hlauh mai, tichuan taxi chu a chang ta a. Mahse haw na tur chu a hmu lawk lo lehnghal a, sana chu a bih sek tawh mai. A tui in a hal deuh avang chuan tui lei turin dawrah chuan a kal a, mi pakhat nen an insu palh hlauh mai. Chupa chu a han en a, Isaka a lo ni.

Rempuii chuan a en hu a, "Ka tih palh lutuk." tiin Isaka chuan a han en ve a. Tunge an nih chiang takin an inhria, an ngawi dun vung vung a. Isaka chuan zawi sap hian, "Nurse Rempuii kha i ni tiraW?" tiin a han zawt a. Rempuii pawh chuan a lu lo bu nghauhvin, "AW ni e." tiin a lo chhang a.

Za lo tak hian Isaka chu a khi suk a, "Ka hria che alawm, kan nu in a sawi thin che alawm." a han ti leh a. Rempuii chuan inthlahrun hmel tak hian, "In nu...Estheri maw? In innei tawh elaw?" tiin a han zawt ve a. Isaka chuan a lo lo bu ve nghauhvin, "AW....2014 khan kan innei a, fanu kum 4 mi kan nei tawh alawm." tiin a chhang a.

Rempuii chu a nui suk ringawt, "I haw dawn chiah em ni a?" tiin Isaka bawk chuan a han zawt leh a. "Aw hei...taxi ka chang mek anih hi." tiin Rempuii chuan a lo chhang a. Isaka chu a han ngawi vang vang a, "Pawi i tih loh chuan ka lo thlah ang che, kan haw kawng a in ang thovin ka hria.." a han ti leh a.

Rempuii chu a inthlahrung kher mai, "Aaa...a ngai lo mai, hei taxi ka chang a, ka hmu mai ang." tiin a lo hnar a. Mahse Isaka chuan, "A remchang alawm, lo chuang rawh. Ka lo thlah ang che, i tan a awlsam zawk." tiin a sawm lui tlat a. Rempuii chu inthlahrung viau mahse taxi a hmu zo mai si lo nen, mahnia haw ai chuan tiin Isaka bulah chuan a chuang ta nge nge a.

*****************************************

Thawmhnaw dawr chhungah hian pa pakhat hian zu a lo in karh karh a, a hming chu Pu Mala a ni. Dawr chhungah chuan a inkhar hnan a, a la haw peih lo a ni chek ang chu. A phone a rawn ri a, a han en chuan 'Dr. Manuna' tih hi a lo inziak a. A khi suk a, "Hello, enge ni ta, MAnunte?" tiin a han nui nghal huah huah a.

"I dawr chhungah ila awm em?"

"AWm e, hei mahni te in STAG ka lo in mai mai e ka tia.."

"Engemaw sawipui duh che ka nei a, ka lo kal ve thei angem?"

Pu Mala chu a nui leh huah huah a, "I in ve chak ami? Doctor atangin zu ngawlvei i ni dawn nimaw...haha, i hurherh vangin i hna i chan a....pawisa pawh i nei tawh lo a nih khaaa.." tiin a han chhaih zui hrep a. Dr. Manuna chu a nui suk a, "Fiamthu lo teh, engemaw i sawi dun lawk teh ang." a rawn ti leh a.

Pu Mala lah chu a kai ve tawh bawk si nen, ala uang laklawh tlat. Hmuhsit hmel tak hian, "Aww...ava buaithlak thin. KA in duh ti ve mai la, i in duh te chuan...amak thin e aw... Thawmhnaw dawr kai mai mai kha kan ni thin a, tiraw... Tunah chuan doctor mualpho i ni der tawh mai chu ania, a buaithlak thin teh e." a han ti leh deuh zek mai a.

Dr. Manuna chuan a chhang tawh lo, a ngawi reng a. Pu Mala bawk chuan, "Ka han ti vel mai mai a nih kha....kan fiamthu a san thin em kha tiraw, i lo thinrim em lovang chu..." a rawn ti kual leh vel a. Dr. Manuna chu a thaw hak a, "Thinrim love...ka lo kal dawn tunah, ka lo chhuak dawnnia." a rawn ti leh a.

Pu Mala chuan no khat chu a han tlak leh pup a, "Umm.. lo kal ta poh che. Ka lo la awm ang, sehhmeh lo lei belh teh aw.." a la ti zui a. Dr. Manuna pawh chuan, "AWle, tunah ka lo chhuak nghal ania." tiin phone chu a dah a. Nui deuh vur vur chung hian Pu Mala chuan, "Mi ka hmusit e te a ti ve a, engmah ni leh mang si lo. Mahni zu man tur pawh nei leh tawp si lo, tenawm lutuk." a ti nuah nuah a.

*****************************************

Rempuii leh Isaka te chu an tlan mek a, an ngawi dun ngar ngar mai. Chutah Rempuii chuan a aw a han thian kharh khar a, "News kha i hria tiraw, tualthah news awm kha...tun hnaiah vawihnih ngawt a thlen tawh kha." a han ti zawi sap a. Isaka chu lo thaw deuh hakin, "Aw..pakhat chu Buleng khua, pakhat chu Saizahawla Road ah..Aizawl ah.." a lo ti deuh hmuk hmuk mai.

Rempuii chu a han ngawi leh vang vang a, "Isak, Rsa hi a lo let leh i ring tiraw nangpawn?" tiin a zawt deuh thuai mai. Isaka chuan a chhang mai lo, a ngawi reng a. Rempuii bawk chuan, "Keichu ama thil tih bak a nih ka ring lo, khatiang khawpa rapthlak a che duh tu tur chu Rsa chauh a ni." a han ti leh a.

Isaka chuan a hma zawn en reng chung chuan, "Kan nu pawhin a ring alawm." a lo ti leh hmuk ringawt. Rempuii chu a nui suk a, "Ni e, amah a nih ngei ka ring. Buleng khua kha an khua a ni a, an in awmna ah ngei khan a che hmasa ber a....Rsa a ni tih chua  chiang mai." a han ti leh nuah nuah a.

Chutah Isaka chuan chiang deuh fek fawk hian, "Rsa a ni..." a rawn ti thut mai. Rempuii pawh chuan a en hru mai a, "Engmaw?" a ti deuh hu mai. Isaka chuan Rempuii chu a han en ve a, "Aw..Rsa thil tih vek a ni." tiin a chhang leh a. Rempuii chuan sawi mai tur pawh a hre lo, a ngawi reng ringawt a.

Isaka chu a han thaw leh deuh hluai a, "A tir kha chuan rukru thil tih a nih ka ring a, mahse Esi'n tualthahna thlenna hmun picture min entir khan ka ring ve chiah a ni. Ka ring mai pawh a ni lo, Rsa thil tih ngei a ni tih ka hria. Chuan nizana thil thleng pawh kha, Rsa thil tih vek tho a ni." a ti ta fak fak mai.

Rempui chu a han ngawi vang vang a, "Mahse pawisa a ru bawk sia, Rsa'n eng atan nge pawisa a tih ve ang? Nizana thi ta, Muantea an tih pawh kha a wallet ruk sak a ni ngei bawk a, Rsa hi rukru a ni tel ta tihna em ni?" a han ti leh deuh hu a. Za lo tih hriat tak hian Isaka chu a khi suk a, "Pawisa mamawh...midang an awm tihna a ni mai." tiin a lo chhang a.

Rempuii chuan hriatthiam loh hmel tak hian, "Enge awmzia?" tiin Isaka chu a en leh hu a. Isaka chuan Rempuii chu ava en ve leh a, "Puitu a nei emaw...Rsa hmang tangkaitu an awm tihna animai." tiin a lo chhang leh a. Rempuii chuan inthiamloh hmel tak hian, "Keimah vang vek a ni, ka thil tihsual vang vek." a han ti zawi sap a.

Isaka chuan a han en deuh hu a, "Engvangin maw, enge nangmah vang a nihna?" tiin a han zawt a. REmpuii chu a inhnit deuh feih feih a, "Khami zan khan keimah khan ka chhuah tir kha ania, chhuahna kawng ka lo kawhhmuh kha ania. Keimah vang vek, ka va han laktlak loh bik tak." a ti nuah nuah mai.

"Nangmah vang a ni hleinem, duhthlan tur i neih loh vang zawk alawm. Lo dang ve ngawt ta la, i nunna in a tawrh phah theih asin. Ni e, Rsa hi a lo let leh tih chu ka hria. MAhse kan nu hian Rsa a hlauhna hi a nasa bik em a, a nun zawng zawng a buai phah a. Chuvang chuan ka awih lo lui mai mai a ni, a rilru tih thlaphan a duh loh vangin ka awih lo lui tawp a ni. Nangpawh fimkhur la, enge kan hma hun hre lo mah ila....kan him ngei ka beisei." tiin Isaka chuan a hnem hram hram a.

*************************************************

Dr. Manuna pawh chu Pu Mala dawrah chuan ava kal ta a, zu chu an indun a. Pu Mala chuan mei nei tak tak leh ngeiawm zet zet hian a chhaih deuh reng a, mahse Dr. Manuna chu a nui ve zel thei mai a, hua awm ang pawhin a lang lo. Pu Mala chu a lo in lawk deuh nual tawh bawk nen, a kai tawh takzet.

No khat han tlak leh deuh pupin, "Engmaw min hrilh duh chu ni a, sawipui duh che ka nei i ti a ni lawm ni?" tiin a han zawt a. Dr. Manuna chuan nui chung hian, "Aww..nei e. Mahse ka sawipui dawn che a, i fiamthu zel a nih kha." a lo ti a. Pu Mala chu a han khuh deuh kharh kharh a, "AWle awle, ka fiamthu tawh lovang, han sawi ta che." tiin a han thu tha sauh sauh va.

Dr. Manuna chuan a no dawm lai chu a han tlak ve pap a, "ihhh..... englo ania maw... kan inhmu khat sia, i ngaihawm ve sia. Doctor atanga min ban hnu khan ka mualpho ta chiam sia, ka lam tang kha an awm mang silova. Mahse nang hian theih tawpin min pui a, chuvang chuan zanin hian lawmthu hrilh che ka duh a ni." a ti daih mai.

Pu Mala ber pawh chuan mak a ti kher mai, "Teh daih che chuan, pawisa puk min rawn dil dawn maw ka tia." a han ti deuh kher a. Dr. Manuna chu a nui lui sak a, "Nilove...thil pek che ka duh zawk mawle." tiin a lo chhang leh a. Pu Mala chu a ngawi vang vang a, "Aaa.. nia, keichu thian ngaina mi ka nia. Engpawh chu nise, khawnge min present turte chu lo en ila." a han ti vel a.

Dr. Manuna chu a phur kher mai, a ding deuh hluai a. Nui var var chung hian, "Pawnah sawn ka dah a, ka rawn la lut ang." tiin kawngka lam chu ava pan a. Mak ti tak hian Pu Mala chuan, "Ehe..pawnah i dah mai mai amaw? Miin an lo ru thei asin, zan ala rei em em loh hi..." a lo ti nuah nuah a.

Mahse Dr. Manuna chuan a chhang lo, kawngka chu a hawng a. Chutah Rsa chu a sazupui hmaikawr vuah chung chuan a rawn lut ta mai a, a san em avang chuan a rawn kun lut deuh du du mai. Pu Mala chuan a hrethiam lo kher mai, RSa lah chuan sa chan chem bawk chu a lo hum leh run a.

Pu Mala chuan a chil a han lem dawk a, "Hepa hi tunge?" tiin a chhoh en vang vang a. Dr. Manuna lah chuan ala chhang mai lo, kawngka chu chhunglam atang chuan a han kalh te te a. Pu Mala ngaih chu a tha ta hauh lo mai. Vin lek lek hian, "Manun, engthil nge i tih a? Enge awmzia, hepa hi tunge ka tih chu?" a han ti deuh khur khur a.

Dr. Manuna chu a rawn let a, "Hei hi maw...ka fapa Ruatsanga a nih hi.." a ti ta mai a. Pu Mala chuan mak ti tak hian a en vung vung a, "Eng a? Fapa i nei maw?" a ti leh hu mai. Dr. Manuna chu a khi suk a, "Ni ang chu mawle, hei hi ka present pek tur che chu a nih hi..Ka fapa hian a pe dawn che a ni, i phu miau a lawm." a han ti leh a.

Pu Mala hrethiam lo chu a nui tawi tak tak a, "I fiamthu em ni, min tihthaih chu tum lo mai teh aw.." a han ti khur dar dar a, a hlau ve deuh reng tih chu a hriat takzet. Chutah Dr. Manuna chu a nui ta huah huah mai a, "Aww....ka tihthaih lo che. I phutawk thil a pe dawn che alawm, ka fapa hian Ka fapa hi maw...a nickname i hre duh em? USAGI....USAGI a nih hi." a han ti chiah chu Pu Mala hmel pawh a danglam chak ngei mai, hlauhna hlir chuan a khat ta a.

Chutah Rsa chuan Pu Mala dul ah tak mai chuan chem chuan a vit pawp mai a, a hnungzang atang chuan chem hmawr chu a rawn tlang zawk thei hial mai. Pu Mala chu a khur hlawk hlawk a, Rsa chuan a chem chu a pawt phawi ri leh hrawk mai. Pu Mala chu a thingthi dawt mai a, a ka atang chuan thisen a rawn chhuak a.

A dul chu a thler zau em em mai lehnghal a, thisen chu a buak hian a rawn baw chhuak hawk hawk mai. Chutah Dr. Manuna chu a thuhniam a, Pu Mala tukhum sam chu a kek dak awrh a. Chiang tak hian a en a, "Nang hian min hmusit ve amaw? MAwhh? Min hmusit ve amaw? Nanga dawr chhe te, CCTV pawh vuahna chang hre lo. Ka tan hian kawng i siam awlsam thiam kher mai, a mawl zawk chu kan hriat tawh mai em tikhan?" tiin a nuihsawh vak vak mai a.

Pu Mala lah chu a tawng hleithei lo, a meng pual vak vak tawh mai. Chutah Dr. Manuna bawk chuan, "Mi rethei, mi tlachhia, mi laktlak loh chu ka ni tiraw? I sawi tiraw? Keichu ka inchawm thei a, nang ang ka ni lo. Ka pumpui hi engtik lai pawhin a puar reng ang, doctor tlachhia kan ni ve hleinem...tiin ka bulah i sawi thin tiraw? Anih chuan kha...i pumpui chu ka han ruak tak tak ange aw..." tih leh a dul thler chu a kut chuan a zen sak ta mai.

A ril te chu a pawh chhuah sak ta mai a, thisen chu a baw chhuak hawk hawk mai. Dawr chhung zawng zawng chu thisen hlir hian a khat a, thawmhnaw zawrh lai thenkhat ah pawh chuan a kai nual tawh bawk. Pu Mala chu a thaw hrawk hrawk a, a tawpah chuan a thal tawp mai.

Ril chhuak pur chuan chhuatah chuan a let der mai a, a thi chiang hle bawk. Dr. Manuna chu a tho va, a thaw deuh hrawk hrawk mai. Thawmhna zawrh lai pakhat chu a ban a, a kuta thisen chu hruk nan a la hmang zui. Rsa hnungah chuan a han beng thak thak a, "I ti tha thin e, min lo nghak char char a...fapa fel tak i ni." tiin a han khi vur vur a.

Rsa chuan a lo en hru mai, "E...aw...nia, hepa hi chu maw...ka lo hrilh theihnghilh daih che alawm le.. HEpa hi kan tleirawl lai atanga min el em em tu leh min hmusit em em thintu ania, doctor ka nih khan ani hian hna engmah a nei ve lova. Theih tawpin ka pui a, pawisa te pawh puk tirin he dawr hi a din hial thei a. MAhse ka mualpho khan, min hmusit leh em em thung a. Ka puihna zawng zawngte kha engmah a hre ve tawh lo, chuvang chuan thah angai a ni." Dr. Manuna bawk chuan a han ti leh a.

Zu chu a la a, dawr chhungah chuan a lei kual vak vak a. PAwnah chuan Rsa nen chuan an chhuak dun a, lighter chu a phawrh a. A han thaw hak a, "Tikha chuan hna pakhat chu a zo leh ta e...lungngai suh aw, BAwiha..helai hnaiah hian CCTV engmah a awm lo ania." tih pah chuan lehkha chhia chu a hal a, dawrh chhungah chuan a theh phei ta mai.

Thawmhnaw te chu a kang alh hluah hluah a, "Kal ang le.." tiin Rsa chu a han kheuh zeuh va, Rsa pawh chuan a zui ve mai bawk. Thawmhnaw chu a kang nasa telh telh a, a kang kai thui zel a. Reilote hnuah chuan dawr bangte chu a kang kai a, dawr pum mai chu a alh ta hluah hluah mai le.

***************************************

Esi chu tukverh bulah chuan dingin pawn lam chu a thlir vauh vauh va, Rosy erawh a muhil tawh thung. Isaka inbual zo chu bathroom atang chuan a rawn chhuak a, a inthlak nghal mawlh mawlh a. Esi tukverh bula a ding ngawi reng chu ava en a, "Esi, enge i ngaihtuah vung vung a?" tiin ava zawt a.

Mahse Esi chuan a lo chhang lo, Isaka chu a inthlak zova. Hnunglam atang chuan Esi chu ava kuah a, "Mawh..enge i ngaihtuah a?" tiin a han zawt leh a. Esi chuan a kut chu lo namsawn pahin, "Ka sawi chuan kan inhau leh palh ang, ka sawi lo mai ang." tiin a kal daih a.

Thawmhnaw ve chu wardrobe ah chuan a dah fel a, Isaka chu a thaw hak mai. Muangchang chuan khumah chuan a thu a, "Nizan tualthahna kha em ni? News thar kha...kha kha em ni?" tiin a han zawt a. En miah lo chuan Esi chuan, "AW ni e." lo ti deuh hlurin thawmhnaw chu a dah fel chhunzawm mawlh mawlh a.

Isaka chuan zaidam tak hian, "Keipawn ka lo hre ve alawm, i ngaihtuah zui a nih ka lo ring ve tho va. Mahse Esi, heta lo hlauhthawn vak hian awmzia a nei lo, police ten an chhui mek alawm. Tih theih vak kan nei hleinem, hahdam tak khan awm rawh." a han ti a.

Esi chu rawn hawi letin rum zet hian Isaka chu a rawn melh a, "Isak, engtin nge ka hahdam theih ang? Buleng khua ah tual a that zo chiah a, a tuk zanah Aizawlah..Aizawlah tual a that leh bawk. Ngaihtuah chiang rawh, tunah hian khawiah nge kan awm, Aizawlah..kan awmna khawpuiah hian Rsa a awm ve reng tih i hria em? Kan pahnih hian a thah ve loh te kha kan ni a, a damchhuak awmchhun kan ni. Keini hi min la theihnghilh lo, kan nupa hian minla theihnghilh lo asin, Isak." tiin a vin deuh hrep mai a, a tap nghal pur bawk.

Isaka chu a thaw hak a, "Nurse kha...Rempuii kha, tichuan Rsa nau Deborah-i nen...anni te pawh kha an rilru a hah ve thovang. KEini chauh kan nilo, tunah chuan ramhnuaiah kan awm tawh lo, khawpuiah, kan inchhung ngeiah kan awm tawh. Min tina ngawt thei bik lovang, kan him em em ang." a han ti leh a.

Esi chu thinrim hmel tak hian a ngawi vang vang a, "Khamite pahnih kha.... an hming te ila rawn sawi le.." a ti hlur mai. Isaka chuan Esi chu a han en a, "Zanin ka rawn haw khan Rempuii kha ka hmu a ni, nurse kha.." a ti ta mai a. Esi chu a meng kawk mai, Isaka chu a va pan nghal a. 

"Eng a? Kha nurse...Rsa chhuah zalentu kha i hmu amaw?" a ti deuh hlur mai. Isaka chuan a lu a lo bu nghat nghat a, "Aw....kan inbia alawm." tiin a lo chhang leh a. Esi chu a thaw hak a, "Enge a sawi?" a han ti leh hmuk a. "A inthiamloh ziate, a rilru hah thin zia te a sawi a, amah vang vek a thleng angah a ngaih thute a sawi a. Chuan heng tualthahna news pahnihte avang hian Rsa chu a lo let ve ngei a rin thu a sawi bawk, hrehawm a ti ve lutuk." tiin Isaka chuan a chhang a.

Esi lah chuan, "A mah vang a ni tho tho, midangin keimah vanga thil thleng vek angin an ngai bawk a. Ka hne lutuk, ti hi chuan min la rawn zawng hmu ve ngei ngei ang." tiin a han phun leh bul bul a. Isaka chu a tawng tawh lo, a ngawi reng a. Khumah chuan lawn in a mu ta daih mai, Esi chuan a melh rum ngang mai. Tih ngaihna vak a hre tawh bik lo, tum bur chung chuan a mu ve ta a.

*********************************************

TO BE CONTINUE