USAGI 3 : ANOTHER KILLING SPREE ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER - 4

 USAGI 3 : ANOTHER KILLING SPREE

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER - 4

***************************************

Derborah-i chu a harh a, peih loh hmel tak chuan a tho chhuak a. A zi mar a, ham bai bai chung chuan a phone chu a check a. News thar a hmu leh tlat mai, chu chu a hma zan lawk a Pu Mala dawr kan ral vek thu leh amah Pu Mala ruang ngei chu a chhungah hmuh a nih bawk thute chu a chhiar a.

A chhiar thui zel a, 'Police  te sawi danin dawr hi tihpalh thil thu a kang a ni lova, tum reng vanga hal a nih an rin thu an sawi a. DAwr neitu Pu Mala hi kang hlum nilovin thah ngei a nih rin a ni bawk a, dawr kan hma a thi a nih an rin thu an sawi bawk.' tih chu a chhiar leh a.

Khum atang chuan a tho va, a ding vang vang mai. A phone chu a la leh a, Dr. Manuna chu a call ta a. Mahse a lo chhang miah lo, a ring quit thak thak mai. A call nawn leh ngat a, mahse ala la chuang lo. A vawi thum nan chuan a han call leh a, a rawn chhang ta hlauh mai.

Dr. Manuna chuan zawi sap hian, "Enge ni ta? Thutlukna chu i siam fel tawh em ni?" tiin a rawn zawt nghal ngawt a. Deborah-i chuan thinrim hmel tak hian, "Tualthahna thleng zozai te hi....ka u thil tih a ni em?" a ti khur dar dar mai. Dr. Manuna chu a ngawi vang vang a, "Sawi rawh....ka u thil tih a ni em?" Deborah-i chuan a han ti vin leh tuar a.

Dr. Manuna chu a han thaw deuh hak a, "Aw ni e...ama thil tih vek a ni." tiin a chhang ta a. Deborah-i mittui chu a tla nghal zawih zawih mai, "Mahse tinge pawisa a ruk tak mai a....nang hian i tih tir a ni lo maw?" a han ti leh a. Dr. Manuna chu a rawn nui ta huah huah mai, "I rilru a chak hle mai, ni e...Rsa hi ka enkawl mek a ni." riin a rawn chhang ta mai a.

Deborah-i chu a meng kawk mai, "Mi tenawmpa, ka u i hmang tangkai amaw? Pawisa i duh avangin, i lo la hmang tangkai char char a nimaw?" tiin a han vin deuh hlur a. Dr. Manuna chuan a aia vin hian, "Aw...ka hmang zel bawk ang, i u hi ka ta a ni tawh." a rawn ti hrep mai.

Deborah-i chuan sawi tur reng a hre lo, a ngawi vang vang mai. Chutah Dr. Manuna bawk chuan, "I u hi ka thuhnuaiah a awm tawh, a pa angin min ngai tawh. RAwn kal la, i u i hmuh duh chuan lo kal rawh. Zaninah ngei ngeiin lo kal tawh ang che, a nih loh chuan chance dang i nei tawh lovang." a rawn ti leh khur khur mai.

Deborah-i chuan a mittui chu a hru a, "Ka lo kal lovang, nang tualthattu...i thusawi hi ka awihna chhan tur pakhat mah ka hre lo. Mi tenawmpa, mihring pawh i ni lo. Police hnenah ka report dawn khawp che, hre rawh." a ti ve ta hrep mai a. Dr. Manuna chu a thinrim kher mai, "Engtin maw i tih a, kei hi police hnenah min report anga maw?" a rawn ti vin hlur mai a.

"Aw ka report ang che, ka hlau lo che....i duh tawk khan min vau rawh, kan inbiakna pawh hi ka record vek." Deborah-i chuan a ti leh pang pang mai. Dr. Manuna chu a ngawi vang vang a, "I inchhirna tur thil engmah ti suh, Deborah. Police hnen i thlen hma in i thi ang, chu chu i duh lo a nih chuan ngawi hmak la a tha zawk ang." a rawn ti leh khur khur a.

Deborah-i chu a nui lui sak a, "Kan hria ang chu....enge ka chungah i tih theih kan hria ang chu." tiin a lo chhang let ve leh sak mai. Chutah vin zet hian Dr. Manuna chuan, "Hmeli ngaithla rawh, zanin dar 8 rik hma a ka sawina hmuna i lo kal lo a nih chuan i u hi ka dahtha nghal ang...i unaupa hi nung dama i la hmu duh a nih chuan rawn kal ang che." tiin phone chu a dah hmak mai.

Deborah-i pawh chu a phu zawk a, a hlauthawng kher mai. Police hnena report chu duh viau mahse a u nunna in a tuar mai tur chu a ngai ngam chiah bik si lo, a rilru a hah kher mai. Dr. Manuna nena an in-call-na kha a record tak tak lova, a vauna mai chauh a ni.

****************************************

Esi chu a fanu nghakin school kawtah chuan a thu mek a, a phone khawihin a hma zan lama Pu Mala dawr kan thu vel te chu a lo chhiar ve mek a. A thaw hluai a, a kun deuh ngawih ngawih mai. Muangchanga a han dak chhuak leh chu a hma zawn lawka dawr pakhatah chuan Cindy kha ava hmu leh a, Cindy lah chuan a rawn hmu ve chiah chiah zui.

Cindy chuan a rawn melh deuh hraw a, Esi erawh chuan hmundang a hawi sawn nghal vat a. Cindy chuan a la rawn en vang vang a, Esi chuan a va melh ve leh zeuh va. Chutah Cindy hnunga dawr chhung atang chuan Dr. Manuna chu a rawn chhuak hlawl mai a, Esi chu a ding nghal zawt mai.

A mitthla ah chuan USAGI lehkhabu phek hmasa bera Dr. Manuna thlalak a hmuhte chu a rawn lang nghal chuai chuai a, tunge a nih chiang takin a hria. Cindy nen chuan an inzui a, motor pakhatah chuan an la lut dun daih zui. Esi chuan mak a ti angreng khawp mai a, engemaw tak chuan ngaih that lohna riau a nei tlat mai.

Chutia a inngaihtuah vung vung lai chuan a hnunglam atang chuan a thiannu Tepuii chuan a darah a rawn vuan thut a, Esi pawh a phu deuh zawk mai. Tepuii a ni tih a hriat chuan a thaw huai a, "E...Te..Tepuii, i lo let leh tawh a ni maw?" a ti bah deuh nuai mai.

Tepuii chu a lo ner deuh nung a, "School bathroom saw a tawp khawp mai, inthiar that ngamna chi pawh a nih nek loh saw.." tih nuah nuah pah chuan a thu a, Esi chu a bulah chuan a thu ve bawk a. Tepuii bawk chuan, "Awii... nizan dawr kang kha i hre ve em, kan veng nen a inhnaih sia...ka room atangin ka hmu pha alawm." a han ti leh a.

Esi chuan muangchang hian a lu a lo bu nghauh nghauh va, "Nia...a rapthlak tawp." a lo ti zawi sap a. "Thah ngei a nih an rin thute kha an sawi a, a zawnin zan thum ngawt mai Mizoram chhungah tualthahna a thleng mai chu ania, keichu ka thla a muang lo ngawih ngawih." Tepuii chuan a han ti leh nuah nuah a.

Esi chu a ngawi reng a, a rilru ah chuan Rsa bak a awm lo. A thinphu chu a rang dup dup kher mai, mahse hlauthawng tak anga lan chu duh bik lovin a insum hram hram a. A mitthla ah chuan Rsa chet dan rapawm tak te, a thiante ruang a hmuh zawng zawng te chu a rawn lang leh chuai chuai thin a.

********************************************

Cindy leh Dr. Manuna te chu car chhungah chuan an thu dun a, Cindy hi a bialpa thi ta, Muantea nen khan danglamna an lo nei vak lo a nih hmel. Dr. Manuna nen hian a rukin an lo inngaizawng ve reng tho hi a lo ni, kum lamah erawh an in upat hleih viau ta ve ang.

Dr. Manuna chuan motor a han start dawn a, mahse a han indap ruk ruk a, "Ehe...ka wallet ka theihnghilh daih mai, dawrah khan..." a han ti hu a. Nin hmel tak hian Cindy chu a lo chek hlur a, "Han la vat rawh...ka lu ana tawh ania." a lo ti vin hlur mai. Motor atang chuan Dr. Manuna chu a chhuak a, dawrah chuan ava let leh a.

A rin ang ngeiin a lo theihnghilh a, dawr nghatute chuan an lo pe let leh thlap bawk a. A chhuak leh chiah chu school kawt lam ava hawi phei chuan Esi chu ava hmu ve ta a, a thiannu TEpuii nen chuan an lo titi dun mek a. Dr. Manuna chu a ding chat mai, Esi chu a en vang vang a.

A lu bu nghauh nghauhvin a nui ta var var mai, Esi erawh chuan a hmu ve lo. Motor ah chuan a let leh a, "A lo awm em, i wallet chu?" tiin Cindy chuan a lo zawt nghal a. Dr. Manuna chu a han thaw hak a, "Aw awm e...englo ania maw, Cindy...vawiin chu ka hman leh ta lo mai." a han ti zawi sap a.

Cindy chuan phawk hru hian a melh a, "Enge awmzia, i sawi lawk vek tawh kha?" a ti vin nghal hlur mai.Inthiamloh hmel tak hian Dr. Manuna chu a nui suk a, "Nia, hna ka nei leh thut alawm mawle...ka tihpalh lutuk aw.." a han ti dam leh dap a. Cindy chu a thinrim kher mai, "Vawikhat mah kan chhuak dun tawh lovang." tih pah chuan motor atang chuan a chhuak hmak a.

Kawngkhar chu a la khar na em em lehnghal a, a ri deuh bur mai. Dr. Manuna chu a han thaw deuh hluai a, "Esther Lalnunmawii, THE SOLE SURVIVOR...haha, ka hmu ta che." a ti zawi sap a. Motor chu a star a, chak takin a tlan a. In fal angreng tak pakhat bulah chuan a ding a, motor atang chuan a chhuk a.

Inchhungah chuan a lut a, a lo thim ruih mai. Room pakhatah chuan a lut leh a, hnungchhawn zawng hian dawhkan hma ah chuan Rsa chu a lo thu khur mai a, a hmaikawr chu a lo th(r)ui tha mek a ni. Room kawngka chu Dr. Manuna chuan a khar a, Rsa chu ava pan a.

Rsa chuan ngaihsak loh hmel tak hian a thil thui lai chu a thui zawm mawlh mawlh a, Dr. Manuna chu a bulah tak chuan a rawn ding a. Rsa chu a han en vang vang a, "Thu lawmawm lutuk mai a awm ania, ka hna nilovin....i hna diktak zawk i thawk ve thei tawh dawn ania." a han ti a.

Mahse Rsa chu a la ngawi reng a, a thil tih lai chu ala ti reng tho. Dr. Manuna chu a han khi leh suk a, "Ruatsang...Estheri ka hmu a ni." a han ti chiah mai chu Rsa pawh chuan a thil tih lai chu a dah nghal hmak a, a ding deuh hluai mai. Dr. Manuna chu a en nghal hru mai a, "Ni e...ka hmu alawm." Dr. Manuna bawk chuan a han ti leh a.

Rsa chu a thaw ri hrawk hrawk mai, a darah chuan Dr. Manuna chuan a vuan a. Zaidam tak hian, "Inbeng dai phawt rawh, BAwiha. A hun ka tih veleh kan che chhuak dawn alawm, tuna chet tut tut chu a rem rih lo. Engpawh nise vawiin chu ka chhuahsan leh dawn lo che, plan mumal takin kan siam ang." a han ti leh dap dap a.

Rsa erawh a thinrim hmel kher mai, Esi chu hmuh vat a, thah vat a duh a ni ngei ang. Room chhungah chuan a vei kual vut vut a, "Esi kan hmu tawh bawk a, Isaka pawh kan hmu thuai ang. A buaithlak ber chu Esi te chenna in hi khawilai nge ka hrelo hi a ni ber, mahse kha school ah khan a fate an kal tih chu a chiang phawt. Chuvang chuan a lungngaih thlak loh, hahchawl phawt rawh." tiin Dr. Manuna chuan a han hrilh leh a.

Rsa chuan rum tak hian Dr. Manuna chu a en a, a thaw ri hulh hulh mai. Dr. Manuna pawh chuan a lo en ve reng a, chutah Rsa chu a kal thut a. Room atanga chhuah pah chuan room bang chu a han hnek ri pawp a, kawngka chu a khar ri leh bur mai. Dr. Manuna chu a han thaw hak a, "Hna a awlsam chho dawn e." tiin a han phun leh sap a.

******************************************

Tlai lam a lo nih chuan Esi pawh chu a fanu nen chuan an inkai phei leh hnak hnak a, taxi stand bulah chuan an ding dun a. Chutia an din dun reng lai chu hmeichhe pakhat hi Esi bulah chuan a rawn ding ve hlawl mai, Esi chuan a han en chu mak a ti kher mai.

Chu nula chu Rempuii kha a lo ni reng mai, "I dam thin maw, Esi?" a rawn ti a. Esi chuan chhan mai ngaihna pawh a hre lo, a en deuh vung vung ringawt. A aw a han thian deuh kharh kharh a, "Ka..ka tha, ka tha alawm, nang zawk?" a ti bah deuh nuai mai.

REmpuii chuan zawi sap hian, "KA tha alawm, kha kha i fanu a mi?" tiin a lo zawt leh a. Esi chuan a fanu chu a en a, "Aw...Rosy a nih hi...kum 4 a ni ve tawh." tiin a lo chhang leh a. Rempuii chu a khi suk ringawt, an ngawi dun leh vang vang a. Esi bawk chuan, "Nizanah kan pa nen in inhmuh thu ka lo hria a." a han ti leh a.

Rempuii chuan a lu a lo bu nghauh nghauh va, "Nia...min thlah thlap alawm. A fel khawp mai, i vannei takzet." tiin a lo chhang a. Esi pawh chu a khi suk a, "Nia, kan inhmu leh hlawl chu a mak hle mai. Khawnge i kal dawn hrim hrim a?" tiin a han zawt leh a.

"KA duty dawn...taxi ka chang mek a nih hi."

"I night dawn nimaw?"

"Umm...min rawn ko deuh thut bawk sia."

An ngawi dun leh vang vang a, taxi pakhat chu a lo tlan a. Esi chuan Rempuii chu a nuih leh suk a, "Anih kan kal phawt ange." tiin a fanu nen chuan motor chhungah chuan an lut a. Rempuii pawh chuan, "Awle..tluang takin in thleng dawn nia." a lo ti ve bawk a.

Taxi chu a tlan ta a, side glass atang chuan Esi chuan Rempuii ding reng lai chu a en zui vawng vawng a. Rempuii pawh chuan a lo en ve reng bawk, engtia han awm tur nge, han thinrim khum vak tur nge, biak loh tawp nge, awmdan tur a hre mai lo a ni ber, an inhmu deuh thut bawk em a ni.

****************************************************

Tlai thim deuh thet thet ah chuan college bang, tlangval pahnih, Dika leh Fela te chu in fal tak pakhat, hlui rup mai leh lian angreng tak mai chu an hmuh chuan a khalhtu zawk Fela chu a ding a. In chu a en vang vang a, "Tinge i din ngawt a?" tiin Dika chuan a lo zawt a.

FEla chuan in chu a kawk a, "In rauh san tawh a ni hrim hrim, saw tala in a inkalh thlap alawm. Tah sawn kan spot zuai mai dawn mi, hmundang a vang emai?" a han ti a. Dika chuan a han en ve vang vang a, "A hran duh hmel e, a nelawm loh si." tiin a lo khi deuh suk.

Fela chu a han chek hlur a, "I va dawih e aw...hawh kal ang. Chhuk rawh, tah sawn spot ang." tiin scooty chu a dah tha a. An va kal ta a, chu in chu Rsa leh Dr. Manuna te chenna in a ni tih an hre der mai si lo. In hnung lamah chuan an phei a, a sen chi ngat chu an phawrh a.

An thli a, an indun ta tlak tlak mai. An titi nui nasa em em lehnghal a, chutia an titi lai chuan in sir lam tukverh a Rsa, a sazupui hmaikawr nen ngei mai a parda phen atanga a lo dak kur mai chu Dika chuan a hmu thut mai. A phu zawk a, "Ehe...saw enteh." tiin a kawk nghal.

Fela pawh chuan hnunglam chu a en ve nghal a, "Enge..khawiah maw?" a ti hu mai. Dika chuan ring tak hian, "Saw..in saw, tukverh ah sawn." a han ti leh vak a. Mahse Rsa chu a kal bo leh daih mai, FEla lah chuan a hmu hman lo chiah chiah a. A khi suk a, "Tumah an awm lo saw.." tiin a nui deuh huk mai.

Dika lah chuan thutak zet hian, "Tah sawn a lo dak alawm, a kal bo leh hman daih." a lo ti leh chiam chiam a. Fela chuan a han kuk lawlh a, "Hmela, i va kai awm ve a...tu chu maw i hmuh a?" tiin a vin hrep mai. Dika chuan a lu a tuai vut vut a, "Ihh..sazupui hmaikawr ang deuh mai hi a vuah a, tukverh ah sawn a rawn dak alawm." a han ti leh a.

Chutah Fela chu a nui ta huah huah mai, "Tlangval ve pui tawh si, wine shop pawh kal ngam lo khan tikhan min tihthaih tum ve khanglang suh." a lo ti leh daih mai. Dika chuan lungawi lo tak hian, "KA ruih vang a ni lo, ka hmu chiang lutuk tlat." a la ti tang tang a.

Fela chu a ner nang a, "I nep emai, va check chiang la ti nia." a lo ti leh hmuk a. Dika chu a ngaihdan a ni vak bik lo, "Chuti fakauva nep min ti a nih te chuan a huai zawk khan va check ta che." a lo ti ve hmak mai. Fela chu a khi suk a, "AWi awi awi....ava han nep thlak thin ve awww..." tih vawng vawng pah chuan a tho tual tual a.

Tukverh lam chu a va pan a, "Hey...tunge awm? Inchhungah khan awm in awm em?" tiin a kik vak vak a. Mahse tuman an chhang lo, a reh ruih mai a. Fela chuan a han kik leh vak vak a, "Khalai inchhunga ramhuai kha, ka thianpa Fela hi lo tihthaih tawh lo teh, a dawih si a, zanah a mu ngam lo palh ang." tiin a la fiamthu zui.

Dika chuan a lo melh rum kher mai, "Ava tul kher lo ve aww..." a ti nuah nuah a. Fela lah chu ala uan chhunzawm zel a, "I lo tihthaih leh vaih chuan zun a cheh a nimai." te a la ti ta deuh deuh va, a kik tluk tluk a, a khi vur vur bawk. Chutah tukverh chu a rawn keh ta thuai mai a, Fela chu a phu nasa kher mai.

Tukverh atang chuan Rsa chu a rawn chhuak a, hreipui hi a rawn keng chhuak bawk. Fela chu a tawlh hnung nghal a, mahse Rsa chuan a hrepui hriam lo lam zawk chuan a bekah chuan a chhu pawp mai a, Fela chu a thal nghal tawp mai. A lu a hai mum mum a, a lo kai tawh bawk nen a thil hmuh a piang chu a vir muai muai zel mai.

Dika chu a ding nghal a, “Hey tunge i nih?” a han ti vak ringawt a. Rsa chuan a chhang lo nasa mai, Fela chu vah sawn tumin leiah chuan a inhai phei a. Rsa chuan a keah lo manin a hnuk hnai leh a, a  hmaiah tak chuan a tlawh sak chawrh mai. Fela hnar chu a rawn thi nghal zawih zawih a, “Zawnga, ka thianpa kha thlah rawh.” tiin a awmhmun atang chuan Dika chuan a rawn vin ve vak vak a.

Rsa chuan a ngaipawimawh lo kher mai, Fela awmah chuan a han rap leh chawrh chawrh mai a. Dika chuan puih ngei a duh si, a ngam chiah bik si lo. Zu bur chu a la lawk a, ava tlan phei ve ta rawk mai a. Rsa chuan a hreipui chu a lek kang ta vu vu mai a, Fela luah tak chuan cheh a tum ta mai.

Mahse Dika chu a rawn thleng hman hlauh va, hnunglam atang chuan Rsa lu ah tak mai chuan zu bur chuan a rawn vaw pawp mai a, zu bur pawh chu a keh chuai mai. Rsa chu a pai khut khut khut a, mahse a tlu lova, a hreipui ken lai pawh chu a thlah eih lo bawk.

A lu chu a dawm ve vang vang a, chutah a rawn hawi let leh a. Dika chu a en ta ran mai, Dika chuan a hlau tak zet. Bottle keh hmawr zum chuan a tin a, “Lo kal hnai suh, a nih loh chuan ka that ang che.” a ti khur dar dar mai. Rsa chuan thinrim hmel tak hian a pan phei zel a, a hreipui chu a lek kang leh a.

Dika chu a tawlh hnung hret hret a, “Lo kal tawh suh ka tih chu..” tap tuau chuan a han ti a. Chutah Rsa chuan leia mu mek, Fela zawk chu a hrawkah tak chuan a chek ta pawp mai a, a lu chu a bung teuh ngei mai. A thi nghal bawk, Dika chuan a rap takzet. A tap pur mai a, Rsa chuan a rawn pan leh ta.

Dika hlau lutuk chu a tlanchhe ta ringawt mai a, mahse a tlanchhe rei lo kher mai. In a tlan pel chiah tih ah chuan motor pakhat chuan a rawn su palh hlauh mai. Dika chu a thal thuai a, mahse chuti lutukin a su na lo hlauh. Motor atang chuan Dr. Manuna chu a rawn chhuak a.

Dika chu a rawn tho leh a, “Ka pu...ka pu min tanpui rawh. Mi pakhatin min thah a tum, tah sawn...tah sawn a awm. Ka thianpa pawh a that, tah sawn a awm.” tiin in hnung lam chu a kawk a, a thaw hlawp hlawp mai. Dr. Manuna chuan zaidam tak hian, “Inbeng dai rawh, inbeng dai rawh...khawiah maw a awm?” tiin a lo zawt a.

Dika chuan a chil a lem dawk a, “Tah sawn..in hnunglamah sawn.” tiin a kawk leh a. Chutih lai chuan hreipui nen Rsa chu a rawn lang hlawl mai, Dr. Mauna’n Rsa a hmu chu a thinrim hmel kher mai. A thaw deuh hak a, “Enge a tangkaina Lalruatsang, in lo chhuahsan suh ka ti che kha.” a ti ta daih mai.

Dika chuan a hrethiam lo kher mai, “Ka..ka pu, i..i hria em ni?” a ti hu mai a. Dr. Manuna chuan Dika chu a rek thut a, “Va kal law law mai teh.” tih pah chuan Rsa bulah chuan ava nam phei dawrh a, a va inchhuih phei khut khut mai. Chutah Rsa chuan na em em hian a hreipui ken lai chuan a lo vai pawp mai a.

Dika hmai lehlam zawng chu a hek bawih mai a, a mitmu lehlam a rawn pawk chhuak nawlh bawk. Dr. Manuna kawr var mai tak maiah chuan ala rawn per zui a, a sen val ta kulh mai. Dika chu a thal tawp a, hmai hek huam chuan a let reng mai. A beng lehlam la chu tla lek lek hian a uai pur mai a, mahse ala thi mai lo.

A khur hlawk hlawk a, Rsa chuan a awmah tak a chek tlum leh thawih mai. Dika chu a che tawh eih lo, a thi ve ta. Rum tak hian Dr. Manuna chuan Rsa chu a melh run a, “A nazawngin mi that suh ka tih tawh che kha, enge thusawi hi i awih miah lova?” tiin a hau hrep mai.

Rsa chuan rum tak hian a melh let ve a, a thaw ri hrawk hrawk mai. Dr. Manuna chu a han thaw leh hak a, “He ka kamis hak lai hi cheng sing khat man a nih hi aw....tunah i ti hlu lo zo leh nghal vek tih i inhria em?” a han ti leh khur khur a. RSa thinrim chuan Dika ruang chu a chek nawn leh hrep mai, “Duhtawk rawh.” Dr. Manuna chuan a han ti vak a.

Rsa chuan thinrim hmel tak hian Dr. Manuna chu a han melh leh run a, “Pawi dang i lo khawih ang tih ka hlauh avangin ka kalh khum che a, tihian ilo chhuak leh tho amaw? Tualthah hi iva chak awm em em ve a?” a han ti leh hrep a. Rsa chuan a hreipui chu a hum nghet sauh sauh va, a thaw ri leh hruk hruk a.

Dr. Manuna chu a han maimitchhing vang vang a, “A tha e...inchhungah lut rawh, kha chahbi..” tih pah chuan chahbi chu a theh phei a, Rsa chuan a lo dawng chat a. Dr. Manuna bawk chuan, “Ruang hi ka lo buaipui ang, chuan rawn chhuak tawh hlek suh ang che.” a han ti leh khur khur a.

Rsa chuan leiah chuan hreipui chu a dah a, kal phei pah chuan Dr. Manuna chu a nek lui deuh sawk mai. Dr. Manuna lah chu a khi suk a, “Kal mai mai rawh....hna min siam tam zia hi hria la, thinrim ve khanglang lo mai teh.” a lo la ti zek zui. Rsa chu inchhungah chuan a lut a, kawngka chu a la khar na em em zui.

Dr. Manuna chu a han thaw leh hak a, “Huiham....nimin lawka ka lei kha a ni asin le, ka va ui em.” tiin a kawra thisen kai chu a en vawng vawng a. Dika ruang chu in hnunglamah chuan a hnuk phei a, Fela ruang chu ava hmu ve leh a. A chek tlawk tlawk a, “Ava han buaithlak, a lu a bung tep a nih saw...tul lo thei lutuk mai.” tih nuah nuah pah chuan ava pan a.

An ruang chu in bul deuh lawka kudam ah chuan a dah a, a kalh hnan hmak mai. A ding ngawi vang vang a, “Nangmah vanga min manchhuah vaih chuan ka dim dawn bik miah lo che ania, Ruatsang. Ka fapa angin en che mah ila, ka thu i awih loh chuan a pawi viau ang.” tiin a phun zawi sap a.

*************************************

Rosy chu roomah chuan Esi chuan home-work a tih pui mek a, an room dawhkan hmaah chuan Isaka chu thu in laptop a khawih ve mual mual bawk. An reh vang vang hnu chuan, “I thaw hah hi a chhuak leh ta miah lo tihna em ni?” Esi chuan a rawn ti chhuak deuh hlawl mai.

Isaka chu a lo khi suk a, “I rawn sawi takah chuan thawhah ka nei thin tih ka inhrechhuak leh chiah a lawm mawle.” a lo ti a. Esi pawh chu a khi suk a, “Amak em a, a reh tawp kha i vannei ka ti takzet.” a han ti leh a. Isaka pawh chuan a thinpui in lai chu lem leh sakin, “Nia...Pathian khawngaihna vang a ni e.” a lo ti leh mai a.

An ngawi leh vang vang a, “E, taka.. Isak, Dr. Manuna kha i hre ve em?” tiin a han zawt leh a. Isaka chu za lo tih hriat tak hian a khi suk a, “Hre dawn lawm ni, kha mi tenawm kha.... doctor pawh a ni tawh lo, 2012 kum khan a mualpho vak alawm.” tiin a lo chhang a.

“Engtin tak nge a mualpho va? Ka hre ve lo reng reng...a lehkhabu ziah a lar em avang khan ania ka hriat ni.”

“2012 kum laihawl vel khan, kha... Rsa rawn inlar leh hma deuh chiah khan a niin ka hria, a damlo zinga mi tleirawl pakhat a lo khawih a ni awm a, chu chu a mualpho hrep a, an ban hial alawm.”

“Chuan tunah eng hna nge a thawh?”

“Eng hna mah a thawh ka hre lo, a tei kual vel mai mai ni ber hian ka hria. Chuan car hlui ve tawh deuh mai hi a nei a, a leng kual reng ringawt mai a ni an tih kha.”

Esi chuan a lu a bu nghauh nghauh va, “Anih chu.” a ti zawi sap ringawt a. Isaka chuan a nupui chu ava melh a, “Tinge min zawh deuh teh thut a?” a han ti a. “Aaa..vawiinah ka hmu a.” tiin Esi chuan a lo chhang a. Isaka chu a ner deuh suk a, “I hmu maw?” a lo ti deuh hu mai.

“AW....mak ka tih deuh chu..Cindy nen khan ka hmu a.” tiin Esi chuan a lo chhang leh a. Hriatthiam loh hmel tak hian Isaka chuan, “Tu Cindy maw?” a lo ti hu mai. “Cindy chu maw...nizan hmasa a thi ta, Muantea bialnu kha ania. Ala naupang, kei ai pawhin a naupan ka ring.” tiin Esi chuan a lo chhang leh a.

Isaka chuan a han ngaihtuah vang vang a, “Ee...2012 kum a Rsa’n a beih te zinga mi, damchhuak ve tho kha em ni?” tiin a han zawt leh a. Esi chuan a lu lo bu nghatin, “Aw ni e, khanu kha mawle.” tiin a lo chhang leh a. Isaka chu a han thaw hak a, “Chu chu enge a mak vak na?” a ti deuh hmuk mai.

“Awww.... a mak em alawm. Dr. Manuna larna ber chu USAGI lehkhabu kha ania, Usagi chu Rsa hi a ni mai a. Rsa lak ata him ve tho ania Cindy kha, Dr. Manuna nena an inhre ta daih kha amak ka tia, inngaizawng an ang em em lehnghal.” Esi chuan a han ti nuah nuah a.

“An lo inngaizawng te pawh a niang chu mawle, enge a mak vak na?”

“Cindy’n a bialpa a sun zo chiah a, Dr. Manuna nen an inzui leh thei nghal mai kha amak alawm. Chubakah Dr. Manuna ber kher, ka ngaih an ti tha lo riau alawm.”

Isaka chu a khi suk a, “Dr. Manuna te chu a lerh eeeem alawm, a tlangval laia fak a hlawh thin tehreng nen. Hre pha chiah lo mah ila 1990 hun lai vel kha chuan doctor fak hlawh ber pawl a niang chu. Cindy pawh a lerh tihna a nimai, Dr. MAnuna chuan Rsa victim a lo nih ve tawh vang leh Rsa doctor a lo nih thin tawh thu vel a sawi anga, chu chu chhuanlamah hmangin a ngaizawng daih aniang chu mawle.” tiin a lo chhang leh a.

Esi chuan a chhang tawh lem lo, a khi suk ringawt. Rosy chuan a home-work chu a ti zova, Esi chuan a mut tir a. Ani pawh chu a mu ve nghal a, Isaka erawh ala meng reng thung. Laptop chu thutchilhin hna chu a thawh zawm reng a, dar 12 a pelh meuh chuan a mu ve ta a.

*******************************

TO BE CONTINUE