USAGI 3 : ANOTHER KILLING SPREE ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER - 5

 USAGI 3 : ANOTHER KILLING SPREE

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER - 5

***************************************

Dawr pakhat bulah hian scooty hi a rawn ding a, a khaltu Deborah-i chuan a side tha a. A phone a phawrh a, 'Ka thleng tawh e.' tiin Dr. Manuna chu a thawn a. REiloteah chuan Dr. Manuna chu a motor nen chuan a rawn kal a, Deborah-i dinna zawnah chuan a rawn ding a.

Deborah-i chu a han melh a, "Lo chuang rawh." a ti deuh hmuk a. Deborah-i chuan a lu a lo thing, "Ka scooty ka kalsan tawp phal lo, ka lo zui zawk ang che." tiin a lo hnial a. Mahse Dr. Manuna chuan, "Lock tawp la, tuman an la sawn lovang. Lo lut mai rawh, hun ka nei rei lo ania." a lo ti leh hmuk mai.

DEborah-i chu a ngawi vang vang a, a scooty chu lock-in Dr. MAnuna motor chhungah chuan a lut ve ta nge nge a. An tlan nghal vang vang a, "Khawiah nge min kal pui dawn?" tiin DEborah-i chuan a zawt a. Dr. Manuna chu a ngawi reng. Deborah-i chuan vin deuh tak hian, "Khawiah nge kan kal dawn ka tih chu, khawnge ka u chu?" tiin a han zawt leh a.

Dr. Manuna chu a han thaw deuh hak a, “I u chu i hmu duh em ni?” tiin a lo zawt let daih mai. Deborah-i chuan rum zet hian a melh a, “Ka hmuh duh vang alawm ka lo kal...khawnge a awm?” a ti vin leh hlur mai. NGeiawm tak hian Dr. Manuna chu a lo khi suk a, “Ka hruai mek dawn che a nih hi.” tiin a lo chhang a.

In pakhat hi an thleng a, motor atang chuan an pahnih chuan an chhuak dun a. Deborah-i chuan in chu a en vang vang mai, “Hei hi khawi lai nge, tu in nge ni a?” tiin a zawt hu mai. Dr. Manuna chu in lam pan chuan a phei a, “Min lo zui rawh...a chhungah lut ang.” a han ti a.

Deborah-i pawh chuan a zui lut ve a, a lo thim ruih mai. Light te chu Manuna chuan a han on eng hlawm a, a endan lah chu a en hian a eng(yellow) phut mai a, men a ti hrehawm lek lek zawk. Inchhung hrim hrim chu a balin a hnawk nuai mai a, mahse rin ai tak chuan a zim lem lo thung.

Room ah chuan Dr. Manuna chu a lut a, Deborah-i chuan a zui ve zel a. Chutah room chhunga Rsa, amah hnungchhawn zawnga lo thu run mai chu ava hmu ta. Deborah-i chuan ava pan hnai a, “Ka u...” a han ti tham tiak a. Rsa chu a rawn hawi kang ve zuk mai, muangchang chuan hnunglam chu ava hawi a.

A hmel erawh a lang lo, a hmui a tuam a, a sam a buk deuh chhup bawk nen a mit bak a lang thei meuh lo. Mahse Deborah-i chuan a hmel a hmuh a ngai lo, a u ngei a ni tih a hre nghal. Deborah-i mittui chu a rawn tla nghal zawih zawih a, muangchang chuan ava pan a.

Rsa pawh zawi muang chuan a rawn tho ve tual tual mai, a nau chu a en ve ngawih ngawih a. An inpan hnai zel a, inhma tawn chuan ding dunin an in en char char a. Deborah-i chuan a aw a han thian kharh kharh a, “Pu Manun, khawngaihin pawn lamah min lo nghak rawh. Ka u nen hian awmdun lawk ka duh...kan unauvin.” a han ti deuh kher a.

Dr. Manuna chu a khi suk a, “Awle awle..” tiin a chhuak ve mai bawk. Chutah rang lutukin Manuna chu room dangah a lut a, dawhkan hnuai pawhdawh chu hawngin damdawi hi a la chhuak a. A rawmawl phawrh lehin chu damdawi chu rawmawlah chuan a tat deuh nawk nawk mai, tichuan a dah tha leh a.

***************************************

Deborah-i chuan a u chu a kutah ava vawn sak a, “U...i tha em, i la dam animaw? Min hria tiraw?” hlau ru angreng tak chung si chuan a han zawt khur dar dar a. Rsa chuan a nau chu a en reng a, a samah te chuan a han chul sak ve thuak thuak a. DEborah-i chu a inhnit feih feih a, “Ka hmu leh che chu ka van lawm tak, ka ngaihtuah thei lutuk che asin.” tiin a kuah a, a tap ta hawm hawm mai.

Rsa chuan zawi muang chuan a kuah let ve a, Deborah-i chuan kawngka lam chu ava melh zeuh va. A u biangah chuan a vuan a, “U...enteh, hetah hian i him lo. Dr. Manuna sawn a bum che a ni, nang hi pawisa a neih theih nan a hmang tangkai che a ni. Helai hmun atang hian kan chhuah angai, saw doctor saw mi hlauhawm a ni.” a han ti lawm lawm a.

Rsa chuan ngawi rengin a nau thusawi chu a en reng ringawt a, “Chhuak ila, Dr. Manuna saw nikhawhrelo khawpin sawisa la, tichuan helai hmun atang hian ka la chhuak ang che. Kan pahnihin, kan unauvin kan cheng dun daih dawnnia. Hawh, min lo zui rawh.” tiin a kai a.

Kal pui a han tum ngawt a, mahse Rsa chu a ding tlat mai. Deborah-i chu a hawi let a, Rsa chuan a lu a lo thing a. Deborah-i chu a mangang kher mai, “Nilo..u..min ring rawh. Hepa hi mi tha a ni lo...ka bulah ngei pawh a sawi alawm..” a tih lai chuan kawngka a rawn ri rak a, Dr. Manuna chu a rawn lut a.

Deborah-i chuan a lo melh rum ngei mai, “A tawk e, Deborah...lo chhuak tawh rawh. Tunah chuan kan pahnihin kan titi ve tawh thung ang, RSa kha damdawi pek a hun tawh.” Dr. Manuna chuan a rawn ti a. Deborah-i chuan a hrethiam lo kher mai, “Damdawi a? Eng damdawi maw?” a lo ti hu mai.

Manuna chuan chhang lo chuan, “Ruatsang, mu rawh le...” tiin Rsa zawk chu a be daih mai. Rsa pawh chu thuawih tak chuan a mu ve bawk a, “Enge awmzia, engtin nge i tih dawn?” Deborah-i chuan a lo ti leh hu mai. Manuna chuan a ipte atang chuan syringe hi a pawrh chhuak a, “I u hi ka enkawl mek a nih hi, rilru lama damlohna a nei tih i hre ve reng a ni lawm ni?” a lo ti let zek mai.

Deborah-i chu a lungawi lo kher mai, “Eng damdawi nge i pek kha sawi rawh....ka u hi tih hlum i tum em ni?” vin lek lek chuan a han ti a. Dr. Manuna chuan Rsa chu a chiu va, “Ka enkawl mek, ka patient a nih hi. Hliam a tuar reng a, chuvang chuan nachhawkna ka pek a ngai alawm.” tiin a chhang leh a.

Rsa chu a zawi tial tial a, second 10 vel hnuah chuan a muhil der mai. Syringe chu khum bula blawhhlawh bawm ah chuan Dr. Manuna chuan a paih a, “Tikhan muhil rih rawh se, pawnah min rawn zui chhuak rawh.” tiin room atang chuan a chhuak leh nghal daih mai a, Deborah-i chuan a u muhil lai chu a en leh vang vang a, tichuan a zui chhuak ve ta a.

**********************************************

PAwnah chuan an inzui chhuak a, “Eng atan nge min duh ber a?” Deborah-i chuan a han ti vin leh hlur a. Dr. Manuna chu a han thaw hak a, “Rsa hian i nautet lai thlalak a kawl a, chu chu a en reng thin. Hmuh che a duh thin a, kum 6 chhung kha chu nangmah hmuh a chak thu bak a sawi ngai lo...ka sawi awmzia chu, i nautet lai thlalak hmangin min hrilh thin ka tihna  anih chu.” a han ti bah deuh nuai a.

Deborah-i chu a ngawi vung vung a, “Chuan engtin zel?” a lo ti hmuk mai. Manuna chu a khi suk a, “Aww... a duh chu ka tih hlawhtlin sak reng a nih hi, in inhmuh zawh chiah kha.” a lo ti ve leh a. Deborah-i chuan ngei hmel tak hian a en a, “Kha zawng kha maw ka lo kal chhan? Tikhan ka haw leh anga, i pawisa hmuh nan ka u chu i hmang chhunzawm zel dawn tihna em ni?” a ti vin leh hlur mai.

Manuna lah chuan ngaihpawimawh loh hmel tak hian, “Ni mai e, a bak tih tur vak a awm hleinem.” a lo ti sam et mai. Deborah-i chu a thinrim takzet, “Ka ngawih bo pui mai mai i ring em ni, ka u khi misual a ni lo. Nang zawk hi a ni misual chu, ka u i hmang tangkai mai mai chauh a ni.” a ti leh hrep a.

Chutah Dr. Manuna chu a nui ta huah huah mai, “Keimah hi...keimah hi maw misual? Tual ka that ve lo, i u Rsa a ni tualthattu zawk chu..” tiin a deuhsawh kher mai. Deborah-i thinrim lutuk chu a tap tuau tawh mai, “Ni e..misual zawk chu nang hi i ni. Ka u i bum a, i fuihpawrh mai mai a ni. KA report khawp ang che, police in an man khawp ang che.” tiin a kal hmak mai.

Dr, Manuna chuan ava umzui a, a manbet ta mai a. Deborah-i chuan a lo sual let ve nghal, mahse mipa tha nge nge a hneh ngang lo. Ring tak hian, “U....Ka u..min chhan rawh.” tiin a au vak vak a. Leiah chuan Dr. Manuna chuan a bawh tlu a, an inchai nasa mai.

“U...U min chhan rawh...” tiin Deborah-i chu a au vak vak a, mahse RSa chu mutduhna damdawi chak taka chiu a nih avang chuan a harh thei lo, mahse mak tak maiin a nau DEborah-i mangang aw erawh a hre thei tlat thung. A mumangah chuan DEborah-i chu amah tho hian manbetin thah a lo tum mek a, a inhmuh dan erawh kum 9 lek a nih laia a hmel chu a lo pu daih thung.

Dr. Manuna chuan a ipte atang chuan rawmawl chu a phawrh thei ta, Deborah-i hmuiah chuan a nam bet nghal a. Deborah-i chu a zawi tial tial a, reilote ah chuan a muhil ve nghal a. Manuna chu a hah angreng khawp mai, a han thaw deuh halh halh a. Deborah-i chu a en vang vang a, “Kal tir leh mai che ka tum rilruk nen, a taka ka han hmu meuh che chu i lo chhelo reuh bawk sia. Khawih lo che hian ka kal tir lovang che, a tul a nih leh ka hmeiah i t(r)ang khumkhua tawh anga a nimai.” tiin a la khi suk zui.

**********************************************

Rsa chuan mumang a nei leh ta, anu chu a hmu tlat mai. A nu chu lamlian reh takah hian lo dingin puan dum sin chung hian Rsa chu a en reng a. Anu chuan a rawn hui a, Rsa chu ava kal ta a. Muangchanga kal pah chuan a kut te chu a han en a, kum 9 mi lek kha a lo ni leh tawh. A va kal phei zel a, anu chuan a lo nui sen sen a.

Rsa chu anu hmaah tak chuan ava ding a, a han melh chho vang vang a. Anu chuan a lu ah chuan a lo chul sak a, Rsa pawh chu a nui ver ver mai. Chutah anu hnung atang chuan amah tho, a puitlin hnu, sazupui hmaikawr thisen kai hnuang nena a rawn lang thut chu a hmu ta mai a.

Rsa chu a mumang ram atang chuan a harh zawk mai, a thu chhuak hlawl mai a. A thaw hrawk hrawk a, a thawm a rin em avang chuan Dr. Manuna pawh chu a rawn lut ve nghal a. Rsa chu a tal buai nasa mai, "BAwiha..Bawiha, i tha em? Enge awmzia, tinge kha tia i awm?" tiin a hteih tawp chuan man beh a tum a.

Rsa pawh chu a tawp thut a, inchhung chu en kual in a hawi vual vual a. Zing a lo ni der tawh mai a, khua pawh a lo eng vek tawh. Dr. Manuna chuan zaidam tak hian, "I tha maw BAWiha? Engti zia nge khatia i awm vak mai le?" tiin a han zawt leh a. Rsa chu a thaw deuh huai a, muang chang chuan khumah chuan a mu thla leh riai riai a.

A thlan a tla bawth bawrh mai, "Mumang tha lo i nei a ni maw?" tih vawng vawng pah chuan Dr. Manuna chuan Rsa thlan chu a han hruk sak vel a. Rsa chu a thaw muang tial tial a, a maimitchhing leh ta riai riai mai. Dr. Manuna chuan a en reng a, Rsa chu a muhil ve leh mai a.

Dr. Manuna chu a tho va, a han zi mar deuh talh tlah a. Ham bui bui chung chuan, "VAwiin chu i nau khu engtiang chiah a duhawm nge a nih ka han fiah ange, min gnaidam mai dawn nia aw.. BAWiha.." tiin Rsa chu a zu melh a, a khu deuh suk a. Rsa erawh chu a hnar leh bawrh bawrh tawh, Dr. Manuna chuan room chu a chhuah san ta a.

***************************************************

Isaka pawh Office lamah chuan a buai mep mep khawp mai, a thianpa, a thawhpui Matlana chu a bulah chuan a rawn thu hnai a, "Nizan chu tualthahna engmah a thleng lo a ni maw?" a rawn ti a. Isaka chu a lo khi suk a, "Nia, a nih hmel.” tiin a lo chhang a.

Chutih lai chuan an bula mi, an thawhpui tho Sammy-a chuan, “Enteh u, mibo pahnih an awm a nih hi.” a rawn ti chhuak hlawl mai. Isaka chuan a han melh hu a, “Han chhiar chiang teh.” a lo ti vat a. Sammy-a chuan a chhiar a, “Lalrindika kum 20, s/o Zachhingpuia Chanmari, Ramhlun Road ami leh Vanlalfela kum 22, s/o Lalmuanawma Mission VEngthlang chu nimin zing dar 8-a college kal tura an chhuak chu tun thleng hian an la rawn haw lova, phone call pawh an la thei lo ve ve a, an chhungte ve ve in police hnenah an report a, tunah hian buaipui mek a ni.” a han ti nuah nuah a.

Isaka ngaih chu a tha lo leh nghal kher mai, “Khai aw, ava zialo ve.” a ti zawi sap a. Matlana lah chuan, “Aaa...tlangval an nia, an rui nawi anga, thiante inah an riak vel mai mai te hi a ni lo maww..” a lo ti sam et mai. “A ni thei dawn em ni? Phone call pawh an chhang lo an ti bawk sia, engemaw tak chu a awm ngei ang.” Sammy-a chuan a lo ti ve thung a.

Isaka erawh ala ngawi reng a, a inngaihtuah vung vung a. Matlana bawk chuan, “Tlangval ve meuh si, chutia han bo ngawt mai chu a mak awm. Ramhnuaiah an kal anga, kawng an bo te hi a ni mai lo maw?” a lo ti ve leh nuah nuah a. Sammy-a chu a khi suk a, “An kidnap ti dawn ila, kidnap tur chuan an lian mah mah tawh bawk sia.” fiamthu deuh reuh chuan a lo ti ve bawk a.

Matlana chuan Isaka chu ava melh a,”Enge maw i ngaihtuah vauh vauh ni, nangpui chu....tinge i lo thut ngawih reng a?” tiin ava nghawk deuh sawk a. Isaka chu za lo taka nui chung hian, “Eng nilove...tunlai thil thleng zozai mai hi a mak ka ti em a, ka lo inngaihtuah muk deuh alawm mawle.” tiin a chhang a.

**********************************************

DAwr pakhat bulah chuan motor pakhat hi a rawn ding a, a chhungah chuan Dr. Manuna leh Cindy chu an chuang a. Cindy chuan Manuna chu a han melh hru a, “Tinge kan din, enge awmzia?” a ti hu mai. Manuna chu a han thaw hak a, “DAwrah sawn thil ka va lei lawk..chuan engemaw surprise tur che ka nei a.” tiin a lo chhang a.

Cindy chuan hriatthiam loh hmel tak hian, “Eng a? Surprise a....engthil nge?” a lo ti leh hu mai a. Manuna chu a han khi deuh vur vur a, “Saw tah sawn min lo nghak rawh, ka lo lut ve nghal ang.” tiin dawr sira public toilet chu a kawk a. Cindy chu a ner deuh nang mai, “AWiiii ber kher chuan a....public toilet a nih saw...sawtianga han in surprise, ava thing tak.” tiin a phun nuah nuah mai.

Manuna chu a khi leh suk a, “Min lo va nghak mai mai teh, dawr ah sawn ka va kal phawt ang.” a lo ti leh a. Cindy chu a ngawi vang vang a, “I style hi a mak thei si, hmeichhe zunin lamah ka lut dawn sia, i lo lut ve tawp dawn tihna em ni?” tiin a han zawt leh phawt a.

Manuna chu a han hawi kual a, “Kan awmna lai hi mi an tam vak loh hi...min hmu lovang, ka plan ve laklawh tawh si a, lo va lut phawt mai teh....nuam i ti dawn lutuk.” tih pah chuan a tar a tar chuan a mit a han siai ve zuk a, “Nuam ka tih loh vaih.” tih pah chuan motor atang chuan a chhuak a.

Manuna chu a nui suk a, “Mawli..i hneawm tawh tlat.” a ti zawi sap mai. Cindy chu toilet chhungah chuan a lut a, mahse mi pakhat, lian deuh mai, raincoat dum bal tak mai ha, face mask vuah hian chhuat a lo nawt turh turh mai. Cindy chu a ding chat a, “AAa...ka pu, ka zung lawk duh a...khawngaihin min chhuahsan thei angem le?” polite tak chuan a han ti a.

Chupa pawh chuan a chhuat nawh lai chu a tawp nghal a, bucket khai chung chuan kawngka lam chu a pan ve mai bawk a. A zawn a rawn thlen chuan Cindy chuan nui sang hian, “Ka lawm e.” a han ti zawi deuh sap a. Mahse chupa chu a chhuak reng reng lo, kawngka chu chhunglam atang chuan a kalh ta hmak mai.

Cindy chuan mak ti tak hian, “Enge i tih dawn a? Eng thil nge tih i tum a?” tiin a zawt a, a ngaih a tha lo khawp mai. CHutah chupa chuan bucket chu chhuatah chuan a dah a, a rain coat ipte atang chuan sazupui hmaikawr chu a rawn phawrh chhuak a, a vuah ta mai a.

Cindy chu a meng phar nghal awn awn mai, a chhan chu chupa chu tunge a nih tih chiang takin a hria. A khur nghal dar dar a, “R..RS..” a ti zawi sap mai. Chutah Rsa chuan a chhuat nawhna chu lek kangin Cindy mak ti a lo ang phuau mai chu a ka chhungah tak chuan a va hawlh pawp mai a, Cindy tukhum vun chu rawn pawp chhuakin chhuatnawhna tiang hmawr chu a rawn lawr tlang zawk thei hial mai.

Cindy chuan chhuat nawhna vawnna lam, a fawng lam chu a hmuam tur a ni ber mai. Thisen a chik nghal zawr zawr a, Cindy chu a khur cher cher mai. Rsa chuan dim baksak lo chuan a phawi leh pawp a, Cindy ka atang chuan thisen a rawn baw chhuak nghal zawih zawih a.

A thingthi hnawk a, a hma takah chuan Rsa chu a va ding a. Rsa chu thei leh thei lo hian Cindy chuan a han melh tawk tawk a, mahse a daih rei lo. Cindy chu chhuatah chuan a tlu sawp hnawk a, a thi chiang kher mai. Rsa chuan kawnga chu ava hawng a, Dr. Manuna chu a rawn lut a.

Buara lian tak mai hi a rawn keng lut bawk, Cindy ruang chu buara ah chuan an khung dun a. Thisen zawng zawng te chu an tifai dun leh vek a, an intihfai zawh hnu chuan Rsa chuan a rain coat te chu a hlip a. Tichuan Cindy ruang chu a buara chawp chuan a pu nawlh a, toilet chu an chhuahsan dun a.

Car hnunglam, trunk ah chuan Cindy ruang chu an dah a. Chak takin an tlan pui a, kawng reh lai tak an thlen chuan an ding a. KAwng sir kham sang em em maiah chuan Cindy ruang chu Rsa chuan a buara chawp chuan a paih thla a, Cindy chu a tlak pah chuan a insawh nasa khawp mai a, a ruh tliak ri pawh Manuna chuan a hre thei zuai zuai hial mai.

Car chhungah chuan an lut leh a, Manuna chu a han ngawi vang vang a. A thaw deuh hak a, “Tunah chuan BAWiha, i duh ang ngeiin Estheri chu kan hmu thei tawh ang. Chumi zawhah a pasal Isaka, chuan abak chu pawisa zawn a ni leh deuh mai.” tiin a khi suk a.

************************************************

Esi chuan a fanu chu a nghak leh mek a, a thiannu Tepuii erawh a lo kal lo thung. A call a, a la thei bawk si lova, message a hnutchhiah teuh va, mahse a seen thei chuang reng reng lo mai. Mahse a damlo emaw, a buai a nih ringin ngaihthatlohna em em pawh a nei hran lo.

A phone chu a rawn ri thut a, a han en chuan number hriat loh atangin a ni. Phone chu pick up in, “Hello, tunge aw?” a han ti a. Phone ami chu mipa niin, “Hello Esther, i dam thin maw?” a rawn ti thum bul bul mai. Esi chuan a hrethiam lo kher mai a, “Tunge ni?” tiin a han zawt leh a.

Phone ami chuan, “Tunge ka nih tih lam a pawimawh rih lo, Esi. Hna i nei, ka thusawi i zawm lo a nih chuan mi nunna in a tuar dawn ania, chu chu ka lo hrilh lawk phawt ang che.” a rawn ti ta mai a. Esi chu a ding zawk mai, “Tunge i nih a, i fiamthu em ni?” a han ti vin deuh hlur a.

“Ka fiamthu lo, nang hi tunah hian ka be duh che a ni. Hmaichhanah ngei, ka mamawh che. Sawi dun tur kan nei, ka thu i awi dawn em?” phone ami chuan a rawn ti leh khur khur mai. Esi chuan a hlau rilru angreng khawp mai, “I number hi police ka thawn nghal dawn ania, tunge i nih sawi vat rawh.” Esi chuan a han ti leh a.

Mahse phone ami chuan a lo hlau lo khawp mai, “I awmna kha ka hria, i fanu te school ah i awm. Chuan tunah khan i ding mek, ka hmu vek thei che.” a rawn ti leh ta mai a. Esi chu a hawi kual nghal vak vak a, “Hawi kual vak vak suh, min hmu thei chuang lovang.” phone ami bawk chuan a rawn ti leh a.

Esi chu a han thaw halh halh a, “Enge i duh sawi rawh.” a ti tham tiak a. Phone ami chu a rawn nui deuh suk a, “Location ka hrilh che ang a, tah chuan lo kal ang che. Tunah ka duh ania, min hnial hlek suh.” a rawn ti leh a. Esi chu a ngawi vang vang a, “Ka fanu ka nghak mek a nih hi, khawiah mah ka kal sawn thei lo.” tiin a chhang a.

“Chu chu ka buaina a ni lo, i lo kal ngei angai.” phone ami chuan a rawn ti leh a. Esi chu a mangang khawp mai, “Anih leh lo kal lo ta ila...” a han ti ve leh deuh kher a. Phone ami chu a ngawi vung vung a, “I whatsapp message en rawh.” a rawn ti leh a. Esi chuan message chu a en a, phone-a a biak mek number chuan message hi a lo thawn a.

A han en a, Tepuii te nufa, nikhawhrelo niawm taka lo let reng thlalak chu a hmu ta. A meng phawk nghal hru a, “Hey Hmela, tu phiangsen nge i nih a? KA thiannu kha chhuah vat rawh...tunge i nih, enge i duh?” a ti nghal chiam chiam mai. Phone ami lah chu a nui huah huah a, “Insum rawh, Esi...awmzia a nei lo. KA duh phawt chuan hemite nufa hi ka that thei asin, chuvang chuan inla pawr vak lo khan ka thusawi chu zawm mai rawh.” a rawn ti leh ta khur khur mai.

Esi chu a hawi kual a, a maimitchhing vang vang a. Thawk a han la te te a, “Enge i duh, enge ti tura min duh chu ni a?” tiin a zawt a. Phone ami chu a ngawi leh deuh vung vung a, “I fanu kha chu midang buaipui tur zawng mai rawh, nang chuan hna i nei. School gate thlanga motor dum kha i hmu em?” a rawn ti a.

Esi chuan ava en a, “Aw hmu e.” tiin a chhang a. “Taxi phar la, motor dum saw zui rawh i ti tawp dawnnia. Tichuan min zui zel la, abak chu kan inhrilh leh dawnnia. Police hnena report emaw, min bum a, phakar chhuah i tum a nih vaih chuan i thiannu Tepuii te nufa hi an thi nghal ang.” tiin phone chu a dah hmak mai.

Esi chu a mangang takzet, chupa thusawi chu a zawm lo a nih chuan TEpuii te nufa, pawisawilo pahnih in an nunna an chan dawn bawk si. Isaka chu a text ta ringawt a, “Hei ka buai thut a, a chhan erawh ka la sawi thei lo. Khawngaihin Rosy hi min lo lam sak mai, ka hman dawn lo tlat.” tiin message a hnutchhiah ta ringawt mai a.

Taxi chu a phar a, motor dum chu zui turin a ti a. Taxi-a a luh rual rual chuan motor dum pawh chu a tlan nghal a, an zui ta zel a. Esi rilru chu a hah kher mai, a thlan a tla zawih zawih thei hial a. A phone chu la chhuak lehin Tepuii te nufa thlalak chu a en leh a, nikhawhrelova mu mai nilovin phuar hlawm an ni bawk.

*********************************************

Isaka chhun chawl zo chu office lam a pan chho leh mek a, a phone chu a check pah bawk a. Chutah Esi message chu a hmu ta, a han chhiar chu mak a ti angreng khawp mai. A call nghal a, mahse Esi chuan a la thei reng reng lo mai. A han chek deuh hlur a, “Enge maw a hriat le....henu hi...a va ti buaithlak tak e aw..” a ti vawng vawng mai.

Vawi 5 lai a call hnu pawh chuan ala la thei chuang lo, a ngaih chu a tha vak lo kher mai. A thaw hak a, “Kan ban hun pawh ala ni si lova, ava han ti buaithlak tak.” ti a phun nuah nuah chung chuan office lamah chuan a chho va. An pu bulah chuan chhuanlam a siam a, an pu pawh chuan kal chu a lo remti hlauh mai.

A fanu Rosy te school chu ava thleng a, an lo bang vel chiah chiah a.  Rosy pawh chuan apa chu a hmu a, a rawn kuah nghal. Isaka chuan a pawm a, “Apa tinge nangman min rawn hruai daih a, khawnge anu hi a awm a?” tiin Rosy chuan a lo zawt a.

Isaka chu nui lui sakin, “Anu kha a buai deuh va, chuvang chuan keimah ka rawn kal ta mai a ni.” tiin a chhang a. Chutih lai chuan nu pakhat hi a rawn kal a, “Khaa...Rosy pa chu in va buai hmel ve. Estheri lah kha phone khan mi a bia a, a hawi ang hruk hruk a, a kal daih mai sia.” a rawn ti a.

Isaka beng a verh zar mai, “Phone a bia a? Chuan a hawi kual vak vak bawk maw?” tiin a han zawt deuh hu a. Chunu lah chuan, “Aww....in buai hmel ka lo ti lutuk a. Kha..nangmah zawkin i rawn lam a ngai hial ania.” a lo ti leh zuah zuah mai. Isaka ngaih chu a tha vak lo, “Khawilam zawngin nge a kal?” tiin a zawt leh a.

“Helam zawng hian an tlan, taxi ah khan a chuang a..” a lo ti leh a. Isaka ngaih chu a tha ta hauh lo, a chhan pawh Esi chu an in panna lo lam, a opposite lama a tlan vang a ni ngei ang. Rang takin a fanu Rosy chu motor lam pan chuan a pawm phei a, an in panna lam nilo, a let zawng chuan a tlan ve ta nghal a.

*****************************************

Esi leh taxi driver chuan motor dum chu an umzui zel a, an kalna hmun chu a mak tial tial mai. Esi chu a han hawi kual a, chulai kawng velah chuan ala kal ngai hauh lo. In pakhat lo ding chu a hmu a, compound chhungah chuan motor dum chu a kawi lut ta zeuh mai.

Esi chuan driver darah chuan a beng thak thak a, “Tah khan..tah khan ka lo chhuk ang.” a ti a, taxi pawh chu a ding ta a. Chuan man te a pek fel hnu chuan Esi chu a chhuk a, in lam chu ava pan ve a. Mahse motor dum chu a lo awm leh tawh miah lo, a phone a rawn ri leh nghal a.

“I ti tha e, tunah chuan inchhung ah rawn lut rawh. I phone erawh switch off hmak ang che, engtin mah ka ti na dawn lo che, biak duhna che ka nei mai chauh a ni.” phone ami chuan a rawn ti leh a. Esi chuan thinrim deuh tak hian, “Khawnge Tepuii te nufa an awm?” a han ti deuh hlur a.

“Hmanhmawh suh....ka duh ka hmuh ve hma chu ka chhuah dawn hrih lo.”

“Engthil nge i duh chu ni a?”

“I aw key kha san vak duh suh aw....engpawh nise, inchhungah khan lo lut phawt mai teh.”

Esi chu a han thaw deuh halh halh a, “Min ti na dawn lo tak tak maw?” tiin a han zawt leh a. Phone ami chu a rawn nui ri huk a, “Aw tehreng mai, ka tina dawn lo che. Lo lut la, keipawn ka hmel ka lo tilang ang.” tiin a rawn chhang leh a. Hreh tak chung chuan Esi chu inchhungah chuan a lut a, chu in chu Rsa leh Manuna te chenna in tho kha a ni.

********************************************************

TO BE CONTINUE