USAGI 3 : ANOTHER KILLING SPREE ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER - 1

 USAGI 3 : ANOTHER KILLING SPREE

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER - 1

*********************************

[2018]

Hmeichhe pakhat hi thlanmual lam pan chuan a kal phei mek a, a dum vek hian a inchei a. Thlanmual chu a reh vung vung kher mai, khua a tha lem lo em em bawk a, khawlai pawh a hnawng chup mai. Chu hmeichhia chuan thlan pakhat hi ava thleng a, a ding chat a. Thlan chu a en vang vang a, thlan lungah chuan Lalringliana, kum 60 tih hi a lo inziak a.

Chu hmeichhia chu Esther Lalnunmawii niin Lalringliana fanu a ni, Esi chuan apa thlan hma takah chuan pangpar mawi tak mai hi a dah a, a mittui a rawn tla a. A hru zeuh va, "Tun thleng hian ka la ring thei lo a ni, Pa...kan khua a har takzet, kan ngai lutuk che." a han ti zawi deuh sap a.

Thlan hmaah chuan a thingthi a, thlan lung chu kuah in a tap zawih zawih mai. Minute 2 vel hnuah chuan Esi chu a tap bang ve ta a, a mittui te chu hru hulin a ding a. Apa thlan chu a en leh vang vang a, "Mangtha le, ka pa." a ti tham tiak a, tichuan a kalsan ta a.

Kawngpui a han thleng a, motor dum lian leh nalh zet mai hi a lo ding a. A bulah chuan Isaka a lo ding ve bawk, motor atang chuan hmeichhe naupang pakhat, kum 4 mi vel hi a rawn chhuak a. Esi a hmuh veleh chuan ava pan a, "Anu..." tiin a va tlan phei a.

Esi chuan a lo pawm a, "Ka lo let leh tawh aw...bawihte, kan haw thei tawh e." tiin a biangah chuan a lo fawp a. Isaka chu a han melh run a, "Lo kal ve ta che....tinge i lo kal duh loh ziah a?" tiin a han melh deuh khur a. Isaka chu a han thaw hak a, "I tap lai hmel hi ka hmu duh tawh lo alawm." tiin a lo chhang a.

Esi chuan a fanu bulah chuan, "Bawihte, motorah lo va lut rawh le, kan lo lut ve vat ang." tiin a hrilh a, a fanu Rosy pawh chu thuawih tak chuan motor chhungah chuan a lut ve nghal mai bawk. Isaka chu ava pan a, "Rosy pawh ka hruai i phal bawk si lo, kum tinin i ti ziah mai." a han ti leh bul bul a.

Isaka chu a nui suk a, "A nu tap lai hmel a hmuh reng te chuan ka hau che amaw a ti dawn asin, kan fanu hmuh ah pawh ka duh lo alawm. Chubakah i tah lah hian a chhuak over thei sia, tah i ti chhuak ve vek zel alawm." tiin a han fiamthu pah zauh va.

Esi pawh chu a khi ve suk mai, "Hawh teh, i haw teh ang. Haw pahin chawhmeh chu kan lei haw mai dawn nia, a tlai dawn tlat." Isaka bawk chuan a han ti leh a, an pahnih chuan motorah chuan inzui lutin an tlan haw ta a. Isaka leh Esi te hi kum 4 kal ta khan an innei tawh a, a awmzia chu Rsa a bo leh hmak hnu atang khan kum 6 a liam leh tawh tihna a nih chu.

Isaka leh Esi te hi an indang nghal bawk a, Esi nu chu an awmpui ve nghal bawk a ni. Kum 6 lai liam tawh in hmalam pan chu tum ve hle thin mahse Esi chuan Rsa chu a theihnghilh thei hauh lo, apa a thahsak tih a hriat tirh phei kha chuan darkar 10 chhung chu nikhawhrelovin a awm nghe nghe a ni.

**************************************

Zan dar 9 vel a ni a, zan rei tak la ni lo mahse Buleng khua erawh kalkawng vel chu a reh hle a, ruah a tla cherh cherh reng bawk. Dawr pawh a inkhar deuh vek tawh a, khawlaia kal pawh an vang khawp mai, khua a chhiat deuh vang pawh a ni mahna. Khua lah chu a vawt reuh phian lehnghal a, thli a thaw leh vuk vuk thin bawk.

In pakhat bulah hian motor hi a rawn ding a, passenger seat lam zawk atang chuan pa lian pui mai hi a rawn chhuak a. In chu a en vang vang a, driver seat lam atang chuan Dr. Manuna chu a rawn chhuak ve bawk a. Chupa bulah chuan ava ding a, "Bawiha, hei hi in in ngei kha a nih hi." tiin a kawk a.

Chu palian tak mai chu tudang nilovin kum 6 chhung lai mai a chin hriat lohva bo ta, tualthattu Rsa ngei kha a ni. Rsa chuan in chu a han en leh vang vang a, "Kum tam tak a liam tawh, in in kha thiah sawm vek a ni a. Helai ram hi mi pakhatin a lei a, tichuan tihian a sa tha leh a ni." Dr. Manuna bawk chuan a han ti leh a.

Rsa chu a ding ngawi reng ringawt, "He in hi i ta a ni, Bawiha...i ta vek a ni. Tuman in dang an rawn sa tur a ni lo, helai hmun hi chu i ta a ni." tiin Dr. Manuna bawk chuan a han ti leh a. Rsa chu a thinrim hmel kher mai, a rum deuh nghut nghut a. Dr. Manuna chuan motor chhunga polythene dum chu ava la a, Rsa chu a pe a.

Rsa chuan a lo la a, a chhunga mi chu a la chhuak a. Sazupui hmaikawr thar, lehkhakhawng leh buara atanga siamchawp hi a lo ni. Rsa chuan muang chang chuan a vuah a, in chu a melh leh ta run mai. Dr. Manuna chuan sa chan chem lian zet mai hi a pe leh a, a hriam hmel em em mai lehnghal.

A tle vur mai a, Rsa chuan a lo ban vat a. Dr. Manuna chu a nui suk a, "Va that rawh....a chhungah sawn mi pakhat bak a awm lo." a han ti leh a. Rsa chuan a sa chan chem chu a hum nghet sauh sauh va, tichuan in lam chu ava pan ta chhur chhur mai le. Dr. Manuna chu motor chhungah chuan a lut a, Rsa in lam pana a kal mek chu nui var var chung chuan a en reng a.

A han thaw deuh hak a, “Engkim....ka thil lo chan tawh zawng zawngte kha...engkim ka nei let leh vek ang. Rsa hi ka hmang tangkai dawn a ni tawp mai, phuba chu ka la khawp ang. Ka tawp san dawn lo, ka dam chhung chuan ka chhunzawm reng ang.” tiin ama hriat tham lek chuan a phun nuah nuah a.

*******************************************

Inchhungah chuan in neitupa, Aizawl sumdawng mi hausa, kum 48 vela upa, tlangval senior Mazuala chuan TV a lo en mek a. Amah chauhvin a awm hauh lo, a thianpa Lura nen an awm mek a ni. Zu an in dun a, inkhel endunin an tang dun kher mai. An thawm pawh ana dun viau bawk, zu chu an in pah zeuh zeuh bawk a.

An bengchheng dun khawp mai, an t(r)an a la in ang lo zui bawk nen. An han inhnial leh vak vak thul, an tawngkam lah chu a mawi lo angreng viau lehnghal a. An kai dun tawh khawp mai, TV sound lah chu an ti ring em em mai lehnghal a. Goal a luh apiang lah chuan an indeuhsawh vak vak a, an nui ring dun thei kher mai.

Sawi tawh ang khan Rsa te in awmna hi a fal angreng viau va, Buleng khaw tawn tirh deuhva awm a nih avangin thenawm hnai pawh an awm meuh lo a ni. Mazuala hi officer eiru thinte zinga mi a ni a, a lerh em avang leh tlangval a kham thlawt loh vang nge ni, upa in hausa tawh viau mahse nupui neih a tum reng reng lo mai.

Kawngka hnunglam ri deuh dawt chu Lura zawk chuan a hre pha tlat mai, "Lawk...U Zual, tizawi lawk teh." a han ti a. Mazuala lah chuan lo hre ve hek lo, "Enge...thildang lo ngaihtuah suh...ka en tui ania." a lo ti vin hlur mai. Lura chuan ring deuh tak hian, "Thawm ka hria alawm mawle, tizawi lawk teh." a han ti ve hlur a.

Mazuala pawh chuan a ti zawi a, an han ngawi dun vang vang a. Mahse thawm engmah hriat tur a awm lo, "Chu engmah a nih loh chu...enge maw i hriat le?" Mazuala chuan a han ti leh hlur a. Thutak zet hian Lura chuan, "Choka lamah sawn thawm ka hria a ni." a lo ti leh a.

Chutih lai tak chuan choka lam atang bawk chuan thutthleng nawr ri an hre leh ta tlat mai, "Chu i hria em?" Lura chuan a han ti lehnghal a. MAzuala chu a thaw hak a, "Ka va en dawn mi?" tiin thawh a tum a. MAhse Lura zawk chu a tho va, "Keiman ka va en ange." tiin a kal phei a.

Choka chu ava thleng a, kawngka lo inhawng huau a hmuh chuan a ngaih a tha lo kher mai. Ring deuh tak hian, "U Zual, kawngka hnung lam hi i hawng sa em ni?" a han ti lauh lauh va. Mazuala chuan en miah lo hian, "Kalh chu ka kalh lova mahse ka khar phui thlap alawm, inhawng sa in ka dah lo." tiin a lo chhang a.

Lura pawh chu a thaw deuh hak a, "Thli a tam ve em bawk a ni zanin chu, haw peih awm tawh loh kher mai." tih nuah nuah pah chuan kawngka chu a khar a, a kalh thlap a. A let leh tur chiah chu fridge phen atang chuan Rsa chu a rawn lang thut mai, Lura chu a phu nasa takzet.

Thawm a chhuah hma hma chuan Rsa chuan a sa chan chem ken lai chuan Lura lu ah chuan a fik hmawk mai, a lu bung chu chhuatah chuan a lir phei a. Lura taksa dang zawng chu a khur cher cher a, a thingthi hnawk mai. Thisen chu a chik hian a chik puat puat mai a, a tlu tur chuan thutthleng chu a vai tlu tel a.

Thawm a rin em avang chuan vin zet hian Mazuala chuan, "Lura...i va kai awm thin ve a....i thawm ava na ve? Enge i tih tlak a?" tiin en miah lo chuan a lo vin leh hrep mai. Mahse Lura chuan a rawn chhan let tak mai siloh avang chuan Mazuala chuan mak a ti deuh va, "Lura...enge i tih, i chatthla ami?" a han ti vin leh tuar a.

Mahse Lura chu ala reh vung vung mai si, a ngaih chu a tha ta bik lo. A tho chhuak a, choka lam chu muangchang chuan ava pan a. A thianpa chu a ko pah reng bawk a, mahse chhanletna ala dawng chuang lo. A hlauthawng ve ta deuh va, "Lura, min tihthaih i tum a nih vaih chuan i chak lo khawp ang." a han ti tun tun a.

Mahse ala reh em em mai bawk si, choka chu ava thleng ta. BAnga thisen perna hnu lo awm nual mai a hmuh chuan a hlau zual kher mai, a thlan fim a rawn tla nghal bawrh bawrh mai a. Choka ah chuan khur dar dar chung chuan a lut a, dawhkan bula Lura ruang lo let reng mai chu a hmu ta.

Lu a lo la nei lo zui nen, a hlau kher mai. A t(r)e thawt a, a tawlh hnung nghal a. A khur zawih zawih mai, "Nilo....eng..enge awmzia?" tiin a hawi a hu mai a. Tlanchhiat tuma lehlam a hawi chu fridge bulah bawk chuan Rsa chu a lo ding leh run tawh mai, Mazuala chu a ding chat a.

Rsa chu a en vung vung a, "Nilo...a..a ni thei lo. Ruat...Ruatsang.." a ti bah nuai mai. RSa lah chuan a chem chu a rawn lek kang a, a rawn pan ta mai. MAzuala hlau lutuk chu kawngka lamah chuan tlanchhiat a tum a, mahse Lura thisen, chhuata lo baw nuaih mai chu a rap pial ta hlauh mai.

A tawlh thlu ta a, a tukhum a vaw chawrh lehnghal. A lu chu a hai muai muai mai a, a khawhmuh pawh a vir mup mup mai. Rsa chuan a rawn pan hnai a, dim lo tak chuan a samah chuan rawn tham a. A hnuk ta mai a, Mazuala chu a tal nasa mai. DAwhkana bakcheh te lo awm chu a ban hman hlauh va, Rsa malah chuan a vit tlum thawih mai.

Rsa pawh chuan na a ti ve ngang a niang, MAzuala chu a thlah a. Bakcheh chu a malah chuan a lo bur va mai, Rsa chu a thingthi hnawk mai a. Chu chu remchangah la in MAzuala pawh a tho nghal a, inchung lamah chuan a kal pai chho khut khut a, a lu chu a la hai deuh bawk.

Roomah a tlan lut a, a inkalh khum nghal. A indap nghal a, mahse phone chu inhnuai sitting roomah a kalsan daih tih a hrechhuak lenghal a. A mangang takzet, a tap pur tawh mai a. Rsa lah chuan awlsam takin a mala bakcheh chu a pawt phawi a, a t(r)e ve deuh thawt mai.

Tichuan inchung lam chu a pan chho ve ta, Rsa rawn pen chho ri thlup thlup mai chu Mazuala chuan a lo hre pha reng a, a hlau kher mai. Rsa chu a rawn thleng chho ta, kawngka chu hawn mai a han tum a. Mahse chhung lam atanga MAzuala'n a kalh avang chuan a hawng thei mai bik lo.

A han chhum vak vak a, a tlawh vak vak bawk. Reilo te hnuah chuan a tlawh hawng thei ta mai a, mahse room chhungah chuan tumah an awm lo. Rsa pawh chuan mak a ti angreng kher mai, a hawi kual vak vak a. Mahse tumah a hmu lo, khum hnuai te chu a han bih a.

Pawn verandah te chu a han enkual bawk a, mahse tumah a hmu chuang lo. Wardrobe chu ava en leh a, a chhungah chuan MAzuala chu a awm ngei a ring tlat. A chem chu hum nghet sauh sauhvin a va pan leh ta chhut chhut mai a, tukverh atanga thla eng rawn lut tih loh chu eng dang vak a awm lo.

Rsa chuan wardrobe kawngka chu hawn tumin a han ban a, mahse a rawn inhawng thut mai. Mazuala chu a chhungah chuan a lo awm tak tak chu niin, Rsa darah tak mai chuan pen hian a rawn chhun tlum thawih mai. RSa na ti lutuk chu a tawlh hnung deuh dawrh a, a chem chu thlauhvin khum hnuaiah chuan a tleng lut daih mai.

MAzuala chu ring taka au chung chuan Rsa chu a rawn zuan lehnghal a, a bawh thlu ve rawk mai. Tichuan a theih tawp chuan a han hnek siah siah a, mahse duh angin a khawih na thei lo. Rsa chuan a lehthal nghal a, chhuatah chuan a rek bet ta mai a. MAzuala chu a che tha thei ta reng reng lo mai, a thaw tawk tawk a.

Mahse Rsa dara pen lo la bur va mai chu a hmu a, thei leh thei lo hian a han ban tawk tawk a. Pen chu a hmet tlum thuk leh zual a, RSa na ti lutuk chuan a thlah leh a. A thu hawk a, pen chu muangchang chuan pawh phawi a han tum a, mahse a thei mai bik lo. Mazuala chu hrawk dawmin a khuh uak tuar tuar a, a chau tawh takzet.

Rsa chuan khum hnuaia a chem hmawr lo lawr chu a hmu fuh ta tlat mai, rang lutukin ava ban a. Mazuala pawh a lo tho ve chiah a, thing atanga siam thutthleng, khum bul ami chu a la a. Rsa chu vuak a tum a, mahse RSa chuan a chem chuan a lo vai hman chiah chiah a.

Rsa darah bawk chuan a vaw fuh a, thutthleng pawh chu a bung rum mai. MAhse Rsa pawhin a ban a lo vai ve chiah chiah avang chuan Mazuala malah chuan a sat thawi a, a mal vun a thler duai mai. A tlu hnawk a, Rsa pawh a dara vuak a nih ve tho avang chuan a thingthi ve leh hnawk bawk a.

Mazuala chu room kawngkhar lam pan chuan a bawkvak phei tawk tawk a, a ke atang chuan thisen a chhuak zawih zawih bawk. A tap pur mai a, "Min pui ru....khawngaih takin min pui ru." tiin a au vak vak a. Rsa chu a rawn tho leh a, a kut te chu a han elh ri ang tuar tuar a.

A sa chan chem chu a chhar leh a, MAzuala chu kawngka atang chuan a lo bawkvak chhuak mek a. A bawhvahna chin hriat tak hian thisen pawh a lo kawi zun mai, Rsa chu room atang chuan a chhuak ve a. Step ah chuan Mazuala chu a lo bawkvak thla mek a, Rsa chuan a zui zel a.

THei leh thei lo hian Mazuala chuan hnunglam a han hawi a, Rsa lo ding run a hmuh chuan a hlau kher mai. A phu zuk a, step atang chuan a la lum thla zui. Inhnuai chhuatah chuan a bawk thlawp mai a, a mal vun thler lah chu a lang chiang em em a, thisen chu a baw chhuak zawih zawih reng bawk.

Rsa lah chu muang chang chuan a rawn chhuk thla ve zel a, MAzuala chu a mangang tawh takzet. Kawngka pui lam pan chuan a bawkvak phei zel a, "Min pui hram ru..khawngaihin min pui ru." tiin a au vak vak a, mahse tanpuitu erawh tumah an rawn kal der mai si lo.

Rsa chuan a rawn pan hnai zel a, chutah Mazuala ke hliam lo lam zawk chu a en ran ran a,  a ke rek ah tak mai chuan a sat leh siah mai. A sat chhum hmawk mai a, thisen chu a rawn chik nghal tuar tuar mai. Ring mang kheng hian Mazuala chu a au vak vak mai a, na a ti kher mai.

A khur ngar ngar a, mahse ala bawkvak phei zel tho va. Rsa chuan muangchang chuan a zui zel a,"Min that suh...khawngaihin...khawngaih takin." tiin Mazuala chu a tap hluam hluam tawh mai. Rsa chuan MAzuala mak vun thler huang mai chu a han en leh vang vang a, a chem chu a lek kang leh ta.

Mazuala chuan a hlau tawh takzet, "Nilo...ti tawh suh. Ka duh tawh lo, khawngaihin.." tiin a ngen lawm lawm a. Mahse Rsa chuan a ngaipawimawh vak lo, Mazuala khup chinah tak mai chuan a sat leh ta siah siah mai a. A vawi khatnaah chuan a la bung mai lo lehnghal, MAzuala chu t(r)e ring tak a ni.

Rsa chuan vawi 4 vel chu a han sat nawn leh sawk sawk a, a bung leh ta hmawk mai. Thisen chu a rawn baw chhuak hawk hawk a, inchhung chu thisen hlirin a kawi nuai tawh mai. Thisen a chhuah hnem tawh em avang chuan MAzuala pawh chu a chau tawk takzet, a thaw tawk tawk tawh hi a ni ber mai.

Mahse thei leh thei lo hian a ke pahnih bung tawh chung pawh chuan kawngka lam pan chuan a bawkvak phei zel a. Chutah kawngka chu a rawn inkik ta karh karh mai, MAzuala pawh chu a rawn hawi chhuak leh tawk tawk a. A aw neih zawng zawng chuan, "Min pui rawh...khawngaihin, min pui rawh." a han ti leh tawk tawk a.

Rsa chuan kawngka chu ava hawng a, Dr. Manuna chu a rawn lut a. Mazuala'n Manuna a hmuh chuan mak a ti hmel kher mai, "Ma...Manun?" tiin a en hu mai a. Dr. Manuna chu a rawn kun hniam a, "Pu Mazuala chu....kha i va damloh hmel ve a?" tiin a han nui vel huah huah a.

Rsa lah chu choka lamah chuan engthil emaw zawn nei niawm tak hian bungrua te chu a lo hai vak vak a, "Ma..Manun, eng...enge, enge awmzia?" tiin Mazuala chu a thaw hlawi hlawi mai. Dr. Manuna chu a khi suk a, "Ka chunga i thil tih kha ila hria em? Kei Dr. Manuna hi nang hian min lo sawisel ngam amaw? Ka lehkhabu ziah te kha tikhan chanchinbuah te chhuah in, milem, damlote hmang tangkai thin, pawisa duh tih ten i lo ziak vel tiraw?" tiin a vin ta khur khur mai.

Mazuala chuan a chhang hleithei tawh lo, a thaw tawk tawk tawh hi a ni ber. Dr Manuna bawk chuan rum tak hian Mazuala chu a han melh leh a, "Kei hi misual chu ka ni a, Rsa zawk hi victim tiin i sawi tiraw? Thudik sawi ngam, mi huaisen tiin an fak che a, keichu a chhe zawngin ka lar a, ka hna ka chan phah asin. Kum 6 lai a liam tawh, i laka phuba lak hi ka chak thei lutuk. Tunah chuan a hun a lo thleng ta, mangtha le...Mazual." tiin a ding a.

Rsa chu choka atang chuan lungral nen hian a rawn phei a, lungral hmawr zum chuan Mazuala chhipah tak mai chuan a chek tlum thawih mai. Mazuala chu a che hrut chauh, a thi chiang kher mai. Dr. MAnuna chuan Mazuala ruang chu a kuai let a, a kawrhma ipte atang chuan chahbi pakhat hi a la a.

Inchung lamah chuan a chho va, room ah chuan a lut tlang nghal a. Wardrobe chhunga safe chu a hawng nghal a, pawisa tam tak a lo awm a. Polythene ah chuan a khung nghauh nghauh mai, a zawh hnu chuan a chhuk leh a. Rsa nen chuan chu in chu an chhuahsan a, chak takin an tlan leh ta vang vang a.

******************************************

Esi chuan scooty in a fanu chu a phur mek a, a fanu school luhna lam an pan mek a ni. A hmun chu an thleng a, class room thleng chuan a thlah a. Esi hian hna a nei hrih lova, house-wife pangngai angin a awm a, anu nen inchhungah chuan an che ber thin a ni. Kum 2014 khan, Esi pa Pu Ringa boral atanga kum 2 naah Esi leh Isaka te hi an innei a ni.

Isaka erawh sawrkar hna thawk a ni tawh thung a, a sum lakluh pawh a pangngai angreng hle. A fanu chu an ban hun thleng a nghak mai thin a, nu leh pa dangte pawh chuan an nghak ve thup zel a, an ban hun nghah chhungin school kawtah an lo titi mai thin a ni.

Esi chuan a phone chu a khawih mual mual a, tumah chu ava kawm lem lo. Chutah a bula mi chuan ring deuh tak hian, "Ui...a rapthlak e..” a rawn ti chhuak deuh thut mai. Esi chu ava hawi a, chunu chuan phone a lo khawih ve mek bawk. A bula nu pakhat chuan, “Engati chiam chiam nge a....leh thut zel che hian?” tiin a lo zawt vat a.

Chunu chuan a phone chu a bula mi entir pahin, “Hei..en la. Nizan khan tualthahna a thleng a, mi pahnih an thi a nih hi, anmahni chenna in chhungah ngei an la ti zui.” a han ti nuah nuah a. Esi chu a rawn hawi phawk rang kher mai, a thin a phu nghal dup dup mai a.

Mahse engmah a va sawi ve lem lo, “A nih tak kha...khawi veng nge, Aizawl khawchhung te a ni em, han chhiar chiang teh.” a thiannu chuan a lo ti ve leh a. Chunu chuan a han chhiar chiang a, “Buleng khua a nih hi.” a ti leh ta mai a. Esi chu a ding ta zak mai, ava pan phei a.

An bulah chuan va thu ve in, “Khawi khua maw? Buleng khua inti em ni?” tiin ava zawt chiang nghal vat a. Phone kengtunu zawk chuan, “AW...nizan dar 9:30 bawr vel khan a nih hmel an ti, pakhat phei chu a lu a bung a, pakhat zawk erawh a ke pahnih tan bun sak a ni bawk, awii a rapthlak lutuk.” tiin a lo chhang a.

Esi chuan a phone chu laksak meuhvin a han chhiar chiang a, “Nizan dar 9:30 vel khan Buleng khuaa Pu LAlmuanzuala inchhungah chuan tu tih hriatloh misual chu lutin Pu Lalmuanzuala leh a thianpa, Lalchunglura te chu hraimhrei hmangin a thah zawh hnuah sum tha hnem tak a ru chhuak bawk niin a lang. Pu LAlmuanzuala hi a ke veilam malpui vun chu a thler vek a, a khup chin hnuai zawng chu tan bun niin a ke dinglam pawh a ke rek atanga tan bun a ni bawk. A lu ah hian na taka sah hliam a ni bawk a, tualthattu hian lungral a hmang ngei niin a lang bawk. A thianpa Lalchunglura hi a lu a tan sak bawk a, a taksa dangah erawh hliam a nei lo thung. Inchhung bungraw man to engemaw zah ruk chhuah a ni bawk a, tunah hian he case hi chhui nghal mek a ni.” tih hi a lo inziak a.

Esi chu a ding zawk mai, a ngaih a tha lo takzet. Lu tan bun, ke tan bun, lungral hmanga incheh pawp mai te chu, Rsa te ang mi nunrawng tan lo chuan tuman an ti dawn lo, Rsa ngei a nih chu a ring nghet bur nghal a. A hlauthawng takzet, a thin a phu nghal dup dup mai a.

Chutah Buleng khua a lo ni kher kher bawk nen, Rsa nena an intawn dan te, a thiante a thahsak dan te leh a pa a thah thu an hrilh laite nen lam chuan engkim mai chu a mitthlaah chuan a rawn let zawk zawk hlawm mai a, a thlan a tla nasa kher mai. A thaw hrawk hrawk a, chak takin a kal sawn a.

Thingkung hnuaiah chuan ava thu hnawk a, a awm a dawm vawng vawng mai. Rsa chu chin hriat lohvin a bo hmak kha a ni a, kum 6 lai liam tawh mahse a ruang takngial pawh an hmuh loh avang chuan Esi hian ala dam ngei hi a lo ring tlat thin a, ala dam ngei a ni tih a rin zual phah hle bawk.

Chutia a inngaihtuah vauh vauh lai chuan a hnunglam atang chuan, “Esther.” hmeichhe aw hian a rawn ti thut mai. A phu nasa em em mai lehnghal a, ava hawi phei chu a fanu Rosy thiannu Memei hringtunu, Tepuii a lo ni reng mai. Esi chu a thaw huai a, “I va han phu nasa em em ve mawle...i tha maw?” tiin Tepuii chu abulah chuan ava thu ve a.

Esi chu zalo tak hian a lo khi suk a, “Thil ka ngaihtuah lai ania, tihpalh lutuk.” a lo ti vat a. “Enge i ngaihtuah a?” tiin Tepuii chuan a han zawt leh a. Esi chuan nui sen sen chung hian, “Engvak mah, ka phu ve hrim hrim a nih kha.” tiin a lo chhang leh a, an fate zirna lam chungchang sawi chuan an titi nual a, mahse Esi chuan rilru a pe hleithei lo, Buleng khua a tualthahna chungchang ringawt mai chu a ngaihtuah a.

*******************************************

Room thim reih ruih tak maiah chuan Rsa chu kawr phelh tung hian a thu ngawi run mai a, a hnungah chuan Dr. Manuna chuan Rsa dara hliam chu damdawi a lo hnawih mek a. Dim taka tuam pah chuan, “I ke kan thuina kha chu naktuk tukleh velah a dam mai ang, BAwiha..tichuan hna kan thawk leh tan dawnnia.” tiin a be mual mual a.

Wardrobe lam pan chuan ava kal a, safe chhung chu a hawng a. Mazuala pawisa a ruk chhuah chu a lo awm teuh mai, a nui var var a. A kalh tha leh nghal a, “Kan pafa hian kan thawk dun zel ang, kei hian ka chawm zel dawn che alawm, BAwiha. Keihi i naupan lai atanga enkawltu tak tak che chu ka ni, ka patient...ka damlo i ni tih hi i inhria tiraw, Ruatsang?” tiin a han zawt a.

Mahse Rsa chu a thu ngawi reng, a hmui chu puan duma tuamin darthlalangah chuan a inen vung vung ringawt a. Dr. Manuna chuan ava pan hnai a, “Kei hi i pa diktak tur zawk chu ka ni asin, i nunna ka chhanchhuak a ni. Nang hian min puih zel angai, tuman min hrechhuak tur a ni lo.” a han ti leh a.

Rsa hmaah tak chuan a va ding a, “Rs, ka venghim ang che. Nang hi ka mawhphurhna i ni, chuan ka tan hian i tangkai takzet bawk. Nizana i mi thah tak, Mazuala kha...kha kha kan first victim a ni.” a han ti leh nuah nuah a. A khi suk a, “Mahse a thianpa pawh i zuah chuanglo kha ania, a pawi lo mai.” tiin a han nui deuh huk a.

Rsa chuan a melh run ringawt, “RS...i nu khan tha taka enkawl tur che in min chah a, chu chu ka ti ngei bawk ang. I pa ka ni tih hria la, tha takin ka thu zawm ang che aw..” Dr. Manuna bawk chuan a han ti leh a. Mahse Rsa chuan ala chhang chuang lo, a melh run ringawt mai a ni.

Dr. Manuna chu a kal sawn a, “Hna dang tam tak kan la nei bawk tih kha hria la, nizan bak kha chu hliam dang i tuar tawh tur a ni lo. I nat hi ka phal lo, ka fapa...i doctor, Dr. Manuna ka awm reng ania, lungngai reng reng suh ang che.” tih pah chuan room ah chuan a vei kual reng a.

Rsa chu a rawn tho thut a, a kawr chu a ha tha mawlh mawlh a. Khumah chuan muangchang chuan a mu a, Dr. Manuna chuan a lo en reng a. Rsa chu reiloteah chuan a hnar nghal bawrh bawrh mai, “Hahchawl rawh, Rs....Dahthat tur tamtak kan la nei, Bawiha...nang hi ka hmang tangkai dawn che a ni, engkim ka nei let leh vek tur a ni.” tiin Dr. Manuna chu a phun nuah nuah a, a nui ver ver mai.

*************************************

TO BE CONTINUE