THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 11

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 11

************************

Motor atang chuan chhuah nghal mai a tum a, mahse a banah chuan ka vuan a. Min en hu a, "Ngati nge? Enge awmzia?" tiin min zawt a. Ka han thaw hak a, "Puipui, kal lo mai rawh. In hotel manager chu keiman ka phone sak ang che, ka bulah lo thawk zawk mai rawh." tiin ka han sawm leh a.

Dik taka sawi chuan chan nawn leh ka hlau tawh takzet, phaia a  awm daih phei chuan ka ngaihtuah dawn lutuk. Call girl ah a lo tang ve tawh si nen, ka bulah pawh a zep lo. Mi pathum vel lakah chuan a indawr tawh thu min hrep vek a, a virgin hawngtu erawh a bialpa, a tleirawl chhoh vel laia a bialpa thin a nih thu pawh zep hauh lovin min hrilh.

Min chhang miah lo, a ngawi reng ringawt. A mitah chuan chiang takin ka en a, "Mawhh...i duh mai lo em ni?" tiin ka zawt nawn leh a. A thaw deuh hak a, "U Brandon, tunah rih chuan ka bansan nghal mai thei hleinem. A nuam lo emai, Manager-in min ngai dik lo vek ang." tiin min chhang a.

"A ho lutuk, ka biak sak ang che ka tih chu. PAwisa chawi ngai hial mahse, bang tawp rawh." ka han ti deuh hlur a. Mahse Puipuii chuan a lu a thing tlat, "Nilo..ka kal phawt mai ang. Chuan hmaichhanah ngei ka hmu anga, ka sawi chhin anga. Chanchin ka rawn hrilh ve leh dawn che alawm, tiang chuan ti zawk ang aw?" nui lui tih hriat tak chuan a khi suk a, ka biangah chuan a rawn chul a.

Ka kut chu ka lo fawp zeuh a, "Anih ka ring ang che, min lo hrilh leh vat ang che aw.." tih pah chuan ka vuan a. A lu a bu nghat nghat a, "Um, ka ti tak tak." tiin min chhang a. Motor atang chuan kan chhuk a, airport chhunga a luh hma chuan kan inkuah a.

"Kan inhmu leh vat dawn lawm...lo lungngai suh aw.." tiin ka sam ah chuan a chul hliau hliau va, "Umm, min lo lerh san suh aw.." ka han ti chu  a nui huk a. "A nih ka kal ange, lo in enkawl tha rawh aw.." tiin ka biangah chuan a rawn fawp a. Ka lo nui sak a, "Ka hmangaih che.." ka han ti zawi sap a.

Ani pawh chuan min nuih let sen sen a, "Keipawn ka hmangaih che." tiin kan inthlah ta a. Ka hmuh theih chhung zawng chu ka en zui char char a, security guard pakhat phei kha chu a lo nui vur vur in ka hria, a ve khanglang a. Ka motor lam pan chuan ka let leh a, ka tah hi a chhuak ngawih ngawih.

Kan inhmu ve tan dawn chauh va, kan intawng ve leh chauh kha a nia. Mahse kar khat vel bak kan inhmu hman leh der si lo, chupawh nileng pawn a ni lo lehnghal. Ka ding a, ka han hawi let leh a. Mahse a hmel hmuh tur a awm tawh si lo, airport chhung chu ka en tlawk tlawk ringawt a.

Ka motor a let mai lo chuan smoking zone ah chuan ka va phei a, meizial ka zu a. Ka ngai nghal em em ringawt mai, an manager bulah chuan lo hrilh hreh leh si se. Nakumah chauh a lo haw ang a, kan inhmu lo rei leh ngat ngat dawn lutuk. Ka la kham thlawt lo, mahse ka sawmna kha a hnar miau si a.

Meizial chu ka zu zo va, ka motor lam pan chuan ka phei a. Motor chhung ka lut chiah chu seat hnung lam atang chuan hmeichhe pakhat aw hian, "In office ah chuan ka rintlak ve tak tak ang maw?" a rawn ti thut mai chu ka phu nasa lutuk ringawt, ka au chhuak teuh teh asin aw.

Hnunglam ka va hawi chu tum bur hian Puipuii chu a lo thu reng mai, "Ehe..eng..engati nge? Enge i rawn let leh a?" ka ti hu mai. Motor atang chuan a chhuk a, hmalamah chuan a rawn insawn leh te te phawt a. Min han melh leh khur a, "Mawhhh..in office ah chuan ka thawk ve thei tak tak ang maw?" a han ti leh a.

Mahse mak ka la ti, "Aw...thei e. Mahse, tinge i rawn let leh a?" tiin ka zawt leh hu mai. A thaw hak a, "Kan Hotel Manager chu min biak sak rawh aw?" a han ti leh a. Ka hrethiam ta, "Puipui, i ti tak tak ami?" tiin ka han zawt leh hram a. A lu a bu nghat nghat a, "Umm ti tak tak, mahse hna min pek leh loh vaih." a han ti deuh tuau a.

Ka lawm lutuk chu ka nui vur vur mai, "Tehreng mai, ka duat...naktuk ah interview kan nei nghal dawnnia." ka han ti chu a meng deuh hru a. A ner nung bawk a, "Ka tling lovang, tunge min interview dawn?" a han ti leh nghal chiam chiam a. Nuih vur vur pah chuan, "Ele keimah." ka han ti chu ani pawh chu a nui huk mai.

Kan han nui dun leh rih a, "Anih chuan ka tling chiang sa a nih chu tiraw?" a la ti zui. Keipawh chuan ka lu ka lo bu nghat a, "Um chiang sa chiang sa..mahse interview chu kan nei ve hrim hrim ang." tiin ka chhang a. Kan infawp vawng vawng a, tichuan an in lam pan chuan ka thlah haw leh ta a.

*************************

A nu bulah chuan eng tin tin emaw kan sawi fel thei mai a, mahse Tluangi ngaihdan chu a ni lo ve leh khanglang a nih chu. An inhau hrep a ni awm a, kei erawh chu ka awm lo. Puipuii pawn a chhan let ve thin tawh thu te chu min hrilh a, huaisen ve tawh tur khan ka fuih nasa bawk em a ni.

Anu nen pawh chuan kan inhmu ve ngei a, vanneihthlak takin kan ti dawn nge, tunge ka nih a hre tawh lo hlauh. A tawp a tawpah chuan TLuangi pawh chuan tih theih dang nei hek bik lo, pawisa pawh a hlawh tam zawk dawn tih chu a hre ve rin ran bawk nen.

A remti ve ta a, keiphei chuan ani remtihna lak ve kha a ngai hi kan ti lo khawp a. REmti lo pawh nise Puipuii hi ka la lut tho tho dawn, a thu lo ve chiang emai a. A pawisa thawk chhuaktu zawk pawh ni lo, amah aia upa zawk pawh ni chuang bawk si lo.

Amah enkawl nan a tih duhdah em em, a unaunu tak tak pawh nilovin a taksa a zawrh phah hial a nia. Sawi tam lutuk lo mai teh ang, ka thinrim thar leh dawn tlat. A tuka interview tur chuan kan sawi fel thei ta, an in atanga ka haw tur kha chu Tluangi nen khan kan inmelh rum lehpek teh asin.

Ani nen hi chuan kan inmelhrum kumkhua mai dawn niin a lang, kan inmil thei thlawt dawn lo a nih hi. Step bul thleng chuan min thlah a, lawmthu te chu min hrilh mawlh mawlh a. Ka hmangaih ber, kum 15 chuang zet ka hmuh tawh loh chu ka bulah a awm reng thei tawh tur chu ka hlim takzet.

Inah chuan ka haw a, ka nu bulah pawh chuan secretary thar kan neih tur thu te chu ka han hrilh luam a. Diktak chuan Puipuii nen hian kan phakar ve deuh reuh va, staff te leh midang tumah chu kan hrilh duh miah lo. Hrilh chi pawh va ni hek suh, Pathian pawn min hrethiam em ang chu, ti tawh mai teh ang.

****************************

ZAn a lo ni a, Puipuii nen chuan tlangah bawk chuan kan inhmu leh ta. Kan naupan laia kan inhmuhna ber a ni bawk a, hetah lo hi chuan kalna tur dang hi kan hre mawlh lo a ni e. A hma zan lawkah a vawikhatna atan hmangaihna tuifawn kan hleuh dun bawk sia, he hmun hi chu a chhinchhiah tlak takzet alawm.

"Naktukah chuan dar engzatah nge kan interview dawn?"

"DAr 1 ah i lo kal dawnnia, chuan ka bulah kan supervisor te pahnih an awm ve dawn bawk ania."

"Animaw? Naaa...ka van zak. Min lo zawt ve awm sia, ka buai vek ange...tinge nangmah a min interview mai loh."

"Keimah chauh te chuan  a chi nang, chubakah an awm ve angai alawm."

"Hmm..i thu ber a, enge an lo awm ve a ngaihna?"

"Kan company ang te chu company lian tham a ni ve bawk sia, interview naah pawh pathum tal kan thu thin alawm."

A ner deuh nung a, "Zawhna min zawh tur ka hre lawk awm si lova, ka tlin leh loh daih chuan a ho viau ang." a han ti bul bul a. Ka nui huk mai, "Chutin ngai mah ta che, kan zawh tur awm ang che ka hrilh lawk dawn che alawm, chubakah ka lo fak vel chiam che anga maw, i tling hrim hrim." ka han ti fiam a.

A tum bur mai, "Ka uang lo ania, kei phei chu ka lai hma teh mai ania. Min hriat kha, ka naupan lai atang tawh a mize zawi tak ka ni tih i hriat kha." a han ti deuh duah kher a. NGhet takin ka kuah a, "Lungngai suh, keiman ka zawt hnem ber ang che." tiin a khabe chu ka dawm kang a.

"Chuan engtin zel?" tiin min melh kar a. A hmui senno chek a zuk fawh zeuh pah chuan, "I tling dawn, ka sawi vek tawh kha. GEneral Manager ka nih hi, i tling dawn chiang sa." tiin ka han fawp leh zeuh va. A nui ve thei ta, "Anih chuan khawi...min muah nghal rawh." a han ti vel deuh sap a.

Kan inkiss a, a hma zan ang bawkin kan duhthawh leh telh telh mai. Kan thaw ri pawh a ring leh sawt ta khawp mai, taksa pawh a lum tan. Helai tlang kher hi chu a reh bawk nen, tumah an kal ve vak ngai lo bawk nen. Kan thlang fuh ve chiang a ni, ka kut pawh a hlei leh tan ta.

Thawmhnaw pawh a hnawk leh tan ta a, hun nuam tak chu kan hmang dun leh ta. A dik lo, thil tha a ni lo tih chu kan hre dun ve ve a, mahse kan relationship ngaihtuah kha chuan ka indem em em bik lo. Chubakah mihring fel tak leh Pathian thu awih em em ka lo ni bik lo bawk nen, sawi tam lo phawt mai teh ang.

Kan titi leh nual hnu ah chuan haw zai kan rel ve leh ta a, "Naktuk chu i resume kha rawn keng kim la aw.." ka han ti chu a han khi deuh suk a. Inla pui thu tak hian, "Awle Sir, ka theihnghilh lovang." a han ti vel deuh kher a. Kan han nui leh rih a, tichuan kan haw ve thei ta hram a ni.

****************************

A tuk office ka kal pawh chu chawhma atang tawh chuan ka helh hawlh hi a ni ber mai, kan manager dangte bulah pawh chuan interview tur thar kan neih tur thu te chu ka han hrilh luam hlawm a. KA phur tawh lutuk ka ti dawn nge, awm ngaihna ka hre der lo a nih chu.

Dar 12 vel atang tawh chuan, "I lo kal tawh dawn em?" tiin ka va text deuh chhen a, min reply har lutuk te chuan ka ngaih a ti tha lo rum rum mai. Dar 12:30 a rik dawn hnaiah pawh chuan min la rawn reply miah lo chu ngaih a tha lo ta tak tak mai. MAhse a hnu deuh lawkah chuan ka phone chu a rawn vibrate hlarh hlarh a, amah a nih ngei ringin rang takin ka la nghal vat a.

Ka beisei leh ka rin ang ngeiin Puipuii ngei chu a lo ni, "Hello, tinge...engmah chanchin i rawn sawi loh, hei dar 1 chu a ri dawn der ania, darkar chanve bak a awm tawh lo." ka han ti nghal zuah zuah a, ka nghakhlel tawh em a ni. Mangan hmel tak hian, "Enteh U Brandon, Tluangi'n scooty a la chhuak leh hman daih a. Engtik lai khan nge a chhuah ka hre lo, ka hmanhmawh lo lui vel a. Mahse hei tunah ka hre ve chauh va, taxi a vang sia...min rawn hruai thei mai angem?" a rawn ti a.

Tluangi ve chhen lah hi a, hmeichhia chu ni lo se chuan ka hnek nasa tawh ngawt ang. Buaina ral lian hi a ni ringawt, "Ava buaithlak tak, awle...anih ka lo kal vat ang. Inpeih sa thlap khan awm la, step bulah khan min lo nghak rawh." tiin ka chhang a. Phone chu ka dah nghal a, rang takin ka motor chahbi ka ban nghal a.

Kan manager dangte bulah chuan chhuanlam eng engmaw phuah chawp chuan ka chhuak ta a, ka hmanhmawh lutuk chu office garage ka panna lamah ka chahbi ka la thlauh zui. KA hmu mai lo leh nghal a, minute 5 dawn chu ka han zawng buai leh a nih kha.

Lalrempuii mai mai chu aw, min va han tibuai reuh tak. Ka hmuh veleh chuan chhar nghalin ka motor lam chu ka pan a, chak tak chuan ka tlan a. Kan office awmna leh Puipuii te in awmna hi a hnai em em lo lehnghal a, vanneihthlak takin traffic a tawt lutuk lo hlauh zawk.

**********************

Ka va thlen meuh chuan dar 1 rik nan minute 25 vel bak a awm tawh lo, step bulah chuan smart tawk hian a bag khaiin a lo ding vang mai. Sawi hun lo viau mahse sawi leh lawk teh ang, a inhmeh zia leh a chhiatloh si zia kha. Ka va thlen veleh chuan rang takin a rawn chuang lut nghal a, "Ka tihpalh lutuk aw, ka tibuai bawk che sia." tiin inthiamloh hmel tak chuan thupha a chawi nghal mawlh mawlh a.

Buai phah viau mah ila a chungah erawh ka thinrim eih lo, chumai nilovin ka thinrim phal lo hrim hrim bawk. Zaidam tak chuan, "A pawi lo, Tluangi vang vek alawm, a ho lutuk." tiin ka chhang a. "Ka nu a awm lo lehnghal a, Tluangi chu in lo nghah ve thin tur ania." tiin a han phun ve deuh nuah nuah a.

A inhmeh lo zawk, a chhan pawh a han phun ve chiam kha ka hre ngai lo tlat a ni. A cute letling zawk, "I nu chu khawnge a awm a?" tiin ka zawt a. "Kan thenawmnu hi a rawn tlawmngai thin a, check-up tura kal a ngai a. Tluangi lah a chhuak leh daih bawk si nen, damdawiinah a han kal pui." tiin min chhang a.

Tluangi hi chu awww...a harh chhuak tawh dawn lo a nih hi. Mahse engmah ka sawipui chhunzawm tawh lem lo, interview kan tlai dawn tlat. Chak tak chuan office lam pan chuan kan tlan zel a, a hmel atang chuan a huphurh takzet a ni tih a hriat theih.

A kutah chuan ka vuan a, "Hlauthawng suh, i tling em em ang ka tih kha...zam lo la, boss ber ka awm hi. Ka thun luh tawp che chuan staff dangin min ring dik lo ve thei si a, interview pangngai tak leh formal taka neih ve hrim hrim kha a tha ka tih vang a nia." tiin ka hnem a.

Ani pawh chuan  alu a bu nghat nghat a, "Ka hria alawm, ka nervous ve lutuk a, chuvang mai mai mawle." a ti khur deuh dar dar mai. KA khawngaih zawk e a, "Confi em em la, a tha animai." tiin ka han fuih leh a. Kan ngawi dun leh vang vang a, "Anih chuan office hi engin nge ka rawn kal thin tak ang..Tluangi hian scooty hi a chang tawp mai bawk sia." a han ti leh nuah nuah a.

Ka lo nui sak a, "Lungngai suh, chutiang mai mai ah...kan scooty pakhat saw i kawl dawnnia." tiin ka chhang a. Min en hu a, "Naa..a inthlahrun awm e a, i nu khawnge a awm ti ta se, a chi loh emai a." a han ti deuh bul bul a. Ka lo nui leh huk a, "Ka nu chu ngaihtuah suh, keima lei tho alawm mawle ahh..ho lutuk." tiin ka chhang a.

A han ngawi vung vung a, "Ka hamhaih vang nge, thil theihnghilh nei ang tlata inhriatna ka nei." a han ti nuah nuah a. "Ava mak e aw...han in-check chiang teh. Kan kal thui hma hian, thlen hnuah let leh nan hun kan nei tawh lo a nia." ka han ti a. A bag chu  ahan hai nauh nauh va, chutah inthlahrun hmel tak hian min rawn en a.

Tap tep hian, "Ka resume ho dahna file ber ka keng lo." a ti ta mai a nih chu. Motor chu ka ti ding nghal a, "I fiamthu lo takzet maw?" tiin ka zawt a. A mu a bu nghut a, "Aw...ka theihnghilh tak tak." a la ti zui. Ka lu ka dawm tawp, "Dar 1 a ri tep tawh, hei..minute 10 vel bak a awm tawh lo ania." ka ti chu a tap titih nghal der mai.

Ka inthiamlo leh deuh va, "Umm..pawi lo, va lam leh lawk mai ang." ka ti leh vat a. Inthiamlo tak hian, "Ka tibuai che e...ka inthlahrung lutuk." a ti zawi sap a. Motor chu ka turn a, "A pawi lo, kan pute kan phone pah ange." tiin ka phone chu ka phawrh chhuak a.

Let leh pah chuan interview chu tih tlai hret deuh a ngaih thu ka hrilh a, interview tur pawh ka be fel tawh angin ka sawi a. Puipuii chuan lawmthu min hrilh leh mawlh mawlh a, ka khawngaih lutuk chu keimah zawk ka inthiamlo mai dawn alawm mawle. Ka hnem mawlh mawlh a, ani lah hi a mittui hi a tla hma ve sia.

***********************

An in chu kan thleng leh ta a, "Ka zu la lawk ang, ka rei lovang." a ti a. "Ka lo kal pui dawn che ami?" ka han ti chu, "Aih angai lo." tiin min chhang a. Ka hmanhmawh tawh em avang chuan, "I smart shoe bun kha a sang bawk sia, in step lah a chhuk un bawk si. Ka zu kal zuai ang, khawi chahbi min lo pe rawh." tih pah chuan a kuta chahbi a ken lai chu ka laksak nghal a.

"Aih..khawi..keimah ka zu kal ang." tiin motor atang chuan ka chhuak nghal a, "Choka ah khan a awm ang, rawn keng chho tawp mai rawh." tiin min au zui lawm lawm a. Rang tak chuan ka tlan thla nghal a, an in awmna lah step tawp ber, kawnghnuai lamliam bul chiah ala ni zui.

Ka thleng thla chu an inkawtah chuan an scooty chu a lo inhung reng a, Tluangi chu rin ai daihin a chhuak rei lo kher mai. Kawngka pawh a lo inkalh lo ngei bawk a, mawihnaiah tiin ka han kik ve hram a. Tluangi aw ngei chuan, "Aw lo lut rawh." tiin min lo chhawn a.

Ka lut chu sofa ah kekawr bul chhing zet ha hian mal lang huangin a lo mu a, phone a lo khawih a. Min hmu chiah chu a thu nghal a, "BRan..Brandon, enge i lo tih dawn?" a ti hu mai. En pawh ka en tha peih lo, "Puipuii'n in a resume a theihnghil a, ka lo la dawn." ka ti deuh hmuk a.

"Khawnge a dah ka hre hleinem." tiin min lo chhang ve hmuk a, a ve khanglang chuan, ka beng chak thin. Za lo tak chuan ka khi suk a, "Keiman ka hria alawm." tih pah chuan choka lam chu ka pan a, anu a awm lo bawk nen, ani ve mai mai hi ka zahna chhan tur hi ka hre bik lo.

Dawhkanah chuan file chu  alo awm a, ka lak pah chuan a bula hmeichhe purse lo awm ve chu ka ti tla palh a, chhuatah chuan a baw nuai mai. A va buaithlak thin em, make up leh ID card pakhat a rawn tla chhuak a. Tluangi thlalak a ni tih ka hmuh chuan ama purse ngei a ni tih ka hrethiam nghal a, ka chhar sak leh lo tep a ni.

Mipa fel leh hawihawm ta na na na chuan ka han chhar sak a, mahse ID card ka han thun lut tur chu ka tawp chat mai. Chiang takin ID card chu ka en a, ka thin a phu dup dup mai. Mak ka ti lutuk chuan thil dang chu ka han hai a, Adhaar card leh VISA thleng chuan ka han en kim vek a.

Mahse a in ang vek, a mak ka ti lutuk chu ka bing mup thei. Ka hrethiam lo, ka hrethiam lo takzet. ID card, Adhaar card leh ATM card ah zawng zawng chuan Tluangi thlalak ngei chu chuang mahse, a hmingah chuan LALREMPUII tih zawk a inziak vek.

Puipuii file chu dawhkanah ka dah a, Tluangi thil chu ka han enchiang leh hlawm a. Ka mit ka nuai thul, mahse Lalnuntluangi hming nilovin Lalrempuii tih vek, Puipuii hming vek a inziak mai chu ka hrethiam thei thlawt lo. Purse chu dawhkanah ka dah a, Puipui file min pek chu ka han en leh a.

A chhunga a resume ho chu ka en a, Puipuii thlalak ah chuan LALREMPUII tih chu a inziak ve vek tho si. Ka hrethiam lo lutuk leh ka bo lutuk chu awmdan tur pawh ka hre lo, a mual bo hian ka bo tawp hi a ni mai. Tluangi purse chu ka han hai leh thul, chutah Voter ID card pakhat ka hmuh belh leh ta.

Ka thin a thawng ka ti dawn nge, engtin emaw hian ka awm nghulh thei. A chhan chu kha voter ID ah khan Puipuii thlalak chu lang ngei mahse, a hming zawnah erawh LALNUNTLUANGI tih a inziak daih thung. A awmzia ka hre lo nge, ka hrethiam duh lo zawk pawh ka hre lo.

Ka mumang ang mai te hian ka hria, ka hnunglam atang chuan thawm ka hriat avang chuan ka hawi phei a. Choka luhna bulah chuan Tluangi chu a lo ding khawng reng a, hlauhthawn hmel tak hian min lo en reng mai. Ngawi reng hian a lo ding khur zawih zawih a, a hmel atang chuan a hlau tih ka hrethei.

Kei pawh chuan sawi mai tur ka hre bik lo, zawi muang chuan Puipuii hming zawk inziahna, ama thlalak chuanna si card ho chu ka keng chung chuan ka va pan phei a. A lo tawlh hnung hret hret bawk, a mittui a tla nghal zawih zawih a, a hmel erawh hlauhthawnna hlirin a khat thung.

A ID card chu ka lek kang a, "TLuangi...enge awmzia? Hei hi enge awmzia?" tiin ka zawt a. Mahse min chhang lo, a khur zawih zawih mai. Chutah vin zet hian, "Tinge i hming nilova Puipuii hming zawk a inziah? MAwhhh..sawi ta che...enge awmzia?" ka ti vak a.

A phu nasa in a hlauh hmel kher mai, a tap nghal ta pur mai a. A mittui a tla zawih zawih a, "U..U Brandon...ka..ka ngai thei lutuk che." tiin a tap ta hawm hawm mai. Nilo, thudik nilo se ka ti ngawih ngawih. Ka insum thei lo, "Nang..nang hi..Puipui, nangmah maw?" tiin ka zawt a, tawng pawh ka tawng tha hleithei lo.

Tap chung chuan a lu a bu nghat a, "Aw..keimah..keimah hi Puipuii zawk chu ka ni." tiin min chhang ta mai a nih chu. Awm ngaihna ka hre lo, enge thil awmzia hi? Puipuii amaw ka tih kha Tluangi zawk tihna maw? Chuan ka lo ngei em em, Tluangi anga ka lo ngaih char char hi Puipuii zawk maw lo ni reng a?

Ni lo, ka awih lo. A banah chuan ka vuan a, "Tluangi, ka awih lo. Dawt a ni tih sawi rawh, Puipuii i ni lo. Min tihder tiraw..khawngaihin dawt i sawi tih min hrilh rawh." tiin ka sawi vak vak a. A tap nasa tulh tulh mai, "Ka tihpalh, duhthlan tur dang ka nei lo a ni. U BRandon, min ngaidam rawh." tiin hnuailam melhin a tap char char mai.

Ka zawi vek thei, ka thaw te a hah mai dawn hian ka hria. Mipat hmeichhiatna hial ka lo hman pui, ka hmangaih ber Puipuii emaw ka tih kha ka mihring huat em em mai, Tluangi zawk maw lo ni reng a? Ka insum thei lo, Puipuii diktak zawk chu ka hmaah chuan  a ding reng mai si.

A biangah chuan ka vuan a, "I ti tak tak em? Puipui..nangmah i ni tak tak maw?" tiin ka zawt nawn leh, keipawh chu ka insum thei dawn lo, ka mittui a tla ve zawih zawih mai. Chhan pawh min chhang thei tawh lo, tap chung chuan a lu a bu nghat nghat a. Ka kuah thlawp mai, ani pawh chuan min kuah let a.

"U BRandon, ka ngai lutuk che. Ka tihpalh aw..lem ka chan a ngai a. Min ngaidam rawh, mahse duhthlan tur dang ka nei si lo a ni." tiin a tap ri hial a. Mahse kei erawh chuan sawi tur pawh ka hre lo, nghet tak chuan ka kuah ngawih ngawih ringawt mai. A khabe ah chuan ka dawm kang a, a hmuiah chuan dim tak hian ka fawp a.

Kum 15 chuang zet ka hmuh tawh loh hnuah ka fawp ve leh thei ta, mahse Tluangi zawk ka lo fawp hmasa chu ka thinrim hnuhnawh leh kher mai. Kan innuih a, kan mittui te chu kan inhruk hul sak a. "Ka ngai lutuk che, Puipui..ka hmangaih che." ka han ti a.

Ani pawh chuan zawi sap hian, "Keipawn ka hmangaih che, U Brandon." a ti tham tiak mai. Ka la chiang chiah thei chuang lo, a chhan chu min thawng em a ni. Ka la nu huih hian ka hria, mumang ni mai hian ka la hre bawk. MAhse a hmel ka en chiang leh deuh chu Puipuii a ni tih hi a chiang tulh tulh hian ka hria, an naupan lai pawh khan unau diktak ni lo mahse an inang ve hrim hrim kha  ania.

****************************

Chutia kan in en reng lai chuan kawngka a rawn ri rawk a, "I van rei ve, U BRandon..enge awmzia." tiin Puipuii anga ka lo ngaih, Tluangi chu a rawn ang lut deuh bawrh bawrh a. RAng takin Puipuii chuan min thlah nghal vat a, mahse a kut chu ka vuan lui ngat a.

Chokaah chuan a rawn lut tlang a, "I hmu lo ami? Choka ah..." a sawi zo hman lo, kut kan lo invuan a hmuh chuan a tawng lai chu a tawp chat mai. Mak tih hmel tak hian min en dun a, "Enge awmzia?" tiin a lungawiloh hmel kher mai. Chutia a lungawi lo hmel ka han hmu te chu Tluangi zawk a ni tih hi ka chiang hnuhnawh leh tulh tulh mai hian ka hria, a awm atang zawng zawng nen chuan, keipawh hian mak ka ti.

A rawn phei a, "Enge thleng a, enge thil awmzia?" a rawn ti leh a. Mahse kan ngawi reng thung, engmah ka sawi duh lo. Kan bul a rawn thlen hma chuan Puipuii ID card ka thlauh chu  a chhui a, zawi muang chuan kun hniamin a chhar a. Chutah a hmel chu a dur ve nghal khup mai, a mitmeng pawh a dang chiang teh asin.

Hlauthawng tih hriat tak hian min rawn en a, mahse engmah a sawi lo. A thaw dep dep mai, keilah chuan ka lo melhrum rap. Huatna hlirin ka khat, ngei sa tawh nen, Puipuii ang zawka insawiin min lo la bum ngam char char chu a nia. Puipuii erawh hnuailam a melh char char thung, Tluangi chu ka va pan hnai a.

Min hlauh hmel kher mai, "U..U Brandon, ka..ka sawifiah thei." a han ti dek dek chu, "NGawi rawh, ngawi hmak rawh." ka ti vin hrep a, a ngawi chiang kher mai. A tap nghal pur a, "Kum 15 kal ta a min tihnat kha i la duh tawk lo cheu em ni? Mawhh....tihian min la bum ngam amaw?" ka han ti leh khur khur a.

Thaw dep dep chung chuan, "Ka..ka tihpalh. Ihh..i hrethiam lo a ni." a han ti zawi sap a. Za lo tak chuan ka nui a, "Lemchan i lo thiam hle mai, Puipuii mizia leh a tawngdan zawng zawng te kha i lo zir thiam leh hman vek chu a nia. A chang chang kha chuan i danglam tawh hle mai ka ti ru thin reng a ni, Lalnuntluang...engvangin nge min bum?" ka han ti leh deuh hrep a.

Chutah hnuailam melh chung chuan, "A chhan chu khang hunlai khan keipawh hian ka duh ve vang che a ni, U Brandon. Puipuii saw ka thik, ka thik em vangin khati khan ka che ta a ni. Ka inthiam lo, a hnu khan keipawn hrehawm ka ti ve lutuk asin." tiin a tap deuh chiam a nih chu.

Khawngaihna chhe te mah ka nei lo, ka huatna a zual tulh tulh zawk. Rum tak hian ka melh a, "Anih chuan tunah tinge ti hian lem i chan leh tho si a, mawhhh...tinge lem i chan leh tho si? Inthiamlo ve si...tinge tunah hetia i tih leh?" tiin ka han vin leh hrep a. Inhnit feih feih chung chuan, "A chhan chu nangmah i ni tih ka hriat khan...ka insum zo lo a ni. Midang tan ka phal chuang lo che, a chhan chu ka hmangaih ve vang che a ni." a la ti ta deuh deuh va.

KA thinrim lutuk chu ka puak keh mai dawn hian ka hria, a bag khai lai mek zipper inhawng atang chuan file hi ka hmu thei a. File a theihnghilh thu ka a sawi sia, khu khu eng file nge ni ta ang? A bag chu ka phih thlak sak pawp a, min dang ngam eih lo. File chu ka la chhuak a, ka rindan vel a ni.

A resume diktak zawk a lo keng chu niin, ka han enkual chu LALNUNTLUANGI tih vek a hming zawnah chuan a lo inziak bawk. Ka nuih hi a za zawk, "I resume diktak zawk i lo ken vang animaw...eng ang mihring nge maw i nih le?" ka han ti deuh thlawt a nih kha.

Choka dawhkana a resume lem zawk chu ka va la a, a bulah chuan ka let leh a. Rum zet hian ka melh a, "Anih chuan heng ho hi fake tihna ania, fake birth certificate, fake ID card, fake Adhaar leh a dang zawng zawng pawh hi fake vek. Khawi atanga i neih nge...sawi rawh." ka han ti vin tuar a.

Hlauh hmel tak hian, "Ka..ka siamchawp tir." a ti zawp sap a. A aia vin leh zual hian, "Engtin?" ka han ti leh hrep a. A phu zuk a, "Ihh..ka thianpa..Bang..Bangalore ami?" a han ti leh sup a, a khur dar dar mai. Ka thaw hak a, "Engtin nge i siam tir theih? Chuan engtikah nge i siam tir?" tiin ka zawt leh a.

"Hman zanah...ni 5 vel liam ta khan.."

"Engtin nge a siam thiam zawk a?"

"Tiang lam..tiang lam ti thin hi a nia, a rukin...sum..sumdawn nan a hmang thin a."

"A nih leh engtin nge siam tir nachang te i hriat zawk a? Ka office ah ka thun ang che ka tih te kha chu nimin piah zan lawk kha a ni sia...min chhang teh."

Min chhan mai loh avang chuan vin tak hian, "Min chhang rawh ka tih chu." ka han ti leh tuar a. A khur nasa tawh mai, "Ih..Pui...Puipuii anga ka awm a ngai tih ka hriat khan nakin zela min rinhlelh loh nan tiin ka lo siam tir lawk vek alawm." tiin min chhang a nih chu, ava han zak lo tak.

Thinrim tak hian ka melh a, "Police man theih in ni asin, eng ang mihring nge maw i nih le?" ka han ti chu a hlauh hmel kher mai. Kut suih meuh chuan, "Nilo U BRandon, khawngaihin...khawngaihin Police hnenah chuan min report lo hram rawh." a ti chel chul mai a.

Puipuii chuan ka hnunglam atang chuan ka darah a rawn vuan a, "U Brandon, khawngaihin...hetiang thil ka thlen a ngaihna chhan ka hrilh fiah ang che. Khawngaihin Tluangi hi ngaidam hram rawh, ka thiamloh pawh a awm ve tho ania." a rawn ti zawi sap a.

Ka thaw a chham dawn, ka tawt up up mai. Ka chhang lo, pawnah chuan ka chhuak a. Puipuii chuan min rawn zui chhuak ve nghal a, hrehawm ka ti takzet. An ina ka kal ve tum pawh khan anu khan an hmingin a ko miah lova, Bawihte tia a koh ve ve avang khan ka lo hre lo zawk a, huiham...ka a mai dawn hian ka hria.

****************************

 TO BE CONTINUE