THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 5

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 5

***************************

Hun a lo kal ve zel a, Puipuii nen pawh kan boruak a tha chho viau zel e. Nitin mai chuan school ah kan inkawm a, a chang phei chuan ke in a haw ve thin, kan haw dun thin tihna a nih chu. Mahse nitin erawh a ni lo, a thiannu Tluangi a ngaihtuah ve deuh thin avangin bus-a a haw chang a tam zawk.

Keipawh nitin chuan ke in ka haw tawh ngai bik lo, ka thiante laka ka inthlahrung vang leh bialnu ringawt ngaihtuah min tih ang tih ka hlauh avangin a khat tawk chuan ke in ka haw pui ve zeuh zeuh thin tho. Mahse ka rilru ti nuam lem lo tu ber chu tudang nilovin, Tluangi bawk hi a ni.

Puipuii nena kan nih hnu atang phei hi chuan min be tha lo leh zual a, min melh rum thei em em mai lehnghal. A chang chuan Pupuii nena kan awm dun reng lai te hian a rawn ko hrang daih zel, a thik amawni le ti dawn ila min duh kher pawh ka ring chuang si lo.

Chutia veng thenawm ni ta na na na chu mi hi an lo tawng thei hlawm khawp a, ka nu leh pate beng a thleng ta tlat mai. Mahse engtin vak mah chuan min ti chuang lo, ka hriat nachhan pawh ka nau DAvid-a'n an hria tih min hrilh vang a ni. Veng chhunga mi bialnu nei phei ila chu, kan lar chak awm e.

*********************

Puipuii nena kan inngaizawn atangin kar 2 lai a lo liam ve ta, vawite khat mah kan la inhau lo bawk. Kan hlim dun tawk ve viau chuan ka hria, sunday tlaiah a rukin kan inhmu thin bawk. Inhmu thin han ti ila, sunday vawi hnih chiah kan la inhmu. A hmasa zawk kha chuan Tluangi a rawn hruai tel a, kan len ho chhung zawng khan Tluangi nen kan in be lo.

Chawlhni vawi 3-na atan kan inhmu leh ta a, tun tum chu amahin a rawn kal thung. Kan veng leh Puipuii te veng inkarah hian tlang nuam deuh mai leh boruak nuam tak mai hi a awm a, chutah chuan kan inhmu thin a ni. Tlang pan chhohna bulah chuan ka lo nghak a, min hmu chiah chu a rawn nui leh sen sen mai.

A rawn thleng a, kan inkuah nghal vawng vawng a. "Min lo nghak rei tawh em?" tiin min zawt a. Kei chuan, "Aih rei love, keipawh ka thleng deuh chiah." tiin ka chhang a, a nihna takah chuan darkar 1 vel dawn chu ka nghak hman ang. Inthiam loh hmel tak hian, "Sorry lutuk aw, apa bulah dawt sawi a ngai bawk sia...chhuah chhuanlam tur hi a vang ve em a ni." a han ti zawi sap a.

"Anih enge chhuanlamah i hman?"

"KA thiannute inah ka kal dawn ka ti, ka thiannu Hruaii..ka hrilh tawp alawm dawt ka sawi tih."

"Tunge HRuaii chu?"

"Kan veng ami ania, ani lo chu chhuanlam tur dang ka hre lova."

"Tinge Tluangi?"

"Ani te chuan min pui duh teuh lo mai."

"Nga ti maw?"

A ngawi vang vang a, "Hawh...chho phawt ila kan sawi chhunzawm dawnnia." tih pah chuan min kuah leh a, a hmuiah chuan ka han fawp vawng vawng a. Tumah ven thawn ngai lova duh ang thala han fawh vawng vawng mai chu nuam tak a ni, hawi zuk zuk a ngai lo bawk a.

Tlang lam pan chuan han chho dun a, kan chhoh pah chuan kan titi a. "Tinge TLuangi chuan a puih duh loh che a?" tiin ka han zawt leh a. A han thaw deuh hak a, "Englo ania, ihh...min pui duh lo pawh ka tih loh kha. Min pui duh lovang ka ti zawk alawm, Tluangi kher hi chuan..." tiin min chhang a.

"Nia, engvang chuan maw a puih duh lovang che?" tiin ka han zawt nawn leh a. Min chhang mai lo chuan second 10 vel chu a han ngawi leh vang vang phawt a, "Ani hi chu...min puih duh ka ring chiah lova, ka sawm lo ta law law mai a nih kha." a han ti zawi leh sap a.

"I best friend a ni lawm ni?"

"Ni e, ka best friend chu ania lawm."

"A nih a hnu, best friend te chu kan harsat ber lai pawhin min pui tur an nia, inpui tawn tur kan ni a lawm...nilo mi?"

"Ni tho e nih chu..mahse ani hi chu..mi hi a veng thawng thei lutuk a."

Ka chhang zui tawh lem lo, Tluangi rilru hi chu a dik lo alawm. Chhan awm lovin min be duh lo leh ringawt zel a, a chang leh min ankhum hrep a. Kan intawn hmasak ber dan atang ringawt pawh khan henu hi chu a rilru a dik chiah lo tih ka hria, a hmel en reng reng pawhin a thinchhe dawn tih hriat reng reng.

MAhse a thiannu a ni a, chuvang chuan amah Puipuii bulah hi chuan ka rel chiam duh lo, chubakah a mipa hna lo emai. Thil dang eng eng emaw sawiin kan titi chhunzawm leh a, chutia kan titi melh melh chhung chuan tlang chu kan thleng der mai. Hmun zawl lai deuh ah chuan kan thu dun a, min han kuah deuh thlawp a.

"KA ngai tawh lutuk che...nimin nilengin kan inhmu bawk si lo." tih pah chuan ka mitah tak enin a han nui var var a, a va han hmeltha chiang kuang tak em. A hmeltha ka tih zia hi sawi hian a siak lo, sawi lo ila a siak zawk ang. "Nia...keipawn ka ngai che alawm." tiin ka lo chhang let a.

KAn eitur lei te chu kan phawrh a, kan eidun a, kan pahnih chauh chuan kan hlimdun tawk em em mai a ni. Tichuan kan titi leh a, ka naupan laite, han ti ve khanglang ila, naupan deuh laia ka chetchhiatna zawng zawngte chu ka han hrilh ve deuh luam a, ani pawhin tlem azawng chu min hrilh ve bawk.

*********************

Kan haw dawn meuh chuan dar 5 a lo ri hnai dawn der mai, haw tur chuan kan chhuk ta a. KAwngpui kan thleng chiah chu Puipuii chu a phu deuh zawk a, a ding chat mai. Chutia kan kal lai meka a ding thut mai chu mak tiin ka ding ve a, "Tinge?" tiin ka han en a.

Puipuii chuan a hma zawn chu a melh reng a, a mitmengah chuan nuam lo tihna a nei a ni tih ka hre thei nghal. KAwngpui lam chu ka va en ve a, karei...Tluangi chu kawngsira dawrah chuan thil a lo lei mek a. A bulah chuan keini aia upa tih hriat reng reng, tlangval pakhat sa tha lampang chu bike nen a lo ding ve bawk.

A lei zo chu a rawn hawi a, Puipuii nena kan lo ding dun chu min hmu ta. Amah Tluangi pawh a ding chat a, min en zui vawng vawng mai. A bula mipa lo ding chuan, "Kal ila...hei a tlai dawnnia." a lo ti ve chhen bawk a. MAhse TLuangi chuan hmun dang ala melh eih lo, kei leh Puipuii chu min la rawn en reng.

Chu tlangval pawh chu kan lam a rawn hawi ve ta a, eng eng emaw chu sawiin an tawng dun mawlh mawlh a. MAhse enge an sawi tak chu kan hre pha ve tawh lo, tichuan Tluangi chu bike ah chuan a lawn a, an tlan ta a. An tlan liam hma zawng chuan hnunglam ala rawn hawi char char a, Puipuii lah chu a ngawi reng lehnghal.

An tlan liam hnu chuan Puipuii chu ka han nek zeuh va, "NGati nge...tinge i va biak loh va?" tiin ka han zawt nghal bawk a. Ala phu deuh zuk zui, "Aaa..ih, engatimah, an awm hla em a." a ti bah nuai mai. A awmdan atang chuan hlauh rukna a nei tih ka chiang bawk, mahse eng ber kha nge hlauh tur ka hrethiam lo a ni.

"Anih chuan hawh...kal ila." ka han ti leh a, "Awle." tih chauh chuan min chhang a, kan kal leh ta a. Kan haw pah pawh chuan min be tha lo hle mai, a rul tawk lek lek bakin min chhang lo. Tichuan kan kal zel a, an in bul peng kan thleng ta. Kan ding a, "HElai thleng hi ni mai rawh se, chaw ei tui aw.." tiin za lo tih hriat tak chuan a han nui suk a.

KA mood a ti fuh lo zo vek, mahse ka ti lang duh bik lo. Keipawh chu ka nui lui ve a, "Awle, anih phawt le." tiin ka chhang a, a kal ta a. Khawlai a ni bawk si a, mi an awm ve nual avang chuan in-muah em chu kan ti ta lo mai, kan la naupang ve bawk sia. Puipuii te in tak hi ka la hmu miah lo, an inpeng kawi thleng bak hi thlah a duh ngai lo bawk.

*****************************

Zanah chuan ka room ah lehkha ka zir mek a, ka nau DAvid-a pawh a awm ve bawk. KA rilru ah chuan tlai lama Puipuii leh Tluangi khati teh fakauva an inmelh mai kha a awm reng a, tinge maw khati em em a Tluangi'n huat hmel tak leh a hmelma ni awm ang maia a rawn melh khur mai kha ka hrethiam thei lo a ni.

Puipuii hmel ka en lah khan a hlauh hmelin a inthlahrun hmel em em bawk a, mahse han hlauh viauna chhan tur kha kei hian ka hre der si lo. Tunge Tluangi bula lo awm tlangval kha, kha kha chu ka ngaipawimawh lo. Engemaw tak chu a awm ngei a ni, hemite thiandun inkarah hian engemaw tak chu a awm ngei a ni tih ka chiang.

Hre chak viau mah ila Puipuii lo zawh vel vak vak kha thil tih chi ni berin ka hre silo, mahse ka hre chak tlat pek a nih chu. Dik taka sawi chuan a hrehawm ve a, amah Puipuii nena kan relationship pawh a nawm tur angin a nuam thei lo alawm. Eng thil chiah hi nge maw kan pahnih lakah hian Tluangi hian a duh ve le, a lo inrawlh ve chhen mai hi a khamawm ka ti takzet.

A tirah kha chuan amah khan min sawipui zawk kha a ni a, khatia ka hmuh hmasak bera a mizia ka lo judge nghal ringawt te kha a hnuah khan a inthiamlo kual leh vel kha a nia. Mahse tuna a awmdan hi chuan min ti lungawi vak bik lo, ka thinrim ka insum theih loh hunah chuan ka tawng chhuak ve chiang tawh khawp ang.

Ka lehkha zir lai pawh chu rilru ah a lut thei hlawl lo, engpawh nise, zingah tho hma ila, ka thiam hman em ang chu maw, thiam hman turah ngai mai ang. Tlai ka haw atang khan ka mood a la fuh thei thlawt lo, muthilh pawh a har leh dawn a nih hi. Tum bur chung leh Puipuii ngaihtuah reng chung chuan ka muhil ve thei ta hram a.

****************************

Zingah chuan ahma zana ka lo sawi lawk tawh ang ngeiin hma takah ka tho va, ka inbual fai a. Zan hmasa lama ka thiam hman tak loh chu ka han chhiar thuak thuak a, ka pa pawh ala hnar ring suk suk hle mai. Rilru pe taka ka han chhiar leh tak tak mai chu, kei mi rilru chak tih takah, ka thiam rang leh mai mai teh asin.

SAwi fo tawh mah ila, ka'n sawi leh lawk. Ni e, keichu thiam thei lo pawl an tih thin angah hian ka tel zeuh zeuh, mahse ka thiante pathum ai hi chuan ka thiam thei ve tawk. Anni chu hrem apiangin an tel thei zel, kei erawh ka thatchhiat vang hian hrem ka tawk ve zeuh zeuh thin ringawt.

Ka buaina ber chu ka thatchhe lutuk hi a ni ber, rilru pe taka ka zir chuan eng anga note thui pawh nise darkar chanve vel bak hi ka mamawh ngai lo. Tukthuan kan eikham veleh chuan rang takin ka insiam a, bus chu ka lo chang leh ta a. REiloteah chuan a rawn thleng a, ka chuang lut nghal a.

Puipuii te veng kan thleng chiah chu a ngai te ang bawkin a thutna tur ka lo hauh sak leh nghal vat a, mahse a lut tur an rawn luh zawh hnu pawh chuan Puipuii hmel reng reng hmuh tur a awm lo. Amah chauh pawh nilovin, Tluangi hmel pawh hmuh tur a awm chuang bik lo.

Bus chu a kal leh ta a, tukverh ah chuan dakchhuakin ka han hawi kual a. Mahse Puipuii te thiandun hmel reng reng ka hmu chuang lo, "A kal dawn lo em mawni le?" tiin ka inzawt nuah nuah a. Tluangi kha chu lo kal lo mahse a pawi tihna ka nei chhe te eih lo, mahse Puipuii ber kha, a tellovin nilengin engtin nge school ah nuam ti taka ka awm theih ang?"

Chu ai maha ka rilru ti hrehawmtu chu an thiandunin, an pahnih khera an rawn kal lo dun chu engemaw tak chu a awm chiang ang mawle, nimina thil thleng vang kha a ni thei angem tihte thleng chuan ka ngaihtuah hman a, rilru a ti nuam lo vek thei dawn alawm mawle.

*************************

School chu kan thleng a, motor dang emaw in an lo kal hmasa tawh zawk aniang tiin beiseina ka la nei fan a, Puipuii hmel hmuh tum reng reng chuan ka hawi kual a, mahse ka hmu thak lo. Class ah ka lut a, ka class mate te pawh tumah ka kawm hman hrih lo, rang lutukin ka chhuak leh nghal vat a.

Class 8 room bul vel ah chuan ka va tei kual vel thuak thuak a, ka mit sir chuan class room chhung chu ka melh deuh zeuh zeuh bawk. Mahse Puipuii hmel reng reng ka hmu lo, "Umm..a rawn tlai dawn a ni ngei ang." tiin ka la ngaihtuah lui hram a, a tello chuan a khawhar thlak dawn emai.

Dar a ri a, assembly kan nei ta. Class 8 ho in-line chu ka va en phei leh zeuh zeuh thin a, mahse hmuh tur a la awm chuang lo. Assembly kan nei zo va, ka thu ngui bur tawh mai. "Tinge a, Brandon? Vawiin chu i va nguai ve, Puipuii nen in inhau em ni?" tiin Amosa chuan min lo zawt a.

KA chhan hma hma chuan Ruata chuan, "Kei chu ka man thiam nghal vek, Puipuii a lo kal loh vang mai mai a nih kha." a lo ti leh zuah zuah mai. Chu veleh Puia pawh chuan, "E ni tak, i sawi takah chuan assembly lai khan ka va hawi phei a, Tluangi pawh a lo kal lo aniang, ka hmu miah lo." a lo ti ve bawk a.

Ka chhang ta hlawm lem lova, za lo tak chuan ka khi suk ringawt. Ka inhnem chawp a, "Umm...a dam lo ve te pawh a ni mahna. Ni khat a lo kal lo ve dek dek a, mangan nghal rikngawt, a pa loh thlak emai." tiin ka rilru chuan ka inbe mawlh mawlh a, chumi nileng mai chuan ka mal ngawih ngawih hian ka inhria.

School kan bang a, Puipuii ni khat lek pawh ka hmu lo, ka ngai nghal lutuk chu ka taksa pawh a zawi vek thei hialin ka hria, ke pawhin ka haw peih ta lo. Bus chuan ka haw ta ringawt a, ka thiante pathum erawh nidang ang bawkin ke in an haw leh nge nge a.

Puipuii te veng kan thlen chuan tukverh ah ka dak chhuak nghal vat a, khawlai vela a kal lai a lo nih tak hlauhvin tiin ka zawng kual nghal. Mahse ka hmu hauh lo, ka tah te hi a chhuak hial dawnin ka hria. A dam lo em ni ang, dam lo ta se, ana viau angem le tihte thleng chuan ka ngaihtuah hman a.

******************

Chumi zan pawh chuan ka mu thei lo, ka inlet ka inlet ringawt. A lo kal lo ringawt pawh ngaih that tawh loh nak alaiin, a thiannu Tluangi leh zel a lo kal lo ve chuan ka ngaih a ti tha lo zual. A hma ni Sunday tlai a thil thleng ngaihtuah nen phei chuan a ngaihbel loh theih loh, thil dik lo engemaw tak chu a awm hi ka ring tlat a ni.

Khati teh fakauva a thiannu mai mai a hmuh veleh a, hlauh hmel taka a ding khawng reng te kha enge awmzia ni a, engvanga hlau nge a nih ang? Chubakah Tluangi pawhin kan pahnih, Puipuii nena kan chungchang min hriat pui loh pawh a ni lova, tinge Puipuii hian a nu leh pa niawm fahrana Tluangi hi a hlauh hmel theih em em le?

A u emaw, a chhungte zinga mi chu nise ka hrethiam. Ni e, kan la naupang a, nu leh pa strict deuh tan phei chuan ngaihzawng nei a han leng kual vel rual chu kan la ni chiah lo alawm. Mahse chupawh nilo, a thiannu, amah ang rualpui ve tho a ni a, chuta karah a best friend ala ni zui bawk.

Zawhna hlir chuan ka khat a, mahse chhanna min pe theitu awm chhun lah chu a damlo nge, harsatna a tawk nge, hmuh tur a awm bawk si lo. "Naktuk lo thleng se, a lo kal mai ang." tiin ka'n han inhnem leh rih thin. Nikhat lek school a lo kal loh pawn tikhawp hian ka buai phah ania, eng tak thleng zel ang maw?"

************************

Ka hlauh ang ngei ngeiin a tukah chuan thil chu a thleng ta, Puipuii chu a lo la kal chuang lo. Ka rilru ti hah zual tu bawk chu, Tluangi pawh a lo la kal chuang bik lo. KA mang a ang tawh takzet, a dam lo a nih chuan an ina va kal hial mai ania ka duh tawh ni, mahse an in awmna lai tak pawh ka la hre chuang bawk si lo.

A tello bawk chuan nileng chu ka hmang ral leh ta, a tuk a lo thleng leh, mahse an pahnih bawk chuan an lo la kal chuang lo. Monday, Tuesday leh Wednesday chu ka hmu lo ta phawt chu ania. Thursday a lo thleng a, mahse an hmel hmuh tur reng reng ala awm chuang lo.

Ka mang hi a ang tawh takzet a ni, mahse tihngaihna engmah ka hre der mai silo. Friday a lo thleng a, an lo la kal chuang lo a nih chuan engemaw tal ka ti tawh ang tiin engthil chiah nge ka tih dawn pawh hre chuang lo chuan ka rilru chu ka han siam ve ngawt a.

Hlauh ang ngei ngeiin an lo la lang thei chuang lo, ka mood chu a fu tawh thlawt lo a ni. Lunch Break a lo ni a, kan thutdun thinna thingkung hnuaiah chuan keimah chauh chuan ka thu a. Ka thiante bulah ka sawi lawk tawh a, min rawn tibuai hrih suh u tia ka hrilh lawk avang chuan tuman min rawn hnem pawh an tum hran lo.

Ka thiante pawn min hrethiam takzet, mahnia awm ka duh rih tih min hriatthiam pui avang chuan keimah chuan min awm tir deuh reng hrih a. Ka lung a leng tawh takzet a ni, a chungchang hre miah lova kar khat tawp a tellova han awm mai chu, a hrehawm ka ti takzet.

Kan thutdunna thin te chu ka han enkual a, ka mittui a tla mai dawn lawm mawle. Ngaihzawng ka neih ngai loh vang te pawh a ni mahna, ka la serious takzet zawng a nih hi. Dar a ri a, kan class lam pan chuan phur lo zet chuan ka chho mek a. Ka thlen hma chuan office lam ka va hawi a, office lam lo pan mek, pa pakhat chuan ka mit a la nghal chat mai.

A chhan chu amah kha ka hmu tawh a, tunge a ni tih pawh chiang takin ka hria. Chu pa chu tudang nilovin, ka ngaih em em, ka bialnu Puipuii pa ngei kha a ni. Chart paper lei tura kan veng lama a rawn kal khan, "Saw..apa sawn min rawn kal pui." tia a kawh, scooter-a lo chuang ngei kha a ni tih ka chiang lutuk tlat.

Mahse engvanga lo kal nge a nih? Enge a rawn tih dawn? Tinge a fanu nilova, amah zawk a lo kal? Ka va han hre ve chak tak em, mahse lo va zawh ve ngawt chi lah a ni bawk si lo. Eng thil nge thleng ang le? KA hre chak lutuk chu chet mai ngaihna pawh ka hre lo, ka ding vung vung mai.

Office a luh thleng chuan ka en a, ka la ding reng. Chutia ka en vung vung lai chuan ka hnunglam atang chuan, "Brandon, enge i tih vung vung a?" tiin Ruata chuan min rawn ko va. Ka phu deuh zawk a, "E aw..awle ka lo kal." ka ti bah deuh nuai mai. Hre chak ve viau mah ila, tihngaihna a awm si lo, class room ah chuan ka lut ve ta a.

*********************

School kan ban veleh chuan class atang chuan ka chhuak leh nghal vat a, bus lam pan chuan ka chhukthla nghal. Vanneih thlak takin class 8 ami, Henry-a chu ka hmu hlauh mai. KA va pan nghal a, "Henry, lo ding lawk teh." tiin ka au va. Ani pawh chu a lo ding a, "Enge ni ta, U Brandon?" a lo ti ve mai a.

"In class ami, Puipuii kha a lo van kal khat em em...a chanchin te an sawi thin em teacher ten?" tiin ka han zawt deuh thuai a. "E taka, khamite kha maw? Ihh..an pahnih khan, Puipuii leh Tluangi te kha an lo kal tawh dawn lo." a ti ta mai a, ka thin a phu nghal dup dup mai.

"Eng...engtin maw?" ka ti bah deuh nuai a. Henry-a chuan min en deuh hu pah chuan, "Ihh...vawiinah an sawi a, kan class teacher Miss Rini khan a sawi a, lunch break zawh hnu khan.." a han ti muang ban deuh charh charh a. Kei lah pek chuan, "Engtin chiah nge a sawi?" tiin ka han zawt leh hram a.

"Puipuii pa a lo kal a, khaw dangah an insawn thut a ngaih vangin an lo kal thei tawh dawn lo atia." tiin min chhang leh ta mai a, ngaihthlak ava han nuam lo ber mai em, ka hnuk a ulh nghal tun thei. Zawh chhunzawm zel chu ka duh a, mahse zawh zui vak vak chu ka inthlahrung ve deuh bawk si.

Chutih lai tak chuan Henry-a chu a thianten an rawn ko leh ta nghal a, "Anih ka kal phawt aw..." tiin a la kal daih zui. Midang han zawh chian leh chu chak viau mah ila, ka tah a chhuak lutuk leh mangang lutuk chu midang bia be chi pawh ka ni lo, a mittui a hnam nghal teuh mai.

Ka lungawi lo takzet bawk, kan inngaizawng ve tan dawn chauh kha ania, mahse tinge tunah kan va inkalsan hma dawn bik ve, a fair lo ka ti takzet. Lung nilo deuh chuan ke in ka haw a, ka thiante pawh khawnge an awm pawh ka hre lo, ka ngaihsak hman lo. Tap tep chung chuan keimah in ka haw nal nal a, ka inngaihtuah nasa lutuk leh ka mood off lutuk chu engtik laiin nge kan in ka thlen pawh ka hre lo.

********************

Kan in ka thlen hma hret chuan scooter ri ka hria a, ka va hawi phei chu ka ding nghal chat mai. Kan thenawmte in bula sintex lian tak phenah chuan ka biru a, ka han bih dek dek a. Mak tak ani, mak tak. Puipuii pa bawk chu kan inkawtah chuan a lo awm a nih chu, a scooter chu a lo start mek a.

Eng thil nge maw a rawn tih le, kan inah kher lehnghal. Thil dik lo chu a awm chaing alawm, mahse eng thil nge ni ang? Enge a rawn tih a, eng chungchang nge a sawi ang? KA rilru chu a nawm loh sa tawh tehreng nen, tunah zet zawng ka hlauthawng tawh zawk.

Um, engpawh ni rawh se. Tihsual ka neih engmah ka hre hleinem, enge ka hlauh ngawt ang ni? Puipuii pa chu a tlan liam a, ka huaisenna zawng zawng sawm khawmin kan in lam chu ka va pan ta. MAk tak maiin kan inbula kan garage ah chuan ka pa car chu a lo awm der tawh, mahse an ban ala hun tawp si lo.

Eng thil phiangsen nge maw thleng ta hi le? Ka huaisenna pawh a chanve deuh thaw chuan a kiam nghal vekin ka hria, mahse ka kal laklawh tawh. Kan in lo haw na tur ka nei chuang hleinem, inchhungah chuan ka lut ta a. Ka pa meuh pawh a ban hun lovah a motor kan garage-ah a lo awm der tawh a nia, Puipuii pa chuan eng tak chu rawn sawi nimaw?

******************

Inchhung ka lut chiah chu sitting room lamah chuan ka pa chu a lo awm ngei e, a bulah chuan ka nu a lo thu ve bawk. Min hmu chiah chu min la melh rum dun em em mai lehnghal, ka zam ve khawp mai. Ka thin a phu dup dup bawk a, mahse tih lan loh hram hram ka tum.

Engmah hre lo ang tak chuan ngaih that hmel tak hian ka room lam chu pan pheiin ka lut tlang nghal a, engmah ka hre lo tak tak reng bawk a. Ka nau DAvid-a pawh a awm lo, a chhan chu a dam ve deuh tawh avangin school a kal ve tawh a, a lo la haw vel lo pawh a ni mahna.

Room ka luh hnu atangin second 20 vel awrh chauh ala liam ang tihah chuan ka pa chu a rawn lut tlang ve nghal a, rum deuh hian min rawn melh khur a. Vin deuh lek lek leh nelawm loh zet hian, "I inthlak zawh veleh kan room ah lo lut ang che." a han ti deuh khur khur a.

"Enge ni ta?" ka lo ti a, "Lo lut la a nimai." ala ti deuh hmak zui. Room kawngka lah chu a han khar na em em khawp ah, va phei chu chakawm lem loh tak a ni. Darkar khat vel inthlak a chakawm rum rum hle mai, ka huphurh takzet. Mahse engmah tihsual ka neih ka hre tlat lo, inti huaisen luiin ka va pan ta a.

***************************

An roomah chuan ka lut a, "Enge a?" ka han ti deuh hu a. KA nu chuan, "Thu teh,,,khumah khan." a lo ti ve deuh hlur bawk a, ka nu pawh a mengrum ve tho bawk nen, zam a awl duh ngei mai. Khumah chuan ka thu a, ka pa chuan a aw a han thian te te phaw ta.

Chutah min han melh khur a, "Tinge ngaihzawng i neih thu kan lakah i zep a?" tiin min zawt ta mai. Chhan mai ngaihna ka hre lo, "Eng..enge ka zepna?" ka han ti bah nuai ringawt a. Chuveleh ka nu chuan, "Veng thenawma lo awm thar, in school-a lut saw a ni tih kan hre vek." a lo ti ve leh bawk.

Chhan ngaihna ka hre lo, ka ngawi ta reng ringawt a. KA pa bawk chuan, "Kum 16 chauh ila nih kha hre rawh, duhzawng leh ngainat zawng te chu i lo nei ve tawh pawh a ni maithei. Mahse min tih zah zia hi, khawlai em em leh a chhungte hmuh lai renga kuah a, kaih vel leh infawh vel kha i zak miah nange?" a ti ta mai a.

Keimah zawk pawh chu ka phu zuk thei hial, "Engmaw? Khawlaiah ka fawp maw? A awihawm loh lutuk...tunge ti?" tiin ka rak chel chul mai. Ka nu lah chuan vin zet hian, "Pha reng reng suh, miin an hmu vek che u alawm mawle. Kha vawiin phei chu, apa hial a rawn kal asin." tiin min ankhum hrep mai.

KA thinrim lutuk leh lungawilo lutuk chu ka insehruh tun mai, tawng pawh ka tawng chhuak hleithei lo. Ka lu ka thing a, "Nilo nu, chutiangin kan awm lo." tih chauh chuan ka chhang thei. "Zep lo la a nimai, mit ngeia hmutu che pawh an awm alawm." tiin ka nu bawk chuan min chhang leh a.

Mahse dawt ka sawi lo tlat, khawlaiah mi hmuh laiin kan infawp lul lovang Puipuii nen hian. Thinrim tak chung chuan, "Tunge? Tunge chutianga dawt a min lo puh a?" tiin ka zawt let ve ta ngat a. MAhse ka nu chuan, "Kan sawi kher lovang, eng ang chhungkua nge an nih pawh i hre ngawt ami? Kha...Puipuii pa pawh a haw chiah, awii...ka zak lutuk." a han ti leh vawng vawng a, ka rilru ana takzet.

KA pa chuan muang ban deuh charh hian, "Ka fapa vangin pa naran ve mai lakah hian ngaihdam ka dil ka ring ngai lo, kum pawh in la tling lo, i zahpuiawm khawp mai." min han ti ve leh a, ava hrehawm tak em. Thiamthu sawi ka tum pauh leh ka dang chu a awk vek zel, a chhan chu ka thinrim a, ka tah a chhuah em vangin ka tawng tha hlei thei lo a ni.

Ka nu chu a ding a, "Kha, nangmah vangin an chhungkua in an insawn leh dawn ania, an fanu Puipuii kha naupang te ni mahse an ven ber a ni a, apa pawhin a rawn sawi vek. An fanu lehkha thiam thei tak anih avangin ngaihzawng neih an phal lova, khatia i lo awmpui tak si ah chuan khaw dangah an insawn nghal rup dawn anih kha." a han ti leh a.

Ka awih lo, enge Puipuii chu chuti taka venthawn a ngaihna tur ka hre lo a ni. Ka bialnu a nia, ka hre chiang bawk. Ni e, an chhungkaw background leh a thuruk zawng zawng chu hre lo mah ila, hmeichhe innocent tak a nia , khawiah hian a khaw lo dawn lo hrim hrim.

Ka pa pawh chu a ding a, "Hre reng tawh rawh, ngaihzawng nei rual pawh ila ni lo. I lo nei a nih pawhin hmeichhe pangngai leh mize mawi an awm, kum i tlin hunah chuan kha chu kan khap theih che pawh a ni tawh lo, ngaihzawng erawh thlan fimkhur tur." a ti ve leh a, min chhuahsan dun ta a. 

***************************

TO BE CONTINUE