THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 7

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 7

********

Puipuii nena kan inhmuh lohna pawh kum 15 lai a lo liam ta, mahse ka thinlung erawh chuan ala theihnghilh thei chuang lo. Ka nupui, Rinhlui pawh chu a fel viau va, mahse kan inbe tlem thin khawp mai. KA nu nen hian an inkawmngeih em em a, an titi tui dun thin teh asin.

Kei erawh hna lamah ka buai char char thung a, hun awl hi ka nei hman meuh lo a ni. KA nu sawi ang ngeiin Rinhlui pawh chu secretary atang chuan a chawl a, in lamah ka nu awmpui pahin office hna chu a thawk ve zel tho va. Kan company pawh Pathian zarah leh ka thawhpuite zarah kan tluang khawp mai, han tlak hniam duai chang pawh a awm ngai lo.

Rinhlui nen kan inneih atangin thla 3 lai chu a liam ve tawh a, nupa nun pawh kan hmang dun ngun ve viau. Mahse a rai thu emaw, rai no awm ang pawhin a lang ngai lo. Hun a kal zel a, mahse Rinhlui chuan thu lawmawm engmah min la hrilh thei chuang lo aniang nge.

KA nu pawh a mangang ve deuh tan tawh ni ngei tur a ni, "Tu hmel hmuh te pawh a chakawm tawh khawp mai." tiin a sawi ri ve deuh ta chhen mai a. Rinhlui lah chu a nui liam mai zel a, harsatna engemaw tak a nei ti dawn ila min hrilh ve awm tak chu ania, a pasal ka ni miau va.

*********

Thla engemaw zat a liam leh a, kum chanve chu a ni tawh mai dawn. Zan khat ka hna bang chu duh aiin ka lo bang tlai deuh hlek a, office ka chhuah san meuh chuan khua a lo thim der tawh mai. Sana ka han en a, dar 8 a lo ri dawn tawh chu niin. Hmanhmawh tak chuan ka car lam ka pan a, in lam panin ka tlan haw nghal vang vang a.

Rei pawh ka tlan hma chuan sikret ka nei tawh lo tih ka hre chhuak thut a, motor chu dawr pakhat bulah chuan ka ti ding a. Car atang chuan chhuakin meizial chu ka lei mek a, chutih lai tak chuan pawn lam atang chuan, "Puipui, Lalrempui..lo phei vat rawh." ti ri ka hria a.

Ka phu deuh zuk mai, a chhan pawh Puipuii hming an lam rik vang kha chu thudang ni ta se, a kotu aw kha Tluangi aw a ang lutuk tlat. Ni e, ka la hre thei ve ve, an unau khan an aw kha ka la hre hrang ve ve alawm. Ka nunhlui zawng zawng, ka naupan lai khawvel ah chuan chawp leh chilhin ka let leh vek ni mai hian ka hria.

Rang lutukin pawnah ka tlan chhuak a, "Puipuii..Puipuii maw?" tiin ka phun nuah nuah a. Ka hawi kual a, "Puipui...hmanhmawh ve deuh teh." tia Tluangi aw ang tak ina a ko ri chu ka hre leh a. KA va hawi phei nghal, hmeichhe pakhat chu hman hmawh hmel tak hian foot path lam pan chuan a phei a.

A mak lutuk, a sam sei dan leh a pian zia hrim hrim kha Puipuii ang chiah chiah hian ka hmu thei. RAng lutukin ka va pan a, a darah ka va vuan a. Ani pawh chu a lo ding a, "Puipuii.." ka han ti deuh thlawt tawp mai a nih kha. A rawn hawi phei a, mak a tih hmel kher mai.

Ka hriat thin Puipuii awzawng a ni lo, hmeichhe tleirawl hmaifang tha ve pangngai tak hi a ni a, vawikhat mah ka la hmu ngai lo. Inthiam lo tak chuan ka kut ka la thla nghal a, "Ka pu, enge ni ta?" tiin min lo en deuh hu mai. "Ka pu a?" ka lo la ti let ve hu zui.

"Min hria em ni?" tiin min lo zawt let leh a. Ka harh chhuak ve chiah, "Aaa...ka..ka tihpalh." tiin za lo tak chuan ka nui suk a, amah lo kotu, Tluangi aw ang tak ka tih pawh kha ka va en a, hmeichhe tleirawl tho a lo ni a, a aw Tluangi aw a ang ve hrim hrim a niang nge, Tluangi awzawng a ni lo.

KA car lam pan chuan ka phei leh a, ka zakin mawl ka inti kher mai. Kum 15 lai a liam tawh a, Puipuii pawh khatiang rual lek a ni tawh bik dawn lo. A hmel te pawh a lo danglam ve deuh tawh anga, pasal a neih a, fa te a lo neih ve tawh phei chuan inhmu leh mah ila ka hre tawh lo maithei a ni.

Tin, ka tleirawl, Puipuii amaw ka tih pawh khan KA PU tia min koh kha mak ka lo ti em em a, kum 30 ka tling ve tawh tih ka lo intheihnghilh hman daih alawm mawle. Motor chhungah chuan ka thu lut a, theihnghilh ava han har si em. Hunin a liam pui ve mai ang tiin ka thiante khan min hnem fo va, mahse Kum 15 meuh a liam hnuah leh nupui hial ka neih hnuah pawh ka la theihnghilh thei lo chu a nih hi.

Ka rilru ah chuan kan naupan lai, Puipuii nena hlim taka kan lendun thin lai te chu ka ngaihtuah chhuak thar leh a. Kum engemaw zat ka tah pui tawh loh kha, ka lung a chhia in ka insum zo ta lo, ka tah pui leh ta vawng vawng mai. KA kun a, ka tawp hawm hawm ringawt mai.

KA mittui a tla zawih zawih a, kan inthen dan zawng zawng te leh kan tawp dan fair lo tak te chu ka hrechhuak leh vek a. Tikhawp hian ka lo hmangaih ang tih ka ring pha ngai lo, mahse ani nen erawh chuan a rem ve si lo a ni. REi fe ka din leh hnu chuan dar 9 a lo ri hnai der mai, in lam pan chuan ka haw ta a.

********

Garage-a ka motor ka dah that hnu chuan inchhung chu ka lut a, ka nu chu amah chauh chuan sofa ah mu in a phone a lo khawih mek a. "Nu, iva meng rei ve a?" tih pah chuan ka va pan a. "Ehe BAwiha, i van rawn haw har ve...call lah i la thei si lova..enge awmzia?" tiin min lo zawt a.

"Nia, ka rei ta deuh. Bangalore-a kan company partner te nen kan inbia a, hun engemaw chen chu zuk kal a ngaih hmel." tiin ka chhang a. A rawn thu chhuak a, "Ehe, BAngalore-ah maw?" a ti hu mai. "Aw ni e, conference meeting neih tur a ni dawn a, khu lama Board Member ho te nen meeting neih a ngai dawn a.." tiin ka chhang leh a.

"Awi a nih chuan, Rinhlui nen chiah kan awm dawn tihna nimaw?"

"Duh leh kan vaiin, kan chhungkua in kan kal dawn nia."

"Kan pathumin maw?"

"Aw...a buaithlak mai mai alawm."

Ka nu chu a han ngawi vang vang a, "Engtikah nge kal a ngaih ang?" tiin min han zawt leh a. "Tun atanga thla thum hnu velah aniang." tiin ka chhang a. A lu a bu deuh nghat nghat a, "Um..ala hlat tho chu, tih dan kan ngaihtuah dawn ania." a ti ve mai a. Thawh pah chuan, "Khawnge Rinhlui?" tiin ka zawt leh a.

A nui deuh suk a, "I lo haw har lutuk kha...a lungawi chiah lo aniang." a han ti zawi deuh sup a. "Tinge...engtin nge a awm a?" tiin ka lo zawt leh a. "A phun a phun a, lo haw har lutuk a ti a ti che lawm." tiin min chhang leh a. Ka zawt zui tawh lem lo, ka khi suk ringawt a, room lam pan chuan ka phei san a.

*********

Room ah chuan ka han lut a, teddy bear lian tak, kan inneih hma a ka lei sak chu kuah in a lo mu tum bur mai. Min rawn hmu chiah chu rum zet hian min melh a, lehlam a hawi daih mai. Khumah chuan ka va thu a, "I pasal ka rawn haw ve a, tikhan maw min hnungchhawn dawn a?" tiin ka han fiam a.

Lehlam hawi reng chung chuan, "Be peih lo che." a lo ti deuh hmuk mai. A bulah chuan ka han tlu zal ve a, ka han kuah a. Mahse a la che duh eih lo, "KA chau ania, min lo duat ve ta che.." ka han ti leh a. Min nek sawk a, khum atang chuan ka la tlak phah tep zui.

A tho deuh hluai a, "I rawn haw har thei si...office a kan thawh dun lai, kan inneih hma khan i bulah ka awm tam fe zawk. Kan innei a, min chhuahsan leh reng tho va, a nuam lo daih zawk." tiin a han phun nuah nuah a, a engemaw cute reuh phian lehnghal.

Keipawh chu ka thu tha a, "Anih kan innei leh lo mai dawn mi?" tiin ka han fiam chhunzawm leh a. Min melh dur khup khup tawh hle mai, "Suala...duh leh office ah khan va lerh leh rawh." a han ti leh ngawt a. "Hmm...enge ka lerhna?" ka ti hu mai, ka lerh lo ve chiang bawk em a ni.

"Sawi peih lo." a ti leh deuh hmuk a, lehlam min hawisan a, a mu leh daih mai. Ka tho chhuak a, "Engvangin nge maw ka lerh ngawt ang le aw...hna a tam deuh a, GM ber ka nia, ka rawn haw har ve a ni mai alawm. Nang pawn i hria ang chu, kan inneih hma pawn, tlai deuh deuh ah a nih kha kan haw dun thin." tiin inthlak pah chuan ka hrilh fiah mawlh mawlh a.

Min en miah lo leh lehlam hawi reng chung chuan, "I secretary pawh ka ni tawh hleinem, hmeichhe thawk thar an tam lehnghal a, i va lerh anih kha.." a han ti leh t(r)alh a. Ka nui tawp, "A mak e aw...secretary thar saw mipa aw...Muana, i hriat kha nang pawn." ka han ti leh a.

A rawn tho leh hluai a, "Nui suh, mipa a nih leh nih loh ka sawi lo. Thawk thar an awm tih ka hria, kei aiin an nalh zawk bawk anga, an chhelovin an la naupang zawk bawk anga, min lerh san a nih kha." tiin a tap tuau tawh mai. Ka va pan hnai a, a kawngah chuan ka kuah a.

Hnai takah hian kan in en a, "KA lerh hleinem, zanin phei chu ka bang tlai ber keimah. Security guard nen chiah kan awm, chupawh mipa aw..ka lerh lo ania." tiin ka han thlem a, tah chhuah hmel tak hian a lu chu a bu ve mai a. "Tinge...khati teh vaka i thinrim a? I period dawn hnai ami?" tiin ka han zawt leh a.

"Aih, ka ngai che alawm." tiin a tap tuau a, min kuah a. Ka nupui kha a ni miau va, hetia duat taka kan han inkuah vel chang hi chuan a nuam ve thei riau ania. Duat takin a hmuiah chuan ka fawp a, a nui ve thei ta hram e. Phur tak hian, "Chaw ei ka siam ang che aw.." tiin a la chhuak daih zui.

********

Hriat loh karin hun a lo kal liam leh zung zung a, Rinhlui chuan hmeichhe dang lakah min veng tulh tulh mai. A thikthu a chhe em em a, min ringhlel reng bawk. Kan inhauh phah ta fo mai, thil ho tak tak leh awmze nei lo tak tak avangin kan inhau ta fo mai chu ka nu pawh a ngaih a tha tawh chiah lo.

Min zawt a, "Enge in inhauh ziah chhan...tunlai hi?" a tih te hian chhan dan thiam a har thin. Vawikhat chu ka ning ve ta deuh va, thinrim hmai sena ho te te leh thudik pawh nilo, a ngaihdan leh min rindan avang ringawt a inhauh reng mai chu ka kham ve ta.

"Anih tinge nangpawh tun thlenga i la rai loh? Fa neih hi i hlau viau em ni? Kum chanve vel kan innei ve tawh a, tinge fa min la pek loh?" ka ti ve ta ngat a, min huat hmel kher mai. A ngawi reng ringawt, "Fa neih chu a har viau ami? Nge fa lak i duh zawk? Min hmangaih takzet anih chuan fa pakhat tal te chu min pe ve ta che." tiin ka thinrim chu a zual tulh tulh mai.

A mittui a tla zawih zawih a, "Enge ka chungah hian thleng pawh i hria em ni? Vawikhat pawh min zawt ngai em? I hna ah i buai reng a? Ka tan hun i nei ngai lo, ka ngaih theih zia che hi i hria em?" tiin min vin let hrep mai. Kei lah tlawm mai ka la tum lo, "Harsatna i neih chuan min hrilh reng ta che...i chhuanlam mai mai anih kha." ka lo ti leh deuh hmak.

"Remruatpui, ka chhuanlam a ni hlawl lo. Tikhan min ti kher suh, i nupui bulah pawh hun i hmang tam thei lo. Chuti khawp chuan i hna i ngaihsak a, hna i thawk tak tak pawh a ni lo, i lerh a nih kha."

"A ti leh ta, i duh chuan office staff zawng zawng te, supervisor te, secretary te, HR te leh midang zawng zawngte saw va zawt rawh...lerh min ti ziah lo la nimai."

"Ka zawt bawk lovang, zawh zawh pawh an ngai lo. I awmdan atang hian ka hre thei vek, a lang vek, mi a ka ni bik lo."

"Tunge i a ti a? Buai em em in hna kan thawk a, ka rawn haw ve a, i lo phun leh vak vak ringawt zel mai."

"Ka phun ang chu, i nu nen chiah hetah inah min dah a, ka bulah awm tlem hek che."

"Ehe..anih chuan ka nu chu i lo hne tawh viau em ni a, Lalrinhlu?"

"Ka hne ka ti em ni? Nau ka pai harna chhan pawh hi vawi khat pawh min zawt tawh em? I nu pawn min la zawt lo...min ngaihsak lo dun em anih hi, engvang teh lulin nge ka sawi ang."

Kan thawm chu a ring deuh ni tur a ni, ka nu chu a rawn lut a. Chhan pawh ka chhang ve hman ta lo, ka la hnial chak asin le. Ka nu chuan mak tih hmel tak hian, "Enga ti vak vak nge ni? Thenawm ten an hre pha mai dawn alawm, in thawm ava ring ve.." a rawn ti lut a.

Mahse a tu zawk mah chuan kan chhang lo, kan ngawi dun reng a. Ka nu bawk chuan, "Brandon, va chhuak lawk teh...Rinhlui hi ka lo titi pui ang." a ti a, ka thaw ipik lutuk chu ka a mai dawn hian ka hria. Hnial lem lo chuan ka chhuak a, pawnah ka chhuak tlang nghal daih a.

**********

Ka car chu la chhuakin khawi ber nge pan tur pawh hre chuang lo chuan ka tlan vang vang a, ka thaw te hi a chham mai dawnin ka hria. Meizial zu chung chuan ka tlan zel a, ring taka tumah awm lohna hmuna aw rawl tawp tawp a au vak vak mai hi ka chak a ni.

Zanin kan inhauh kha chuan sawi chhuak lo ve khiah mahse zan dang zawnga kan inhauh apianga a sawi ziah chu, "VAwi khat pawh min hmangaih thu hi ila sawi ve lo, vawi tam ka hrilh tawh che." tih hi a ni. Hei vang ber hian ngawih ka chuh leh thin, a chhan chu ka inthiam loh ve tho vang a ni.

Rinhlui hi ka nupui ni mahse, ka duhthlanna ngei a ka neih ni mahse vawi khat mah ka hmangaih thu hi ka la hrilh lo. Dawt ni hek lo, ka hmangaih lo miau alawm. Ka hmangaih leh tun thlenga ka thinlunga la thi thei lo chu tudang nilovin Puipuii chauh kha ala ni, midang hmangaih ka la nei lo.

Rinhlui erawh hi chuan vawi tam tak min hmangaih thu hi min hrilh thin a, a chang chuan ka inthlahrung ve thin khawp mai. Mahse dawt sawi ka duh loh vang a ni, ka hmangaih miau si lo a tin ni. Ka dik lo pawh a ni maithei e, mahse inhauh reng ringawt hi chu a ninawm ve a ni.

Hetia a thinrim hi chuan thlem hi  a har thei sia, a lungawi har thei sia. MAhse a chang hi chuan han thlem han thlem hian a lungawi ve leh mai thin. Amaherawh chu mi nupuite ang hi a ni ve lo, a lungawi har thei bik lutuk hi a ninawm ber. Chutah pawh a lungawi aiin a lungawi loh tum a tam zawk, zanin kha chu ka kham ve tawh ngang a ni.

*********

Ka tlan zel a, mahse hmun pakhat ka thleng chu ka ding chat mai. Kan tleirawl lai a, high school kan kal laia Puipuii nena Sunday apianga kan kalna thin, kha tlang ngei mai kha ka hmu leh ta. Ka kal khat tawh bawk a, lunglen a ko chhuak chiang leh pek kher mai.

Motor atang chuan ka chhuak a, ding meuhvin ka han en vang vang phawt a. KA mitthlaah chuan Puipuii nena kan inzui chhoh thin lai chu a lo lang leh nghal chuai chuai a, ka mittui pawh a hnam sawk mai. Ka lung a chhe leh em em tawh, a tawp a tawpah chuan ka pan chho ta nge nge a.

Hnim a to tam deuh tawh tih mai loh chu danglamna em em a awm lo, a kawng kawi dan te, thingkung te leh lung lian pui mai awmna pawh kha a la danglam lo, a lo la awm vek. Chung mai mai te pawh chuan Puipuii min ngaih zual tir takzet, tlang chu ka thleng a, kan thut dun thinna lai te chu a en kual a.

Ka nupui Rinhlui vangin ka rilru a hah bawk nen, hna a tam em avang leh ngaihtuah tur a tam em avang chuan keimah chauh a kan company enkawl chu a hahthlak in ka pa ka mamawh ngawi ngawih bawk nen, rilru hahna hlir hi a ni ringawt. Puipuii lah ka hre chhuak leh zel thin bawk nen, ka thinrim lutuk leh thaw ipik lutuk chu ka au vak vak ringawt mai a.

Ka thingthi a, Puipuii ka ngai takzet. Ka pa pawh ka ngai, kan company hi hlawkin sum pawh thawk chhuak reng mah ila, hlimna engmah a tel lo. Rilru hahna hlir zawk a ni, keimah chauh chuan ka tlin lo a ni. Min enkawl puitu tur leh min fuuhtu tura ka ngaih ka nupui ve lah tiang hian a awm leh bawk si.

Nupui ka nei ta mai pawh chu ka inchhir leh tan tawh khawp mai, lo tlangval senior ta mai mai ila tha tur ania. Darkar khat vel chu tlangah chuan ka awm a, sana ka han en chuan dar 10 a lo ri der tawh mai. Ka nu chuan min rawn phone ngei bawk, in lam pan chuan ka haw ve ta a.

***********

In ka thlen chuan ka nu chuan a room ah min ko lut nghal a, "Enge ni a?" ka han ti deuh hlur a. "Lo thu phawt teh, kha..Rinhlui nen chuan kan titi a." a han ti te te a. Kei lah chuan, "Ka ning, min ringhlel reng a...a duh duh danin awm rawh se." ka lo ti leh khur khur mai.

"Amak pung pung thin nangpawh hi, ka thusawi chu ngaithla phawt rawh."

"Enge a sawi a?"

"Ani pawh hman atang tawh khan nau a pai mai thei lo kha a lo mangang ve lutuk a, doctor hnenah a in entir a. Doctor chuan infertile a ni maithei a tia, mahse kum em pawh a la ral lova in la nei mai ang chu min ti tho a. A rukin a in entir reng tho a ni awm e, nakinah kal pui la a tha ang."

Han chhan mai dan pawh ka thiam lo, infertility chungchang a nih phei chuan fa kan nei thei dawn lo a ang dawn riau mai. Ka hlauthawng ngei bawk, vawi tam nupa nun kan hman tawh hnuah pawh, thla 8 vel lai a liam tawh a, a la nei thei lo a nia. Ka nu chuan, "Nang pawh tikhan vin vak vak lo la...in thawm a ring si, a zahthlak." tiin min hauh chhunzawm nghal mawlh mawlh bawk.

 Kan titi leh deuh nual hnu chuan, "Hei, thla leh mai a ni tawh a phai a in kal tur pawh...chuvang chuan inhau inhau tawh su." a han ti chu ka en deuh hu a. "Maw? Tinge? I lo kal ve dawn lo em ni?" tiin ka zawt a. "Kei chu i pi Siami te inah ka awm mai ang, hrih ana.." a ti daih mai, Pi Siami hi ka Pi, ka nu nu zawk a ni.

"A va tul lo tak...kan pathumin kan kal ang chu.."

"A buaithlak daih zawk, vai rama awm ka peih lo chubakah."

"Enge a buaithlakna tur?"

"In nupa in zu awm zawk ula, honeymoon te pawh a ni pah ang chu. Hunawl in neih changin han len chhuah pui la, vin khur khur tawh lo la...ka mu dawn, va mu tawh rawh nang pawh."

*********

Room ah chuan ka va lut a, khum bula thutthlengah chuan phone khawih pah hian a lo thu tum bur mai. En pawh min en lo, a bulah chuan ka va thu a. Biak ka han tum a, mahse sawi mai tur ka hre lo, a awkward duh reuh khawp mai. Tih ngaihna ka hre lo chu ka phone ka han khawih ve ringawt a, "Khawnge i kal?" a rawn ti deuh hmuk.

"Aww..ka chhuak." tih ringawt chuan ka chhang a. Min melh leh deuh hraw a, "I chhuak tih te chu ka hria alawm, khawnge i kal ka tia lawm?" a aia vin chuan a han ti leh a. "KA va chhuak harh mai mai, keimahin.." tiin ka chhang leh a. Min zawt zui tawh lem lo chuan a han ngawi leh reng a, "KA chhuak ve duh." a rawn ti leh hmuk mai.

Ka en a, "Enga? Khawiah maw i chhuah duh?" ka lo ti hu mai. Hnai taka min en pah chuan, "Min chhuah pui ve la, i nupui ka nih hi..." a han ti leh khur khur a. "Hmm...khawnge kan kal anga?" ka lo ti leh hu mai. Min ngei hmel tak hian, "Ka peih lo ti law law rawh, mahni chauh pawh chhuak reng a, mahni nupuite pawh chhuah pui peih lo." tiin a han titau leh nghawng nghawng a nih kha.

Mahse a dinhmun ka hre tawh a, kei pawh ka thinrim a reh tawh bawk nen, "A tha alawm, insiam la...kan leng dawnnia." tiin ka han nuih sak a. Muang chang hian a rawn hawi a, "I ti tak tak em?" a rawn ti leh a, a aw pawh a zawi deuh tan ta khawp mai, a hmel pawh hmuh a nuam leh deuh tawh.

"Umm...i duh na na ah kan kal dawn nia."

"Duhna ber pawh ka nei lo."

Ka han ngaihtuah vang vang a, nichin lawka ka kalna, tlang ah khan hruai ta ila, a pawi thui em lovang chu. "Umm..hmun nuam deuh, view tha deuh ka hria alawm, kan kal dawnnia." ka han ti mai chuh a biangsum langin a han nuih leh sung tawh kha, ka nupui hi chu a engemaw cute riau alawm.

***************************

Motor ah chuan chuang dunin kan leng chhuak dun ta nge nge a, ka nu chu kan kalh hnan tawp mai, tihngaihna dang awm hek lo. Kan tlan zel a, mahse kan ngawi dun reng thung. Meizial chu ka phawrh a, "Ka duh ve ania...min lo t(r)an kep teh." a rawn ti deuh hmak a.

Kei pawh chuan ka phawrh kep a, ka tan sak thlap bawk. Hmeichhe meizial zu hi kei chuan an zahtheihlohna emaw, a sualna hi ka han hre lo khawp a. Mipa pawhin kan zu a, hmeichhia in an zu ve thei lo tih khawi danah mah a inziak lo. Chubakah hmeichhia an nih avanga meizial an zuk hian ka hmuh dan a dan phah lo reng reng, ka han sawi deuh duah a nih chu.

Meizial chu a han zu khu hlat hlat a, "Khawiah chuan nge min hruai dawn a?" tiin min zawt leh a. "Aa...hmana..ihh..hmana, kan englo thinna a nia." ka ti bah deuh nuai mai, han sawi mai tur kha ka hre lo tlat a ni. Ani lah chuan min melh leh deuh hraw a, 

"Engmaw in eng lo? Enge awmzia?" a lo ti leh hlur a.

Nichina kan chhuah dawn kha chuan a biangsum lang ngeiin a nui sen sen kha a ni a, hmeltha ka tih hman tehreng nen, a mood a inthlak leh daih amawni, a tum leh hmuk tawh. Ka chhan mai loh avang chuan, "Engmaw i sawi awmzia ka tih chuuuuu?" tiin min han vin leh khur khur a.

"Hmana kan thil sual tih ruk vena thin ania, tlang ania.."

"Tlang a? Tun ang zan rei tawh ah tlangah kan kal dawn maw?"

"Aww...chutia tlang sang a ni lo, kan thleng tep."

"A hlauhawm loh maw?"

"Hlauh tur engmah a awm lo, a chhip phei chu a zawl nuam lutuk, nuam i ti viau ang."

"A hla em...chhoh vang vang ngai te a ni em?"

"Ni love, kan thleng vat mai ang..engemaw ei duh te i nei em?"

"Aih, engmah ka duh lo. Chubakah zan a rei tawh si, dawr inhawng pawh a awm tawh nang."

"Kan kai tho chawp mai dawn alawm."

"Hmm..i ti zahthlak e a, i ngaih a sam thei lutuk."

Ka chhang tawh lem lo, kan ngawi leh deuh vang vang a. REi lote hnuah chuan kan thleng ve ta a, tlang pan chhohna bulah chuan ka motor chu ka tiding a. Step chhohna chu kawh pah chuan, "Helai hi ania." tiin ka hrilh a. Rinhlui chuan a han thlek deuh vang vang a, "Ka la kal ngai lo reng reng." tih nuah nuah pah chuan car atang chuan a chhuak a, ka zui chhuak ve nghal bawk.

Rinhlui chu a han hawi kual vel a, step te chu a han chhoh en vang vang a. Ner deuh nung pah chuan, "A thui e, ka van chho peih lo." tiin awmze nei tak chuan min han melh a. Ka nui suk ringawt, "Umm...anih hawh, ka paw chho ang che." ka han ti chu a nui leh var var mai.

Step tawp thleng chuan ka paw chho va, ka nupui hi chu a khal nalh talh talh bawk a, ka hah phian mai. A zawl nuam lai kan han thleng chu nuam a ti kher mai, "A boruak a nuam sia, awiii...kal ziah tur a nih hi." a la ti zui. "Nia, kan kal ziah dawn nia." tiin ka chhang ve mai a.

Min rawn nuih seih a, "Fa kan neih hunah pawh tah hian kan hruai thin ang a..." a han ti zawi sap a. Ka kawngah chuan vuanin ka pawt hnai a, "Duhtak, lungngai suh...doctor hnenah chuan kan kal leh dawn nia." tiin a biangah chuan ka dawm a. Ka kut chu a lo fawp zeuh va, "Duhtak a?" tiin a mittui a hnam nghal ringawt.

A awm ve tho, vawikhat mah DUHTAK tih hian ka la ko ngai lo. Hemi zan hian engemaw ka hriat ni...ka kawchhunga Romeo hi a nung tlat. Kan inhauh loh vang te pawh a ni mahna, chubakah nau a pai ve theih dawn leh dawn loh pawh kan hre der si lova, ka khawngaih riau a ni.

Keimah zawk chu ka lai lek lek mai, "Aa..ihh, nupa inkoh dan alawm." ka han ti ringawt a, a nui nasa mai. "Hawh, i thu phawt teh ang." tiin kan thu dun a, "Doctor chu engtik nge i hmuh leh dawn?" tiin ka han zawt a. "Kar leh ah aniang." tiin min chhang a.

"Min hrilh la, ka lo kal pui dawn che nia."

"Aaa...ka personal doctor ania, ka thianpa a ni bawk a...i buai ve thei sia."

"Hmm..khera che. Chuan i personal doctor chu mipa maw? A lerh em? Kei chu ka thikthu a chhe teh mai ania."

"Lerh ve e, mahse kei chu i nupui ka nia, chubakah amah pawhin a hria a...a fel lutuk, tlemin a tuai deuh reuh lehnghal."

"Ka awih lo e...i lerh a nih kha."

A nui vak vak a, "Ka style i la emai a, tak tak ana...i peih leh peih loh animai." tiin min chhang a. Kan titi dun nual a, kan la sawi ho ropui zui. Kum 30 ve meuh tawh si hian ka nupui chu Iron Man chungchang ka han sawi pui a nih kha, ani Rinhlui zawk lah chuan a lo hre thui phian lehnghal.

"Brandon, ka thikthu chhe lutuk hi a chang chuan min ning thin ang tiraw?" a rawn ti deuh thut mai. "Aa...ngati nge min zawh deuh thut a?" tiin ka zawt let a. Za lem lo tak chuan a khi suk a, "Ka ta chauh ni la ka duh, hmeichhe dang zawng zawng chu ka thik vek. Chuvang chuan ka bula i awm lo rei deuh chuan ka ngaih a tha lo hman vek zel a, aaa...ka thikthu chhe lutuk hi keipawh hian ka ning." a han ti deuh nuah nuah a.

"I period amaw ka ti hial thin alawm, mahse tihian i awm reng zel a. Nupa kan nia, kan harsatnate chu kan inhrilh tur alawm. Inhauh reng hi a ninawm a, tuna hetia inngeih taka awm hian a nuam ka ti." tiin ka chhang a. Ka mal chungah chuan a rawn thu a, "Ka tihpalh aw...theih tawp chhuah in keipawh zaidam ka zir tawh ang." a han ti deuh kher a.

KA nui huk mai, "Hmm...enge i nuih a? Nui bawk suh, ka tawngkam thiam ve dan a nih kha." tiin a han tum bur a, ava han cute tak. "Umm..ka nui tawh lovang, kan haw tawh dawn mi niang?" ka han ti a. "Umm..mahse chumi hma in.." a sawi zawh hma ham chuan min fawp thut mai.

Keipawh chuan ka lo chhang let vat a, duhthawh tak chuan kan infawp a. Hetianga hlim taka inhau miah lova kan awmdun hi chuan a nuam ka ti ve thin, a bikin zanin tak phei hi chu a nuam ka ti ngawih ngawih. Kan inneih hnu a nuam ka la tih ve ber a ni ngei ang.

Kan inbe khat thin si a, a chang chuan ka nupui a ni bawk a ka ngai ve thin khawp mai. Puipuii pawh ka theihnghilh chang a tam thin a bula ka awm hi chuan, mahse ka rilru no lutuk vang hi nge ni, kan inhauh va, ka thinrim chang hian ka pa leh Puipuii kha ka ngai thin takzet.

*******************************

TO BE CONTINUE