THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 4

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 4

***********************

In ka haw pawh chu ka nui lut nghal vur vur mai, ka hlim a ni tawp mai a ni. Ka pian tirh ata a vawikhatna atan, ka hmuh tirh phat atanga ka duh ruk em em leh ka vei em em mai chu ka bialnu a ni ve dawn ta. He khawvelah hian kei aia vannei lo awm pawh nise ka thik nek love, vannei ka inti hliah hliah.

Tluangi pawh khan min lo ngei leh tak tak lo aniang chu, a enga pawh chu nise, ka hlim hliah hliah mai. Roomah ka lut tlang nghal a, ka nau DAvid-a chuan khumah a thawmhnaw a lo thlep fel mek a. Keilah hlim over tawh lutuk chuan ka va bawh thlu nghal ringawt a, "Engmah lah hi i hre ve der mai silovah." tih pah chuan a sam chu a tuai thur sak vak a.

Ani lah chuan hrethiam hek lo, "Enge...enge khatia min tih vak vak, i mawl ami?" tiin a lo t(r)e chel chul mai. Phawk hru hian min en a, "A nuam a ni tawp mai a ni, mawww LAl David hmelchhepa." te ka han ti thul, sawi tur ber pawh ka hre lo a ni. "Engmaw nuam?" a lo ti leh hu mai.

"I hrethiam pha ve lovang, ila naupang emai." ka lo ti deuh kher a, min ner khum nasa mai. Thawmhnaw chu a thleh fel chhunzawm leh mawlh mawlh a, min be zui tawh lem lo. Keipawh chu ka inthlak a, homework kan nei lem lo bawk nen, ka hlim lutuk awm ngaihna hre thlawt lo chu ka leng kual a.

Ruata te inah chuan kan lengkhawm a, waiwai te bawlin ka bialnu thar neih chu kan lawm ho hi a ni ringawt. Video games te kan khel a, hetih hunlaia kan khelh thin ve chu Mario, Contra, Tank leh Street Fight tih vel kha ania, PubG leh ML tih vel te chu a la awm lo hrim hrim mai nilovin, smart phone pawh ala awm lo.

**************************

Zanah chuan maths home-work chu ka ti mek a, ka nui deuh vur vur ni ngei tur a ni, ka nau chuan min en leh hu hu thin. KA nui lai chu ka tawp hmak a, "Enge min en vak vak a?" ka han ti deuh hlur a. "Vawiin tlai ilo haw atang khan i dik lo riau, chaw eilai te khan i khi leh suk suk zel a." a han ti nuah nuah a.

"Aww...ka nuih aza a ka nui a nimai, ngaih that lohna tur a awm lo." ka ti leh deuh hmuk a, min be zui ta bik lo. Home-work chu ka ti zova, sana ka en a, dar 8 a lo pel chauh mai. Meizial zuk ruk a hun chiah e, pawnah chuan ka chhuak a. Thenawm dawrah chuan ka pa ta tur anga sawiin meizial chu ka lei a, zunin phenah ka zu ru leh ham ham mai.

Ka rilru ah chuan Puipuii chu a awm leh reng tawh a, ka bialnu thar chu ka ngai takzet a ni. Ngaihzawng ka la nei ngai silova, zei lo deuh hian ka awm thin ang tih te chu ka han zeldin lawk vel thawt thawt a. Han inngaizawn a, han inkawp ve tak tak chu ka chak tawh, ka phur tawh lutuk hi a ni tawp.

Naktuk ni vat vat tawh se ka ti hle mai, ka hmuh chak leh takzet tawh a ni. Ahma anga ka hmuh chakna nen pawh a dan a dang ta deuh, tunah chuan ka bialnu a ni tawh tlat. Kan lendun hun vel tur te leh kan han nui dun har har tur te chu mitthlaah chuan ka han hmu leh nghal thawt thawt tawh a, darkar chanve vel zet ka suangtuahna rama ka chen hnu chuan ka haw ve thei ta hram a.

********************** 

Zing a lo ni leh ta, ka mut har tehreng nen ka tho hma ver ver khawp mai. Zan hmasa lawk khan ka helhhawlh nge mawni, dar 2 ah pawh khan ka khumah ka let ka let kha ala nia. Tuk danga exer la ngai mang hlei lo kha kan inkawt step ah te chuan ka han tlan ve thauh thauh va, fai takin ka inbual leh bawk a.

Ka inbual pah te chhuan ka zai rut rut a, ka inbual zo bathroom atanga ka chhuak chiah chu ka nu pawh a rawn tho ve chiah. Mak tih hmel deuh hian min en a, "Ehe, i inbual ami?" a ti hu mai. Kei lah chuan tum hmuk hian, "Ka inbual chu a nih hi." ka lo ti deuh hlur a.

Bathroom-a luh pah chuan, "I piangthar amawni le, i thawh hma ve khiah ni...chuta karah i la inbual zui a.." a han ti nuah nuah a, mahse ka chhang tawh lem lo. Ka thawmhnawte chu tuk danga ka nu kut veka ka dah thin kha keimah ngeiin ka han nawt deuh hliau hliau va, ka lo nawt mar thiam ve phian lehnghal.

Chaw ei khamah chuan rang takin ka insiam a, ka pheikhawk pawh ka brush tle tha hliau hliau khawp mai. Ka chhungte ngaih hi a tha vak lo hialin ka hria, min en deuh hu hu hlawm reng mai. Tichuan Bus ka chang a, reilo teah chuan a rawn thleng a. KA chuang lut nghal a, a hmaa ka thutna thin, ka seat hual ah chuan ka thu nghal chat.

*****************

Puipuii te veng kan thleng a, ka phur tawh ngei mai. Bus chhungah chuan a thiannu Tlaungi nen bawk chuan an rawn lut dun leh ta a, min rawn nuih leh sen sen mai. Nidang ai zawngin a hmeltha ni mai hian ka hria, a duhawm hian a duhawm hliah hliah.

Tluangi pawn min melh rum tawh em bik love, ani pawn min rawn nuih ve suk mai. Puipuii chu ka bulah chuan a rawn thu nghal chat a, kan hnung chiah ah chuan Tluangi leh an classmate hmeichhe pakhat an thu dun bawk. "Tukin i tho nuam maw?" tiin bul ka han tan hmasa a.

A lu a lo bu nghat a, "Umm..nangzawk?" tiin min lo zawt let a. "Tho nuam tak ka ni, ka hlim lutuk hi ka nui ver ver reng mai." tiin nui chungin ka chhang a. Min nek deuh zeuh pah chuan, "I over ea, ka awih kher lo." tiin a han lai deuh tut tut a, ava duhawm zual tak em.

"Ania lawm, enge i awih loh?"

"Min tih laih i tum a nih kha.."

"Naa, a awihawm loh emai. Anih chaw te i ei puar em?"

"Um puar e, nangzawk?"

"Keipawh ka puar..ti ila, um..puar a ni mai."

Chutih lai chuan kan hnung atang chuan Tluangi chu a rawn dak zeuh va, "A nuam in va ti awm duh ve a...single kan chep hle mai." a rawn ti deuh kher a, kan nui deuh dar dar a. Hringnun chu a wow khawp mai, ka thiante reng reng rilru ah an awm thei lo. "Home-work te i ti maw...hrem ngaiin i awm leh ange?" Puipuii chuan a han ti leh a.

"Hmm..hrem ngaiin ka awm i hre tawh ami?" tiin ka han ner deuh sak a. Nui chung hian, "Ka hmuh hmasak ber che khan an hrem che...assembly naah i thianpa nen in rawn tlai khan."tiin min chhang a. "Naa..kha te kha chu kan tlai vang alawm, homework te chu ka ti ziah reng aw.." ka han ti ve leh a.

Nui deuh put put chung chuan, "Chupawh nise, an hrem thin che ka ring." ala ti lui tallh a, hnial hrat reuh lutuk mai. Kan titi leh fe hnu chuan school chu kan thleng leh dawn ta der mai, hei ai hian kan school hi la hla deuh se ka van ti tak em, tukin kher kher chu.

"Lunch BReak chu inhmu ang aw...rawn tlai tawh suh ang che." tiin min han melh deuh khur a, a mitmeng han dur ve deuh khup te chu a cute zual tawlh tawlh zawk mai hian ka hria. "Khawi zawk ah, pipu nge.." ka tih lai chuan hnunglam atang chuan Tluangi bawk chuan, "SAwi chiang vat ru, in awmlohna zawk zawk ah awm ka duh." a rawn ti leh zuah zuah mai.

Hnunglam chu ka va hawi a, "Aww...ilo awm ve ang chu.." ka han ti ve deuh kher a, min melh rum lehpek teh asin. "Nangni inngaizawng bulah ka awm ve reng peih lo." a la ti deuh khur khur zui, third wheel chu a peih lo ve hle a ni ngei ang. Bus chu a ding a, kan chhuk ta a.

********************

VAwiin phei chu a nuam lehzual dawn, a chhan chu Friday a ni tlat. Friday ah hi chuan Lunch Break zawh chawhnu zawng hi school tihfai emaw, thildang kan ti thin a, class kan la ngai lo. Zirtirtute mood a fuh chang phei chuan class room bang kan hawng tlang a, high-school ho zawng te hi kan zai thup thup zel.

A chang leh kan inkhel a, a chang leh lam te kan zir thin bawk. Eng eng emaw school competition te hi a lo awm ve leh zeuh zeuh zel a, tiang ah te chuan eng eng item emaw ah te chuan ka tel ve zeuh zeuh thin. Short Break ah em hi chuan Puipuii chu ka hmu ngai lo, a chhan chu a rei lo ve bawk em a, ka kham dawn silova.

Ka thiante chuan a khat tawk hian min chhaih deuh reng a, kan classmate thenkhatte pawn thawm chu an hre ve deuh ni ngei tur a ni. Luch Break a lo ni leh ta a, tifin pawh ka ei zo rang teh asin. Meizial zu ru tur chuan kan liam thla leh dial hlawm a, zuk zawh veleh chuan thingkung lam chu ka pan nghal a.

An lo awm leh der tawh, nui vur vur chung chuan ka zuk chhuk ve nghal a. Ka zu thlen chiah chuan Tluangi chu a lo meng dur leh khup mai, "Puipui hei, i bialpa a lo thleng." a la ti deuh hmuk zui. Puipuii chu a rawn hawi a, "Hawh..lo thu rawh." a lo ti nghal vat.

A bulah chuan ka thu a, "Tifin i ei puar maw?" tiin ka han zawt a, Tluangi chu a lo nui huk mai. Ka han melh ve deuh khur a, "NGe i lo nuih?" tiin ka han vin deuh hlur a. Ngeiawm zeta lo khik suk pah hian, "A zawh tur hriat loh thlak emai a.." a la ti zui. Nia a dik ve tho mai, ngaihzawng ka nei ngai miau lova, engmah hre ve hek lo.

Zaidam tak hian, "Umm..ka ei puar alawm." tiin Puipuii chuan min lo chhang mai a. Tluangi bawk chu a han thaw leh deuh hluai a, "Keizawng ka kal ange, ka hnawk tlatin ka hria." tih pah chuan chhan pawh kan chhan hma hma chuan a kal daih mai, a la rawn hawi let thak lo zui.

A kal liam hnu chuan Puipuii nen chuan kan han in en a, kan nui leh dun ang suk suk a. Kan ngawi dun leh vang vang a, "Tluangi hian min ngei hmel thei e.." ka han ti a. Puipuii chuan a lu lo thingin, "A teuh lo, a ngei lovang che." a lo ti vat a. "Min melh rum thei sia, min hua a ang ka ti thin." ka han ti leh a.

"Tinge a ngei ngawt che anga?"

"Aaa..ka hre bik lo, mi hi a vin deuh hlur hlur zel sia."

"A ho lutuk, a zaidam lutuk lova. A thinchhe ve hrim hrim alawm, keipawh min vin vak vak zel."

"Tinge i in vin tir vak vak? I thiam loh a nih loh te chuan, chubakah a thuhnuaiah a dah mah mah che in ka hria."

"Dah love, a chang te chuan ka thusawi a awih ve thei lutuk."

"Umm a nih chu, min melh rum thei em a, chuvang ania ka sawi mai mai."

"Engah mah ngai suh, a men dan ve hrim hrim alawm."

Kan ngawih dun leh vang vang hnu chuan, "Min duh tak tak em?" tiin ka han zawt leh a. A nui deuh suk a, "Umm..ka duh che lawm. Mahse ka hlauthawng, ka rilru a nuam lo." tiin min chhang ta mai a, a lawmawm rual rualin a lawmawm loh bawk. "Engati maw? Buaina i nei em ni?" tiin ka zawt nghal vat a.

"Buaina tih ah...ka chhungte hian ngaihzawng neih an la phal lo lutuk a." tiin min chhang leh a. Kei lah chuan, "A ho e, keipawh an la phal em em bik hleinem. Chubakah tuman an hre dawn hleinem, i chhungte pawn i sawi loh te chuan an hre dawn hleinem." ka lo ti sam et a.

MAhse Puipuii hmel chu a dik lo tlat, hlim lohna riau a nei a ni tih ka hre thei nghal. Za lo tih hriat taka nuih suk pah chuan, "Chutiang ngawt a ni lo, kum 14 bak ila nilova, tu mipa mah ngaih melh ve reng reng suh ang che tiin ka pa hian nitin min hrilh in min zilh ziah a, mipa ka hnaih hi an phal lo bur." tiin min chhang leh a.

Chhan pawh ka chhang lo, han chhan mai dan ka hre lo a ni. Chutah amah bawk chuan, "Tluangi bulah hian ka pa hian veng tha rawh, a mawl si...star te kha a lo nei ange tiin a hrilh fo lehnghal a, heivang hi ania a tir pawh khan i lakah Tluangi kha a strict em em ni." a han ti leh a.

Kei lah ka ngaihdan a lo ni vak lo, "Hmm..enge a lo strict ve vakna tur awm a? I pa in a hrilh vang chuan maw? A thu lo emai, chubakah in inrual reng a, chutia a ven vak bikna tur che a awm lo." ka lo ti nghal deuh khur khur mai. "Nia ka hria alawm, min ven loh em hi..hei tunah pawh." tiin a han nui leh sen sen a, ka thinrimna pawh vhawp leh chilhin a reh nghal vekin ka hria.

Kan titi leh deuh fe hnu chuan dar a ri a, "Naa..avan ri hma tak." tiin ka phun nghal nuah nuah mai. Min nghawk zeuh pah hian Puipuii chuan, "Tinge, min la kham lo ami?" a han ti vel deuh kher a, kei vala hi ka lai tep alawm mawle. "Umm...i bulah ka la awm chak asin le." ka lo ti ve ngei bawk a.

Boruak pawh romantic tan nghal hle mai, a daih rei turah ngai phawt ila. "E taka, friday ah hi chuan chawhnu class a awm lo tiraw?" tiin min zawt deuh teh thut a. "Aw..awmlo ve...mahse vawiin hian eng work ber nge kan tih dawn chu ka hre lo." tiin ka lo chhang a.

"Umm a nih chu, a nih chuan hawh...chho ila." tih pah chuan chhoh a tum a, mahse kei erawh chuan ka la duh tlat lo. A chhan chu vawiin ni hian kei Romeo hi ka che dawn, ka han che ve tak tak ange. Mahse ka zam khawp mai, zam tak ka ni. Puia, Amosa leh Ruata te huaisenna tlem puk belh chuan Puipuii banah chuan ka chelh a.

Mak tih hmek taka min en deuh hu chung chuan, "Tinge? Dar a ri tawh ania?" tiin min zawt nghal vat a. Ka han hawi kual te te a, student dang ho chu an reh ta maw tih ah chuan thingkung hnung lamah chuan ka han kai phei ve rawk a, a mitah tak chuan ka en a.

Mak a tih hmelin a hrilhhai takzet tih a mitmeng atang chuan ka hre thei, mahse ka thil tih tum hi ka ti tlang thovang, ka start ve laklawh tawh tlat. A hmui senno chek mai, lipstick hnawih chawp ngai miah lova tai hlar mai chu ka han en ta vang vang a, a mawiin a va han no nalh tak em.

"Eng...enge i tih dawn, U Brandon?" tiin a thaw dep dep a, mahse ka chhang lo. Kiss tum chuan ka hnaih zel a, "U, U..Bran.." a sawi hleithei lo, kei lah chuan ka hnaih chhunzawm zel a. A tawpah chuan a maimitchhing tawp, zawimuang chuan a hmuiah tak mai chuan ka zu fawp ta.

Ka vawikhat hmeichhe fawhna a ni a, chutah ka duh ruk em em, ka bialnu ni ta Lalrempuii ngei mai ala ni zui. Nuam tak a ni nuam tak, khawvel vir mek lai hi a ding rih ni hialin ka hria, ka thinphu dup dup ri kha ka hre thei bawk. Engkim kha mumang ang mai hian ka hre bawk, mahse a va han nuam chiang tak em.

Min chhanglet miah lo, dry kiss diktak a ni. Mahse vawikhat inkiss-na ah chuan ka duh khawp ka hmu ti ila ka sawi thiam dan ber ania, han sawi vak ngaihna ka hre lo. A nuam a ni tawp mai, second- 10 vel lai chu ka kiss ve vang vang a. Ka hmui chu ka dah sawn a, ani erawh ala che miah lo.

Tichuan a rawn meng a, milim ang mai hian ala ding khawng reng. "KA kal aw.." tiin ka han phun vel deuh sap a, mahse min chhang lo. KA chhoh san ta a, class-a ka luh hnu ah chuan muang changa a lo chho mek chu kan class room tukverh atang chuan ka lo en reng a.

First kiss ah pawh Puipuii, ka duh ber mai chu ka fawp ve ta. Nuam tak a ni, ka hlim lutuk hi sawi ngaihna pawh ka hre lo. Sawi lo mai ila a fuh zawk ang, mahse ka sawi lo thei si lo. Ka nui deuh vur vur reng ringawt mai, ka thiante pathum erawh ka la hrilh duh lo, ka la zep tlat dawn.

**********************

Vawiin chawhnu chu school compound tih fai tur a ni tlat mai, mahse pawi lo, class lak ai chuan a nuam zawk tho tho. Class te te in kan inthen darh a, school compound chhung chu kan ti fai ta sup sup hlawm a. KAn thian pali bik te chuan nidang ang bawkin a hrangin kan awm leh a, bawlhlawh chhar fai pah chuan kan titi a.

Chutia kan titi lai chuan kan bul deuh lawka amah chauhva Tluangi hmun lo phiat chu ka va hmu a, rang takin ka va pan nghal a. Ka bawlhhlawh chhar sa te chu a bula dustbin ah chuan va paih pah chuan, "Kha iva mal ve..khawnge Puipuii?" tiin ka va zawt a.

Min lo hmu chiah chu a ding ngil nghal awt a, a hawi kual deuh nghal hru hru bawk a. Chutah zawite hian, "Hey Hmela, i kiss ami a?" a rawn ti su su a, a la thinrim hmel em em lehnghal. Kei lah ka lo intithei khawp mai, "Kiss ang chu...enge nivak, inngaizawng kan nia, a thiang vek alawm." tiin ka lo chhang ve deuh ngat a.

Na vak lo hian ka ke ah chuan a hmunphiah ken lai chuan min han hlap deuh zeuh va, "MAwla, nge i kiss kher? A awmdan saw ala dik thei lo, a la khur char char." a ti ta mai a. "Engati nge? A thinrim ami?" ka lo ti nghal vat a. "Rim lo rim lo, tu mipa mahin an la kiss ngai hleinem." tiin min chhang leh a.

"Keipawh tu hmeichhia mah ka la kiss bik lo."

"I kiss lo animai alawm, ka sawi tum i man lo."

"Enge i sawi tum chu sawi la?"

"I kal chak pui lutuk, chubakah enge kiss kher a tulna?"

"Ka kal chak vakna ka hre lo, inngaizawng ah chuan inkiss te chu a awm ngei ngei tur alawm."

Min chhan leh hma chuan Miss Tetei a lo kal a, "Tluangi, i phiah zawh tawh chuan saw lai saw lo phiat leh rawh aw.." a rawn tih avang chuan rum deuh a min melh pah hian a kal sawn ta a, keipawh chu ka kal sawn ve nghal bawk. Rilru a ti nuam lo kher mai, ka kiss avang khan Puipuii chuan min haw ta em mawni le tiin ka inngaihtuah leh ta char char mai.

Tluangi sawi tak ang khan ka kal chak pui mah mah emawni aw? Mahse ka kiss kha a ni mai a, a diklohna ka hre si lo. Kan kum ala naupang ti dawn ila, kum 13 mi lek lek bialnu/bialpa nei ka hre hnem mai bawk si a, kan vengah pawh an kat nuk alawm. Kei te phei chu kum 16 ka ni ve tawh a, ngaihzawng nei rual chu ka ni ve tawh chiang emai.

 

********************************

Ban a lo hun a, Puipuii chu ka zawng kual leh nghal char char a. Nidanga min lo nghah thinna ah bawk chuan, bus hnungah bawk chuan ka va en leh a. A lo awm leh ngei e, mahse Tluangi thil sawi phiangsen vang vek khan inthlahrunna ka nei leh tawh tlat mai.

Min lo en a, a nui tawi ta tak mai. Nuam lo duh ngei mai, kiss kha a lo duh vak lo a ni ngei ang. Ka inthiamlo angreng kher mai a, mahse min hmu laklawk tawh. A bulah chuan ka va thu a, "I chau em?" tiin ka han zawt a. "Aih chau love...khawi lai nge in tih fai a, nangni? Ka hmu miah lo che a, ka lo zawng ru deuh che a.." a tih leh tak lawi si ah chuan tlem chuan ka confi leh ta deuh e.

"Tlang lam kan tifai daih a, chuvang a nih chu...nang khawiah nge i awm zawk a?" tiin ka han zawt let ve leh a. "Kei leh kan class ami hmeichhe  pathumte nen teacher te office chhung kan phiat fai a, a kawt zawng zawng nen, a ninawm rap." tiin a phun deuh nuah nuah a.

Ka han hawi kual a, Tluangi chu ka hmu ve miah lo. "Tinge i hawi kual vak vak a? I thiante i zawng ami?" tiin min lo zawt vat a. "Aih zawng love, khawnge i thiannu Tluangi hi a awm a?" tiin ka zawt let a. "Bus chhungah, ka lo nghak ang che...in inbe tui leh awm emai atia." tiin nui chung hian min chhang a.

Ka aw ka han thian deuh kharh kharh phawt a, inthlahrung tak hian, "Enteh Puipui, ihmaw...vawiin kha..ka kiss che kha.." ka ti dek dek chu a hmai a sen nghal tawn tawn mai, a zak tih ka hre thei nghal. Ka banah chuan na lo te hian min beng a, "Sawi tawh suh..ka zak ania." a han ti nghal ringawt a.

"Ihh englo, ka sawi tum zawk chu...i duh lo viau em? Ka zakthei lo i ti em?"

"Hmm...i zakthei lo ka ti mi?"

"Ti chuang love, ihh...i duh lo viau em ni?"

"Duhloh thu engtik laiin nge ka sawi?"

"Hehe..aa..ka inthlahrung ve tho va."

Hnuai lam melh reng chung chuan a nui ta var var mai, "I inthlahrung lo aniang min kiss ringawt alawm, dil pawh min dil lovin.." ala ti zui. Inthlahrun sa nen, ka inthlahrung tulh tulh zawk. Za lo taka nuih suk pah chuan, "Nia ka dil si lo che a, nuam lo ka tia.." ka han ti leh a.

Chutah a rawn hawi chhuak a, "Keichu a nuam ka ti...ka feel tawp." a rawn ti mai chu keimah zawk chuan ka en deuh hu mai. MAhse ka tawng leh hma chuan, "Ka lut dawn aw...Monday ah chauh kan inhmu leh awm sia, i lo in enkawl tha dawn nia." tih pah chuan bus chhungah chuan min luhsan ta daih a.

Engtia han awm tur nge, engtia han react tur nge pawh ka hre lo. KA lawm bawk si, mak ti bawk si nen chuan ka ni deuh nuai hi a ni ber mai. NGaihzawng ka nei ngai lo bawk nen, han neih tak meuh ah chuan nikhat lek hun hman dunnaah pawh hriatthiam loh tur thil a tam hle mai.

Bus-in ka haw ta lo, haw kawngah chuan meizial zuk pah chuan ka thiante pathum chu Puipuii nena kan inkiss thu chu ka han hrilh ta a nih kha. Ruata phei chu a t(r)e ring lutuk kha pa pakhatin a hauh hial kha, kei ai mah mah chuan an lawm zawk amaw tih mai tur a ni.

Puia lah chuan, "Niminah pawh tikhawp khan i thinrim a min vin hlur kha ania, a zia tho ve..hei tunah chuan i hlim hawr hawr tawh emai." tiin min la nuih tiah tiah zui. Ruata lah a lo nghal nasa, "I star ve tho kha aw a tir te chuan, Brandon-a bulah pawh min chuhpui suh i tih kha." tiin a lo la chhaih zui.

Amosa lah chuan, "KEichu Puipuii kha chu ka duh chi a ni lo hrim hrim a, a thiannu Tluangi kha a hmeltha fe zawk." a lo ti vel ham ham a. "I chang chuang lovang." ka han ti mai chu a duh lo nasa mai. Kan haw lam chu kan bengchheng hlawm kher mai, a nuam ve bawk em a ni.

**************************

Saturday leh Sunday lo awm kher kher hi chu aw...pawi ka tih ve vawikhatna a ni hial ang. School kan chak ngai reng reng lo kha, ngaihzawng han neih ve meuh chuan chak tak ka ni ringawt. Monday ni vat vat se ka ti ngei mai, school ni lo, hmun dang free ren rawna thlamuang taka han kiss vawng vawng ka chak a ni.

Zan a lo ni leh ta a, friday zan a ni bawk a lehkha zir lo phawt mai teh ang. Ka pa chuan thu lawmawm tak a dawng bawk a, chu chu an company te chu Bangalore lama company ten partnership siam puiah an rawn sawm hi a lo ni. Sawi tak ang khan kan chhungkua hi kan harsa lem lo ka tih tawh kha, ka pa hi RALTE INN neitu leh GEneral MAnager a ni a.

Insawi theihna nilo se, hetih hunlai hi chuan sum te kha ala hlu em em a, kan vengah mai nilo, Aizawl khawchhung hrim hrim ah kha chuan hausa leh khawsa thei tiin kan lar ve deuh hat thin. Ka pa hian vawi tam min hrilh thin, "I ta vek tur, i rochun vek tur ala nih hi." tiin.

Mahse ala rei ngat ngat dawn emai, tunah class 10 kan zir ve tan chauh a nia. Chubakah min duat lo emai, ka nau David-a chu a duh duh an leisak a, kei ve chu cheng 10 lek dil pawn min hauh hrep pahin min pe ve hram hram thin. Tin, thil pakhat chu, ka pa hi a eiru ve miah lo ania.

Ka pa a nih avanga ka sawi mawi leh ka fak ni lo se, midangte pawhin min hrilh thin fo. Ka pi leh pute kha rethei ve tak an ni a, an khawsa ve tawk tawk thin. Ka pa hi a taima a, naupang te anih atangin a tum ruh em em a. Lehkha a thiam theiin pakhatna a ni zat zat thin a ni awm e, college ah pawh topper a ni char char thin an ti bawk.

Amah tak hi chu a insawi ve ngai lem lo, chubakah pa tawng tam lo ve tak mai hi a nia. Kei ni ila, topper ka ni khat ropui sia, ka insawithei thei ngawtin ania ka rin ni. A naupan ve lai pawh khan school kal chung leh lehkha zir chung khan a inhlawh tang tang thin a, tun dinhmun a thlen theihna chhan pawh hi a taimak vang a ni tiin miin min hrilh thin.

Mahse a harsatna lian ber leh a hmelma lian ber, ka nu pawh a mangan ve em em thinna chu zuk leh hmuam a sim thei lo ber hi a ni. Meizial a heh em em a, amah pawh a dum vek tawh. Chubakah thaw hah hi a nei ve deuh reuh va, a tlangval lai thlalak nen phei chuan in ang tawh lo tak hi an ni.

A taksa te pawh a chak lo tan a, han sim tum ve thin mahse a thei ngang lo. Chutah sa ala duh em em zui, ka nu hian a control thin a, mahse control hleihtheih pawh hi a ni thin lo. A infit tawh lo ropui sia, keipawh a chang chuan ka lo mangang ve thin. Amaherawh chu zu erawh a in ngai hauh lo thung a, ruihtheihthil engmah a ti ngai lo hi a lawmawm ve riau.

An fapa bawk hi ania sual chu, kum 14 ka nih atang khan grape wine han in ve ka ching a, kar lovah zu ah ka in upgrade ve zel a. Tlangval dangte angin in buk buk chu nilo mah ila, engemaw occasion velah hi chuan chatthla khawp khawp chuan ka ti ve fo mai.

Chutia chhungte tana hnawk khawpa sual chu ka ni bik lo, keima tawkah chuan fel ka inti ve viau. Ka insawiselna leh ka induhloh ve deuhna chu meizial ka zu hma lutuk hi a ni ber, kum 16 chauh ka la nia, puitling zuk zat zet hi school kal loh ni phei chuan ka zu ve thin.

KA nu leh pate hian ka meizial zuk pawh hi an hre vek tawh a, a chhan pawh lukham hnuaiah te, ka school bag ah te an lo man ve fo tawh bawk nen. Chumai ala ni lo, Sir MAWitea bawk kha, he mihringpa hian ka chhungte bula min report hi a ching zuah zuah lutuk a, ka puitlin hunah ka la beng khawp ang.

Ka meizial emaw, ka lighter chauh pawh nise, ka nu in min man tawh hi chuan min vin hrep zel a, min vaw lo chauh zel. Mahse ka nu leh pate hian kut min la thlak eih lo, ka hriat theih chinah chuan. Tin, ka pa hi ka fak zual leh na pakhat bawk chu, ka meizial a man te hian ka nu angin min vin ve pawng pawng ngai lova, tha takin a pawi zia te min hrilh zawk thin, ka sim chuang hlei lova. 

Sawi tak ang khan ka pa hi hrisello ve viau mah se, Pathian zarah damdawiina han tlan luh pui buan buan ngai erawh chuan ala awm lo thung. Tin, ka nau DAvid-a pawh hi hrisello ve tak mai ania, an duat tawh sa nen ala hrisello khanglang zui. Huiham, ka sawi tui dawn tlat, engpawh nise zanin chu mu leh phawt mai teh ang.

**********************

TO BE CONTINUE