THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 3

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 3

************

Zan a lo ni a, rin lawk ang ngeiin ka lehkha zir mek chu rilru ah a lut lo chiang teh e. Ka mitthlaah chuan Puipuii hlir a awm, min biak lai te, min nuih  lai te leh a han lai deuh put put lai te chu ka ngaihtuah chhuak zel a. Ka lehkha zir chu ka ngaihsak hlawl lo, ka han chhiar rik ve lauh lauh pawh chuan awmzia a nei thui lo kher mai.

Ka chhiar mek lai pawh chuan ka rilru chu hmun dang ah a awm daih, ka thiam lo a nih vaih chuan Sir Mawitea'n min hlap nasa dawn lutuk, min lo haw sa bik riau lehnghal nen. Rilru a luh tir tum chuan ka han zir ve leh tang tang a, tam phei chu nilo mahse Puipuii ngaihtuah reng chung chuan thiam a har takzet.

Darkar chanve vel engmah dang ngaihtuah lo leh rilru pe taka ka han zir tak tak chuan ka thiam rang leh lawi si kher mai, mahse naktuk ah hian min zawh hunah ka theihnghilh leh nghal vek ang tih erawh ka hlau angreng hle mai. En lo te chuan ka han sawi zat zat chhin a, ka thiam thawkhat chuan ka hria.

Sana ka han en a, dar 9 a lo pel der tawh mai. Dar 7:30 atanga zir tan kha ka nia, rilru pe miah lo khan darkar 1 vel lai ka lo chhiar vel mai mai tihna a nih chu. Ka pa a rawn lut leh thut a, "Khaa...a tlai tak tak hma in kuhva cheng 10 man va lei teh, i nau eitur rawn lei tel bawk la." tih pah chuan cheng 50 hi ka dawhkanah chuan a rawn dah a.

Hetih hunlai hian kuhva hring fun hi cheng nga in panga a ni a, cheng 10 in sawm a ni bawk. "I duhzawng lei ve bawk la.." tih awm reng reng lo mai, a naupang zawk a nih vang nge, David-a hi chu an duat bik riau ka ti lo thei lo. Ka pa chu a chhuak leh nghal a, "Enge i duh?" tia vin deuh hlur chung chuan ka nau chu ka va melh hrawk a.

Inthlahrun hmel tak hian, "Waiwai a ni mai, i ta tur leh ka ta tur..kan ei dun anga.." tiin min han tlawn vel ngei a nih chu. Lehlamah chuan ka nau hian min zah ve hle chuan ka hria, mahse ka nu leh pate hian kei aiin an duat zawk tih hi a inhre leh lutuk a, remchangah hian a hmang thiam ve hrim hrim bawk.

***********************************

DAwrah chuan ka kal a, ka tih thin dan bawkin ka haw leh lam chuan zunin phenah meizial chu ka zu ru leh a. Tunlai hun angah hi chuan tleirawl/rawlthar kum 16 mi lek mai pawh nilo, kum 14-15 te pawh hian khawlaiah mei an zu khu luih luih ngam tawh a. Mahse hetih hunlai hi chuan kan ngam ve hlawl lo, live-action human CCTV an tam lutuk tlat.

Ka zu zo chu in lam ka pan leh mek lai chuan Pa Sangtea te dawr bulah chuan ka hmelhriat ang tak mai hi ka hmu a, hmeichhia a ni. Ka va kal hnai a, ka han en chiang chu tudang nilovin ka star em em mai, ka suangtuahna ram thununtu Puipuii a lo ni reng mai. School uniform nilo, chhehchhawl dress nena ka vawikhat hmuhna a ni bawk a, a chhelo tho.

Va biak ka tum a, mahse ka be mai thei rih lo. A chhan chu min hmuh veloh lai hian uluk tak leh duh ang thala en phawt ka duh vang a ni. School ah kha chuan a sam a t(r)awn tlangpui thin a, tunah erawh a thlah hnap mai a, ava han duhawm tak em. Ka va pan phei ta a, "Ehe Puipui, enge kan vengah i rawn tih a?" tiin ka han zawt a.

A rawn hawi a, a hmeltha lutuk kha ka thidang tep hialin ka hria, ka lum deuh pup mai. Ka hmu zing ve tawh viau ania, ngaia neih a har khawp mai. Min nuih sen sen a, "AWi U Brandon, teh hlawl che chuan...hei chart paper ka lei a." tiin min lo chhang a. "Umm anih chu, enga mi tur nge a?" tiin ka han zawt veleh a.

"Kan assignment ania, tlai atang khan ka zawng tawh mawle."

"Aw a ni maw, englam nge ni reng reng a?"

"Miss Zaii'n quotes hrang hrang min pe a, chu chu chart paper ah ziah tur ania. Kan vengah chart paper zuar an awm lova, in veng lamah ka rawn kal tawp mai a nih hi."

"Tunah dar 9 a ri tawh a, i la lei chauh sia...i va mengrei duh awm ve?"

"Nia, zanin chu menrei deuh angai tihna a ni tawh mai."

"Nangmah in em ni i lo kal a, engin nge i lo kal?"

"Aih, apa nen kan lo kal." tih pah chuan kawngsir chu ava kawk a, patling pakhat hi scooter ah alo chuang mek a, zozial a lo pak khu tulh tulh mai. "Saw saw i pa maw?" tiin ka han zawt leh a. "Umm a nih saw...nih leh khawi lai nge in in a awm?" tiin min zawt let ve leh a. "SAw lai lawk saw a ni tawh..in pathumna, a chung sen saw.." tiin kan in chu ka kawk a.

"Oii in in van nei lian ve...in hausak hmel." tiin a han nui leh sen sen a, a va han duhawm chiangkuang tak em. "Kher a che, kan hausa kher lo." tiin ka lo nui ve bawk a. Chutia kan inbiak lai chuan Puipuii pa chuan, "BAwihte, i va rei ve.." a rawn ti lauh lauh a. "Aw ka lo kal." tiin a chhang a.

Min rawn en leh a, "Naktuk school i kal ang tiraw?" tiin min han zawt leh a. Ka lu ka lo bu nghut a, "Kan inhmu dawn nia." tih pah chuan min han nuih leh seih a, a pa bula chuan a va kal ta a. An tlan liam dawn thleng chuan min en zui a, min bye bye bawk. A nuam ka ti lutuk chu ka nui vur vur reng mai, ka haw kawng pawh ka theihnghilh phah tep a ni.

**************************

A tuk ah pawh chuan bus ngeiin ka kal ve leh ta, bus hlirin ka kal tawh zawk dawn amawni aw ka ti hial. Puipuii te veng kan thleng a, an thian dunin bus pawh an lo chang ngei e. An rawn lut a, "Puipui, hei i seat ka lo hauh sak che a.." ka han ti deuh lauh lauh va, min rawn nuih seih mai.

Ka bulah chuan a rawn thu a, lunglawm ava kim tak em. Mahse lungawi lem lo tak pakhat a awm, chu chu tudang nilovin a thiannu, Tluangi a ni. Min melh rum dun khawp mai, kei lah chuan ka lo nuih suk a. Mahse Puipuii hmel chu ka en a, Tluangi ava melh zeuh va, a nui tawi ta tak mai.

Nuam lo a tih hmel em em a, Tluangi lah chu kan thutna opposite, hma lam deuhvah chuan a thu tum bur a, hawi pawh a rawn hawi duh tawh lo. Kan ngawi dun deuh vang vang a, "Nizan chu i mengrei em?" tiin ka han zawt a. A nui suk a, "Mengrei em em chuang lo, sentence kha a tam lem lova, ka ziak rei lutuk lo." tiin min chhang a.

"VAwiina submit ngei ngei a ngai tihna a mi?"

"Niang chu, nilo se nizanah khan in veng lamah ka rawn kal nang, lei turin.."

"Hehe, nia...anih, ihh....veng thenawm lawkah in awm sia, kum dang velah ka van hmu ngai lo che ve.."

"Hmu ngai lovang, kumin khan...hmanni deuh lawk khan hemi vengah hian kan rawn awm ve chiah alawm."

"Anih i thainnu Tluangi saw? Saw pawh saw ka hmu ngai lo, ani pawh saw a lo awm thar ve chauh tihna nge?"

Puipuii chuan min chhang mai lo chuan a thiannu chu ava en leh phawt a, Tluangi lah chu lehlam a lo la hawi reng a, a tum lian nasa mai sia, tinge maw a thinrim ngawt ni ka ti rilru vawng vawng mai keipawn. Puipui chu za lo tih hriat tak hian a nui suk a, "Um...kan inhnuaiah.." tih ringawt chuan min chhang a.

"In inhnuaiah an awm maw?"

"Aw...keini chhungkaw hnih hi chu chhungkhat ang mai hian kan awm ho reng zel a, kan pahnih pawh hian unau ang mai kan ni. KAn insawn kual deuh reng zel mai, a chang chuan a ninawm thin, mahse a ngai miau sia."

"Ka van hrethiam lo, in inchhung ami?"

"Chhung kher love, mahse.."

"Enge mahse.."

"Nidangah kan sawi dawn nia."

A hmel atang chuan sawi nuam tak chu a ni chiah lo tih ka hrethiam nghal a, ka zawt zui duh ta lem lo. Kan han ngawi dun leh vang vang a, "U BRandon, lunch break ah inhmu leh ang aw.." a rawn ti chhuak hlawl mai. Ka lawm lutuk chu han au chhuah hial ka duh rum rum mai, mahse vala hi ka insum hman hram.

Ka aw ka han thian deuh kharh kharh a, "Aaa..nia, tehreng mai. Khawiah nge niang, pipu bulah bawk khan em ni?" ka lo ti vat a. "Ka hre lo, kha lai kha nuam ber lawm. Anih loh pawn, midang an awm loh chuan theihai kung hnuai pawh kha a rem ang chu.." tiin min chhang a.

Chutia min hmuh a duh thu a sawi ve ta mai chu ka awih lo hial zawk, ka lawmna hi thu leh hla thiam tan lo chuan han sawifiah thiam chi hi a ni lo. Mahse chhete chuan rilru nawmlohna chu ka nei, chu chu engdang nilovin, a hmelah khan rilru hahna ka hmu tel tlat a ni.

School chu kan thleng a, thawh pah chuan min rawn leh hawi a. A thaw deuh hak a , "Lunch Break chu aw.." tiin zawite a phun sup pah chuan min han nuih leh suk a, ava han chhelo chiangkuang tak em. Tluangi lah chuan vin tak hian, "Lalrempui, hmanhmawh rawh." a rawn ti vin tuar mai.

Rum tak hian min la rawn melh hram lehnghal, engemaw a hriat teh thut ni? A hma zawngin min tihpui a, min duhsak ve dawn tan viau khan ka hria a. Ka lo hua a, ka lo ngei ve ngawt te kha ka lo inchhir ve em em a. Mahse tunah a hmelma ang maiin tihian min ti leh a, henu hi chu hmeltha thinchhia an tih ang kha a ni dawn a nih hi.

*********************************

Lunch break hma zawng, zing assembly lai atang tawh chuan ka rilru ah Puipuii chu a awm leh reng tawh. Mahse ka rilru a awm tel pakhat chu Tluangi bawk a ni, tinge khatia min ngei leh tak thut si aw tiin ka ngaihtuahna a luah ve tlat a nih chu. A thiannu Puipuii hi a thik nge, ka tan a phal leh lo zawk ni ang aw?

Mahse a thu lo ve e, amah Puipuii'n min duh phawt te chuan a thiannu lo ni eng ang mahse thuneihna pakhatmah a nei bik lo. Chuan thil pakhat ka rilru luah bawk chu bus-a kan chuan laia, Puipuii thil sawi ber mai kha a ni. An chhungkua hi eng ang mizia nge an nih a, eng hna nge an thawh hlawm ka hre lo.

Ahma zan khan Puipuii pa kha a hmel ka hmu chiang lutuk lova, mahse ral khat atanga han en mai kha chuan pa pangngai ve tak chu niin ka hria. Kha chu thudang ni ta se, inchhungkhat pawh ni si lo, tinge Tluangi te chhung nen chuan an inzui reng ni ta ang?

"Kan chhungkua hi chu khaw dang dang leh veng dang danga insawn kual reng kan nia." a tih te khan tinge thisena inzawm chu sawi loh, in khata cheng ho pawh nilo, chhungkaw hrang ve ve, mi hrang ve ve chu an insawnna apiangah an tel ve zel le? Engemaw thil, inphum ru chu a awm chiang alawm.

KA buaina tur a ni miah lo tih chu ka hria, mahse hriat ka chak zek zek. HAn zawt tawp dawn lah ila, a chi berin ka hre bawk si lo. Chubakah bus-a kan chuan lai khan Puipuii khan a sawi tha vak duh lo lehnghal a, chutih lai kara kei a bialpa pawh nilo, a thian thar ve mai hian chutiang thleng thleng lo zawh kha thil dik ber chu a ni lo tih ka hre ve bawk si.

Sir Mawia period a ni dawn a, kan homework min zawh tur te chu ka han revise zung zung a. Ka thiante pathum pawh chu ka kawm hleithei meuh lo a ni e, an titi pawh ka uksak hleithei lo. Sir MAwia chu a rawn lut ta ngei a, ka la inzawh tir hmasa ber zui a, ka thiam hmasa ber bawk.

A thiam ve lo te a hrem zawh hnu, beng pawta vawi 100 teh meuh a suk tir zawh hnu chuan a aia tam home work by-heart tur tho min la pe leh zui. Note tlem kan ziak bawk a, tichuan a chhuak a, lunch break a lo ni leh ta der mai. Meizial pawh ka zu ru peih lo, rang takin pipu awmna lam chu ka pan phei nghal vat a.

********************

Minute 10 vel hnuah pawh chuan Puipuii chu a lo la thleng thei mai si lova, ka mangang tan khawp mai. Minute khat lek pawh a uiawm tawh asin mawle, "A lo kal dawn lo amawni le?" tiin ka phun deuh nuah nuah a. Chutah thil ka hrechhuak zawk, gate bula thingkung hnuai, thutna rem deuh kha ka mitthlaah a rawn lang ta zawk mai.

Bus-a kan chuan lai pawh khan kan sawi lawk tawh tak e, ava han atthlak thin tak em. Rang takin ka zuang tho nghal vat a, thingkung awmna lam pan chuan ka chhuk thla ta nghal a. Ka rin ang ngeiin a lo awm, mahse a bulah Tluangi a lo awm tel ve tlat mai, pawilo..chhuk tho ang.

Ka zu thleng a, "Hetah elaw i lo awm daih a?" tiin ka han nuih sang a. An pahnih chuan min rawn melh dun a, Puipuii chuan min lo nuih leh sen sen a. Mahse Tluangi erawh min lo melh rum lehpek hle mai, "Khawiah nge i awm char char zawk a?" tiin Puipuii chuan min lo zawt let a.

"Pipu bulah ka lo awm a, ilo kal dawn maw ka tia. Mahse ka hrechhuak zawk a, tukina bus-a kan sawi kha.." tiin ka chhang a. "Hawh lo thu rawh." tiin a han tawlh phei a, a bulah chuan ka va thu a. Tluangi chu a tho ta hluai mai, a han thaw deuh hak a. "Khawnge i kal dawn?" tiin Puipuii chuan a lo zawt nghal vat a.

A mit sira ngei hmel deuhva min melh zeuh zeuh pah chuan, "Ka lo va inthiarfihlim mai ange, in titi duh ang." a han ti deuh kher a, Puipuii chuan a chhang lem lo. MAhse a hmel ka en khan nuam lo a ti a, a thiannu lakah chuan a inthlahrung takzet tih ka hmu thei.

Inla polite tak hian, "Aww..lo thu ve la." ka lo ti a. Chhan pawh min chhang lo chuan Puipuii bawk chu a en leh a, "KA sawi kha hre reng ang che, class room ah ka lo nghak ang che." tih pah chuan a chho ta daih a, keimah ber pawh chuan nuam ka ti lo vek.

"Enge TLuangi sawi awmzia kha?"

"Aaa...thildang daih ania, a ho lutuk."

"Ka awih lo e, ka chungchang em ni?"

"Aih, teuh lo mai....i chungchang a ni lo."

"A ni lo takzet maw?"

"Um..thildang alawm."

Eng eng emaw sawi a kan titi dun lai chuan, "Enteh U BRandon, zu i in thin em?" a rawn ti deuh thut mai. "Eng maw? Zu a? Tinge min zawh?" ka ti deuh hu a. Inthlahrun hmel tak chuan a khi suk a, "Aaa..ka hre duh mai mai mawle." tiin min chhang a. In chu ka in ve zeuh zeuh alawm, mahse kan la naupang a, inlak pa nan a tuina pawh hrelovin ka in ve mai mai thin kha a nia.

"Umm...Christmas lai velin no 2 te ka in ve thin, rual pawl nan mai mai." tiin ka chhang a. A lu a bu deuh nghat nghat ringawt, "Anih nang?" tiin ka han zawt ve ngawt a. Min melh deuh hru a, "KEimah hi maw? Awii...a teuh lo mai, duh pawh ka duh lo hrim hrim." tiin min chhang a.

Kan nui dun bawk bawk a, "Ka fiamthu mai mai a nih kha....i in dawn lo tih ka hria alawm." te ka han ti leh vel a. Kan han ngawi dun leh deuh vang vang a, bialpa a neih leh neih loh chu zawh hun tak niin ka hria. Mahse chutia han zawh tawp mai chu ka ngam chiah bik lo, ka huaisenna ka han sawm khawm leh te te phawt a.

Ka zawt tur chiah chu amah zawk chuan, "U Brandon, bialnu i nei em?" a rawn ti ta daih mai, min zawh khalh daih mai a nih chu. Chhan mai ngaihna pawh ka hre lo, ka ngawi vung vung mai. Chutah amah bawk chuan, "I nei ani maw?" a ti zawi leh sap a. "Aih..nei lo, nei ngai lo." te ka ti bah nuai mai.

A nui deuh suk a, "Ka awih lo e.." a han ti leh a. "NGe i awih loh? Ka nei lo, ka nei lo tak tak." tiin ka han insawifiah leh zung zung a. Ani pawh chu a nui a, "Ka fiamthu nih kha, ka ring che alawm." a han ti leh a. "Anih nang i nei em?" tiin ka han zawt ve ta a.

A lu a thing a, "Aih...bialpa neih an la phal lova...ka chhungten." tiin min chhang a, ka thaw huai mai. "Nia, kum 14 lek ila nia, a la hun lo alawm." te ka han ti vel a. Min ner khum nasa ngang mai, "Vela che, kei aiin kum 2 bakin i upa lo, inla upa viau suh, nangpawh neih ala hun bik lo." tiin min nghawk deuh sawk a.

Chutah keimah pawh ka inrin hma chuan, "Anih leh min duh em?" ka ti ringawt mai a nih chu, engtia sawi thut nge ka nih pawh ka inhre bik lo. Keimah zawk chu ka zak hnuhnawh angreng, ani lah chu a nui lai a tawp chat lehnghal. Kan ngawi dun ta reng mai, keipawh sawi tur ka hre lo.

KA sa chhuak vekin ka hria, ka thlan fim a luang nghal zawih zawih thei hial. MAhse ka zawt laklawh tawh si, "Aih." ti ta se, ka zak dawn lutuk. Chutia kan ngawih dun reng lai chuan dar a rawn ri a, "A nih phawt." a tia, a chho ta daih mai. Ka lu ka dawm tawp, a va han atthlak tak em, enge maw ka hriat a, ka zawh rikngawt ni.

*********************************

Ban a lo hun a, Puipuii chu ka hmu hreh tawh khawp mai. Eng angin nge min ngaih tak ang, ka mawl vang vek. Han kawm nel a, han induh tir ve phawt tur a nia. Ka hmanhmawh mah mah a ni, engvanga zawt nghal ringawt nge ka nih hi ka inhrethiam thei lo.

Ni e, ka neih loh ka hlauh em vang pawh a ni mahna. Ka mawl viau tih chu ka hria, chubakah khatia min kalsan nghal hmak danah khan min duh let ve lo tih a hriat mai. Ka va han a tak em, ka zak hle bawk. Ka ngui ruih thei, ka thiante min biakna pawh chu a rul tawk bakin ka chhang thei lo.

Hun hi her let leh theih se chu, ka zawt miah lovang mawle. Ka zak ngawih ngawih, eng angin nge min ngaih ang le? Zakthei lo min ti ve ngawt chuan ka ring, "Min duh em?" tia han zawh tawp mai kha chu ni e, a zahtheihloh thlak ve chiang alawm. Ka dem lo, min lo hua pawh nise ka dem hauh lovang.

Ka ngaihtuahna tlem lutuk vang vek a ni, min ten hial angem le tih thlengin ka ngaihtuah a, ka zak hi a ni tawp mai a ni. Class room atang chuan kan chhuak a, Puipuii hmel hmuh chak a zawng kual vak vak thin kha tunah chuan ka hmu hreh takzet tawh.

Student ho chu kan tei suau suau hlawm a, ka thiante bulah chuan ka awm tlat a. Bus bul kan thlen chuan Amosa chuan, "Bus-in nge i haw dawn ke in?" tiin min zawt a. "Ke-in aniang chu.." ka lo ti deuh hmuk a. "Innu i bye-bye dawn em? Kan lo nghak leh dawn che em?" ngeiawm zet hian Ruata chuan a han ti deuh kher a.

"I ho emai a, haw ang u....meizial ka zu chak tawh ania." ka lo ti leh hlur a. Puia chu a khi deuh suk a, "Eheu, i bem a..a duh lo che em ni?" a rawn ti mai chu ka sa zak mai. Ka thinrim chu ka insum zo hman lo, "Ka duh leh ka bem anga, min duh emaw duh lo emaw i lo buai angai lo." ka ti hrep mai a, ka kal nghal nal nal.

Ka so bulh bulh mai, ka zak bawk si nen. Hrehawm tak a ni, hrehawm tak. Ke chuan chak takin ka kal a, dawr lo awm hmasa berah chuan meizial lose ka lei a. Kawng hnuai, mi kal tam vak lohna lam atang chuan ka haw phei a, meizial chu ka zu phei a. "Tul lo lutuk, Puia pawh hi....a sawi tur pakhat mah a awm lo." tiin keima hriat tham lek chuan ka phun phei nang nang mai.

*************************

In chu ka thleng a, roomah chuan ka lut tlang nghal a. Khumah chuan ka bawk thlawp mai, ka thinrim bawk si leh zak bawk si chu ka chau vek thei hialin ka hria. Ke-a ka haw kha chu ka hah lem lo, ka nitin tihdan a ni. Mahse Puipuii laka ka zak lutuk ber khan min ti chau a ni, kan inah lah chuan tumah an lo la awm lo lehnghal.

Minute 10 vel kan mut hahdam hnuah chuan thinrim pawh a zia ta deuh ve, mood off pawh a reh tan. MAhse ka zahna erawh ala reh thei lo, khatiang em em a inhnarna leh inhnawlna chiang kha a awm tawh kher lovang. Puia, ka thianpa, kum tamtak ka lo kawm ve tawh chunga ka thinrim ringawt kha ka ngaihtuah let a.

Ka inthiamlo hle mai, ka lo thinchhe over mah mah a ni. KA zahna leh hnawl ka nihna te, engmah a hre ve miah lo kha ania. A hriat loh vangin min chhaih mai kha ania, keia mood fulovin khatia ka lo vin vak kha ka inthiamlovin ka inthlahrung ngei mai, ka va han a tak tiin ka han inhau hnuhnawh leh a.

Ka inthlak a, rilru lak pen nan tiin inchhung te chu nidanga tifai ngai mang hlei lo khan ka han phiat vel ta hliau hliau va. Puia laka ka inthlahrunna chu a zual telh telh mai, ngaihdam ka dil ngei chu a ngai dawn a ni. Zanah va len phei mai ka duh, rilru a nuam lo emai.

Ka tihfai zawh hnu chuan a lum ka tih deuh em avangin ka inbual a, tichuan home-work ziah chi kan neih ang ang te chu ka han ziak zung zung a. Mahse ka zahna a la reh thei chuang lo, a reh har ngawt ang. Puipuii chu duh hle mah ila, ka hmu ngam tawh awm silova, ka thiamloh vek, keimah vang vek a ni.

*****************************

Zan a lo ni leh a, lehkha zir chu zandang ang bawkin rilru ah a lut lo lehpek hle mai. Puipuii laka ka zahna pawh a la reh lo mai nilovin, thildang reng reng ka ngaihtuah thei lo a ni ber zawk. Amah hmuh chaka school kal ka phur tan dawn chauh va, tunah chuan a ni tawh lo.

Naktuk school kal chu ka huphurh takzet, a hmel hmuh ringawt pawh ka inthlahrung zo tawh. Chiang vak lo chuan ka by-heart ve thei ta, meizial zuk ruk a hun chiah e. Sana ka en a, dar 8:30 chauh a lo la ri hlauh mai. Zanin chu nizan aiin ka thiam hma ve tlat mai, a tam zawk tehreng nen.

Room atang chuan ka chhuak a, pawnah ka chhuak tlang nghal a. Puia te inah chuan va lengin ngaihdam te ka dil a, thianpa Puia nge nge a lo hrethiam khawp mai. A chhan te chu min zawt a, ka mood fuhloh vang a nih thute leh Puipuii laka ka zah zia te chu engkim ka hrilh tlang vek a.

Ani pawh chuan a thiam ang tawkin min hnem a, kan titi deuh luam bawk. Tichuan Ruata te inah ka leng leh a, naktuka ke-a school kal ho tur chuan kan rel fel a. Tichuan ka haw pah chuan naktuka pai ruk tur meizial te chu ka han lei lawk deuh thlap a, zan hun chu ka hmang zo ve thei ta.

**************************

A tuk ah chuan ahma zana kan lo sawi lawk tawh ang ngeiin school chu kei leh Ruata, Puia leh Amosa te nen chuan a ngai te ang bawk chuan ke in kan kal ho leh ta tham tham hlawm a. Kan titi tui lehpek hlawm hle mai, a hma zawng kha chuan Puipuii vangin ka kawm hman tha ngai hlawm mang tawh lo kha a ni a.

Tunah chuan kan thian pali diktak chu kan inkawm ho leh thei ta, Puipuii chu rilru ah la awm tho mahse, min duh ta miau si lova, hma lam ka pan zel angai. NGaihtuah loh ka tum a, assembly naah pawh chuan ka zawnah a ding tih hre reng mah ila ka melh duh lo lui char char.

Ka hmu ngam tawh lo mai nilovin a melh pawh ka melh zak tawh a ni, a chhan chu min hnawl ve chiang bawk em a ni. Class lak lai te pawh chuan ka ngaihtuah reng tho, kumtluanin kan la inhmu dawn chauh chu a ni si a. Tinge maw ka lo star kher kher ni, tinge maw ka lo duh kher kher ni tiin ka rilru chuan ka han inhau leh vak vak thin a.

Zirlai pawh rilru ah a lut mawh hle mai, lunch break a lo ni leh ta. Kan thian ho chuan meizial zukrukna lam kan pan thla leh ta sap sap hlawm a, Puipuii hmuh loh theih ang bera awm chu ka tum a ni. Mahse a mak lutuk, hmuh chu ka chak reng tho. A nui hmel te, a mitmeng mawi tak te kha mitthlaah hian a cham reng mai.

Nileng mai chuan ka biru hi a ni tawp, amah chauh nilovin Tluangi pawh vawiin chu ka hmu lo hrim hrim. Kha chu thudang ni rawh se, ani kha chu ka hmu peih vak lo hrim hrim a. Ban a lo hun leh der mai, ke-a haw tur chuan kan thian pali chuan gate lam kan pan thla mek a.

Gate kan thleng tep tih ah chuan hnunglam atang chuan hmeichhe aw hian, "U BRandon, lo ding lawk teh." a rawn ti a. Ka va hawi let a, Tluangi a lo ni daih mai. Mak ka ti angreng khawp mai, "Aww.eng..enge ni ta?" ka ti bah deuh nuai a. A rawn kal hnai a, "Englo ania, biak lawk che ka duh a." tiin min chhang a.

Han chhan mai dan tur pawh ka hre lo, "Gate pawnah kan lo nghak ang che." rang zet hian Ruata chuan a lo ti vat a, an kal daih mai. Tluangi nen chuan kan inzui chho leh a, bus bulah chuan kan ding a. "Enge ni ta?" tiin ka han zawt nawn leh a. Chutah rum zet hian min melh a, "Tinge Puipuii i biak duh miah lohva? HRehawm a ti teh mai ania, a lakah i thinrim em ni?" tiin min zawt ta daih mai a nih chu.

Keimah zawk chuan mak ka ti kher mai, "Enga? Puipuii ka be duh lo maw?" ka ti deuh hu mai a. Ani lah chuan vin zet hian, "Aw...vawiinah pawh a zawng char char che a, tinge i bo daih a? Keimah vang ami? Nimina ka melhrum em vang che kha em ni alakah i thinrim?" tiin min zawt leh ta deuh deuh va.

"Aih nilo...enge i sawi awmzia pawh ka hre lo." ka han ti bah leh deuh nuai a. Rum deuh  hian min melh leh a, "I hre reng...enge i buaina chu sawi mai la...hrehawm a tih zia chu e, i ngei amaw a intia, nilengin a mood a fulo." a han ti leh hlur a. KA ngawi ta vang vang a, "Khawnge amah chu a awm?" tiin ka zawt ta a.

"Bus hnungah sawn a awm a, iva be dawn mi?"

"Um ka va bia ange.."

"AWle, hetah ka lo nghak ang che u."

Bus hnunglamah chuan ka va phei a, tah chhuah hmel leh hlim loh hmel tak hian Puipuii chu a lo thu ngui bur mai. Min rawn melh a, min melh rum kher mai. A menrum ka hmuh vawikhatna a nia, mahse a hmel chu tha tak a ni tho, a menrum hian a hmeltha zawk mah em mawni ka ti hial.

Ka va pan phei a, a bulah chuan ka va thu a. Ka zam leh der hian ka hria, kan ngawi dun reng a. Second 10 vel hnuah chuan, "I tawng dawn lo ami?" a rawn ti deuh hmuk a. "Aaa..ihh, min ngei ami?" tiin ka han zawt let daih a. Min melh deuh hru a, "Min ngei zawk ami? Tinge min biak duh miah loh...khawnge vawiinah i awm char char?" a han ti deuh hlur a.

"Ngei love...engvangin nge ka ngei ngawt che anga?"

"Nihleh min kawm peih tawh lo ami?"

"KAwm peih e."

"Tinge min bihruk san char char si? Assembly lai te khan ka rawn melh ve tawk tawk che a, min hmulo der char char..enge awmzia?"

"Ihh...englo, min ngei zawk amaw ka tia."

"MAwla, engvangin nge ka ngei ngawt che anga, la lakah engmah tihsual i nei hlei nem."

KA chil ka han lem deuh khawlh a, "Ihh, englo..nimin khan min kalsan daih a." ka han ti tham tiak a. Tum hmuk hian, "Engtikah maw? Khawiah maw ka kalsan che...ka van hre lo." a lo ti hu mai a. "Kha...min duh em ka tia, i kal daih kha." zah avanga khur deuh dar dar chung chuan ka han ti leh a.

A aia nasa hian a tum a, "Ka kalsan che pawh a nih loh kha, dar a ri a, luh a hun tawh avangin ka lut a nih kha." a ti leh hmuk mai. Keilah chuan sawi tur hre hek tawh lo, "E..nia tiraw..." te ka ti ta vel mai mai a. Amah bawk chuan, "Khavang khan maw min biak duh tawh loh?" tiin min zawt leh a.

"Ni chiah chuang love..englo ania, min duh em ka tia, i kal ta daih sia...min duh lo angah ka ngai a, ka zak lutuk a."

"Hmm..amak, dar a rik vang a nih kha, ka sawi mawlh mawlh kha."

"Nia, ka lo hre lo alawm."

A ngawi leh deuh vang vang a, "Vawiinah hian chhan che ka tum reng a, mahse min hmu duh bawk silova...i sual khawp mai." a han ti leh a, lehlam te chu a hawi deuh hmak a. Thawk ka han la te te a, "Anih..enge i chhanna chu?" tiin ka han zawt leh a. Zawite leh fiah tak si hian, "Duh." a han ti deuh hmuk a.

Ka awih lo lutuk chuan, "Maw?" ka ti hu mai. A mit sir chuan rum zet hian min melh leh a, "Duh ka tih chuu.." a ti vin hlur a. Amak ka ti lutuk chu ka nui chhuak huk a, "Enge i nuih?" a rawn ti nghal vat. KA tawng tha hleithei lo, "Min..min duh maw?" ka han ti leh ngat a.

"Aw duh e, duh duh duh...haw tawh rawh, naktuk ah bus-in kal ang che, ka thutna tur lo dah awl ang che." a ti leh hmuk a, ka lawm lutuk chu nuih huah huah mai ania ka chak ni. Ka khi deuh vur vur in ka hria, ganja rui ang mai ka ni. "HAw tawh rawh..ka tih chu." a rawn ti leh a.

"Ihh.aw..awle." ka ti bah nuai a, ka ding nghal. "Kan inhmu dawnnia...anih aw." tiin ka nuih a, min rawn nuih let seih mai. Ka kal ta a, Tluangi chuan min lo melh deuh hraw a. "Eheu, i va hlim hmel deuh ve...good news a awm a nimaw.." a lo ti vel a. "Nia...nakinah kan sawi dawnnia." tiin ka chhang a.

Ka hlim kher mai, gate bulah chuan ka thiante pali chuan min lo nghak a. Ka hlim hmel chu an lo hmuh hmaih lo chiang kher mai, min lo zawt nghal. Chu chanchin tha, sap tawnga good news an tih thin ngei mai chu ka hrilh ta. Min lawmpui lutuk chu a au hian an au vak vak mai, tunah chuan Puipuii bialpa ka ni ta.

**************************

TO BE CONTINUE