THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 10

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 10

**********************

Coffee dawrah chuan Puipuii nen chuan kan chawl a, kan titi dun nasa ngang mai. Khua lah chu a tlai chak khawp a, a thim titih tan leh dawn der mai. Kan inkham dun hlawl lo hi a ni ber mai, sana ka han en chuan dar 5 a lo pel leh der tawh mai. Chutia coffe in pah a kan titi lai chuan Puipuii phone chu a rawn ri a, a han en a.

A ner deuh nung mai, "Tunge a?" tiin ka han zawt a. Phur lo tak chung chuan, "Tluangi." a ti zawi sap a. Kei pawh chu a down ruih thei, "Umm..a nih chu." ka ti ringawt a. A phone chu a la ri reng a, "La rawh, a lo pawimawh thut thei asin." tiin ka hrilh a.

Phone chu a han pick up a, "Aw hello...hei hetah, Tepuii Coffee Dawr ah khan ka awm." a han ti a, a ngawi leh vang vang a. Chutah min rawn en a, "Lo kal ve a tum." tiin a phun sap a. A tir chuan ka hnuai vek thei, mahse Tluangi hmel hmuh ve hrim hrim pawh a chakawm ka ti ve deuh.

"Kan awm dun tih a hria a mi?" tiin ka han zawt leh phawt a. A lu a thing a, "Ka hre lo, engtin nge ka tih dawn?" tiin min zawt let leh a. Ka ngawi vang vang a, "Um..lo kal rawh se." ka han ti ve ta deuh ngat a. Mahse Puipuii chuan nuam lo a tih hmel kher mai, "Aw lo kal rawh...lo lut rawh, mahse ka thianpa nen kan awm ania." a ti ta a.

Phone chu a dah a, "Khawilai takah nge a awm a? Khawiah nge a kal hrim hrim a?" tiin ka han zawt leh a. "A bialpa nen an leng a, ka chhuak tih a hriat vangin min zawng bak a ni lovang." tiin min chhang a. Ka lung a awi lo kher mai, "Tun thleng thleng pawn a thuhnuaia dah che ala tum a nimaw?" ka han ti vin deuh thak a.

"U Brandon, thinrim suh. A nuam lo ania, coffee shop bul lawkah ka awm a tia, a lo thleng tep ang." a tih lai chuan kawngka chu a rawn ri rak a, "Lo leng lut rawh." tia waitress pakhat tawng ri kan hriat rual rual chuan Puipuii nen chuan kan va hawi rual a, hmeichhe pakhat hi a rawn lut a.

"Saw saw anih saw." Puipuii chuan a lo ti vat a. Zep lo chuan a chhelo phian mai, thang tha tak hi a ni ringawt. Jeans kekawr bul hi a rawn ha a, hmeichhe kamis ka ti mai, a rawng var sar mai hi a ha bawk a. A lai langin a la rawn ha zui a, a hnute hnuaiah chuan a suih t(r)at bawk.

Pheikhawk sang, kezung tang lang thei hi a bun bawk a. A sam pawh a lo la tawi a, alo la kir reng bawk. Ft 5'4 vela sang a nih ka ring, Puipuii ai pawn a sang zawk mah in ka hria. A hnar a beh ngei bawk a, a mitmeng atang reng reng chuan a fel zawk zawk lo tih a hriat hle bawk.

A han hawi kual a, Puipuii a rawn hmuh veleh chuan a rawn pan phei nghal a. A rawn cat walk nalh vei phian lehnghal a, a lerh tih hriat reng reng. Ka mitthla ah chuan kan naupan lai, kum 15 liam ta a Puipuii nena kan inkar a tihchhiat vek lai, rum taka min melh thin lai leh min vin khur khur thin lai te chu a rawn lang chuai chuai mai.

Ka ngei thar leh tlat a nih chu, engkim kha, memories zawng zawng kha a lo let leh vek nimai hian ka hria. Kan bulah chuan a rawn thu a, min la en deuh vung vung zui. A bag ah lai chu dawhkanah chuan min zah lem lo tak chuan a han dah nghal thuai a, "Engtia haw nge i tum a?" tiin Puipuii chu a han melh nghal khur ringawt a.

Ka ngei ve deuh avang chuan, "Keiman ka thlah mai ang." ka lo ti ve deuh kher a. Min rawn melh deuh hraw a, ka mitthlaah chuan kan naupan laia min melh rum lai te chu a lang nghal zawk zawk mai, ala meng rum thiam khawp mai. Chutah Puipuii chu a en a, "Hei hi i thianpa chu em ni?" tiin a han zawt leh a.

Puipuii chuan inthlahrun hmel tak hian, "Umm." tih ringawt chuan a lo chhang a. Tluangi chuan ei loh hmel tak hian min en a, "Lalnuntluangi ka nia." tiin a kut chu a rawn dah chhuak a. Keipawh chuan chibai pah in, "Brandon...Brandon Remruatpuia." ka han ti ve a.

Mahse mak a tih hmel vak loh, min theihnghilh tawh nge, min hre tawh lo zawk pawh ka hre lo. "Umm..anih chu." a ti ringawt a, keimah zawk chuan mak ka ti angreng hle mai. Dawr a lo chawl ve dang ho pawh chu an rawn hawi leh deuh sap sap thin a, a jeans hak kha a bul lulai ve bawk em a ni.

Puipuii bawk chu a han en leh a, "Ka rual chuan i lo haw dawn lo maw? Saw..scooty ka keng asin." a han ti leh a. Puipuii chuan a lu a thing a, "Hei..Brandon-a rual hian ka lo haw mai ang." tiin a lo chhang zawi sap a. Tluangi chu a khi suk a, waiter pakhat lo kal chu a lo tiding a.

"Aw ka pi enge i duh?"

"Coffee no khat aw...espresso aw."

"AWle, lo nghak lawk rawh aw, kan rei lovang."

Waiter a kal hnu chuan ngaihnep hmel tak hian min rawn en leh a, "Huiham....a nih chuan coffee hi no khat ka han in ve anga, chuan ka haw ang." tih pah chuan a bag atang chuan a make up leh rawmawl vel te chu a la chhuak a, "Bathroom ah ka va inchei tha lawk ang e." ala ti zui.

Bathroom lam pan chuan min kalsan ta a, Puipuii hmel ka en chuan a zah hmel kher mai. Hnuai lam chu a melh reng a, "Tinge a, nuam i ti lo a mi?" tiin a kutah chuan ka vuan a. Inthlahrun hmel tak hian, "Nangmah zawk khan nuam i ti lovang tih ka hlau va, awii..min ti zak thei si, ka ning eee." a han ti nuah nuah a.

"A ho lutuk. Ka hmu ve chak hrim hrim alawm, eng ang hmel nge a put tih te pawh ka hre chak alawm." tiin ka han khi deuh suk a. Puipuii pawh chu a nui ve suk a, "Anih leh a thang tha i ti em, zep miah lovin?" tiin min han zawt deuh thut a. Ka lo ner deuh sak a, "Tha ka tih vak pawh ka hre lo e a...a inha chhing si, a zia khawp kha." ka han ti vel a.

Zep lo chuan khati em em a glow up kha ka la hre lo, a naupan lai ai mahin a hmel kha a tha tawh zawk. A naupan lai hmel kha chu a paih deuh vek tep hial zawk, mahse a mizia leh a hair style ah amah a ni tih a la hriat hle thung. "Anih kei nge thang tha Tluangi?" tiin Puipuii chuan min han zawt leh a.

Ka nui ringawt a, "Mawwhh..han sawi ve hrim hrim teh." tiin min zawt lui zel a. "Khatiang hmai paw phek phuk ai chuan i tha fe zawk, ka hmangaih daih zawk bawk che." ka han ti chu a nui var var mai. "Anih leh...ka hming ka sawi khan mak ti hmel pawh a pu lova, min hre tawh lo tihna mi?" tiin ka han zawt a.

"Ka hre bik lo, a hre tawh lo che aniang."

"Engtin nge min hriat loh theih...nangin min la hre bawk sia."

"Awii..ani te chu mipa dang dang kawp kual kha ania, kum 15 liam ta a thil thleng te chu a hre chhuak tawh tawp nang."

"Anih i lehkhabu kha a chhiar ngai lo a mi? Ka sawi awmzia chu, ka hming leh i hming ziahna...nizana ka hmuh kha?"

"Chhiar lo, ka khawih tir ngai lo hrim hrim."

"A that chu, min hre lo mahse a pawi lo. A nih min sawi chhuak ngai em? tiin ka han zawt leh a. Puipuii chuan a lu thingin, "Kan inhmuh loh atang khan kum 2 vel chu a la sawi chhuak ve zeuh zeuh che, chupawh min hauh nan." tiin nui vur vur chung chuan min chhang a. Chutih lai chuan Tluangi coffee chah chu a rawn thleng a, "Khawnge in thiannu kha, coffee order tu ber kha?" tiin waiter chuan min rawn zawt a.

"Bathroom ah a awm a, a lo kal mai ang. Tikhan lo dah tawp rawh, a lo let tep ang." tiin Puipuii chuan a lo chhang a. Waiter a kal hnu deuh lawk chuan Tluangi chu bathroom atang chuan a rawn chhuak a, a hma aia ling hian a hmui chu a rawn sen chhuak vut vut khawp mai.

Dawr a lo chawl ve dang te chuan an en duh em em a, Puipuii chu a zah hmel tak zet. Kan bulah chuan a rawn thu leh a, "Awii...an bathroom zim zia kha...a chhung an ti changkang ve em em a." tiin a la rawn phun nuah nuah zui. Dawhkana coffee chu a en a, "Hei hi ami ka chah kha?" tiin Puipuii chu a zawt a.

"Aw...nichin deuh lawk khan a rawn dah." tiin Puipuii chuan a lo chhang a. Coffee chu a han la kang a, "A lo dai hman vek tawh lo maw?" tih pah chuan a lipstick reh hlau tak chung si chuan a han in a, ava han chhe hlei hlawi tak. Kha leh chen amah vangin ka hmangaih ber Puipuii nen kan inhmuh loh phah a, ka beng thle lawl chak a nia.

A in zawh hnu chuan, "Ka kal dawn...i thianpa hian min lo pek sak ve mai rawh se, a hausak hmel tho." a la ti ta deuh deuh va, Puipuii chu a zak tih a hmel atang chuan  a hriat kher mai. Mahse a hau ngam thlawt lo, chhan pawh a chhang lo. Tluangi bawk chuan, "Ka kal ania, lo haw har suh...hei khua a thim dawn." tiin min chhuahsan ta a.

A kal veleh chuan Puipuii chuan inthiamloh hmel tak hian, "Kan awmna ka lo hrilh kher kher a ni aw...ava pawi tak. Ka lo pek sak mai ang coffee man kha chu, tihpalh aw.." a han ti tham tiak a. Naupan lai atanga tun thlengin Tluangi thu thu in a awm a, mahse amah ber lah chuan ti khawp hian a ngaihsakin a hmangaih chu ania.

A taksa hial pawh vai patling hmelchhe pui pui lakah a zuar tawp kha ania, chupawh a unaunu Tluangi, a unaunu tak tak pawh ni lo leh amah tiduhdah tu lehnghal. KA khawngaih takzet, hlim hi a phu ve tawh asin le. Dawr chu kan chhuahsan a, tichuan ka thlah haw ta a.

*************************

Puipuii nen kan inhmuh leh atangin kar 1 vel chu a liam leh ta a, nitin kan inhmu a. Chhuanlam a siam ve nasa thin khawp ang le, mahse tunge ka nih tih chu Tluangi bulah chuan sawi lo law law turin min ti a, keipawh ka insawi duh lo bawk. Amah vangin khati khawp khan Puipuii nen kan tuar a, hre lo se kan duh ve ve.

Ka nu bulah pawh engmah ka la sawi lova, a chhan chu kum 30 ka pel ve tawh bawk si nen, nupui then hlim hlawl ka ni bawk nen. Hmeichhe dang ka chhuah pui lehnghal tih leh bialnu thar ka nei nghal tih a hriat chuan a ngaihdan a ni lovang tih ka hlau va, chubakah ka ex Puipuii ngei kha a ni tih a hriat phei chuan mak a ti lutuk palh ang.

A hrim hrim thu in ka nu phei hi chuan Puipuii hi tunge a nih pawh a hre tawh miah lovang, keimah hian ka sawi ngai lo hrim hrim bawk a. Ka patea te nupui phei hi chu rawn awm lo phei sela chuan, ka nu khawhar dan tur zia hi ka ngaihtuah ngam lo zawk.

Amah hian a inhnit feih feih leh thin a, a ruka tah hawm hawm chang phei chu a nei ngah thin viau ang ka ring. Ka pa kha a ngai ve thin takzet tih ka hria, mahse ka hmuh laia hlim tak anga a lang hram hram te hi tuarchhel ka tiin ka fak takzet a ni. Ka nau David-a lah thla 1 vel a rawn haw a, a kal leh nghal daih zel bawk si.

Puipuii nen hrim hrim pawh hian kan fimkhur hle a, kan veng hnaih ah leh an veng hnaih ah kan awmdun ngai lo hrim hrim. Hman atanga tun thleng hian mi hi an lo kam tam thei sia, an inthlah chhawng zel amaw tih mai tur a ni. Mi chanchin ah te, mi nuna lo buai em em te ho hi chu an pung tual tual zel mai zawng a nih hi.

*************************

VAwikhat ka office bang ka haw chu chhunah engmah ka lo ei si lo nen, ka pum chu a ruak em em a. Engemaw ei a inhnawh puar tur chuan restaurant pakhatah ka lut a, dar 3 a pel tawk chauh. Hemi ni hian Puipuii chu a hman loh avangin kan inhmu lo, mahse zanah chuan inhmuh kan tum tho.

Rice chu plate khat ka ei a, ka la haw mai peih hrih loh avang chuan thingpui chu ka han in leh te te a. Ka phone chu phawrhin Puipuii message a lo awm nual mai, naktuk mai hi phai a, Bangalore-a a chhuk leh hun a ni tawh a, ka ngai dawn khawp mai. Kan intext a, kan inngai lawk takzet.

A ruala chhuk ve mai te ania ka duh ni, mahse khulamah eng hna mah a awm hrih der mai si lo. Chhuanlam siam a zui thlak mai te ka duh, nge ni hna ka zuk siam chawp mai dawn pawh ka hre lo. Mahse zui thla in hna zu insiam chawp pawh ni ila, helamah tunge kan office enkawl ta ang?

Chutia kan intext lai chuan ka thutna bulah chuan hmeichhe pakhat hi a lo kal a, "Hi..thu dang an awm lo tiraw?" a rawn ti a, ka han en chu ka phu deuh zawk mai. Chu hmeichhia chu tudang nilovin ka hmelma kumhlun, Tluangi ngei kha a ni. En pawh ka en tha peih lo, "Aw awm lo." ka lo ti deuh hmuk a.

A han nui huk a, "Umm..anih chuan ka lo thu aw.." a han ti leh a. Kei lah chuan, "Thu la nimai lawm." ka lo ti leh deuh hmuk a, ka ngeiawm ve chak hrim hrim, a ngeiawm rei tawh bik emai. Ka hma zawnah chuan a rawn thu a, "Coffee man kha ka lo rul dawn che em ni, hmanni a mi kha?" a la ti zui.

Za lo tak chuan ka khi suk a, "A ngai hran love." tih ringawt chuan ka chhang leh a. Ka phone chu ka khawih lui char char a, Puipuii lah chuan min reply tawh miah lo lehnghal. Mahse ka be peih thlawt lo, instagram ah te chuan lutin eng eng emaw chu ka han khawih kual vel mai mai a.

Ani pawh chu a ngawi deuh vang vang a, "Ka nau nen hian engtia rei nge in inzui tawh?" a rawn ti chhuak hlawl mai. Ka phone khawih reng pah chuan, "A la rei vak lo." tih ringawt chuan ka chhang leh a. Chutah ka rin loh lutukin, "U Brandon, tunge i nih hi ka hre lo tak tak turah min ngai em ni?" a rawn ti ta thut mai.

Ka phone chu ka ak tha nghal a, "Enge i sawi awmzia? Min hria em ni?" ka han ti a, a ruk tak chuan ka zam angreng khawp mai. Chiang kelh kawlh hian min en a, "I lo hausa tawh bik hle mai, hmanni a coffee dawr a i hming i sawi khan tunge i nih ka hre daih tawh che, ka hre lo der mai mai che anih kha." a la ti ta deuh deuh va.

Za lo tak chuan ka han nui khi leh suk a, "Tunge ka nih? Min hria amaw?" ka han ti leh kher a. Ani pawh chu a rawn nui suk a, "Um...school kan kal ho thin kha. Hrelo der suh...chuan, ka lawmpui lutuk che." tiin min chhang a. Mahse ka la hre lo der tlat, "Engvangin maw min lawmpui nachhan, enge lawm tur awm a?" tiin ka zawt lui zel a.

"I hmangaih ber, kum tam tak i hmuh tawh loh ka nau, Lalrempuii nen in intawng leh a, ka lawmpui che."

"Min hai aniang, Puipuii hi a hma in ka hre ngai lo, nangpawh ka hre ngai lo che."

"U Brandon, tunge ka nih i hria, zep kual duh suh. Ka hre vek, engkim ka hre vek."

"Enge i hriat chu, han sawi ta che.."

"Min haw viau ami?"

"Engvang ngawtin nge ka huat che anga?"

"Keima dawt phuah chawp vangin tikhawp khan i tuar nasa a, chutiang bawkin Puipuii pawn...min haw viau mahla a awm ka ti lutuk."

Lem ka chang peih tawh lo, "Aw..ka hua che alawm." ka ti ve ta a, rum tak hian ka melh bawk. Mahse inthiamlohna engmah a nei chuang lo, "Tinge min hriat loh der a?" tiin min zawt leh a. Vin lek lek hian, "A chhan chu ka hmu peih lo che, ka be peih lo che. Puipuii nena min then hrangtu i nia, engvang tehlulin nge ka biak that ang che?" ka ti deuh hrep mai.

A ngawi vang vang a, "Min ngaidam rawh, puitling kan ni tawh a...naupang rilru kan pu tawh hleinem. Engkim theihnghilh ila, thian kan ni leh thei alawm tiraw?" a la ti ta deuh deuh anih chu mawle. Ka va han beng chak tak, ka thinrim lutuk chu ka sap pup pup mai.

Rum zet hian ka melh a, "Engvangin? Engvangin nge khatia i tih? Mawhh? I pawi ka sawi em ni? Tinge Puipuii nen khan min then hran?" tiin ka aw key pawh a sang deuh aniang, an rawn hawi deuh sap sap mai. Zah hmel tak hian Tluangi chu a hawi kual a, "Tinge? Tinge hun kal tawh a nih kha...au vak vak suh." tiin min la khap ve khanglang zui.

Ka ding hluai a, "Ni e, hun kal tawh ania lawm. Mahse ka la dam lo, ka la dam hlawl lo a ni. Hei hi hre rawh Lalnuntluang, tunah chuan i sawi ang ngeiin naupang kan ni tawh lo. Keipawh puitling ka ni tawh a, ka hlawhtling bawk. Nanga then hran mai mai theih kan ni tawh lo, ka duh phawt chuan nupuiah ka nei daih thei i unaunu hi..chu chu hria la, i duh duh dan chuan chet han tum leh ta che." tih pah chuan ka kalsan ta daih a.

Ka thinrim kher mai, cashier hnenah chuan pawisa ka pe a, ka car lam panin ka kal nghal a. A chhungah chuan ka lut a, hawi pawh ka hawi let eih lo. Mi hmuh ah chuan Tluangi kha nula chhelo tak leh vun ngo bawk si, hmeltha tak leh hmuh nuam tak pawh a lo ni thei e.

Mahse ka tan chuan dawithiam pitar phakar leh sual zet ang chauh a ni, ka hua a ni. Ka haw takzet, ala zak chuang miah lo te kha min ti thinrim zualtu a ni. Ka motor steering chu ka han chum deuh bur a, "Zawngi leh...zahna nei lo lutuk." tiin ka han phun sap a.

Ka maimitchhing vang vang a, kan nunhlui zawng zawng te chu mitthlaah chuan a rawn lang leh chuai chuai mai. KA mittui a tla hial a, ka thinrim lutuk chu ka thaw a chham hiam dawnin ka hria. Ka inbeng daih hnuah chuan motor chu ka start a, in lam pan chuan ka haw veleh ta a ni.

******************************

ZAn a lo thleng a, Puipuiii nen chuan kan inhmuh fona thin, kan kal leh tluk tluk tawhna, tlangah ngei mai khan kan awm dun leh a. Mahse zanin chu engemaw rilru nawmlohna a nei a ni ngei ang, a tawng tlem angreng phian mai a. Ka biak pawhin a rul tawk lek lek bakin min chhang lo, kan inbe tlem khawp mai.

"Ngati nge a, nawmlohna i nei ami?"

"Nei hran love, ka ngai lutuk che a."

"Keipawn ka ngai che alawm, ticket vel i ti fel tawh em?"

"Umm..thawmhnaw pawh vawiinah ka pack fel vek tawh. Ka peih lo e, kal loh mai ania ka duh ni."

"Nia, keipawn kal lo mai la ka ti....min nei mai rawh ka tih lahin i duh bawk si lo."

A han nui deuh suk a, "Engtin nge ka nu leh Tluangi an awm anga...tuna inneih tut tutu te chu a..chubakah nangpawh nupui then hlim hlawl i ni bawk nen, a chi loh alawm." a han ti nuah nuah a. "Engtin nge kan tih ang aw, tiraw? In hlawh a tlem awm sia, i chawm reng thei dawn lo nangmah chauh chuan.." ka han tih chuan ani pawh chuan a lu a bu nghat nghat a.

"Nia, Tluangi lah hian a chen zo deuh thak thak zel mai bawk si a. Ka nu lah saw  a hrisel tawh lo bawk sia, rilru hahna hlir hi a ni ringawt mai." tiin a mangang ve hle a ni tih chu a hriat theih mai. Kan ngawi dun leh vang vang a, zan boruak pawh a thiang tha in thla pawh a eng romantic vel khawp mai.

Chutah, "Vawiinah Tluangi nen in inhmu ami?" a rawn ti deuh thut mai a. Mak ti tak hian, "Tinge? A sawi ami?" ka lo ti hu a. A lu a bu deuh nghat a, "Aw sawi e, kan inhmu a tia. Enge i bulah sawi a nei em?" tiin min zawt leh a. Ka han thaw deuh hak a, "Aw nei e, min lo hre reng alawm, tunge ka nih a lo hre reng alawm." tiin ka chhang a.

"Engtin nge a rawn insawi a?"

"Aaa...ka sawi vek peih lo zawk. Ka hria che, ka hrelo der che chuti khati tih velin.."

"Umm...ava zia lo thin tak."

"A ho lutuk, ngatan mah ka ngai lo. Anih engtin nge i bulah a sawi ve zawk a?"

"Chuuu...a rawn haw kha, nangmah nen in inhmuh thu a sawi a...min hau nghal hrep lehnghal a."

Ka thin a dek zar mai, "Enga? A hau che amaw? Ava zak lo tak, keichu ka ngawi mai mai thei tawh lo ania." tiin ka han vin nghal deuh hlur a. Mahse Puipuii chuan nghet takin min kuah a, "Tikhan awm suh...nidangah kan sawi mai dawn nia, tunah chuan  a hun hrih lo emai." tiin min khap dai thei hram a.

A hna chungchang vel kan sawi leh a, kan sawi kan sawi hnuah chuan engemaw ka hre chhuak zawk mai. Idea thar ka nei tlat, "E taka, Puipui...kan office ah rawn thawk ve mai rawh." ka han ti chu a meng phawk nasa mai. "Enga? Keimah hi maw..in office ah maw?" a ti hu mai a.

"Aw...nangmah, interview naktukah i rawn nei anga, hlawh pawh a tam zawk anga..chubakah tunah hian secretary hmeichhia kan mamawh lai tak ania." ka han ti leh a. A lu a thing a, "Aih, a chi dawn mi? Aaa...ngawi teh, a ni teh thut emai." tiin min hnial tlat a.

Mahse ka thlem ka thlem hnuah chuan, "Nia, kan tum dawnnia. Diktak chuan pawisa chu ka mamawh lutuk alawm, mahse tunah tut tut chuan thuthlukna siam mai chu ka la ngam lo, U Brandon." tiin min chhang a. "Nia, ka hrethiam lutuk che alawm. Mahse, naktuk mai i kal hun a ni leh tawh sia. Engtin nge ni dawn?" tiin ka han zawt leh a.

"Ka hre bik lo, naktuk chu ka zuk chhuk leh phawt mai dawn mawni te ka tia...ka inpuahchah ve vek tawh sia."

"I kal leh daih chuan a rawn haw leh nghal mai mai theih tawh awm silova, kan va han ngaihtuah chhuak har tak."

"Nia tiraw? Ka hrethiam bik lo, i sawi deuh teh thut bawk sia."

"Nia, keima rilru chak loh vang vek mawle..haha."

Chiang tak hian min en a, "U Brandon, min hmangaih tak tak em?" tiin min zawt deuh thut a. A biangah chuan ka kut pahnihin ka vuan a, "Aw Puipui, ka hmangaih tak tak che alawm." tiin ka chhang a. Kan infawp a, "Keipawn ka hmangaih che." tiin min chhang a.

Kan infawp leh a, kan duhthawh telh telh mai. Kan infawp nasa telh telh a, keipawh ka kut a hlei tan ta khawp mai. Mahse min dang miah lo, kan thawmhnaw pawh kan ngaitheilo tan ta. Tichuan a vawikhatna atan, Puipuii nen chuan hmangaihna tuipui ah chuan muang chang chuan kan pil dun ta riai riai a.

************************ 

Motor ah chuan kan pahnih chuan kan awm dun a, tlang pan chhohna bulah lawk chuan kan la awm tho va. Kan ngawih dun vang vang hnuah chuan, "I pa kha i ngai ve thin em?" tiin min rawn zawt deuh thut mai. "Aw ngai ve thin e....nang zawk?" tiin ka han zawt let a.

"Umm...ngai ve tho a, mahse...min duat lo ve em a. Chubakah, a thih dan kha a zahthlak bawk sia." a han ti zawi sap a, ka khawngaih takzet henu hi chu. Kan han ngawi dun leh vang vang a, "Anih chuan naktuk chu i kal dawn ta tho tihna mi?" tiin ka han zawt ve leh a.

"Umm...ka kal phawt mai loh chuan...a laklawh tawh emai."

"Umm nia...engtik nge i kal ang?"

"Chawhnu lamah aniang."

"Flight in a mi?"

"Umm."

"Pawisa te i indaih thei maw...inthlahrung lo la..i bialpa ka awm hi."

"Aih...ka book fel vek tawh alawm, a hma daih atang tawh khan."

"Anih ka thil offer che chu?"

"Tunah hrih chuan a rem hrih lo emai, mahse kan ngaihtuah dawnnia."

"Nia, keima thiam loh vek. Ka lo ngaihtuah vat lova, ka bulah i awm reng thei dawn a, a tha dawn asin le."

"Chutin sawi mah ta che, chubakah keimah hian engmah thiam ka nei ve lovang."

"Engmah thiam lohna tur a awm lo, MA lai i pass ve a...a mak thin emai."

A han nui vur vur a, "I sual thiam emai a." tiin min sik vak a. Kan titi leh deuh nual hnu chuan kan thisen a lum leh ta tlat mai, kan in-kiss leh a. A ngai te ang bawkin kan silh leh fen te chu ka hlip a, round two kan bei leh ta. A tu zawk zawk mah chu kan inzah tawh lo, kan zawh hnu chuan kan inthlah ve thei ta hram a ni.

*********************

A tuk a lo thleng a, office kal pawh a tui awm tawh loh hle mai. Ka rilru ah chuan Puipuii hlir chu a awm a, kan intawn lehna a la rei loh tehreng nen, kan inkalsan leh nghal vat a ngai chu ka lung a leng lawk takzet. Ka hna ah pawh chuan ka rilru ka pe thei hlawl lo, meeting naah pawh eng vak mah ka sawi lo.

Chhun chawlh hun a lo ni a, office canteen ah chuan ka thu ngawi reng a. Ka thil ei lai pawh chu ka ei tui lo kher mai, chutih lai chuan ka phone chu a rawn vibrate a. Ka han en a, Puipuii message a lo ni. "U Brandon, hei Lengpui lam kan pan dawn chiah." a rawn ti a.

Rang takin ka reply vat a, "Ka lo kal ve dawn mi? Hei chhun kan chawl mek a, ka rawn thleng har lovang." ka han ti nghal thawt thawt a. A inthlahrung ve deuh nge ni, "Aih a ngai hleinem, hei Tluangi leh a bialpa in min thlah dawn alawm." tiin min chhang a.

"Engin nge in kal dawn?"

"TAxi in a nimai aniang chu."

"A fare a to awm si, ka motor hian ka lo thlah zawk dawn che em ni?"

"Ngai lo, a inthlahrunawm..chubakah ka tibuai leh lutuk ang che."

"Ti buai lo nasa, in awmna sawi la...ka lo kal vat ang."

"I buai lo tak tak maw?"

"AW...ka thawhpuite ka lo hrilh mai ang."

"Naa...a inthlahrunawm e.."

"Sawi buai tawh suh..khawnge i awm, ka lo kal ang."

"Umm...step bulah khan ka lo nghak ang che."

"Awle, ka lo kal nghal."

Ka thil ei lai pawh chu ka kalsan nghal a, rang takin office lamah ka let leh a. Ka staff te chu ka chhuah lawk a ngaih thu te chu ka hrilh a, tichuan ka motor lam panin garage ah chuan ka tlan thla leh nghal a. Ka motor chu ka start a, Puipuii thlah tur chuan an veng lam panin ka inkhalh phei nghal a.

**************************

Ka tlan chak bawk aniang, ka thleng rang kher mai. An in pan thlakna step ah chuan amah Puipuii leh Tluangi leh mipa pakhat hi an lo ding a. Motor atang chuan ka chhuk a, "Ka tlai em?" nui sang chung chuan ka han ti a. Tluangi chuan min lo thlek nasa mai, mahse ka en let ve peih lo.

Puipuii pawh chuan, "Ka rin aiin i rawn thleng rang zawk a, i va tlan chak awm ve a." nui sen sen chung hian a lo ti a. "Nia..khawi bungrua vel chu dah lut vat ila, i tlai palh ang." tiin a bungrua te chu ka motor ah chuan ka dah luh sak zung zung a. Puipuii chuan Tluangi bula lo awm ve chu a kawk a, "Hei hi SAngtea a nih hi....ka unaunu thianpa ve hi ania." tiin min inhmelhriat tir a tum a.

Mahse ka ngaihsak peih lem lo, "E anih chu." ka ti hmuk ringawt a, Tluangi lah chuan min lo la en reng a, ka beng hawi sawk chak ania. Kan tih fel hnu chuan Tluangi chuan, "Tluang deuhin i kal dawnnia aw, i thlen veleh min lo hrilh la." tiin a han thlah vel deuh thlap a, ngaihsak ve niawm fahrana a han tawng vel te chu ka ei lo nasa a ni.

"Awle, ka nu kha lo enkawl tha rawh aw..kan kal ange." tiin zaidam tak chuan Puipuii chuan a chhang a, kei erawh chuan a biak pawh ka be peih vel lo e a. Tichuan motor chu ka start a, airport lam pan chuan kan kal ta a. Kan kalkawng ah te chuan kan titi mang lo, kan inngai lawk lutuk chu hnuk hi  a ulh tun thei.

Puipuii lah chu a inhnit feih feih reng bawk a, a hrehawm takzet. Kan ngawi dun reng a, "Engtik nge i lo chawlh leh theih ang?" tiin ka han zawt a. A mittui hruk zeuh pah chuan, "Nakum January daih a ni tawh ang." a han ti tham tiak a. Kan ngawi dun leh reng a, rei vak lo hnuah chuan Airport chu kan thleng ta.

************************

TO BE CONTINUE