THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 9

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 9

**************************

A tuk atang chuan hna chu ka kal zawm leh a, mahni chauh va awm ka nih avang chuan chaw pawh office canteen lamah ka ei mai zel a, mahni a inbawl chawp chu ka peih ngang lo a ni. Rinhlui pawn min rawn be fo va, mahse chuti lutukin ka la chhang tha peih lo.

Min lo bumna zawng zawngte kha ka ngaihtuah let leh thin a, ngaihdam han tum viau mah ila, ka thinrim thar leh thin. Chubakah mi ka atangin a personal doctor anga a sawi nen khan an inzui fo tihte ka hre thawi deuh reuh emawni a, ka chiang chiah ngam lo.

Mahse ka zawt peih lem lo, a duh duh danin awm rawh se. Inthen ngawt chu ka duh rih mai loh avang leh ka nu ka ngaihtuah avang chuan ka ngawi mai mai rih zawk a, mi hi a vin ve khaglang zawk zamah zel a, hei hi kei chuan ka ti thei thak thin lo, mahni tawk ah ka chapo ve bawk a.

A chang chuan ka ning lek lek thin zawk, a inthiam lo dawn ve viau amaw tih lai hian a chapo zawkah hian a tang leh tlat zel hi ka huat ber chu a ni. Inthen lah chu a sawi ri reng mai leh nghal a, amah hian ka ngai khaw lo ta viau ang hian a inngai tlat ni mai hian ka hria.

Kar khat vel a liam leh hnu chuan Mizoram lamah pawh ka haw leh thei ta a, tluang takin ka thleng bawk. Kan chhungkaw thum, kei leh ka nu leh Rinhlui te tlawng chu kan khawsa leh ta a. A ngai te ang bawk chuan Rinhlui nen chuan kan inhau leh ta fo mai a, kei pawh dik lo na tam tak ka nei ang.

Mahse khati khawpa ka laka a thil zep ka ngaihtuah hian thinrim ngam tur hi a ni lo hrim hrim, a tawng thei em em mai lehnghal a. A hma chuan eng ang pawhin inhau nasa mah ila, han inthlem lungawi kha a awm ve zeuh zeuh tal a. Mahse tunah chuan a ni tawh lo, kan riak dun lo ta fo mai.

Sofa ah ka riak daih zel a, a nih loh pawhin chhuatah te ka mu daih zel. Ka nu bulah chuan engmah chu ka la hrilh duh chuang lova, a inthlahrun awm duh thin khawp mai. Ka nu hi a mal ngawih ngawih mai si a, a lo tar ve tulh tulh bawk nen. Amah chauh va a awm ruk ruk ka hmuh phei hi chuan ka hnuk a ti ulh thin, tu hmel hmuh a chak thu lah a sawi bang thei der si lo.

Vawi khat chu kan inhau nasa zual deuh va, a tlan ta nge nge a. Ka nu chuan ko let vat turin min tur sek a, mahse ka tum lo bur. Kar 2 vel lai chu a rawn haw duh tak miah lovah chuan ka nu pawh ka chungah a lungawi tawh lo kher mai, min hau hrep lehnghal.

Mahse thudik engkim chu ka hrilh ve ta vek a, a tir phei chuan a awih lo hial zawk. Ka ning ve takzet tawh, chu mai bakah neih let leh pawh ka duh tawh lo. A la tlan ngam zawk kha amak ka ti, chuvang chuan ka zep peih tawh bik lo a ni. A tawp a tawpah chuan kan inthen ta nge nge a, rin ai takin mi sawi kan hlawh em em lo hlauh.

**************************

Rinhlui nena kan inthenna atangin thla 2 lai a lo liam leh ta, vawi te khat mah ka ngai eih lo. Tlai khat ka office bang chu haw tlang mai lo chuan restaurant ah ka peng kawi a, ka nu chu chaw min lo eisan mai tur chuan ka hrilh a. Rinhlui nen kan inthen hnu khan ka nu chu amah chauh va a awm ka duh loh avangin ka patea te nupa chuan min rawn fin hrih a ni.

Ka inhnawh puar hnu chuan pawisa ka pe fel a, ka chhuak chiah chu hmeichhe pakhat nen kan insu palh a. A la tlu tep zui, "I na em? Ka tihpalh aw..." tiin ngaihdam ka dil nghal a. "Na lo ve." tih pah a min rawn en chu a meng phawk nasa mai, chutiang bawkin keipawh.

Chu nula chu tudang nilovin, Bangalore-a call girl pakhat, a hming Esther-i ngei kha a ni. Kan in en dun reng ringawt a, "Ihh...nang hi.." ka han ti vang vang a. Zah hmel tak hian hnuailam a melh nghal a, "Ihh..i dam maw?" a han ti tham tiak a. "Esther, nangmah tiraw?" ka han ti leh kher a.

Nui suk chung hian, "Aw, keimah...i..i dam tha maw?" zah hmel tak leh hnuai lam la melh reng chung chuan a han ti leh a. Ka khawngaih zawk e a, "I unaunu chu enge a an zel?" tiin ka han zawt leh a. Nui sangin a rawn hawi chho va, min rawn en ve ta. A hmel chu chiang deuha en phei chuan a tha phian mai, "Umm..nanga tanpuina vang liau liau a ni." tiin min chhang a.

"Khawiah nge i kal reng reng a? Khawilai nge in veng?"

"Ihh...ka..ka thiannu ka hmu lawk a, ka lo haw dawn chiah a."

"A nih chu mawle, hawh...ka thlah ang che."

"Aih a ngai lo, taxi in ka haw mai ang."

"Inthlahrung suh, hei ka carin ka thlah mai dawn che alawm."

Inthlahrun hmel tak hian ka car chu a en a, "Aa...keimahin ka haw zawk mai ang." a han ti zawi leh sap a. Ka nui suk a, "Min hlau ami?" ka han ti fiam a. A lu thingin, "Aih, teuh lo mai. I hlauhawm loh zia te chu ka hria alawm, chutiang lam a nilo." tiin a insawi fiah nghal mawlh mawlh a.

"A nih te chuan?" ka han ti chu a lai lek lek mai. A lai hmel te chuan tu emawni min hriatchhuah tir rum rum thei, "Umm..ka lawm ngawt ang." a ti ta nge nge a. Motor ah chuan kan inzui lut a, kan tlan ta a. Ngawi renga rei fe kan tlan hnu chuan, "Hetah hian ka lo chhuk ang, khu lai step ah khuan chhuk angai a." a han ti zawi leh sap a.

Motor chu ka ti ding a, "Ka lawm lutuk aw..min thlah a..ka lawm tak tak ania." tiin min han nuih leh sen sen a. "Awle, keipawh ka lawm e." tiin ka lo chhang a. Motor atang chuan a chhuk a, tlan leh mai ka  tum chu a bag a lo theihnghilh reng mai. "Esther lo ding lawk teh." tiin ka au ding a.

A lo ding ve mai bawk a, a bag chu la in motor atang chuan ka chhuk a. Ka va pan phei pah chuan, "Hei i bag i theihnghilh a.." tiin pek ka han tum chu a bag zipper a lo in hawng nen, ka inchhui khut a nih kha. A make-up tlema zawng leh note book tereuhte hi a rawn tla chhuak a.

"Sorry sorry, tihpalh lutuk." tih pah chuan ka chhar sak nghal mawlh mawlh a, note book chu a lo in keu a. A phek hmasa bera lian taka inziak ka han chhiar fuh thut mai chu ka phu chiang kher mai, ka hming a lo inziak, BRANDON REMRUATPUIA tih chu lian tak hian a lo inziak a nih chu.

Estheri chu a rawn tlan a, a bag chu min rawn lak sak a. Inthlahrung tak hian, "A pawi lo, a pawi lo. Keipawh hi ka haihawt lutuk thin a, ka va tibuai tak che." tih pah chuan a note book chu rawn lak a tum a. Mahse ka kut chu ka lo dah sawn daih a, mak ti tak hian min en hu mai.

Keipawh chuan a mitah tak ka en ve a, "Ka hming ka la hrilh miah lo che, tunge ka nih pawh i hre hek lo. Mahse tinge he i note book ah hian ka hming a awm?" tiin ka zawt ta a. Mak a tih hmel takzet, "Engmaw? Enge i sawi awmzia?" tiin min zawt hu mai a.

Ka hming inziahna chu ka entir a, "Brandon Remruatpuia, hei hi ka hming a ni. Engtin nge i note-book ah hian a inziah theih? Tunge ka nih i hria em ni? Tunge i nih?" tiin ka han zawt leh a, ka rui deuh bawk nen ka pawr khawp mai. Chutah a mittui chu a rawn luang nghal zawih zawih mai, "Bran..Brandon..nangmah maw?" tiin a tap titih ta mai a.

Ka hrethiam lo kher mai, "Min hria maw? Tunge i nih a? Engtin nge min hriat?" tiin ka han zawt leh a, ka vin lek lek tawh. Mahse min chhang lo, zawi muang chuan a kut chu a rawn phar chhuak a. A note book ka ken lai chu a phek lehlam chuah a rawn keu va, chutah chuan AND LALREMPUII tih a lo inziak a.

Engtin emaw hian ka awm, ka sa chhuak deuh vek ni mai hian ka hria. Lehkhabu chu ka en vang vang a, amah chu ka en leh a. Chiang tak hian ka en a, Puipuii hmel a lang chiang tulh tulh mai. Ni e, amah ngei a ni. Puipuii, ka hmangaih, kum 15 zet ka lo hmuh tawh loh, Lalrempuii ngei kha.

Keipawh chu ka hnuk a ulh, "I..i ni maw? Nangmah maw..Puipuii?" ka ti bah nuai mai. A mittui a tla zawih zawih a, a lu a bu nghat nghat bawk a. Kan tawng dun hleithei lo, kan mittui chu a sur hian a sur dun zung zung mai. A biang te chu ka vuan a, ka chul a. Amah pawh chuan ka darah min vuan a, "Brandon...avan mak tak. Ka awih thei lo, engtin nge a thlen theih zawk?" tiin a tap hawm hawm mai.

"Puipui, khawiah nge min kalsan daih a? Mawh..ka ngaih zia che hi i hria em?" tiin keipawh chu ka insum zo tawh lo. Nghet tak chuan kan inkuah a, "Ka tihpalh, ka tihpalh lutuk." tiin tap chungin min lo kuah let ve bawk a. Kan infawp vawng vawng a, kum 15 zet a liam hnuah chuan ka hmangaih ber Puipuii chu ka tawng leh ta.

*******************************

Car ah chuan kan chuang dun a, a note-book chu ka en kual a. Min ngaih thin zia te, min theihnghilh ngai reng reng loh thu te chu a lo ziak teuh mai. Min lo la hmangaih ve reng a ni tih ka hria a, ka hlim takzet. Ka kutah chuan a rawn vuan a, "I van changkang tawh bik ve a, i hausa tawh bawk si...lehkha i zir tha animaw?" tiin min han nuih suk a.

"Ka vanneih vang mai mai mawle, Pathian vang liau liau a ni." tiin ka chhang a. Lehlam hawiin motor tukverh ah chuan a han dak a, van lam a melh chho va. "Min ngaihdan a dang vek tawh ang tiraw? Call girl te ka ni sia, min ngainep ngawt ang." zaidam tak chuan a han ti zawi sap a.

Chutia a sawi ringawt pawh chuan ka tah a ti chhuak, "I duhthlanna a ni lo tih ka hria, ka sawi tawh kha. A chhan min hrilh la, tupawhin harsatna te chu kan nei vek alawm." ka han ti dam diai a. A han thu tha te te a, a thaw deuh hak bawk a. Uang thuang deuh reuh tak chuan min rawn en a, "Nupui i nei tawh em?" a ti deuh thut mai.

"Keiman maw?" ka ti deuh hu ringawt a. A khi suk a, "Kan pahnih chiahin kan awm hi, keimah maw tih a ngai a mi?" a la ti deuh zek zui. Hreh tak chung chuan, "Umm..nei tawh e." tiin ka chhang a. ZA lo tih hriat tak chuan a khi suk ringawt a, "Umm..nia..ka ring reng a ni." a han ti tham tiak a.

"Mahse, kan inthen daih tawh."

"Eng a? Tinge?"

"Kan inngeih lo lutuk a, chubakah inhmangaih lo tak chunga innei kha kan ni miau va."

"Engtia rei nge in inneih hman?"

"Thla 8 vel aniang, ka chiang tawh lo."

"Awii..la ti zui. Anih leh fa in nei tawh em?"

"Nei lo, a rai thei lova. Aaahh...a rai thei lo han tih ah, ihh...um..a rai thei lo a nimai." ka han ti bah nuai a, a nui ringawt a, min zawt chhunzawm lem lo. "Anih nang, pasal i nei tawh em?" tiin ka han zawt ve leh a. A ner deuh nung a, "A teuh lo mai, ka nei peih lo." a ti deuh hmuk a.

Kan ngawi dun deuh vang vang a, "I unaunu dam lo i sawi chu...Tluangi em ni?" tiin ka han zawt deuh thuai a. A hmel chu a danglam chiang kher mai, a mittui pawh a parawl kuang mai. A lu a bu nghat a, "Umm...a hrisel lo lutuk a...englo ania, a khawsik a sang thei lutuk a." a han ti nuah nuah a.

Amah vanga inhmu ta lo vang vang ni mah ila, ka khawngaih ve reuh hle mai. "Anih leh tunah enge a an?" tiin ka han zawt leh a. "Tunah chuan a tha e, a damtha leh tawh. Hospital hi kan lut deuh reng mai a nih hi...a buaithlak ania." tiin za lo deuh chuan a khi leh suk a.

"Anih enge Bangalore-ah khan i tih reng reng a? Tinge khatiang thil te kha i tih a ngaih tak mai a?"

"Sawi dawn chuan a thui lutuk."

"A tlangpui tal min hrilh la."

"Tluangi kha...a khaw lo telh telh a. Zu in te a ching a, kan han upa chho ve zel, kum 20 kan han pelh hnu phei kha chuan tlangval hrang hrang kha a kawp a. College pawh a kal ta lo, kei erawh chu tihian ka nu leh paten min zir san tir chho zel a. MA ka pass hnu khan Bangalore ah Hotel Management ka training a...." a tawp deuh chat a, a inhnit feih feih a. 

Tap deuh tuau chung chuan sawi zawm leh in, "A hnuah damdawi hmawm ang chi te kha tih ve a ching tan a, tichuan a hrisello chho ta em em a. Kei lah training ka ngai bawk si...MA ka pass hnu pawh khan school teacher niin ka training hma khan ka thawk kual hrep phawt a. Chumi hnuah chuan ka kal chauh a ni, thla 3 ka training hnuah staff pangngai angin min la a. Mahse thla khatah sing khat chauh kan hlawh a, a vaia thawn vek chuan eitur ka nei dawn bawk si lova, kan buai a ni tawp mai." a han ti leh nuah nuah a.

"Tinge i nu leh pate, ka sawi awmzia chu...an khawsa thei ve viau ani lawm ni?" tiin ka lo zawt a. "Vanduaina ka ti dawn nge....Pathianin min hrem ka ti dawn zawk pawh ka hre lo ve a. Ka pa kha a eiruk an man a, jail ah a tang a. Chu chu Bangalore-a ka thawh laiin a nia, tichuan nasa takin kan chhungkua kha kan mualpho va. Ka pa lah chu jail chhungah midang tang te nen intibuaiin an vit hlum palh bawk a, tiang vel chu a ni." a han ti leh mai chu, min thawng takzet.

"Chuan enge thleng zel?"

"Ka nu leh kei leh Tluangi chauh kan ni ta a, Tluangi lah a dam lo reng bawk si nen. Ka hlawh tlem te chauh chu kan rin ber a ni tawh a, chhung leh khat hnai tumah puitu tur kan nei bawk si lo. Tichuan operation tih a ngaih thu an rawn sawi ta a, pawisa tam tak a ngai dawn bawk si nen. Tikhan ka inzawrh a ngaih phah ta a, Tluangi ka hmangaih em avang leh ka nun beidawn em avangin tikhan ka ti ta mai a ni."

Ka rilru a nat rual rualin ka khawngaih lutuk ringawt, a sawi pah te chuan a tap nasa mai a. ZAwh chhunzawm zel chi ni pawhin ka hre lo, "Tunah chuan Tluangi pawh a dam tha tawh a, engmah chu a ti rih lo. Mahse a dam anga, a rui leh vak vak thovang." a han ti leh a.

Sawi mai tur pawh ka hre lo, hnem dan mai ka thiam lo tlat a ni. A kutah chuan ka fawp a, "Min nei mai rawh." ka ti tawp mai, ni e...chan leh ka duh tawh lo a ni. Phawk hru hian min en a, "U Brandon, nupui nei tawh i nih kha..chubakah kei ang a ruka inzuar thin mai mai hian ka phu tawh lo che." tiin  alu a thing a.

Mahse nghet tak chuan a kutah chuan ka vuan a, "Enge pawi? Nupui pawh nei mah ila, kan inthen tawh a, karah fa an awm pawh ni hlei lo. Keipawh engmah ka nih bik loh hi, chan nawn leh che ka duh tawh lo, Puipui." tiin ka ngen a. Min kuah a, ka chalah chuan min fawp vawng vawng a.

A sam chul pah chuan, "Brandon, ni love. Tunah tut tut chuan ni love, kei ka awm lohvin tunge ka chhungte enkawl ta ang? KA kalsan thei lo, min hrethiam rawh." tiin min chhang a. "Ka enkawl mai ang, i unaunu leh i nu chu...ka enkawl mai ang. Kan cheng ho vek ang a, kan hlim em em ang." ka han ti leh tawp a.

"Engemaw i sawi le? I a em ni?"

"Puipui, kum 15 chhung zawng khan nangmah ngaiin zan tam ka mu ngai lo. I thi nge i dam pawh hrelovin mal takin ka awm a, nupui ka neihna chhan pawh ka nu khawhar lutuk ka khawngaih vang mai mai a ni."

"Umm...ka hrethiam alawm. Mahse tunah chuan thuthlukan siam tut tut hrih suh, chubakah ka nihna hi a mualpho thlak emai."

"Eng ang pawhin lo awm la, ka ngaidam nghal che. Ka hmangaih che, Puipui..ka hmangaih takzet che."

Mittui tla zawih zawih chung chuan min en a, "Keipawn ka hmangaih che, U Brandon." tiin min chhang a. Duat tak chuan kan infawp leh vawng vawng a, ka hmangaih ber ka hmu leh thei chu a nawm rual rualin a dinhmun ka hre chiang chu lung a chhe duh kher mai.

"Tunah chuan ka haw phawt angai, ka nu in min lo ngaihtuah tawh ang. Nakinah kan inhmu leh dawnnia." a han ti leh a. Mahse a kal mai chu ka phal ngang lo, chleh reng chi ni hek lo le, number te inpe in kan inthlah ta a. Step-a a chhuk chhung zawng chu hmundang ka hawisawn phal lo, an in a luh thleng chuan ka en zui a, tichuan in lam panin kei pawh chu ka haw ve leh ta a ni.

*********************************

Inah chuan ka haw a, ka hlim rual rualin ka mangang bawk a, hrehawm ka ti bawk a, ka ngai leh nghal ngawih ngawih mai. Mumang ang mai hian ka la hria, ka hmu tawh ngai dawn lo emaw ka tih kha ka hmu leh ta thut mai chu ania. A vanduaina chu ala inchhunzawm reng mai chu ania, ka khawngaih zual kher mai.

Ka inbual fai hnu chuan ka mu nghal a, Puipuii chu ka text nghal a. Ani pawh chuan rei loteah chuan min rawn reply vat a. KAn vawikhat intext-na a ni bawk a, a nuam dangdai viau mai. Kan school kal lai te, kan induh tan tirh lai vel te leh kan inngaihzawn chhoh dan vel te chu sawiin kan hlim dun kher mai.

"I nupui nen chuan nupa nun inhmang dun ve fo awm sia, ka thik reuh e.." tiin smiley te chu a rawn dah teuh a, ava tul kher lo tak. Kan infiam dun chiam chiam bawk a, a chang leh kan in video call thul. AWm ngaihna kan hre lo a ni ber mai, Rinhlui chungchang lah chu min la zawt chhen zui.

"A thalak min lo thawn teh." vawi 5 chuang min dil vak vak hnuah chuan ka thawn ta nge nge a. "Awiii...a hmelthat em hi, kei ai chuan a tha thlawt." te a rawn ti vel chiam chiam a, a upa tulh tulh a, a lo nghal sawt riau mai henu te hi. Ka pa boral thute leh company ka enkawl chhunzawm chhoh dan te chu ka share ve nual bawk a, ani pawh chuan a hun hman chhoh dan te chu min hrilh ve nual bawk.

"Anih kan inhmuh thu hi Tluangi i hrilh tawh em?"

"Aih hrilh nang, hrilh dawn pawh ni ila ka haw khan a lo muhil daih tawh a."

"Umm..i hrilh dawn em?"

"Ka hre nang, ka hrilh i duh em ni?"

"Duh chuang love..mahse nakinah ala hre dawn tho tho va."

"Nia..anih chuan ka hrilh dawn mi?"

"Ngai lo, hrilh kher angai hrih lo."

"Naktuk i office ang tiraw?"

"Aw dawn e, tinge?"

"In bang tlai thin awm sia."

"Inhmuh i duh em ni?"

"I duh ve lo ami?"

"Duh e, min chhang ve phawt la."

"Umm..hmuh reng che ka duh alawm."

"A nih chuan ka lo bang hma ang a, nang enge i tih dawn hrim hrim a?"

"Aa...Tluangi chhuanlamin kar 2 chiah leave ka la a, chhuk leh vat angai dawn a. Engmah ka ti ngai lo, hei Tluangi pawh a dam tha leh tawh bawk a, ka chhuk leh vat a ngai dawn a. Chuvang chuan a tam thei ang ber inhmuh ka duh a, mahse keimah vang mai mai a office i ban hma chu a inthlahrunawm e."

"Engmaw? Bangalore-ah i chhuk leh vat dawn maw?"

"Aw...ka lo hrilh theihnghilh daih che a...tihpalh."

"Umm..anih naktuk ah chuan dar 4 velah inhmuh kan tum dawnnia."

Plan chu kan siam fel a, zing dar 3 vel thleng chu kan inbiak hnu chuan kan mu ve thei ta hram a. Tluangi hming a sawi ringawt pawh chuan hun kal tawh ka ngaihtuah let lo thei si lo, a damlohna avangin khawngaih ve tho mah ila ka la ngei reng, amah phiangsen vang vek kha a ni miau va.

********************************

A tuk zingah chuan dar 6:30 velah ka tho leh nghal a, mengrei thang bawk leh tho hma thang bawk na na na chu ngaiah ka nei ve tawh. Khum atanga ka thawh chhuah hma hma chuan ka phone chu ka en a, a la tho lo a ni ngei ang, Puipuii message ala awm lo tlat.

A la hma ve bawk em a, a mengrei bawk nen, a awm ve tho ve. Fai takin ka inbual a, ka inbual zawh hnu room-a ka let leh chuan ka phone chu ka han en a. "Good Morning." tih message chu ka dawng a, Puipuii hnen atangin a ni. "Morning le...vawiin tlai kha aw, lo kal lo vaih teh." ka han ti fiam vel a.

"Lo kal lo ta ila..engtin nge min tih dawn?" a rawn ti leh deuh kher a. "Ka khai zai ang che." tiin ka han fiam let ve a. REi deuh fang chu kan han intext leh phawt a, tichuan office kal tur chuan ka insiam a. Room atanga ka chhuah meuh chuan ka patea nupui chuan chawhmeh a lo chhuang lum der tawh.

"Ehe Bawiha chu...iva hman hma ve..kha, chaw chu a ei theih tawh tho ania." ka patea nupui, Nu Maremi chuan a lo ti a. Chaw te chu ka han ei puar a, tichuan ka motor lam panin ka chhuak phei a. Puipuii hmuh nghakhlel tak chung chuan office lam ka pan phei a, ka zai phei rut rut mai.

Engtia awm zel tur nge erawh ka hre lo, mahse Puipuii hi chu engpawh thleng se chan nawn leh chu ka tum tawh lo bur. Hun kha leh chen amah ka lo zawng tawh a, move on ka tum ngial pawh a ka hmangaih em avanga ka theih thak loh kha a nia, tunah hi chuan tuma tan ka phal tawh lo, min kalsan hi ka phal tawh lo bur hi a ni tawp mai.

Nileng chuan office ah pawh rilru ka pe hleithei lo, board meeting naah te pawh chuan Puipuii ringawt chu ka lo ngaihtuah leh thin a. Min biak te chuan ka lo phu leh zuk zuk zel, mahse mualpho leh zahthlak khawp chuan ka chet phah bik em love. Haw hma ka ngaih thu te chu ka sawi a, tichuan dar 3:30 a rik chuan office chu ka chhuahsan ta a.

***************************

Motor ah chuan ka lut a, "Ka bang tawh e, khawnge i awm..ka rawn lam dawn che em ni?" tiin Puipuii chu ka han text a. Minute 10 hnu velah chuan min rawn reply chauh, "E..i va bang hma leh si ve..dar 4 kha i ti sia...khawnge i awm zawk a?" tiin min rawn zawt let a.

"Hetah office kawtah ka awm a, khawiah nge i lo awm dawn?" tiin ka reply ve leh a. "Kan in step chhukna bulah, nizana min thlahna bulah khan ka lo awm ang, i rawn phei pahin ka lo insiam ange." tiin min rawn chhanglet ve leh a. Tichuan phur tak chuan ka motor chu ka start a, chak takin ka tlan phei a.

An in step bul ka thleng a, min lo nuih sen sen mai. KA mitthlaah chuan a naupan laia min nuih sen sen laite chu a lo lang leh a, a lo upa ve tawh bawk a, a hmel pawh  a danglam ve tawh viau na chungin ala hmeltha reng tho. A hmeltha mai pawh a ni lo, hmeltha tak a ni hmeltha tak.

A dinna bulah chiah chuan motor chu ka tiding ve a, "I van rang em em.." tih pah chuan a rawn chuang a. Ka han en vang vang a, "I van chhelo ve a.." ka han ti fiam a, min ner khum nasa mai. "I over lutuk, khawnge kan kal dawn?" tiin min zawt a. Ka han ngawi vang vang a, "Tlangah khan han kal ang hmiang?" ka han ti chu a ngawi vung vung a.

Min en deuh hu a, "Khawilai tlang maw?" a ti hu mai. "Aww...kan inhmuhna thin...sunday tin kan inhmuhna thin tlangah khan mawle." ka han ti chu chunglam en meuh chuan a han inngaihtuah vang vang a. Chutah a nui suk a, "E..e..e ni tak, Tluangi'n min rawn ambush naah khan maw?" tih pah chuan a han nui duah huah huah a."

Kei pawh chuan nui chung chuan, "Ni chiang e, han kal ang aw..." ka ti a. "Umm..a lunglen thlak mange..kal ila nimai lawm." tiin kan han in-muah zeuh va, a pawimawh tlat. Kan kal tak tak hma chuan eng eng emaw eitur te chu kan lei lawk a, tichuan kan inhmuhna thin ngei tlang lam pan chuan kan kal ta a.

***************************

Tlang chu kan thleng a, motor atang chuan ka chhuak a. Puipuii chuan step chu a han en chho vang vang a, "Ehe..engvak mah ala danglam lo mawle, ava han ngaihawm tak." a ti nuah nuah a. A banah chuan ka kai a, "Hawh chho ila." ka ti a, kan inzui chho dun leh ta.

Kum 15 hnuah, kan pahnih bawk chuan kut invuan ngeiin kan inhmuhna thin tlangah ngei mai chuan kan inkai chho leh thei ta, mumang ang nimai hian ka la hria. Kan chhoh pah te chuan kan titi nasa, tawng kan inchuh hi a ni deuh ber mai. Ani pawh a hma ang ngawt kha chu a ni tawh bik lo, a tawng duh ve barh barh tawh lutuk.

A zawl lai chu kan thleng a, "Helai pawh hi...engmah ala danglam lo hrim hrim, mahse hnim a tam ve deuh tawh a nih hi.." tiin Puipuii chuan a han enkual a. Kan thut dunna thinah ngei mai chuan kan han thu dun leh a, min kuah leh rial a. "Ka beisei ngam tawh loh ber thil chu a thleng leh ta mai chu ania, a nuam ka ti e." tiin min han kuah nghet zual sauh va.

Kan titi dun leh a, "Taka Puipui, tinge Estheri i intih daih a?" tiin ka zawt a. A khi suk a, "Khatiang hna tenawm thawh dawn te chuan hming tak tak ka hmang duh teuh lo mai." tiin min chhang a. Kan ngawih leh deuh vang vang hnuah chuan, "Engtin nge a tir khan ka hriat nghal mai loh che le?" a rawn ti chhuak deuh thut a.

Kei pawh chuan, "Nia tiraw? Kei pawh khan ka hre nghal mai lo che alawm, hmuh tawhna che ka nei khan ka hre reng a ni." ka han ti ve chu a awih loh hmel kher mai. A ner deuh sak a, "Hmm...ka awih kher lo ea, min ngai lova min hre tawh lo a nih kha." a han ti kual vel a.

"Ka hriat reng che hi mawle...nangpawh tinge min hriat nghal mai bik loh?"

"Aww...i lo patling ve tawh em alawm."

"Ehe...hmelchhia min ti animaw?"

"Awi a teuh lo mai, keipawh ka senior tawh em hi."

"I la young em kha...sweet 16 ila ni ringawt."

"Vela che aw...ka hmel te hi a chuai tan tawh...ka upa tawh lutuk."

"Anih leh kum engzat nge i nih?"

"28 ka ni ve tawh...nang chu 30." an ti nghal zuah zuah a. Ka nui ringawt, "Ka hria alawm, 30 ka tling tawh a, mahse hei ka la flirt pui che chu ania...fa nei phei ila chu pathlawi ka ni der dawn tihna ania." tiin ka han nui vel huah huah a. Ani pawh chuan nui chung hian, "A ho e...30 and flirty i ni mai alawm." tiin ka biangah chuan a han piai vak a.

Kan inhmuh lohna a rei tawh bawk a, sawi tur kan ngah dun khawp mai. Tawng kan inchuh hi a ni ringawt, a nuam ka ti a, a bula ka awm leh thei hrim hrim pawh hi nuam ka ti tawh tho tho. A khat tawk chuan kan inkiss leh a, nupui nei tawh ka ni tih pawh ka intheihnghilh leh dawn alawm mawle.

Thla te kan la dun a, kan inngaihzawn tirh ve lai te kha chuan thlalakna tur phone la nei ve hek lo. Chumai bakah smart phone pawh ala chhuak lo hrim hrim kha a nia, kan selfie dun nasa mai. Kan inhmangaih thu inhrilh miah lova inthlah kha kan ni a, tunah zet zawng ni 1-na atang pawhin kan inhrilh ngun malh malh tawh khawp mai. 

Kan thil eitur lei kan ei zawh hnu chuan, "Hawh..haw hma coffee indun leh lawk ang." pangchang deuh tak chuan a han ti tuau a. Senior ve tawh viau mahse a cute riau alawm, "Tehreng e...kan in dawnnia." tiin ka chhang a. Tlang atang chuan kan chhuk leh a, coffee in tur chuan kan inphur phei leh ta a.

************************

TO BE CONTINUE