THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 6

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 6

****************

Ka rilru na bawk si, hah bawk si leh lungawilo bawk si nen chuan lehkha zir chu sawi loh, chaw ei pawh a tui lo rawk thei alawm mawle. Ka nu leh pate lah chuan min la hauh chhunzawm zel mai bawk si a, mahse chhan let dan tur pawh ka thiam tawh lo. Ka zak a, a na ka ti a, ka lung hi a awi hlawl lo a ni.

Tu phiangsen chuan nge maw dawt a min lo puh khanglang chu le, Tluangi bak a nih chu ka ring chuang lo. Mahse chutiang khawp a dawt phuah chawp lutuk a min puh duh chu ka ring chiah bawk si lo, tiang em em a rilru chhia leh sual a nih chu ka ring phal bik lo a ni.

Mahse ahma zawnga thil thleng zawng zawng te, min huat hmel taka a awm leh thut thut thut thinte leh ka lak atanga Puipuii a ven dan em em atang kha chuan amah bak chu rin tur dang ka hre chuang bawk si lo. Lehkha zir chu lang lo tak a ni ringawt, hmun fianrial a va kal a, va tah vak mai a nia ka chak ni.

Zana meizial zu ru tura chhuah pawh an phal ta lo, ka insawifiah nasat pauh leh min awih lo tulh tulh zawk. Mahse ka nu leh paten thudik ka sawi hi min awih lo mahse rilru na tho mah se ka dem lutuk hram lem lo, a chhan chu a hma pawhin dawt ka lo sawi fo tawh thin a, min man chhuak leh zel thin bawk sia ni.

Min grounded hi a ni tawp, chhuah chu sawi loh, hmunphiah la tura pawna ka kal pawh ka nu hian min en zui hu hu zel. Puipuii ka ngaihna chu a zual telh telh mai zawng chu a ni sia, ava han hrehawm tak em. Nui hmel, hlim hmel ka pu thei lo, engtik lai mai pawh chuan ka tum bur reng ringawt.

*************************

Khami zan, friday zan leh saturday nileng leh zan kha chu ka nguai em em ringawt a, thildang engmah ka ngaihtuah thei lo. Ka eng tih mah a tui lova, ka chhungte leh inlengte min biakna pawh a rul tawk te te bakin ka chhang lo. A rukin bathroom-ah te chuan ka han tap leh rih thin a, Puipuii chu ka ngai takzet a ni.

Sunday chawhnu kan inkhawm ban chuan inah haw tlang mai lo chuan ka thiante inah chuan ka leng kawi a, Ruata chu engkim ka hrilh ta vek a. Ani pawh a lungawi lo kher mai, "An inah chuan va kal ila, va insawi fiah ve ila nimai lawm. Tiang tur hi a ni bik lo, an ngai dik lo vek dawn che asin." tiin a thinrim nasa mai.

Mahse ka rilru dawih vang nge, Puipuii chu buaina dangah ka hnuk lut leh palh ang tih ka hlauh vang zawk pawh ka hre lo, chutianga thil tih bur bur chu ka tum lova, ka duh lo bawk. Chubakah ti khawp khan ka nu leh paten min hau nasa tawh a, keini thiandun ina buaina dang lo va chawh chhuah belh leh kha a fu teh chiam lo.

Chaw ei a hun dawn tawh a, keipawh chu ka haw ve ta. KE in ka haw a, ka rilru ah thildang engmah a leng thlawt lo a ni. Puipuii te veng lam pan chuan ka han kal ve ta thuai ringawt a, pawn velah a lo awm takin tiin beiseina tlem tak nen chuan ka pan phei ve zel a.

Mahse khawi lai ber nge an in ka hre si lo, bus a lo chan thinna lai baw velah chuan ka tei ka tei kual ringawt a. A hmel reng reng hmuh tur a awm bawk si lo, apa khan min lo hmu riau riau ang tih te chu ka hlau hnuhnawh leh a, kal mai ka tum a. Mahse ka kal tur chiah chu ka hnunglam atang chuan hmeichhe pakhat hian, "Lo ding lawk teh." a rawn ti a.

Ka ding nghal a, ka hawi let nghal vat a. Hmeichhe pakhat, hmel pangngai ve tak, ka hriat ngaih hauh loh leh ka la hmuh ngai hauh loh a ni. Kum 15-16 vel bak a la nih bik ka ring lo, "AW enge ni ta?" ka han ti a. Min rawn pan hnai a, "Brandon-a i ni em?" a ti ta mai a.

Ka hrethiam lo kher mai, "Aw ni e, tunge i nih a?" tiin ka han zawt let a. "Ihh...Hruaii ka nia, Puipuii thiannu." a han ti chiah mai chu ka thin phu a rang nghal dup dup hle mai. Ka va din hnaih nghal a, "Engmaw? Pui..Puipuii thiannu maw i nih?" ka han ti nghal deuh chiam chiam a.

Ka hre chhuak nghal zawk mai, sunday hmasa a kan inhmuh khan, "Hruaii te ina leng tur angin ka chhuak a, ka thiannu a nia.." a tih lai chu ka bengah chuan a rawn ri nawn nghal mawlh mawlh mai. Hruaii chuan a kekawr ipte atanga lehkha rawn phawrh pah chuan, "Umm..hei hi i ta tur ania." tiin min pe a.

Ka lo la ve mai a, "Hei hi enge? Chuan...engtin nge min hriat?" ka han ti leh hu a. "Puipuii'n lo pe rawh min tia, mahse a ruk tak meuh meuhvin a nih kha aw ka pek che..a chhungte hriat a hlau teh mai ania." tiin min han chhang leh a. Kei lah pek chuan lehkha chu la hawng chuang miah lo chuan, "Khawnge Puipuii chu a awm a?" tiin a han zawt leh a.

"Ihh...nimin khan an kal tawh."

"Khawiah maw?"

"Khawi khua nge ka hre lo, nizan khan kan inthlah alawm."

"Anih engtin nge hetah ka rawn kal dawn tih i hriat chat theih a?"

"Ihh..englo ania, lo pe ngei ngei rawh a tia, chuan nangmah pawh hi min hrilh a, chuan ka pek theih dawn che leh dawn lo che chu ka hre lo nangin, hei ka hmu hlauh che a nih hi." a han ti kual deuh duah a. KA ngawi deuh vang vang phawt a, "Anih a thiannu Tluangi kha a tel ve em?" tiin ka han zawt leh a.

Chutah Hruaii chuan min en ta hu mai, "Tu a thiannu maw?" a ti ta hu mai a. "Aww..a thiannu, an inhnuai ami kha...LAlnuntluangi kha?" ka han ti leh a. Mak a tih hmel kher mai, "Tluangi kha maw...a thiannu a ni hleinem." a ti ta mai a, ka hrethiam lo kher mai.

"Engmaw? A thiannu a ni lo maw?" tiin ka han zawt leh a. Ani chuan, "AW ni lo..ihh..unau alawm an nih." a la ti ta deuh deuh va. Ring leng lawng tak mai hian, "Unau a?" ka ti deuh vak mai. Hruaii pawh chuan mak a ti ngang aniang, "I hre lo em ni?" a ti hu mai.

Chhan mai ngaihna pawh ka hre lo, mak ka ti lutuk chu ka bo hu in ka hria. Thian inkawm ngeih tak an ni emaw tih laiin, unau lek an lo ni chu ania. Mahse an pahnih khan ngati nge an zep dun tlat le, enge awmzia ni ta ang? "Hruaii, anih tu zawk nge upa?" tiin ka han zawt leh a.

Mahse Hruaii hmel ka en chuan tum loh deuhva thudik min hrilh ta mai chu a inthiam lo deuh a ni tih a hmel atang chuan ka hmu thei, "Hruaii, min hrilh rawh...engkim min hrilh rawh." ka han ti leh a. A han thaw deuh hak a, "Engvak mah chu ka hre lo, mahse..." a ngawi leh deuh vang vang a.

Ka nghakhlel tawh lutuk chuan, "Sawi rawh...sawi vek rawh." ka lo ti leh thawt thawt a. Nuam lo tih hmel tak hian Hruaii chuan, "Englo ania maw, Puipuii hi....an fa lak a nia." a ti ta mai a nih chu, min va han th(r)awng teh kher em. "Fa..fa lak maw?" ka han ti bah deuh nuai a.

"AW ni e, fa lak ania, mahse a bak chu ka hre thui vak lo. Ihh..ka kal phawt mai aw...ka hmu hlauh che chu a tihzia hle mai." tiin a kal ta daih a. Mahse kei chu chet mai ngaihna ka la hre rih lo, ka thu hriat khan min thawng takzet a, min deng na em a ni.

Muang chang chuan ka melh ngai melh reng chung chuan kan in lam chu ka pan phei mek a, "Fa..fa lak, Puipuii...fa lak maw a lo nih a? Chuan...thiandun nilovin, unau..enge maw awmzia le?" tiin ka rilru chuan ka inbe phei mawlh mawlh a, reilote ah in chu ka thleng ve ta.

KA nu leh pate khan min lo be ve nual chuan ka hria, mahse ka rilru ah engmah a lut lo, thildang ka ngaihtuah thei lo. Engtin nge ka chhan tak pawh ka hre lo, room ah chuan ka lut tlang nghal a. Ka inthlak mawlh mawlh a, tichuan Puipuii lehkha min thawn chu keng chung chuan kan inchung zawl lamah chuan ka chho va.

Lehkha chu ka han hawng a, sawi a hun viau lo maithei, mahse a kut ziak mawi em em zia kha. KA chhiar huphurh letling zawk, ka zam takzet. Engchiah nge thleng a, enge thil awmzia chu hre chak viau mah ila, eng tiang taka pawi nge a nih ka hre silo, tichuan ka chhiar ta a.

 *********************

Puipuii Lehkhathawn -

U BRandon, ka tihpalh lutuk aw. He lehkha hi i lo hmu a nih chuan a petu che kha HRuaii a nia, ani khan ka chungchang, ka nihna diktak chu a hrilh tawh maithei che a. Engpawh nise, kei hi i tan hian ka tling lo a ni. A chhan chu maw, kei hi fahrah ka ni a, khawngaihna vang pawh nilo, a t(r)ul em vang chauh a fa atana lak mai chauh ka ni.

Tun thleng hian tunge ka nu leh pa ka hre lova, an hmel pawh ka la hmu lo. KA hriat awm chhun chu Fahrah Run atanga seilian ka ni a, kum 7 ka nih khan tuna ka nu leh pa anga ka en te hian fa atan min la a ni. U BRandon, thudik engkim chu hrilh vek che duh mah ila, engvanga fa atana min la nge an nih erawh ka hrilh thei rih lo che, min ngaidam dawnnia.

KA ngai lutuk che ania aw, chuan nangpawn min ngai ve ngei bawk ang tiraw? I bula awm ka chak lutuk ringawt, mahse kei fahrah ve mai hian tih theih engmah ka nei si lo a ni. Khawngaih takin min ngaidam ang che aw, i rilru ka tihnat avangin min ngaidam hram ang che.

Kum 10 dawn chu ka chhungkaw thar te bulah hian ka cheng ve tawh a, an sual hran lova, min tiduhdah hran lo bawk. Chuan Tluangi nen hian kan inrual chiah chiah bawk a, ani nen pawh hian kan inhaw lem lova, kan inkawm ngeih lutuk zawk. Mahse unau kan nih thu kha tuma bula sawi hi a phal ngai lova, a chhan erawh a sawi duh ngai lo.

School kan rawn kal tirh khan maw, ka hmuh hmasak ber atang che khan, zun in bula kan inhmuh khan, khata tang khan ka vei ngawih ngawih tawh che asin. Tluangi bulah pawh khan ka sawi hial a, mahse ani khan hnaih lo tur che in min ti nghal a ni. Ka duh em em si che a, mahse ani lah chuan min control tlat bawk si.

Dik tak chuan ka lung ni lo ve thin lutuk a, a chhan pawh keimah ang rual lek, ka u pawh nilo, ani tleirawl ve mai ina ka nuna thu neih a tum kha a fair ka ti bik lo. Mahse ka hnial ngam thin lo a ni, a chhan chu engkima min pui bawmtu leh min duhsaka, a unaunu ang chiaha min entu leh min ngaihsaktu a nih vang a ni.

Mahse ka duh lutuk vang che leh, nangpawn min duh ve thu i sawi hnu phei kha chuan ka insum zo tawh bik lova. Thingthi meuh khan Tluangi kha ka dil a, ka nu leh pate bula sawi chhuak lo turin ka dil ngawih ngawih asin. Tichuan a thu ka awih zel dawn phawt chuan sawi chhuak lo turin a intiam a, keipawh ka intiam ve bawk.

Tichuan nangmah nen kan inngaizawng ta a, ani erawh ka hlat tulh tulh thung. Chu chu a ngaithei ta lova, ka chungah chuan a sual tan ta em em a. Min vau khur khur te a ching a, a chang leh dik lo tak takin ka nu leh pate bulah min rel thin bawk. A hrehawm ka ti em em a, mahse i bula tih lan loh hram hram ka duh bawk si.

Khami ni, Sunday khan maw...ka rawn kal dawn pawh khan nangmah ka hmu che a nih chuan ka pa bula sawi ah min vau hial a, a tir chuan ka rawn kal ngam mai bik lo. MAhse ka hmu chak em che a, chuvang chuan ka thiannu HRuaii te ina len chhuanlam ka lo kal thei hram a nih kha.

Tin ka nu leh pate pawh hian an fanu tak tak zawk na na na chu an ring zawk em em a, duat zawk chang an nei a, an tilang ve fo bawk. KA dem chuang lo, a chhan chu an fa lak ve mai mai chauh kha ka ni miau va. A tira kan inngaihzawn atang tawh pawh khan ka hlauthawng der tawh asin, U Brandon.

Khami ni khan maw, dawt sawiin ka chhuak kha a nia. Mahse tikhan Tluangi khan min hmu ta si a, chuvang chuan ka hlau takzet a ni. Ka rin ang ngeiin in ka haw meuh chuan ka nu leh pate chuan min lo hau nghal chiam chiam a, mahse Tluangi chuan dawt a lo phuah belh teuh a ni.

Khawlaia inkiss angin min lo sawi a, dawt a lo sawi belh teuh a, kha khan min tina lutuk kha chhanlet ngaihna pawh ka hre lo. KA thiamthu sawi ve dawn mah ila, kei an fa tak tak pawh nilo thusawi ai chuan an fanu neih chhun leh an duat hlum loh chauh, Tluangi hi an ring zawk dawn tih ka chiang bawk si.

A tirah chuan chutia kan awm loh thu chu ka sawi ve nual a, ka t(r)an char char che a, chutiang mipa i nih loh thu te pawh ka sawi ve. Mahse min awih lo, chubakah Tluangi lah kha a tawngthei em em bawk mai si a. Tichuan ka pa chuan kan pahnih chuan school danga kal tur leh kan awmna sawn nghal turin rilru a siam fel nghal a, engmah sawi theih ka nei lo a ni.

Min ngaidam hram rawh aw, U BRandon. Hei bak chu engmah ka hrilh thei rih lo che a ni, a pawi ka ti takzet. I rilru ana dawn lutuk tih pawh ka hria, mahse kei pawh hi ka na takzet asin. Duhthlan tur dang ka nei silo, anni lo chu min enkawltu tur dang an awm bawk silo.

U BRandon, hmangaihna diktak sawi tur chuan kan la naupang viau tih ka hria. Kan la hrethiam ve tak tak lo pawh a ni thei e, mahse hmangaihna ka hriatthiam ve dan ang ang hian ka hmangaih che asin, ka hmangaih hman tak tak che. Pathianin rem a tih chuan kan la inhmu ve leh mahna, mangtha le.

*************************

Ka thinrim lutuk chu ka kawchhung hi a so hian a so bulh bulh ni mai hian ka hria, Lalnuntluangi vang vek khaw maw lo ni a? Engvanga khati teh fakauva dawt phuah chawp nge a nih, a thil tih pawi zia hi hrethiam ve tak ang maw. Ka thinrim lutuk chu ka insum zo hman lo, lehkha chu ka pawt thler nghal vek.

Ka tho chhuak a, inchung zawlah chuan ka tei kual sek ringawt. Eng dang a ni lo, kha mihring tenawm, Lalnuntluangi khan Puipuii kha a thik a ni. Chhan dang a awm lo, amah aiin a hmeltha zawk a, a duhawm zawk a, a luck zawk a, chuvang chuan a thik a, amah aia a chungnun zawk a duh loh vang a ni.

A rilru kha a dik hlawl lo, misual tak chu ava ni em. "Puipui, ava fair lo ve. A fair hlawl lo, tinge duhthlan tur nei lo khawp a i chan hi a chhiat bik le? KA ngai che asin, tinge a hma khan thudik min hrilh mai loh?" tiin ka hriat tham lek chuan ka phun leh sap thin a, ka tawt up up mai.

Puipuii tel lo chuan engtin nge ka awm zel tak ang? Ka hmu tawh dawn miah lo tihna maw? Ni lo, a ni thei lo. Ka phal lo, ani kha keipawh hian ka hmangaih a ni. KA duh takzet a, kumkhua a ka ta ni turin ka duh. Mahse tih theih engmah ka nei der mai si lo, a fair lo, a fair hlawl lo a ni.

***********************

Hun a kal zel a, Puipuii hmu lo leh be thei lo tawh ta na na na chu a tel lo chuan hun ka hmang chho ve zel a. Ngaihtuah loh lai ka neih pawh ka hre lo, hun lah chu a kal ve zel mai si chu a nia. First term exam a lo hun a, Puipuii chauh ka la ngaihtuah reng thin avang chuan lehkha ka zir tha thei lo.

In exam kan zo va, ka thiante pawh tumah ka la kawm tha peih lo. Ka mizia zawng zawng chu a dang vek tawh, mi pawn mak min ti a, ka chhungte pawn mak min ti. KA nun chu a ruak vek ni mai hian ka hria a, zantin deuh thaw Puipuii ngaiin a ruk hian ka tap tlawk tlawk thin.

REsult a lo chhuak a, ka rindan vel a ni. Subject 3 laiah chuan ka fail a, ka pa pawhin min hau nasa kher mai. MAhse ka la pangngai thei chuang lo, Puipuii chu ka bulah awm se, ka hnaih ah awm se chuan ka fail bik hian ka ring lo. Ani kha chuan lehkha zir tha tur te, thil sual tilova thuawih tura min fuihtu ber kha a ni thin asin.

Kan inthen atang leh kan inhmuh tawh lohna atangin thla 4 a liam ta, ka la pangngai thei chuang hauh lo. MAhse a hma a ka tawrh ang em em kha chuan ka tuar tawh bik lova, zawi zawi chuan ka tha chho ve zel chuan ka hria. MAhse han inngaihtuah lungpuam a, zu han in ve leh zeuh chu ka ching chho tan ta riau lehnghal a.

Hun a lo kal zel a, keipawh indawm kun reng chu ka tum tawh bik lo. Theih tawp chhuahin lehkha te chu ka han zir ve leh a, ka thiante pathum, ka lam tang reng leh ka hmangaih em em, Puia, Amosa leh Ruata te pawhin min ngaihsak em em a, min fuih hram hram thin.

Anni hi awm lo ta  phei se chuan ka inti hlum duh hial tawh in ka ring, ka tan hian an hlu takzet. Kum tawp a lo ni ve leh ta a, Puipuii chu la theihnghilh lo mah ila engtik lai pawh a ngaihtuah chu ka ni tawh bik lo. Second term leh mid-term exam pawh tha takin ka pass hlauh mai, ka nu leh pate pawh an lawm takzet.

Final exam a lo hun a, class 10 board exam tur chuan ka inpuahchah ve leh ta a. Ka theih tawp a nasa chuan lehkha ka zir a, rilru la peng theitu tur chu ka dah bo ve hmiah hmiah tawh. Ka chan tawk ah hian ka lungawi a ngai, harsa viau mahse ka chan tura PAthian ruat ania, ka pawm thiam a ngai tih pawh ka hria.

Chutiang rilru chu pu reng chung chuan ka infuih hram hram thin a, a hma ai thlawt chuan zia tawh tak ka ni. Class 10 exam pawh kan zo ve ta, mahse result erawh chu nakumah daih a chhuak dawn. Christmas leh Kumthar vuakvet pawh ka hmang nuam pangngai chuan ka hria, mahse ka ngai zual riau a ni, hetiang hun a lo thlen meuh chuan.

Christmas chawlh vel laia han len dun a, veng chei hrang hrang han fan kual vel kha kan tum teh reng nen, tunah hetiang hian kan inthen a ngai leh ta si. Kum a lo thar a, kan result pawh a rawn chhuak a. Vanneihthlak takin First ah ka pass ve ta hlauh mai, tikha chuan High School chu ka zo ve ta.

*****************************

Hun a liam zel a, Puipuii pawh ka thinlungah la thi lo mahse ngaihtuah chhuah chang ka nei khat ve ta hle mai. Higher pawh ka zo ve leh ta a, class 12 pawh Pathian zarah distinction ah ngat ka pass ve ngei alawm. KA nu leh pate min treat dan pawh a dang tawh khawp mai, ka nau DAvid-a ai pawhin min duat tawh mah zawkin ka hria.

College ka han rap chho ve leh tan ta a, rin ai daihin hun chu a lo kal chak mai. Mahse ka pa erawh a tha lo tulh tulh a, a kum a lo upa ve tawh bawk nen. Stroke a nei thut thut zel a, kan chan hman thin teuh khawp mai. Damdawiinah kan tlan chhoh pui ta fo mai a, a dinhmun chu a tha lo tulh tulh.

Mahse Pathian khawngaihna zarah eng em chu kan tawng bik love, damdawiinah te admit ngai khawpin awm zing viau mahse a tha ve leh zel mai bawk a. Puipuii nena kan inthen hnu atang khan ngaihzawng ka nei leh ta miah lo, amah ka la theihnghilh theih loh vang pawh a ni mahna.

Chu ai mah chuan ka future ka ngaihtuah vang leh ngaihzawng tih vela ka buai peih tawh lo vang a ni ber zawk, ka zirlai leh ka chhungkuate chu ka ngai pawimawh zawk ti ila ka sawi sual lovang. Min han bem tu leh min lo duh ve tu te chu an awm ve nel nual alawm, mahse ngaihzawnga buai kha ka peih tawh rih lo a ni.

Chubakah ka nau DAvid-a pawh a rawn inla tlangval chho ve tan a, ruihtheih thil lamah a tlan ve zeuh zeuh thin bawk nen. Ka pa lah a hrisel lo ve ropui si a, kei tal chu puitling taka ka awm a ngai a ni. Mahse keipawh hi chutia fel leh piangthar em em ka ni e tihna a ni chuang lo, han lem ve leh zeuh chang hi chu ka ngah khawp mai.

*************************

Kum 26 ka lo ni ve ta a, hemi kum hian ka pa chuan min boral san ta nge nge a ni. College pawh master thleng chu ka zo ve tawh a, ka pa ber a awm tak silovah chuan kan company, Ralte Inn tih chu ka kutah ka pa chuan a thih hma khan min hlan a, tha taka lo enkawl chho zel turin min chah bawk a ni.

Ka tuar na lutuk ringawt, a chhan chu company pakhat tawp enkawl tur chuan ka la naupang mah mah a ni tih ka hria a, ka pa kha ka la mamawh ngawih ngawih a ni. Mahse Puipuii atang khan tawrhchhel ka zir tawh a, lungngaia indawm kun reng khan hlawkna pakhatmah a nei lo tih ka hre chiang tawh tlat a ni.

Pathian zarah kan company pawh a thang chho zel a, hlawk pawh ka hlawk khawp mai. Insawitheihna ni lo se, sum lamah pawh harsatna em em kan nei lo. Mizoram ah chuan kan company hi a ber chu a ni ve ang, keipawh a nitelin thil thar ka zir zel a, experience pawh ka ngah chho ve zel bawk.

Ka nu chuan nupui nei turin min tur sek thin bawk nen, kei lah ngaihzawng tak ngial pawh ka nei peih der mai si lo chu ania. Mahse ka nu berin min tur min tur tak si ah chuan han lerh ve deuh chu a ngai leh tan tawh tih ka hria a, diktak chuan ka peih tawh hrih thlawt lo a ni.

KAn Office ah hian thawk ve pakhat, ka mit la deuh chu a awm ngei mai. Mahse Puipuii kha ka la duh zawk daih tho, chumai pawh a la ni lo, a tluk lo lutuk ringawt. A hming chu Lalrinhlui a ni a, a hmel pawh a chhe lem lo. Min nel em em a, keipawhin ka ngaina.

A hna ah a rinawm a, a taima bawk. Kan secretary pakhat chu a boral thut avang chuan Rinhlui chu secretary ah a kaisang ve nghal bawk a, kan inzui hnem phah khawp mai. KAn inah pawh ka hruai lut ve fo va, ka nu lah chuan a lo duat thei em em mai lehnghal.

**********************

Kum 2 a liam leh a, kum 28 ka ni ve ta. Rinhlui nen pawh chuan a tawp a tawpah chuan kan inngaizawng ve ta nge nge a. Mahse zep lo chuan, a ruk hian Puipuii hi FB ah te, Instagram ah te ka la zawng ru reng thin. A thlalak takngial pawh en tur nei lo mah ila, ka hmangaih hmasa ber hmel kha ka la theihnghilh thei thlawt lo a ni.

Rinhlui lah chuan min han duh em em khawp a, a thikthu lah a chhe bawk. Mahse vawi khat mah kan la chesual lova, keimah hrim hrim pawh hian chet lak ka tum lem lo. Diktak chuan ka duh em em pawh ka hre lo, mahse ka nu thu ka awih vang chauhvin ka nihpui ti ila ka sawi sual em em lovang.

Kum 1 a liam leh a, kum 30 ka va tling teuh tawh tak em. Puipuii erawh ka thinlungah chuan a la thi thei chuang hauh lo. Rinhlui nen pawh kan boruak a tha ve zel a, buaina em em kan tawk hran lo. A chhungte pawhin min ngaina tih ka hria, inneih thleng chuan an sawi ri tan ta a.

MAhse nupui han neih em chu ka la ngam chiah lo, ka nu lah chuan Rinhlui chu nei ngei ngei turin nitin deuh thaw min hrilh reng mai bawk si. Mahse Puipuii mawlh kha a ni min tibuaitu chu, engtik niah emaw ka la tawn leh ka ring tlat a ni. Beisei bo hle mahse, nupui lo neihsan daih kha chu phatsan anga inngaihna ka la nei tlat a nih chu.

******************

KA sawi hmaih pakhat, ka thiante pathum kha. Amosa, Puia leh Ruata te kha, anni erawh kha chu khawdangah an awm vek tawh a, nupui fanau an nei vek tawh. Ka sawi awmzia chu khawdangah hna an hmu a, sipai ah an tang vek. Kei erawh ka pa company ka enkawl a ngaih bik vang em em pawh nilovin, sipai ni tur chuan ka infit lo bik lutuk.

Chanchinte chu kan la inhrilh ve fo hlawm a, Rinhlui chungchangte pawh chu ka hrilh ve hlawm bawk. Inneih chungchang te pawh ka han sawi pui hlawm a, an thurawn te ka han la ve a. An vai mai chuan Rinhlui chu nei ngei ngei turin min lo hrilh hlawm chiam chiam a, ka nui ringawt.

Rinhlui hi kum 25 vel chauh ala ni a, a ngovin a felfai thlap reuh va. Ft 5'4 vela sang a ni a, a hleitling ve pangngai khawp mai. Kan intawn chhoh dan leh kan inngaihzawn tan dan chu sawi duah lo mai ila, hmeichhe fel tak leh hawihhawm tak a ni chuan ka hria.

A hmel pawh a tha a, a pian pawh a zahpuiawm loh thlawt. Mi biang biak a thiam em em a, luck pawh a luck narawh e. Ka nu tih lawm dan lah hi a thiam em em mai lehnghal a, hei vang tak hian a nia ka nu pawhin a mo atan a duh em em ni. DAvid-a lah zirna avangin phai lamah a awm daih bawk si a, ka nu nen chauh chuan kan khawsa a.

"I pa in min boral san tawh bawk si a, i nau lah phaiah a awm daih bawk si. KAn pahnih chauh kan ni tawh a, nang lah hna avangin inah i awm mumal hman bawk si lo. Chuvang chuan Rinhlui nei mai rawh, ka khua a har emai. Innei ula, in lamah min chet pui se, a hna pawh in lam atangin thawk mai se a tha ang." tiin ka nu chuan min hrilh a.

A awm ve tho mai, kan pahnih chauh a kan awm lahin kan inbe khat a, kan tawng tlem dun em em thin lenghal a. Keipawh ka khua chu a har ve thin, mahse ka nu hi a lung a leng thei lutuk hi ka khawngaih takzet a ni. Mahse rilru siam fel nghal ngawt chu ka tan chuan ala har takzet, a chhan chu ka hmangaih lo tlat a ni.

Ni e, kum tamtak a liam tawh. A thi nge ala dam, pasal a nei tawh em tih leh kahwnge a awm tih pawh ka hre lo. MAhse Puipuii kha, kum 16 lek ka nih laia ka bialnu Lalrempuii kha ka la hmangaih tlat a ni. Rinhlui nen hi chuan eng ang pawhin lo inngaizawng mah ila, ka hmangaih ve tlat lo.

Hun min pe turin ka nu chu ka dil a, ani pawhin min lo hrethiam hle mai. Nitin mai chuan ka inngaihtuah a, Rinhlui hi nei ta ila, ka tisual angem tiin ka inzawt mawlh mawlh thin. Innei ta ila, buaina ka tawh phah angem? Puipuii chu tawng leh thut ta si ila, tihte thleng chuan ka ngaihtuah thin.

A tawpah chuan ka rilru ka siam fel ve thei ta, chutah pawh ka la chiang zan chuang lo. Kum tamtak kal ta a, ka hmuh leh tawh miah loh tura min kalsan ta Puipuii vang ringawt a nupui nei lova ka len tar nachhan tur ka hre bik lo, chuvang chuan Rinhlui hi ka nei dawn, ka nei ngei ang tiin ka rilru chu ka siam fel ta a ni.

Amah Rinhlui pawh chu ka sawi pui a, a lawm zia kha. Min kuah nawk nawk a, min rek hlum lo chauh. "Ka hmangaih che." a la ti cham chi zui a, mahse ka sawi ve hauh lo, a chhan chu dawt sawi ka duh lo a ni. Kum tawp a lo ni a, ka nu thu awihin Rinhlui chu nupuiah ka nei ta a ni.

******************************

TO BE CONTINUE