THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 8

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 8

********************

Ni engemaw zat a liam leh hnuah chuan Bangalore-a meeting tura kal a lo hun dawn ta der mai a, Rinhlui pawh a phur khawp mai. Kalna tur leh lei tur a han sawi lawk tak tak mai chu, nuam chen tura zin tur te pawh kan ang mai dawn. Han inhauh zeuh zeuh chu nei thin tho mah ila, a hma ang em em kha chuan thawm kan nei ring vak tawh ngai lo.

Ka nu chu ka pi Siami te inah chuan a awm phei ta nge nge a, keini nupa pawh BAngalore lamah kan thlawk thla ta a. Partnership kan neih puite nen chuan kan inhmu a, kan inkawm nual bawk. Thla khat pawh kan awm tlin dawn loh avang chuan Rinhlui pawh a doctor damdawi chawh nen min zui tawp kha ania, atha em ang chu maw!

Kan thawhpui hnamdangte chuan flat tha tak mai min hmuh sak a, chutah chuan kan nupa chuan kan innghat ve rawih a. Zan khatna chu kan han hmang zo ve ta der mai, a tukah chuan meeting tur chuan ka chhuak leh nghal a. Tha takin meeting pawh kan zo thei a, hna a tam leh dawn khawp mai.

Kar 2 vel chu helamah kan awm deuh char char angai dawn a, ka nu lah a hrisello ve tan tawh nen, ka ngaihtuah takzet. Rinhlui nen pawh kan boruak chu a tha rih khawp mai, han phun vak vak kha a awm tawh lem lo. Chubakah office pawh ka rualin a kal thei tawh a, in lamah rawng bawl a ngai lo bawk nen.

Amah chauhva a awm kha chuan keipawhin nuam ka tih dawn loh mai bakah ka ngaihtuah ve tho bawk sia, damlohna leh na engmah a nei lem lo bawk a, office lamah min zui ve ziah thin. Ni 5 lai chu kan awm ta a, amah zawk zawk chuan a lung a len thu a sawi a sawi leh tawh zawk.

******************************

Sunday tuk a ni a, Mizoram-a ka awm lai pawh a inkhawm em em ngai hlei lo kha ka nia, helai vai ramah phei hi chuan ka inkhawm peih teuh lo. Rinhlui pawh inkhawm lo chuan inchhung te chu a han tifai ve ang dur dur a, kan flat awmna a zau si, keini lah pahnih chauh kan ni bawk si, a thawl duh ngei mai.

Choka lama Rinhlui a chet vel lai chuan beer vel lei turin chhuah zuai chu ka tum a, kan roomah chuan lutin ka motor chahbi ka zawng a. Heta ka motor ka tih hi company car zinga pakhat a ni a, heta ka awm chhunga ka hman tur atana min hawh tir a ni. Ka hmu zo tlat lo mai, ka enkual ngial pawh chuan ka hmu tlat lo.

Pawhdawh te chu ka hai a, lukham hnuaite nen zawng zawng ka hai hnu pawh chuan ka hmu lo. Khum sir side-table a Rinhlui bag bulah chuan a lo awm reng chu niin, a bag khan a lo hliah tihna a nih chu. Chahbi lak pah chuan Rinhlui bag chu a hui thla palh a, a lo zip lo bawk nen a chhunga make-up leh thildang ho chu a tla darh vek mai.

Rang takin ka chhar zung zung a, mahse damdawi pakhat lo tla tel ve ka hmuh chuan ka tawp chat mai. Ka han enchiang a, ka thinphu a rang nghal dup dup kher mai. Thinrimna hlirin ka khat bawk, a chhan chu damdawi ka hmuh chu birth control pills a ni tlat.

A rai theih mai loh thu min hrilh a, doctor pawh a hmuh ziah thu min hrilh a. Kum chanve ai tam mah kan innei tawh a, mahse a la rai thei hauh lo kha ania. A chhan chu engdang a ni lo, indanna a lo ei char char vang a ni tih ka hrethiam chu ka rilru a na takzet.

Enge tih tur ni a, engtia han chet mai tur nge pawh ka hre lo. Damdawi chu ka hum a, ka thinrim lutuk chu ka thlan a tla nghal buah buah thei. Chutih lai chuan Rinhlui chu room ah chuan a rawn lut a, "I va kal har ve.." a rawn ti a. Mahse ka chhang lo, amah hnungchhawn zawng chuan ka ding reng a.

"Ehe..tinge ka bag kha, i ti tla em ni?" a rawn ti leh a. Muang chang chuan ka hawi let a, damdawi chu ka lek kang a. Rum takin ka melh a, "Hei hi enge awmzia?" ka han ti chang fak a. A hmel chu a danglam chak kher mai, a meng deuh hrawk a. Min chhang miah lo chuan hmun dang a melh nghal, "Rinhlu, hei hi enge awmzia ka tih chu?" tiin ka han vin leh deuh hrawk a.

Chutah rum zet hian min rawn melh a, "Enge ni vak anga, i hre reng lawm ni?" min la rawn ti let daih zui a nih chu. Ka thinrim takzet, "Anih hei hi engvangin nge i ei? Hei vang hian animaw nau i lo pai theih loh ni?" tiin ka han zawt leh a, ka thinrim lutuk chu ka khur dar dar hialin ka hria.

Mahse min chhang duh miah lo, min en miah lo chuan tum bur hian a ngawi reng ringawt a. Ka va pan phei a, "Lalrinhlu, min chhang rawh ka tih chu...engvanga hei hi ei nge i nih? Engvangin nge nau pai chu i hreh em em a?" tiin ka han vin leh deuh khur khur a.

Chutah a aia vin hian, "Aw ka ei ang, a ngai a ka ei a nimai. Nau pai thei lo pawh ka ni lo, ka duh loh vang mai chauh a ni." min la ti let zawk zui a. Mak ka ti zawk, "Ehe..min la vin zawk amaw? Tikhan min la thinrim let khum zawk animaw?" ka han ti ve leh hrep a.

A tap deuh pur a, "Ni e, a dik alawm. Nau pai ka la duh lo, fa neih ka la duh lo. Ka duh zawng chu i bula awm a, kan pahnih chauh va awm dun hi ka thil duh ber a ni thin. Nu ka la ni duh lo, a hun ka la ti lo. Ka duh hunah chuan ka pai mai ang, na tawrh a, damloh kual vel ka peih lo alawm." tiin min chhang a.

Ka a mai dawnin ka hria, kan hlim ve dawn chauh amaw tia. Sawi tur pawh ka hre lo, "Engtin..engtin nge i tih theih zawk?" ka ti zawi sap ringawt a, kei pawh chu ka tah a chhuak takzet. A inhnit hlap hlap a, "Hetia nula anga awm hrih hi ka la duh a, chuvang chuan fa neih ka la duh lo a ni." tiin min chhang leh a.

Ka thinrim lutuk chuan, "Anih chuan tinge min neih? Tinge inneih i duh? Min hmangaih thu i sawi ziah a ni lawm ni? I pasal atan min nei a, mahse ka fa pai pawh i duh leh silo amaw?" tiin ka vin leh hrep mai. Tap tuau chung chuan a lu a thing a, "Nilo, midangin min chhuhsak ang che tih ka hlauh vang a ni." tiin a mittui chu a tla zawih zawih a.

Rum zet hian ka melh a, "Fa neih i duh lo emaw, harsatna i nei anih chuan tha takin min sawipui ve mai ta che. Indanna i lo ei hi ka ring ngai lo, dawt i sawi a ni. Ka rai thei lo i tia, dawt i sawi a ni." tiin ka han kawk deuh sawk sawk a, anihna takah chuan sawisak hrep mai ania ka duh ni.

Min vin let leh ta, "Sawi pui turin inah awm ngai hek lo che, office lam hlir i buaipui vang a nih kha." min ti let leh hrep mai. Thinrim sa nen thinrim a ti zual tulh tulh mai, "Anih ka pawisa vang em ni? Mawhh... ka pawisa vang em ni min neih? Fa nei hrih lova, ka pawisa chen hrih hi i duhdan chu em ni?" ka han ti ve ta siah siah mai a.

Min melh phawk chiang teh asin, "Engmaw i sawi a, Remruatpui? Kei hi pawisa duh viau angah min lo ngai em ni? Ka hmangaih vang che a nei che ka nih hi, tikhan engtin nge min tawng khum theih zawk a?" tiin ka kawr awmah te chuan a la rawn tham ang ta deuh deuh va.

Ka nam sawn deuh dawr a, "Min khawih suh, nang nena thil sawi dunin awmzia a nei lo. I thinrim let zawk zel lehnghal, i duh duh dan khan lo awm la. I duh leh pawisa kha i duh zah zah lo hmang la, lo bazar rawh...ka chhuak dawn." tiin chahbi chu ka la a, engmah a sawi leh hma chuan rang takin room chu ka chhuahsan nghal daih a.

*************************

Ka thaw a ipik lutuk, hna lamah buai nen, a va han hneawm zozai tawh tak em. Chak takin ka tlan vang vang a, Bangalore ka vawikhat kalna a ni lo bawk a, kalkawng chu ka hre ve tawk. Ka tlan zel a, wine-shop zawnah chuan ka ding nghal a. Beer can 5 vel ka lei a, tichuan ka tlan leh zel a.

Ngaihtuahna fim hman a har kher mai, engtin nge ka awm zel ang ka hrethiam lo a ni. Khawsak lamah chuan harsa lo mah ila, chhungrilah hian harsatna a va tam si em. Ka nu chu han hrilh nghal thawt thawt chu ka tum hman a, mahse phone khawih hman pawh a ni lo.

Rinhlui chuan chawl miah lo chuan min rawn call char char a, mahse ka la duh hauh lo thung. A hnuah phei chuan ka phone ri zing lutuk chu ka hne ta deuh va, ka switch off hmak. A tirah phei kha chuan inthen nghal mai kha ka duh a, mahse thinrim laia thuthlukna siam vat thin lo tura min hrilh tu ka pa chu ka ngaihtuah chhuak zawk a.

Ngawih rih a, ngun taka ngaihtuah chu ka thlang ta zawk a ni. Park pakhat, reh ve tak mai zawnah chuan ka ding a. Mi an awm loh lai a ni hlauh bawk a, motor atang chuan ka chhuk a. Lung pui lian tak bulah chuan ka va kal a, a bulah chuan dil te tak te hi a lo awm bawk.

Ka han ding vang vang a, meizial zu in ka beer lei chu ka in a. Ka ngaihtuahna a kal thui lutuk chu ka tah te hial a chhuak zawk, ka taksa zawng zawngte chu a chau hnawk thei in ka hria. Ka han maimitchhing vang vang a, kan nupa hian engtia awm zel tur nge ka hre hlawl lo a ni.

Ka lo inngaihtuah muk deuh aniang, hmeichhe tap ri fep fep chuan min ti harh chhuak zawk mai. Ka han meng a, ka dinna bul lung pui lian tak leh lam atang chuan hmeichhe tap ri, chhuak em em, mahse ring si lova inhnit hlap hlap ri chu ka hre leh ta a. Ngawi reng chuan ka ngaithla a, a tap ring tial tial a.

Zawi muang chuan thawm nei lo ang ber hian ka va dak dek dek a, nula pakhat hi thingthi meuh hian a lo tap hawm hawm mai a nih chu. A hmel lah chu a tha phian lehnghal a, cher lam deuh a ni bawk. A maimitchhing a, "Ka va han huphurh tak em...mahse ka tih ngei a ngai si." tiin a lungchhiat hmel em em a.

Mahse ka awm ve tih a hre lo, lungpui phen atang chuan ka en reng a. A la tap char char a, "Lalpa, tinge hetiang thil hi ka tih a ngaih bik? Ka hreh takzet, ka huphur a ni." a han ti leh a, a inhnit feih feih mai. Enge a thil sawi chu awmzia hre lo mah ila, kei lah lo lungchhe ve tho nen, ka tah te chu a ti chhuak zual zawk mahin ka hria.

Rei deuh fe a tah hnu chuan a tap bang ta a, a kut chuan a mittui chu a hru hul a. A ding a, min la hmu chuang miah lo. Tichuan a let leh a, ka en zui reng a. Kawng sirah chuan dingin taxi a phar a, a kal ta daih mai. Eng tak chu a harsatna ni ve ang maw tiin ka ngaihtuah zui nauh nauh va, reilote hnuah chuan ka haw ve leh ta a.

***********************

In ka thlen chuan sitting room ah tum bur hian Rinhlui chu a lo thu a, phone a lo khawih mek a. A en pawh ka en tha peih lo, room ah chuan ka lut tlang nghal daih a. Khumah chuan ka tlu zal a, ka chau takzet a ni. Room ah chuan a rawn lut ve nghal a, khum bulah chuan thinrim hmel tak hian a rawn ding tum bur mai.

"Enge?" ka lo ti deuh hlur a, mahse min chhang lo. Ngawi reng chuan sofa ah chuan a thu a, kei pawh chuan ka be chhunzawm lem lo, ka be peih hlawl lo a ni. Kan ngawih deuh vang vang hnuah chuan, "Engtia min tih nge i tum? Min then dawn mi?" a rawn ti chhuak hlawl mai.

"Tunge ka then dawn che ti a?"

"Tuman...ka inthlahrung ve tho, a nuam lo ka ti ve tho ania."

"Umm...a lo nih tak chu."

"Ka nu i hrilh tawh ami?"

"Tu ka nu maw?"

"Brandon, ngeiawm lo teh...i hrilh em?"

"I nu a ni ve tho lo em ni?"

A han thaw deuh hak a, "Aw a nih leh, ka nu i hrilh tawh em?" a han ti leh a. Ka lu ka thing ringawt, "I hrilh dawn em? Hrilh i tum em?" a han ti leh a. Ka chhang mai lo, ka ngawi deuh vang vang phawt. Minute 2 vel hnuah chuan, "Engmah ka sawi peih hrih lo, keimahin min awm tir hrih rawh." tiin ka chhang hmak a.

Kan ngawi dun leh vang vang a, "Khawnge i va kal a?" tiin min han zawt leh a. Ka chhan mai loh avang chuan min zawt nawn chhen a, ka ning lutuk chu ka tho hluai a. Vin zet hian, "Ka duh duh naah ka kal ang, min be hrih suh ka tih kha." tiin ka chhuahsan leh daih a.

Diktak chuan ka be phur hlawl lo a ni, kha leh chen min lo tih derh a, dawt min lo hrilh kha kei chuan inphatsanna ah ka ngai. Sitting room ah chuan ka va mu a, ka lu hi a puak keh mai dawnin ka hria. Ka phone chu ka on a, number hriat loh atang hian missed call hi a lo awm a.

Ka han call back nghal a, mipa hian min lo chhang a. "Aw hello, hei miss call ka lo hmu a, tunge aw?" tiin ka han zawt a. Phone ami chuan, "Brandon, keimah Zualtea...min hria em?" a rawn ti ringawt a. Ka han ngaihtuah vang vang a, mahse tu Zualtea ber nge ka hre chhuak zo tlat lo.

"Tu Zualtea maw?"

"Aww...keimah, Lalrozuala...PUC ah kan luh ho kha."

"Eee...Zualte, nangmah maw? Khai aa...engtin nge ka number i neih a?"

"Aww...nangni ang businessman lar te chu...hehe, taka..Bangalore ah in awm em ni?"

"Aw awm mek e, kan nu nen...hna thilah ania."

"Aw anih tak chu...nia, nupui i neih te kha ka lo hria a."

"Tinge min rawn phone ve teh mial a?"

"Englo ania, Bangalore ah ka awm ve mek a...vawiin i day-off em ni?"

"Aw DAy-off han tih ah...Sunday hi chu ka chawl dawn ka tia, keiman."

"Anih tak chu mawle, i thu ber awm sia. Haha, englo ania, zanin hi ka birthday ania, house party kan nei dawn a, lo kal ve la ka tia."

"Khai a...kan nu a awm ve reng hi...chubakah nupui nei tawh ka nia, party tih vel chu ka tan a rem ve tawh lo. Ka hman lo bawk, nidangah kan inhmu mai dawnnia."

"Aww..ava pawi thin. Umm..ka sawm lui lo mai ang che, nakinah kan inbe leh dawnnia."

Phone chu kan dah a, youtube video vel chu ka en kual mai mai a. Min rawn phone tu Zualtea hi PUC ah khan kan lut ho va, college ka kal ve lai khan ka tihna a nih chu. Amah hi contractor fapa niin sum pawh a nei ngah viau a, sual pawh a sual narawh e. Kan inkawmngeih ve em em thin a, Master ka zawh hnu khan kan inhmu leh ta miah lo a ni.

**************************

Sofa ah chuan ka mu reng a, ngaihtuah tur a tam lutuk chu eng ber nge ngaihtuah hmasak tur pawh ka hre zo tawh lo. Ka rilru hah lutuk chu ka chau vek thei, ka hriat loh hlan chuan ka lo muhil a. Ka harh leh meuh chuan chhun dar 1 a lo ri tawh, inchhung chu ka han en kual a.

Mahse Rinhlui chu ka hmu miah lo, room ah a awm a nih ringin ka va lut a. Khumah chuan a thawmhnaw chu a lo thlep fel mek a, chhuatah chuan airbag a lo awm bawk. Ka hrethiam lo kher mai, ka va kal hnai a. A hmaah chuan va dingin, "Enge i tih a?" tiin ka zawt a.

"Ka haw mai ang." a ti hmuk ringawt. A va han hahthlak thin tak em, "Tunah maw? Engtin nge i haw anga?" tiin ka zawt leh a, ka vin deuh lek lek bawk. A thawmhnaw thleh lai chu a dah a, "I rilru hahna ka ti zual mai mai i bula ka awm chuan, ka inthiarfihlim mai ang." tiin min han chhang zawi leh sap a.

Ka thaw deuh hluai a, "A va mak e aw...enge thuthlukna hi i siam zung zung zel a? Haw rawh pawh ka ti em ni?" ka han ti leh deuh hlur a, thaw hi a ipik ngawih ngawih. Ala tap zui, "Engtin nge tiang chuan kan hlim chuan anga? A hrehawm alawm, ka haw phawt mai ang...ka inngaihtuah ve tawh mai ang." a han ti tuau a.

Ben thal tawp mai ania ka duh ni, mahse chutia then nghal mai erawh thil tha ber a ni lo, inthen hi ka duh lo hrim hrim bawk. Ka maimitchhing vang vang a, "Umm...a tha e. Lo va haw la, ka nu nen inah lo awm ang che u." ka ti ta a. Min en deuh hu a, "Inah maw?" a han ti hu a.

"Aw inah, kan inah. Lo haw thawt thawt suh, kan inthen pawh a nih loh hi." ka han ti leh a. A lu a bu nghat nghat a, a thawmhnaw te chu ka pack fel pui a. Tichuan eng tin tin emaw chumi ni la la chuan kan inthawn haw thei ta hram a, ka zawh fel meuh chuan zan a ni der tawh. 

Zana haw tur a ni chu ka ngaihtuah leh hnuhnawh khawp mai, chaw pawh ka la ei miah lo. Ka ril a tam em avang chuan dawrah ka han inhnawh puar a, tichuan ka haw leh ta a. Mahni chauh a awm takah chuan a reh ruih ruih khawp mai, a khawhar thlak ve det.

************************

Darkar khat vel zet engmah ti lova ka mut mai mai hnuah chuan boring ka ti ta deuh va, chhuah harh ka tum ta a. Mahse khawi ah nge ka len ang tih lah ka hre chuang bawk si lo, a hnuah chuan Zualtea min sawmna kha ka hre chhuak zawk mai. RAng takin ka phone nghal a, "Ka lo kal leh si ang." ka han ti chu min lo welcome nasa mai.

Location te nen lam min rawn hrilh thlap a, tichuan keipawh chu ka tho chhuak nghal a. Fai takin ka inbual a, lan hausak theih dan tur ber chuan smart tak chuan ka han inchei a, tichuan party-na lam pan chuan ka inkhalh phei ve ta rawih a. Rilru a ipik bawk nen, naktuk atangin hna tan leh a ngai anga, zanin chu i han rui nawi ve tak tak teh ang.

Nupui ber a awm tawh lo bawk a, tlangval lai te pawh a ngaihawm a lawm le. Party-na hmun chu ka thleng a, kawngka bulah chuan Zualtea chuan min lo nghak a. A khabe hmul a lo buk chhup tawh mai, "Ehe..lo kal rawh, lo kal rawh." tiin inchhungah chuan min luhpui nghal a.

A zau tha bawk a, DJ pawh an awm deuh thlap. Changkang tak a ni, hnamdang deuh vek niin ka hria. Hnamdang ka tih awmzia chu, mizo nilo hnamdang hrim hrim ka sawina a ni. In tur te chu min kawh hmuh a, bartender thlengin house party ni siin an lo awm deuh thlap bawk a.

A then an lam a, a then kil khatah an lo inchhai a. Zualtea nen chuan kan titi deuh luam a, ani pawh helamah lehkha a lo zir zawm chu niin. Zualtea hi chu sual hle mahse a taima bawk a, lehkha a thiam thei phian bawk. Party-naa lo awm ve te chu ka han enkual a, rin ai daihin an senior hlawm.

Vai patling pui pui, hausak hmel tak tak ka hmu teuh mai. No 2 vel ka han lem ve hnuah chuan ka titi pawh a tui ve tan khawp mai, mahse Rinhlui nena kan buaina erawh ka sawi chhuak em bik love. Reilote hnuah chuan hmeichhe chhelo tak tak, la naupan hmel tak tak chu an rawn lut deuh sap sap hlawm a.

Zualtea chuan a hmuh veleh, "Min lo hrethiam lawk aw.." a han ti a. Min kalsan daih a, vai patling ho chuan Zualtea chu a mal te te in an rawn be sap sap hlawm a. Ka hrethiam lo kher mai, ka zu in lai chu ka in chhunzawm mawlh mawlh a. Vainu pahnih thum vel chuan min rawn bem ve nasa mai, a biak pawh ka lo be peih lo.

*************************

Minute 20 dawn hnuah chuan Zualtea chu a rawn let leh a, "KA rei em...sumdawnna tenawm lutuk tak mai ka han kalpui lawk a nih kha.." rui zet chuan a han ti chuar chuar a. "Enge awmzia ni a? Chuan heng nulate hi tute nge?" tiin ka han zawt a. Meng mang hlei lo chuan, "Shhh...bro, top secret a nih hi." a han ti su su a.

Ka nui huk a, "Umm..ka sawi chhuak lovang. Enge thil awmzia han sawi teh."

"HEng nula ho hi, han en la...an thuamhnaw inbel dan pawh a inan deuh hlawm hi...call girl high class an nih hi aw.." a ti ta mai a. "Enga? Call girl a? Chuan..nichin a.." ka tih lai chuan amah bawk chuan, "I duh ve chuan sawi rawh...innu ka hrilh miah lovang." tiin ala nui vak vak zui.

"Ngawi teh, ka duh lo mai ange..chuan heng patling ho hian an dawr tihna em ni?"

"Aw...mahse sawi chhuah a chi dawn miah lo ania aw, bro."

"Awle lungngai suh, ka sawi chhuak lovang. Agent an nei thlap tihna nge, call girl ho hian?"

"Chutiang thleng thleng chu sawi duh leu....i duh dawn em?"

Ka nui vak vak ringawt, ava han nikhua lo reuh tak. Engpawh chu nise, an nun alawm. Ka buai peih vel lo, "Duh love, tah hian reilote ka thu anga, chuan ka haw ang." tiin ka chhang a. Ani pawh chu a buai leh nghal char char a, zu pawh no 4 lai ka in ta. Duhtawk tawh teh ang, motor ka la khalh dawn si.

******************

Ka haw tur ka insiam fel lai mek chuan call girl zinga hmeichhe pakhat chuan ka mit a rawn la chat mai, ka ding nghal a. Ka en vang vang a, phur loh hmel tak hian a kilah hian a lo thu a, a hmel atang chuan a hlim lo hle a ni tih a hriat. Chumai a ni lo, kei ngei pawh hian a hlim lo a ni tih ka hre thei.

Chu nula chu tudang nilovin, tukin zinga park-a ka hmuh ngei kha a ni. Mizo tawng ngeiin a tawng a, mizo a ni ngei tih ka chiang bawk. Ka ngaihtuah let a, "Lalpa, ka va han hreh tak em!." tia a tah hawm hawm lai te chu ka bengah chuan a rawn ri nawn awn awn mai.

Ka han ngaihtuah vang vang a, a vai chuan hre lo mah ila engemaw tak chu a chungah a thleng tih ka hre thei nghal. A duh lo chung a inzawrh a ngai a nih hmel khawp mai, a hmel en reng reng pawhin a hlim hlawl lo tih a hriat bawk. Park ah ni lo, nidangah ka hmu tawh tlat hian ka hre lehnghal, mahse ka hrechhuak zo tlat lo.

Zualtea chu ka zawng kual nghal a, ka hmuh veleh chuan chu mizo nula chu ka va kawk nghal. "Saw saw zanin atan ka lo dawr ve ang che, tuma bulah sawi lo la." ka han ti chu a meng phawk nasa mai. Min en hru a, "Enga? I duh ve tak tak maw?" a ti hu mai a.

"Aw...engtia indawr tur nge?"

"Aw..a awlsam lutuk. Hotel i duh berah thleng la, chuan i room number nen lam min hrilh la, ka nauten an rawn tir mai dawn alawm."

"Umm..anih chuan saw saw ka duh, engzat man nge?"

Zualtea chu a ner deuh ta nung mai, "Broo...saw lo saw midang an tam em hi..saw chu an hual tawh a." a ti ta mai a. MAhse ka luhlul ka chhuah ve tlat a, "Saw kher saw alawm ka duh...tuin nge lo hauh hman a?" tiin ka zawt a. Kan sir lawka vai dulkiar hmelchhe zet leh dum zet chu a kawk a, "Saw putar sawn mawle." tiin min chhang a.

"Engzahin nge a ngam a?"

"Sing 8."

"Nuai 1 in ka ngam."

"Bro, i a ami? Zankhat atan lek, hmeltha em em pawh a nih loh saw?"

"Nia a aia tha an tam, mahse sawnu kher saw ka duh. Va hrilh rawh, amah sawn midang thlang zawk mai rawh se."

"Ka lo tiam ve tawh sia."

"Haha, thutiam te chu sut leh mai mai tur atan alawm. A duh bik nachhan pawh ka hria, mizo a nih vang."

Zualtea chuan min en hru a, "Enga? Engtin nge mizo a ni tih i hriat a?" a ti hu mai. "Ka hre thei vek alawm, va be fel teh." ka han ti leh a. Hreh tak chung chuan a va bia a, chu vaipa pawh chuan ka ngam huai a ti deuh aniang, min rawn en deuh hu hu mai. A tawp a tawpah chuan ka chang thei ta, "Khawi hotel ah nge?" tiin Zualtea chuan min han zawt leh a.

Sana ka han en a, zan  dar 11 a ri tawh. Ritz Carlton Hotel ah, helai atang chuan km 1 vel chauh aniang. Tunah dar 11 a ni a, 12:30 ah rawn thleng rawh se." ka han ti deuh hmak hmak a. "Va hausa thin ve...awle, sawi chhuah awih loh ve ve aw.." tiin a han nui sun sun a, pawisa kan in pek fel hnu chuan hotel lam pan chuan ka phei ta a.

**********************

Hotel ka thlen hma chuan ka flat ah chuan ka peng zuai a, pawisa chu a cash a ka kawl lai chu engemaw zah ka la chhuak a, envelope ah ka thun a. Tichuan hotel lam chu ka pan ta a, room no 404 ah chuan ka thleng a. Sana ka en a, dar 12:30 a lo ri tep tawh. Dawr tak tak ka tum a ni lo ania, a harsatna hriat ka duh vang zawka lei ka ni.

12:30 chu a ri a, timing a dik thlap thlap khawp mai. Ka room door bell chu a rawn ri ral ral a, ka han hawng chu kha mizo nula ngei kha inthlahrun hmel tak hian a lo ding a. "Hi..My name is Esther." a han ti zawi sap a, a zam hle a ni tih pawh ka hria. Mizo ka nih thu chu ka la sawi duh bik lo, "Come in." tiin ka luh tir a.

Khumah chuan a thu a, kei erawh amah hnungchhawn zawng chuan ka ding reng a. A thawmhnaw chu muang chang chuan a phelh mek tih ka hma tukverh reflection atang chuan ka hmu thei vek. Aw khur dar dar leh zam tih hriat tak hian, "I'm ready, Sir." a han ti zawi leh sap a.

Ka va hawi let a, a vun a nalh in a ngo em em a, mahse a hmel ah erawh hlauhna hlir in a khat tih ka hmu thei. En pawh min en tha ngam lova, hnuai lam chu a melh reng ringawt. A khur deuh dar dar reng bawk a, ka khawngaih takzet. Ka va pan hnai a, a khur nasa tulh tulh mai.

"Esther-i maw i nih a?" ka han ti chu mak ti tak hian min en hru a, "Ihh..ihh, mizo maw i nih?" a ti hu mai. Ka lu ka bu nghat a, "Aw ni e, chuvang alawm nangmah kher ka thlan che ni." tiin ka chhang a. A mittui chu a tling teuh mai, "Min hria em ni?" tiin min zawt leh a.

Ka lu ka thing a, "Ka hre lo che, mahse mahni mizo pui te nge nge chu, i hmel ka hmuh khan ka hre chat che alawm." tiin ka han khi deuh suk a. Mahse a thla chu a muang hlawl lo, "Anih..tinge min thlan nachhan?" a han ti khur leh dar dar a. "I hmel ka en khan i hlim lo tih ka hria, chuan he thil hi tih i duh lo tih pawh ka hria." ka han ti leh a.

A ngawi reng a, a inhnit ta feih feih mai. Tawng a tum a, a tawng hleithei lo. Khuma puan chu ka la a, amah chu ka khuh tha a. Tawng a tum leh a, "Nilo, engmah sawi suh. Engtin mah ka ti dawn lo che, ka mizo pui i ni a, ka chhanchhuak che angah i ngai dawnnia." ka han ti leh a.

A la ngawi reng, tichuan envelope-a pawisa ka dah chu dawhkanah chuan ka dah a. Ka va pan hnai leh a, "Saw saw pawisa tlem azawng a ni a, i dawn tur bakah pawisa dang pawh ka dah belh a. I harsatna chu engpawh nise, sum mamawh vang i ni tih ka hria. Engmah min zawt suh, thlamuang tak khan awm rawh." zaidam tak chuan ka han ti leh a.

Mahse min la chhang chuang lo,  a hamhaih lutuk vang pawh a ni mahna. Keimah bawk chuan, "Zanin chu he hotel ah hian i riak tawp mai dawnnia, kei chu ka haw angai a. Tunge ka nih hriat tum duh kher suh aw, ka tanpui che angah i ngai dawn nia. Riah man pawh ka lo pe vek anga, i duh duh hunah i chhuak mai dawnnia." tiin ka thil te chu ka la fel a.

Chhuah ka tum chiah chu, "Thianpa, lo ding lawk teh." a rawn ti a. Ka ding a, ka hawi let a. Mittui tla teuh chung chuan a nui suk a, "Ka lawm e aw...ihh, englo ania. Ka unaunu a dam lo nasa lutuk a, sum kan nei bawk si lova. Chhungte lah tumah kan nei lo bawk nen, hetia ka tih mai hi a ngai a ni. Mahse vantirhkoh ka tawng che a, ka lawm takzet." tah aw tuau chuan a han ti a.

Keipawh chu ka lo nui sak a, "I unaunu chu lo dam vat vat rawh se, tui deuhin i mu dawn nia." ka han ti a, a lu a bu nghat a, a nui sen sen mai. Hotel chu ka chhuah san a, a riah man tur zawng zawng te chu ka pek sak nghal vek bawk. Ti tha ka inti kher mai, chhungrila hlim veng veng chung chuan ka flat lam panin ka haw leh ta a ni.

****************************

TO BE CONTINUE