GINA (MIZO FICTION RELIGIOUS HORROR STORY) WARNING - 18+ Written by : Aaron Malsawmdawngzuala CHAPTER - 5

 GINA

(MIZO  FICTION RELIGIOUS HORROR STORY)

WARNING - 18+

Written by : Aaron Malsawmdawngzuala

CHAPTER - 5

********************

Zan a lo ni a, Henry-a chu chaw eikham veleh chuan Remkima te inah chuan ava leng nghal a. Thian inkawm ngeih tak, in len pawh fo thin an nih avang chuan Henry-a rawn leng pawh chu Remkima chuan mak a ti hran lo. Chutih lai chuan Mama pawh Gina-i te inah chuan Pu Ringa veng turin a leng ve bawk a, ani pawh hi Gina-i te inah a tlangnel em avangin a awmloh pawhin a leng fo a ni.

A ruk chuan chanchin inhrilhin an in text dun reng bawk a, engkim chu ala tha vek. Chutih lai chuan hospital ah Gina-i ber chu ala awm reng a, a ward bul chiah a awm, hmeichhe naupang kum 8 mi, Nancy chu a infiam pui a. Engmah harsatna a awm hrih lo, mahse Mama leh Henry-a te erawh thlamuangin an awm thei mawlh lo a ni.

Mama leh Pu Ringa an titi dun mawlh mawlh lai chuan a room atang chuan Baby chu a rawn chhuak a, Mama chu a phu zuk mai. A melh tha ngam reng reng lo mai a, Baby'n a biak pawh chuan a rul tawk te te bakin a chhang lo, mahse Baby te pafa chuan chutia Mama lai deuh tut chu an hre lemlo a niang chu, engmah an zawt lem lo.

An titi lai an ngawih deuh vang vang hnu chuan Baby chuan, "Awii..mak ka la tih deuh chu..Au Gina-i damdawiina an admit ni a ka muthlu ringawt kha, engtia muthlu ringawt nge ka nih pawh ka hre lo." a rawn ti chhuak hlawl mai. MAma beng chu a verh zawk mai a, "Engtia muthlu tawp in maw?" tiin a lo zawt vat.

"A room ka tih fai khan mawle, khatah khan engtiang chiah in nge ka lo mutthluk pawh ka hre lo. REilote chu ania, mahse mumang ka nei hman bawk. Ka mumang lah chu a nuam lo em em lehnghal, ramhuai pitar niawm tak ka la hmu zui." tiin a han khi suk a. "Mut hi i duh ve hrim hrim alawm." tiin apa chuan a lo fiam zauh va.

Mahse MAma chuan a hriat belh chak tlat, "Eng ramhuai pitar maw...a awmdan i la hre thei em?" tiin nui lui chung chuan a han zawt leh a. "Saruak vekin a awm a, a hmelchhe em em lehnghal." tiin a lo chhang leh a. Mama ngaih chu a tha ta hauh lo mai, "Chuan engtin nge i harh leh a?" tiin a han zawt leh hram a.

"Ka mutthluk lai tak kha chu ka hre lo hrim hrim, a u th(r)i kha ka awrh chhin vel a, chuan ka in-selfie pui bawk. Khami hnu khan ka lo muhil aniang, ka harh leh chuan ka u khumah chuan ka lo mu a. Chuan dawrah ka kal a, chuan nangmah kha ka haw lamin ka hmu ta che kha ania." tiin a lo chhang leh a.

************************

REmkima leh Henry-a te pawh chu an titi tui dun ngang mai, "E taka..engtin chiah maw i tluk theih a?" tiin Henry-a chuan a han zawt deuh thut a. "Ka hre bik lo, ka hriat zawng chu maw...inbual tur khan bathroom ah ka lut a, chuan thawm ka hria a. Ka chhungte an nih takin ka tia, engah mah ka ngai duh lova. Mahse ka lu kha a ri deuh dup a, a thim nghal mup a ni mai." tiin a chhang a.

Henry-a chuan a hrethiam lo kher mai, "Engtia ri deuh dupin maw? Engtiang chiahin nge i tluk ka tia lawm...sahbawn i rap pial palh em ni?" tiin a han zawt leh a. "Chutak chu ka hrechiang tawh lo...amak lutuk, ka tukhum ri dawt kha chu ka hria, ka sawithiam lo." a ti nuai mai a, Henry-a ngaih chu a tha lo tulh tulh mai.

Mahse a zawt lui lem tawh lo, chuveleh Remkima chuan zawite hian, "Ihmaw bro, nikhawhrelova ka awm chhung khan mumang mak deuh ka nei amaw..a mak tawpa nimai." a han ti su su a. Henry-a beng a verh ta zawk mai, "Enge i mumang chu?" tiin a zawt nghal a. "Mahse sawi chhuak miah suh aw...min tiam phawt rawh." a han ti te te a.

"Aw ka tiam ache, ka sawi chhuak miah lovang."

"Ihmaw..khatia ka nikhawhrelova ka awm hnu khan mumang ka nei a, ka mumangah chuan bathroom ah tho ka lo awm a. Chuan bathroom kawngka kha  a rawn inkik a, ka va hawn chuan Gina-i a lo ni a. A rawn lut a, a thawmhnaw kha a phelh ve nghal mial mial a. ZAwhna ka zawh pawhin min chhang miah lova, chuan min rawn kiss vak mai mawle..." a han ti a.

Henry-a chuan mak a ti kher mai, "Chuan engtin zel?" a lo ti leh a. "Chuan abak chu engmah ka hre leh tawh lo, mahse a mak a ni." a han ti leh vawng vawng a. "Aww..i mumang ve mai mai anih chu, enge a mak vakna?" tiin Henry-a chuan a han zawt leh a. "A chhan chu maw..khatia saruaka kan awmdun lai te, kan inkiss laite kha a tak ang chiah chiah in ka feel thei." a ti leh a.

Za lo tak hian Henry-a chu a khi suk a, "I lo it thin reng a ni lo maw? Nang hi?" tiin a han fiam lui a. "Aih..chutin Gina-i lakah rilru ka pu hleinem, mahse a mak em a ni." a han ti leh a. "Engah mah ngai suh...nihleh ai harh dan min lo hrilh leh, Gina-i tihdam dan che kha.." tiin a zawt leh a.

"Kha chu...zing ka tho ka harh ang chiah hi  a nimai. Ka bulah khan doctor leh nurse te, ka chhungte leh midang ho kha an lo ding thup a. A tir phei chuan a ngaihna ka hrelo lutuk, engkim kha mumang ang vek a ni. Chuan thil awmzia min hrilh a, ka man thiam ve chauh alawm." tiin a chhang leh a.

**********************

Thingpui inna no ruak vel chu Baby chuan a sil a, Pu Ringa leh Mama te erawh an titi chhunzawm bawrh bawrh a. "Mama...ka va inthiar teh ang..tikhan lo la leng rawh aw.." tiin a ding a. Mama chuan a ngaihtuah hle mai, bathroom velah a che sual anga, a lo thi mai ang tih chu a hlau a ni.

"Awle..Pa Ring, fimkhur la aw.." a han ti ringawt a, Pu Ringa pawh a nui suk ringawt. Bathroom ah chuan  alut a, Baby leh Mama chauh chu an awm ta. Thleng sil pah chuan Baby chuan, "U Mam..lo kal lawk teh." a ti thut mai. Mama chu a phu zuk a, "Engmaw..keimah maw?" a ti hu mai.

"Nangmah lo tunge ka koh anga? Lo kal lawk teh." a lo ti leh a, lai deuh tut chung chuan Mama chu ava kal ta a. Silhmun bulah chuan an ding dun a, "Enge ni a?" tiin Mama chuan a han zawt a. "Ihmaw...ka mumang kha ka sawi kim lo mai mai anih kha...apa a awm sia." a ti a, Mama chu  ameng phawk hru mai.

"Enge? Enge thil dang i hmuh a?"

"Ihmaw...inah khan ka awm a, chuan ilo lut a. Ka u khumah khan kan chesual a, mahse mumang mai mai anih chu aw..amak ka ti ropui." tiin a nui huah huah a, Mama thin chu a phu rang ngei mai. "Hehe..anih chu, a ho emai, i mumang mai mai a nih chu." tiin za lo tak chuan a nui a, a thutna ngaiah chuan ava let leh a.

Inbe miah lo chuan an awmdun leh char char a, Mama chuan bathroom lam chu ava melh sek tawh mai. Pu Ringa chu a lo let der mai ang tih chu a hlau em em a, va auh mai chu a duh rum rum hial Minute 10 vel zet hnuah chuan Pu Ringa chu bathroom atang chuan a rawn chhuak hlawl mai, "A va paih hnem theih ve.." tiin a dul a rawn zut chhuak a.

Mama pawh a thaw huai mai, "Sang tha thei maw?" tiin a lo nuih a. Tichuan reife an titi leh hnu chuan dar 11 a lo ri dawn der mai, "Ka haw phawt ange...naktukah chuan Gina-i chhuah dawn hunah kan chho ho dawnnia." tiin Mama chu a ding a. "Awle..nia, tluang deuhvin i haw dawnnia." tiin Pu Ringa chuan kawngka bul thleng chuan a thlah a.

Mama kal tur chiah chu Pu Ringa chuan, "Mama..lo ding lawk teh." a rawn ti leh thut mai. Pu Ringa chu a pawnah chuan rawn chhuakin, "Thil hrilh tur che ka nei a." a han ti a. "Aw..enge ni sawi ta che." Mama chuan a lo ti a. "Mak pawh i ti maithei an, a thawng viau maithei bawk che a ni. Mahse i hriat angai, chuvang chuan ka hrilh dawn che a ni." a han ti leh te te a.

"Aw, sawi rawh..Pa Ring..."

"Englo ania, Marovi nen hian kan mihrang tumah kan la hrilh lova. Kan nupa hian fa pahnih nilovin, fa pakhat chauh kan nei a ni." a ti ta mai a. Mama chuan a melh hu a, "Fa pakhat chauh a? Enge awmzia?" tiin a zawt a. "Gina-i hi...kan fa tak tak a nilo." a ti leh ta mai a, Mama chu a thawng takzet.

"Pa Ring, enge awmzia? Anih leh tu fa nge?" tiin a zawt leh nghal a. "Kan nupa hian kum 5 chhungzet fa kan nei thei der lo mai a, kan in entir pawhin kan tha ve ve bawk si. Tichuan fa nei lo ringawt a awm mai chu tiin fa kan la ta a, Gina-i hi kan fa lak chu a ni. Mahse kum reilote hnuah kan nu chu a rai leh hlauh mai a, Baby hi kan nei leh ta a ni." a ti leh a.

Mama chu a ngawi vang vanga , "Anih leh amah Gina-i hian a hria em?" tiin a han zawt a. "Amah chuan hria e, a naupan lai khan kan hrilh lawk vek alawm. MAhse tumah bulah sawi lo turin kan ti a, chuvang chuan a hrilh lo che a nih kha. Khaw dang daihah kan awm thin bawk a, hemi in kan luah kum hian Gina-i chu fa atan kan la ta a ni." tiin a chhang leh a.

*****************************

ZAn a rei tawh bawk a, damdawiin pawh a reh thiap tawh mai. Damdawiin chuan mitthi an nei ta tlat mai a, a zan a zanin a vui ta nghal a. Hospital Chaplain, Rev Vanlalnghaka chuan hun a han hmang zo va, tichuan ruang pawh an phur liam ta. Chutah meuh chuan dar 11:30 a ri tawh. Chaplain chu staff te nen chuan an titi luam a, tichuan haw leh mai a tum ta a.

Chutah a thaw a rawn hah ta thut mai, a ding chat mai a. A awm dawmin a thaw ta hrawk hrawk mai, a thingthi a, a khuh ta vak vak mai le. Chuveleh staff te leh a bul hnaia mi tlemte awm te chuan an buaipui nghal a, mahse Chaplain chu a chau tulh tulh mai. Heta Chaplain an buaipui na lai hi pawn a ni a, a bul chiah hi Gina-i te awmna ward a ni.

An thawm a rin em avang chuan Gina-i awmna wrad duty te pawh chuan an lo hre pha a, pawnah chuan an tlan chhuak ve nghal a. A buaipuitute zinga pa lian ve tak mai chuan, "ZAwn lut phawt teh ang u." a ti a, Gina-i te awmna ward-ah chuan an zawn lut ta ringawt mai. "Doctor Zuala emaw..tu emaw kha ko vat teh u." tiin nurse pakhat chu a au chel chul mai.

Gina-i te nufa pawh chu an harh ve a, tichuan Chaplain an buai pui lai chu an va en ve a. "Awi enge awmzia ni a?" Pi Marovi chuan a han ti nuah nuah a. Gina-i chuan a en vang vang a, "Ka tidam thei..ka thei ang." tiin ava pan ta nghal mai a. Chaplain chuan Gina-i chu a hmu a, a ban a va phar nghal.

Nurse pakhat chuan Gina-i a hmuh veleh chuan, "Gina..khawngaihin, kan chaplain hian thaw hah nasa lutuk a nei a. Hei a buai a, khawngaihin han khawih hram teh." tiin a ngen ta tawp a. Gina-i chu a thingthi a, Chaplain awmah chuan a kut chu a nghat a. "Lal Isua i ring em?" tiin a han zawt phawt a.

Chaplain chuan thei leh thei lo hian a lu a lo bu nghat a, tichuan Gina-i chu a maimitchhing vang vang mai. Zawi zawiin Chaplain chu a zawi tial tial a, a thaw pawh a muang tan. "Ehe, enge awmzia...hei a zawi telh telh mai." tiin nurse pakhat chu  a mangang kher mai. Chutah Chaplain, Pu Nghaka chu a rawn thaw ta hrawk mai.

Chuveleh Gina-i chu a nui sak a, "Halleluiah Amen, kan lawm e, Lalpa." a ti zawi sap a. Pu Nghaka chuan Gina-i chu a en a, ala chau deuh bawk nen engmah a sawi peih hrih lo. A thaw huai a, "Ka..ka lawm e." a ti thei tawk. Gina-i chu vantirhkoh ang mai hian a hmu eng em em a, a thianghlim sur mai.

Chutah Nui chunga Gina-i a kal chiah chu a hnungah chuan ramhuai niawm tak, dum lian em em mai leh sang em em mai hi a lo ding run mai a nih chu. Mahse midang chuan an hmu ve thei lo, Pu Nghaka chiah chuan a hmu thei a ni. Chu ramhuai chu boruakah chuan a thlawk delh delh a, Gina-i awmna lam apiangah chuan a kal ve zel mai.

Mahse Pu Nghaka chuan engmah a sawi duh lova, a thlir liam ta ringawt mai a ni. Tichuan a hranpa chuan a harh deuh hnu chuan lawmthu ava sawi tha leh a, tichuan a haw ve ta a ni. Mahse a rilru ah chuan a thil hmuh kha a awm reng a, Gina-i chuan thlarau sual a pai mek a ni tih a hrethiam nghal bawk.

**********************

Mama leh Henry-a te pawh an leng haw chu an sawi lawk ang ngeiin an inhmu a, an thil hriat te chu an inhrilh tawn a. Mama chuan Gina-i damdawiina an admit ni a, Baby nena an thil tih te chu a hrilh ta vek a. Tichuan Baby thil sawi, a mumang te chu engkim a hrilh vek bawk. Chutiang chiah chuan Henry-a pawh chuan Remkima mumang te chu a hrilh ve leh bawk a, mak an ti dun kher mai.

Mama chu a ngawi vang vang a, "Enteh bro, Remkima leh Gina-i te hi ahma daih tawh khan boruak an lo nei tawh tihna nilo maw?" a han ti a. "I mawl emai, chutiang vang ani lovang. I hriat kha, Gina-i tak tak a ni lo. Kan Gina-i hi tuna damdawiina awm, tihdamtheina nei saw a nilo." a lo ti hrep mai.

"Amak hle mai, enge thil hi awmzia ni? Ka hrethiam nei nuai lo, enge kan tih zel dawn pawh ka hrethiam tawh lo." tiin Mama chuan a lu chu a dawm vang vang a. "Anih leh...Baby nena in chet dun lai chuan i harhfim em? I mumang chu a ni ve lo tiraw?" tiin Henry-a chuan a han zawt ve leh a.

"Nilo nilo...a taksa rim pawh kha chiang takin ka hria. Amah chuan a mumang angin a hria a, mahse keichuan a tak tak a ni tih ka hre chiang. Mahse kha kha Baby diktak a ni lo bawk, a hnuah pawnah ka hmu leh tho sia." tiin a lo chhang a. Henry-a chu thil hriat chhuah nei niawm tak hian a phu zuk a, "E taka..Baby chuan th(r)i kha a awrh ve i ti tiraw?" a han ti a.

"Aw awrh ve e...a awrh atang chiah khan alawm engtik lai khan nge ka mutthulk pawh ka hrelo a ti chu." tiin a lo chhang a. Henry-a chuan a han ngaihtuah vang vang a, "A awmzia chu he witch ball hian mi pakhat chauh nilo..mi pahnih pawh a control thei tihna animaw?" a han ti a.

"A nih chu...chu..Remkima pawh a control tho a nih chu, a tluk dan pawh a hriat chian loh chu." tiin Mama chuan a lo chhang a. "Mahse Mama te chuan th(r)i hi a awrh ve hleinem, englo a niang. Baby chu Gina-i nau ania, thisen inzawm annia. Chuvang chuan Baby pawh a control ve hman zuai aniang, Father pawhin an thlahte ah chauh a thawk thei a tih kha." a lo ti ve leh a.

Chutah Mama chuan a thianpa chu a en a, "Nilo...Baby leh Gina-i hi unau diktak an ni lo." a ti ta mai a. Henry-a chuan mak a ti hle mai, "Uau diktak an nilo a? Enge i sawi awmzia?" a lo ti hu mai. "Pa Ringa'n zanin khan min hrilh a ni, Gina-i hi an fa lak a ni." tiin thudik engkim chu Mama chuan a hrilh ta vek a.

"Anih chuan engtin nge Baby-ah chuan a thawh ve theih? Remkima bik kher chu engvangin nge a tihbuai...ahma in Remkima hian a na neih vel Gina-i a tihdam tir awm i hria em?" tiin Henry-a chuan a han zawt a. "A neih ka hre lo, mahse a lo nei emaw, nei lo emaw. Remkima dinhmun chu  ahlauhawm tawh hrim hrim, enge zanin a mizia te a danglam em?" tiin a lo zawt veleh a.

"A danglamna em em pawh ka hmu lo...chuan maw thianpa, mak tih deuh pakhat ka nei bawk." Mama chuan a han ti veleh a, "Enge chu chu?" tiin a lo zawt nghal vat. "Engati nge Gina-i thiltihtheihna hi Pathian hnen atanga chhuak a nilo tih leh, amah ah diklohna kan hmuh theih bik tih hi a ni." tiin a chhang a.

"Enge awmzia? Ka la man lo.."

"Aww..ngaihtuah la. Kan thian ho hi paruk kan i a, Gina-i tello chuan panga kan ni. Kan panga zingah kan pahnih bik hian tinge thil danglam kan hmuh thin bik? Nangpawn kha pitar kha Te-i thih ni ah khan mipui karah i hmu a, Gina-i taksa meikhu dumin a hel vel lai i hmu bawk. Keiin ka mumangah kha pitar kha ka hmu ziah bawk a, mahse midang chuan engmah an hre ve lo. Enge awmzia...tinge kan pahnih kher?" a han ti nuah nuah a.

Chutih lai chuan car pakhat hi a rawn tlan a, an bulah chiah chuan a rawn ding a. Mak ti tak hian Henry-a leh Mama te thian dun chuan an lo en reng a. Motor atang chuan pa pakhat hi a rawn chhuk a, an han enchian chuan Father Adam West a lo ni reng mai. "Ehe Father, nang maw?" Henry-a chuan a ti hu mai a.

"Aw keimah...ka zawng nasa lutuk che u. Ka kal kual hnem khawp mai, mizo tawng thiam ve siloh nen, zawn hmuh in har takzet." a rawn ti a, saptawngin an inbia tih kha theihnghilh lo ila. "Engatan nge min zawn a?" tiin Mama chuan a lo zawt a. "VAwiina in haw hnu khan, ka inngaihtuah chiang a. Tanpuitu in mamawh takzet tih ka hria, zanin zan tir atang khan ka zawng nghal char char che u alawm." a han ti leh a.

"Anih chuan min pui dawn em ni?" tiin Mama bawk chuan a lo zawt leh a, "Ka pui hreh hauh lo che u, mahse hnehna kan chang angem tih erawh ka chhang thei hrih lo che u." tiin Father chuan a chhang a. "Anih chuan enge kan tih dawn? Engtin nge hma kan lak tan ang?" Henry-a chuan a lo ti ve leh a.

"Engpawh nise, ka motor chhungah sawn thu lut phawt ang u. Tichuan kan sawi dawnnia, sawi tur ka ngah lutuk." a lo ti leh a, tichuan Adam-a car chhungah chuan an inzui lut ta hlawm a. "He Witchball chungchang kha in haw hnu khan ka zir chiang leh a, FAther John-a khan sawi tel lo a nei nual a ni." a han ti a.

"Enge a dang la awm?" tiin MAma chuan a lo zawt leh vat a. "He witch ball neitu hmasa ber, Aradia-i khan a thlah kal zel ten an inrochun zel theihna turin ball kha a dawi nghal a ni. Tichuan tupawh, a thlahte zinga he ball neitu chuan tihdam theihna a nei nghal anga, mahse a tir chuan a inhrethiam mai lovang. MI pathum a tihdam hnuah chauh Aradia-i thlarau hian a neitu taksa kha a chenchilh nghal a, a awmzia chu a tihdam vawi li-na atangin thawk leh khatah Aradia-i'n a chenchilh nghal dawn tihna a nih chu." a han ti a.

Mama leh HEnry-a chu an in en a, "Anih chiah chiah mai a...a hmasa berah driver, a dawtah sava..tichuan Te-i kha a ni leh a. An pathum khan a tidam phawt a, a mizia pawh engmah ala danglam lo. A pa thaw hah a tihdam kha a vawi li-na chiah a ni a, khami zan la la khan a tawngkam leh a mizia kha a inlet thawk a ni." Mama chuan a ti nuah nuah mai.

Chuveleh Father chuan, "Ni chiah e...a awmzia chu khami zan, apa  a tihdam hnu chiah khan Gina-i kha Gina-i ni tawh lovin, Aradia a ni tawh tihna a nih chu." a lo ti ve leh a. Mama chuan a lu a dawm a, "Anih chuan..Gina-i chu a thi tawh tihna em ni?" tiin a tap titih nghal der mai. "Nilove..Gina-i chu ala awm alawm, mahse a taksa saw Aradia-i'n a hmang a ni. Mahse Gina-i diktak chu ala awm ve ngei ang, a la thi lovang." tiin Father chuan a lo chhang leh a.

"Engtin nge i hriat? Kan Gina-i tak tak zawk chu engtin nge ala dam tih i hriat theih?" tiin Henry-a chuan a lo zawt veleh a. "A chhan chu nikhawhrelovin a room ah a tlu in tia, damdawiinah in panpui nghal thu in sawi bawk. A awmzia chu Gina-i tak tak zawk khan Aradia-i thlarau hi nasa takin a bei let ve mek tihna a ni, tunah hian Gina-i chu thi tawh se chuan a taksa saw a hmang thei bik lovang. Ramhuai leh thlarau sual te reng reng hian mihring nung lai ngei taksa hi an hmang thin, mitthi tawh erawh an hmang thei bik lo." tiin a lo chhang leh a.

"Father, anih hei hi min han chhang teh. Engati nge Henry-a nen hian hetiang thil hi kan hmuh theih bik? Tinge kan thian ho panga zingah Gina-i hi a diklo a ni tih hi engtin nge kan hriat theih bik?" tiin Mama chuan a han zawt veleh a. "A chhan chu hmangaihtu diktak in nih vang a ni." tiin a chhang ta daih mai.

"Enge awmzia?" tiin Mama chuan a melh hu mai. "Samhain hi sawi tak ang khan Thihna Pathian a ni a, mahse he Celtic Thihna Pathian hian a ngamloh ber leh a hneh ve theih loh chu hmangaihna a ni. Mama..Gina-i hi i bianu a ni a, i hmangaih hle bawk ang. Chuvang chuan i hmangaihna khan Gina-i chu a veng a, vantirhkoh ten an tanpui che tihna a ni. Gina-i dinhmun chu a tha lo tih leh, he a thil tihtheina hi Pathian atanga chhuak nilovin Setana atanga chhuak zawk a ni tih a hriattir che a ni." a han ti a.

Father bawk chuan Henry-a chu a en leh a, "Nangpawh thiante hmangaih tak i ni tih tichiangtu a ni, Gina-i hi i unaunu, i farnu ang chiahin i en a. Chuvang chuan Samhain Pathian ngam loh, hmangaihna diktak chuan i thiannu dinhmun chu a hlauhawm hle a ni tih a hriattir che a ni." a han ti leh a.

"Anih leh midang te khan Gina-i hi an hmangaih ve lo tihna em ni?" Mama chuan a lo ti leh a. "Nilove....in hmangaihna kha a nasat bik vang a ni. Hamngaihna ah pawh a satliah mai mai a ni hleinem, hamngaihna leh ngaihsakna diktak chauh a ni he Thihna Pathian hian a ngam loh ni." tiin a lo hrilhfiah leh a.

MAhse Mama chuan ala hrethiam lo, "Anih chuan tinge a nu leh pate sawn an hriat veloh, keini aiin an hmangaih daih zawk ang chu..enge awmzia ni ta ang?" a han ti leh hram a. "Awmzia dang vak a awm lo, an fanu an hmangaihna aiin in pahniha in hmangaihna kha a nasa zawk tihna a nimai." tiin a lo chhang leh a.

Chuveleh Mama chuan a han ngaihtuah let a, "Nizanah ka pa in min hlap a, ka beer inna bur ruak a lo hmu fuh a." tia Gina-i'n a hrilh lai te, amah nilova a nau Baby zawk an ngaihsak zia a sawi laite chu a ngaihtuah chhuak ta zawk zawk mai. A bialnu a ni a, a lungawilohna engkim a hrilh lai te chu a ngaihtuah let a.

Anu leh paten an duat loh zia te, an ngaihsak loh zia  ahrilh lai te a, naupang chhiat vang mai mai a alo ngaihthlak liam sak mai mai laite chu a hrechhuak zawk zawk mai. Chubalah fa lak a ni tih a hre tawh a, chung atang te chuan a hriatthiam belh zel bawk. "A awmzia chu...Pu Ringa te nupa sawn an lo hmangaih ve tak tak lo tihna nimaw?" a ti ta khur khur mai.

Mahse Henry-a chuan lo hnialin, "An thiam loh a ni kher bik hleinem, an hmangaih ve thovang chu. MAhse an rila rah ngei fanu Baby an nei leh a, an duat zawk lo thei lo ta ve ang. Chubakah kan thian ho chu kan fel e m em lo tih i hriat kha, Gina-i pawh an hauh chhan leh an duat veloh chhan pawh ama thiam loh vek alawm. An chhungkua sawn mihlim, sakhaw mi tak tak vek an ni saw.." a lo ti vat a.

Mama pawh chuan pawm thlapin a lu a bu ve nghut nghut mai, "Anih chuan Father, engtin nge kan tih ang?" tiin a zawt a. Tunah chuan kan haw phawt anga, naktukah kan inhmu ho leh dawnnia. Gina-i hian eng thil nge tih a tum tih inlo enthla reng anga, lo veng tha reng ang che u." tiin a chhang a, an haw darh ta hlawm a.

****************************

A tuk zingah chuan Gina-i chu doctor chuan a rawn check leh a, "Eee..i tha tawh lutuk e. Vawiinah in haw thei nghal ang, tinge ni kan tidamtu ber a damloh ni? Hehe...vawiinah inchhuak thei ang aw.." tiin a han nui huah huah a. Gina-i te nufa pawh chu an lawm kher mai, an in en a, an nui dun var var mai.

Tichuan chhun a lo ni a, damdawiin awm man vel chu Pi Marovi chuan a han pe fel a. Reiloteah chuan Mama pawh chu a rawn thleng ve a, tichuan damdawiin atang chuan an inpu chhuak ta a. Gina-i te bul chiah a awm ve, hmeichhe naupang Nancy, ngui bura a lo ding chu Mama chuan ava en a.

Gina-i leh anu chuan Nancy nu chu an lo be mek bawk a, chutia an inthlah buai vel lai chuan Mama ngaih tha vak lo chuan Nancy chu ava pan a. "Ngati nge, Mami? I va lungawi loh hmel ve? Au Gina-i i ngai deuh ami?" tiin a han zawt fiam a. "Aw..au Gina-i pawh ka ngai a, chuan ka thiannu ber hi ka ngai a..zankhat chauh kan inkawm hman a." a ti ta mai a.

Mama chuan mak a ti kher mai, "Tunge i thiannu chu? Chuan engtia zan khat chauh maw in inkawm?" tiin a zawt a. "Nizan chauh khan kan inkawm a, au Gina-i sawn min inkawm tir char char alawm." a ti leh ta mai a. Mama chuan a hrechiang chak ta hle mai, "Tunge i thiannu chu  ahming? Eng ang tiat nge?" a han ti leh a.

"Aradia-i ania, a hming chu." a ti ta mai a, Mama chu a phu zuk mai. A thlan a tla nghal bawrh bawrh a, "Engtin nge ka hmel a awm?" a ti leh a. "Pitar ania, a pi te ang vela tar." tiin a lo chhang leh a. Mama chu a hawi kual a, "Tunah Aradia-i chu khawnge a awm?" tiin a zawt leh a. "ZAnah chauh ka hmuh theih atia..nakinah chauh kan inhmu leh dawn a, ka ngai alawm." tiin a lo chhang leh ta mai a.

"Nakinah chauh a? Chu chu engtik nge?" tiin Mama chuan a zawt leh zel a, a hlauthawng tawh khawp mai. "Kar 1 hnuah FarKhuh Tlangah tihdam rawngbawlna inkhawm ah i nu nen lo inkhawm ve ula, tah chuan kan inhmu dawnnia a ti." tiin a chhang leh ta mai a. Chutih lai chuan Nancy chu anu chuan a rawn au va, a kal ta daih mai.

Mama chuan ava zui ve lehnghal a, Nancy nu te leh Gina-i te nufa chu an lo la inbe tui nasa mai. "Awi..a ngai dawn lutuk che hi a ngui bur mai ka fanu te hi..Gina, nau awm i thiam khawp mai. Nizana i inkhualtelem pui te kha ka lo en a, midang awm ve ang maia boruak i han biak pui vel te kha. Pasal nei pawh nila, nau awm chu i harsat dawn loh kha." tiin Nancy chu a nui huah huah a.

Chumi thu a hriat meuh chuan Mama chu  anuih a za velo chiang kher mai, chutia boruak an biak vel pawh chu an ti der nilovin, Aradia-i thlarau an awmpui ve reng a ni tih chu Mama chuan a hrethiam nghal vek. Gina-i lah chu a nui sen sen reng mai a, "Hei hi mi, i thianpa chu?" tiin Nancy nu bawk chuan Mama chu a kawk a.

Lai deuh hian Nancy chuan a lu a lo bu nghat a, "Awi tlangval, innei vat rawh u. I vannei emai, Pathian malsawmna liau liau a nih hi. Pathianin a pek che a nih hi, nei ngei ngei ang che." a lo la ti zui. Za lo tak chuan Mama chu a nui a, "Hehe...nia..nia tiraw.." a ti bah nuai mai. TAxi a lo kal a. "Anih kan kal phawt mai ange." tiin an chuang ta a.

SEat hmalam ah chuan Pi MArovi chu driver bulah a chuang a, a hnung lamah chuan Mama leh Gina-i an thu thung a. "Nizanah Hospital Chaplain khan heart attack a nei thut a, a thi hman teuh ania aw...mahse kha Gina-i awmna ward bul a lo ni hlauh va, kan fanu hmangin Pathianin a tihdam leh tak kha. A lawmawm tak tak, Pathian hi chu a lo tha a ni." tiin Pi Marovi chuan a sawi ta mai a.

Mama chu a phu zuk mai, "Eng..engmaw..Chaplain maw? I tidam amaw?" tiin Gina-i chu a en hu mai. Gina-i pawh chuan Mama awmdan chu mak tih hmel tak hian a en a, "Aw..tinge, i van hlauhthawn hmel em em?" tiin a zawt a. Mahse Mama chu a inbeng dai leh vat a, "Aa..eng nilove, a lawmawm hlauh a nih chu." a lo ti leh mai a.

Gina-i chuan Mama chu a kuah a, "Ka ngai tawh lutuk che." a han ti zawi sap a. Chutah a jakcet iptea chu a dap fuh a, "Ehe..hei hi enge a, enge i ah hi?" tiin a zel nghal a. A th(r)i, kha witch ball ngei mai kha a phawrh chhuak ta a. "Ehe..awi, engtin nge hei hi i kawl daih theih a?" tiin a zawt a.

Mama chuan a chhang mai thei lo, za lo tak chuan a nui suk ringawt a. "Mawhh..ka room ah khan ka dah daih sia?" Gina-i bawk chuan a han ti leh a. "Ni e..nia, ihh..ka la alawm, nangmah pe tur chein..ka la a." a ti bah leh nuai mai. "A lawmawm anih chu...a nalh ve thlawt a ni....he th(r)i hi chu." tih pah chuan Gina-i chuan a awrh leh a.

*************************

Pu Ringa chu office ah chuan a awm mek a, a thawhpui te nen chuan meeting pawimawh tak an nei mek a. A pum a nawmloh deuh avang chuan bathroom lam a va pan a, "Nizan atang tawh khan ka pum hi  anuam thei reng reng lo mai." ti nuah nuah chung chuan a inthiar leh ta a, phone a khawih pah bawk.

Gina-i message a hmu a, "Pa, hei kan chhuak tawh e aw...ka tha e, ngaihtuahawm ka nilo. KA hmangaih che, pa." tih hi a lo ni. A nui sak a, "Pathianin a hmang tangkai che ka va lawm em , ka fanu. Khawvel lamah tlanin i kalsual dawn amaw kan ti a, heti em em a Pathian vanga i inthlak danglam hi ka lawm takzet a ni." tiin ama hriat tham lek chuan a phun mawlh mawlh mai.

Chutih lai chuan kawngka inhawng thawm hi a hria a, staff dang inthiar ve turte an nih ringin engah vak a ngai lo. Mahse chu thawm chu a mak a ti angreng hle mai, mihring pen thawm, hmanhmawh taka vei kual sek hi a ang ber. Chak tak chuan a vei kual sek ang mai hian thawm chu a nei a, a vei kual zuk zuk thla pawh kawngka hnuai atang chuan a hmu thei.

A aw a han thian kharh a, "Meeting in zo der elaw?" a han ti ringawt a, mahse chhanna a dawng lo. Chutah thla chu a en reng a, a vei rang tulh tulh mai. Chutah le, thawm chu a ring telh telh a, a vei kual mai pawh a ti tawh lo, bathroom chhungah chuan chak em em mai hian chu thawm chu a tlan kual ta chiam mai.

Pu Ringa ngaih chu a tha tawh hauh lo, "Hey..tunge ni? Ngati nge i tlan chiam mai a?" tiin a au ta vak vak ringawt mai a. MAhse thawm chu a la reh mai lo, bangah te chuan a tlan lawn niawm tak hian thawm chu a danglam reng bawk. Chutah ring tak hian, "Hey..duhtawk rawh." tiin a au vak a.

Thawm chu a reh ve mai bawk, "Tunge i nih a? I va bengchheng em em ve?" a han ti leh vak a, mahse thawm chu a reh diak mai. Angaih tha lo chu inthiar zo vatin a han insilfai a, tichuan a kekawr te chu a ha tha mawlh mawlh a. Chutah a chhuak tur chiah chu penthawm a hre leh ta, chhuak ta lo chuan thawm chu a ngaichang reng a.

PEn thawm chu a rawn hnai zel a, a awmna toilet lam chu a rawn pan ta mai. Chutah kawngka bulah tak chuan a tawp chan a, a ke pahnih thla pawh chu a hmu thei. Fimkhur tak chuan Pu Ringa chu a han kun hniam a, ke pahnih, engmah bunlo, kelawnga awm, dum vek leh bal em em mai chu a hmu ta.

Mak a ti lutuk chu tawng pawh a tawng chhuak lo, chutah engemawni tuihnang, dum nguk mai chu a ke bulah chuan a far kauh kauh bawk. Enchiang leh deuh tumin Pu Ringa chu a han kun hniam lehzual a, a chawn thleng chuan  a hmu thei ta. A chawn te pawh chu a dum chho vek a, thisen zam niawm tak hi a lang ruah bawk.

Chutah pitar lu hi a rawn tla thut mai a, a mit a lo la eng pup zui. A sam lah chu a thur bum mai a, a la rawn melh kur leh ta nghal a. Pu Ringa hlau lutuk chu  a au vak a, bang kilah chuan a tawlh phei nghal. A thin a phu dup dup mai a, tawng ngaihna pawh a hre lo. A hlauh em avang chuan a ngawi reng a, a chhuak ngam lawk lo bawk.

Mahse thla pawh chu  abo daih a, bathroom chhung pawh chu a reh diak mai. Minute 1 vel chu ngawi reng chuan a ding a, a tawp a tawpah chuan kawngka chu rawn ri rakin, mipa titi thawm a hre ta. A thaw huai mai, bathroom atang chuan a chhuak vat a. A thawpuite pahnih an lo ni a, a lawm kher mai.

A thawnpuite chuan an lo hmu a, "Ehe..i va bei rei ve..meeting kan zo daih tawh ania. "E..aw a nih chu." tiin Pu Ringa chuan a lo chhang mai a, bathroom te chu a han melh kual a. "Enge i zawn a? Tihbo i nei em ni?" tiin pakhat zawk chuan a lo zawt leh a. "Engmah nei hran love." tiin a chhuak ta daih a.

**********************

TO BE CONTINUE