BEAUTIFUL NIGHTMARE (MIZO FICTION FANTASY STORY) [Inspired by SuperMe] Written by : Aaron Malsawmdawngzuala CHAPTER - 4 (LAST)

 BEAUTIFUL NIGHTMARE

(MIZO FICTION FANTASY STORY)

[Inspired by SuperMe]

Written by : Aaron Malsawmdawngzuala

CHAPTER - 4

(LAST)

************************

Zan khat chu Rsa chuan mumang a nei leh a, pawisa hlira khat hnuk mai, room chhung ni awm takah chuan a lo awm a. Bangah te, chhuatah te leh inchung ceiling ah te thleng chuan pawisa chu a khat hnuk mai. A han hawi kual vel a, "ZAnin chu ka va hlawk dawn em." tiin a khi vur vur a.

Chutih lai tak chuan bang chu a rawn keh hawk mai a, apa chu a rawn lang leh ta. Base-ball bat, rangkachak hlanga siam hi a hum bawk. Tichuan Rsa chu rawn vuak tumin a rawn pan a, a vuak thelh zel a. Pawisa chu room chhungah chuan a leng chuai chuai mai, bag ah chuan a tlanchhiat pah chuan pawisa chu a khung zel a.

Cheng 2000 tlang hlir a ni bawk a, vawikhatah clip 5 te chu a hui lut a. A khat ta maw tih ah chuan, "Ka mumang mai..." a sawi zo hman lo. A hnarah chuan chiang em em hian apa chuan a rawn hlap a, a thal tawp mai. A mumang chu ala zo lo, a hnar chu a thi zawih zawih mai. Apa chu khawih let ve ta se, enge thleng ang tih a hre chak ta tlat mai.

Rang takin a tho va, apa chuan rawn vuak leh a tum a. Mahse awlsam tak hian a lo bun a, apa hmaiah chuan a hnek ve ta siah mai. Apa chu a ral riai riai a, amah pawh chu a harh chawpchilh ve leh nghal bawk. A khum bula bag puar luah mai chu a han en vang vang a, hlim tih hriat tak chuan a khi sak mai.

*************************

Rangkachak leh lunghlu hrang hrang, man to tak tak te chu ramdangah thawn thla in Thailand ah te, China ah te leh Japan thlengin online-in a zuar kual a. Reiloteah phei chuan thawh pui duh tu te pawh an awm ta hial mai, mahse fing inti tak chuan  ahnar zel a. Lydia-i pawh a rawn let leh a, Mizorama a inluah ah chuan a awmpuinu ni turin a thawk ve leh ta a.

A ni tel mai chuan an inngaina telh telh a, induhna a awm ve zel bawk. Lydia-i pawh chuan a ngaizawng tan ta em em a, mahse a zah em avang leh an dinhmun a inthlauh em avang chuan a rilru diktak chu ala hrilh ngam bik lo. Rsa lah chuan a hnathawk midangte ai chuan a duhsak bik em em a, restaurant-a a thawh ve pawh a phal lo.

Zan khat chu Rsa chuan an restaurant chak tak maia a hlawk ta thur thur mai chu lawm a duh a, a flat ruak pakhatah chuan party a huaihawt ta a. Staff ho mai nilovin a thiante dang, hnamdang ho te pawh a sawm nual mai. Nuam tak chuan an lam suau suau a, Rsa chu duh aiin a rui ta tlat mai.

Party a zawh meuh chuan kal pawh a kal hleithei tawh lova, staff thenkhatte leh a bodyguard te chuan a in thleng chu an thlah haw a. "Heta tang hi chuan keiman ka buaipui tawh mai ang." tiin Lydia-i chuan inchhungah chuan a kuah lut a, RSa chu a zai nasa mai. A room an thleng a, Lydia-i chuan khumah chuan a mut tir a.

Chhuah a tum chuan chu Rsa chuan a banah a vuan a, "Lo la awm ve hrih rawh, ka ngai che alawm." a ti ta tlat mai. "RS, i rui lutuk a nih kha. Mu hahdam la, naktuk zingah hna thawh i ngai awm sia...ka kal zawk ange." tiin Lydia-i chuan kal a han tum leh a. MAhse Rsa chuan na deuh tak hian a pawt vaka, khumah chuan a pawt thu a.

Rsa chu a bawh thut mai, hnai tak chuan an in en a. Zawi sap hian Rsa chuan, "Ka duh zia che hi i hria tiraw?" tiin a han zawt a. "Kei..keimah maw? Min duh maw?" a lo ti hu mai. "Aw ni e, ka hmuh tirh atang che khan ka duh tawh che." tiin a chhang leh a. An ngawi dun vang vang a, "Min duh ve lo em ni?" tiin Rsa bawk chuan a zawt leh a.

Inthlahrung tak hian Lydia-i chuan, "Ka duh che alawm, mahse kan dinhmun a inthlau emai." tiin a chhang a. Rsa chuan a biangah chuan a vuan a, dim tak chuan a kiss a. Lydia-i pawh a tang rei lo kher mai, a lo chhanglet vat a. Mahse engmah an kal thui thei ta lo, Rsa rui lutuk chu a chatthla daih mai.

Lydia-i pawh a nui suk ringawt a, a rilru tak chuan a lawm kher mai. A chhan pawh Rsa chu a lo hmangaih ve daih tawh vang a ni, a thil tih sak zozai te a ngaihtuah let phei chuan phu lo a inti ngawih ngawih zawk ta ve ang. Rsa muhil lai chu puan a sin that tir a, tichuan a chhuahsan ve leh ta a ni.

************************

Chumi zan chuan Rsa chuan mumang a nei leh ta a, a awmna hmun chu mak a ti kher mai. Building tiat dawn dawn rangkachak tamtak, bengbeh, thi leh zungbun te, tam tak lo inchherchhuan luah mai hi an lo ding fur hlawm mai. A reh em em lehnghal a, tichuan apa chu a zawng leh tan ta.

A han hawi kual a, mahse rei fe a zawn hnu pawh chuan a hmu der lo mai. A lo lang dawn lo amaw tiin rangkachak ho chu a rut khawm leh tan ta a, mahse mihring thaw ri hrawk hrawk hi a hre ta tlat mai. Rangka chak inchherchhuan hnungah chuan apa, Pu Rova chu a lo thu ngui bur mai a.

Rsa chuan mak a ti angreng hle mai, zawimuang chuan ava pan a. Mahse apa chu a che eih lo, a melh ngai melh reng chung chuan a thu ngawi reng a. VAse pakhat mawi em em mai, man to hmel em em mai hi a lo pawm bawk. Rsa chu ava kal hnai a, thawm te a han siam lui thul. Mahse apa chu ala thu ngawi reng a, tawng pawh a tawng chhuak lo.

Rsa chu apa hmaah chuan a thingthi a, vase chu a vuan a. Chutah apa chuan a thlah a, Rsa hmai chu a kut chuan a chul a. A chulna lai chu a duk tluk mai, Rsa mak ti lutuk chuan a en reng a. A tih ngaihna hrelo chuan, "Ka mumang mai mai a ni." tiin a phun sap a. Chuveleh apa chu a ral riai riai a, a harh leh ta.

Khum atang chuan a tho chhuak a, vase pawh chu a khum bulah chuan a lo intung a. A hmai chu a pilh ang tlat hian a hria a, a khawih chhin pawn a thip thei tlat. Rang takin bathroom ah chuan a talan lut a, a mumanga apa in a khawina lai chiah maiah chuan kang ser niawm tak hi a lo awm ruah mai.

**********************

Vase chu a han en vang vang a, chutia apa berin a lo pawm ran mai a ngaihtuah chuan a man pawh to tur tak a ni. Tichuan internet ah te chuan vase man to ho chu a enkual a, a zawn a zawn hnuah chuan a vase ang chiah chu a hmu ta. Kum 1735-1796 inkara siam, US Dollar Million 80.2 laia to, Pinner Qing Dynasty Vase a lo ni reng mai.

Chutiang khawpa thil man to a han nei ta mai chu a lawm hle a, hralh pawh hralh phal ta lo chuan rangkachak hrang hrang a dahkhawmna hmun, a secret room ah chuan glass box chhungah a dahtha ta a. Tichuan a restaurant chu a ni telin a hlawk zel bawk a, a inluah pawh chu a chei tha zel bawk.

Lydia-i nen pawh chuan a tawp a tawpah chuan an inngaizawng ta a, Lydia-i pawh a nupui angin a awm tawp tawh. A hausakna chuan tawp chin nei hek lo le, a nitel chuan sum a ngah belh zel a. A chang phei chuan mumang a neih pawhin engmah a la duh lo vel ngei zel a, engkim mai chu hlimna hlir a ni tawh.

Mahse Lydia-i erawh chuan chutin a sum chu a hmansak vak vak duh bik hauh lo thung, Rsa lak atanga a inhlawhna sum tho chu a hmang a. Mahse Rsa chuan nitin mai chuan thil thar a leisak reng a, a duh apiang a tihsak thin bawk. Lydia-i nu pawh a dam chho zel a, damdawiin atang pawh chuan chhuah tir a ni hial tawh.

********************

VAwikhat chu Lydia-i a chhuak a, inah chuan Rsa chauh chu a awm a. Lydia-i nen hun thawl zawk an neih theih nan tiin a hnathawk te pawh chawlh a pe vek a, chhun a lo nih chuan inleng a nei ta tlat mai. VAi hlir hi an lo ni a, sumdawn puiah an rawn sawm a. Mumbai lam atanga lo kal an nih thute chu an hrilh a, an company tana a thawh chuan company share pawh 20% lai a chan tur thu an hrilh bawk.

Mahse Rsa chuan hnialin, "Ka ti lo mai ange..keima tawkah ka buai emai." tiin a lo hnar a. Chung vai ho chuan coat suit an ha vek a, panga vel an ni bawk. Chutah an boss ber niawm tak chu a thinrim ta tlat mai, "Engvangin nge min pawmsak ve mai loh a, iva chapo ve.." a ti ta hrep mai.

Rsa thin chu a khei zak mai, "Engmaw i sawi a? Ka duhlo a, ka hnial che a nimai." tiin a vin let ve hrep mai. Chutah midang pali te chuan an manbet ta mai a, an zinga lukhawlhpa chuan a pumah a hnek ta siah siah mai. A security guard te a lo haw tir vek bawk si, Rsa chuan chhan tu reng a nei lo.

"Tute nge maw in nih le? Enge in hriat a...chhuak vat rawh u." tiin a vin vak vak hlawm a, mahse vai ho chuan an sawisak rawn ta hrep mai. Chutah inchhungah chuan vai pahnih tho an rawn lut leh a, Rsa'n an hmel a han hmu chiah chu a meng biak kawk kawk mai. Chumite pahnih chu a mumanga mi, Rohit-a leh Ajat-a te an ni.

Ajay-a zawk chuan chiang tak hian Rsa chu a en a, "Khawnge ka pawisa a awm?" a ti ta chhur chhur mai. Hlau rilru tak chung chuan, "Eng pawisa maw? KA hre ngai lo che." a lo ti khur dar dar a. Chutah a dulah chuan Ajay-a chuan a hnek leh siah mai, "Ka room ah khan khami zan khan engtin nge ilo luh theih? Tu tana thawk nge i nih sawi rawh." tiin a vin leh hrep a.

"Ka pe ang che...ka pe ang che tunah..." tiin Rsa chu a thaw hrawk hrawk mai. Ajay-a chu a ngawi vang vang a, "Naute u, thlah rawh u." a han ti vak a, midang chuan an thlah ta a. Ajay-a bawk chuan, "Cheng nuai 100 a ni a, nuai sawmnga ve ve in a cash in suitcase ah khan a inthen hrang thlap. Nang hian a pahnihin i ru a, ka zawn nasat zia che hi i hria em?" tiin a vin leh vak vak a.

"Cheng nuai 100 min pe tling lo anih chuan he i inchhung ngeiah hian kan that ang che, tuman an hre dawn lo ania." tiin Rohit-a pawh chuan a lo vau ve bawk a. Rsa chuan a pum a dawm vang vang a, "PAwisa ka dahna save ah sawn ka va la ang, ka tlan chhe lovang, min ring rawh u." a han ti a.

Tichuan pawisa a dahna lam pan chuan a kal a, vaiho chuan an zui zel bawk. Tichuan safe chu a hawng a, pawisa tam tak chu suitcase ruakah chuan dahin a chhiar kauh kauh va, chuveleh Ajay-a chu rawn lutin Rsa chu a nam sawn dawr mai. Safe chhunga pawisa zawng zawng chu a la chhuak vek a, suitcase ah chuan a dah vek mai a, suitcase lian chi paruk lai mai chu a khat tan mai.

Rohit-a chuan inchhung chu a han enkual a, "Hetiang khawpa in tha nei thei chu kha aia tam pawh kha pawisa ila nei dawn tih ka chiang, khawiah nge i dah sawi vat rawh." a lo ti ve leh a. "Ka pawisa dahthat zawng zawng inla zo vek tawh, abak ka nei tawh lo." tiin Rsa chuan a lo chhang a.

Chutih lai chuan an zinga pakhat chuan, "Sir..in lam panin hmeichhe pakhat a lo phei mek ania." a rawn ti a, Rsa chuan Lydia-i a ni tih a hrethiam nghal. Ajay-a chu a nui var var a, "I nupui a ni ngei ang maw?" tiin Rsa chu a en a. Rsa chu a mangang kher mai, "Nilo...engtin mah ti suh u. Ka pek belh ang che u, in duh zah zah ka pe ang che u." a ti nghal lawm lawm mai.

Rohit-a chu kawngka bulah chuan ava ding a, chutih lai chuan bang phenah Rsa chu hnukin an bihruk pui a, a hmui an tuam sak bawk. Lydia-i chu a lo lut a, chuveleh a hnung lam atang chuan Rohit-a chuan a chhu pawp mai. Lydia-i chu nikhawhrelovin a let nghal der mai a, thutthlengah chuan an mut tir a.

Ajay-a chuan Rsa hmui an tuamna chu a phelh a, "Le..pawisa chu min pek belh rawh le.." a ti leh ta a. Rsa chuan a pawisa inchhunga a dahthat bik ho chu a phawrh vek a, a vaiin cheng nuai 10 vel chu a cash in a phawrh belh leh ta mai a. Chutiang em em a pawisa a nghah mai chu Ajay-a te thiandun chuan mak an ti kher mai.

"Kha zawng kha ka pawisa chu a ni e, khawngaihin min kalsan tawh rawh u. Engmah ka sawi lovang, tihian a tawp nghal a nimai." Rsa chuan a han ti leh a. Mahse Ajay-a duhamna chu a zual ta sauh mai, "Ni mai love...engemaw tal chu ila kawl a ni tih ka chiang." a ti leh ta tlat mai. "Engmah ka kawl tawh lo, min ring rawh." a ti leh lawm lawm a.

Chutah Ajay-a chu  a ding a, "Naute u, a inchhung zawng zawng hi dap rawh u. Thil hlu leh man ti tura inhriat kha chu la vek ang che u, pawisa dang a la awm a nih phei chuan dawt min hrilh tihna ania, i chak lo khawp ang." a ti leh ta mai a. Tichuan a in chu an dap leh ta, a thil neih hlu tak tak te chu an laksak zel a.

A hnu deuh ah chuan an zinga pakhat chuan, "Sir..heta hi room hawn theih loh a awm, password a ngai." a rawn ti lauh lauh mai. Chutah le, Ajay-a chuan Lydia-i mu lai chu chemte chuan a tin ta mai a. "PAssword saw min hrilh dawn nge....i nupui hi ka that dawn?" tiin a vau leh ta mai a. Rsa chu a mangang khre mai, "Eng thil hlu mah a awm lo, room satliah mai chauh a nih saw." a han ti a.

MAhse Ajay-a chuan a awih tlat lo, "Room satliah mai mai nise, password te i dah thlap lovang. Sawi rawh, a nihloh chuan ka vithlum dawn nia." tiin a vau leh a. "Khawngaihin ti suh, khawngaihin...ka neih zawng zawng in lak tawh kha. Duhtawk tawh rawh u, ka sawi lovang...ka sawi chhuak lovang." tiin a ngen leh lawm lawm a.

Ajay-a thin in a tuar ta lo, Lydia-i kawr hak lai chu chemte chuan a zai t(r)et tan ta. "Nilo...ti suh, khawih suh..khawngaihin." tiin Rsa chu a au vak vak a, mahse Ajay-a chuan a zai thler belh zel mai. Chumi pah chuan, "PAssword i sawi hunah chauh ka tawp ang, anih loh chuan a thawmhnaw chauh nilo, a vun pawh ka zai thler ang." tiin a vau chhunzawm leh a.

"Chumai ni nang, kan vai hian a mal te te in kan pawngsual bawk ang." Rohit-a chuan a lo ti ve bawk a, Rsa chu a mangang kher mai. Lydia-i a ngaihtuah em avang chuan password chu a hrilh ta a, tichuan a secret room ah chuan an lut ta. A zau em em a, Jewelry Store ang mai a ni. Rangkachak leh lunghlu tam tak, man to tak tak mai chu a lo inhung fur hlawm mai a.

Ajay-a leh Rohit-a te thiandun chuan hmuhnawm an ti dun ngang mai, chutah Ajay-a zawk chuan VAse chu ava hmu ve ta. Ava pan a, "Ehe..hei chu...Pinner Qing Dynasty Vase anih hi." tiin a au chel chul mai. Rohit-a chuan mak ti tak hian, "Engtin nge hetah a awm theih? US Dollar Million 80 chuang daih asin." a lo ti ve hu bawk.

Ajay-a chuan Rsa chu a kawr awmah a tham a, "HEng zawng zawng hi engtin nge i neih theih?" tiin a zawt a. RSa chuan chhan mai ngaihna pawh a hre lo, "Ka nei a ni tawp mai." tih ringawt chuan a chhang a. Chutah Ajay-a chuan a beng leh siah siah mai a, "Smugling i ti em ni? Nge mi thil i ru kual zawk?" tiin a zawt leh a.

Mahse Rsa chuan a chhang duh thak lo, a ngawi ngul mai. An han sawisak rawn leh deuh chiam hlawm a, mahse engmah ala sawi duh chuang lo. "In duh leh la vek rawh u...khawngaihin min chhuahsan hram teh u." tiin Rsa chuan a ngen leh a, mahse Ajay-a ber chuan a zawhna chu chhanna a hre chak tlat.

*********************************

Chutih lai chuan Lydia-i pawh chu a rawn harh a, Rsa secret room-a thawm chu a hre ta a. Rang takin a bag a silai lem, inven nan a siam, rubber bullet hmang pistol chu a phawrh a, Rsa pek a ni. Tichuan fimkhur tak chuan secret room lam chu ava pan a, kawngka atang chuan a han bih dek dek a.

Ajay-a'n Rsa a lo sawisa lai a hmu chiah chu a phu zawk mai, "Hey..duhtawk rawh." tiin silai chuan ava tin a. Chuveleh Rsa chuan, "Nilo Lydia...tlanchhe rawh. Lo kal hnai suh, tlanchhe rawh." tiin a au vak vak mai. Ajay-a chuan, "Khanu kha man rawh u." a ti nghal a, midang panga chuan man an tum a.

Mahse a lo kap thal tawp tawp hlawm mai, a chhan chu rubber bullets force nat em vang a ni. Ajay-a chu a mangang hman tep a, mahse a naute ho a en chuan engmah thisen a awm silova, rubber bullet, chhuata lo tla a hmuh chuan silai lem a ni tih a hrethiam nghal. "Rihit, rubber bullet a nih saw...va man rawh." a han ti leh vak a.

Rohit-a chuan va man tumin ava tlan phei a, mahse a mitah tak a lo kap leh a. A thal tawp mai, Ajay-a chuan thinrim tak hian, "Va han nep hlawm tak." tih pah chuan ava kal ve leh a. Lydia-i chuan lo kah leh a tum a, mahse a mu a zo ta tlat mai. Ajay-a chuan a rek a, chhuatah chuan a paih ri thlawp mai.

Lydia-i chuan a hnar a sawh a, a thi zawih zawih mai. Rsa chu a thinrim ta kher mai, a ding a. A  khur chur chhur a, Ajay-a chuan ava en a. "I ding ve ngam khanglang amaw? VE lutuk che chuan..." tih pah chuan ava pan a, a tlawh thal tawp mai. Mahse lehlam a hawi leh chu Rsa tho chu a lo awm leh a, a hma zawn chu a en leh a, Rsa chu a lo la tlu reng bawk si.

A awmzia chu chumi room chhungah chuan RSa pahnih an awm tihna  anih chu, a tlu lo zawk, a ding zawk erawh kawr phelhin a awm thung. Chutih lai chuan vai dang ho chu an rawn tho leh hlawm a, chutia Rsa ang chiah chiah lo awm ve thut an hmuh chuan mak an ti kher mai. Rsa dik tak zawk chu chhuata let reng zawk chu a ni a, chutia amah ang chiah a hmu thut pawh chu mak a ti ve hle bawk.

Chutah Rsa duplicate zawk chu a khur cher cher a, a taksa chu a rawn puam tual tual mai. Muangchang chuan hmul a rawn ngah tulh tulh bawk a, a lian tulh tulh bawk. Vai ho chuan hlau tak hian an en thap a, chutah Rsa duplicate zawk chu Pu Rova, Rsa pa ah a rawn chang ta daih mai.

A lian em em a, ft 12 dawn laia sang a ni. Ajay-a chuan a hlau kher mai, tlanchhiat a tum a. MAhse rang takin Pu Rova chuan a man a, bangah chuan a rek bet ta mai. Chuveleh midang ho chuan an rawn bei ve a, mahse a mal te te chuan a lo theh leng lawp lawp mai. Chutia an insual buai lai chuan RSa tak tak zawk chuan Lydia-i chu ava en a, nikhawrhelo chuan a lo la let reng a.

"Lydia..Lydia..nilo." tiin ava pan a, a hnar thi te chu a hruk sak a. A sawi vak vak a, "Tho rawh Lydia..tho hram teh." tiin a be mawlh mawlh a, mahse Lydia-i chu a che eih lo. Pu Rova chuan Ajay-a chu a rek kang a, khawia tanga lo chhuak nge pawh hriat loh chuan a kutah chuan chemte a lo hum reng mai.

VAwi 5 vel chu dim baksak lo chuan Ajay-a dulah chuan a vit ta siah siah mai a, bang den nan a hmang zui a, Ajay-a chu a thi chiang kher mai. Tichuan Rohit-a lam chu ava hawi leh a, Rohit-a chuan tlanchhiat pah chuan rangkachak tlang leh thil hlu dang, a hmuh hmasak apiang chuan a vawm vak vak a.

Vawm fuh mahse Pu Rova chuan na ti awm ang pawhin a lang lo, Rohit-a chu a um zel a. Chutah a man ta, a ke ah chuan nghet taka vuanin chhuatah chuan a vaw tak vak vak mai a, Rohit-a pawh a thi chiang kher mai. Chutah midang panga te chu a mal te te in a that leh bawk a, an thi fai ta vek mai.

Tichuan muang chang chuan Pu Rova chuan Rsa chu a rawn en a, zawimuang chuan a pan phei a. Rsa chuan Lydia-i chu nghet takin a kuah a, apa lo kal phei chu a lo en reng ringawt. Chutah Pu Rova chemte ken lai chu amahin a rawn sei zel a, ngunhnam nalh tak, hriam tak maiah a rawn chang leh daih mai.

Rsa leh Lydia-i te hmaah tak chuan a ding a, "Thatchhepa..tunah chuan i thih a hun ta tak tak e." a ti thum chhur chhur mai. A ngunhnam chu a lek kang a, Rsa chu sah a tum ta. Mittui tla hluam chung leh Lydia-i kuah reng chung chuan apa chu a melh chho vang vang a, "Ka mumang mai mai a ni." a ti zawi sap a.

Chuveleh Pu Rova chu a ral leh ta riai riai mai a, room chhunga rangkachak zawng zawng leh thil hlu dang zawng zawng pawh chu muang chang chuan an ral riai riai hlawm mai. Rsa chuan mak a ti em em a, a hawi kual hu ringawt mai. Chutah engkim mai chu a ral vek a, Rsa awmna chu a thim tak hmuk mai le.

***************************

Rsa chu a harh leh a, a awmna hmun a han en chuan chhum hlir hi a lo awm a. Khawiah tak nge a awm pawh a hre thei lo, a hmuh chin chu chhum zing vek a ni. A bulah chuan Lydia-i a awm velo tih a hre nghal a, "Lydia..Lydia..nilo, khawnge i awm?" tiin a au vak vak a. Mahse a reh diak mai, a han tlan kual vak a.

Mahse kawng engmah a hmu thei lo, chhum zing hlir bak engmah a hmu thei lo. A mangang em em a, "Khawnge ka awm? Enge awmzia? Enge ka chungah thleng?" tiin a inbe mawlh mawlh a. Chutia hrilhhai taka a awm lo chuan a hnunglam atang chuan, "Chhuak rawh...tunah chhuak nghal rawh." tia rawn vin vak vak ri hi a hria a.

A han hawi phei chuan a bialnu hlui, Preeti a lo ni reng mai. Chutah a awmna hmun chu a han en a, Preeti apartment a lo ni. A hrethiam lo kher mai, Preeti lah chu a thinrim em em mai lehnghal. "Ka sum i ring char char a, ka awmloh hlanin tihian ka inah ngei, ka khumah ngei KS ilo mutpui thin amaw?" tiin a lo vin hrep hrep mai.

Rsa chuan an awmdan leh Preeti tawngkam te chu a han ngaihtuah chian chuan hun kal tawh ah a let leh tih a hrethiam ta a, Preeti'n KS laka a man chhuah ni chiah chiah ah a let leh tihna a nih chu. Preeti bawk chuan pawisa phawrhin Rsa chu a pe a, "Kha...khami hmang khan Mizoramah haw la, min rawn be tawh suh ang che." a ti leh khur khur a.

Rsa chuan ngawi reng chuan pawisa chu ala a, a chhuak ta a. Thil awmzia a hre ta ruai ruai a, a tak ngeiah apa thlarau chu rawn inlanin, a tak ngeiah a mumang mai mai a nih thu a sawi takah chuan a mumanga a pa a hmuh tan hma, Preeti'n a hnawhchhuah lai hunah a let leh phah tih a inhrethiam ta.

A hlawhthlinna zozai te, a pawisa tam tham tak, a sumdawnna te, a thil hlu neih zawng zawngte chu a chan ta vek tih a hriat chuan a ui em em mai a, a mittui at tla nghal zawih zawih mai. A inchum a, a au vak vak a. Khawlaiah chuan a thinrimna chu a hrithla chiam mai a, lei te chu a pet vak vak bawk.

Chutah Lydia-i a hrechhuak thut mai, rang takin ke chuan Lydia-i dawr nghah thinna lam pan chuan a tlan ta ngat ngat a. A thleng chiah chu a hah hle mai a, a thlan pawh a tla zawih zawih mai. Thaw hawm hawm chung chuan ava hawi phei a, Lydia-i'n customer te nui sen sen chunga a lo bia a hmuh chuan a thaw huai mai.

Rang takin ava pan a, "Lydia.." ava ti ringawt a. Lydia-i chuan hriatthiam loh hmel tak hian a lo en hu mai a, "Ehe...tunge i nih? Engtin nge ka hming i hriat?" tiin anmahni khasi tawng chuan a lo bia a. Lydia-i chuan Rsa chu a hre ve ta hauh lo, lungchhe tak chuan Rsa chuan chhang lovin a kalsan leh ta ringawt mai.

Tichuan a inngaihtuah a, a hma a rethei taka a nun a hman te, a mumang zawng zawngte leh a thil tawn zawng zawng te chu a ngaihtuah let a. Tichuan rilru a siam fel ta, Mizoram lama haw a, a nu bulah ngaihdam dil mai chu tha zawkin a hre ta a. A pawisa neih ang ang chuan retheihna a hmachhawn leh hmain Guwahati chu a chhuahsan ta a ni.

*****************************

AFTER ONE YEAR

"Bawiha, naktuk zingah maw i chhuah dawn a?" tiin Rsa nu chuan Rsa chu a han zawt a. "Aw...chuan kar khat vel ka cham angai bawk ang." tiin a lo chhang a. Rsa nu, Pi Duhi chuan a fapa chu a han en vang vang a, "Nang hi...kha vainu Preeti bawk kha zu hmuh leh i tum a nilo maw?" tiin a han fiam zauh va.

Rsa chu a khi suk a, "A teuh lo mai, ka nu. Ka danglam tawh tih i hriat kha, i monu tur ka rawn hawn maithei ania." tiin a han fiamthu ve a, an nufa chuan an nui dun hak hak mai. "Anih chuan ka mutsan ang che aw...i dawr kha chu ngaihtuah suh, ka awm alawm." tiin a nu chuan a mutsan ta a.

Tichuan Rsa pawh chu a room ah a kal a, banga apa, Pu Rova thlalak chu a han en vang vang a. A kal hnai a, "Ka lawm e, ka pa. Nang hian thil tamtak min zirtir asin, i thu ka lo awihlo kha ka inchhir khawp mai. Tunah chuan ka danglam tawh, ka lawm e, pa zawng zawngah chuan pa tha ber i ni." tiin a nuih sak a, tichuan a muhil zui veleh ta a.

************************

A tuk zingah chuan a inpack mawlh mawlh a, a car man tlawm te, a thawh chhuah liau liau va a lei ah chuan a bungrua te chu a han dah a, tichuan a chhuak ta a. Sum thawk chhuak tura beih nasat a ngaih zia te, hlawhtling tura a beidawn lek lek fo thinte chu a ngaihtuah let nauh nauh va. A mumang atanga a hlawhtlinnate chu ui chang la nei thin mahse, a harh chhuak leh thei ta erawh a lawm viau thung.

Tichuan airport lam a pan hma chuan kawng kawi pakhat ah chuan a peng a, restaurant lian lemlo tak bulah chuan a motor chu a han ti ding a. A car atang chuan a chhuak a, restaurant chu a han en vang vang a. A chunga BEAUTIFUL NIGHTMARE tih inziak chu en in a nui sak a, tichuan a hmangaih ber, Lydia-i zawng tur chuan Guwahati lamah chhuk turin a tlan liam leh ta a ni.

******************************

A TAWP TA